1, 2. ნამ სიტუაციეფს შილებე ქუმანგარინან?

 ᲠᲔ ᲗᲘᲪᲐᲚ სიტუაციეფ, მუჟამსით იმნგართ. მაგალთო, მუჟამსით მუდგარენ მანგარო მოხიოლუნა, თოლშე ხიოლიშ ჩილამურეფ მოურს. შილებე თენა თიმწკუმა რღოლამუნა, მუჟამსით ბაღანაქ შეგეძინეს, სასიამოვნო მუდგარენქ ქუგგაშინეს ვარდა წანეფიშ უძირაფ საჸოროფო მეგობარს შეხვადით.

² მარა უმენტაშო თიმწკუმა მანგარინენა, მუჟამსით გურ დამონკებულ მაფუნა. მაგალთო, შილებე თიმწკუმა ქუმანგარინან, მუჟამსით მიდგაინ გურს ალმოჭუანა, ლახალაშ გურშენ ვეყურებენ ფერ ჭუა მიღუნა ვარდა ღურა მიდმამღანა საჸოროფო პიროვნებას. თეცალ სიტუაციეფს შილებე წინასწარმეტყველ იერემიაცალო ბგინაფლენდათ დუდის, მით მანგარო გენიცადენდჷ იერუსალიმიშ განადგურებას დო თეცალ მუდგარენ თქუ: „ჩხე ჩილამურით იმნგარქ . . . ჩქიმ თოლს ჩილამურ ველასქირუ, დღაშ დო სერით იმნგარდენ იჸი“ (გოდ. 3:48, 49).

 3. მუს გინაფლენს იეჰოვა, მუჟამსით მუშ მსახურეფიშ ნგარას ორწყე? (ეს. 63:9).

³ იეჰოვას კოროცხილ აფჷ ჩქინ ჩილამურეფ დო ზუსტას უჩქჷ, მუშ გურშენ მინგარინუნა ცხოვრებას. ბიბლია მარწმუნენა, ნამდა თის ჯგირო არჩქილე, მუს ურზუ მუშ თითოულ მსახურ დო მთელ გურით მირჩქილენა, მუჟამსით ჩხე ჩილამურით ფთხინთჷ მოხვარას (ფსალმ. 34:15). იეჰოვა ხვალე ჯინას დო რჩქილას ვეგეჯერდუ; მოჸოროფე მშობელცალო, თის გურს უსოფუნს ჩქინ ნგარაშ ძირაფა დო ვეშულებ ვემმეხვარანინ (წეკითხით ესაიაშ 63:9).

 4. ნამ მაგალითეფს გუვარჩიენთ დო მუს გებგენთ თავრეშე იეჰოვაშ გურშენ?

 ⁴ ღორონთიშ სიტყვას ბრელ შემთხვევა რე მოჩამილ, მუჭო უპასუხ იეჰოვაქ მუშ მსახურეფს, მით ჩილამურეფით თხინდეს მოხვარას. თე სტატიას გუვარჩიენთ ღორონთიშ სუმ ართგურ მსახურიშ, ხანაშ, დავითიშ დო მეფე ხიზკიაშ მაგალითეფს. ქობძირუნთ, მუშენ ინგარეს თინეფქ, მუ აკეთ იეჰოვაქ, მუჟამსით თინეფიშ ნგარა ქოძირ დო მუჭო ემქექუანა გურშა თინეფიშ მაგალითეფ, მუჟამსით გურჭუაშ, ღალატიშ დო უიმენდობაშ დროს იმნგართ.

ᲒᲣᲠᲭᲣᲐᲨ ᲩᲘᲚᲐᲛᲣᲠᲔᲤ

 5. მუ მდგომარეობა უღუდ ხანას?

⁵ ხანას ბრელ ოწუხებელ უღუდ, მუთ თეშ უმონკენდჷ გურს, ნამდა ნგარაშა ხოლო მიშჷ. ართ-ართ პრობლემა თინა რდჷ, ნამდა თიშ ქომონჯის მაჟია ოსურ ხოლო ჸუნდჷ, ფენინა, ნამდგას ვაძირუაფუდ ხანა დო სიცოცხლეს უნწარენდჷ. ონერვიანებელო თენა ვა უბაღუდკონინ თეშ, ხანას თინა ხოლო გიაძინუდ, ნამდა სქუა ვეურჩქინდუდ, ვარინ ფენინას მუსხირენ სქუა ჸუნდჷ (1 სამ. 1:1, 2). თის ფენინა ირიათო გაციგანუდ ბაღანეფ ვეურჩქინდუდუნ თიშენ. თქვა მუს იგინანდით ხანაშ ადგილს ქოჸოფედითკონ? მუჭოთ ბიბლიაშე ბგებულენთ, შურგანწარებულ ხანა „ინგარდჷ დო მუთუნს ვა ჭკუმუნდჷ“ (1 სამ. 1:6, 7, 10).

 6. მუქ ეუქექუ გურშა ხანას?

⁶ მუქ ეუქექუ გურშა ხანას? ართ, მუდგაქ თის მეხვარ, იეჰოვაშ თაყვანიშმცემლობაშ ადგილშა, კარავშა, ულა რდჷ. მუჭოთ იძირე, ხანა კარავიშ მინალწკუმა ხოლოს რდჷ, მუჟამსით იეჰოვას ლოცვას გურ გეგნუფაჩ დო ჩილამურ ასქუდუნ თეშ ინგარდჷ. თინა იეჰოვას ოხვეწუდ, სქან მსახურიშ ტანჯება ქოძირ დო ქუგომშინია (1 სამ. 1:10ბ, 11). ხანაქ იეჰოვას ლოცვას ქეჩუ, მუს გინაფლენდჷ. წერმიდგინით, მუჭო აწყუნედ გურ იეჰოვას, მუჟამსით მუშ საჸოროფო მსახურს თეცალ მდგომარეობას ქოძირუნდ.

 7. მუჭო მეხვარ ხანას თიქ, ნამდა გურ გეგნუფაჩ იეჰოვას?

⁷ თიშ უკულ, მუთ ხანაქ იეჰოვას გურ გეგნუფაჩ, მღვდელმთავარ ელიქ ხოლო დარწმუნ თინა, ნამდა იეჰოვა ქუპასუხენდ თიშ ლოცვას. მუჭო იგინ დუდ ხანაქ თეშ უკულ? ბიბლიას პკითხულენთ: „მიდართჷ [ხანაქ], ოჭკუმალ ოჭკუმ დო მეტო ვა ჸოფე გურშეჭირებულ“ (1 სამ. 1:17, 18). თიშ უმკუჯინუო, ნამდა ხანაშ პრობლემა ხეთეშე ვა მოგვარებე, თინა ბრელით უჯგუშო გინაფლენდჷ დუდის, მუშენდა მუშ ოწუხებელ იეჰოვას გეგნაბარ. ღორონთიქ ქოძირ, მუ მდგომარეობას რდჷ ხანა, ქიმირჩქილუ თიშ ლოცვა დო ჭიჭე ხანშა აკურთხჷ დო სქუალეფ ქიმეჩ (1 სამ. 1:19, 20; 2:21).

8, 9. ებრაელეფიშ 10:24, 25-იშ თანახმას, მუშენ ოკო ვეცადათ ირნერო, ქიდვესწრათ კრებაშ შეხვალამეფს? (ქოძირით სურათ).

⁸ მუს ბგურაფლენთ? ხანაცალო, თქვა ხოლო ხომ ვაიღუნა თიცალ ოწუხებელ, ნამუთ გურს გიმონკენა დო ნგარაშა მეჸუნთ? შილებე ოჯახიშ წევრ ვარდა მეგობარ გაფუდან ღურელ.  მუთუნ გასაკვირ ვა რე, ნამდა თეცალ გაჭირება უღუნ ფერ კოჩის ხვალე უსხუნუდას რინა. მარა დუდშა დანძალებერქ გაჸუანინ ხოლო, იშენით მეუთ კრებაშ შეხვალამეფშა, მუშენდა, მუჭოთ ხანას ელუკინ გურშა კარავშა ულაქ, თეშ თქვა ხოლო ეიქექუანა ღორონთიშ თაყვანიშცემაშ ადგილშა მეულა (წეკითხით ებრაელეფიშ 10:24, 25). იეჰოვაქ შილებე კრებაშ შეხვალამეფს მორჩქილაფირ ბიბლიურ მონაკვეთეფით ემქექუან გურშა დო ქიმმეხვარან გლახა ემოციეფიშ ჩათხინაფას. შედეგო, ხეთეშე ვეგშესწორებუნ ფერ სიტუაცია მიღუდანინ ხოლო, დუდის უჯგუშო ქიბგინანთ.

⁹ გურშა თინა ხოლო ემქექუანა, ნამდა კრებაშა მეულირეფს და დო ჯიმალეფ გემუან სიტყვეფს მირაგადუნა დო ჸოროფას მოგინაფუანა (1 თეს. 5:11, 14). გუვარჩუათ ართ სპეციალურ პიონერიშ შემთხვევა, მიდგას ოსურ აფჷ ღურელ. თე ჯიმა იჩიებ: „მინშა, მუჟამსით გურშა ქათმაკათუ, ხვალე რინა მოსაჭირ, მუშენდა ნგარა ემიოლუ დო ვაგმაჩერებე. მარა ზუსტას კრებაშ შეხვალამეფ ელამკინანს გურშა, მუთ მანგარო მოსაჭირ. და დო ჯიმალეფიშ ჸოროფათ რაგადებულ სიტყვეფს დო თინეფიშ კომენტარეფს ქიმიბრჩქილუანქინ, შურ მუმადგუმუ. მუდგა გურშეჭირებულ ვა ვორდენ, ირო, მუჟამსით კრებაშ შეხვალამაშა მეურქ, ემაშქუმალუ“. თაშ ნამდა, კრებაშ შეხვალამეფს იეჰოვაქ შილებე და დო ჯიმალეფ გეგმირინუას ჩქინდა გურიშ ელაკინალო.

10. მუჭო შემლებუნა მივაჸუნათ ხანაშ მაგალითის, მუჟამსით გურ მაფუნა შეჭირებულ?

¹⁰ მუჭოთ ფშუნა, ხანაქ ლოცვაშ უკულ დუდ უჯგუშო იგინ. თქვა ხოლო შეილებუნა „არძა თქვან ოწუხებელ“ გეგნოჩათ იეჰოვას დო რჯერდან, ნამდა თინა ქუმოირჩქილუანა (1 პეტ. 5:7). ჩქინ ართ და, ნამდგაშ ქომონჯ ყაჩაღეფქ ჸვილეს, იშინანს, მუ დღას რდჷ, მუჟამსით თე უბედრობაქ გიოტირხჷ. თინა იჩიებ: „თიცალ გრძნობა მიღუდ, ნამდა გურ აკოსოფილ მაფუდ დო ანწ მუთუნ ქუმახიოლედუნ ვეფიფქრენდჷ. ჩქიმ ზეციერ მუმაწკუმა ლოცვას დორაგადაფა ელამკინანდჷ გურშა. მინშა თინა ხოლო ვა მიჩქუდ, მუ უწიკო იეჰოვას, მარა თის არჩქილედ ჩქიმ. მუჟამსით გვალო გეკმეჭირებუდ გურ, თის ფთხინდჷ, ნამდა სიმშვიდე ქომუჩუკო. ლოცვაშ უკულ ხეთეშე სიმშვიდეს ბგინაფლენდჷ დო ძალეფ მუმაჩამუდ, ნამდა ცხოვრება გუვაგრძელიკო“. მუჟამსით იეჰოვას თქვან ოწუხებელიშ გურშენ ეჩიებუთ, თინა ორწყე თქვან ჩილამურეფს, ჯგირო უჩქჷ, მუს გინაფლენთ დო თქვანცალო აჭვჷ თქვან ჭუა. თქვან პრობლემაქ უცფას ვემიგვარებუასინ ხოლო, იეჰოვა ეიქექუანა დო დუგამშვიდენა (ფსალმ. 94:19; ფილ. 4:6, 7). თინა ვაიდინუანა თი ირფელს, მუდგას თიშო ორთუთ, დო ართგურობაშენ დუგაჯილდოვენა (ებრ. 11:6).

ᲦᲐᲚᲐᲢᲘᲨ ᲩᲘᲚᲐᲛᲣᲠᲔᲤ

11. მუს გინაფლენდჷ დავით, მუჟამსით შხვეფ გლახათ ოქცუდეს?

¹¹ დავით ბრელშა ჸოფე თიცალ სიტუაციას, მუდგას ნგარაშა მეუჸონაფ თინა. მაგალთო, ართ-ართ სირთულე თინა რდჷ, ნამდა თის ჸუნდჷ ნტერეფ, მით ოჸვილარო თხოზუდეს. თეს გეძინელ, მუშ ნამთინე მეგობარქ დო ოჯახიშ წევრიქ, ნამდგას მანგარო ონდუდ, უღალატეს თის (1 სამ. 19:10, 11; 2 სამ. 15:10–14, 30). ართშა დავით ნტერეფიშ თხოზინქ თიცალ დღაშა ქიმიჸუნ, ნამდა თქუ: „ქავოშურდჷ წუხებას; მთელ სერს ჩილამურით ფშოლუნქ ნორჩალს, ჩილამურეფ წენსჷ ჩქიმ ტახტშე“ (ფსალმ. 6:6, 7). თეზმა გლახა მოქციება დავითის თიცალ ჭუას მიორინუანდჷ, ნამდა ჩილამურეფით ირჩხუდ.

12. მუშა რდჷ დავით დარწმუნებულ? (ფსალმ. 56:8).

¹² მართალ რე, დავითის ბრელ გაჭირება უღუდ, მარა ვა უფიქრებ, ნამდა იეჰოვას ვა უჸორდჷ. თიქ თქუ: „იეჰოვა ქიმირჩქილუანს ჩქიმ თვალუას“ (ფსალმ. 6:8). შხვა დიხას,  ფსალმუნიშ 56:8-ს, დავით მანგარ სქვამ სიტყვეფით ეჭარუნს, მუნერ ჸოროფათ ზრუნენს იეჰოვა ჩქინდე (წეკითხით). თინა თეშ გინაფლენდჷ დუდის, ითამ იეჰოვა ტიკის ინაშაყარანდჷ დო წიგნის ჩუანდჷ თიშ ჩილამურეფს. დავითის ჯერდჷ, ნამდა იეჰოვას ძირაფილ დო დამახსოვრებულ აფუდ ჭუა, ნამდგას თინა ურზუდ. დავით დარწმუნებულ რდჷ, ნამდა მოჸოროფე ზეციერ მუმა ხვალე თის ვარწყედ, მუ პრობლემეფ უღუდ თის, თინა ხოლო ჯგირო არჩქილედ, მუს გინაფლენდჷ თე დროს მუშ მსახურ.

13. მუ ელამკინანა გურშა, მუჟამსით შხვეფიშ საქციელ გურს მიტახუნა? (ქოძირით სურათ).

¹³ მუს ბგურაფლენთ? ემოციურო მანგარ გლახათ ხომ ვა რეთჷ თიშ გურშენ, ნამდა მიდგაინქ იმენდ ვა გაიმართლეს ვარდა ონდუდითინ ფერ პიროვნებაქ გიღალატეს? შილებე გურ თიქ გიწყუნუეს, ნამდა ჸოროფილქ ჩეგეთხუეს, მეუღლექ მიგოტუეს ვარდა ხოლო თქვან საჸოროფო ადამიანქ იეჰოვაშ მსახურება მიოტუ. ართ ჯიმა, ნამდგას ოსურქ უღალატ დო მიოტუ, იჩიებ: „აზრიშა ვამმართინ დო მიჭირდჷ თიშ დაჯერება, ნამდა თე ირფელქ ქუმაღოლ. მუთუნშა გურ ვეგემძუდ, ავრე გურმულირ ხოლო ვორდჷ დო თის ხოლო ფიფქრენდჷ, ნამდა მითინს ვა ვოკოდ“. ღალატ ვარდა იმენდიქ გეგემტყუნესინ თენა გურს ქოიტახუნან-და, ქეცადით, ყურადღება თიშა გეგნიღათ, ნამდა იეჰოვა დღას ვემგოტენა. თე ჯიმა აგრძელენს: „ქიმეფხვად, ნამდა ადამიანეფქ შილებე მიმოტუან, მარა იეჰოვაშ იმენდ ირო შემლებუნა მიღუდან; მუდგაქ ვა მოხვადასინ, თინა ირო ჩქინწკუმა იჸუაფ. იეჰოვა დღას ვემიოტენს მუშ ართგურ მსახურეფს“ (ფსალმ. 37:28). ვაგგოჭყორდან, ნამდა ნამთინ ადამიანს ვა უჸორთ თეშ, მუჭოთ იეჰოვას. მუჟამსით მიდგაინ მიღალატენა, მუშო ოკო რაგად, თენა მანგარო მიწყუნუანა გურს, მარა თენა ვა თირანს თი ფაქტის, ნამდა იეჰოვაშო მანგარ ძვირფასეფ ვორეთ (რომ. 8:38, 39). თაშ ნამდა, ირიათო ქორშუდან: ადამიანეფქ მუჭოდგა ვემმექცუანინ, იეჰოვას ირიათო უჸორდათ იჸი!

14. მუშა მარწმუნენა ფსალმუნიშ 34:18?

¹⁴ ონდუდითინ ფერ ადამიანქ ქოიღალატეს-და, მანგარო მიგეხვარებუნა ფსალმუნიშ 34:18-ს ინოჭარილ დავითიშ სიტყვეფ (წეკითხით). ართ-ართ წყაროს ჭარჷ, ნამდა თე მუხლის გიმორნაფილ სიტყვა „შურგანწარებულ“ შილებე თიცალ მდგომარეობას ეჭარუნდას, მუჟამსით ადამიანს მუთუნ ჯგირიშ იმენდ ვა უღჷ. მუჭო ოხვარ იეჰოვა თინეფს, მით თეშნერო გინაფლენა დუდის? იეჰოვა „ხოლოს რე“ ჩქინწკუმა. თინა მოგენს მოჸოროფე მშობელს, ნამუთ გურშა იხუტოლუანს დო ამშვიდენს ანგარებულ ბაღანას. იეჰოვას არჩქილე, მუშმაშხვა ჭუას ბგინაფლენთ, მუჟამსით მიდგაინ მიმოტენა ვარდა მიღალატენა, დო მზათ რე, ხეთეშე მიმეხვარან. თეცალ  დროს თინა ოღალს ემქექუანა დო ნჭყოლირ გურს მიჰამუანა; თეწკუმა ართო, მომავალშო იეჰოვა თიცალ მუდგარენეფს მოპირუნა, მუთ ამდღარ სირთულეეფიშ გინოღალას მოხვარუნა (ეს. 65:17).

ᲣᲘᲛᲔᲜᲓᲝᲑᲐᲨ ᲩᲘᲚᲐᲛᲣᲠᲔᲤ

15. მუშენ ინგარდჷ მეფე ხიზკია?

¹⁵ მეფე ხიზკიაქ 39 წანერ რდუნ თეშ მანგარო დელახ. იეჰოვაქ წინასწარმეტყველ ესაიაშ პიჯით თის უწუ, ნამდა ვა დოსქიდუდ თე ლახალაშე დო დოღურუდ (2 მეფ. 20:1). თაშ ნამდა, ხიზკიას მუთუნიშ იმენდ ვა უღუდ. მუჟამსით თიქ თე ამბე ქიმირჩქილუ, ჩხე ჩილამურით ქიდიჭყჷ ნგარა დო იეჰოვას მთელ გურით ოხვეწუდ მოხვარას (2 მეფ. 20:2, 3).

16. მუ აკეთ იეჰოვაქ, მუჟამსით ხიზკიაქ ანგარებულო ეხვეწ, ქაპატუკო?

¹⁶ ანგარებულ ხიზკიაშ ძირაფაქ დო თიშ ხვეწინქ იეჰოვას გურ მუკურთინუ დო თეცალ მუდგარენ უწუ: „ქიმიბრჩქილე სქან ლოცვა დო ქობძირ სქან ჩილამურეფ; დუგოსქილიდუანქ“. წინასწარმეტყველ ესაიაშ პიჯით იეჰოვაქ თის პირობა მეჩჷ, ნამდა უცფას ვა ღურუდ დო ჭახანს იცოცხლენდ. თეწკუმა ართო, თინა იერუსალიმს დერსხენდ ასურეთიშ ხეშე (2 მეფ. 20:4–6).

17. მუჭო მოხვარუნა იეჰოვა, მუჟამსით ჯანმრთელობაშ სერიოზულ პრობლემა მიღუნა? (ფსალმ. 41:3; ქოძირით სურათ).

¹⁷ მუს ბგურაფლენთ? თიცალ ლახალა ხომ ვაიღუნა, ნამდგაშა ვემიხვარებე? ქილოცით დო ქეჩით იეჰოვას, მუს გინაფლენთ, ნგარებულო რდასინ ხოლო. ბიბლია მარწმუნენა, ნამდა, მუდგა გაჭირებას ვა ვორდათინ, „ჭყოლოფათ ეფშა მუმა დო ირნერო გურიშემაქექაფალ ღორონთ“, გურშა ელამკინანა (2 კორ. 1:3, 4). ამდღა ვეველუთ, ნამდა იეჰოვა არძა პრობლემას ჩამთხინუანა, მარა თინა ქიმმეხვარებუნა თინეფშა გარზებას (წეკითხით ფსალმუნიშ 41:3). იეჰოვა მუშ წმინდა შურით ძალას, სიბრძნეს დო შინაგან სიმშვიდეს ქომუჩანა (იგავ. 18:14; ფილ. 4:13). თეწკუმა ართო, გურშა ქელამკინანა იმენდით, ნამდა მომავალს ირნერ ლახალა მისპუ (ეს. 33:24).

18. ნამ მუხლ ელაიკინანა გურშა განსაკუთრებულო რთულ სიტუაციეფს? (ქოძირით ჩარჩო „მუჭო მამშვიდენა იეჰოვა?“).

¹⁸ ხიზკიას იეჰოვაშ სიტყვაქ ელუკინ გურშა; ჩქი ხოლო ელამკინანა გურშა ღორონთიშ სიტყვაშ კითხირ. თექ ბრელ გურიშ ემაკინალ აზრ რე ინოჭარილ, ნამდგას შეულებ ძალეფ ქომუჩან, მუჟამსით ოწუხებელ მიღუნა (რომ. 15:4). დასავლეთ აფრიკას მახორუ ართ და, ნამდგას კიბოშ დიაგნოზ გეუშქვეს, ხშირას ინგარდჷ. თინა იშინანს: „განსაკუთრებულო ართ მუხლ ელამკინანდჷ გურშა – ესაიაშ 26:3. მართალ რე, უმენტაშო, პრობლემა გვალო ვაჩმათხინნენა, მარა თე მუხლ მარწმუნენა, ნამდა იეჰოვა ქომუჩანა შინაგან სიმშვიდეს დო მიმეხვარებუნა სირთულეშ გინოღალას“. თქვა ხოლო ხომ ვაიღუნა თიცალ ბიბლიურ მუხლ, ნამუთ გურს მალამოცალო მინგადვალუნა, მუჟამსით განსაკუთრებულ სირთულეშ  წოხოლე გერეთ, ნამდგაშა შილებე მუთუნ ვემიხვარებე?

19. მუნერ დრო დოდირთუ?

¹⁹ ჩქი „ბოლო დღალეფიშ“ ბოლოს ფცხოვრენთ, ათეშენ, ნგარა დო ჩილამურიშ მიზეზ მუმაძინუნა-და ვარა, ვამმოკორდუნა. მარა, მუჭოთ ხანაშ, დავითიშ დო მეფე ხიზკიაშ მაგალითეფშე ბძირით, იეჰოვა ორწყე ჩქინ ჩილამურეფს დო თის ხოლო აჭვჷ ჩქინ ჭუა. თის მანგარო უჸორთ თიშ გურშენ, ნამდა თეზმა ჭუაშ უმკუჯინუო, თიშ ართგურ სქიდუთ დო რჯერდან, თქვან არძა ჩილამურს იმახსოვრენს. ათეშენ, მუჟამსით ოწუხებელ გაღვენუნა, გურ გეგნუფაჩით თის ლოცვას, ვარია ვა თქუათ კრებას და დო ჯიმალეფწკუმა ურთიერთობაშენ დო წეკითხით თი ბიბლიურ აზრეფ, ნამუთ გურშა ელაიკინანა. რჯერდან, ბოლოშა ართგურეფ ქიჸით-და, იეჰოვა აუცილებერო დუგაჯილდოვენა. თე ჯილდოშა თი დუნაპირებ ხოლო მიშურს, ნამდა იეჰოვა არძას „გელუწიმინდანს თოლეფშე“ გურჭუაშ, ღალატიშ დო უიმენდობაშ ჩილამურეფს (გამოცხ. 21:4). თაშ ნამდა, დოდირთუ დრო, მუჟამსით ჩქინ თოლეფ ხვალე ხიოლიშ ჩილამურეფით იფშაფუდას იჸი!