1, 2. ა) მუშენ ოკო ვა გამკვირდან ჩქინ საქმიანობა აკრძალეს-და? ბ) მუს გუვარჩიენთ თე სტატიას?

2018 წანას 223 000-შე უმოს მაქადაგებელ ცხოვრენდჷ თიცალ ქიანეფს, სოდეთ ჩქინ საქმიანობა აკრძალურ რდუ. თენა ვამკვენა, მუშენდა მუჭოთ წოხოლენ სტატიაშე გებგით, ჭეშმარიტ ქრისტიანეფს უჩქნა, ნამდა წინააღმდეგობეფს შეხვადუნა (2 ტიმ. 3:12). სოდგა ვა ფცხოვრენდათინ, მთავრობაქ შილებე ვეველუთინ თეშ ამკრძალან, ვემსახურათ ჩქინ მოჸოროფე ღორონთ იეჰოვას.

² თი ქიანას, სოდეთ თქვა ცხოვრენთ, მთავრობაქ იეჰოვაშ მოწმეეფიშ საქმიანობაშ აკრძალვა გეგნოჭყვიდ-და, შეილებნა თქვან დუც ქუდუსვათ თეცალ კითხვეფ: ნიშნენსო მთავრობაშე წინააღმდეგობა, ნამდა მივოდინეთ იეჰოვაშ მოწონა? მიმოტებაფუანანო აკრძალვეფ იეჰოვაშ მსახურებას? გინოფრთაო ოცხოვრებშა თიცალ ადგილშა, სოდეთ თავისფალო შემალებე ვემსახურე ღორონც? თე კითხვეფიშ პასუხეფს თე სტატიაშე მიბღენთ. თეს გეძინელ, თის ხოლო გუვარჩიენთ, მუჭო გუვაგრძელათ მსახურება თხოზინიშ დროს დო მუშ კეთებას ოკო ავარიდათ დუდ.

3. მუჭოთ 2 კორინთელეფიშ 11:23—27-შე იძირე, მუნერ წინააღმდეგობას შეხვად პავლე მოციქულქ დო მუს ბგურაფლენთ თიშ მაგალითშე?

³ მთავრობაქ ჩქინ საქმიანობა ამკრძალეს-და, შილებე იფიფქრათ, ნამდა მივოდინეთ ღორონთიშ მოწონა, მუთ ვეჸუაფ სწორ დასკვნა. ირიათო ოკო ფშუდან, წინააღმდეგობეფ ვა ნიშნენს, ნამდა იეჰოვა უკმაყოფილო რე ჩქინით. დეფიფქრათ პავლე მოციქულიშ მაგალითშე. თინა ღორონთშო მოსაწონ პიროვნება რდუ. თის უღუდ პატი, დოჭარკო 14 წერილ, ნამუთ ქრისტიანულ ბერძნულ წერილეფიშ ნაწილ რე; თეს გეძინელ, თინა ბიბლიას მოშინაფილ  რე, მუჭოთ უცხოტომელეფიშ მოციქულ. მარა თე ირფელიშ უმკუჯინუო, იშენით სასტიკ წინააღმდეგობეფს შეხვადუდ (წეკითხით 2 კორინთელები 11:23—27). პავლე მოციქულიშ მაგალითშე ბგებულენთ, ნამდა იეჰოვა უშვენს მუშ ართგურ მსახურეფიშ თხოზინს.

4. მუშენ ბჯოგუთ ქვეყნიერებას?

⁴ იესოქ ემინწყეს მიზეზ, მუშენ ოკო ველდათ წინააღმდეგობეფს. თიქ თქუ, ნამდა ქვეყნიერება გომჯოგუანდეს, მუშენდა თიშ ნაწილ ვა ვორეთ (იოან. 15:18, 19). წინააღმდეგობეფ ვა ნიშნენს, ნამდა იეჰოვაშ კურთხევა ვამღუნა. პირიქით, თენა თიშ ნიშან რე, ნამდა ჩქი თის ვორთუთ, მუთ სწორ რე!

5. ქეშულებნანო ადამიანეფს სრულაშე შეაჩერან იეჰოვაშ თაყვანიშცემა? გენწყით.

⁵ მოწინააღმდეგეეფს ვეშულებნა სრულაშე შეაჩერან ირფელიშშემალებე ღორონთ იეჰოვაშ მსახურება. თეშ კეთება ბრელქ მინდომ, მარა მუთუნქ ვეგშურთეს. ქიგიფშინათ, მუქ მოხვად მაჟია მსოფლიო ჩხუპიშ დროს. თიმ დროს ბრელ ქიანას მთავრობეფ თხოზუდეს ღორონთიშ ხალხის. იეჰოვაშ მოწმეეფიშ საქმიანობა ხვალე ნაცისტურ გერმანიას ვარინ, ავსტრალიას, კანადას დო შხვა ქიანეფს ხოლო აკრძალურ რდუ. მარა ქობძირათ, მუჭო ითირ მდგომარეობაქ. 1939 წანას ჩხუპიშ დოჭყაფაშ დროს 72 475 მაქადაგებელ რდუ მთელ მსოფლიოს. მონაცემეფ ოძირანს, ნამდა 1945 წანაშო, მუჟამსით ჩხუპიქ ითუ, იეჰოვაშ კურთხევათ მაქადაგებელეფიშ რიცხვიქ 156 299-ს ქიმიოჭირინუ. ნამდვილო, წინააღმდეგობეფიშ უმკუჯინუო მაქადაგებელეფიშ რიცხვი მაჟია თისხიშე უმოს რდუ.

6. თიშ მანგიორო, ნამდა დოფშკურდათ, მუშა შილებე აღბძრან წინააღმდეგობეფქ? ქიმიჸონით მაგალით.

⁶ თიშ მანგიორო, ნამდა დოფშკურდათ, წინააღმდეგობეფს შეულებ აღბძრან, სრულაშე ვემსახურათ იეჰოვას. მაგალთო, ართ წყვილ ცხოვრენდჷ თიცალ ქიანას, სოდეთ მთავრობაქ ჩქინ საქმიანობაშ აკრძალვა გინოჭყვიდ. თე წყვილს ბაღანა ხოლო ჸუნდჷ, მარა თინეფქ ვა დოშკურდეს დო პიონერულ მსახურება ქიდიჭყეს. ოსურქ სამუშა ხოლო მიოტუ, სოდეთ დიდ ხელფასის არზენდეს. თიშ ქომონჯ იჩიებ, ნამდა წინააღმდეგობეფქ ბრელს გურჩქინ კითხვეფ იეჰოვაშ მოწმეეფიშ გურშენ. შედეგო, თის უმოს ადვილ აფუდ ბიბლიურ გურაფეფიშ დოჭყაფა. მთავრობაშე აკრძალვეფქ შხვეფწკუმა ხოლო იმოქმედ დადებითო. ართ უხუცეს, ნამუთ თე წყვილ ცხოვრენსინ თი ქიანაშე რე, იჩიებ, ნამდა ბრელქ, მიდგას მეტებულ აფუდ იეჰოვაშ მსახურება, კრებაშ შეხვალამეფშა გილულა დო ქადაგება ქიდიჭყჷ.

7. ა) მუშ გურაფა შემლებნა ლევიანეფიშ 26:36, 37-შე? ბ) მუშ კეთება გაფნა გინოჭყვიდილ წინააღმდეგობეფიშ დროს?

 ⁷ მუჟამსით ჩქინ ნტერეფ ღორონთიშ მსახურებას მიკრძალენა, თინეფს იმენდ უღნა, ნამდა დობშკურდუთ დო მივოტენთ ღორონთიშ მსახურებას. აკრძალვაწკუმა ართო, შილებე ტყურეფ ქეკმაბრალან, ჸუდეშა პოლიცია ქუმომშკვან, სასამართლოშა ულა დუმანძალან ვარდა ციხეს ქუდმოხუნუან. თინეფ ფიქრენა, მუსხირენ და დო ჯიმა ციხეს ქუდახუნუეს-და, თეთ მანგარო დობშკურდუთ დო პანიკას ქინობლუთ. მუჟამსით თინეფს საშვალებას ქიმეფჩანთ, დუმოშკურინუან, შილებე მართალო მივოტუათ მსახურება. ჩქი ვა მოკონა, ვაგურათ თინეფს, მით ეჭარილ რე ლევიანეფიშ 26:36, 37-ის (წეკითხით). დღას ვა დუშვენთ, შიშიქ ქიმეცილან სულიერ საქმეეფიშ კეთებას ვარდა გვალო მივოტუათ მსახურება. ჩქი მთლიანო იეჰოვაშა ვორეთ მენდებულ დო პანიკას ვევაჸუნუთ (ეს. 28:16). თეწკუმა ართო ბლოცულენთ დო იეჰოვას ხემძღვანელობას ფთხულენთ. დარწმუნებულ ვორეთ, ნამდა ღორონთიშ მოხვარათ, არძაშ უმოს ძალიერ მთავრობას ხოლო ვეშულებ განკმოჸოთან ღორონთიშ ართგურო მსახურებაშე (ებრ. 13:6).

8, 9. ა) მუ პირად გადაწყვეტილებას ღებულენს თითოულ ქრისტიან მუშო ვარდა მუშ ოჯახშო? ბ) მუ მეხვარებ ქრისტიანს, მიღას გონივრულ გადაწყვეტილება?

⁸ თი ქიანას, სოდეთ თქვა ცხოვრენთ, იეჰოვაშ მოწმეეფიშ საქმიანობა აკრძალურ ქორენ-და, შილებე გოირჩქინდან კითხვაქ: ხომ ვეგნოფრთა ოცხოვრებშა თიცალ ადგილშა, სოდეთ თავისუფალო შემალებე ვემსახურე ღორონც? მუშო ოკო რაგად, თენა პირადო ოკო გინოჭყვიდათ დო მითინს ვეშულებ თქვან მანგიორო მიღას გადაწყვეტილება. თე საკითხიშ გინოჭყვიდუაშახ, ნამთინეშო შილებე ჯგირქ იჸუას თიშე დაფიქრებაქ, მუჭო მიქცუეს პირველ საუკუნეშ ქრისტიანეფქ წინააღმდეგობეფიშ დროს. მუჟამსით ნტერეფქ სტეფანე დოჸვილეს, იერუსალიმს მახორუ მოწაფეეფქ ოცხოვრებშა იუდეა დო სამარიაშა გინილეს; თეს გეძინელ, ნამთინექ თიცალ დაშორებულ ადგილეფშა ხოლო მიდართჷ, მუნერით რდუ ფინიკია, კვიპროსი დო ანტიოქია (მათ. 10:23; საქ. 8:1; 11:19). მარა შხვეფქ შილებე ყურადღება ქიმიაქცუან თი ფაქტის, ნამდა შხვა დროს, მუჟამსით პირველ საუკუნეშ ქრისტიანეფს კინ გამათხოზეს, მოციქულ პავლექ ვედიტუ თექიანობა დო გაგრძელ ქადაგება თექ, სოდეთ წინააღმდეგობეფ რდუ. თიქ საფრთხეშა ქენიჸოთ მუშ დუდ, ნამდა იქადაგკო სახიოლო ამბე დო გამანგარკო და დო ჯიმალეფ თი ქალაქეფს, სოდეთ სასტიკ წინააღმდეგობეფს შეხვადუდეს (საქ. 14:19—23).

⁹ მუს ბგურაფლენთ თე მაგალითეფშე? თითოულ ოჯახიშ დუდიქ პირადო ოკო გინოჭყვიდას, გეგნურს დო ვარ თეცალ დროს შხვა ადგილშა. გადაწყვეტილებაშ მეღებაშახ თიქ ოკო ქილოცას, გურგედვალირო გაანალიზას მუშ ოჯახიშ სიტუაცია დო დეფიქრას თი დადებით დო უარყოფით შედეგეფშე, ნამდგაქ შილებე შხვადო გინულას მაჸუნას. თე სიტუაციას ქრისტიანეფს ოკო შუდან, ნამდა „თითოულს მუშ ოღალ გილუღ“ (გალ. 6:5). ჩქი ოკო ვაგვასამართლათ შხვეფ მუნეფიშ გადაწყვეტილებეფიშ გურშენ.

10. მუნერ მითითებეფს მუჩანა ფილიალ დო უხუცესეფ აკრძალვაშ დროს?

¹⁰ მუჭო შეილებნა ღორონთიშ მსახურებაშ გაგრძელება აკრძალვაშ დროს? ფილიალ ადგილობრივ უხუცესეფს ქიმეჩანს მითითებეფს დო პრაქტიკულ რჩევეფს, მუჭო მიბღათ სულიერ საზრდო, მუჭო იფშაყარათ ართო ღორონთიშ თაყვანიშოცემებელო დო მუჭო იფქადაგათ სახიოლო ამბე. ფილიალს უხუცესეფწკუმა დაკავშირებაქ ვეშიალებუ-და, უხუცესეფ ქიმგეხვარებნა მუჭოთ თქვა, თეშ კრებაშ თითოულ წევრის, გაგრძელათ იეჰოვაშ თაყვანიშცემა. თინეფ ბიბლიაშა დო ქრისტიანულ  პუბლიკაციეფშა გერსხილ ხემძღვანელობას ქიმერჩანა (მათ. 28:19, 20; საქ. 5:29; ებრ. 10:24, 25).

11. მუ მარწმუნენა, ნამდა სულიერ საზრდო ირიათო მაღვენუნა დო მუ ოკო აკეთათ, ნამდა ქუმუთხილუათ სულიერ საზრდოს?

¹¹ იეჰოვაქ პირობა დოდვჷ, ნამდა თიშ მსახურეფს ხვეიანო აღვენუდეს სულიერ საზრდო (ეს. 65:13, 14; ლუკ. 12:42—44). შეილებნა დარწმუნებულ რდათ, ღორონთიშ ორგანიზაცია ირფელს გაკეთენს, ნამდა ქუგაშუან სულიერ საზრდოქ. მარა თქვან მხარეშე ხოლო რე მოქმედება საჭირო. მაგალთო, აკრძალვაშ დროს, ქეცადით ბიბლია ვარდა ნებისმიერ შხვა პუბლიკაცია ჯგირ ადგილს დოჩუათ. დღას ვედიტუათ თე ძვირფას მასალა, ბეშტელ დო ვარ ელექტრონულ ფორმატით თიცალ ადგილს, ნამდგას შხვეფ ადვილო ქიმიოგორუანა. თითოულქ ოკო გეგნობდგათ პრაქტიკულ ნაბიჯეფ, ნამდა სულიერო ვედეფსუსტათ.

12. მუჭო შილებე უხუცესეფქ თეშ მაგვარან კრებეფიშ ორგანიზება, ნამდა შხვეფს თოლშა ვამუოლათ?

¹² მუშ რაგად შილებე ირმარიან კრებაშ შეხვალამეფშენ? უხუცესეფ თიცალო მაგვარენა კრებაშ შეხვალამეფიშ დასწრებას, ნამდა მოწინააღმდეგეეფშო თოლშა მალაფარქ ვეჸუათ. შილებე გუგანაწილან ჭიჭე ჯგუფეფშა დო ხშირას დოთირუან შეხვალამეფიშ დრო დო ადგილ. კრებაშა მოულაშ ვარდა ულაშ დროს ხონარდაბალ რაგადით და დო ჯიმალეფიშ უსაფრთხოებას შეუნწყუნთ ხეს. თეს გეძინელ, შილებე კრებეფშა თიცალ ბარგით გაჸუან გილაულარქ, ნამუთ შხვეფიშ ყურადღებას ვემიქციენს.

13. მუს ბგურაფლენთ ყოფილ საბჭოთა კავშირიშ დროს მახორუ და დო ჯიმალეფშე?

¹³ მუშ რაგად შილებე ქადაგებაშე? სიტუაციაშე გამომდინარე, მსახურებაშ მეთოდეფქ შილებე განსხვავებულქ იჸუას შხვადოშხვა ადგილს. მუშო ოკო რაგად, ჩქი მიჸორა იეჰოვა დო მოკონა შხვეფს ვეჩუათ თიშ სამეფოშენ, ათეშენ ირნერ შარას დობგორუნთ, ნამდა იფქადაგათ (ლუკ. 8:1; საქ. 4:29). ისტორიკოს ემილი ბარან საბჭოთა კავშირიშ დროს მახორუ იეჰოვაშ მოწმეეფიშ გურშენ იჩიებ: „მუჟამსით მთავრობაქ მორწმუნეეფს მოთხუ, მუნეფიშ რწმენაშენ შხვეფს ვეჩუესკო, მოწმეეფქ რაგად გაგრძელეს მეზობელეფ, თანამშრომლეფ დო მეგობრეფწკუმა. ათეშგურშენ თინეფ შრომა-გასწორებაშ კოლონიაშა გოუტეს, მარა მოწმეეფ თექ ხოლო აგრძელენდეს მუნეფიშ რწმენაშენ ჩიებას შხვა პატიმარეფწკუმა“. აკრძალვაშ უმკუჯინუო, ჩქინ ჯიმალეფს საბჭოთა კავშირს ვემუტებნა ქადაგება. ქადაგებაშ საქმე თქვან ქიანას ხოლო აკრძალეს-და, შეილებნა მიაჸუნათ თე და დო ჯიმალეფიშ მაგალითის.

14. მუჭოთ ფსალმუნიშ 39:1-ს რე მოჩამილ, მუშ კეთებას ოკო ევუჩილითუათ დუდ?

¹⁴ დეფიქრით, მუნერ ინფორმაციას გინოჩანთ შხვეფს. თხოზინიშ დროს ოკო მარჩქილედან, მუჟამ რე „ხონარ ვეკიღენ თიშ დრო“ (ეკლ. 3:7). ჩქი ვა ფთქუათ ოკო თიცალ ინფორმაცია, ნამუთ ოხუ და დო ჯიმალეფიშ სახელეფს, შეხვალამეფიშ ჩატარებაშ ადგილეფს დო თის, მუჭო ვმსახურენთ  დო სოვრეშე ბღებულენთ სულიერ საზრდოს. ჩქი თე ინფორმაციას ვეგნოფჩანთ მთავრობაშ წარმომადგენლეფს; ვართ ჩქინო ჯგირ ოკონან ფერ მეგობრეფს დო ნათესეფს, მით ჩქინ ქიანას ვარდა შხვა ქიანეფს ცხოვრენა. თაშ ვემიფქციებუთ-და, საფრთხეს ქინვოჸოთანთ და დო ჯიმალეფიშ უსაფრთხოებას (წეკითხით ფსალმუნი 39:1).

15. მუშ კეთებას ოცად სატანა დო მუჭო შემლებნა დუდ ევუჩილითუათ თიშ მახეს?

¹⁵ საშვალება ვემეჩათ უმნიშვნელო საკითხეფს, თქვან შკას გორთუალა გემშიღას. სატანას უჩქჷ, ნამდა გორთილ ჸუდე გეკოცენს (მარ. 3:24, 25). თინა ირიათო ოცად, თანაქრისტიანეფ შკას უთანხმოება გემშიღას, მუშენდა იმენდ უღჷ, თიშ მანგიორო, ნამდა მუს ქივეწინააღმდეგათ, ართიანს დევეპირისპირებუთ.

16. მუ მაგალით დომტუეს ცხებულ დაქ, გერტრუდ პოეტზინგერქ?

¹⁶ მოწიფულ ქრისტიანეფ ხოლო ფრთხილას ოკო რდან, ნამდა ვეიაჸუნან სატანაშ თე მახეს. გუვარჩუათ ჟირ ცხებულ დაშ, გერტრუდ პოეტზინგერ დო ელფრიდე ლერიშ მაგალით. თინეფ შხვა დალეფწკუმა ართო ნაცისტურ საკონცენტრაციო ბანაკის ხედეს. გერტრუდის ონჯარუდ, მუჟამსით ელფრიდე გურიშ ემაკინალ თემეფს უკითხანდჷ დალეფს ბანაკის. უმოს გვიანო, გერტრუდის ონჯღორექ დაგურ მუშ საქციელიშ გურშენ დო იეჰოვას მოხვარა ქოთხუ. თიქ ჭარჷ: „ჩქი ოკო ქიდიბგურუათ, ნამდა ვემენჯარან, მუჟამსით შხვეფს ჩქინდე უმოს მეტ შესაძლებლობეფ ვარდა პასუხიშმგებლობეფ უღნა“. მუჭო გიორჯგინ თე დაქ მენჯარიშობას? გერტრუდიქ ყურადღება ელფრიდეშ ჯგირ თვისებეფშა დო მეგობრულ ხასიათშა გამახვილ, მუდგაქ მეხვარ კინ ჯგირ ურთიერთობა უღუდკო ელფრიდეწკუმა. საკონცენტრაციო ბანაკშე გათავისუფლებაშ უკულ თინეფ ართგურო ომსახურდეს იეჰოვას, სოიშახ დედამიწას მიწიერ ცხოვრებას დასრულენდეს. მუჟამსით ირნერო ვოცადუთ, და დო ჯიმალეფწკუმა ჯგირ ურთიერთობა მიღდან, თეთ დუც ევუჩილითუანთ სატანაშ მახეს, ნამუთ ოცად, გორთუალა გემშიღას ჩქინ შკას (კოლ. 3:13, 14).

17. მუშენ ოკო მივაჸუნათ ხემძღვანელობას?

¹⁷ ირიათო მიაჸუნით ხემძღვანელობას. პრობლემეფს დუც ევუჩილითუანთ, მუჟამსით მივაჸუნუთ პასუხიშმგებელ ჯიმალეფიშ ხემძღვანელობას (1 პეტ. 5:5). მაგალთო, ართ ქიანას, სოდეთ ჩქინ საქმიანობა აკრძალურ რე, პასუხიშმგებელ ჯიმალეფქ მითითება მეჩეს მაქადაგებელეფს, ნამდა მსახურებაშ დროს ბეშტელ ლიტერატურა ვა გავრცელესკო. მარა ართ პიონერ ჯიმაქ გინოჭყვიდ, ნამდა თე საკითხ მუს უჯგუშო არჩქილედ დო გავრცელ ლიტერატურა. მუ შედეგიქ მაჸუნ თეს? ჭიჭე ხანშა, არაფორმალურო ქადაგებაშ თებაშ უკულ, თინა დო მუსხირენ მაქადაგებელ პოლიციაქ დაკითხჷ. მუჭოთ იძირენ, პოლიციელეფქ თინეფს ქეკაჸუნეს დო ქუძირეს გავრცელებურ ლიტერატურა. მუშ გურაფა შემლებნა თე შემთხვევაშე? თიმწკუმა ხოლო, მუჟამსით  ფიფქრენთ, ნამდა ჩქი უჯგუშო მიჩქნა სიტუაცია, საჭირო რე მივაჸუნათ ორგანიზაციაშ ხემძღვანელობას. იეჰოვა ირიათო მაკურთხენა, მუჟამსით იფთანამშრომლენთ თი ჯიმალეფწკუმა, მიდგას იეჰოვაქ ხემძღვანელობა დავალ (ებრ. 13:7, 17).

18. მუშენ ოკო ავარიდათ დუდ საჭირო ვა რენ ფერ წესეფიშ დადგენას?

¹⁸ ვა დადგინათ საჭირო ვა რენ ფერ წესეფ. მუჟამსით უხუცესეფ საჭირო ვა რენ ფერ წესეფს დადგინენა, თენა შხვეფს ოღალო ქიგიანჯირუ. ჯიმა იური კამინსკი იშინანს, მუქ მოხვად აკრძალვაშ დროს ყოფილ ჩეხოსლოვაკიას: „მუჟამსით ბრელ უხუცეს ოჭოფეს, ნამთინე რაიონულ ზედამხედველქ დო თინეფქ, მიდგას კრებეფს ხემძღვანელობა ოვალუდ, მაქადაგებელეფს დუდგინეს წესეფ, მუ ოკო აკეთესკო დო მუ ვარ“. იეჰოვას ვა მუჩამ ჩქინდა თიშ უფლება, ნამდა ჩქინ ჯიმალეფიშ მანგიორო მიბღათ გადაწყვეტილებეფ. თინეფ, მით საჭირო ვა რენ ფერ წესეფს ადგინენა, ჯიმალეფიშ უსაფრთხოებას ვეცვენა, პირიქით, ოცადნა იბატონან თინეფიშ რწმენაშე (2 კორ. 1:24).

19. სატანაშ მონდომაშ უმკუჯინუო, მუშა მარწმუნენა 2 მატიანეშ 32:7, 8 მუხლეფ?

¹⁹ ჩქინ ნტერ, სატანა ეშმაკ, ვემიოტენს იეჰოვაშ ართგურ მსახურეფიშ თხოზინს (1 პეტ. 5:8; გამოცხ. 2:10). სატანა დო არძა, მით თის ხუც უკინენს, ირნერო ეცადებნა, ამკრძალან იეჰოვაშ თაყვანიშცემა. მარა მუთუნნერ მიზეზ ვა მიღნა, ნამდა შიშის ქენობლათ (კან. 7:21). იეჰოვა ჩქინ მხარეს რე დო ირიათო გაგრძელენს ჩქინ ელარნას, თიმწკუმა ხოლო, მუჟამსით ჩქინ საქმიანობას აკრძალენა (წეკითხით 2 მატიანე 32:7, 8).

20. მუ გაფნა გინოჭყვიდილ?

²⁰ მორთ ჩქი ხოლო მტკიცას მაფდან გინოჭყვიდილ, მიფქცუათ პირველ საუკუნეშ ქრისტიანეფცალო, მიდგაქ მუნეფიშ მართველეფს თეცალ პასუხ მეჩეს: „თქვანით ქიფიქრით, სწორ ქიჸუაფუნო ღორონთიშ თოლს, თქვა მოირჩქილუათ დო ვართ ხოლო ღორონც. ჩქი ვემმატებენა თიშე რაგად, მუთ ბძირით დო მიფრჩქილეთ“ (საქ. 4:19, 20).