მაჟია ტიმოთე 4:1-22
4 ელაიჩანქ ღორონთიშ დო ქრისტე იესოშ წოხოლე, ნამდგაქ ოკო გასამართლას ცოცხალეფ დო ღურელეფ, მუჟამსით მუშ სამეფო ძალაუფლებათ ქუმურს:
2 უგნუდვალუო იქადაგ ღორონთიშ სიტყვა ქოთ ჯგირ დროს დო ქოთ გლახა დროს; გეგმირჩქინ მოთვინება დო რდა ჯგირ მასწავლებერ, მუჟამსით კოჩის ოძირანქ, სო რე ჩილათირ, გიოწურუანქ დო უდღანუქ.
3 ქუდოდირთუ დრო, მუჟამსით ვემირჩქილუანა სიმართლეშ სიტყვეფს, გეიაჸუნუნა მუნეფიშ სურვილეფს დო ქიგიშაყარანა თიცალ მასწავლებერეფს, მით თის ქუწინა, მუდგაშ მორჩქილაფა მუნეფს ოკონა;
4 სიმართლეს ჸუჯშა ველეშქვანდან იჸი დო ტყურეფს ქუმურჩქილუანა.
5 მარა სი კურცხას რდა, ქუგურზ გაჭირებას, იქადაგ სახიოლო ამბე დო ბოლოშა შეასრულ სქან მსახურება.
6 შესაწირ ღვინცალო გეპწენქ სამსხვერპლოს, მუშენდა მონჭაფილ რე ჩქიმ გათავისფალებაშ დრო.
7 ღირსუან ბრძოლას ვორდჷ, ორულარ შარა ბოლოშა გემკიბრულ დო რწმენა ვამდინუაფ.
8 ჩქიმო უკვე კინოჩუალირ რე სიმართლეშ გვირგვინ, ნამდგას უფალ, მართალ მოსამართლე, სასამართლოშ დღას ძღვინო ქომუჩანს, ხვალე მა ვარინ, არძას, მით მიანატრ უფალიშ გიმოცხადებას.
9 ირნერო ეცად, მალას ქუმორთე ჩქიმდა,
10 მუშენდა დემასიქ თე უბადო ქიანა* ქიჸოროფუ, ქუდომტუ დო თესალონიკეშა მიდართჷ. კრესკე გალატიაშა რე ულირ, ტიტე — დალმაციაშა.
11 ხვალე ლუკა რე ჩქიმწკუმა. მარკოზ ხოლო მოლეჸუნ, ნამდა ღორონთიშ მსახურებას ქიმმეხვარას.
12 ტიქიკე ეფესოშა მიდვაშქვჷ.
13 მოლურქინ, ჩქიმ გინაქუნალ მოლეჯუმე, ნამუთ ტროას კარპოსწკუმა დიპტე, გრაგნილეფ ხოლო მოლამიღ, არძაშ უმოსო პერგამენტეფ* მოსაჭირ.
14 მესპილენძე ალექსანდრექ ბრელ გლახა მიკეთ. იეჰოვა გეგნუგანს ირფელშენ.
15 სი ხოლო შორს რდა თიშე, მუშენდა თიქ მანგარო ეწინააღმდეგ ჩქინ ნარაგადის.
16 პირველო, მუჟამსით დუდიქ დაცვებელქ მაჸუ, მითინქ ვეგედირთჷ ჩქიმ მხარეს, არძაქ მიმოტუ. ღორონთის პასუხ ვა მუთხუდას თინეფშა!
17 მარა უფალ ელამირდჷ დო მამანგარენდჷ, ნამდა ბოლოშა ქიმიპჸუნიკო ქადაგებაშ საქმე დო არძა ხალხიქ ქიმირჩქილუკო ღორონთიშ სიტყვა; უფალქ მირსხჷ ლომიშ პიჯშე.
18 ირნერ უბადობაშე მირსხენს უფალ დო გინმოტენს, ნამდა თიშ ზეციერ სამეფოს ვორდე. დიდება თის სადღამუშოთ! ამინ!
19 მომკითხ პრისკა, აკვილა დო ონისიფორეშ ჸუდეშარეფ!
20 ერასტუსიქ კორინთის ქუდოსქიდ; ტროფიმექ დელახ დო მილეტის ქიდიპტე.
21 ირნერო ეცად, ზოთონჯშახ ქუმორთე.
მოკითხვას გიჩინანა ევბულე, პუდენს, ლინე, კლავდია დო არძა ჯიმა.
22 უფალს დუხვამუდას სქან შურ დო გურ! თიშ ჭყოლოფა ვა მორრკებუდას.
