თიცალ სიტუაციას, მუჟამსით პიროვნება ახალშო იქორწინებ, კრებაქ ჯვეშ ქორწინება თებულო ოკო მირჩქინას დო ახალ ქორწინება — კანონიერო. თიშ გაგებელო, მუშენ იფჩიებუთ თეს, გუვარჩუათ, მუ თქუ იესოქ ჩათხია დო შხვაშა დაქორწინებაშ გურშენ.

მათეშ 19:9-ს იესოქ მიშინუ თი ართ ბიბლიურ მიზეზ, მუთ აუქმენს ქორწინებას. თიქ თქუ: „ქომონჯ ოსურს ჩეთხიებ დო შხვაშა დექორწინებ, მარა ჩათხიებაშ მიზეზ ღალატ ვა რენ-და, მრუშენს“. იესოშ სიტყვეფშე ჟირ მუდგარენს ბგებულენთ: 1) ხვალე სექსუალურ უზნეობა რე ჩათხიაშ ბიბლიურ საფუძველ დო 2) კოჩ, ნამუთ ოსურს ბიბლიურ საფუძველიშ უმშო ეთხიებ დო შხვაშა იქორწინებ, მრუშენს. *

იესოშ სიტყვეფ თის ნიშნენსო, ნამდა კოჩის, მით იმრუშენს დო ოსურს ჩეთხიებ, ბიბლიურ საფუძველ აღვენუ ახალ ქორწინებაშო? იშენდოიშენ ვარ. ღალატიშ დროს უდანაშაულო მეუღლე გინოჭყვიდუნს, ქაპატუას დო ვარ თის. ოსურ ვაპატიენს დო ჩათხია გეგნოჭყორდუნ-და, მუჟამსით ჩათხიაშ პროცესეფ ბოლოშახ ქიმურს, ჟირხოლოს აღვენუ ბიბლიურ საფუძველ, ნამდა კინ დექორწინას.

შილებე თეშ ქუმოხვადას, ნამდა უდანაშაულო მეუღლეს ვაკოდას ოჯახიშ ეკორღვაფა დო მზათ რდას, ქაპატუას ქომონჯის. მარა მუ ხვადუ, მუჟამსით ქომონჯ ვარიას ურაგად ოსურს შერიგაშენ დო ოფიციალურო ეთხიებ თის? რახანს ოსურ მზათ რე, ქაპატუას თის დო ვეკარღვას ოჯახ, ქომონჯის ვა უღჷ ბიბლიურ საფუძველ კინ ქორწინებაშო. თეშ უმკუჯინუო, თინა შხვა პიროვნებაშა იშენით დექორწინებუნ-და, გიშურს, ნამდა ხოლო ართშა მრუშენს. ათეშ გურშენ თიშ საქმე სამართლებრივ კომიტეტიქ ოკო გარჩუას (1 კორ. 5:1, 2; 6:9, 10).

მუჟამსით კოჩ ბიბლიურ საფუძველიშ უმშო კინ იქორწინებ, მუჭო ოკო უჯინედას კრება, მუჭოთ ჯვეშ, თეშ ახალ ქორწინებას? ბიბლიურო კინ ძალას რენო ჯვეშ ქორწინება? შეულებნო ოსურს გეგნოჭყვიდას, კინ მიღენს დო ვარ მუშ ყოფილ ქომონჯის? ქითვალუ დო ვარ ახალ ქორწინება მრუშობათ?

აიშახ კრებას ახალშო ქორწინება მრუშობათ მიორჩქუდ, ონდო უდანაშაულო მეუღლე ცოცხალ რდჷ, დაუქორწინებელო სქიდუდ დო ვა რდჷ სექსუალურ უზნეობას დამნაშავე. მარა იესოს ვა მუშინუაფ უდანაშაულო მეუღლე, მუჟამსით ჩათხია დო კინ ქორწინებაშ გურშენ იჩიებუდ. თიქ უბრალოთ თინა ენწყჷ, ნამდა კოჩ, მით ბიბლიურ საფუძველიშ უმშო ეთხიებ ოსურს დო შხვაშა იქორწინებ, მრუშენს. თეცალ დროს ჩათხია დო ახალშო ქორწინება, ნამუთ იესოშ ნარაგადით მრუშობას ნიშნენს, აუქმენს ჯვეშ ქორწინებას.

მუჟამსით ჩათხიათ დო ახალშო ქორწინებათ ჯვეშ ქორწინება იუქმებ, უდანაშაულო მეუღლეს ვეშულებ პატიებათ კინ დირთინუას ყოფილ ქომონჯ. თე რთულ გადაწყვეტილებაშე  თინა უკვე თავისფალ რე. თეს გეძინელ, კრებაშ თოლს ახალ ქორწინება კანონიერ იჸუაფ თიშ უმკუჯინუო, ნამდა ჯვეშ მეუღლე შილებე ცოცხალ რდას, ვა რდას დაქორწინებულ დო ვართ სექსუალურ უზნეობას გეძდას ბრალ. *

ჟიშე გუვარჩით მაგალით, სოდეთ ქომონჯიშ მრუშობაშ გურშენ ოჯახიქ ეკოცუ. მარა მუ ხვადუ, მუჟამსით ქომონჯის ვა უმრუშებ, ჩეთხუ ოსურს დო უკულ შხვაშა დექორწინ? ვარდა მუ ხვადუ თიმწკუმა, მუჟამსით ქომონჯის ჩათხიაშახ ვა უმრუშებ, მარა ჩათხიაშ უკულ ქიმრუშ დო შხვაშა დექორწინ თიშ უმკუჯინუო, ნამდა ოსურ მზათ რდჷ, ქაპატუკო? არძა თე შემთხვევას ჩათხია დო ახალშო ქორწინება მრუშობათ ითვალუ დო აუქმენს ჯვეშ ქორწინებას. შედეგო ახალ ქორწინება კანონიერო ითვალუ. 1979 წანაშ 15 ნოემბერიშ „გინაჯინალ კოშკიშ“ [ინგლ.] 32-ა გვერდის ჭარჷ: „ასე თე კოჩის უკვე ახალ ოჯახ ჸუნს, ათეშენ ვეშულებ უბრალოთ აკარღვას ახალ ოჯახ დო ყოფილ ოსურს დართას, მუშენდა ჯვეშ ქორწინება ჩათხიაშ, მრუშობაშ დო დუდშე ქორწინებაშ შედეგო გაუქმებულ რე“.

თე ახალ გაგება ფასის ვა უდინუანს ქორწინებაშ სიწმინდეს დო ვართ მრუშობაშ სერიოზულობას ეუქექუანს. კოჩ, ნამუთ ბიბლიურ საფუძველიშ უმშო ეთხიებ ოსურს დო ბიბლიურ საფუძველიშ უმშო ახალშო იქორწინებ, მრუშობას იჸუაფ დამნაშავე დო თიშ საქმე სამართლებრივ კომიტეტიქ ოკო გარჩუას (მიდგაშა იქორწინებუნ თინა იეჰოვაშ მოწმე ქორენ-და, თიქ ხოლო შილებე მრუშობას იჸუას დამნაშავექ დო თიშ საქმე ხოლო სამართლებრივ კომიტეტიქ გარჩუას). მართალ რე, თინეფიშ ჩილ დო ქომონჯალა მრუშობათ ვეთვალუ, მარა თე ჯიმა ბრელ წანაშ დინახალე ვემიღენს კრებას პასუხიშმგებლობეფს. თეს გეძინელ, პასუხიშმგებლობეფს თეიშახ ხოლო ვემიღენს, სოიშახ შხვეფ გაღიზიანებულ იჸუაფნა თიშ ნაკეთებ საქმეშენ დო თინეფიშ თოლს პატიცემას ვედირთინუანს. თიშა პასუხიშმგებლობაშ მეჩამაშახ ჯიმალეფქ ოკო გეთვალისწინან ყოფილ მეუღლეშ, ნამუთ თიქ შეგნებულო დიტუ, ასეიან მდგომარეობა, ნამდგაშა მიშურს მეუღლეშ ემოციურ, ფინანსურ დო შხვა პრობლემეფ. თეს გეძინელ, ოკო გეთვალისწინან არასრულწლოვან სქუალეფიშ მდგომარეობა ხოლო, ნამუთ თიქ უმინჯურო დიტუ (მალ. 2:14—16).

ბიბლიურ საფუძველიშ უმშო ჩათხია დო ახალშო ქორწინება სერიოზულ საკითხ რე. ათეშენ ქრისტიანეფ გონივრულო იქციებნა, მუჟამსით ქორწინებას იეჰოვაშ თოლით უჯინენა დო აფასენა თიშ სიწმინდეს (ეკლ. 5:4, 5; ებრ. 13:4).