მაჟია კორინთელეფ 9:1-15
9 აუცილებერ ვა რე, წმინდეფიშ* მოხვარაშენ მუთუნ მორჭარათ.
2 მიჩქჷ, ნამდა მზათ რეთჷ შხვეფიშ მახვარებელო. მაკედონელეფწკუმა ხოლო გოცქვანთ, აქაიელეფ გოწონერშე მოჸუნაფილ შხვეფიშ მახვარებელო მზათ რენა-მაქ. თე საქმეს თქვან შურ დო გურქ თინეფიშ უმენტაშ ხოლო გეიჸუნუ.
3 მარა ჯიმალეფს იშენით უტენქ თქვანდა, მუშენდა, მუჭოთ თქვანიშ გურშენ იფჩიებუდით, მართალო მზათ გაფუდან ირფელ შხვეფიშ მახვარებელო დო თეშ ვეგშართას, ითამ ტყურელო გოცქვანდით.
4 შილებე მაკედონელ ჯიმალეფქ მოლმაჸუნან დო, თინეფს მომზადებულეფ ვა დოხვადუთ-და, ხვალე თქვა ვარინ, ჩქი ხოლო ქობძირუნთ ონჯღორეს, მუშენდა თქვან ბჯერდეს.
5 ათეშენ საჭიროთ მიფრჩქინ, ჯიმალეფს ქოფთხიკო, ჩქიმ მეულაშახ ქიმერთესკო თქვანდა დო გახაზირესკო თქვან დუნაპირებ გურხვე ძღვინ, მუშენდა ჩქი ქიმურთინ, თე ძღვინ მზათ რდასჷ. თეშნერო ქაძირანთ, ნამდა თეს მთელ გურით ორთუთ დო თეშ კეთება თქვანდა მითინს ვა დუნძალებ.
6 რშუდან: მით წკუნწკას თასუნს, ჭიჭეს გეჭოფუნს, დო მით ხვეიანო თასუნს, ხვეიანო გეჭოფუნს.
7 თითოეულქ თეშ აკეთას, მუჭოთ გურს გინოჭყვიდ დო ვართ ხოლო გურს გალე ვარდა ნანძალუო, მუშენდა ღორონთის თინა უჸორს, მით ხიოლით ორთჷ ჯგირს.
8 ხვალე თენა ვარინ, ღორონთის შეულებ ქვერსემ ჭყოლოფა გეგმირჩქინას, ნამდა აუცილებერ დღას ვა გორკუდან დო ირფელ ხვეიანო გიღუდან ჯგირ საქმეეფიშ ოკეთებელო
9 (მუჭოთ ჭარილ რე: „თიქ ხეგოფაჩილობა გიმირჩქინ, უღონოს ალუდირთჷ; თიშ სიმართლე დღას ველიებ“.
10 თინა, მით ხვეიანო არზენს თასის მათასალს დო ქობალს მაჭკუმალს, თქვა ხოლო ხვეიანო ქიმერჩანა თასის ოთასალო დო ხვეიანო გეგოჭოფაფუანა თქვან ჯგირ საქმეეფიშ მოსავალს).
11 ირფელს ხვამა გიღუნა ღორონთშე, ნამდა ირნერო გურხვეეფ რდათჷ დო თქვან კეთებულ ძღვინიშ გურშენ, ნამდგას ჩქი ენუღანთ შხვეფს, ხალხიქ მარდულობა უძღვინას ღორონთის.
12 შხვეფიშ მახვარებელო კეთებულ თქვან თე ჯგირ საქმე ხვალე წმინდეფშო* ვა რენ, თიშო ხოლო რე, ნამდა ბრელქ მადლობა უძღვინას ღორონთის თე მოხვარაშო.
13 თინეფ დიდებას უძღვინენა ღორონთის თიშ გურშენ, მუდგას შხვეფიშ მახვარებელო ორთუთ. თენა ოძირანს, ნამდა ომორჩილუთ ქრისტეშ გურშენ სახიოლო ამბეს, ნამდგას სახალხოთ აცხადენთ. თეს გეძინელ, ღორონთის თიშენ ხოლო უძღვინენა დიდებას, ნამდა გურხვეეფ რეთჷ ქოთ წმინდეფშო* დო ქოთ შხვეფშო.
14 თინეფ მთელ გურით ილოცენა თქვანო დო ჸოროფას გეგმოხანტუნა ღორონთიშ ჭყოლოფაშენ, ნამდგაქ თქვან საშვალებათ გიმორჩქინდჷ.
15 მადლობა ღორონთის ნინათ ვეიჭარენ ფერ ძღვინიშ გურშენ!
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
