მაჟია თესალონიკელეფ 1:1-12
1 რჭარუნთ პავლე, სილვანუს* დო ტიმოთე თესალონიკეშ კრებას, ნამუთ ართობას რე ღორონთწკუმა, ჩქინ მუმაწკუმა, დო უფალ იესო ქრისტეწკუმა:
2 ჭყოლოფა დო მშვიდობა ვა მორრკებუდან ღორონთშე, ჩქინ მუმაშე, დო უფალ იესო ქრისტეშე!
3 ჯიმალეფ, ვალდებულეფ ვორეთ, თქვანიშ გურშენ ირიათო მადლობა გინუგათ ღორონთის! თეს ქოთ თაშ ოკო ვორთუდათ, მუშენდა რწმენა დო ართიან შქას ჸოროფა უმოსო დო უმოსო გემანგარებუნა.
4 ათეშენ თქვანით იფცქვანთ ღორონთიშ კრებეფს დო არძას ურაგადუთ, მუჭო ურზუთ ირნერ თხოზინს დო გაჭირებას რწმენათ დო მოთვინებათ.
5 თენა თის ოძირანს, ნამდა ღორონთ სამართლიანო ასამართლენს, მუდგაშ ჭყოლოფათ ღირსო მეირჩქინანა, იჸუათ ღორონთიშ სამეფოს, ნამდგაშ გურშენ იტანჯებუთ.
6 რახანს ღორონთ სამართლიან რე, თინა მანგიორს გინუგანს დო დასაჯენს არძას, მით თქვა ოტანჯებელს გირჩქინანა,
7 მარა თქვა, მით ასე იტანჯებუთ, შურ მუგადგუმუნა ჩქინწკუმა ართო, მუჟამსით უფალ იესო მუშ ძალიერ ანგელოზეფწკუმა ართო ზეცაშე
8 ბორბონჩია დაჩხირით გეგმიცხადებ დო მანგიორს გეგნუგანს არძას, მით ვეჩინენს ღორონთის დო მით ვა ღებულენს სახიოლო ამბეს ჩქინ უფალიშ, იესოშ გურშენ.
9 თინეფს უფალ დასაჯენს დო სადღამუშოთ მოსპუნს; მეტო ვემიძირუანს თოლშა დო ვართ მეხვარებ მუშ დიდებულ ძალათ,
10 მუჟამსით თინა ქუმურს, ნამდა განდიდებულქ იჸუას მუშ წმინდეფწკუმა* ართო. თიმწკუმა არძას, მით რწმენას გიმირჩქინანდჷ, უფალიშ მიმაჯინუ დიდ ხიოლ აღვენუ. თინეფ შქას თქვა ხოლო იჸუაფუთ, მუშენდა ირწმუნით ჩქინ ნარაგად.
11 ათეშენ ირიათო ბლოცულენთ თქვანო დო ჩქინ ღორონთის ფთხინთჷ, თიშ ღირსეფო მეირჩქინან, მუდგაშოთ გიშარგორეს. თეწკუმა ართო, ბლოცულენთ, მუშ ძალათ ბოლოშა გაკეთას თი ირფელ ჯგირ, მუთ თქვანო აფჷ გახაზირებულ, დო დოხვამუას თი საქმეეფ, ნამდგას რწმენათ ორთუთ,
12 ნამდა თქვან საშვალებათ განდიდებულქ იჸუას ჩქინ უფალიშ, იესოშ, სახელქ დო განდიდებულქ იჸუათ თქვა ხოლო, მით თიწკუმა ართობას რეთჷ, ჩქინ ღორონთიშ დო იესო ქრისტეშ, ჩქინ უფალიშ, ჭყოლოფათ.
