კორინთელეფშა მეჭარილ პირველ წერილ 12:1-31
12 ჯიმალეფ, ვა მოკო, წმინდა შურიშ* ძღვინიშ გურშენ რჩქინა ვაიღუდან.
2 თქვა გიჩქუნა, ნამდა ონდო მორწმუნეეფო გინირთუდით, ღორებულ რდითჷ, მუშენდა რაგად ვეშულებუდუნ ფერ კერპეფს ცენდით თაყვანს დო თინეფს ირფელს დოჸუნდით.
3 მარა ასე მოკო, გიჩქუდან, ნამდა მიდგას ღორონთიშ წმინდა შურ ხელმძღვანელენს, ვა თქუანს, ჭყელ ჸოფედასია იესო, დო ვართ წმინდა შურიშ უმშო არაგადე მითინს, უფალ რენია იესო.
4 ძღვინ შხვადოშხვა რე, მარა ართ რე წმინდა შურ, სოვრეშეთ თე შხვადოშხვა ძღვინ მოურს;
5 მსახურება ხოლო შხვადოშხვანერ რე, მარა უფალ ართ რე, მიდგას ვომსახურუთ;
6 წმინდა შურ შხვადოშხვა მუდგარენს ოკეთებაფუანს ხალხის, მარა ართ რე ღორონთ, მით ძალას ირზენს თე ირფელიშ ოკეთებელო.
7 არგამათ იძირე, მუს ოკეთებაფუანს თინეფს წმინდა შურ; თის ღორონთ შხვეფიშ საჯგირობუოთ არზენს თითოეულს.
8 წმინდა შურ ნამთინეს ჭკვერულო რაგადიშ ძღვინს არზენს, ნამთინეს — რჩქინათ რაგადიშ ძღვინს,
9 ნამთინეს რწმენას არზენს, ნამთინეს — სქილიდაფაშ ძღვინს,
10 ნამთინეს — სარკო საქმეეფიშ კეთებაშ ძღვინს, ნამთინეს — წინასწარმეტყველებაშ ძღვინს, ნამთინეს — თიშ გარჩიებაშ ძღვინს, ღორონთშე ქორე დო ვარ მუდგარენ გურაფა, ნამთინეს — შხვადოშხვა ნინაშა რაგადიშ ძღვინს დო ნამთინეს — შხვადოშხვა ნინაშე თარგმნუაშ ძღვინს.
11 მარა თე ირფელ წმინდა შურიშ საშვალებათ იკეთებ. თითოეულს ღორონთიშ წმინდა შურით ერზიებ ძღვინ.
12 სხეულ ართ რე, მარა შხვადოშხვა ნაწილ უღჷ, დო თე ნაწილეფ თი ართ სხეულს ოკუთვნ, თაშ რე ქრისტეშ სხეულ* ხოლო.
13 ჩქი არძაქ ართ შურით იმნათით, ნამდა ართ სხეულ პჸოფედითკო. ვა უღჷ მნიშვნელობა იუდეველ ვორეთ დოვარ ბერძენ, მონა ვორეთ დოვარ თავისფალ, არძაქ ართ შურ მიბღით.
14 სხეულს ხვალე ართ ვარინ, ბრელ ნაწილ უღჷ.
15 კუჩხიქ ქოთქუას, ხე ვა ვორექ დო ათეშენ სხეულიშ ნაწილ ვა ვორექიან, თეშ გურშენ დასურო ვეჸუაფუნო თინა სხეულიშ ნაწილ?!
16 ვარდა ჸუჯიქ ქოთქუას, მა თოლ ვა ვორექ, ათეშენ სხეულიშ ნაწილ ვა ვორექია, დასურო ვეჸუაფუნო თინა სხეულიშ ნაწილ?!
17 მთელ სხეულ თოლ ქორდასინ, მუჭო გეგონენდჷ კოჩ მუთუნს?! ვარდა მთელ სხეულ ჸუჯ ქორდასინ, მუჭო იგინანდჷ კოჩ მუთუნიშ შურს?!
18 მარა ღორონთიქ სხეულიშ ნაწილეფს მუშ-მუშ ადგილ ქიმურჩქინ თეშ, მუჭოთ მუს ოკოდ.
19 სხეულიშ არძა ნაწილ ართ დო იგივე ქორდასინ, მუჭო იჸუაფუდ თინა სხეულ?!
20 სხეულ ართ რე, მარა თის ბრელ ნაწილ უღჷ.
21 თოლს ხეშა ვარაგადე, ვა მოსაჭირუქია, ვართ დუდის არაგადე კუჩხშა, ვა მოსაჭირუქია.
22 სინამდვილეს სხეულიშ თი ნაწილეფ ხოლო საჭირო რე, ნამუთ ნაკლებო მნიშვნელოვანო რე მერჩქინელ,
23 დო სხეულიშ თი ნაწილეფს, ნამდგაშა ნაკლებ პატი გემძუნა, ჯგირო მიკვოჯინეთ; თაშ ნამდა, ნაკლებო პატიგედვალირ ნაწილეფს უმოს პატის ფცენთჷ,
24 მარა პატიგედვალირ ნაწილეფს მუთუნ ვასაჭირ. ღორონთიქ სხეულ თეშ გაკანწყუ, ნამდა ნაკლებო პატიგედვალირ ნაწილეფს უმოს პატი ქიგედვჷ,
25 მუშენდა სხეულ გორთილ ვა რდასჷ დო თიშ ნაწილეფ ართიანშე ზრუნენდან.
26 სხეულიშ ართ ნაწილ ქიტანჯებუნ-და, თიწკუმა ართო იტანჯებ არძა, დო სხეულიშ ართ ნაწილ განდიდებულ ქორენ-და, თიწკუმა ართო ხარენს არძა.
27 თქვა არძა ართო ქრისტეშ სხეულ რეთჷ დო ცალ-ცალკე — თე სხეულიშ ნაწილეფ.
28 კრებას ღორონთიქ არძას მუშ საქმე ქიმურჩქინ: დიო მოციქულეფ გიორინუ, უკულ — წინასწარმეტყველეფ დო უკულ — მასწავლებერეფ; შხვეფს სასწაულეფიშ კეთებაშ, სქილიდაფაშ, მოხვარაშ, ხელმძღვანელობაშ დო შხვადოშხვა ნინაშა ჩიებაშ ძღვინ ქიმეჩ.
29 თინეფ არძა ხომ ვა რენა მოციქულეფ, წინასწარმეტყველეფ ვარდა მასწავლებერეფ?! არძას ხომ ვა უღჷ სასწაულეფიშ კეთებაშ ძღვინ?!
30 არძას ხომ ვა უღჷ სქილიდაფაშ, შხვადოშხვა ნინაშა ჩიებაშ ვარდა თარგმნუაშ ძღვინ?!
31 ირნერო ეცადით, თე ძღვინეფ შქას უმოს დიდ ნამ რენ თინეფიშ მეღებას, მარა ასე ქუგოძირანთ, მუ რე არძაშ უდიდაშ ძღვინ.
