1. მუ აკეთ იეჰოვაქ არძაშო?

იეჰოვაქ მიმეხვარეს არძას, ნამდა თიწკუმა ხოლოშიან ურთიერთობა ქომღუდესკო (იოან. 6:44). დეფიფქრათ, მუს ნიშნენს თენა. მუჟამსით იეჰოვაქ დეკვირ მილიარდობით ხალხის მთელ დედამიწას, თიქ ქოძირ ჩქინ ალალ გურ, ნამდგას შეულებუდ, ქიჸოროფუკო თინა (1 მატ. 28:9). იეჰოვა მიჩინენა, არჩქილე ჩქინ დო ვუჸორთ. თენა მანგარ გურიშემაკინალ რე!

2. მაგალითიშ საშვალებათ მუჭო მოძირეს იესოქ, მუ დამოკიდებულება უღჷ იეჰოვას მუშ შხურიშ მიმართ?

² იეჰოვა მთელ გურით ზრუნენს, მუჭოთ ჩქინდე თეშ ჩქინ და დო ჯიმალეფშე. თე საკითხის ქინვანჭითკონ თიშენ, იესოქ იეჰოვა ჭყიშის ქეშუდარ. მუს გაკეთენს ჭყიშ, 100 შხურს ართიქ დაკორდასინ? თინა ქიდიტენს 99-ს დო მიდურს თი ართ შარასეჩილათირიშ ოგორშა დო ქოძირუნსინ, გურიშმოულაშ მანგიორო, გეხარენს. მუს ბგურაფლენთ თავრეშე? იეჰოვაშო არძა შხურ მნიშვნელოვან რე. იესოქ თქუ: „ჩქიმ ზეციერ მუმას ვაკო, ნამდა თე მცირეთაგანშე ართიქ ხოლო დოღურას“ (მათ. 18:12—14).

3. მუს გუვარჩიენთ თე სტატიას?

³ მუშო ოკო რაგად, ჩქი ვა მოკონა, გურ ვუწყუნუათ ჩქინ და დო ჯიმალეფს. მუჭო შემლებნა დუდ ევუჩილითუათ შხვეფიშ დაბრკოლებას? დო მუშ კეთება შემლებნა, მუჟამსით აშო მოწყინუანა? პასუხეფს თე სტატიაშე ქობძირუნთ. მარა მორთ დიო უმოს ქიგებგათ მათეშ მა-18 დუდის მოშინაფილ „მცირეთაგანიშ“ გურშენ.

4. მი რე „მცირეთაგან“?

⁴ „მცირეთაგან“ რე იესოშ არძა მოწაფე, ასაკიშ უმკუჯინუო. თინეფ მუდგა ასაკის ვა რდანინ, იშენ „ჭიჭე ბაღანეფცალ“  რენა, მუშენდა მზათ რენა დიგურუან იესოშე (მათ. 18:3). მართალ რე, თინეფს შხვადოშხვა წარმოშობა, კულტურა, შეხედულებეფ დო თვისებეფ უღნა, მარა არძა გიმირჩქინანს რწმენას ქრისტეშ მიმართ, მიდგას მანგარო უჸორს თინეფ (მათ. 18:6; იოან. 1:12).

5. მუს გინაფლენს იეჰოვა, მუჟამსით მიდგარენ აბრკოლენს ვარდა გლახათ ოქცუ თიშ ხალხის?

⁵ იესოშ მოწაფეეფ ძვირფას რენა იეჰოვაშო. თიშ გაგებელო, მუ დამოკიდებულება უღჷ იეჰოვას თინეფიშ მიმართ, დეფიფქრათ, მუს ბგინაფლენთ ჩქი ბაღანეფიშ მიმართ. თინეფ ჩქინო ძვირფასეფ რენა დო ვოცადუთ, დეფცვათ, მუშენდა ნაკლებ შეულებნა დო ნაკლებ გამოცდილება დო სიბრძნე უღნა. ჩქინო მიუღებელ რე, მუჟამსით მიდგარენ შხვას გლახათ ოქცუ, მარა განსაკუთრებულო მუმალენა გურ, მუჟამსით ბაღანას ოქცუნა გლახათ. თეშნერო, იეჰოვას ხოლო ოკო, დოფთხილუან დო მანგარო ირისხებ, მუჟამსით მიდგარენ აბრკოლენს ვარდა გლახათ ოქცუ თიშ ხალხის! (ეს. 63:9; მარ. 9:42).

6. მუჭოთ 1 კორინთელეფიშ 1:26—29-ს ჭარჷ, მუჭო უჯინე ქვეყნიერება იესოშ მოწაფეეფს?

⁶ ხოლო მუჭო გუნა იესოშ მოწაფეეფ „მცირეთაგანს“? ქვეყნიერებაშ თოლს მნიშვნელოვანო ითვალუნა ფარამ, ცნობილ ვარდა ძალაუფლება უღუნ ფერ კათა. თინეფიშ გინაწონს, იესოშ მოწაფეეფ უმნიშვნელოეფო იძირენა (წეკითხით 1 კორინთელეფიშ 1:26—29). მარა იეჰოვა თაშ ვა უჯინე თინეფს.

7. მუნერ დამოკიდებულება ოკო,ენ იეჰოვას მიღდან და დო ჯიმალეფიშ მიმართ?

⁷ იეჰოვას უჸორს მუშ, მუჭოთ ბრელ ხანიშ მსახურ, თეშ თინეფ ხოლო, მიდგაქ ამარდე გეგეს ჭეშმარიტება. თითოულ ჩქინ და დო ჯიმა მნიშვნელოვან რე იეჰოვაშო, ათეშენ თინეფ ჩქინო ხოლო მნიშვნელოვან ოკო რდან. ჩქი მოკონა, მიჸორდან „მთელ საჯიმალო“ დო ვართ ხოლო ხვალე ნამთინე თანაქრისტიან (1 პეტ. 2:17). ჩქი ჸოროფათ ოკო მივექცუათ და დო ჯიმალეფს დო გეფთვალისწინათ თინეფიშ გრძნობეფ. მარა ქიგებგით, ნამდა მიდგაინს ქუვოწყინებაფეთ-და, თაშ ვეფიფქრათ: „თენა ყურადღებაშ მექციებაშა ვა ღირჷ, თი პიროვნება ნაბეტან მგრძნობიარე რე დო თენა ოთირალ აფჷ“. წყენაშ მიზეზ შილებე შხვადოშხვა მუდგარენ რდას. ნამთინეშა იმოქმედ გარემოქ, სოდეთ ირდჷ დო ათეშენ შილებე მუშ დუდშე დაბალ წარმოდგენა უღდას. შხვეფ ახალ რენა რწმენას დო დიო ვა უჩქნა, მუჭო ელულუან შხვეფიშ არასრულყოფილებას. მიზეზ მუდგა ვა რდასინ, ჩქი ირფელ ოკო გუვაკეთათ, ნამდა ხე ქეშვუნწყუათ მშვიდობას. თეს გეძინელ, თი პიროვნებაქ ხოლო, მიდგა ხშირას ინაწყენებ, ოკო ეცადას, ირფელ გურიშ ხოლოშა ვემიღას. შედეგო თის ხიოლ დო შხვეფწკუმა ჯგირ ურთიერთობა აღვენუ.

8. მუ გავრცელებურ დამოკიდებულება მოქმედენდჷ იესოშ მოწაფეეფშა?

⁸ მუშენ დიჭყჷ იესოქ ჩიება „მცირეთაგანიშ“ გურშენ? თის მოციქულეფქ კითხეს: „მი იჸუაფ არძაშ უმოს ზეციერ სამეფოს?“ (მათ. 18:1). თი დროს ბრელ იუდეველს ოკოდ, შხვეფიშ თოლს მანგარ მნიშვნელოვან პიროვნებათ იძირედკო. ართ მეცნიერ იჩიებ: „ადამიანეფ თიშო ცხოვრენდეს დო ღურუდეს, ნამდა უღდესკო დიდება, სახელ დო პატი“.

9. მუ ოკო აკეთესკო იესოშ მოწაფეეფქ?

⁹ იესოს უჩქუდ, ნამდა მუშ მოწაფეეფს ბრელ აჸიდეს ოხანდებელ, ნამდა პირველობაშ შურ გეშეჸოთესკო, ნამუთ თი დროს გავრცელებურ რდჷ. თიქ მოწაფეეფს უწუ: „თქვან შქას უდიდაშ უჭიჭაშ  რდას, დო მიდგას ხემძღვანელობა ოვალ, მსახურ რდას“ (ლუკ. 22:26). მუჟამსით შხვეფს ჩქინ დუდშე უჯგუშეფო მიფრჩქინანთ, ჩქი „უჭიჭაშცალო“ იპჸუაფუთ (ფილ. 2:3). თეშნერ დამოკიდებულება ქუმაღვენუნან-და, ნაკლებო დუვაბრკოლენთ შხვეფს.

10. პავლეშ ნამ რჩევა ოკო მიბღათ გურიშ ხოლოშა?

¹⁰ არძა ჩქინ და დო ჯიმა მუდგარენ კუნთხუთ ჩქინ უჯგუშ რე. თეშ ძირაფა ადვილ რე, მუჟამსით თინეფიშ დადებით თვისებეფს ვაქციენთ ყურადღებას. ჩქი გურიშ ხოლოშა ოკო მიბღათ თი რჩევა, ნამუთ მოციქულ პავლექ კორინთელეფს მეჩჷ: „მიშ დამსახურება რე, შხვაშე განსხვავებულ რექინ? მუ გიღჷ თიცალ, მუთ ვა მეიღებ? დო, მეღებულ ქუგაფ-და, იმწკუმა მუშენ იცქვანქ, ითამ სქანით გიღდას?!“ (1 კორ. 4:7). ჩქი ოკო ვევაჸუნათ შხვეფიშ წოხოლე დუდიშ გიმორჩქინაშ ცდუნებას დო ვართ თინა ოკო იფიფქრათ, ნამდა შხვეფშე უჯგუშ ვორეთ. მაგალთო, ჯიმა ჯგირ მომხსენებელ ქორე ვარდა და ბიბლიაშ გურაფეფს ადვილო ქიჭყანს-და, თინეფქ თე ირფელშენ დიდება იეჰოვას ოკო უძღვინან.

11. მუს მოგურუანა მეფე დო მოინალეშ გურშენ მოჸუნაფილ იესოშ მაგალით?

¹¹ თიშ უკულ ხეთეშე, მუთ იესოქ მუშ მიმაჸუნალეფს მეჩჷ გაფრთხილება, ნამდა ვა დაბრკოლესკო შხვეფ, თიქ მეფე დო მოინალეშ მაგალით ხოლო მოუჸონ თინეფს. მეფექ დიდ ვალ აპატუ მუშ მოინალეს, ნამუთ თის დღას ვაგინედ. ჭიჭე ხანშა თე მოინალექ ბრელით უჭიჭაშ ვალ ვაპატუ შხვა მოინალეს. საბოლათ, მეფექ თე გლახა მოინალე ციხეს ქიმთახუნუ. მუს ბგურაფლენთ თავრეშე? იესოქ თქუ: „თქვა ხოლო თაშ მიგექციებნა ჩქიმ ზეციერ მუმა, თქვან ჯიმას მთელ გურით ვაპატიენთ-და“ (მათ. 18:21—35).

12. მუჭო ვუწყუნუანთ შხვეფს გურს, მუჟამსით პატიებაშე ვარიას იფჩიებუთ?

¹² მოინალექ თეშნერ საქციელით ხვალე მუშ დუდის ვარინ, შხვეფს ხოლო ეცილ. პირველ რიგის, თიქ უგურეთ მექცუ შხვა მსახურს „მიდართჷ დო ციხეს ქიმთახუნაფუ, ნამდა თექ ქოჸოფედკო, სოიშახ ვალს ვეგნუგანდჷ“. მაჟია, თიქ გურ უწყუნუ თი მსახურეფს, მით ორწყედ თიშ მოქმედებას. „მუჟამსით შხვა მოინალეეფქ ქოძირეს, მუდგაქ მოხვადუნ, მანგარო შეწუხეს“. თეშნერო, ჩქინ საქციელ ხოლო მოქმედენს შხვეფშა. მითინქ გლახათ მიმექცის დო ჩქი ვა ვაპატით-და, მუქ შილებე მოხვადას? პირველ, ჩქი გურს ვუწყუნუანთ თის, მუშენდა ვა ვაპატიენთ, მუთუნნერ ყურადღებას ვემვაქციენთ დო ვეგმიფრჩქინანთ ჸოროფას. მაჟია, ჩქი შხვეფს ვეცილებუთ, კრებას გემუანო ქიგინან დუდ, მუჟამსით ქოძირნა, ნამდა თე პიროვნებაწკუმა ურთიერთობა მაფნა გილალუაფირ.

13. მუს ბგურაფლენთ ართ პიონერ დაშ მაგალითშე?

¹³ მუჟამსით ვაპატიენთ და დო ჯიმალეფს, თეთ ქოთ ჩქინ დუდშა მომღუნა ჯგირობუა დო ქოთ და დო ჯიმალეფშა. თექ მოხვად ართ პიონერ დაშ, კრისტალიშ, * შემთხვევას. თის კრებაშე ართ დაქ უწყუნუ გურ. კრისტალ იშინანს: „თიშ მწარე სიტყვეფ ხამუშ გეშქუმალაცალ რდჷ ჩქიმო. მსახურებაშა თინა მითოხედუნ თი მანქანათ ულა ხოლო ვა მოკოდ. ჭიე-ჭიეთ ენთუზიაზმ დო ხიოლ მიდინუდ“. კრისტალიშ აზრით, თის უღუდ გურიშმოულაშ მიზეზ. მარა თინა ვა დოსქილადე გურმულირო დო ხვალე მუშ დუდშე დო გრძნობეფშე ვა უფიქრებ. თიქ  თანდაბლურო მიაჸუნ ბიბლიურ რჩევას, ნამუთ ჭარჷ 1999 წანაშ 15 ოქტომბერიშ „გინაჯინალ კოშკის“ მოჩამილ სტატიას „მთელ გურით ქაპატით“ (ქორთ.). კრისტალქ ქაპატუ თე დას. თინა იჩიებ: „ასე მარჩქილე, ნამდა ჩქი არძა ვოცადუთ ახალ პიროვნებათ თირუას დო იეჰოვა ხოლო ირიათო მზათ რე, ირდღას მაპატუან. დუდ თეშ იბგინ, ითამ ხუჯშე დიდ ოღალ გეგლემწყჷ დო ხიოლქ ხოლო დუმართჷ“.

14. ა) მუჭოთ მათეშ 18:21, 22-შე იძირე, მუ დაბრკოლებას შეხვად მოციქულ პეტრექ? ბ) მუ მიმეხვარებნა, მუჟამსით თიცალ სიტუაციას ქეშეფხვადუთ, მუნერით პეტრეს უღუდ?

¹⁴ ჩქი მიჩქნა, ნამდა პატიება სწორ საქციელ რე. მარა თენა ირო ვა რე ადვილ. მოციქულ პეტრე ხოლო შილებე მინშა თაშ გინაფლენდკო დუდის (წეკითხით მათეშ 18:21, 22). მუ მიმეხვარებნა პატიებას? პირველ, დეფიფქრათ, ჩქი მუსხიშა მაპატის იეჰოვაქ (მათე 18:32, 33). მართალ რე, ვა დამსახურებნა, მარა თინა იშენით მაპატიენა (ფსალმ. 103:8—10). თეწკუმა ართო, „ოკო მიჸორდან ართიან“. თაშ ნამდა, პატიება ჩქინ არჩევან ვარინ, ვალდებულება რე (1 იოან. 4:11). მაჟია, დეფიფქრათ, მუ ჯგირ შედეგ მოჸუნს პატიებას. თეთ შილებე მივეხვარათ თის, მიდგაქ მოწყინებაფეს, ხე შევუნწყუათ კრებაშ ართობას, ვა ვოდინუათ იეჰოვაწკუმა მეგობრობა დო მონკა ოღალ გეგლემწყათ ხუჯშე (2 კორ. 2:7; კოლ. 3:14). თეს გეძინელ, ქიბლოცათ თიშო, მით პატიებას ფთხინა. ვემეფჩათ სატანას თიშ უფლება, ნამდა თანამორწმუნეეფწკუმა მშვიდობა აკომრღვან (ეფეს. 4:26, 27). ჩქი მოსაჭირნა იეჰოვაშ მოხვარა, ნამდა დუდ ევუჩილითუათ სატანაშ მახეს.

15. მუჭოთ კოლოსელეფიშ 3:13-ს ჭარჷ, მუშ კეთება შემლებნა, მუჟამსით თანამორწმუნეშ საქციელ გურს მიწყუნუანა?

¹⁵ მუ ოკო ვაკეთათ, მუჟამსით თანამორწმუნეშ საქციელ გურს მანგარო  მიწყუნუანა? ირფელ გუვაკეთათ, ნამდა მშვიდობაქ ვამდინან. იეჰოვას ქივეჩუათ ჩქინ გრძნობეფიშ გურშენ. ქოფთხუათ თის, ქიმეხვარას თი პიროვნებას, მიდგაქ მოწყინებაფეს დო ჩქი ხოლო ქიმმეხვარან, ქობძირათ თიშ ჯგირ თვისებეფ — თი თვისებეფ, ნამდგას იეჰოვა ორწყე (ლუკ. 6:28). პატიება ქომჭირან-და, დეფიფქრათ, მუჭო დურაგადუათ თის. ირო ჯგირ რე თიშე ფიქრ, ნამდა თანამორწმუნეს ვაკოდ, გურ მიწყუნუესკო (მათ. 5:23, 24; 1 კორ. 13:7). ქუდვურაგადუანთინ, თიშ გულწრფელობაშა ეჭვ ვემშებღათ. მარა თის მშვიდობაშ დორთინაფა ვაკო-და, მუ ოკო ფქიმნათ? მუთვინათ დო მონდომა ვადვარკათ (წეკითხით კოლოსელეფიშ 3:13). მუთ არძაშ უმოს მნიშვნელოვან რე, გურმულირქ ვა დოფსქიდათ, მუშენდა თენა ეცილებ იეჰოვაწკუმა ჩქინ მეგობრობას. მუთუნს ვემეფჩათ საშვალება, დუმაბრკოლან. თეშნერო ქუვოძირანთ, ნამდა არძაშ უმოსო იეჰოვა მიჸორა (ფსალმ. 119:165).

16. მუ პასუხიშმგებლობა მიღნა თითოულს?

¹⁶ ჩქი ვაფასენთ პატის, ვემსახურათ იეჰოვას, მუჭოთ „ართ ოჭყიშალ“ ართ „ჭყიშიშ“ ხემძღვანელობაშ თუდო (იოან. 10:16). წიგნის „ორგანიზებულო ვასრულენთ იეჰოვაშ ნებას“, ნამუთ ქორთულ ნინაშა რე ხეშამალაფარ, ჭარჷ: „თე საჯიმალოშ ართობას არძაქ ოკო შეუნწყუას ხე, თინეფ შქას სი ხოლო“. საჭირო რე, „და დო ჯიმალეფს იეჰოვაშ თოლით ვუჯინათ“. იეჰოვაშო ჩქი, არძა, ძვირფას „მცირეთაგან“ ვორეთ. ჩქი ხოლო თაშ ვუჯინეთო ჩქინ და დო ჯიმალეფს? იეჰოვა ორწყე დო აფასენს ირფელს, მუდგას და დო ჯიმალეფიშ მახვარებელო ვორთუთ (მათ. 10:42).

17. მუშ კეთება მაფნა გინოჭყვიდილ?

¹⁷ ჩქი მიჸორა ჩქინ თანამორწმუნეეფ. ათეშენ მოკონა, „ჯიმას ვეგუდვათ დაბრკოლებაშ ქუა ვარდა კუჩხიშეკახაბარკალ“ (რომ. 14:13). და დო ჯიმალეფ ჩქინ უმოსეფო მიმორჩქნა დო მოკონა, მთელ გურით ვაპატუათ თინეფს. მორთ დღას ვადვაბრკოლათ შხვეფ. თეშ მანგიორო, „თიშა იმჭუათ, მუთ მშვიდობას დო ართიანიშ გურიშელაკინას ომსახურ“ (რომ. 14:19).