პირველ ტიმოთე 2:1-15
2 პირველ რიგის, ელაიჩანთ, ილოცათ არძანერ ადამიანშო, მთელ გურით ქოთხით ღორონთის, ქიმეხვარას თინეფს, დო ლოცვას მარდულობა გეგმოხანტით.
2 ილოცით მეფეეფშო დო თინეფშო, მიდგას მაღალ ადგილ უკინებ, მუშენდა შემალებუან წყნარას დო მშვიდას ცხოვრებაქ დო ირნერო ქუვოძირუათ, ნამდა ღორონთიშ ართგურეფ ვორეთ დო ალალას ვომსახურუთ თის.
3 თენა ჯგირ დო მოსაწონ რე ჩქინ მარსხებელშო, ღორონთშო,
4 მიდგაშ ნება რე, არძანერ ადამიანქ გინოსქიდას დო სიმართლეშ ზუსტ რჩქინა მიღას.
5 ართ რე ღორონთ დო ართ რე ღორონთ დო ადამიანეფ შქას აშმაჸვენჯ — კოჩ, ქრისტე იესო.
6 თიქ მუშ სიცოცხლე დათმჷ დო თეშნერო ცოდაშე ხალხიშ გიშაჸიდირალო საჭირო ფას გეგნიგ, მუდგაშ გურშენ მუშ დროს დამოწმენა*.
7 მა ხოლო თე დამოწმებაშო გიმორინუ ღორონთიქ მაქადაგებელო დო მოციქულო, ნამდა ქუდვოგურეკო შხვა რჯულიშ ხალხის დო ქიმვეხვარიკო რწმენაშ გავითარებას დო სიმართლეშ რჩქინას. მართალს გირაგადუთ, ვა გაღორენთ.
8 მოკო, ირდიხას, სოდეთ იშაყარუთ, ღორონთიშ ართგურ ქომოლკათაქ ილოცას. თე ქომოლკათა ოკო ვა რდანჷ რისხუანეფ დო ვა ნირზენდან.
9 თეს გეძინელ, ოსურკათას ელუჩანქ, დუდის ისქვამენდან კოხტა, მოკრძალებურ დო ჭკვერულო გიშაგორილ ბარგით დო ვართ ხოლო სარკოთ კეთებულ თუმათ, ოქროთ, მარგალიტეფით დოვარ ძვირიან ბარგით;
10 თაშ ნამდა, მუჭოთ ღორონთიშ ართგურ ოსურკათას ოსქვანა, ჯგირ საქმეეფით ოკო გესქვამან დუდ.
11 გურაფაშ დროს ოსურკათაქ მუთუნ ვა თქუან დო გეგმირჩქინან მორჩილება.
12 ოსურკოჩის ვა ვარზენქ უფლებას ოგურუას ვარდა ეუნჩაშას ქომოლკოჩის. თიქ მუთუნ ოკო ვა თქუას,
13 მუშენდა დიო ადამქ იჸუ გოჭყაფილქ დო უკულ ევაქ.
14 თეს გეძინელ, ადამ ვა დაღორებენ, ევაქ დეღორ დო დაშუ.
15 მარა ოსურკოჩის სქუალეფიშ ერჩქინა დოთხილანს, მუჟამსით ვადინუანს რწმენას, ჸოროფას, სიწმინდეს დო სწორ აზროვნებას.
სქოლიოეფ
^ ქოძირით „ბიბლიურ სიტყვეფიშ ენწყუმა“.
