ბიბლიას ბრელ ართგურ ქომოლკოჩიშ მაგალით რე მოჩამილ, მიდგას „ჩქინცალ გრძნობეფ უღუდ“ (იაკ. 5:17). მაგალთო, შემლებნა ქობძირათ რომაელეფიშ 7:21—24, სოვრეშეთ იძირე, მუს გინაფლენდჷ პავლე მოციქულ. თექ ჭარჷ: „მოკო ვაკეთე, მუთ სწორ რე, მარა გლახა ვამოთხუ . . . ცოდა კოჩ ვორექ!“. ალალას გიმოხანტილ თეცალ გრძნობეფ ჩქი ხოლო ელამკინანა გურშა, მუჟამსით მიხვადნა არასრულყოფილებაწკუმა ბრძოლა.

პავლექ შხვა გრძნობეფ ხოლო გიმოხანტჷ. გალატელეფიშ 2:20-ის პავლე იესო ქრისტეშ გურშენ იჩიებ: „ქომიჸოროფუ დო დუდ გაწირ ჩქიმ გურშენ“. თინა დარწმუნებულ რდუ თე სიტყვეფს. თქვა ხოლო თაშ გინაფლენთო დუც? შილებე ირიათო თაშ ვა რდას.

შილებე ულირს დაშებულიშ გურშენ დუც უღირსო გინაფლენდათ, ათეშენ გიჭირდან თიშ დაჯერება, ნამდა იეჰოვას უჸორთ დო გაპატიენა; თეს გეძინელ, შილებე იესოშ გიშაჸიდირალ პირად ძღვინო ვემირჩქინათ. ნამდვილო ქაკონო იესოს, ნამდა გიშაჸიდირალ პირად ძღვინო მიფრჩქინათ? თენა თაშ ქორენ-და, მუ მიმეხვარებნა თეცალ დამოკიდებულებაშ გავითარებას? მორთ გუვარჩუათ თე საკითხეფ.

იესოს ოკო, ნამდა გიშაჸიდირალ პირად ძღვინო მიფრჩქინათ. მუშენ შემლებნა თეშ რაგად? მორთ გუვარჩუათ ართ მაგალით, ნამუთ ლუკაშ 23:39—43-ს რე ინოჭარილ. იესოშ გვერდით ართ უბადოშ მაკეთებელ ბოძის ქიმკაჭკადეს. თინა აღიარენს, ნამდა სერიოზულ მუდგარენ აფჷ დაშებულ. მუჭოთ იძირენ, თენა ნამდვილო თაშ რე, მუშენდა ბოძიშ მიკოჭკადუათ თიცალ პიროვნებას ასაჯენდეს, მიდგას მძიმე დანაშაულ აფუდ ჩადენილ. თინა მანგარო ნარღენს დაშებულს დო იესოს თხინს: „ქუგომშინ, მუჟამსით სქან სამეფოს იჸიქ“.

მუჭო უპასუხ იესოქ თის? წერმიდგინით, მუნერ მტკივნეულ იჸიდ იესოშო, მუჟამსით დუც მიკართინუანდჷ, ნამდა ქინაჯინკო უბადოშ მაკეთებელს. მართალ რე, იესო მანგარო იტანჯებუდ, მარა იშენით გემუანო ქუპასუხ დო გურიშემაკინალ სიტყვეფ უწუ: „ჭეშმარიტებას გირაგადუქ ამდღა: ჩქიმწკუმა ართო იჸუაფუქ სამოთხეს“. იესოს შეულებუდ თე პიროვნებას უბრალოთ ქუგაშინკო, ნამდა „კოჩიშ სქუაქ თიშენ მორთჷ, ნამდა . . . შეწირკო მუშ სიცოცხლე ბრელიშ გიშაჸიდირალო“ (მათ. 20:28). მარა თეშ მანგიორო, იესოქ უბადოშ მაკეთებელს ქაძირუ, ნამდა თე გიშაჸიდირალ პირადო თის ოხუდ. თიქ მეგობრულ ტონით დურაგადუ დო იმენდ მეჩჷ, ნამდა იცხოვრენდჷ სამოთხეს, დედამიწას.

იესოს ოკოდ, გიშაჸიდირალ პირად ძღვინო მირჩქინკო უბადოშ მაკეთებელქ, ნამდგას ვა უღუდ შესაძლებლობა, ემსახურკო ღორონც. მუშო ოკო რაგად, იესოს ოკო ნათილ ქრისტიანეფქ, მით ომსახურნა ღორონც, გიშაჸიდირალს უჯინან მუჭოთ პირად ძღვინს. მუ მიმეხვარებნა დებრწმუნათ, ნამდა ულირს კეთებულ გლახა საქმეეფიშ უმკუჯინუო, იესოშ გიშაჸიდირალს ჯგირობუა მოუღ პირადო ჩქინო?

იესოქ პავლეს სახიოლო ამბეშ ქადაგება დავალ, ათეშენ პავლეს არჩქილედ, ნამდა იესოქ პირადო თიშო ღურჷ. მუშენ შილებე თეშ რაგად? თინა იჩიებ: „მარდულ ვორექ ჩქინ უფალ ქრისტე იესოშ, ნამუქით მუჩჷ ძალა, მუშენდა ართგურო მემრჩქინ დო მსახურება დუმავალ, თიშ უმკუჯინუო ნამდა, ადრე ღორონთიშ სახელს ბლანძღუნდჷ, თიშ ხალხის ფთხოზუდ დო შეურაცხყოფას მივორინუანდჷ“ (1 ტიმ. 1:12—14). თეცალ მოქმედებათ იესოქ დარწმუნ პავლე, ნამდა ულირს კეთებულ გლახა საქმეეფიშ უმკუჯინუო, უჸორდჷ თინა, პატიენდჷ დაშებულს დო ნდობას უცხადენდჷ. იესო ჩქი ხოლო მონდუნა დო მავალენა სახიოლო ამბეშ ქადაგებაშ საქმეს (მათ. 28:19, 20). ქუმარწმუნენანო თენა თიშა, ნამდა იესოქ პირადო ჩქინ გურშენ ღურჷ?

ალბერტ, ნამუთ სოდგარენ 34 წანას გარიცხულ რდუ დო ბრელ ხან ვა რე, მუთ იეჰოვაშ ორგანიზაციას დართჷ, იჩიებ: „დღას ვაგმოჭყორდუ ჩქიმ ცოდვეფ, მარა მუჟამსით მსახურებას ვორექ, პავლეცალო მა ხოლო ვორწყექ, ნამდა ქადაგება პირადო იესოქ დუმავალ. თენა გურშა ელამკინანს დო დადებითო ვუჯინექ ჩქიმ დუც, ჩქიმ ცხოვრებას დო მომავალს“ (ფსალმ. 51:3).

ალან ჭეშმარიტებაშ გაგებაშახ მოძალადე რდუ დო კრიმინალურ საქმეეფს რდუ ჩართულ. თინა იჩიებ: „ხშირას გუმოშინანს დუც თი გლახა საქმეეფ, ნამდგათ ხალხის ზიან მივორინე. ათეშენ მინშა გლახათ ბგინაფლენქ დუც. მარა იეჰოვაშ მარდულ ვორექ, მუშენდა ჩქიმცალ ცოდვილ ადამიანს არზენს საშვალებას, უქადაგას შხვეფს სახიოლო ამბე. მუჟამსით ვორწყექ, მუნერ რეაქცია უღჷ ხალხის სახიოლო ამბეშენ, თენა გუმოშინანს, ნამდა იეჰოვა ჯგირ დო მოჸოროფე ღორონთ რე. ბგინაფლენქ, ნამდა თინა გიმომრინუანს, ქიმვეხვარე თიცალ კათას, მით ჩქიმცალო გლახა საქმეეფს ორთუდ“.

მსახურება მოხვარნა, ჯგირ საქმეეფ ვაკეთათ დო დადებითშე იფიფქრათ. თეწკუმა ართო, მარწმუნენა, ნამდა იესოს ვუჸორთ, მაპატიენა დო მონდუნა.

სატანაშ უბადო ქვეყნიერებაშ განადგურებაშახ, ჩქინ გურ შილებე ბრალს გებდვანდან ულირს კეთებულ გლახა საქმეეფიშ გურშენ. მუ მიმეხვარებნა, მივერუათ თეცალ გრძნობეფს?

«მობწონს თი აზრი, ნამდა „ღორონთ ჩქინ გურეფშე უმოს რე“»,— იჩიებ ჯინ. თის ხშირას აწუხენს დანაშაულიშ გრძნობა, მუშენდა ახალგაზრდობას გაორებულ ცხოვრებას მეჸუნდჷ (1 იოან. 3:19, 20). ჯინცალო, ჩქი ხოლო შემლებნა დუდ უჯგუშო იბგინათ, მუშენდა იეჰოვა დო იესოს აჩრქილენა ჩქინ ცოდვილ მდგომარეობა. დღას ვაგგოჭყორდან, თინეფქ ჸოროფათ იზრუნეს გიშაჸიდირალშენ, ნამუთ სრულყოფილ კათას ვარინ, თინეფს ოსაჭირ, მით ნარღენა მუნეფიშ ცოდვეფს (1 ტიმ. 1:15).

მუჟამსით ბლოცულენთ დო ფიფქრენთ, მუ აკეთ იესოქ არასრულყოფილ კათაშ გურშენ დო ირნერო ვოცადუთ, შევასრულათ ჩქინდა მენდებულ ქადაგებაშ საქმე, თეთ უმოსო იბრწმუნებუთ, ნამდა იესოშ გიშაჸიდირალ პირადო ჩქი მოხუნა. შედეგო, პავლეცალო თქვა ხოლო შეილებნა თქუათ: იესოქ „ქომიჸოროფუ დო დუდ გაწირ ჩქიმ გურშენ“.