1, 2. მუჭოთ ფსალმუნიშ 34:8-შე იძირე, მუჭო შემლებნა გებგათ, მუნერ ჯგირ რე იეჰოვა?

წერმიდგინით, ნამდა მიდგარენ გაპატიჟენა ოჭკუმალშა, ნამუთ დღას ვა გაიმორსებნა. თქვა შილებე თიშ ძირაფათ, შურიშ ნთხუაფათ, რეცეპტიშ კითხირით ვარდა შხვეფიშ აზრიშ მორჩქილაფათ გეგათ, მუნერ რე თინა. მარა ქიმგეწონებნა დო ვარინ თიშ ოძირაფალო, ოკო გამორსათ თე ოჭკუმალ.

² იეჰოვაშ სიჯგირაშ გურშენ გაგება შემლებნა მუჭოთ ბიბლია დო პუბლიკაციეფიშ კითხირით, თეშ შხვეფიშ მორჩქილაფათ, მუჭო მიღეს თინეფქ ღორონთშე კურთხევეფ. მარა იეჰოვა სინამდვილეს მუნერ ჯგირ რენ თის ხვალე თიმწკუმა გებგენთ, მუჟამსით ჩქი „გუვამორსენთ“ თიშ სიჯგირას (წეკითხით ფსალმუნიშ 34:8). მორთ გუვარჩუათ ართ მხარე, მუ შემთხვევას შემლებნა თეშ კეთება. შილებე იეჰოვაშა სრულ დროთ მსახურება მოკოდან, მარა თე მიზანიშ მიოჭირნაფალო ოკო გუვამარტივათ ჩქინ ცხოვრება. იესოქ დემეპირეს, ნამდა სამეფოშ ინტერესეფს პირველ ადგილს ქიგვორინუანთ-და, იეჰოვა ქომჩანა ირფელს, მუთ სინამდვილეს მოსაჭირნა. შილებე ბრელშა მიკითხირნა თე დუნაპირებ, მარა ჩქინ დუდშა დღას ვეგმომცადებნა თიშ შესრულება (მათ. 6:33). თეშ უმკუჯინუო, იესოშ დუნაპირებუშ რწმენათ ჩქი ვოცადუთ ნაკლებ ხარჯ მიღდან, სამუშას უმოს ჭიჭე დრო დუთმათ დო მთავარ ყურადღება მსახურებაშა მაფდან გინოღალირ. თაშ მოქციებათ, ჩქინ პირად გამოცდილებაშე ქიდიბგურუანთ, ნამდა იეჰოვა დასურო ზრუნენს ჩქინ საჭიროებეფშე დო პირადო „გუვამორსენთ“ თიშ სიჯგირას.

3. ფსალმუნიშ 16:1, 2-იშ თანახმას, მიშ მიმართ გიმირჩქინანს იეჰოვა სიკეთეს?

³ იეჰოვა „მითინს ვარკენს სიკეთეს“, თინეფს ხოლო მით ვეჩინენს თის (ფსალმ. 145:9; მათ. 5:45). მარა ღორონთ განსაკუთრებულო  თი პიროვნებეფს არზენს ბრელ კურთხევას, მიდგას მუ უჸორს დო მთელ გურით ომსახურ (წეკითხით ფსალმუნიშ 16:1, 2). მორთ გუვარჩუათ ნამთინე კურთხევა, მუთ იეჰოვაქ მუჩეს.

4. მუჭო ოძირანს იეჰოვა მუშ სიჯგირას თინეფს, მით იჭყანს თიწკუმა დაახლოებას?

⁴ ჩქი ვორწყეთ, ნამდა თიშ გიმორნაფა, მუდგას იეჰოვაშე ბგურაფლენთ, ირო ჯგირო მოქმედენს ჩქინ ცხოვრებაშა. მუჟამსით ღორონთიშ გურშენ ქიდიბგურეთ დო ქიპჸოროფეთ თინა, ქიმმეხვარეს, გივორჯგინითკო მუშო მიუღებელ ფიქრეფს დო საქმეეფს (კოლ. 1:21). დუდიშ მეძღვინუა დო ნათუაშ უკულ, მუჟამსით იეჰოვაქ სუფთა სინდის მუჩეს დო მემღეს მუშ ხოლოშიან მეგობარო, ხოლო უმოსო გეგმოფცადით თიშ სიჯგირა (1 პეტ. 3:21).

5. მუჭო გიმოფცადუნთ იეჰოვაშ სიჯგირას მსახურებაშ დროს?

⁵ ჩქი მსახურებას მონაწილებაშ დროს ხოლო უმოსო ვორწყეთ იეჰოვაშ სიჯგირას. მაგალთო, იეჰოვაშ ბრელ მსახურ მორდებუან რე; თქვა ხოლო თაშ ხომ ვა რეთ? შილებე იეჰოვაშ მსახურო გინორთაშახ, დღას ვეფიქრენდით, ნამდა უჩინებუშ კარშა ქიმიშით დო გეგნოჩანდით ცნობას, ნამუთ ბრელს ვა მოწონს. მარა ამდღა, თეს რეგულარულო ორთუთ. ხვალე თენა ვარინ, იეჰოვაშ მოხვარათ თე საქმეს ხიოლ ხოლო მოუღ თქვანდა. თეს გეძინელ, ღორონთიშ მოხვარა ბრელნერ სიტუაციას იგინით. თიქ მიგეხვარეს, ვაიდინუაფდესკო სიმშვიდე, მუჟამსით წინააღმდეგობას ხვადუდით; გუგოშინეს საჭირო ბიბლიურ მუხლ თი მობინადრეწკუმა ჩიებაშ დროს, ნამდგაქ ინტერეს გიმირჩქინ დო მერჩეს ძალა, გაგრძელითკო ქადაგება თიშ უმკუჯინუო, ნამდა თქვან ტერიტორიას ხალხ ვეგმირჩქინანდჷ ინტერესის სამეფოშ ცნობაშ მიმართ (იერ. 20:7—9).

6. მუჭო იძირე იეჰოვა მამზადენან თევრეშე თიშ სიჯგირა?

⁶ იეჰოვა მსახურებაშო მამზადენან თით ხოლო მოძირანა მუშ სიჯგირას (იოან. 6:45). შქა მარაშ შეხვალამეფს ძირაფილ რე ჩიებაშ ნიმუშიშ პრაქტიკულ ვიდეოეფ, მუდგაშ გიმორნაფა შემლებნა მსახურებაშ დროს. დუდშე შილებე ბნერვიანენდათ, მუჟამსით ახალ მეთოდეფიშ გიმორნაფას იბჭყანთ, მარა უკულ ქიმეფხვადათ, ნამდა თე რჩევეფიშ მეჸუნას ჩქინ ტერიტორიას ჯგირ შედეგეფ მოუღ. თეს გეძინელ, კრებაშ შეხვალამეფს დო კონგრესეფს ელამჩანა, მსახურებაშ თიცალ ფორმეფს მიბღათ მონაწილება, ნამდგაშ გამოცდილება ვამღუნა. შილებე თენა ხოლო რდას ჩქინ ნერვიანობაშ მიზეზ, მარა თაშ ქიმიბქციებუთ-და, იეჰოვა მაკურთხენა. მორთ გუვარჩუათ ნამთინე კურთხევა, ნამდგას იეჰოვა მარზენა, მუჟამსით, მუდგა მდგომარეობა ვა მიღდანინ, ახალ მეთოდეფით ვოცადუთ ნამ შემლებნან თინა გუვაკეთათ მსახურებას. თეშ უკულ ქობძირუნთ, მუჭო შემლებნა მსახურებას უმოსიშ კეთება.

7. მუ კურთხევეფს მიბღენთ, მუჟამსით ქივეცადებუთ უმოს გუვაკეთათ მსახურებას?

⁷ ჩქი უმოსო ვეახლოებუთ იეჰოვას. გუვარჩუათ ართ უხუცესიშ, სამუელიშ, * მაგალით, ნამუთ ოსურწკუმა ართო კოლუმბიას მსახურენს. თე წყვილშა ხიოლ მოუღუდ მუნეფიშ კრებას პიონერო მსახურებას, მარა ოკოდეს, მეტ გაკეთესკო დო იმსახურესკო თიცალ კრებას, სოდეთ უმოს საჭიროება რდჷ. თე მიზანიშ მიოჭირნაფალო თინეფს მუდგარენეფ აფდეს დათმებელ. სამუელი იჩიებ: „ჩქი გეგმიბრინეთ მათეშ 6:33-ს მოჩამილ მითითება დო მივოტეთ თიცალ მუდგარენეფიშ ჸიდირ, მუთ აუცილებერ ვა მაფდეს, მარა არძაშ უმოს ძნელ ჸუდეშ დოტება რდჷ. თინა ჩქინ გემოვნებათ დო ვალ ვეგებდვალნან თეშ მაფდეს შენებულ“. ახალ დანიშნულებაშ უკულ თე წყვილქ ქოძირ, ნამდა თინეფს უკვე ბრელით ნაკლებ ფარა ოსაჭირდეს ოცხოვრებელო. სამუელი აგრძელენს: „ჩქი ქობძირით, მუჭო  ხემძღვანელენს იეჰოვა ჩქინ ნაბიჯეფს დო პასუხენს ლოცვეფს. ქიბგინით, ნამდა იეჰოვას მოწონს ჩქინ მოქმედება დო ვუჸორთ, თეშნერო თენა დღას ვამგინაფნა“. ქოიღნანო საშვალება, მსახურებაშ ნამთინე ფორმას უმოს გაკეთათ? თაშ ქორენ-და, შეილებნა დარწმუნებულ რდათ, ნამდა თეშნერ მოქმედებათ იეჰოვას უმოსო დეახლოებუთ დო თინა იზრუნენს თქვანდე (ფსალმ. 18:25).

8. მუს ბგურაფლენთ ივანი დო ვიქტორიაშ სიტყვეფშე?

⁸ მსახურებას ჩქინდა ხიოლ მოუღ. ყურადღება ქიმიაქცით ართ დაქორწინებულ წყვილიშ, ივანი დო ვიქტორიაშ, სიტყვეფს, მით ყირგიზეთის პიონერეფო მსახურენა. თინეფქ გემარტივეს მუნეფიშ ცხოვრება, მუდგაქ საშვალება მეჩჷ, შხვადოშხვა დანიშნულებას მიღესკო მონაწილება, თინეფ შქას მშენებლობას. ივანი იჩიებ: „ჩქი თითოულ დანიშნულებაშო ნამ შემლებდესინ, ირფელ გუვაკეთით. მართალ რე, დღაშ ბოლოს შულადირეფ ვორდით, მარა მიღდეს მშვიდობაშ დო კმაყოფილებაშ გრძნობა, მუშენდა ჩქინ ენერგიას სამეფოშ საქმეშენ ვახარჯენდით. თეს გეძინელ ჩქინდა ხიოლ მოუღუდ ახალ მეგობრეფიშ შიბას დო სასიამოვნო მოგონებეფს“ (მარ. 10:29, 30).

9. მუჭო გიმირჩქინ ართ დაქ მონდომა, ნამდა რთულ მდგომარეობაშ უმკუჯინუო, უმოს მეტ გაკეთკო მსახურებას დო მუ რდჷ შედეგ?

⁹ ჩქინდა იეჰოვაშ მსახურებას თიმწკუმა ხოლო მოუღ ხიოლ, მუჟამსით რთულ მდგომარეობა მიღნა. მაგალთო, დასავლეთ აფრიკას მახორუ ქომონჯღურელ და მირაქ, ნამუთ ექიმ რე, სამუშაშე პენსიაშა გიშულაშ უკულ პიონერო მსახურება ქიდიჭყჷ. თინა ართრიტით რე დალახებურ დო კარდოკარ ართ საათიშ მეტ ვამსახურებე, მარა შეულებ უმოს მეტ იქადაგას სტენდეფით. თის ბრელ კინ მეკითხირ დო ბიბლიაშ გურაფა უღჷ, თინეფშე ნამთინეს ტელეფონით ოკავშირ. მუშენ გინოჭყვიდ მირაქ იეჰოვაშო უმოსიშ კეთება? თინა იჩიებ: „ჩქიმ გურ იეჰოვა დო იესო ქრისტეშ ჸოროფათ რე ეფშა. იეჰოვას ხშირას ფთხინქ, ქიმმეხვარას, გუვაკეთე ირფელ მუთ შემლებ თიშ მსახურებაშო“ (მათ. 22:36, 37).

10. მუჭოთ 1 პეტრეშ 5:10-შე იძირე, მუს ღებულენა იეჰოვაშე თინეფ, მით სულიერ მიზნეფს მიოჭირინუანა?

¹⁰ ჩქი უმოს გურაფას ბღებულენთ იეჰოვაშე. კენიქ, ნამუთ მავრიკის პიონერო მსახურენს, მუშ დუდშა გეგმოცად თე სიტყვეფიშ ჭეშმარიტება. მუჟამსით თიქ ჭეშმარიტება ქიგეგ, მიოტუ უნივერსიტეტის გურაფა, დინათ დო ქიდიჭყჷ სრულ დროთ მსახურება. კენი იჩიებ: «ვოცადუქ, წინასწარმეტყველ ესაიაშ სიტყვეფიშ მიხედვით იფცხოვრე, ნამდგაქ თქუ: „მა ვურქ! მა მიდმაშქვ!“» (ეს. 6:8). კენი მონაწილებას ღებულენდჷ მუსხირენ სამშენებლო პროექტის დო მთარგმნელობით ჯგუფის ბიბლიაშა გერსხილ პუბლიკაციეფიშ მშობლიურ ნინაშა თარგმნუას ოხვარუდ. „მა თიცალ გურაფა მიბღჷ, ნამდგაქ მიმეხვარ, გუვავითარკო უნარეფ, ნამუთ ჩქიმ დანიშნულებაშ შეიოსრულებერო მოსაჭირუდ“ — იჩიებ კენი. მარა კენის ხვალე თინა ვა დუგურუაფ, კონკრეტულ საქმე მუჭო აკეთკო. თინა აგრძელენს: „ქობძირ, მუსხიშ კეთება შემლებუდ დო თი თვისებეფიშ გურშენ ქიდიბგურე, ნამდგაშ გავითარება მოსაჭირუდ, ნამდა იეჰოვაშ უჯგუშ მსახურო გინიფრთიკო“ (წეკითხით 1 პეტრეშ 5:10). თქვა ხოლო ხომ ვეგნაჯინედით თქვან მდგომარეობას, ნამდა ქოძირათ, ქეშეილებნა დო ვარ უმოს მეტ გურაფა მიღათ იეჰოვაშე?

11. მუ მონდომა გიმირჩქინეს დალეფქ სამხრეთ კორეას, ნამდა უმოს გაკეთესკო მსახურებას დო მუ რდჷ თეშ შედეგ? (ქოძირით სურათ გალენ გვერდის)

¹¹ იეჰოვაშ ბრელ ხანიშ მსახურეფ ხოლო ღებულენა გურაფას, მუჟამსით თინეფ მსახურებაშ ახალ მეთოდეფს მონაწილენა. კოვიდ -19 პანდემიაშ პერიოდის სამხრეთ კორეაშ კრებაშ უხუცესეფქ ჭარეს: „ნამთინე, მით ფიქრენდჷ, ნამდა ჯამრთელობაშ მდგომარეობაშ გურშენ ვეშულებუდ ქადაგება, ამდღა თეს ვიდეოკონფერენციაშ საშვალებათ ორთჷ. 80 წანას გინოჩილათირ სუმ დაქ ქიდიგურუ ახალ ტექნოლოგიეფიშ  გიმორნაფა დო თითქმის ირდღას მსახურენა“ (ფსალმ. 92:14, 15). ხომ ვა გოკონა მეტ გაკეთათ მსახურებას დო ხოლო უმოსო „გამორსათ“ იეჰოვაშ სიჯგირა? გუვარჩუათ ნამთინე ნაბიჯ, ნამუთ მიგეხვარებნა თე მიზანიშ მეჭირნაფას.

12. მუს ოპირ იეჰოვა თინეფს, მით ონდჷ თის?

¹² ქიდიგურეთ იეჰოვაშა მენდება. თინა მოპირნა, ნამდა მაკურთხენა, მუჟამსით ვონდუთ დო მუთ შემლებნან ირფელს ვორთუთ თიშო (მალ. 3:10). კოლუმბიას მახორუ დაქ, ნამდგას ფაბიოლა ჯოხო, მუშ დუდშა გეგმოცად, მუჭო შეასრულ იეჰოვაქ თე დუნაპირებ. ნათუაშ უკულ ხეთეშე თის სრულ დროთ პიონერობაშ დოჭყაფა ოკოდ; მარა ოჯახ, ქომონჯ დო სუმ სქუა, თიშ შემოსავალშა რდეს დამოკიდებულ. ათეშენ, მუჟამსით სამუშაშე პენსიაშა ულა უკვე შეულებუდ, თინა ირიათო ლოცულენდჷ დო მოხვარას თხინდჷ იეჰოვას. ფაბიოლა იჩიებ: „მუჭოთ წესინ, პენსიაშა გინულას ბრელ დრო ოსაჭირ, მარა ჩქიმ შემთხვევას, განცხადებაშ მიშაღალაშე ართ თუთაშა ქუმორთ პასუხიქ. თენა მართალო სასწაულ რდჷ!“. ჟირ თუთაშ უკულ თიქ ქიდიჭყჷ პიონერობა. ასე 70 წანას რე გინოჩილათირ დო პიონერობაშ 20 წანაშე მეტ ხანიშ გამოცდილება უღჷ. თე დროშ დინახალე, თიქ ბრუო პიროვნებას მეხვარ, ნამდა დინათკო. თინა იჩიებ: „მართალ რე, მინშა დუდის სუსტო ბგინაფლენქ, მარა იეჰოვაშ ირდღაშიან მოხვარათ მეპჸუნქ პიონერობაშ გეგმას“.

13, 14. ნამ მაგალითეფს შეულებ ჩქინ მოხვარა, ნამდა ქიმვოჭირინუათ მიზნეფს?

¹³ ქიდიგურეთ თინეფიშ მაგალითეფშე, მით იეჰოვას ონდუდ. ბიბლია ეფშა რე თინეფიშ მაგალითეფით, მით ბრელს ხანდენდჷ  იეჰოვაშ მსახურებას. ბრელ შემთხვევას იეჰოვაქ ხვალე თიშ უკულ აკურთხჷ მუშ მსახურეფ, მუთ თინეფქ მუნეფიშ მოქმედებათ ნდობა ქაძირეს ღორონთის. მაგალთო, იეჰოვაქ აბრაამი თიშ უკულ აკურთხჷ, მუთ თიქ ქიდიტუ მუშ ჸუდე, თიშ უმკუჯინუო, ნამდა „ვა უჩქუდ, სო მიშჷ“ (ებრ. 11:8). იაკობიქ ანგელოზწკუმა რკინებაშ უკულ მიღჷ განსაკუთრებულ კურთხევა (დაბ. 32:24—30). მუჟამსით ისრაელეფქ დაპირებულ ქიანას ქადირთეს, ხვალე თიშ უკულ შეიალებუეს მალწყარ იორდანეშ გინოკვათუაქ, მუთ მღვდელეფქ კუჩხ ქენოდგეს თე წყარს (იეს. 3:14—16).

¹⁴ თქვა იეჰოვაშ ამდღანერ მსახურეფიშ მაგალითეფშე ხოლო შეილებნა დიგურუათ, მიდგაქ მიენდეს იეჰოვას დო მიოჭირინუეს მიზნეფს. მაგალთო, ჯიმა პეიტონი დო თიშ ოსურ დაიანას მანგარო მოწონდეს თი და დო ჯიმალეფიშ მაგალითეფიშ კითხირ, მიდგაქ უმოს აკეთ იეჰოვაშ მსახურებას. თეცალ მაგალითეფ მოჩამილ რე სტატიეფიშ სერიას „თინეფქ მზადყოფნა გიმირჩქინეს“. * პეიტონი იჩიებ: «მუჟამსით თინეფიშ შემთხვევეფს ბკითხულენდით, დუდის თეშ ბგინაფლენდით, ითამ ვუჯინედით, მუჭო სიამოვნენს შხვას გემუან ოჭკუმალ. მუთ უმოს ხანს ვუჯინედით, თით უმოსო მოკოდეს, „გუვამორსითკო დო ქობძირითკო, მუშმაჯგირა რე იეჰოვა“». საბოლათ, პეიტონი დო დაიანაქ თექ გეგნორთეს მსახურებათ, სოდეთ მაქადაგებელეფიშ საჭიროება რდჷ. თქვა ქუგაფნანო თე სტატიეფიშ სერიეფ კითხირებულ? ვარდა ქუგაფნანო ძირაფილ ვიდეოეფ „ქადაგება დაშორებულ ტერიტორიას — ავსტრალია“ დო „ქადაგება დაშორებულ ტერიტორიას — ირლანდია“ [ქორთ.], ნამუთ მოჩამილ რე ვებგვერდის jw.org? თე მასალაქ შილებე ქიმგეხვარან, ქოძირათ, მუჭო შეილებნა უმოსიშ კეთება მსახურებას.

15. მუჭო შეულებ ჯგირ საზოგადოებას ჩქინ მოხვარა?

¹⁵ გეგშეგორით ჯგირ საზოგადოება. ჩქი დღას ვამჭკუმნან ფერ ოჭკუმალიშ გამორსება თიმწკუმა უმოსო მოკონა, მუჟამსით თიცალ ხალხწკუმა ვორეთ, მიდგას მოწონს თინა. თეშნერო, მუჟამსით თიცალ საზოგადოებაწკუმა მიღნა ურთიერთობა, მიდგას იეჰოვა პირველ ადგილშა გეურე, უმოსო მაჸინა გურ, მეტ გუვაკეთათ ღორონთიშ მსახურებას. თაშ მოხვად კენტი დო ვერონიკაშ შემთხვევას. კენტი იჩიებ: „მეგობრეფ დო ოჯახ ელამჩანდეს, მსახურებაშ ახალ მეთოდეფ ქომცადებდესკო. ჩქი ქუგოფხვადით, ნამდა თინეფწკუმა ურთიერთობაქ, მიდგას სამეფო პირველ ადგილშა გეურდჷ, მიმეხვარეს, მიღდესკო ჩქინ დუდიშ რწმენა დო გუვაკეთითკო მუდგაინ ახალ“. თინეფ ასე სერბეთის სპეციალურ პიონერეფო მსახურენა.

16. მუჭოთ ლუკაშ 12:16—21-ის ინოჭარილ იესოშ მაგალითშე იძირე, მუშენ ოკო ვორდათ მზათ, მიდაფრთათ მსხვერპლშა?

¹⁶ მსხვერპლშა მეუთ იეჰოვაშ გურშენ. საჭირო ვა რე, მუთ მიჸორა, ირფელშე ვარია ფთქუათ, ნამდა იეჰოვას გურ გუხარათ (ეკლ. 5:19, 20). მარა, მსხვერპლშა ვა მოკონა ულან თიშენ, იეჰოვაშ მსახურებას უმოსიშ კეთებაშე ვარიას ქიფჩიებუთ-და, შილებე თიცალ შეცდომა დავუშვათ, მუნერით იესოშ მაგალითის მოშინაფილ კოჩიქ დუშვჷ, ნამდგაქ კომფორტულ ცხოვრება მინწყუ, მარა გიჭყოლიდუ ღორონთ (წეკითხით ლუკაშ 12:16—21). კრისტიანი, ნამუთ საფრანგეთის ცხოვრენს, იჩიებ: „ჩქიმ დრო დო ენერგიაშ დიდ ნაწილს იეჰოვაშო დო ოჯახშო ვებრინუანდჷ“. თიქ დო მუშ ოსურქ გეგნოჭყვიდეს პიონერობა, მარა თე მიზანიშ მიოჭირნაფალო სამუშა ოკო მიოტუესკო. თინეფქ დუდიშ ეიოჯუმალარო ოფისეფიშ დო ჸუდეეფიშ დონწყუალა ქიდიჭყეს დო ქიდიგურეს, მუჭო იბაღინესკო ჭიჭე შემოსავალ. ქოღირუდუო თე მსხვერპლშა ულა? კრისტიანი იჩიებ: „ჩქინდა ასე უმოს მეტ ხიოლ მოუღ მსახურებას დო თიშ ძირაფას,  მუჭო გებულენა იეჰოვაშ გურშენ თინეფ, მიდგას კინ მივაკითხანთ დო მიდგას ბიბლიას ვოგურუანთ“.

17. მუ შილებე მოცილდან მსახურებაშ ახალ მეთოდეფიშ გიმორნაფას?

¹⁷ მზათ რდათ მსახურებაშ ახალ მეთოდეფიშ გიმარნაფალო (საქ. 17:16, 17; 20:20, 21). შერლის, ნამუთ შეერთებულ შტატეფს პიონერო მსახურენს, ᲙᲝᲕᲘᲓ -19 პანდემიაშ პერიოდის მსახურებაშ მეთოდიქ ოთირალქ აჸუ. დუდშე თის უჭირდჷ ტელეფონით მსახურებაშ დოჭყაფა, მარა სარაიონო მონახულებაშ დროს ქიდიგურუ, მუჭო შეულებუდ თეშ კეთება დო ქიდიჭყჷ მსახურებაშ თე ფორმას რეგულარულ მონაწილებაშ მეღება. შერლი იჩიებ: „დუდშე მოშქურუდ, მარა ასე თის ჩქიმდა ხიოლ მოუღ. ასე უმოს ადამიანს ვოკავშირუთ, ვინემ კარდოკარ მსახურებაშ დროს!“.

18. მუს შეულებ მიმეხვარან, გივორჯგინათ სირთულეეფს, მუჟამსით ვოცადუთ, უმოს გუვაკეთათ მსახურებას?

¹⁸ ქუდანწყით გეგმა დო იმოქმედით. სირთულეეფიშ დროს ჩქი ბლოცულენთ დო ირფელს ვორთუთ, ნამდა ფიქრიშ უნარ გეგმიბრინუათ გამოსავალიშ ოგორალო (იგავ. 3:21). სონია, ნამუთ ევროპას ბოშურ ნინაშა მორაგადე ჯგუფის სრულ დროთ პიონერო მსახურენს, იჩიებ: „ჩქიმ გეგმეფს გიმობჭარუნქ დო თოლშო მალაფარ ადგილს დობდვანქ. სტოლშა გეხანტილ მაფჷ ჟირ შარა, ნამუთ შხვადოშხვა მხარეშა მეურს. მუჟამსით გადაწყვეტილება მაფჷ მიოღებელ, გივოჯინექ თე ნახანტას დო ფიფქრენქ, ნამ მიმართულება მემიჸონანს ჩქიმ მიზანშა“. სონია ოცად, ვადინუას დადებით განწყობა მუშ სირთულეეფიშ მიმართ. თინა აგრძელენს: „ნებისმიერ მდგომარეობა შილებე ჩქიმო რდას კიდალა, ნამუთ წოხოლე ვამტენს ვარდა ხიდე, ნამუთ მოხვარ; თენა დამოკიდებულ რე თიშა, მა მუჭო ვუჯინექ სიტუაციას“.

19. მუ ოკო მაფდან გინოჭყვიდილ?

¹⁹ იეჰოვა ჩქი ბრელნერ კურთხევას მარზენა. თიშ ოდიდებელო ირფელს ქუვორთუთ-და, ვოძირანთ, ნამდა მარდულ ვორეთ (ებრ. 13:15). თეშა შილებე მიშეშას ახალ საშვალებეფიშ გორუა, ნამდა მეტ გუვაკეთათ მსახურებას, მუდგაშ შედეგო ხოლო უმოს მეტ კურთხევეფს მიბღენთ. მორთ ირდღას დობგორათ საშვალება, ჩქინ დუდშა გეგმოფცადათ, „მუშმაჯგირა რე იეჰოვა!“. შედეგო ჩქი ხოლო იესოცალო იპჸით, მიდგაქ თქუ: „ჩქიმ ოჭკუმალ თინა რე, ნამდა ჩქიმ მუმაშქუმალარიშ ნება შევასრულე დო თიშ საქმე ბოლოშა ქიმიპჸუნე“ (იოან. 4:34).