1, 2. მუ რეაქცია ოკო უღუდან მშობლეფს, მუჟამსით სქუას კითხვეფ ურჩქინდუ ჩქინ რწმენაშ გურშენ?

 ᲡᲥᲣᲐᲚᲔᲤᲘᲨ რდუალა ჭიჭე ამბე ვა რე. ბაღანა თქვა ხოლო ქორჸუნან-და, ალბათ ირფელს ორთუდათ იჸი, ნამდა თის რწმენა გუვითარათ, მუდგაშოთ ოცქვაფალ რეთჷ (კან. 6:6, 7). მუჭო ირდუნ თეშ, შილებე თქვან ბაღანას კითხვეფქ გურჩქინდას ჩქინ რწმენაშ გურშენ, მაგალთო, მუშენ მივარიენა იეჰოვა მუდგარენეფს.

² დუდშე შილებე დუგოშქურინუან თქვან სქუაშ კითხვეფქ, მუშენდა იფიქრათ, ნამდა თენა რწმენაშ სინაკლებეშ მაძირაფალ რე. მარა ვა გაშქურინან, მუთუნ ვა რე ონერვიანებელ. სინამდვილეს ჯგირ რე, ნამდა ბაღანას კითხვეფ ურჩქინდუ, მუშენდა თენა მეხვარებ, ხოლო უმოსო გემანგარას რწმენა (1 კორ. 13:11). თაშ ნამდა, მუჟამსით თქვან სქუას ჩქინ რწმენაშ გურშენ მუდგარენ შურ დო გურით ოინტერეს, გეგმირინეთ თე სიტუაცია, ნამდა თის ტომბას ფიქრ ქუდაგურუათ.

 3. მუს გუვარჩიენთ თე სტატიას?

³ თე სტატიას გუვარჩიენთ, მუჭო შეულებუნა მშობლეფს, ქიმეხვარან სქუალეფს, 1) გემანგარან რწმენა იეჰოვაშ დო თიშ ორგანიზაციაშ მიმართ, 2) ქინანჭან, მუშენ რე ჯგირ ბიბლიურ ნორმეფიშ მეჸუნა, დო 3) ეიანწყინედან შხვეფშა, მუ წანა. თიშე ხოლო მაღვენუნა ჩიება, მუშენ რე ჯგირ, ბაღანეფს თეცალ კითხვეფ ურჩქინდუნან დო მუშ კეთება შეულებუნა მშობლეფს, ნამდა სქუალეფწკუმა ჩქინ რწმენაშ გურშენ ჩიებაშ საშვალებაქ ქიმიაჩან.

 ᲥᲘᲛᲔᲮᲕᲐᲠᲘᲗ ᲡᲥᲣᲐᲡ ᲑᲘᲑᲚᲘᲐᲨ ᲓᲝ ᲦᲝᲠᲝᲜᲗᲘᲨ ᲛᲘᲛᲐᲠᲗ ᲠᲬᲛᲔᲜᲐᲨ ᲒᲐᲛᲐᲜᲒᲐᲠᲔᲑᲐᲡ

 4. მუ კითხვეფქ შილებე გურჩქინდას ბაღანას დო მუშენ?

⁴ მშობლეფს ოკო არჩქილედან, ნამდა სქუალეფს დიდა დო მუმაშ რწმენა ავტომატურო ვეგნაჩამუნა. მუჭოთ თქვა ვა დაბადებეთ ძალიერ რწმენათ, თეშ რე თქვან სქუა ხოლო. ათეშენ შილებე მინშა თეცალ კითხვეფქ გურჩქინდას: სოვრეშე მიჩქჷ, ნამდა ღორონთ მართალო არსებენს? ქინდებენო თიშა, მუდგას ბიბლია ოგურუანს? ბიბლია ხოლო ელამჩანა, თეშ ვემსახურათ ღორონთის, ნამდა ჯგირო მარჩქილედან, მუს ვორთუთ, დო „ირფელ გურგედვალირო“ გეგმიბრკვიათ (რომ. 12:1; 1 თეს. 5:21). თაშ ნამდა, მორთ ქობძირათ, მუჭო შეილებუნა მეხვარათ სქუას რწმენაშ გამანგარებას.

 5. მუჭო შეულებუნა მშობლეფს, მეხვარან სქუას, დერწმუნას, ნამდა ბიბლიაშა ინდებე? (რომ. 12:2).

⁵ ქუდაგურეთ, მუჭო გიმირკვიას მტკიცებულებეფ (წეკითხით რომაელეფიშ 12:2). მუჟამსით ბაღანას კითხვეფ ურჩქინდუ, ქაძირეთ, მუჭო შეულებ პასუხეფიშ მეღება ორკვიებელ საშვალებეფიშ გიმორნაფათ. მაგალთო, გეუნწყით, მუჭო გიმირინუას „გინაჯინალ კოშკიშ პუბლიკაციეფიშ საძიებელ“ დო „იეჰოვაშ მოწმეეფიშ ორკვიებელ სახელმძღვანელო“. „ორკვიებელ სახელმძღვანელოს“ შეულებ დოგორას საკითხ „ბიბლია“ დო უკულ ქვესათაურ „ღორონთშე შთაგონებულ“, ნამდგაშ თუდო გუმოკოროცხილ სტატიეფს მოჩამილ რე თიშ მტკიცებულებეფ, ნამდა ბიბლია უბრალოთ ჭკვერ კათაშ ნაჭარა წიგნ ვარინ, „ღორონთიშ სიტყვა“ რე (1 თეს. 2:13). მაგალთო, თე სტატიეფშე შილებე გეგშაგორას სტატია, სოდეთ ასურეთიშ ქალაქ ნინევეშე მეურს ჩიება. ულირს ნამთინე ბიბლიაშ კრიტიკოს იჩიებუდ, ნამდა თე ქალაქ დღას ვა არსებენდჷ. მარა 1850-იან წანეფს არქეოლოგიურ გათხრეფიშ შედეგო, დიხაშ თუდო ქიძირ აკოცუმილ ნინევექ, მუდგაქ დამტკიც, ნამდა ბიბლიას თე ქალაქიშ გურშენ მართალ ჭარუდ (სოფ. 2:13–15). თიშ გაგებელო, მუჭო შისრულ ნინევეშ განადგურებათ ბიბლიურ წინასწარმეტყველებაქ, თქვან სქუას შეულებ ქოძირას 2021 წანაშ ნოემბერიშ „გინაჯინალ კოშკის“ მოჩამილ სტატია „ქოიჩქუდესო?“. მუჟამსით თქვან სქუა ქოძირუნს, მუჭო მეურე ართიანს თინა, მუთ ჩქინ პუბლიკაციეფს ჭარჷ დო მუთ ენციკლოპედიეფს დო შხვა სანდო წყაროეფს რე რაგადებულ, უმოსო დერწმუნებ, ნამდა, მუდგას ბიბლია იჩიებ, სიმართლე რე.

 6. მუჭო შეულებუნა მშობლეფს მეხვარან სქუას, დეფიქრას, მუშენ რე სიმართლე, მუდგას ბიბლია იჩიებ? (ქოძირით სურათ).

⁶ ქუდაგურეთ, დეფიქრას მტკიცებულებეფშე. მშობლეფ, შეილებუნა შხვადოშხვა სიტუაცია გეგმირინუათ სქუაწკუმა ბიბლიაშ დო ღორონთიშ გურშენ ორაგადეთ. თეშ საშვალებაქ შილებე ქუმგაჩან ბოტანიკურ ბაღშა ვარდა ჩქინ ფილიალს მონწყილ გამოფენეფშა ულაშ დროს. სქუა მუზეუმშა მერჸუნა ვარდა ჩქინ პუბლიკაციეფით დოვარ ინტერნეტით  არქეოლოგიურ ძეგლეფშა გაჯინუანთინ თიმწკუმა, ყურადღება თიცალ ისტორიულ მოვლენეფშა დო დეტალეფშა გეგნიღით, ნამუთ დარწმუნენს, ნამდა მუდგას ბიბლია იჩიებ, სიმართლე რე. ქოუჩქუნო თქვან სქუას, ნამდა ღორონთიშ სახელ 3 000 წანაშ წოხოლეიან ქუაშ ფილას რე ძირაფილ, ნამდგას „მოაბურ ქუას“ უძახუნა. თე ქუა საფრანგეთიშ ქალაქ პარიზის, „ლუვრიშ“ მუზეუმს ძჷ. თე ქუაშ ასლ „იეჰოვაშ მოწმეეფიშ მსოფლიო მთავარ სამმართველოს“, უორიკის ხოლო რე გამოფენას, ნამდგას ჯოხო „ღორონთიშ სახელ ბიბლიას“. თე ქუაშ ფილას ჭარჷ, ნამდა მოაბიშ მეფექ, მეშაქ, ისრაელიშ წინააღმდეგ გეგშართჷ, ნამდგას ხარკის უგანდჷ. ბიბლია ხოლო ზუსტას თეს იჩიებ (2 მეფ. 3:4, 5). თეშნერო, მუჟამსით თქვან სქუა ქოძირუნს, ნამდა ბიბლიაშა ინდებე დო მუთ თექ ჭარუნ სწორ რე, უმოსო გემანგარებ რწმენა (ქეშუდარით 2 მატიანეშ 9:6).

7, 8. ა) მუს ბგურაფლენთ სქვამ ფორმეფშე, ნამდგას ბუნებას შეფხვადუთ? ქიმიჸუნით მაგალით (ქოძირით სურათ). ბ) ნამ კითხვეფშე დაფიქრება გაუმანგარენს თქვან სქუას თიშ რწმენას, ნამდა ირფელს გუმაჭყაფალ ჸუნსჷ?

⁷ ქუდაკვირებაფეთ გუნაჭყეფუეფშა. მუჟამსით ბუნებას რეთჷ ვარდა ეზოშ საქვარს ორთუთ, თქვან სქუალეფს ყურადღება ქიმიოქციებაფეთ გუნაჭყეფუეფიშ საინტერესო ფორმეფშა. მუშენ რე თენა მნიშვნელოვან? მუშენდა, თე ირფელ ოძირანს, მუნერ ბრძენ დო გონიერ პიროვნებაშ გუნაჭყეფ რე თე ირფელ. მაგალთო, ბრელ ხან რე, მუთ მეცნიერეფ სპირალიშ ფორმაშ აგებულებას ირკვიენა, ნამდგას ბუნებას შხვადოშხვა გუნაჭყეფუეფს შეფხვადუთ. ბიოფიზიკოს ნიკოლა ფამელ იჩიებ, ნამდა ბუნებას სპირალურ აგებულებაშ გუნაჭყეფუეფს ქიდეკვირებუქ-და, ქოძირუნქ, ნამდა თე სპირალეფიშ რაოდენობა კონკრეტულ მიმდევრობათ იმეორებ. თეს „ფიბონაჩიშ რიცხვეფიშ მიმდევრობა“ ჯოხო. სპირალურ აგებულებას ბრელ დიხას შეფხვადუთ, მაგალთო, ნამთინე გალაქტიკას, მოლუსკიშ ნიჟარაშ აგებულებას, მცენარეშ ფურცელიშ განლაგებას დო სემიჩქაშ ყვავილს კაკალეფიშ წყობას. a

⁸ თქვან სქუას სკოლას ბუნებაშ კანონეფს ხოლო ქუდაგურუანა, მაგალთო, მიზიდულობაშ კანონს, ნამდგას უმარგ ატმოსფერო, ნამუთ დედამიწას გოთხოზ, არეგულირენს ზღვეფიშ დო ოკეანეეფიშ მოძრაობას დო ხეს უნწყუნს დედამიწას სიცოცხლეშო საჭირო წესრიგის. მიქ მიფიქრჷ თე კანონ დო მიშ გენწყილ რე თე სასწაულ წესრიგ, ნამუთ ბუნებას რე? თქვან სქუა თეცალ კითხვეფშე დო გუნაჭყეფუეფშე ჯგირო დეფიქრებუნ-და, თენა მეხვარებ, უმოსო დერწმუნას, ნამდა ირფელ ღორონთიშ გოჭყაფილ რე (ებრ. 3:4). ჭიჭე გამწირდუნ, უმოსო დაფიქრათინ თიშენ, შეილებუნა თქვა ხოლო ქოკითხათ თეცალ მუდგარენ: მუჭო ფიქრენქ, ღორონთის, ჩქინ გუმაჭყაფალს, არძაშ უჯგუშო ვა უჩქუნო, მუ ოკო ვაკეთათ, ნამდა ბედნერეფქ ქიპჸუათ? უკულ შეილებუნა გეუნწყათ, ნამდა იეჰოვაქ თეშო ბიბლია მუჩეს.

 ᲥᲣᲓᲐᲒᲣᲠᲔᲗ, ᲛᲣᲨᲔᲜ ᲠᲔ ᲯᲒᲘᲠ ᲦᲝᲠᲝᲜᲗᲘᲨ ᲜᲝᲠᲛᲔᲤᲘᲨ ᲛᲔᲸᲣᲜᲐ

 9. მუშენ შილებე თქვან სქუას ეჭვეფქ გურჩქინდას ბიბლიურ ნორმეფიშ გურშენ?

⁹ თქვან სქუას ბიბლიურ ნორმეფიშ გურშენ კითხვეფ ქოუღუნ-და, ქეცადით, ქიგეგათ, მუ უღჷ გურს დო მუშენ გურჩქინდჷ თე ეჭვეფქ. თეშ მიზეზ თინა რენო, ნამდა ვა ჯერსჷ, მუდგას ბიბლია იჩიებუნ სწორ რე, დოვარ უბრალოთ უჭირს შხვეფწკუმა მუშ რწმენაშ ენწყუმა? მიზეზ მუდგა ვა რდასინ, ქიმეხვარით თქვან სქუას, ქინანჭას, მუშენ რე ჯგირ იეჰოვაშ ნორმეფიშ მეჸუნა. თეშ ოკეთებელო, შეილებუნა თიწკუმა ართო გარჩუათ წიგნ „მარადიულო გეხარით ცხოვრებათ!“. b

10. მუჭო შეილებუნა მეხვარათ თქვან სქუას, ხოლოშიან ურთიერთობა უღუდას იეჰოვაწკუმა?

¹⁰ ქიმეხვარით, პირად ურთიერთობა უღუდას იეჰოვაწკუმა. თქვან სქუაწკუმა ბიბლიაშ გურაფაშ დროს, თიშ გაგებელო, მუს ფიქრენს შხვადოშხვა საკითხიშ გურშენ, გეგმირინეთ წიგნის „მარადიულო გეხარით ცხოვრებათ!“ მოჩამილ მაგალითეფ დო კითხვეფ (იგავ. 20:5). მაგალთო, თე წიგნიშ მა-8 გაკვეთილს იეჰოვა შედარებულ რე მეგობარწკუმა, მით ირფელს ორთჷ, ნამდა დოფთხილუან დო იზრუნას ჩქინდა. 1 იოანეშ 5:3-იშ გარჩიებაშ უკულ, შეილებუნა თეცალ მუდგარენ ქოკითხათ: „იეჰოვა ჩქინო თეცალ მეგობარ ქორენ-და, მუჭო ოკო უჯინედათ თი რჩევეფს, ნამდგას თიშე ბღებულენთ?“. თენა შილებე გვალო უბრალო კითხვათ გაძირედან, მარა თქვან სქუას ქიმეხვარებ თიშ ინონჭაფას, ნამდა იეჰოვა კანონეფს უჸორთინ თიშენ მარზენა (ეს. 48:17, 18).

11. მუჭო შეილებუნა მეხვარათ თქვან სქუას, ქოძირას, მუშენ რე ჯგირ ბიბლიურ ნორმეფით ცხოვრება? (იგავ. 2:10, 11).

¹¹ ქიჩით, მუ ჯგირობუა მოუღ ბიბლიურ პრინციპეფიშ მეჸუნას. ბიბლიაშ კითხირიშ ვარდა ირდღაშიან მუხლიშ გარჩიებაშ დროს თქვან სქუაწკუმა ართო ქიჩით, მუჭო ოხვარ თქვან ოჯახის ბიბლიურ პრინციპეფიშ მეჸუნა. მაგალთო, ქარწყენო თქვან სქუა, მუ ჯგირობუა მოუღ, ნამდა დუდიშ ეიოჯუმალარო ხანდენთ დო ოცადუთ, ირფელს პატიოსანო მიქცუათ? (ებრ. 13:18). შეილებუნა თიშა ხოლო დაფიქრათ, მუჭო ფთხილანა ბიბლიურ პრინციპეფიშ მეჸუნა ქოთ ფიზიკურო დო ქოთ ემოციურო (იგავ. 14:29, 30). თეცალ ბიბლიურ პრინციპეფიშ გარჩიება უმოსო ქიმეხვარებ თის, ქინანჭას, მუშენ რე ჯგირ ბიბლიურ ნორმეფით ცხოვრება (წეკითხით იგავეფიშ 2:10, 11).

12. მუჭო ოხვარუნა ეთანს მშობლეფ თიშ ძირაფას, მუ ჯგირობუა მოუღ ბიბლიურ პრინციპეფიშ მეჸუნას?

¹² სტივ დო თიშ მეუღლე, მით საფრანგეთის ცხოვრენა, იჩიებუნა, მუჭო ოხვარუნა მუნეფიშ მოზარდ სქუას, ეთანს, ქინანჭას, მუჭო იძირე იეჰოვაშ ჸოროფა თიშ კანონეფშე. სტივ იჩიებ: „ეთანს კონკრეტულ პრინციპიშ გურშენ თეცალ მუდგარენს ვოკითხუთ: მუშენ ითხინს იეჰოვა ჩქინდე თიშ მეჸუნას? მუჭო იძირე თე მითითებაშე, ნამდა უჸორთ? მუ მოხვადუ, თე პრინციპის ვემიაჸუნუქ-და?“. თეცალ კითხვეფშე დაფიქრება ეთანს ოხვარ, ჯერდას, ნამდა, მუდგას იეჰოვა იჩიებ, სწორ რე. სტივ გეუძინანს: „ჩქინ მიზან რე, ჩქინ ბოშიქ ქოძირას, ნამდა ადამიანურ სიბრძნეს ხოლოშა ხოლო ვემიართე ბიბლიურ სიბრძნეშა“.

13. მუჭო შეილებუნა მეხვარათ სქუალეფს, გეგმირინუან ბიბლიურ პრინციპეფ? ქიმიჸუნით მაგალით.

¹³ ქიმეხვარით, გეგმირინუას ბიბლიურ პრინციპეფ. მაგალთო, თქვან სქუას შილებე სკოლას თიცალ წიგნიშ კითხირ დავალან, ნამდგაშ პერსონაჟეფ თიცალ მუდგარენს ორთუნა, მუთ იეჰოვაშ თოლს არასწორ რე, დო თეშ რდასჷ ძირაფილ, ითამ თეს მუთუნ გლახა ვა რე; შილებე თენა რდასჷ უზნეობა ვარდა ძალადობა. შეილებუნა თეცალ დროს თქვან სქუას ქოუწუათ, დეფიქრას, მუჭო უჯინე იეჰოვა თეცალ საქმეეფს (იგავ. 22:24, 25; 1 კორ. 15:33; ფილ. 4:8). თექ შილებე მეხვარას თიშ ძირაფას, მუშენ რე ჭკვერულ იეჰოვაშ მორჩილება დო მუჟამსით მასწავლებერეფ დო ამხანაგეფ თე წიგნიშ  გურშენ აზრის ქოკითხენა, თის თავისფალო აჩიებინედას იჸი მუშ რწმენაშ გურშენ.

ᲥᲣᲓᲐᲒᲣᲠᲔᲗ, ᲛᲣᲭᲝ ᲔᲣᲜᲬᲧᲐᲡ ᲨᲮᲕᲔᲤᲡ, ᲛᲣᲨ ᲬᲐᲜᲡᲷ

14. ნამ საკითხშენ ჩიება შილებე უჭირდან ბაღანეფს დო მუშენ?

¹⁴ კანკალეშა ბაღანას შილებე უჭირდას მუშ რწმენაშ გურშენ შხვეფწკუმა თამამას ჩიება. თინა შილებე უხერხულს ინოლუდას, მუჟამსით გაკვეთილს ევოლუციაშ გურშენ იჭყაფ ჩიება, მუშენდა მასწავლებერეფ ევოლუციაშენ თეშ იჩიებუნა, ითამ თენა წყარ ვეკლურსინ ფერ ამბე რე. მუჭო შეილებუნა მეხვარათ თქვან სქუას, დერწმუნას, ნამდა, მუდგაშ წანსჷ, ჭეშმარიტება რე?

15. მუ მეხვარებ ბაღანას, დერწმუნას, ნამდა, მუდგაშ წანსჷ, ჭეშმარიტება რე?

¹⁵ ქიმეხვარით, დერწმუნას, ნამდა, მუდგაშ წანსჷ, ჭეშმარიტება რე. ქაძირეთ თქვან სქუას, ნამდა მუთუნ საონჯღორო ვა რე, გუმაჭყაფალიშ არსებობაშ წანსინ (2 ტიმ. 1:8). ხვალე ჩქი ვარ, ბრელ მეცნიერ ხოლო, მუჟამსით ოკვირ, მუნერ რთულ აგებულებაშ რე სამყარო, თი დასკვნაშა მეურს, ნამდა თე ირფელ მუშით მუთუნით ვა მოხვადუდ დო თეშ უკახალე გონიერ გუმაჭყაფალ მიკორე. ათეშ გურშენ თე მეცნიერეფ ვათანხმუნა ევოლუციაშ თეორიას, მუდგას მთელ მსოფლიოს სკოლეფს ოგურუანა. თიშ გაგება ხოლო, მუ არწმუნენს შხვა და დო ჯიმალეფს გუმაჭყაფალიშ არსებობაშა, თქვან სქუას მეხვარებ, გემანგარას რწმენა დო თამამას იჩუას შხვეფწკუმა თი ირფელშე, მუდგაშ წანსჷ. c

16. მუჭო შეილებუნა ქუდაგურუათ თქვან სქუას მუშ რწმენაშ შხვაშა ენწყუმა? (1 პეტ. 3:15; ქოძირით სურათ).

¹⁶ ქიმეხვარით, თავისფალო გეუნწყას შხვას, მუშენ წანსჷ გუმაჭყაფალიშ (წეკითხით 1 პეტრეშ 3:15). თეშო შილებე გიმგოდირთან ჩქინ ვებსაიტის jw.org-ის გედვალირ სტატიეფქ თე საკითხიშ გურშენ. ოგორალ ველს ქინაჭარით „ახალგაზრდეფიშ შეკითხვეფ – შემოქმედება დოვარ ევოლუცია?“ [ქორთ.]. უკულ გეგშაგორაფეთ თქვან სქუას, ნამ აზრეფ გიმადირთუ შხვეფწკუმა, თიშ ოძირაფალო, ნამდა არსებენს გუმაჭყაფალ. ქუგაშინით თის, ნამდა ვა რე საჭირო, კლასელეფს ენირზას; თეს უჯგჷ, ტაქტიანო დო მარტივ მაგალითეფით ეჩუას თე საკითხიშ გურშენ თინეფს, მით მინდომენს მორჩქილაფას. მაგალთო, თის შილებე ამხანაგიქ თეცალ მუდგარენ უწუას: „მუთუნით ვადმაჯერებე თინა, მუთ ჩქიმ თოლო ვამძირ. ვართ ღორონთ მიძირ დღას დო ვა პწანსჷ, თინა ქოარსებენსინ“. თქვან ბაღანას შეულებ უპასუხას: „წერმიდგინ,  ნამდა შქა ტყას, სოდეთ კოჩიშ ნასახ ვა რე, სქვამ ჸუდე აშადგ. იფიქრენდიო, ნამდა თე ჸუდექ მუშით გორჩქინდჷ? ჸუდეშ შენება კოჩიშ ხეშ უმშო ვა მოხვადუდ-და, თეცალ სასწაულ სამყარო გორჩქინდუდუო მუშით, გონიერ გუმაჭყაფალიშ უმშო?“.

17. მუჭო შეილებუნა მეხვარათ თქვან სქუას, შხვეფს ეჩუას ჭეშმარიტებაშენ? ქიმიჸუნით მაგალით, მუ შილებე კითხას ბაღანაქ მუშ კლასელს.

¹⁷ ქუდაგურეთ, ნამდა ხეშე ვა გუტუას საშვალება, შხვეფს ეჩუას ჭეშმარიტებაშ გურშენ (რომ. 10:10). მუჟამსით თქვან სქუას ოგურუანთ, მუჭო იჩუას შხვეფწკუმა მუშ რწმენაშ გურშენ, შეილებუნა ქუმუჸონათ ნამდგაინ ინსტრუმენტიშ მეგამაშ დოგურაფაშ მაგალით. დუდშე თიცალ მელოდიას გურაფლენა, ნამდგაშ მეგამა ადვილ რე, მუდგაშ ჭყოლოფათ, იშო-იშო, უმოს ადვილ რე შხვა მელოდიეფიშ გურაფა. თეშნერო, ბაღანაქ მუშ რწმენაშ გურშენ ჩიება შილებე ადვილ მეთოდით დიჭყას შხვეფწკუმა. მაგალთო, შეულებ მუშ თანაკლასელს ქოკითხას: „ქოიჩქუდუო, ნამდა მეცნიერეფ მუნეფიშ გამოგონებეფშო, ბუნებაშე ეჭოფუნა ნიმუშის? ქუგოკონ-და, თეწკუმა დაკავშირებით ართ ვიდეოს ქუგოძირანქ“. უკულ შეულებ, ვიდეოსერიაშე „მიქ გაჭყჷ?“, ართ-ართ ვიდეოს ქაჯინუას დო ქუწუას: „მუჟამსით მეცნიერეფ უკვე გოჭყაფილიშ ნიმუშშე მუდგარენს გიმიგონენა, ხალხ თინეფს პატის გედვანს. მუჭო ფიქრენქ, ხოლო უმოს დიდება ვა ხვადუნო თის, მიდგაქ გვალო დუდშე გაჭყჷ თე ირფელ?“. თეცალ მარტივ ჩიებაშ ჭყოლოფათ, თქვან სქუაშ კლასელს შილებე ღორონთიშ გურშენ უმოსიშ გაგებაშ სურვილქ გურჩქინდას.

ᲕᲔᲛᲘᲝᲢᲣᲐᲗ ᲗᲥᲕᲐᲜ ᲡᲥᲣᲐᲨᲐ ᲠᲬᲛᲔᲜᲐᲨ ᲒᲐᲛᲐᲜᲒᲐᲠᲔᲑᲐ

18. მუ ოკო აკეთან მშობლეფქ, ნამდა გაგრძელან სქუაშა რწმენაშ გამანგარება?

¹⁸ ჩქი თიცალ ქვეყნიერებას ფცხოვრენთ, სოდეთ ხალხიშ უმენტაშის ვა უღჷ იეჰოვაშ რწმენა (2 პეტ. 3:3). ათეშენ, მშობლეფ, მუჟამსით თქვან სქუას ბიბლიას ოგურუანთ, ქელუჩით, გეგმირკვიას თიცალ საკითხეფ, მუთ მეხვარებ, ხოლო უმოსო დაფასას ღორონთიშ სიტყვა დო თიშ ზნეობრივ ნორმეფ. ართო ქიჩით იეჰოვაშ სარკო გუნაჭყეფუეფშენ დო თეშნერო ქიმეხვარით, გემანგარას რწმენა დო დეფიქრას, მუშენ რე სწორ, მუდგას ბიბლია იჩიებ. თეწკუმა ართო, ქიმეხვარით, ქინანჭას თი ბიბლიურ წინასწარმეტყველებეფს, ნამდგაქ უკვე შისრულ. მუთ არძაშ უმოს მთავარ რე, ქილოცით თქვან ბაღანაწკუმა ართო დო თქვან პირად ლოცვეფს ხოლო ქეჩით იეჰოვას თიშ გურშენ. თქვან სქუაშა რწმენაშ გამანგარებელო თე ირფელს გაკეთენ-და, რჯერდან, იეჰოვა აკურთხენს თქვან მონდომას (2 მატ. 15:7).