პირველ ტიმოთე 1:1-20
1 პავლე, ქრისტე იესოშ მოციქულო ჩქინ მარსხებელიშ, ღორონთიშ, დო ჩქინ იმენდიშ, ქრისტე იესოშ ძალაუფლებათ გერინაფილ,
2 ტიმოთეს*, უფალიშ მსახურს დო ჩქიმ საჸოროფო სქუას:
ვა მორრკებუდას ჭყოლოფა დო მშვიდობა ღორონთშე, ჩქინ მუმაშე, დო ჩქინ უფალშე, იესო ქრისტეშე!
3 მაკედონიაშა ულა მილამუდუნ, რთხი, ეფესოს ქუდოსქიდიკო. ასე ხოლო თეს რთხინქჷ, მუშენდა ნამთინეს მოთხუე, ვაგურუან ტყურა გურაფეფ,
4 ვართ ტყურა ამბეეფს ურჩქილან დო ვართ საგვარეულო სიეფ კილაჩხირკუან, მუშენდა თეცალ მუდგარენეფს უაზრო ნირზიშ მეტ ჯგირ მუთუნ ვა მოუღ; თენა ვართ ღორონთშე მოურს დო ვართ რწმენას ამანგარენს.
5 თე მითითებაშ მიზან თინა რე, ნამდა ართიან მიჸორდან ალალ გურით, სუფთა სინდისით დო ნამდვილ რწმენათ.
6 ნამთინე გინმურთანს თე ირფელს დო შედეგო უაზრო ჩიებეფშა გინმურს.
7 თეცალეფს ქაკონა, შხვეფს კანონ ოგურუან, მარა ვართ თინა უჩქუნა, მუს იჩიებუნა, დო ვართ თინა არჩქილენა, მუდგას აჩემებულო ამტკიცენა.
8 ჩქი მიჩქუნა, ნამდა კანონ თიმწკუმა რე ჯგირ, მუჟამსით კოჩ თის სწორას ირინუანს,
9 დო მარჩქილენა, ნამდა კანონ მართალეფშო ვა გოჭყაფე; თიქ გოჭყაფილქ იჸუ კანონს ვამორჩილუნან თინეფშო, უდუჯერებელეფშო, უღორონთეეფშო, ცოდამეფშო, მოღალატეეფშო, წმინდაშ მალანძღარეფშო, დიდაშ დო მუმაშ ვარდა შხვეფიშ მაჸვილარეფშო,
10 უზნეოეფშო*, თი ქომოლკოჩეფშო, მით ქომოლკოჩეფს ელუჯანუნა, თინეფშო, მით კოჩის იხირა, მეტყურეეფშო, სიტყვაშ გუმატახალეფშო დო თინეფშო, მით ოწინააღმდეგ ჯგირობუაშ მუმაღალარ გურაფეფს,
11 ნამუთ მოურს ბედნერ ღორონთშე დო გერსხილ რე დიდებულ სახიოლო ამბეშა, ნამდგაშ გაცხადებაქ ჩქიმდა იჸუ მენდებულქ.
12 მარდულ ვაფუქ ჩქიმდა ძალაშ მუმაჩამალს, ჩქინ უფალ იესო ქრისტეს, მუშენდა ართგურო მემრჩქინ დო წმინდა საქმე დუმავალ;
13 ვარინ, ულირს ღორონთიშ მალანძღარ ვორდჷ, თიშ ხალხის ფთხოზუდ დო დუდ მიძირგანდჷ. მარა ქრისტექ ქომჭყოლოფუ, მუშენდა თაშ ურჩქინჯობაშ დო რწმენა ვამღუდუნ თიშენ იფქციებუდ.
14 ჩქინ უფალქ სარკო ჭყოლოფა გიმირჩქინ დო ასე ქრისტე იესოშ საშვალებათ რწმენა დო ჸოროფა მიღჷ.
15 მუდგას ასე ფთქუანქ, სანდო დო სარწმუნო რე: ქრისტე იესოქ თე ქიანაშა ცოდამეფიშ ორსხებშა მორთჷ; თე ცოდამეფ შქას არძაშ უმოს ცოდამ მა ვორექ.
16 თეშ უმკუჯინუო, თიქ ქომჭყოლოფუ, მუშენდა ჩქიმ, მუჭოთ არძაშ უმოს ცოდამიშ, საშვალებათ ქრისტე იესოქ ქაძირუკო, მუშმადიდა მოთვინებას გიმირჩქინანს, დო მაგალით პჸოფედიკო თინეფშო, მით ირწმუნენდ თის ულიებ სიცოცხლეშ მიოღებელო.
17 ულიებ დროშ მეფეს, ხვალე ართ ღორონთის, ნამუთ სადღამუშოთ იჸუაფ დო ნამდგაშ ძირაფა კოჩის ვეშულებ, პატი დო დიდება სადღამუშოთ! ამინ!
18 სქუა, ტიმოთე, სი გარზენქ თე მითითებას, ნამუთ მეურე თის, მუთ სქანიშ გურშენ რე ნაწინასწარმეტყველებ. თე წინასწარმეტყველებეფ მიგეხვარებ, გაგრძელე ბრძოლა ჯგირ მიზანშო,
19 ვადინუე რწმენა დო გიღუდას სუფთა სინდის, ნამდგას ნამთინექ ხე აღჷ დო რწმენაქ გემცალო გაკუცუ.
20 თინეფ შქას რენა ჰიმენეოს დო ალექსანდრე, მით სატანას გეგნოფჩჷ, ნამდა დასაჯებათ ქიდიგურუან ჭკუა დო ვა ლანძღან ღორონთ.
სქოლიოეფ
^ ნიშნენს: „ღორონთიშ განმადიდებელს“.
^ ბერძნ. „პორნოს“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
