1. მუს ფიქრენს ნამთინე მარადიულ სიცოცხლეშენ?

 ᲑᲠᲔᲚ ადამიან დუდის ულუანს – ოცად, ჯანსაღ ოჭკუმალ ჭკუმას დო ივარჯიშას, ნამდა მუთ შილებენ ბრელ ხანს დო ჯანმრთელო იცხოვრას. მარა თე კათა ველჷ, ნამდა თე ირფელიშ კეთება მარადიულო აცხოვრენს. თინეფ ფიქრენა, ნამდა მარადიულ სიცოცხლე დღას ვა მოხვადუნ ფერ მუდგარენ რე. მარა იოანეშ 3:16-ის დო 5:24-ის ინოჭარილ იესოშ სიტყვეფშე იძირე, ნამდა ადამიანქ მარადიულო ქიცხოვრასინ თენა შურო ვა რე ზღაპარ.

 2. მუ ჭარჷ იოანეშ მა-6 დუდის მარადიულ სიცოცხლეშ გურშენ? (იოან. 6:39, 40).

² მუჭოთ წოხოლენ სტატიას გუვარჩით, ართშა იესოქ სასწაულ აკეთ დო ანთასობით ადამიანს ქობალ დო ჩხომ მეჩჷ (იოან. 6:5–35). მარა მაჟია დღას იესოქ თიცალ მუდგარენ თქუ, მუთ ხოლო უმოს გასაკვირ რდჷ თინეფშო; მუჟამსით ხალხიქ გორუა ქუდუჭყჷ თის დო გალილეაშ ზღვაშ წყარპიჯიშ ხოლოს, კაპერნაუმს, ქიმიოგორუეს, იესოქ უწუ თინეფს, ნამდა ღურელეფს გათელენდჷ დო მარადიულ სიცოცხლეს ქიმეჩანდ (წეკითხით იოანეშ 6:39, 40). მართალო მუშმადიდა ამბე რე თენა. იესოქ თქუ, ნამდა ბრელ ადამიან, მით ღურელ რე, გეთელებ დო მარადიულ სიცოცხლეს მიღენს. თინეფ შქას შილებე თქვან საჸოროფო ადამიანეფქ ხოლო ქიჸუან, მით ღურაქ მიდაიღეს. თეშ უკულ იესო თიცალ მუდგარენს იჩიებ, მუდგაშ ენონჭაფაქ თიშ ბრელ მარჩქილეს გუჭირდჷ დო ამდღა ხოლო უჭირა. მორთ ქიგებგათ, მუ თქუ იესოქ.

 3. მუს იჩიებ იესო იოანეშ 6:51-ის მუშ დუდიშ გურშენ?

 ³ კაპერნაუმს აკოშაყარელ ხალხის იესოშ სასწაულქ მანანა ქუგაშინ, ნამდგას იეჰოვა ისრაელეფს არზენდჷ ოჭკუმალო. თინეფს უჩქუდეს, ნამდა წმინდა წერილეფ მანანას მიშინუანდჷ, მუჭოთ „ქობალს ცაშე“ (ფსალმ. 105:40; იოან. 6:31). რახანს თე ხალხშო მანანა ნაჩინებ მუდგარენ რდჷ, იესოქ გეგნოჭყვიდ, თინა გეგმირინუკო თინეფშა მნიშვნელოვან მუდგარენეფიშ დაგურაფალო. მუშო ოკო რაგად, ღორონთ ისრაელეფს მანანას არზენდუნ თენა მანგარ დიდ სასწაულ რდჷ, მარა თე ხალხიქ ართ დროს იშენით დოღურ (იოან. 6:49). თეშ გინაწონს, იესოქ მუშ დუდ მიშინუ, მუჭოთ „ნამდვილ ქობალ ცაშე“, „ღორონთიშ ქობალ“ დო „სიცოცხლეშ ქობალ“ (იოან. 6:32, 33, 35). თეშნერო თიქ ქაძირუ, მუ განსხვავება რდჷ, ჯვეშო ისრაელეფშა მეჩამილ მანანაშ დო მუშ დუდ შქას. თიქ თქუ: „მა ვორექ სიცოცხლეშ ქობალ, ნამუთ ზეცაშე გიმურს. მით თე ქობალს ოჭკუმუნს, ირიათო იცოცხლენს“ (წეკითხით იოანეშ 6:51). თეშ გაგონებაქ გვალო აბორჯჷ იესოშ მარჩქილეეფ. თინეფქ ვემეხვადეს, მუჭო შილებედ იესო რდუკო ზეცაშე გიმულირ ქობალ, ნამუთ ბრელით უჯგუდ მუნეფიშ ჯვეშეფშა სასწაულით მეჩამილ მანანას. ხალხ თეს ქიმიოხვამლუასინ თიშენ იესო თინეფს ურაგად: „თე ქობალ ჩქიმ ხორც რე“. მუშ რაგად ოკოდ თეთ იესოს? თეშ რჩქინა მანგარ მნიშვნელოვან რე, მუშენდა თე კითხვაშ პასუხშა რე დამოკიდებულ ჩქინ დო ჩქინ საჸოროფო ადამიანეფიშ მარადიულ სიცოცხლე. მორთ ქიგებგათ, მუს გულისხმენდჷ იესო.

ᲛᲣᲨᲔᲜ ᲨᲔᲐᲓᲐᲠ ᲘᲔᲡᲝᲥ ᲛᲣᲨ ᲡᲮᲔᲣᲚ ᲡᲘᲪᲝᲪᲮᲚᲔᲨ ᲥᲝᲑᲐᲚᲡ?

 4. მუშენ რდჷ ხალხ აჸონებულ იესოშ ნარაგადით?

⁴ იესოშ მარჩქილეეფქ ეჸონეს, მუჟამსით თიქ უწუ, ნამდა მუშ ხორცის დათმენდჷ ხალხიშ სიცოცხლეშო. ალბათ თინეფქ იფიქრეს, ნამდა კანიბალეფცალო პირდაპირ გაგებათ იესოშ ხორც აჸიდეს ოჭკუმალ (იოან. 6:52). უკულ იესო თიცალ მუდგარენს გეუძინანს, მუთ ხოლო უმოსო აკვირენს ხალხის: „კოჩიშ სქუაშ ხორც ვა ჭკუმით დო თიშ ზისხირ ვა შვით-და, ვა გაღვენუნა სიცოცხლე“ (იოან. 6:53).

 5. მუშენ შემლებუნა თიშ რაგად, ნამდა იესო ხალხის პირდაპირ გაგებათ ჩქიმ ზისხირ გეშვითია ვა ურაგად?

⁵ დიო ხოლო ნოეშ დროს იეჰოვაქ ადამიანეფს უზოჯ, ზისხირ ვა ჭკუმესკო (დაბ. 9:3, 4). უკულ იეჰოვაქ თე მითითება ისრაელეფშა მეჩამილ კანონს ხოლო გემეორ, ნამდგაშ თანახმას, მით ზისხირს ოჭკუმუნდ, ოკო დოღურუკო (ლევ. 7:27). მუჟამსით იესოქ ქუმორთჷ დედამიწაშა, თინა ხუჯის უკინენდჷ მოსეშ კანონიშ მეჸუნას (მათ. 5:17–19). თაშ ნამდა, გამორიცხულ რე, იესოს თიშ რაგად ოკოდუკო თე ხალხშა, ნამდა პირდაპირ გაგებათ თიშ ხორც ოკო ჭკუმესკო დო თიშ ზისხირ შვესკო. თე ართ მეჯინათ ჭიჭე უცნაურ ნარაგადით, სინამდვილეს, იესოს ოკოდ, ქუდაგურუკო ხალხის, მუ რდჷ ოკეთებელ მარადიულ სიცოცხლეშ მიოღებელო (იოან. 6:54).

 6. მუშენ შემლებუნა თიშ რაგად, ნამდა იოანეშ 6:53-ს იესო მხატვრულ შედარებას ირინუანდჷ?

⁶ არგამა რე, ნამდა იესო კაპერნაუმს აკოშაყარელ ხალხწკუმა მხატვრულ შედარებას ირინუანდჷ, მუჭოთ თენა სამარიელ ოსურწკუმა ჩიებაშ დროს აკეთ, ნამდგას უწუ: „მით თი წყარს გეშუნს, ნამდგას მა მეფჩანქ, დღას ვა მაჸუმენე, მუშენდა წყარ, ნამდგას მა მეფჩანქ, თიშო მიხვარჩალუნ ფერ წყურგილეთ გინირთუ, ნამუთ ულიებ სიცოცხლეს ირზენს“ (იოან. 4:7, 14). a მუშო ოკო რაგად, თეთ იესოს სამარიელ ოსურშა ვა უთქუალ, ნამდა ნამდგაინ ინჭას რდჷ წყარ, ნამდგაშ შუმას თიშა მარადიულ სიცოცხლე მიაჩინედ. თეშნერო, იესოს ვართ კაპერნაუმს აკოშაყარელ ხალხშა უთქუალ, ნამდა პირდაპირ გაგებათ მუშ  ხორციშ ჭკუმუა დო ზისხირიშ შუმა მოუღანდ თინეფს მარადიულ სიცოცხლეს.

ᲨᲮᲕᲐ ᲨᲔᲛᲗᲮᲕᲔᲕᲐ, ᲛᲣᲟᲐᲛᲡᲘᲗ ᲘᲔᲡᲝᲥ ᲘᲒᲘᲕᲔ ᲐᲖᲠ ᲗᲥᲣ

 7. მუჭო ენწყუნს ნამთინე იოანეშ 6:53-ს რაგადებულ იესოშ სიტყვეფს?

⁷ ბრელ მორწმუნეს ჯერსჷ, ნამდა იოანეშ 6:53-ს მოჩამილ იესოშ სიტყვეფ, თიშ ხორციშ ჭკუმუაშენ დო ზისხირიშ შუმაშენ, ოძირანს, მუჭო ოკო ხვადუდას გოშინაშ ონჯუაშ აღნიშნება, მუშენდა უმოს გვიანო, თე ღონისძიებაშ დორსხუაფაშ დროს ხოლო, იესოქ თიცალ მუდგარენ თქუ, მუთ მოგენდჷ კაპერნაუმს რაგადებულ სიტყვეფს (მათ. 26:26–28). ათეშენ თინეფ ამტკიცენა, ნამდა გოშინაშ ონჯუაშ აღნიშნებაშ დროს არძაქ ოკო შვასჷ ღვინ დო ჭკუმას ქობალ. მარა ქორენო თენა სწორ? აუცილებერ რე, მიჩქუდან თე კითხვაშ სწორ პასუხ, მუშენდა ირ წანას მთელ მსოფლიოს მილიონობით ადამიან ოსწრჷ ჩქინწკუმა ართო გოშინაშ ონჯუას. უკულიან აბზაცეფს გუვარჩიენთ მუსხირენ განსხვავებას იოანეშ 6:53-ს რაგადებულ იესოშ სიტყვეფ დო თიშ შქას, მუთ თიქ გოშინაშ ონჯუაშ დორსხუაფაშ დროს თქუ.

 8. მუ ჟირ განსხვავება რე იესოშ რაგადებულ სიტყვეფ შქას? (ქოძირით სურათეფ).

⁸ მორთ ასე გუვარჩუათ, მუ განსხვავება რე გოშინაშ ონჯუაშ დორსხუაფაშ დროს რაგადებულ დო კაპერნაუმს რაგადებულ იესოშ სიტყვეფ შქას. პირველ, მუჟამ დო სო თქუ იესოქ იოანეშ 6:53–56-ის ინოჭარილ სიტყვეფ?  თიქ თე სიტყვეფ ახ. წ. 32 წანას გალილეას აკოშაყარელ ხალხის უწუ, ართ წანათ ადრე, ონდო გოშინაშ ონჯუას დარსხუანდუკო იერუსალიმს. მაჟია, მის უწუ იესოქ თე სიტყვეფ? გალილეას აკოშაყარელ ხალხის, ნამდგაშ უმენტაშის მთელ ყურადღება ფიზიკურ საჭიროებეფიშ დაკმაყოფილებაშა აფუდ გინოღალირ დო ვართ ხოლო სულიერ მოთხოვნილებეფშა (იოან. 6:26). მუჟამსით თინეფს გუჭირდეს იესოშ სიტყვეფიშ ინონჭაფაქ, ხეთეშე მიოდინუეს თიშ რწმენა დო ნამთინექ გვალო მიოტუ თიშ ეკოჸუნა (იოან. 6:14, 36, 42, 60, 64, 66). მარა, ართ წანაშ უკულ, ახ. წ. 33 წანას, მუჟამსით იესოქ გოშინაშ ონჯუა დარსხუ, თინა გვალო შხვა ხალხწკუმა ხედჷ. თე შემთხვევას იესო მუშ 11 ართგურ მოციქულწკუმა ართო რდჷ. მართალ რე, თინეფ ბოლოშა ვენანჭუდეს იესოშ გურაფეფს, მარა გალილეას აკოშაყარელ ხალხიშ გინაწონს, წანდეს, ნამდა იესო ღორონთიშ სქუა რდჷ დო ზეცაშე რდჷ მოშქუმალირ (მათ. 16:16). იესოქ ქაცქუ თინეფს დო თეცალ სიტყვეფ უწუ: „თქვა გაჭირებაშ დროს ხოლო ვა ჩაფთხიებუთ“ (ლუკ. 22:28). ხვალე თე ჟირ განსხვავება ხოლო ბაღჷ თიშ ოძირაფალო, ნამდა იოანეშ 6:53-ს ინოჭარილ იესოშ სიტყვეფ გოშინაშ ონჯუაშ გურშენ ვა რე რაგადებულ. მარა ხოლო რე შხვა განსხვავებეფ.

ᲛᲣᲡ ᲜᲘᲨᲜᲔᲜᲡ ᲘᲔᲡᲝᲨ ᲡᲘᲢᲧᲕᲔᲤ ᲗᲥᲕᲐᲜᲝ?

 9. მიშ გურშენ იჩიებუდ იესო გოშინაშ ონჯუაშ დაწესებაშ დროს?

⁹ გოშინაშ ონჯუაშ დაწესებაშ დროს იესოქ მოციქულეფს ცომიშ ეიოჸუნაფალ ვა უღუდუნ ფერ ქობალ გეგნაჭირინუ დო უწუ, ნამდა თინა სიმბოლურო მუშ სხეულს ნიშნენდჷ. უკულ ღვინ ხოლო გეგნაჭირინუ დო უწუ, ნამდა თინა სიმბოლურო მუშ ზისხირს ნიშნენდჷ, ნამდგაშ ჭყოლოფათ შეთანხმება გემშეშ ძალაშა (მარ. 14:22–25; ლუკ. 22:20; 1 კორ. 11:24). იესოშ თე სიტყვეფს მანგარ დიდ მნიშვნელობა უღჷ. თე შეთანხმებაქ არძა ადამიანწკუმა ვარინ, ხვალე „სულიერ ისრაელწკუმა“, ანუ თინეფწკუმა იჸუ დოდვალირქ, მით ქრისტეშ თანამმართველეფ იჸუაფუნა (ებრ. 8:6, 10; 9:15). მოციქულეფქ თეს თიმ მომენტის ვენანჭეს, მარა მალას წმინდა შურს მიღენდეს დო ახალ შეთანხმებაშ ნაწილო გინირთუდეს, მუდგაშ ჭყოლოფათ ადგილ აღვენუდეს იესოწკუმა ზეცას (იოან. 14:2, 3).

10. ხოლო მუ განსხვავება რე გოშინაშ ონჯუაშ დაწესებაშ დროს რაგადებულ დო გალილეას აკოშაყარელ ხალხწკუმა რაგადებულ იესოშ სიტყვეფ შქას? (ქოძირით სურათ).

¹⁰ ყურადღება ქიმიაქცით, ნამდა თიმ ონჯუას, მუჟამსით იესოქ გოშინაშ ონჯუა დარსხუ, იჩუ „ჭიჭე ოჭყიშალიშ“ გურშენ, ნამდგაშ პირველ წევრეფ თიშ ართგურ მოციქულეფ რდესჷ, მით თიმ სერს მუწკუმა ართო ჸუნდჷ (ლუკ. 12:32). იესოქ თინეფს უწუ, ოჭკუმესკო ქობალ დო გეშვესკო ღვინ. გოშინაშ ონჯუაშ აღნიშნებაშ დროს თენა ოკო აკეთესკო თინეფქ ხოლო, მით თე ჭიჭე ჯგუფის ქიგიაძინუდ. თინეფ იესოწკუმა ართო იჸუაფუნა ზეცას. თაშ ნამდა, გოშინაშ ონჯუაშ დაწესებაშ დროს რაგადებულ იესოშ სიტყვეფ ოხუდ ჭიჭე ჯგუფის. მარა გალილეას აკოშაყარელ ხალხწკუმა რაგადებულ ბრელით უმოს ადამიანს ოხუდ.

11. სოვრეშე იძირე, ნამდა გალილეას იესო „ჭიჭე ოჭყიშალიშ“ გურშენ ვეჩიებუდ?

¹¹ ახ. წ. 32 წანას იესო გალილეას თი ხალხის ეჩიებუდ, მიდგაშ უმენტაშ თიშა ოჭკუმალიშ გურშენ რდჷ მეულირ. თიქ თინეფიშ ყურადღება თიშა გეგნიღ, მუთ ბრელით უმოს ძვირფას დო მნიშვნელოვან რდჷ ოჭკუმალშე დო მუდგას მარადიულ სიცოცხლეშ მოღალა შეულებუდ თინეფშა. იესოქ თინა ხოლო თქუ, ნამდა უკანასკნელ დღას ღურელეფ გეთელებუდეს დო მარადიულო იცხოვრენდეს. თაქ იესო ვეჩიებუდ „გიშაგორილეფშე“, თი ჭიჭე ჯგუფშე, ნამდგაშ გურშენ გოშინაშ ონჯუაშ დორსხუაფაშ დროს იჩუ. გალილეას თინა  იჩიებუდ თი კურთხევაშე, ნამდგაშ მეღებაშ საშვალება არძა ადამიანს მიაჩამუდ. ათეშენ თქუ თიქ: „თე ქობალ ჩქიმ ხორც რე, ნამდგას ხალხიშ სიცოცხლეშო დაფთმენქ“ (იოან. 6:51).

12. მუ რე საჭირო მარადიულ კურთხევაშ მიოღებელო?

¹² თიშ რაგად ოკოდუო იესოს გალილეას აკოშაყარელ ხალხშა, ნამდა არძა, მიდგას დედამიწას უცხოვრებ ვარდა ანწ იცხოვრენს, ულიებ სიცოცხლეს მიღენსია? ვარ, ხვალე თინეფ მიღენდეს თი კურთხევეფს, მით ოჭკუმუნდეს თე ქობალს – გეგმირჩქინანდეს იესოშ რწმენას. ბრელს ჯერსჷ, ნამდა მარადიულ სიცოცხლეშ მიოღებელო თინა ხოლო დასაბაღ რე, ნამდა უბრალოთ იესოშ რწანდას დო სქან მარსხებელო მიგორჩქუდას (იოან. 6:29). მარა, სინამდვილეს, თენა თაშ ვა რე. გალილეას აკოშაყარელ ხალხშე ნამთინექ ხოლო დუდშე ირწმუნ იესო, მარა უკულ მიოტუეს თინა. მუშენ მოხვად თექ?

13. მუ რე საჭირო იესოშ მიმაჸუნალობაშო?

¹³ თი ხალხიშ უმენტაშ, მიდგას იესოქ ოჭკუმალ მეჩჷ, თეიშახ ეკოჸუნდჷ თის, ონდო მუთ ოკოდესინ თის ღებულენდეს. ნამთინე ლახალაშე სქილიდაფაშ ხათრით ეკოჸუნდჷ იესოს, ნამთინე ოჭკუმალიშ დო ნამთინე ხოლო თი გურაფეფიშ მარჩქილაფარო, ნამუთ მუს ონწყუნდჷ. მარა იესოქ ქაძირუ ხალხის, ნამდა თიშ მოწაფეობა მართალო ქაკოდეს-და, უმოს რდჷ საჭირო. თის დედამიწაშა უბრალოთ თიშენ ვა მურთუმ, ნამდა ადამიანეფიშ სურვილეფ შეასრულუკო. თინეფქ, თაშ ქოფთქუათინ, ოკო „ქიმერთესკო“ იესოშა, მუთ თის ნიშნენდჷ, ნამდა ქურჩქილესკო თის დო მიაჸუნესკო ირფელს, მუდგას თინა ოგურუანდჷ (იოან. 5:40; 6:44).

14. მუ ოკო ვაკეთათ, ნამდა იესოშ მსხვერპლიქ ჯგირობუა ქუმომღან?

¹⁴ იესოქ არგამათ ოძირუ თე ხალხის, ნამდა  რწმენა რდჷ საჭირო. მუ ოკო ირწმუნესკო თინეფქ? თინეფქ ოკო ირწმუნესკო, ნამდა იესოშ ხორცის დო ზისხირს, ნამდგას შეწირენდ, გიშაჸიდირიშ ძალა უღუდ, მუთ მარადიულ სიცოცხლეს ქუმუღანდ თინეფს. თეშ რწმენა ოსაჭირუდეს იუდეველეფს დო მოსაჭირუნა ჩქი ხოლო (იოან. 6:40). თაშ ნამდა, მუჭოთ იოანეშ 6:53-ს ჭარჷ, იესოშ შეწირულ ხორციქ დო დობუნილ ზისხირქ სარგებელ ქუმომღანინ, საჭირო რე, გიშაჸიდირალიშ რწმენა გეგმიბრჩქინათ. თეშ საშვალება არძას უღჷ (ეფეს. 1:7).

15, 16. მუ დიბგურეთ იოანეშ მა-6 დუდშე?

¹⁵ იოანეშ მა-6 დუდის ინოჭარილ სიტყვეფ მანგარ მნიშვნელოვან რე ქოთ ჩქინო დო ქოთ ჩქინ საჸოროფო კათაშო. თევრეშე იძირე, ნამდა იესოს მანგარო ოწუხ ადამიანეფიშ მდგომარეობა. გალილეას რდუნ თიმწკუმა თინა ხალხის ოგურუანდჷ ღორონთიშ სამეფოშ გურშენ, ოჭკუმალს არზენდჷ, მუჟამსით შქირენულეფ რდესჷ, დო ოსქილიდუანდჷ ლეხეფს (ლუკ. 9:11; იოან. 6:2, 11, 12). მუთ არძაშ უმოს მთავარ რე, იესო ოგურუანდჷ, ნამდა თინა რდჷ „სიცოცხლეშ ქობალ“ (იოან. 6:35, 48).

¹⁶ „შხვა შხურიშ“ წარმომადგენელეფ ვა ღებულენა დო ვართ ოკო ღებულენდან სიმბოლოეფს გოშინაშ ონჯუაშ დროს (იოან. 10:16). მარა, მუშო ოკო რაგად, იესოშ შეწირულ ხორცის დო ზისხირს იშენით მოუღ ჯგირობუა თინეფშა. თინეფ სიმბოლურ გაგებათ ღებულენა სიცოცხლეშ ქობალს, მუჟამსით რწმენას გიმირჩქინანა იესოშ მსხვერპლიშ მიმართ დო ჯერა, ნამდა თის ჯგირობუაშ მოღალა შეულებ თინეფშა (იოან. 6:53). მარა შხვა შხურიშ გინაწონს, თინეფ, მით სიმბოლოეფს ღებულენა, თეთ ოძირანა, ნამდა ახალ შეთანხმებაშ მონაწილეეფ რენა დო ჯერა, ნამდა ზეციერ სამეფოს მმართველეფ იჸუაფუნა. ვა უღჷ მნიშვნელობა, შხვა შხურს ვოკათუთ დოვარ ცხებულ ვორეთ, იოანეშ მა-6 დუდის ინოჭარილ სიტყვეფს დიდ მნიშვნელობა უღჷ თითოეულშო. თინა მოგებაფუანა, ნამდა მარადიულ სიცოცხლეშ მიოღებელო რწმენაშ გიმორჩქინა რე საჭირო.