კორინთელეფშა მეჭარილ პირველ წერილ 2:1-16
2 ჯიმალეფ, თქვანდა ღორონთიშ წმინდა საიდუმლოშ გაცხადებშა მობრთინ, ვართ თიცალ სიტყვეფ გიმომრინუაფ დო ვართ თეშ მიჩიებინ, ნამდა დუდ მანგარ რჩქინელო მუგოძირეთკო;
2 გინოჭყვიდილ მაფუდ, თქვანწკუმა იესო ქრისტეშ დო თიშ ძელშა მიკოჭკადუაშ მეტ მუთუნიშ გურშენ ვა ბრაგადეკო.
3 თქვანდა უჭყანიექ დო შიშით კანკალელაფირქ მობრთჷ;
4 ქადაგებაშ დროს ბრძენ კათა იჩიებუნ თიცალ სქვამ-სქვამ სიტყვეფით ვამჩიებინ, ნამდა გუგაკვირითკო. თეშ მანგიორო, ჩქიმ სიტყვეფშე ღორონთიშ წმინდა შურიშ* ძალა იძირედ,
5 მუშენდა თქვან რწმენა კოჩიშ სიბრძნეშა ვარინ ღორონთიშ ძალაშა ჸოფედუკო გერსხილ.
6 ჩქი თი სიბრძნეშენ ბრაგადანთ, ნამუთ თინეფ შქას რე, მით რწმენას ძალიერეფ რენა, თენა ვა რე თე ქიანაშ* ვარდა თიშ მმართველეფიშ სიბრძნე, მიდგაშ მოსპუალა მონჭაფილ რე.
7 ჩქი იფჩიებუთ წმინდა საიდუმლოშ გურშენ, ნამუთ ღორონთიშ ფულირ სიბრძნე რე. ღორონთიქ ბრელ ხანიშ წოხოლე* გინოჭყვიდ, თე სიბრძნეთ იმოქმედუკო, ნამდა დიდება მიბღითკო.
8 თე სიბრძნეს თე ქიანაშ* ნამთინ მმართველქ ვენანჭჷ; ქინონჭაფუდესკონ, ჩქინ დიდებულ უფალს ვა ჸვილუნდეს.
9 ჭარილ რე: „ღორონთიქ მუშ მოჸოროფეეფს თინა გუხაზირ, მუთ თოლს ვა უძირ, ჸუჯის ვა გუგონებ დო გურს ხოლო მითინს ვა უფიქრებ“.
10 ღორონთიქ თენა მუშ წმინდა შურით გამცხადეს, მუშენდა წმინდა შურ ირკვიენს ირფელს, ღორონთიშ ტომბა აზრეფს ხოლო.
11 ნამ კოჩის უჩქჷ, მუ უღჷ შხვას გურს?! არძას თინა უჩქჷ, მუთ მუშ გურს რე.
12 ჩქი თე ქიანაშ აზროვნება* ვარინ, ღორონთშე მეღებულ წმინდა შურ ფხელმძღვანელენა, მუშენდა შემალებუან, ქინვანჭათ თი ირფელს, მუთ ღორონთიქ ჸოროფათ მოგურუეს.
13 ქოთ იფჩიებუთ თე ირფელიშ გურშენ, მარა ადამიანურ სიბრძნეთ ვარინ, თეშ, მუჭოთ წმინდა შურქ დუმოგურუეს; თიშე ნაგურეფ სიტყვეფს იბრინუანთ სულიერ საკითხეფიშ ეიონწყუმალო.
14 კოჩ, ნამუთ ადამიანურ აზროვნებას მეჸუნს, ვა ღებულენს თის, მუდგას ღორონთიშ წმინდა შურ აცხადენს. თიშ აზრით თენა სიბორუე რე დო ვართ ენანჭუ, მუშენდა თეშო ღორონთიშ წმინდა შურიშ მოხვარა რე საჭირო.
15 თეშ გინაწონს, მით წმინდა შურიშ ხელმძღვანელობას მეჸუნს, ირფელს ინანჭუ, მარა მიდგას ადამიანურ აზროვნება უღჷ, ვა გაგინე თეცალ კოჩშა.
16 მუჭოთ წმინდა წერილეფ იჩიებ: „ბოლოშახ მიქ ინანჭჷ იეჰოვაშ აზროვნებას, ნამდა ქუდაგურუას თის?!“ მარა ჩქი ქრისტეშ აზროვნება მიღუნა.
სქოლიოეფ
^ ქოძირით „ბიბლიურ სიტყვეფიშ ენწყუმა“.
^ ბერძნ. „ეონ“. ქოძირით „ქიანა“ („ბიბლიურ სიტყვეფიშ ენწყუმა“).
^ შხვანერო — „თე უბადო ქიანაშ გოჭყაფაშახ“.
^ ბერძნ. „ეონ“. ქოძირით „ქიანა“ („ბიბლიურ სიტყვეფიშ ენწყუმა“).
^ ბერძნ. „პნევმა“. ქოძირით „შურ“ („ბიბლიურ სიტყვეფიშ ენწყუმა“).
