1. მუ მუმალენა აზრო, მუჟამსით იეჰოვაშ სარკო გუნაჭყეფუეფშე ფიფქრენთ?

მუჟამსით იეჰოვაშ სარკო გუნაჭყეფუეფშე ფიფქრენთ, შილებე დუდ ფსალმუნმაბირე დავითცალო იბგინათ, მიდგაქ იეჰოვას ლოცვას კითხჷ: „მუჟამსით ვუჯინექ ცას, სქან ხეშ ნაკეთებუს, თუთას დო მურიცხეფს, ნამუთ სი გაჭყჷ, ფიფქრენქ: მი რე ღურა მოძუნ ფერ კოჩ, ნამდა რშჷ, ვარდა თიშ სქუა, ნამდა ზრუნენქ თიშე?!“ (ფსალმ. 8:3, 4). დავითცალო, შილებე ჩქი ხოლო ფიფქრენდათ, მუ ჭიჭე ვორეთ იეჰოვაშ გოჭყაფილ მურიცხეფიშ კარს, დო მიკვედან, ნამდა თინა ყურადღებას მაქციენა. მუჭოთ თე სტატიაშე ქობძირუნთ, იეჰოვა პირველ ადამიანეფს უბრალოთ ვაკვირუდუნ, თინეფ მუშ ოჯახიშ წევრეფო გინაშქვჷ.

2. მუს ელუდ იეჰოვა მუშ პირველ მიწიერ სქუალეფშე?

² ადამ დო ევა იეჰოვაშ პირველ მიწიერ სქუალეფ რდეს დო იეჰოვა თინეფიშ მოჸოროფე ზეციერ მუმა რდჷ. თინა ელუდ, ნამდა თე წყვილ ოჯახის ბრელ ჯგირ საქმეს გაკეთენდჷ დო უწუ: „ინაყოფიერით, გემრავლით, გეიოფშით დედამიწა დო ქემინჯით თის“ (დაბ. 1:28). თინეფქ ოკო გეიორჩქინესკო სქუალეფ დო მიკულუესკო მუნეფიშ ჸუდეს, დედამიწას. ადამ დო ევა ღორონთიშ მოთხოვნეფს ქიდემორჩილებდეს-და, მუნეფ დო მუნეფიშ გამნარყ ირიათო ღორონთიშ ოჯახიშ წევრეფო ქუდოსქიდუდეს.

3. მუშენ შემლებნა ფთქუათ, ნამდა ადამ დო ევას იეჰოვაშ ოჯახის საპატიო ადგილ უკებდეს?

³ ადამ დო ევას იეჰოვაშ ოჯახის საპატიო ადგილ უკებდეს. ბიბლია ებრაელეფიშ 2:7-ის იეჰოვაშ გოჭყაფილ ადამიანიშ გურშენ იჩიებ: „ანგელოზეფშე ჭიჭეთ დაბალას გიორინე, დიდებაშ დო პატიშ გვირგვინ ქიგიორთვჷ“. იეჰოვას ადამიანეფშა თიცალ ძალა, გონება დო უნარეფ ვემუჩამ, მუნერით ანგელოზეფს მეჩჷ (ფსალმ. 103:20). მარა ადამიანეფ ხვალე  „ჭიჭეთ დაბალას“ გერენა თე ძალიერ სულიერ ქმნილებეფშე. იეჰოვაქ დასურო მანგარ ჯგირ ცხოვრება მეჩჷ ჩქინ პირველ მშობლეფს.

4. მუქ მაჸუნ ადამ დო ევაშ დაუმორჩილებლობას დო მუს გუვარჩიენთ თე სტატიას?

 ⁴ სანარღოთ, ადამ დო ევაქ მიოდინუეს მუნეფიშ ადგილ იეჰოვაშ ოჯახის. თეს მანგარ გლახა შედეგეფქ მაჸუნ თინეფიშ გამნარყშო, მუდგაშ გურშენ თე სტატიას მაღვენუნა ჩიება, მარა იეჰოვაშ განზრახვა ვათირე. თის ოკო, მორჩილ ადამიანეფ მარადიულო თიშ სქუალეფ რდან. დუდშე მორთ გუვარჩუათ, მუჭო მოძირეს იეჰოვაქ, ნამდა თიშო ძვირფასეფ ვორეთ. თეშ უკულ გუვარჩიენთ, მუშ კეთება შემლებნა ამდღა თიშ ოძირაფალო, ნამდა მოკონა, იეჰოვაშ ოჯახიშ წევრეფ ვორდათ. ბოლოს თი კურთხევეფიშ გურშენ ქიფჩიებუთ, ნამდგათ იეჰოვაშ მიწიერ სქუალეფ მარადიულო გეხარებნა.

5. მუჭო შემლებნა განვადიდათ ღორონთ თიშენ, ნამდა თიქ მუშ ამნახანტო გუმოჭყეს?

⁵ იეჰოვაქ დიდ პატი მიძღვინეს თით, ნამდა მუშ ამნახანტო გუმოჭყეს (დაბ. 1:26, 27). ღორონთიშ ამნახანტო ვორეთ გოჭყაფილინ თიშენ, ჩქი შემლებნა გუვავითარათ ბრელ თიცალ ჯგირ თვისება, მუნერით მუს უღჷ. მაგალთო ჸოროფა, შხვეფიშ მდგომარეობაშა მიშულა, ართგურობა დო სამართლიანობა (ფსალმ. 86:15; 145:17). თეცალ თვისებეფიშ გავითარებათ ჩქი განვადიდენთ იეჰოვას დო გიმოფხანტუნთ თიშ მარდულობას (1 პეტ. 1:14—16). მუჟამსით ჩქინ საქციელით გურს გავუხარენთ ზეციერ მუმას, ჩქი ხოლო ბედნერეფ დო კმაყოფილეფ იპჸით. თეს გეძინელ, იეჰოვაცალ თვისებეფ მიღნან თენა საშვალებას მარზენა, ქიპჸუათ თიცალ ადამიანეფ, მუნერით თის ოკო, ნამდა მუშ ოჯახის ჸუნდას.

6. მუ პატი მეჩჷ იეჰოვაქ ადამიანეფს?

⁶ იეჰოვაქ განსაკუთრებულ ჸუდე მამზად ჩქინო. ადამიანეფიშ გოჭყაფაშახ, ბრელ ხანით ადრე, ღორონთიქ დედამიწა მამზად თინეფიშ ოცხოვრებელო (იობ. 38:4—6; იერ. 10:12). თიქ ბრელ მუდგარენ გაჭყჷ, ნამდა დუდ ბედნერო მიგინაფდესკო, მუშენდა ყურადღებიან დო ხეგოფაჩილ რე (ფსალმ. 104:14, 15, 24). მინშა თინა ოკვირუდ მუშ გუნაჭყეფუეფს დო ორწყედ, ნამდა „ირფელ მანგარ ჯგირ რდჷ“ (დაბ. 1:10, 12, 31). იეჰოვაქ ადამიანეფს მეჩჷ პატი, ნამდა თე სარკო გუნაჭყეფუეფიშ ბატონ ჸოფედესკო დედამიწას (ფსალმ. 8:6). ღორონთიშ განზრახვა რე, ნამდა სრულყოფილ ადამიანეფქ იზრუნან თიშ გუნაჭყეფუეფშე დო თე საქმექ მარადიულ ხიოლ მოუღას თინეფს. ირიათო ქუგმოხანტუნთო ღორონთიშ მარდულობას თე ძვირფას დუნაპირებშენ?

7. მუჭო იძირე იესო ნავეშ ძეშ 24:15-შე, ნამდა ადამიანს ნებაშ თავისუფლება უღჷ?

⁷ იეჰოვაქ ნებაშ თავისუფლებაშ ძღვინ მუჩეს. ჩქი შემლებნა გინობჭყვიდათ, მუნერ ცხოვრებას გიშებგორუნთ (წეკითხით იესო ნავეშ ძეშ 24:15). ნებაშ თავისუფლება რე, მუჟამსით შემლებნა ჩქინით გიშებგორათ, მუ ვაკეთათ. ჩქინ მოჸოროფე ღორონთის მანგარო ახარენს თიშ ძირაფა, მუჭო ისხუნუანა ადამიანეფ თიშ მსახურებას (ფსალმ. 84:11; იგავ. 27:11). ნებაშ თავისუფლებაშ სწორას გიმორნაფა ბრელნერო შემლებნა. გუვარჩუათ, მუ მაგალით დომტეს იესოქ.

8. ქიმიჸონით თიშ მაგალით, მუჭო გიმირინუ იესოქ ნებაშ თავისუფლება.

⁸ იესოშ მაგალითის ქიმვაჸუნუთ-და, შხვეფიშ ინტერესეფს ჩქინ ინტერესეფშე მაღალას ქიგვორინუანთ. ართშა, მუჟამსით იესო დო მოციქულეფ მანგარ შულადირეფ რდეს, გინოჭყვიდეს, მასვანჯეფშა წყნარ ადგილშა მიდართესკო, მარა თექ ვეგშურთეს. ხალხიქ თინეფს ქიმიოგორუ, მუშენდა იესოშ მორჩქილაფა ოკოდეს. მარა იესო ვა გაღიზიანებე, თეშ მანგიორო თის ეცოდ თე ხალხიქ. მუ აკეთ იესოქ? თინა „ბრელ მუდგარენს ოგურუანდჷ თინეფს“ (მარ. 6:30—34). მუჟამსით მეპჸუნთ იესოშ მაგალითის დო ჩქინ დრო დო ენერგიას  შხვეფიშ მახვარებელო იბრინუანთ, განვადიდენთ ჩქინ ზეციერ მუმას (მათ. 5:14—16). თეს გეძინელ, იეჰოვას ვოძირანთ, ნამდა მოკონა, ვორდათ თიშ ოჯახიშ წევრეფ.

9. მუ განსაკუთრებულ საჩუქარ მეჩჷ იეჰოვაქ ადამიანეფს?

⁹ იეჰოვაქ ადამიანეფს მეჩჷ უნარ, ჸუნდან სქუალეფ დო დავალ, ქუდაგურუან თინეფს, უჸორდან ღორონთ დო ემსახურან თის. მშობელ ქორეთ-და, ქაფასენთო თე განსაკუთრებულ საჩუქარს? თიშ უმკუჯინუო, ნამდა იეჰოვაქ ანგელოზეფ ბრელ განსაკუთრებულ უნარით აკურთხჷ, თინეფშა ვემუჩამ პატი, ჸუნდან სქუალეფ. თაშ ნამდა, მშობელ ქორეთ-და, დაფასით სქუალეფიშ რდუალაშ შესაძლებლობა. მშობლეფშა მენდებულ რე დიდ პასუხიშმგებლობა, იეჰოვაშ მოსაწონო მორდან დო ქიგიოწურუან სქუალეფ (ეფეს. 6:4; კან. 6:5—7; ფსალმ. 127:3). თინეფიშ მახვარებელო იეჰოვაშ ორგანიზაცია გიშაშქვანს ბიბლიაშა გერსხილ ბრელ საშვალებას. თეშა მიშურს პუბლიკაციეფ, ვიდეოეფ, ობირეშეფ დო ვებ მასალეფ. არგამა რე, ნამდა ქოთ იეჰოვა დო ქოთ იესო მანგარო აფასენა ახალგაზრდეფს (ლუკ. 18:15—17). მშობლეფ გურს უხარენა იეჰოვას, მუჟამსით ონდუნა თის დო ირფელს ორთნა მუნეფიშ ძვირფას სქუალეფშო. თეცალ მშობლეფ ოხვარნა სქუალეფს, ნამდა უღდან საშვალება, გინირთან იეჰოვაშ ოჯახიშ მარადიულ წევრეფო!

10, 11. მუ გინაშქვჷ იეჰოვაქ შეიოლებერო გიშაჸიდირალიშ საშვალებათ?

¹⁰ იეჰოვაქ მუშ არძაშ უმოს ძვირფას სქუა გაწირ, ნამდა კინ ქუმაშუესკო თიშ ოჯახიშ წევრეფო გინორთაშ საშვალებაქ. მუჭოთ  მა-4 აბზაცის მიფშინეთ, ადამ დო ევაქ ქოთ მუნეფშო დო ქოთ მუნეფიშ გამნარყშო მიოდინუეს ადგილ იეჰოვაშ ოჯახის (რომ. 5:12). ადამ დო ევაქ შეგნებულო ვედემორჩილეს იეჰოვას დო ათეშენ დემსახურეს თეცალ შედეგ, მარა მუშ რაგად შილებე თინეფიშ გამნარყშე? იეჰოვაქ ჸოროფათ მეჩჷ შესაძლებლობა მორჩილ ადამიანეფს, ნამდა კინ გინირთესკო თიშ ოჯახიშ წევრეფო. ღორონთიქ თენა შეიოლებერო გინაშქვჷ მუშ ხვალეგუნაჭყეფ სქუაშ, იესო ქრისტეშ, მსხვერპლიშ საშვალებათ (იოან. 3:16; რომ. 5:19). თე მსხვერპლიშ შედეგო 144 000 ართგურ ადამიან ღორონთიშ სქუათ გინმირთუ (რომ. 8:15—17; გამოცხ. 14:1).

¹¹ თეს გეძინელ, მილიონობით შხვა ართგურ ადამიან მორჩილო ასრულენს ღორონთიშ ნებას. თინეფს უღნა იმენდ, ნამდა ანთასწანიან საბოლა გამოცდაშ უკულ, მიღენა ღორონთიშ ოჯახიშ სრულუფლებიან წევრობას (ფსალმ. 25:14; რომ. 8:20, 21). თე იმენდიშ გურშენ თინეფ მუნეფიშ გუმაჭყაფალს, იეჰოვას, ამდღარშე მიშინუანა, მუჭოთ მუმას (მათ. 6:9). გათელებურეფს ხოლო აღვენუნა საშვალება, ქიგეგან, მუს ითხინს იეჰოვა თინეფშე. მით ღორონთიშ მორჩილებას გიშეგორუნს, საბოლათ თიშ ოჯახიშ წევრო გინირთუ.

12. მუ კითხვას მეფჩანთ პასუხის?

¹² მუჭოთ ბძირით, იეჰოვაქ გიმირჩქინ ინიციატივა დო ბრელ მუდგარენიშ პატი მუჩეს. თინა ცხებულეფს უკვე ღებულენს მუშ სქუალეფო დო „ანაყუ ხალხის“ არზენს იმენდის, ნამდა თინეფ ახალ ქვეყნიერებას ღორონთიშ ოჯახიშ სრულუფლებიან წევრეფო გინირთუნა (გამოცხ. 7:9). მუშ კეთება შემლებნა ამდღა იეჰოვაშა თიშ ოძირაფალო, ნამდა მოკონა, ირიათო თიშ ოჯახიშ წევრეფ ვორდათ?

13. მუშ კეთება შემლებნა, ნამდა გინიფრთათ იეჰოვაშ ოჯახიშ წევრეფო? (მარ. 12:30)

¹³ მთელ გურით ემსახურით იეჰოვას დო თეშნერო ქაძირეთ, ნამდა გიჸორა თინა (წეკითხით მარკოზიშ 12:30). ღორონთიქ ჸოროფათ ბრელ მუდგარენ მაჩუქეს. ართ-ართ არძაშ უმოს დიდ საჩუქარ თიშ თაყვანიშცემაშ შესაძლებლობა რე. იეჰოვაშ ჸოროფას გიმოფხანტუნთ თიშ მითითებეფიშ მეჸუნათ (1 იოან. 5:3). ართ-ართ მითითება, ნამუთ იეჰოვაშე მოურს დო იესოქ  გინოფჩეს, რე მოწაფეეფიშ მომზადება დო თინეფიშ ნათუა (მათ. 28:19). თეს გეძინელ, თინა ხოლო მიწუეს, ნამდა მიჸორდან ართიან (იოან. 13:35). იეჰოვა მორჩილ ადამიანეფს მუშ თაყვანიშმცემელეფიშ მსოფლიო ოჯახიშ მუდმივ წევრეფო მიღენს (ფსალმ. 15:1, 2).

14. მუჭო შემლებნა გიმიფრჩქინათ შხვეფიშ ჸოროფა? (მათ. 9:36—38; რომ. 12:10)

¹⁴ გეგმირჩქინით შხვეფიშ ჸოროფა. ჸოროფა იეჰოვაშ არძაშ უმოს მთავარ თვისება რე (1 იოან. 4:8). თიქ თეიშახ ქომიჸოროფეს, სოიშახ გეფჩინებაფუანდით (1 იოან. 4:9, 10). ღორონთიშ მაგალითის მეპჸუნთ, მუჟამსით გიმიფრჩქინანთ შხვეფიშ ჸოროფას (ეფეს. 5:1). ადამიანეფიშ მიმართ ჸოროფაშ გიმორჩქინაშ არძაშ უჯგუშ საშვალება რე, ქიმვეხვარათ თინეფს იეჰოვაშ გაჩინებაფას, ონდო რე თეშ დრო (წეკითხით მათეშ 9:36—38). თეშნერო, თინეფს საშვალებას ვარზენთ, ღორონთიშ ოჯახიშ წევრო გინორთაშ იმენდ უღდან. პიროვნება დინათუნ თიშ უკულ ხოლო ოკო ვემვოტუათ თიშ მიმართ ჸოროფაშ დო პატიცემაშ გიმორჩქინა (1 იოან. 4:20, 21). მუ მიშურს თეშა? ართ-ართ თინა რე, ნამდა ეჭვ ვემშამღუნა თიშ მოტივეფშა. მაგალთო, მუჟამსით ვენვანჭუთ, მუშენ აკეთ თიქ მუდგარენ, ვა ფიფქრენთ, ნამდა თეშ მიზეზ ეგოისტობა რდჷ. თეშ მანგიორო, პატის ფცენთ ჩქინ ჯიმას დო თის ჩქინ დუდშე უჯგუშო მიფრჩქინანთ (წეკითხით რომაელეფიშ 12:10; ფილ. 2:3).

15. მიშ მიმართ ოკო გიმიფრჩქინათ ჭყოლოფა დო სიკეთე?

¹⁵ გეგმირჩქინით ჭყოლოფა დო სიკეთე არძაშ მიმართ. იეჰოვაშ ოჯახიშ წევრეფო გინორთა ქუმოკონან-და, თიშ სიტყვა ცხოვრებას ოკო გეგმიბრინუათ. მაგალთო, იესო ოგურუანდჷ, ნამდა ჭყოლოფა დო სიკეთე გეგმიფრჩქინითკო არძაშ, თინეფ შქას, ნტერეფიშ მიმართ ხოლო (ლუკ. 6:32—36). მარა მინშა შილებე, თეშ კეთება მიჭირდან. თაშ ქორენ-და, საჭირო რე, იესოცალო ფიქრ დო მოქმედება ქიდიბგურუათ. მუჟამსით ირნერო ვოცადუთ, დევემორჩილათ იეჰოვას დო მეპჸუნთ იესოშ მაგალითის, ჩქინ ზეციერ მუმას ვოძირანთ, ნამდა მოკონა ირიათო თიშ ოჯახიშ წევრეფ ვორდათ.

16. მუჭო შემლებნა, მუთხილუათ იეჰოვაშ ოჯახიშ რეპუტაციას?

¹⁶ მუთხილეთ იეჰოვაშ ოჯახიშ რეპუტაციას. ოჯახის ხშირას ხვადუ, ნამდა უკლაშ ჯიმა უნჩაშ ჯიმაშ მაგალითის მეჸუნს. უნჩაშ მუშ ცხოვრებას ბიბლიურ პრინციპეფს ქირინუანს-და, თინა ჯგირ მაგალით იჸუაფ უკლაშშო დო გლახაშ კეთებას ქიდიჭყანს-და, შილებე უკლაშიქ ხოლო თაშ გაკეთას. თენა იეჰოვაშ ოჯახის ხოლო თაშ რე. მაგალთო, ართგურ ქრისტიანქ დროშ მიკულაშ უკულ, განდგომილო გინირთ, უზნეო ვარდა უპატიოსნო ცხოვრება ქიდიჭყ-და, შხვეფქ შილებე გეიაჸუნან თიშ გლახა საქციელს დო მუნეფქ ხოლო თეშ ქიდიჭყან ცხოვრება. თეშნერო თინეფ გილმალუანა იეჰოვაშ ოჯახიშ რეპუტაციას (1 თეს. 4:3—8). ჩქი ოკო ვევაჸუნათ თე გლახა მაგალითეფს დო მუთუნს ვემეფჩათ საშვალება, დუმაშორან ჩქინ მოჸოროფე ზეციერ მუმას.

17. მუნერ აზროვნებას ოკო ევუჩილითუათ დუდ დო მუშენ?

¹⁷ ქონებაშ მანგიორო იეჰოვას მიენდით. იეჰოვა მოპირნა, ნამდა ქომჩანა ოჭკუმალს, მიკაქუნალს დო დუდიშგითაფორაფალს, მუჟამსით პირველ ადგილს ქიგვორინუანთ ღორონთიშ სამეფოს დო თიშ სამართლიან ნორმეფით იფცხოვრენთ (ფსალმ. 55:22; მათ. 6:33). თე დუნაპირებუს ქიმვენდებუთ-და, ვეფიფქრენთ, ნამდა ქონება, ნამუთ თე ქვეყნიერებას შემლებნა იფშუათ, დოფთხილანა დო მარადიულ ბედნერობას მომღანა. ჩქი მიჩქნა, ნამდა ნამდვილ მშვიდობა ხვალე იეჰოვაშ ნებაშ შესრულებას მოუღ (ფილ. 4:6, 7). თიმწკუმა ხოლო, მუჟამსით ბრელ მუდგარენიშ ჸიდირიშ საშვალება მიღნა, ოკო დეფიფქრათ, ქომბაღნან დო ვარ დრო დო ენერგია თინეფიშ გიმარნაფალო დო მიკალუაფარო. თინეფ ხომ ვედეკინენს ჩქინ ცხოვრებას მთავარ ადგილს? ვაგმოჭყორდან, იეჰოვა ჩქინდე ელჷ, ნამდა  თიშ ოჯახის ბრელ ჯგირ საქმეს გუვაკეთენთ. თენა ნიშნენს, ჩქინ დუდის ვემეფჩათ უფლება, ყურადღება შხვა მუდგარენშა გეგნიბღათ. მუშო ოკო რაგად, ჩქი ვამკონა, ქუვაგურათ თი ახალგაზრდა ქომოლკოჩის, ნამდგაშ ცხოვრებას მთავარ ადგილ ქონებას უკინებუდ დო ათეშენ მიოდინუ ძვირფას შესაძლებლობა, ემსახურკო იეჰოვას, მუჭოთ ართ-ართ თიშ მომავალ სქუაქ (მარ. 10:17—22).

18. მუ დიდებულ პატი დო კურთხევეფით გეხარენა მორჩილ ადამიანეფ მარადიულო?

¹⁸ მორჩილ ადამიანეფ გეხარენა დიდებულ პატით, ნამდა უჸორდან იეჰოვა დო ემსახურან თის მარადიულო! თეს გეძინელ, დედამიწას ცხოვრებაშ იმენდ უღნან თინეფ ხიოლით იზრუნენა თე სქვამ პლანეტაშე, მუნეფიშ ჸუდეშე, ნამუთ იეჰოვაქ სრულყოფილო მანწყუ. მალას მთელ დედამიწას დო ირფელს, მუთ თექ რე, ღორონთიშ სამეფო დურთინუანს დუდშეიან მდგომარეობას. იესო ბოლოს მუღენს თი შედეგეფს, მუდგაქ მაჸუნ ადამ დო ევაშ გადაწყვეტილებას, ქიდიტესკო ღორონთიშ ოჯახ. იეჰოვა მილიონეფს გათელენს დო ქიმეჩანს თინეფს შესაძლებლობას, მარადიულო სრულყოფილ ჯამრთელობათ იცხოვრან სამოთხეთ გინორთელ დედამიწას (ლუკ. 23:42, 43). მუჟამსით იეჰოვაშ თაყვანიშმცემელეფიშ ოჯახიშ მიწიერ ნაწილ ქიმიოჭირინუანს სრულყოფილებას, თითოულს აღვენუ თიცალ დიდება, ნამდგაშ გურშენ ბიბლიას ჭარჷ (ებრ. 2:7).

19. მუ ოკო ფშუდან ირიათო?

¹⁹ თქვა ხოლო „ანაყუ ხალხ“ შქას ქორეთ-და, დიდებულ იმენდ ნორღვენა. ღორონთის უჸორთ დო ოკო, თიშ ოჯახიშ წევრეფ რდათ. თაშ ნამდა, ირფელ გაკეთით თიშ მოწონაშ მიოღებელო. ირდღაშიან ცხოვრებათ ქაძირეთ, ნამდა გურს დო გონებას გიღნა ღორონთიშ დუნაპირებუეფ. მარდულ რდათ თი პატიშე, ნამდა ომსახურუთ ძვირფას ზეციერ მუმას დო დაფასით თიშ მარადიულო განდიდებაშ შესაძლებლობა!