კორინთელეფშა მეჭარილ პირველ წერილ 4:1-21
4 ხალხ თეშ ოკო მიჯინედან, მუჭოთ ქრისტეშ მსახურეფს, მიდგას ღორონთიშ წმინდა საიდუმლოქ მიენდჷ.
2 თეცალ მსახურეფშე ართგურობას ელუნა.
3 ჩქიმო მუთუნ მნიშვნელობა ვა უღჷ, თქვა გუმასამართლენთ დოვარ ადამიანეფიშ სასამართლო. თქვა ვარ, მა ვა ვასამართლენქ ჩქიმ დუდის.
4 ჩქიმ სინდის მუთუნშე ვეგებდვანს ბრალს, მარა თენა ვა ნიშნენს, ნამდა მართალ ვორექ; იეჰოვა რე თინა, მით მასამართლენს.
5 თაშ ნამდა, მითინ ვა გასამართლათ თეშ დროშ მოულაშახ. უფალ ქუმურსუნ, სინთეშა გეგმიღანს თის, მუთ უკმელას რე ფულირ, დო გეგმაარგამენს, მის მუ უღჷ გურს; უკულ ღორონთშე არძა მიღენს თი დიდებას, ნამუთ ოკუთვნ.
6 ჯიმალეფ, თე ირფელს თიშენ რჭარუნთ, ნამდა ჩქიმ დო აპოლოსიშ მაგალითშე ქიდიგურუათ თე წეს: „ვეგნურთათ ჭარილს“. თე წესის ქიმიაჸუნუთ-და, ამაყეფო ვეგნირთუთ დო ართ კოჩის მაჟიაშე უმოს მაღალას ვეგიორინუანთ.
7 მუ გიღუნა თიცალ, დუდ შხვაშე უმოსეფო მეიღუნან?! ირფელ ღორონთიქ ვემერჩესო?! დო, ღორონთიქ ქიმერჩეს-და, მუშენ იცქვანთ, ითამ თქვანით გიღუდან?
8 ფიქრენთო, ნამდა მუთ გოსაჭირუდესინ ირფელ მეღებულ გაფუნა? უკვე ქონებიერეფო გინირთითო? ჩქინ უმშო დიჭყითო მეფობა? ნოტე, მართალო ქუდოიჭყაფუდესკო მეფობა, იმწკუმა ჩქი ხოლო თქვანწკუმა ართო იპჸუაფუდით მეფეეფ.
9 მუჭოთ ვორწყექ, ღორონთიქ ჩქი, მოციქულეფ, ბოლოეფ გეგშამიჸუნეს სცენაშა, მუჭოთ ღურამესაჯებულეფ, ნამდა დემეკვირან მთელ ქიანაქ, ანგელოზეფქ დო ადამიანეფქ.
10 ჩქი ქრისტეშ გურშენ უჭკუეეფო ვორეთ მერჩქინელ, მარა თქვა ჭკვერეფო მეიღუნა დუდ. ჩქი ძალაგიშალიებურეფო იბძირეთ, თქვა — ძალიერეფო. თქვა პატიგედვალირეფ რეთჷ, მარა ჩქი — პატიელაფირეფ.
11 ამდღარ დღაშახ შქირენულეფ დო ჸუმენულეფ ვორეთ, ნორმალურ ბარგ ვემკმოქუნა, ლახირეფ ვორეთ, დუდიშ გითაფორაფალ ვამღუნა
12 დო ჩქინ ხეთ ფხანდენთ. ბლანძღუნან — ფხვამანთ, ფთხოზუნან — იფთვინენთ,
13 ტყურას ეკმაწამენან — გემუან პასუხის ვარზენთ; თე ქიანაშ თოლს ამდღარშახ გვამ დო წინდა ვორეთ.
14 თე ირფელს თიშენ ვა რჭარუნთ, ნამდა ონჯღორე დოიგურინუათ, თიშენ რჭარუნთ, ნამდა გიგოწურუათ, მუჭოთ ჩქიმ საჸოროფო სქუალეფს.
15 ქრისტეშ მოწაფეეფ შქას ვით ანთას მარდუალ ხოლო ქორჸუნდანინ, მუმა ბრელ ვა რჸუნა. მა გინიფრთჷ თქვან მუმათ, მუშენდა მა გინორჩით სახიოლო ამბე ქრისტე იესოშ გურშენ;
16 ათეშენ ელაიჩანთ, მიაჸუნათ ჩქიმ მაგალითის.
17 თეშ გურშენ უტენქ თქვანდა ტიმოთეს, ნამუთ ჩქიმ საჸოროფო დო ართგურ სქუა რე უფალიშ მსახურებას. თინა ქუგგოშინანა, მუჭო ვასრულენქ ქრისტე იესოშ მსახურებას დო მუს ვოგურუანქ ირდიხას, არძა კრებას;
18 თქვანდე ნამთინექ ამაყეფო გინირთით, მუშენდა ფიქრენთ, ნამდა ვა მოურქ თქვანდა.
19 იეჰოვაშ ნებაქ ქიჸუ-და, მალას ქუმურქ თქვანდა, მარა ამაყეფ დო დუდშა იცქვანან თინეფიშ ორჩქილშა ვარინ, თიშა, ნამდა ქობძირე, ქუმკურე დო ვარ თინეფს ღორონთიშ ძალა.
20 ღორონთიშ სამეფოს ვომორჩილუთინ თის ჩქინ სიტყვეფ ვარინ, საქმეეფ ოძირანს, ნამდგას ღორონთიშ ძალათ ვორთუთ.
21 ნამ გისხუნუნა, თქვანდა დასაჯებელო* მობრთა დოვარ ჸოროფათ დო გემუანო?!
სქოლიოეფი
^ პირდაპირ თარგმან — „კეტით“.
