მაჟია კორინთელეფ 12:1-21
12 ოკო ქიფცქუე დო ქიგეჩუათ თი ხილუაშ გურშენ, ნამუთ უფალქ მოძირუ დო თიშ გურშენ, მუთ თიქ გამცხად, თიშ უმკუჯინუო, ნამდა თეშ კეთება მუთუნს ვა მომღანს.
2 იფჩინენქ ართ კოჩის, უფალიშ მოწაფეს*, ნამდგაქ 14 წანაშ წოხოლე — სხეულით რდუო დოვარ სხეულიშ უმშო, ვა მიჩქჷ, ღორონთის უჩქჷ — მასმა ცაშა იჸუ ეშაჸუნაფილქ.
3 თაშ რე, იფჩინენქ თეცალ კოჩის, ნამდგაქ — სხეულით რდუო დოვარ სხეულიშ უმშო, ვა მიჩქჷ, ღორონთის უჩქჷ —
4 სამოთხეშა იჸუ ეშაჸუნაფილქ დო მირჩქილუ სიტყვეფ, ნამდგაქ ოკო ვერაგადუას; თეშ ნება კოჩის ვა უღჷ.
5 თეცალ კოჩით იფცქვანდენ იჸი, მარა ჩქიმ დუდით ვეფცქვანქ; ხვალე თით ქიფცქვანქ, მუდგას ვა ვორექ ძალიერ.
6 ქიფცქვე-და, თენა ჩქიმ მხარეშე უჭკუეობა ვეჸუაფ, მუშენდა მართალს ბრაგადანდენ იჸი, მარა ვეფცქვანქ, ნამდა მითინქ ზედმეტო ვადმაფასას დო ვეფიქრას, ითამ თიშე უმოს მაფჷ ნაკეთებ, ვინემ ჩქიმდე ორწყე ვარდა ირჩქილე,
7 მუშენდა სარკო ხილუეფ ბძირჷ.
ამაყო ვეგნიბრთიკო თიშენ, ოწუხებელქ ქუმმაჩ, ნამუთ ძიგირცალო მიძგვიტუანს, ნამდა ირიათო ჭუა მუმორინუას, მუშენდა ამაყო ვეგნიფრთე. თინა სატანაშ ანგელოზცალო მოქმედენს.
8 სუმშა ვეხვეწ უფალს, ჩამთხინუკო თე ძიგირ,
9 მარა თიქ მიწუ: „დასაბაღო გიღჷ ჩქიმ ჭყოლოფა, მუშენდა, მუდგას ძალიერ ვა რექჷ, ზუსტას თექ იგინანქ სრულას ჩქიმ ძალას“. ათეშენ დიდ ხიოლით იფცქვანქ თი ირფელით, მუდგას ძალიერ ვა ვორექ, მუშენდა კარავცალო ქიგნმაფორას ქრისტეშ ძალაქ.
10 თაშ ნამდა, ჩქიმდა ხიოლ მოუღ ქრისტეშ გურშენ ლანძღუას, უღონობას, თხოზინს, გაჭირებას დო თის, მუდგას ძალიერ ვა ვორექ, მუშენდა მუჟამსით ძალაგიშალიებურ ვორექ, თიმწკუმა ვორექ ძალიერ.
11 შხვა შარა ვა დომტეთ დო ათეშენ იფჩიებუქ უჭკუეცალო. სინამდვილეს, თქვა ოკო რაგადეთკო თი ჯგირიშ გურშენ, მუთ მა მიკეთებ. თქვა ქოითქუალუდესკონ, მა ვა მაჸიდ ჩქიმ დუდიშ გურშენ ორაგადე. შურო მუთუნ ვა ვორდენ ხოლო, თქვან „მანგარ“ მოციქულეფშე ნაკლებ იშენით ვა ვორექ.
12 ბრელნერო დაიმტკიცით, ნამდა მოციქულ ვორექ — ირფელს იფთვინენდჷ, გოძირანდით ნიშანეფს, ვორთუდ სარკო საქმეეფს დო სასწაულეფს.
13 შხვა კრებეფშე ნაკლებ პატი ხვალე თით გიღუდეს, ნამდა ოღალო ვეგემნჯირალ თქვანდა. თეცალ მოქციებათ მუთუნ გლახა გუვაკეთ-და, რთხინთჷ, ქუმაპატით.
14 უკვე მასმაშა ვორექ მზათ თქვანდა მაულარო დო ვართ ასე გიგანჯირუთ ოღალო. მა თქვან ქონება ვარინ, თქვან ძირაფა მოკო, მუშენდა მშობლეფ ოკო შაყარანდან სქუალეფშო დო ვართ ხოლო სქუალეფ — მშობლეფშო.
15 ჩქიმ მხარეშე ხიოლით დაფთმენქ ირფელს თქვანიშ გურშენ დო დუდის ხოლო დობდვანქ თქვანო. მა თეშმანწარას ქომიჸორთ-და, თქვა ნაკლებო ოკო გიჸორდათო?!
16 მუდგანერო ვა რდასინ, ოღალო ვეგემნჯირალ თქვანდა, მარა თქვა ჩქიმიშ გურშენ იშენით იჩიებუთ, გითოღალირ რე დო ჭკვერულო დუმაღორესია.
17 მუთუნით გირგებეთო მითინიშ საშვალებათ, მუჟამსით ჯიმალეფ მივაშქვჷ თქვანდა? ვარ.
18 ტიტეს ფთხი თქვანდა მოულა დო თიწკუმა ართო ართ ჯიმა ხოლო გოუტე. გირგებუესო ტიტექ მუთუნნერო? ვარ. ართ აზრ ვა მიღუდესო მა დო ტიტეს დო ართ შარას ვეგეპჸუნდითო?!
19 შილებე ფიქრენდათ, ნამდა დუდის იფცვენქ თქვან წოხოლე, მარა თაშ ვა რე. ჩქი ქრისტეშ მიმაჸუნალეფ ვორეთ დო სიმართლეს იფჩიებუთ ღორონთიშ წოხოლე. საჸოროფო და დო ჯიმალეფ, ირფელს თქვან გამანგარებელო ვორთუთ.
20 თიშა მოშქურ, ნამდა ქიმურქინ, თიცალეფქ ვა დოფხვადათ, მუნერით ვა მოკო დო ვართ მა მაჸუას თეშ მაქციებელქ, მუჭოთ თქვა ვა გოკონა. მოშქურ, თქვან შქას ვა რდასჷ ნირზ, მენჯარიშობა, რისხუა, გორთუალა, ეკორაგადინ, ჭორაობა, დუდიშ ძირგინ დო ერია-მორია.
21 მოშქურ, ნამდა თქვანდა ქიმურქინ, ჩქიმ ღორონთიქ ონჯღორე ვა დომგურინუას თქვან წოხოლე დო ონგარალქ ვა მაჸუას თინეფიშ გურშენ, მიდგაქ თეიშახ შეცოდეს დო უკულ ვენარღეს* მუნეფიშ უწმინდურება, უზნეობა* დო ნირგულ საქციელ*.
სქოლიოეფი
^ შხვანერო — „უფალწკუმა ართობას რენ ფერს“.
^ ქოძირით „დაშებულიშ ნარღება“ („ბიბლიურ სიტყვეფიშ ენწყუმა“).
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
^ ბერძნ. „ასელგია“. ქოძირით „ნირგულ საქციელ“ („ბიბლიურ სიტყვეფიშ ენწყუმა“).
