მაჟია კორინთელეფ 8:1-24
8 ჯიმალეფ, მოკონა, გეჩუათ, მუჭო იმოქმედ ღორონთიშ გიმორჩქინელ ჭყოლოფაქ მაკედონიაშ კრებეფშა.
2 თინეფ დიდ გამოცდაშ წოხოლე გერდეს დო მანგარო უჭირდეს. თიშ უმკუჯინუო, ნამდა მუთუნ ვაპალუდეს, დიდ ხიოლ უღუდეს დო გურხვეობა გიმირჩქინეს, მუდგათ ოძირუეს, ნამდა სულიერო ქონებიერეფ რდესჷ.
3 თინეფქ მუთ შეულებუდესინ, ირფელ გაკეთეს. ხვალე თენა ვარინ, შეულებუდესინ თიშე უმოს ხოლო გაკეთეს; თეშ მოწმე მა ვორექ.
4 თინეფ აშო მოხვეწუდეს, ნამდა თე ჯგირ საქმეს მონაწილებაშ პატი ქიმემჩამუდესკო, მუშენდა წმინდეფს* ქიმეხვარესკო.
5 თინეფქ თიშე უმოს გაკეთეს, ვინემ ჩქი ველუდით; შურ დო გურ ქინოდვეს უფალიშ საქმეს დო ღორონთიშ ნებათ ჩქი ხოლო ქიმმეხვარეს.
6 ათეშენ ტიტეს ელუჩით, ბოლოშა ქიმიჸუნუკო წუმოჭყაფილ საქმე დო აკოშაყარუკო ირფელ, მუთ თქვა გინოდვით.
7 თქვა ირფელს მანგარ ჯგირო ორთუთ: ძალიერ რწმენა დო დიდ რჩქინა გიღუნა, შეილებუნა ღორონთიშ სიტყვაშ გაცხადება, ირფელს დუდუდუზოგებუო ორთუთ დო თეშ გიჸორა შხვეფ, მუჭოთ ჩქი მიჸორთ, თაშ ნამდა, თე ჯგირ საქმეს ხოლო გურხვეეფ რდათჷ!
8 თაშ მოქციებას ვაიზოჯუნთინ, თენა თიშენ გიწით, ნამდა მოკო, გიჩქუდან, მუნერ დუდუდუზოგებუეფ რენა შხვეფ, დო თეს გეძინელ, მოკო, ქობძირე, ქოიღუნან დო ვარ ნამდვილ ჸოროფა.
9 თქვა გიჩქუნა, მუნერ ჭყოლოფა გიმირჩქინ ჩქინ უფალ იესო ქრისტექ: თიშ უმკუჯინუო, ნამდა ირფელ უღუდ, თქვანიშ გურშენ უღონოთ გინირთჷ, მუშენდა თიშ უღონობათ თქვა გიღუდესკო ირფელ.
10 ქოიწინთ, მუს ფიფქრენქ თე საკითხშენ: თე საქმეშ ბოლოშახ მეჸუნაფა კინ თქვა მოიღანა ჯგირობუას. გოწოს თქვა თე საქმეშ კეთება წიმიჭყითინ, თინა ხოლო ქაძირეთ, ნამდა მანგარო გოკოდეს თეშ კეთება.
11 თაშ ნამდა, ბოლოშახ ქიმიჸუნით წუმოჭყაფილ საქმე; მუთ შეილებუნან ირფელ გაკეთით შხვეფიშ მახვარებელო დო თეშნერო ქაძირეთ, ნამდა კინ თეშ რეთჷ მზათ თე საქმეშ ოკეთებელო, მუჭოთ დუდშე რდითჷ,
12 მუშენდა ღორონთის არძაშ უმოსო მთელ გურით კეთებულ ძღვინ მოწონს. თის ოკო, კოჩიქ თინა შეწირას, მუთ უღჷ დო ვართ ხოლო თინა, მუთ ვა უღჷ.
13 თაშ ნამდა, ვა მოკო, შხვეფს ეუქექუე დო თქვა მონკა ოღალ გიგონჯირუათ.
14 თის იფჩიებუქ, ნამდა ართნერო რდასჷ — მუთ თქვა გოძინუნა, გამნაფშას თინა, მუთ თინეფს ორკუნა, დო მუთ თინეფს ოძინუნა, გამნაფშას თინა, მუთ თქვა გორკუნა,
15 მუჭოთ ჭარილ რე: „ბრელ უღუდუნ თის, ზედმეტ ვა უღუდ დო ჭიჭე უღუდუნ თის, ვარკუდ“.
16 მადლობას ურაგადუთ ღორონთის, მუშენდა ტიტე თიცალ შურ დო გურით მუგკოჯინენა, მუჭოთ ჩქი მუგკოჯინეთ.
17 თის ვარია ვა უთქუალ თიშ კეთებაშენ, მუთ ჩქი ელუჩით. ხვალე თენა ვარინ, მუს ხოლო ოკოდ თეშ კეთება, ათეშენ მუშ სურვილით მოურს თქვანდა.
18 ტიტეწკუმა ართო თქვანდა უტენთ ართ ჯიმას, ნამდგას არძა კრებას ოცქვანა თიშ გურშენ, მუდგას სახიოლო ამბეშ გაცხადებელო ორთჷ.
19 ხვალე თენა ვარინ, თე ჯიმა კრებეფქ დანიშნეს, ნამდა ჩქიმ მაჸალე ქოჸოფედუკო თე ჯგირ საქმეს — აკოშაყარელ ძღვინიშ განაწილებას — მუდგაშ კეთებათ უფალს ვადიდენთ დო ვამტკიცენთ, ნამდა მზათ ვორეთ შხვეფიშ მახვარებელო.
20 თაშ ნამდა, მუჟამსით საქმე ოხუ თქვან კეთებულ გურხვე ძღვინს, ნამდგაქ ჩქინდა იჸუ მენდებულქ, მოკონა, თინა თეშ გუვანაწილათ, ნამდა ბრალქ მითინს ვეგიადვინას,
21 მუშენდა ჩქი ირფელს „ხვალე იეჰოვაშ თოლს ვარინ, ხალხიშ თოლს ხოლო პატიოსანო ვორთუთ“.
22 თინეფწკუმა ართო უტენქ ართ ჯიმას, ნამდგაქ ბრელნერო დამტკიც, ნამდა საქმეს გურგედვალირო ორთჷ, მარა ასე ხოლო უმოს მეტ მონდომა უღჷ, მუშენდა ჯერსჷ, ნამდა ირფელს თეშ გაკეთენთ, მუჭოთ სწორ რე.
23 ტიტეშ გურშენ მითინს მუთუნ ეჭვ ქოუღუნ-და, უჩქუდან, ნამდა თინა ჩქიმწკუმა ართო მსახურენს დო ჩქიმწკუმა ართო ხანდენს თქვან საჯგირობუოთ. მუთუნ ეჭვ შხვა ჯიმალეფშე ქოუღუნან-და, უჩქუდან, ნამდა თინეფ კრებეფიშ მოციქულეფ რენა დო ქრისტეშა დიდება მოუღუნა.
24 თაშ ნამდა, თქვან ჸოროფა დუმტკიცით თინეფს დო ქაძირეთ კრებეფს, მუშენ გოცქვანდით.
სქოლიოეფი
^ ქოძირით „ბიბლიურ სიტყვეფიშ ენწყუმა“.
