პავლე მოციქულქ მუშ თანამსახურს, ტიმოთეს, მით უხუცეს რდჷ, მეჭარ: „ღორონთიშ, ქრისტე იესოშ დო გიშაგორილ ანგელოზეფიშ წოხოლე გირაგადუქ, მიაჸუნე თე ირფელს დო ჯგირო გიმორკვიებაშ უმშო მუთუნ ვეგნოჭყვიდე დო ვეგმირჩქინე გიშაკერძაფა“ (1 ტიმ. 5:21, სქოლიო).

თიშ გაგებელო, მი რენა „გიშაგორილ ანგელოზეფ“, დიო თინა გუვარჩუათ, მი ვემშურს თე ჯგუფშა. არგამა რე, ნამდა თაქ ჩიება ვემურს 144 000 ცხებულშე. მუშენ იფჩიებუთ თეს? მუჟამსით პავლექ ტიმოთეს თე წერილ მეჭარ, დიო დოჭყაფილ ვა რდჷ ცხებულეფიშ ზეცას გათელება; მოციქულეფ დო შხვა ცხებულ ქრისტიანეფ დიო ვა რდესჷ გინორთელ სულიერ ქმნილებეფო. თაშ ნამდა, გიშურს, პავლეშ სიტყვეფ თინეფიშ გურშენ ვა რდჷ რაგადებულ (1 კორ. 15:50–54; 1 თეს. 4:13–17; 1 იოან. 3:2).

„გიშაგორილ ანგელოზეფშა“ ვართ თი ანგელოზეფ მიშულა, მიდგაქ ნოეშ დროს დედამიწაშა გიმორთეს დო ღორონთის ვედემორჩილეს. თინეფქ სატანაშ მხარე ქიდეკინეს, გინირთეს დემონეფო დო უკულ იესოშ წინააღმდეგ მიდართეს (დაბ. 6:2; ლუკ. 8:30, 31; 2 პეტ. 2:4). მალას ქრისტე თინეფს 1 000 წანათ „წკვარამს“ ქინაჸათანს დო, საბოლათ, ეშმაკწკუმა ართო გენადგურებუნა (იუდ. 6; გამოცხ. 20:1–3, 10).

თაშ ნამდა, პავლეშ მოშინაფილ „გიშაგორილ ანგელოზეფ“ ჸოფენა თი ანგელოზეფ, მით ზეცას ართგურო უკინენდეს ხუჯის ღორონთის დო ქრისტეს.

იეჰოვას თეცალ ოშობით ანთას ართგურ ანგელოზ ჸუნსჷ (ებრ. 12:22, 23). მუჭოთ იძირე, ღორონთ არძა ანგელოზის ართნერ დავალებას ვარზენს (გამოცხ. 14:17, 18). მაგალთო, ქიგიფშინათ თი შემთხვევა, მუჟამსით თიქ ართ ანგელოზის დავალ 185 000 ასურელ ჯარიშკოჩიშ განადგურება (2 მეფ. 19:35). იეჰოვას ბრელ ანგელოზშა აფჷ დავალებურ, იესოშ სამეფოშე დოშაყარუან არძა, „მით შხვეფს ოჩილითუანს დო უბადოშ მაკეთებელ რე“ (მათ. 13:39–41). შხვა ანგელოზეფ შილებე თი საქმეშო რდანჷ გერინაფილ, ნამდა ცხებულეფ გაკოშაყარუან ზეცას (მათ. 24:31). ნამთინე ანგელოზის ჩქინ თხილუა აფჷ დავალებურ (ფსალმ. 91:11; მათ. 18:10; ქეშუდარით მათეშ 4:11; ლუკ. 22:43).

1 ტიმოთეშ 5:21-ის მოშინაფილ ანგელოზეფს შილებე კრებაშა მიკოჯინაშ დავალება უღუდესკო. თე მუხლიშ კონტექსტის პავლე მოციქულ ჭკვერულ რჩევეფს არზენს უხუცესეფს, მით „პატიშ ღირს რენა“ კრებაშე. მარა თე ჯიმალეფქ ხოლო „ჯგირო გიმორკვიებაშ უმშო“ მუთუნ ოკო ვეგნოჭყვიდან, ოკო ვეგმირჩქინან გიშაკერძაფა დო ონდო ჯგირო ვედეფიქრებუნან, ოკო ვემიღან გადაწყვეტილებეფ. მუშენ რე თეშ კეთება მნიშვნელოვან? მუშენდა, პავლე იჩიებ, ნამდა თინეფ „ღორონთიშ, ქრისტე იესოშ დო წმინდა [გიშაგორილ] ანგელოზეფიშ წოხოლე“ ორთუნა თე ირფელს. თაშ ნამდა, ნამთინე ანგელოზის იეჰოვაშე დავალებურ აფჷ, ქიმეხვარას კრებას. მაგალთო, თინეფ თხილანა ღორონთიშ ხალხის, ოხვარუნა სახიოლო ამბეშ ქადაგებას დო იეჰოვას ანგარიშის აბარენა (მათ. 18:10; გამოცხ. 14:6).