კორინთელეფშა მეჭარილ პირველ წერილ 14:1-40
14 პირველ რიგის, გევითარით ჸოროფა, მარა თის ხოლო ირნერო ეცადით, მიღათ წმინდა შურიშ* შხვადოშხვა ძღვინ, უმოსო წინასწარმეტყველებაშ ძღვინ.
2 თინა, მიდგას შხვა ნინაშა რაგადიშ ძღვინ უღჷ, კოჩის ვარინ, ღორონთის ეჩიებ, დო მითინ ვა გებულენს თიშ ნარაგადის, მუშენდა წმინდა შურიშ ძალათ წმინდა საიდუმლოს იჩიებ.
3 მარა მით წინასწარმეტყველენს, მუშ ჩიებათ ამანგარენს დო გურშა ეუქექუანს შხვეფს.
4 შხვა ნინეფშა იჩიებუნ თინა მუშ დუდის ელუკინანს გურშა, მარა წინასწარმეტყველენსინ თინა — კრებას.
5 მოკო, არძას გიღუდან შხვა ნინეფშა ჩიებაშ ძღვინ, მარა მისხუნ, წინასწარმეტყველენდათ. წინასწარმეტყველენსინ თინა უჯგჷ თის, მით უცხო ნინეფშა იჩიებ, მარა მუშ სიტყვეფს ვა თარგმნუნს დო კრებას ვამანგარენს.
6 ჯიმალეფ, მუ ჯგირობუას მოიღანა, თქვანდა ქუმობრთე დო შხვა ნინაშა რაგად ქუდოიჭყათინ?! თქვან მახვარებელო მოსაჭირ ღორონთშე გიმოცხადებაშ ძღვინ, რჩქინაშ ძღვინ, წინასწარმეტყველებაშ ძღვინ დო გურაფაშ ძღვინ.
7 მუსიკალურ ინსტრუმენტეფს, სალამურს დო ქნარს, ხოლო უღუნა ხონარ, მარა თინეფს სწორას ვემიოგანან-და, მუჭო გებგენთ, მუ მელოდია რე?!
8 საყვირიშ ხონარ ჯგირო ვერჩქილენ-და, მი დიჭყანს მომზადებას ბრძოლაშო?!
9 თეშნერო, ჩიებაშ დროს ეფ გაგებელ სიტყვეფს ვერინუანქ-და, მი მეხვადუ, მუს იჩიებუქ?! ჰაერს იჩიებუდენ იჸი.
10 მსოფლიოს ბრელ ნინა არსებენს, მარა თინეფშე ნამთინ ვა რე აზრიშ გინოჩამა ვეშულებუნ ფერ.
11 კოჩიშ ნარაგად ვეგებგ-და, ართიანშო უცხოელეფცალ იპჸუაფუთ.
12 თქვა ხოლო, რახანს მთელ გურით გოკონა, წმინდა შურიშ ძღვინ მიღათ, ეცადით, თიცალ ძღვინეფ მიღათ, ნამუთ კრებას გამანგარენს.
13 ათეშენ, შხვა ნინეფშა იჩიებუნ თიქ ოკო ქილოცას, ნამდა ქეშიალებუას თარგმნუაქ.
14 შხვა ნინაშა ქობლოცულენქ-და, ჩქიმით ვარინ, წმინდა შურიშ ძღვინით ბლოცულენქ.
15 იმწკუმა მუ ოკო ვაკეთე? ქიბლოცენქ წმინდა შურიშ ძღვინით, მარა, თეწკუმა ართო, ჩქიმ ნინაშა ხოლო ქიბლოცენქ. ოდიდებელეფს ქიბიბრქ წმინდა შურიშ ძღვინით, მარა, თეწკუმა ართო, ჩქიმ ნინაშა ხოლო ქიბიბრქ.
16 ღორონთის ხვალე წმინდა შურიშ ძღვინით განადიდენქ-და, სქანწკუმა რენ თიქ „ამინ“ მუჭო თქუას სქან მარდულობაშ ლოცვაშენ?! თის ხომ ვა უჩქჷ, მუს იჩიებუქ?!
17 სი ქიგნუგანქ ღორონთის მადლობას, მარა თენა შხვას გურშა ველუკინანს.
18 მარდულ ვაფუქ ღორონთის, მუშენდა თიშე უმოს მეტ ნინაშა ჩიებაშ ძღვინ მიღჷ, ვინემ თქვა არძას,
19 მარა კრებას მისხუნ ხუთ სიტყვა ფთქუე, ნამდგას მა ინვანჭუქ, ნამდა შხვას ხოლო ქუდვოგურუე, ვინემ ვით ანთას სიტყვა ფთქუე შხვა ნინაშა.
20 ჯიმალეფ, ვაიღუდან ბაღანაცალ აზროვნება; უბადობაშო თოთო ბაღანეფ რდათჷ, მარა აზროვნებათ — ძინათებულეფ.
21 კანონს ჭარჷ: «„უცხოელეფიშ ნინათ დო უცხოელეფიშ პიჯით ქუდურაგადუანქ თე ხალხის, მარა თინეფ იშენით ვა მომრჩქილუანა“, — იჩიებ იეჰოვა».
22 შხვა ნინეფშა ჩიებაშ ძღვინ უცხოელეფშო რე ნიშან დო ვართ ხოლო მორწმუნეეფშო, მარა წინასწარმეტყველება — მორწმუნეეფშო რე დო ვართ ხოლო ურწმუნოეფშო.
23 მუჟამსით მთელ კრება აკიშაყარუ დო არძა შხვადოშხვა ნინაშა ქიდიჭყანს ჩიებას, უბრალო კოჩიქ ვარდა ურწმუნოქ გამნორთასინ, ვა თქუანსო, ჭკუაშე გინულებუნანია?!
24 მარა არძა ქოწინასწარმეტყველენთ დო უბრალო კოჩ ვარდა ურწმუნო მინილენს-და, მორჩქილაფირ თის გიშასწორებას ქიმეხვარებ დო ჯგირო ქიდეკვირებ მუშ დუდის.
25 თინა ქოძირუნს, მუ ჸოფე მუშ გურს ფულირ, ბირგულეფს ქაშანთხუ, ღორონთის თაყვანს ქოცენს დო ქოთქუანს, მართალო თქვან შქას რენია ღორონთ.
26 აბა, მუ ოკო ქიმინათ, ჯიმალეფ? ართო იშაყარუთინ, ართ ფსალმუნს იბირს, მაჟია — ოგურუანს, მასმა — ღორონთშე გაცხადებულს იჩიებ, მანთხა — შხვა ნინაშა რაგადანს დო მახუთა — თარგმნუნს; თე ირფელ ართიანიშ გამანგარებელო აკეთით.
27 მითინ შხვა ნინაშა ქიჩიებუნ-და, არძაშ უმოს ჟირქ ვარდა სუმქ რაგადუას, მორიგეობათ, დო შხვაქ დოთარგმნას თინეფიშ ნარაგად.
28 მათარგმნალ ვა რენ-და, იმწკუმა ხონარ შურო ვეკიღას კრებას დო მუშ გურს დურაგადუას ღორონთის.
29 ჟირ ვარდა სუმ წინასწარმეტყველქ ქიჩუას დო შხვეფქ თინეფიშ ნარაგადის ინანჭან.
30 თექ რენ თინეფშე ნამთინეს ღორონთშე გიმოცხადება ქაშინ-და, მით იჩიებუდუნ თიქ გაჩერდას,
31 მუშენდა არძას შეგალებუან მორიგეობათ წინასწარმეტყველებაქ, ნამდა არძაქ ქიდიგურუას დო გურშა ელაკინას.
32 წინასწარმეტყველეფქ წმინდა შურიშ ძღვინ თეშ ოკო გიმირინუან, ნამდა ერია-მორიაქ ვეჸუას.
33 მუშენდა ღორონთ ერია-მორიაშ ვარინ, მშვიდობაშ ღორონთ რე.
მუჭოთ წმინდეფიშ* არძა კრებას რე,
34 ოსურკათაქ ხონარ ოკო ვეკიღას, თინეფს ვა უღუნა კრებას რაგადიშ უფლება. თინეფ მორჩილეფ ოკო რდანჷ, მუჭოთ თეს კანონ იჩიებ.
35 მუთუნქ ვა გაგინეს-და, ჸუდეს ქოკითხან მუნეფიშ ქომონჯეფს, მუშენდა ოსურკოჩის ვასქვანს კრებას რაგად.
36 თქვანდე მოურსო ღორონთიშ სიტყვა ვარდა ხვალე თქვა მიღითო თინა?!
37 მით ფიქრენს, ნამდა წინასწარმეტყველ რე ვარდა წმინდა შურიშ ძღვინ უღჷ, ოკო არჩქილედას, ნამდა, მუდგას რჭარუნთ, თენა უფალშე რე.
38 მითინ თეშე ვარიას ქოთქუანს-და, მუშ გურშენ ხოლო ვარიას ქოთქუანა*.
39 თაშ ნამდა, ჩქიმ ჯიმალეფ, უმოსო წინასწარმეტყველებაშ ძღვინიშ მეღებას ეცადით, მარა შხვა ნინეფშა ჩიება ხოლო ვა უვარუათ მითინს,
40 მარა ირფელ მუშ-მუშ წესით დო წკანტილო ხვადუდას.
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ვარდა შილებე: „მითინს თეშ გაგება ვაკონ-და, ირო თაშ იუაფ“.
