1. მუშენ შემლებნა სატანა შევადარათ მონადირეს?

მონადირეს უღჷ ართ მიზან — ოჭოფას ვარდა დოჸვილას მსხვერპლ. თიქ შილებე თეშო შხვადოშხვანერ მახე გიმირინუას, მუჭოთ თენა ბიბლიას რე მოშინაფილ (იობ. 18:8—10). მუჭო იტყურუანს მონადირე ცხოველს მახეშა? თინა ჯგირო ოკვირ, სო გილურს თე ცხოველ, მუ უჸორს თის დო ნამ მახე იჸუაფ არძაშ უჯგუშ თიშ ოჭოფალო? სატანა თეცალ მონადირეს ქოგჷ. თინა ჯგირო ოკვირ თის, სო გილურთ დო მუ მიჸორა. უკულ თიცალ მახეს გიშეგორუნს, ნამდგას ჩქი ვეველუთ. მარა ბიბლია მარწმუნენა, ნამდა თიშ მახეს ქუმოფხვადით-და, დუდიშ დარსხება ხოლო შილებე. თეს გეძინელ, მოგურუანა, მუჭო ეიფჩილითუათ თინეფ.

2. ნამ რე სატანაშ ჟირ არძაშ უმოს ეფექტურ მახე?

² სატანაშ ჟირ არძაშ უმოს ეფექტურ მახე რე სიამაყე დო ჰარამობა. * ანთასობით წანაშ დინახალე თინა წარმატებულო ირინუანდჷ თე გლახა თვისებეფს. სატანა ფრინველიშ მონადირეცალო, მახეშა მითიტყურუანს მსხვერპლის ვარდა ჭოფუნს თის (ფსალმ. 91:3). მარა ჩქი ვა ვორეთ თიშ მახეს, მუშენდა იეჰოვაქ ქუგმოგებაფეს, მუჭო მოქმედენს თინა (2 კორ. 2:11).

3. მუშენ მიშინუ იეჰოვაქ ბიბლიას გარკვეულ მაგალითეფ?

³ ართ-ართ საშვალება, მუდგათ იეჰოვა მოგურუანა, მუზმათ ოშქურანჯ რე სიამაყე დო ჰარამობა, რე მუშ მსახურეფიშ ისტორიეფ. თინეფიშ დაკვირებათ ჩქი შემლებნა დუდ ევუჩილითუათ იგივე შეცდომეფს, მუდგაქ თინეფს აღოლეს.  ყურადღება ქიმიაქცით თი მაგალითეფს, სოდეთ მოჩამილ რე, მუჭო მიოჩილითუ სატანაქ იეჰოვაშ ნამთინე სულიერო მოწიფულ მსახურ. ნიშნენსო თენა, ნამდა დუდ ვემაჩილითენა თე მახეეფშა? ვარ. იეჰოვაქ თე შემთხვევეფ ბიბლიას „ჩქინ გაფრთხილებერო“ ინაჭარ (1 კორ. 10:11). თის უჩქჷ, ნამდა ჩქი შემლებნა დიბგურუათ თე გუმაფრთხილებერ მაგალითეფშე დო თეშნერო დუდ ევუჩილითუათ ვარდა ვენტათ სატანაშ მახეეფს.

4. მუქ შილებე მაჸუნას სიამაყეს?

⁴ სატანას ოკო, ამაყეფო გინიფრთათ. თის ჯგირო უჩქჷ, ნამდა თეშნერო მუს ქუვაგურუთ დო მივოდინუანთ მარადიულ სიცოცხლეშ შესაძლებლობას (იგავ. 16:18). ათეშენ მოციქულ პავლექ გუმაფრთხილეს, ნამდა პიროვნებაქ შილებე გეამაყას „დო ეშმაკშა გიშაღალირ განაჩენ ქიგიტახას დუდშა“ (1 ტიმ. 3:6, 7). თექ შილებე ნებისმიერს მაღოლან, თიშ უმკუჯინუო, ასე გებგით ჭეშმარიტება დოვარ წანეფ რე, მუთ იეჰოვას ვომსახურუთ.

5. მუჭოთ ეკლესიასტეშ 7:16, 20-შე იძირე, მუჭო შილებე პიროვნებაქ გიმირჩქინას სიამაყე?

⁵ სიამაყე ეგოისტობაშ ართ-ართ ფორმა რე. სატანა ოცად, ეგოისტეფო გინმორთინუან, თით ნამდა ჩქინ დუდშე უმოსო იფიფქრათ, ვინემ იეჰოვაშე, განსაკუთრებულო თიმწკუმა, მუჟამსით სირთულეეფს ფხვადუთ. მაგალთო, დღას ქეკუწამებნანო თქვანდა ტყურა? ვარდა უსამართლოთ მუქციებინნანო? სატანას ოხიოლ, მუჟამსით იეჰოვაშე ვარდა თიშ ორგანიზაციაშე მუმალენა გურ. თის ოკო, მოფიქრებაფუან, ნამდა პრობლემაშ გინაჭკირალო არძაშ უჯგუშ შარა რე, ჩქინით იმოფქმედათ, ვინემ მივაჸუნათ ღორონთიშ ხემძღვანელობას, ნამუთ ბიბლიას რე მოჩამილ (წეკითხით ეკლესიასტე 7:16, 20).

6. მუშ გურაფა შემლებნა ართ ნიდერლანდელ დაშ მაგალითშე?

⁶ გუვარჩუათ ართ დაშ მაგალით, ნამუთ ნიდერლანდებს ცხოვრენს. თის და დო ჯიმალეფიშ შეცდომეფიშ გურშენ მანგარო აფუდ გურ მოულირ დო მეტიშ მოთვენა ვა ულამუდ. თე და იჩიებ: „დუდის  ხვალახეთ ბგინაფლენდჷ დო ვეშმალებედ მივერიკო ჩქიმ გრძნობეფს. ჩქიმ ქომონჯის ვუწი, ნამდა შხვა კრებაშა გეგნომრთუმდესკო“. თიქ 2016 წანაშ მარტიშ JW მაუწყებლობას უჯინ. თე პროგრამას მოჩამილ რდჷ მუსხირენ რჩევა, მუჭო შემლებნა მიფთვინათ შხვეფიშ არასრულყოფილება. თე და იშინანს: „ქობძირ, ნამდა შხვეფიშ თირუას ვეცადკონ თიშ მანგიორო, საჭირო რდჷ, თანდაბლურო შევაფასკო ჩქიმ შეცდომეფ დო დეფიფქრიკო თინეფშე. თე პროგრამაქ მიმეხვარ, ყურადღება იეჰოვაშა დო თიშ ძალაუფლებაშა გეგნიბღიკო“. მუს ბგურაფლენთ თავრეშე? მუჟამსით პრობლემეფს შეფხვადუთ, ჯგირ იჸუაფ, ყურადღება იეჰოვაშა გეგნიბღათ. საჭირო რე, ქოფთხუათ თის მოხვარა, ნამდა შხვეფს თეშ ვუჯინათ, მუჭოთ მუ უჯინე. ჩქინ ზეციერ მუმა ორწყე თინეფიშ შეცდომეფს, მარა მზათ რე, ქაპატუას. თის ოკო, ჩქი ხოლო თაშ მიფქცუათ (1 იოან. 4:20).

7. მუქ აღოლ მეფე უზიას?

⁷ იუდაშ მეფე უზიაქ სიამაყეშ გურშენ ველერჩქილუ რჩევა დო გაკეთ თინა, მუდგაშ უფლება ვა უღუდ. უზია მანგარ ნიჭიერ პიროვნება რდჷ. თინა ჯგირო ხემძღვანელენდჷ ჯარს, აშენენდჷ ბრელ ქალაქის დო ჯგირო აფუდ გენწყილ სოფელიშ მეურნეობა. „ღორონთ ხოლო ხეს უნწყუნდჷ“ თის (2 მატ. 26:3—7, 10). ბიბლია იჩიებ, ნამდა „მუჟამსით ძალა ქიმიკინდუ, დიდ გურქ ქაშუ დო დუდ მიდინუ“. იეჰოვას ბრელ ხანით ადრე აფუდ ისრაელშა მითითება მეჩამილ, ნამდა ტაძარს ხვალე მღვდელეფს უღდეს უფლება, საკმელ დოჭვესკო. მარა უზიაქ მუთუნო ვემირჩქინ თე მითითება, გემნორთჷ ტაძარშა დო დოჭვჷ საკმელ. თექ იეჰოვას ვა მეწონ დო კეთრ გურჩქინ თის. თინა ღურაშახ კეთროვან რდჷ (2 მატ. 26:16—21).

8. მუჭო შემლებნა მივაჸუნათ 1 კორინთელეფიშ 4:6, 7-ის მოჩამილ რჩევას დო დუდ ევუჩილითუათ სიამაყეს?

⁸ ქორენო შეიოლებერ, უზიაცალო ჩქი ხოლო გინიფრთათ ამაყეფო დო შედეგო სატანაშ მახეს ქუმოფხვადათ? გუვარჩუათ ართ ჯიმა ხოსეშ მაგალით. თინა წარმატებულ ბიზნესმენ რდჷ, უხუცესო მსახურენდჷ დო კრებას ხოლო პატის ცენდეს. ხოსე მოხსენებეფით გიშეშ კონგრესეფს დო რაიონულ ზედამხედველეფ ხოლო რჩევას ელაკითხანდეს თის. თინა იშინანს: „იეჰოვაშ მანგიორო, ჩქიმ შესაძლებლობეფ დო გამოცდილებაშა ვორდჷ დაიმენდებულ. ფიფქრენდჷ, ნამდა მანგარ ვორდჷ დო ათეშენ, ვა ვურჩქილედ იეჰოვაშ  გაფრთხილებეფს დო რჩევეფს“. თიქ სერიოზულო შეცოდ დო გერიცხჷ. მუსხირენ წანაშ წოხოლე, ხოსექ დირთჷ იეჰოვაშ ორგანიზაციაშა. ასე თინა იჩიებ: „იეჰოვაქ დუმოგურუ, ნამდა მნიშვნელოვან თიშ კეთება რე, მუდგას მუ თხულენს ჩქინდე დო ვართ ხოლო თინა, მუ მდგომარეობა მიკინებნა“. ირიათო ფშუდან, ნამდა ნებისმიერ ნიჭ ვარდა პასუხიშმგებლობა იეჰოვაშე მიღნა (წეკითხით 1 კორინთელეფიშ 4:6, 7). ამაყეფ ქიპჸით-და, იეჰოვა ვაგმომრინუანა.

9. მუ ოკეთებაფუ ჰარამობაქ სატანას დო ევას?

⁹ მუჟამსით ჩქინ ფიქრეფს ჰარამობა ირჩქინანს დუდის, თეთ სატანას ვარზენთ საშვალებას, იმოქმედას ჩქინ გონებაშა. მუჭოთ იეჰოვაშ ართ-ართ ანგელოზის, სატანას, ბრელ უპირატესობა აღვენუდ. მარა თის უმოს ოკოდ. თის ოკოდ, მუს ცესკო თაყვან, მუდგას ხვალე იეჰოვა იმსახურენს. ეშმაკის ოკო, მუს ქუვაგურათ, ათეშენ ოცად, გომრჩქინან თიშ სურვილ, ნამდა ვეგებჯერდათ თის, მუთ მიღნა დო მოკოდან უმოს. პირველო თენა ევაწკუმა მინდომ. იეჰოვაქ ჸოროფათ მეჩჷ ევა დო მუშ ქომონჯის ბრელ გემუან ოჭკუმალ „ბაღიშ არძა ჯაშე“ ართიშ გარდა (დაბ. 2:16). მარა სატანაქ დაღორ ევა დო ოფიქრებაფუ, ნამდა ოკო უჭკუმუდკო თი ჯაშ ნაყოფ, ნამუთ ვარიებულ რდჷ. ევაქ ვა დაფას თინა, მუთ უღუდ დო უმოსშა ქაჸუ გურქ. ჩქი მიჩქნა, მუქ მაჸუნ თეს. თიქ შეცოდ დო ბოლოს დოღურ (დაბ. 3:6, 19).

10. მუჭო გინართჷ დავითის ჰარამობაქ მახეთ?

¹⁰ მეფე დავითის ჰარამობაქ გაჭყოლიდუ თინა, მუთ იეჰოვაშე უღუდ, თეშა მიშეშ სიმდიდრე, სახელ დო ბრელ ნტერიშ გერჯგინა. დავით იჩიებუდ, ნამდა იეჰოვას თისხი აფუდ მინაჩემ, ვართ გიმაკოროცხედ (ფსალმ. 40:5). მარა ართ მომენტის თის გაჭყორდჷ თექ. თინა ვა რდჷ კმაყოფილ დო უმოსიშ მეღება ოკოდ. თიშ უმკუჯინუო, ნამდა მუსხირენ ოსურ ჸუნდჷ, არასწორ სურვილ გავითარ შხვა კოჩიშ ოსურიშ მიმართ. თენა რდჷ ხეთელ ურიაშ ოსურ ბათ-შება. დავითიქ ეგოისტურო მიქცუ დო სექსუალურ ურთიერთობა ქიდეკინ თიწკუმა, შედეგო ბათ-შებაქ დეორსულ. დავითიქ თენა ვებაღინუ დო ურია ხოლო დაჸვილაფუ (2 სამ. 11:2—15). მუს ფიქრენდჷ თინა? ვა უჩქუდუო, ნამდა იეჰოვა თე ირფელს ქოძირუნდჷ? თეშნერო, იეჰოვაშ ართგურ მსახურქ ჰარამო გინირთჷ დო შედეგო ბრელ ტანჯებაქ აჸუ  გინაღალარქ. უმოს გვიანო, თიქ აღიარ დაშებულ დო მინანუ. მუნერ მარდულ იჸუაფუდ დავით, მუჟამსით კინ დირთინუ იეჰოვაშ მოწონა! (2 სამ. 12:7—13).

11. მუჭოთ ეფესოელეფიშ 5:3, 4-ის ჭარჷ, მუს შეულებ მიმეხვარან, ქივეწინააღმდეგათ ჰარამობას?

¹¹ მუშ გურაფა შემლებნა დავითიშ მაგალითშე? ჩქი შემლებნა ქივეწინააღმდეგათ ჰარამობას, მუჟამსით ვა ვოდინუანთ მარდულობას თი ირფელიშ მიმართ, მუთ იეჰოვას ჩქინო უკეთებ (წეკითხით ეფესოელეფიშ 5:3, 4). საჭირო რე, კმაყოფილ ვორდათ თით, მუთ მიღნა. ჯგირ იჸუაფ, ბიბლიაშ ახალ მაგურაფალეფს ელვუჩათ, დეფიქრან თი კონკრეტულ კურთხევაშე, მუთ იეჰოვაშე უღნა დო გეგმოხანტან თიშ მარდულობა. პიროვნება თეს ირდღას გაკეთენს-და, გიშურს, ნამდა მარაშ დინახალე შქვით შხვადოშხვა საკითხიშ გურშენ ილოც (1 თეს. 5:18). თეცალ მუდგარენ თქვა ხოლო ხომ ვაიკეთებნა? მუჟამსით დეფიქრებუთ თი ირფელშე, მუთ იეჰოვაქ თქვანო აკეთ, თენა მიგეხვარებნა, რდათ მარდულ, მარდულობა მოიღანა კმაყოფილებას დო კმაყოფილეფ ქიჸუაფუთ-და, ჰარამობაშ მახეს ვა მოხვადუთ.

12. სოიშა მიჸუნ ჰარამობაქ იუდა ისკარიოტელ?

¹² ჰარამობაქ იუდა ისკარიოტელს დიდ უბადობა ოკეთებაფუ დო მოღალატეთ გინაშქვჷ. მარა თინა ირო თეცალ ვა რდჷ (ლუკ. 6:13, 16). იესოქ იუდა მოციქულო გიშეგორ. მუჭოთ იძირენ, თინა რდჷ სანდო დო უნარიან პიროვნება, ათეშენ ფარაშ ყუთ ჩაბარეს. იესო დო მოციქულეფ თე ფარას სამქადაგებლო საქმეშო ირინუანდეს. მუჭოთ ამდღა გიმირინუაფ ჩქინ შესაწირავეფ მსოფლიო სამქადაგებლო საქმეშო. მარა ჭიჭე ხანიშ უკულ იუდაქ ხირუა ქიდიჭყჷ, თიშ უმკუჯინუო, ნამდა ბრელშა აფუდ მორჩქილაფირ, მუჭო აფრთხილენდჷ იესო ხალხის ჰარამობაშ გურშენ (მარ. 7:22, 23; ლუკ. 11:39; 12:15). თიქ ველერჩქილუ თე გაფრთხილებეფ.

13. მუჟამ იძირ იუდაშ ჰარამობაქ?

¹³ იუდაშ ჰარამობაქ თი შემთხვევაშე ქიძირ, ნამდგაქ იესოშ ღურაშახ ჭიჭე ხანით ადრე მოხვად. იესო დო თიშ მოწაფეეფ, თინეფ შქას მარიამ დო მართა, სტუმარო რდეს სიმონიშ ჸუდეს, ნამდგას კეთრ უღუდ. ოჭკუმალიშ ჭკუმუაშ დროს მარიამქ გედირთჷ დო იესოს დუდის სურნელოვან ზეთ ქუმნაბ, ნამუთ ძვირ ღირუდ. იუდა დო შხვა მოწაფეეფს გურქ დოჭყორდეს. მოწაფეეფ შილებე ფიქრენდესკო, ნამდა უჯგუშ იჸუაფუდ თე ფარა მსახურებაშო გეგმურინუაფდესკო, მარა იუდას შხვა მოტივ უღუდ. თინა „მახირალ რდჷ“ დო ოკოდ, ფარა ყუთშა ქინუჸოთამდესკო. უმოს გვიანო, ჰარამობაქ გეგნაჭყვიდირაფუ, გეგმოჩკო იესო (იოან. 12:2—6; მათ. 26:6—16; ლუკ. 22:3—6).

14. მუჭო მიაჸუნ ართ წყვილქ ლუკაშ 16:13-ს მოჩამილ რჩევას?

¹⁴ იესოქ ქუგაშინ მუშ მიმაჸუნალეფს ართ მარტივ ჭეშმარიტება: „ვეშქალებენა ღორონთიშ მონა ხოლო რდათ დო ქონებაშ ხოლო“ (წეკითხით ლუკაშ 16:13). თენა ამდღა ხოლო თაშ რე. გუვარჩუათ ართ რუმინელ წყვილიშ მაგალით, ნამდგაქ გიმირინუ იესოშ თე სიტყვეფ. თინეფს წარმატებულ ქიანას დროებით სამუშა შეთავაზეს. თე წყვილ იშინანს: „ჩქი ბანკის დიდ ვალ გებძუდეს. ათეშენ, დუდშე ფიფქრენდით, ნამდა თე სამუშა იეჰოვაშ კურთხევა რდჷ“. მარა თენა მახე იჸუაფუდ, მუშენდა თინეფს იეჰოვაშ მსახურებას ეცილებუდ. თინეფქ გადაწყვეტილება თიშ უკულ მიღეს, მუთ წეკითხეს 2008 წანაშ 15 არგუსოშ „გინაჯინალ კოშკის“ მოჩამილ სტატია, ნამდგაშ სათაურ რე: «ვადინუათ ართგურობა „მთლიან გურით“» (ქორთ.). თე წყვილ იჩიებ: „მეტიშ შიბაშ გურშენ შხვა ქიანაშა გეგნიფშით-და, იეჰოვაწკუმა ურთიერთობა ჩქინო მაჟიახარისხოვანო გინირთუდ. ქუგოფხვადით, ნამდა ჩქინ სულიერობას საფრთხეშ თუდო გივორინუანდით“. ათეშენ თინეფქ  ვარია თქუეს თე შემოთავაზებაშე. მუქ მოხვად უკულ? ქომონჯიქ მუშ ქიანას თიცალ სამუშა დოგორ, ნამუთ დასაბაღ რდჷ ოჯახიშ საჭიროებეფშო. ოსურ იჩიებ: „იეჰოვას ირო შეულებ მუშ მსახურეფიშ მოხვარა“. თე წყვილ ბედნერ რე, მუშენდა ფარაშ მანგიორო იეჰოვას ომსახურნა.

15. მუშენ შემლებნა ვორდათ დარწმუნებულ, ნამდა შემალებენა ვენტათ სატანაშ მახეეფს?

¹⁵ მუ ოკო ვაკეთათ, მუჟამსით ქობძირუნთ, ნამდა ამაყეფო ვარდა ჰარამეფო ვორეთ გინორთელ? ჩქი შემლებნა დიფთირათ! პავლექ თქუ, ნამდა თინეფს, მით სატანაშ მახეს რენა, შეულებნა თევრეშე დუდიშ დარსხება (2 ტიმ. 2:26). საბოლათ, დავითიქ ქუმურჩქილუ ნათანიშ მკაცრ შეგონებას. მინანუ მუშ ჰარამობა დო დირთინუ იეჰოვაწკუმა მეგობრობა. დღას ვაგმოჭყორდან, ნამდა იეჰოვას სატანაშე უმოს შეულებ, ათეშენ თიშე მოხვარას ქიმიბღენთ-და, შემლებნა ვენტათ სატანაშ მახეეფს.

16. მუ მიმეხვარებნა, დუდ ევუჩილითუათ სატანაშ მახეეფს?

¹⁶ მუშო ოკო რაგად, ბრელით უჯგუშ რე, შურო ვა მოფხვადათ სატანაშ მახეს. თენა ხვალე იეჰოვაშ მოხვარათ შემალებენა. მარა ჩქინ დუდშა ოკო ვა ვორდათ დაიმენდებულ დო ვეფიფქრათ, ნამდა დღას ვეპჸით ამაყეფ დო ჰარამეფ! იეჰოვაშ ბრელ ხანიშ მსახურეფქ ხოლო გინირთეს ამაყეფო დო ჰარამეფო. თაშ ნამდა, ირდღას ქოფთხუათ იეჰოვას, ქიმმეხვარან, ქობძირათ, ხომ ვეჭყანს თე გლახა თვისებეფ ჩქინ ფიქრეფ დო საქმეეფშა მოქმედებას (ფსალმ. 139:23, 24). ირფელ გუვაკეთათ, ნამდა ვა მოფხვადათ თე მახეს!

17. მუ აღოლე მალას ჩქინ ნტერს, ეშმაკის?

¹⁷ ანთასობით წანა რე, მუთ სატანა ნადირენს. მარა მალას თინა დიბორკუ დო საბოლათ გენადგურებ (გამოცხ. 20:1—3, 10). ჩქი შურ მოლნა თე დღაშ მოულაშა. მარა თეიშახ, შორს დებკინათ დუდ სატანაშ მახეეფშე. ირნერო ვეცადათ, დუდ ევუჩილითუათ სიამაყე დო ჰარამობას. დარწმუნებულ ვორდათ, ეშმაკის ქივეწინააღმდეგებუთ-და, თინა დემეთხიებნა (იაკ. 4:7).