კორინთელეფშა მეჭარილ პირველ წერილ 6:1-20
6 ჯიმაწკუმა ნირზ ქოიღუნან-და, მუჭო ბედუთ დო მეურთ ურწმუნო მოსამართლეშა, ნამდა ქოუჩიულათ თის?! მუშენ ვემეურთ წმინდეფშა*, მით კრებას რენა?!
2 მეტო ვაიჩქუნანო, ნამდა თე უბადო ქიანას წმინდეფ* გასამართლენა?! თე ქიანას გასამართლენთ-და, თეცალ ჭიჭე საქმეეფშა ვემგკაჯინნესო?!
3 ვაიჩქუნანო, ნამდა ანგელოზეფს გუვასამართლენთ?! თაშ ქორენ-და, ამდღარ ჭიჭე პრობლემეფქ მუთ გინგართეს?!
4 თეცალ პრობლემეფს კრებაშ გალე, შხვა მოსამართლეეფწკუმა მუშენ გინმოჭკირუნთ?!
5 თეს თიშენ იფჩიებუქ, ნამდა ონჯღორე დოიგურინუათ! თქვან შქას მითინ ვა რენო თიცალ ბრძენ, ნამდა ჯიმალეფ შქას ონირზებელ საქმე გეგნოჭყვიდას?!
6 თენა აკეთათინ თიშ მანგიორო, ართ ჯიმა მაჟიას უჩიულ სასამართლოს ურწმუნო მოსამართლეწკუმა!
7 სასამართლოს ართიანს უჩიულუთინ, თეთ უკვე წაგებულ რეთჷ. მუშენ ვესხუნუანთ, მითვინათ უსამართლობა?! მუშენ ვესხუნუანთ, ღორებულქ ქუდოსქიდათ?!
8 თეშ გინაწონს, უსამართლოთ იქციებუთ დო აღორენთ თქვან ჯიმალეფს!
9 ვაიჩქუნანო, ნამდა უბადო კათა ვეჸუაფ ღორონთიშ სამეფოს?! დუდ ვედეღორათ: ვართ უზნეოეფ*, ვართ კერპთაყვანიშმცემელეფ, ვართ მრუშეფ, ვართ თი კოჩეფ, მიდგას კოჩეფწკუმა უღუნა სექსუალურ კავშირ*,
10 ვართ მახირალეფ, ვართ ჰარამეფ, ვართ შუმილიეფ, ვართ მალანძღარეფ დო ვართ მიდმაღალარეფ იჸუაფუნა ღორონთიშ სამეფოს!
11 თეცალეფ რდითჷ თქვანდე ნამთინე, მარა ასე გასუფთებულეფ რეთჷ დო მართალეფო რეთჷ მერჩქინელ ჩქინ უფალ იესო ქრისტეშ სახელით დო ღორონთიშ წმინდა შურით*.
12 ირფელიშ უფლება მიღჷ, მარა ირფელს ვა მოუღ ჯგირობუა. ირფელიშ უფლება მიღჷ, მარა მუთუნს ვემეფჩანქ ჩქიმ მართუაშ ნებას.
13 ოჭკუმალ კუჭშო რე დო კუჭ — ოჭკუმალშო, მარა ღორონთ ჟირხოლოს მოსპუნს. სხეულ უზნეობაშო* ვარინ, უფალშო რე დო უფალ — სხეულშო.
14 ღორონთიქ უფალ გათელ დო თინა ჩქი ხოლო გუმათელენა მუშ ძალათ.
15 ვაიჩქუნანო, ნამდა თქვან სხეულეფ ქრისტეს ოკუთვნ?! ქორენო სწორ, ქრისტეს ოკუთვნუნ თინა, უზნეოშ სხეულიშ ნაწილო გინაშქვე?! მუთუნფერო ვარ!
16 ვაიჩქუნანო, ნამდა მითინს მეძავწკუმა სექსუალურ კავშირ ქოუღუნ-და, თინეფ ართ ხორცო გინირთუნა, მუშენდა ღორონთ იჩიებ: „თე ჟირ ართ ხორცო გინირთუ“.
17 მარა, მით უფალწკუმა რე ართობას, თინა დო უფალ აზრით ხოლო ართობას რენა.
18 ენტით უზნეობას*! შხვა ნამთინ ცოდა ვეგნაშქვანს სხეულს თიცალ უწმინდურო, მუჭოთ სექსუალურ უზნეობა; თინა, მით თეს ორთჷ, მუშ სხეულიშ წინააღმდეგ ცოდენს.
19 ვაიჩქუნანო, ნამდა თქვან სხეულ ტაძარცალ რე, სოდეთ წმინდა შურ კვიდრენს, ნამუთ ღორონთიქ მერჩეს?! თაშ ნამდა, თქვა თქვან დუდის ვაკუთვნუთ,
20 მუშენდა დიდ ფასშა რეთჷ ნაჸიდერ. ათეშენ თქვან სხეულეფ ღორონთიშ ოდიდებელო გეგმირინეთ.
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ბერძნ. „პორნოს“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
^ თაქ ბერძნულ ნინას გიმორნაფილ რე ჟირ შხვადოშხვა სიტყვა, ნამდგაშე პირველ გულისხმენს პასუირ როლიშ შემსრულებერ დო მაჟია — აქტიურ როლიშ შემსრულებერ ჰომოსექსუალისტის.
^ ქოძირით „ბიბლიურ სიტყვეფიშ ენწყუმა“.
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
