მუშო ოკო რაგად, იეჰოვას ოკო, დაქორწინებულეფ რდან ბედნერეფ დო გეხარან ართიანწკუმა მარადიულ დო ხოლოშიან ურთიერთობათ (მათ. 19:4—6). დაქორწინება ქომლამნან-და, მუჭო შემლებნა ბგორათ შესაფერის მეუღლე? იეჰოვა ჩქინ გუმაჭყაფალ რე დო ჯგირო უჩქჷ, მუ ოკო ვაკეთათ, ნამდა ბედნერ ქორწინება მიღდან. თაშ ნამდა, თიშ მოჩამილ პრინციპეფს ქიმვაჸუნუთ-და, მიბღენთ ნამდვილ ბედნერობას. გუვარჩუათ თე პრინციპეფშე ნამთინე.

პირველ, ჩქი ჯგირო ოკო მარჩქილედან პრინციპ: „გურ არძაშ უმოს უდუნდებელ დო დაუმორჩილებერ რე“ (იერ. 17:9). მუჟამსით ჟირ პიროვნებას გინოჭყვიდილ აფჷ დაქორწინება, იჩინებაფუანა ართიანს დო იჭყანა პაემანშა გილულას, თინეფქ შილებე ხეთეშე გინირთან ართიანშა ემოციურო დამოკიდებულქ. თეცალ დროს რთულ რე გონივრულ გადაწყვეტილებაშ მეღება. ქორწინებაშ გადაწყვეტილებას უმოსო ემოციეფშა ქიგიორსხუანან-და, ხშირას თეს გურიშგოტახუა მაჸუნუ (იგავ. 28:26). ათეშენ ვა რე გონივრულ, ჟირ პიროვნებაქ ურთიერთობაშ დაჭყაფუს, ჯგირო გაჩინებაფაშახ, გეგმოხანტან ართიანიშ მიმართ მუნეფიშ გრძნობეფ ვარდა მუთუნიშ პირობა დოდვან.

იგავეფიშ 22:3-ს ჭარჷ: „გურგოჩამილ კოჩ ორწყე უბედრობას დო იტყობუ, მარა გამოცდილება ვა უღუნ ფერ პირდაპირ მეურს დო გლახას იკინდუანს დუდშა“. მუშენ რე ოშქურანჯ გაჩინებაფაშ საიტეფიშ გიმორნაფა? სანარღოთ, მუჟამსით ნამთინექ თეცალ საიტეფს უჩინებუს ქეშეხვად დო ქიდიჭყჷ ურთიერთობა, გვიანო მეხვად, ნამდა თინა აღორენდჷ. თეს გეძინელ, ნამთინე უბადო პიროვნება ტყურა ინფორმაციას ჭარუნს მუშ გურშენ, ნამდა ხალხის ფარა გეგწოტყურას. მინშა თინეფ ამტკიცენა, ნამდა იეჰოვაშ მოწმეეფ რენა.

გუვარჩუათ ხოლო მუქ შილებე მაჸუნას გაჩინებაფაშ საიტეფიშ გიმორნაფას. ნამთინე თეცალ საიტ ირინუანს კომპიუტერულ პროგრამას, ნამუთ ართიანს უკავშირენს თიცალ ადამიანეფს, მიდგას საერთო მახასიათებელეფ უღნა. მარა ვა არსებენს თიშ მტკიცებულება, ნამდა თეცალ მეთოდ ეფექტურ რე. ვეჸუაფუდ გონივრულ ადამიანეფიშ მოგონილ ფორმულას ვენდითკო თიცალ მნიშვნელოვან გადაწყვეტილებაშ მეღებაშ დროს, მუნერით რე, მომავალ მეუღლეშ გორუა. კომპიუტერულ პროგრამა დღას ვეჸუაფ ბიბლიურ პრინციპეფშე უმოს სანდო (იგავ. 1:7; 3:5—7).

 იგავეფიშ 14:15-ის მოჩამილ რე პრინციპ: „გამოცდილ ვა რენ ფერს, ირფელიშ ჯერს, წიმი იჯინენ ფერ, ოკვირ მუშ ნაბიჯეფს“. სოიშახ გინობჭყვიდუნთ, ნამდა კონკრეტულ პიროვნება ჯგირ მეუღლე იჸუაფ, თეიშახ საჭირო რე, ჯგირო გეფჩინებაფუათ თინა. მარა ონლაინ შეხვალამეფით თეშ კეთება რთულ რე. შილებე საიტეფს თიშ გედვალირ ინფორმაცია ქობძირათ ვარდა ბრელ ხანს ვეჩუათ ართიანს ონლაინს. მარა თენა ქორენო დასაბაღ პიროვნებაშ გაჩინებაფალო? ნამთინე, მით ფიქრენდჷ, ნამდა ნამდვილ ჸოროფას ქიმიოგორუ, მანგარ გაკვირებულქ ქუდოსქიდ, მუჟამსით რეალურო გეჩინებაფუ თინა.

ფსალმუნმაბირექ თქუ: „მეტყურე ხალხწკუმა საქმეს ვებკინენქ დო დუდის ვურიდანქ თიცალ კათას, მით ფულუნს, სინამდვილეს, მუნერ რე“ (ფსალმ. 26:4). ბრელს მიორჩქ, ნამდა პრობლემა ვა რე, საიტეფს მუნეფიშ გურშენ ტყურა ინფორმაცია ჭარან დო თეშნერო უმოს საინტერესოთ გემკორჩქინდან. თინეფ შილებე ფულუნდან, მუნერეფ რენა სინამდვილეს ვარდა შილებე ინტერნეტით ვა ბძირათ თინეფიშ ნამდვილ თვისებეფ. მუჟამსით ნამთინე იჩიებ, ნამდა იეჰოვაშ მოწმე რე, ქორენო თინა დასურო ნათილ ქრისტიან? ქორენო სულიერო მოწიფულ? ქუღუნო იეჰოვაწკუმა პირად ურთიერთობა? პატიცემა ქუღუნო მუშ კრებაშე? არასამაგალითო ხომ ვა რე ვარდა გლახა საზოგადოებაწკუმა ხომ ვა უღჷ ურთიერთობა? (1 კორ. 15:33; 2 ტიმ. 2:20, 21). ქორენო ბიბლიურო თავისუფალ ქორწინებაშო? მნიშვნელოვან რე, თე კითხვეფშე პასუხ მიბღათ. მარა თეშ გაგება ძნელ რე, თის ჯგირო იჩინენსინ ფერ თანამორწმუნეეფწკუმა ჩიებაშ უმშო (იგავ. 15:22). მუშო ოკო რაგად, იეჰოვაშ ართგურ მსახურეფქ თეშ ხოლო ოკო ვეფიქრან ურწმუნოწკუმა დაქორწინებაშე (2 კორ. 6:14; 1 კორ. 7:39).

მუჭოთ ბძირით, გაჩინებაფაშ საიტეფიშ გიმორნაფას ბრელ საშიშროება მოჸუნს. მარა არსებენს უჯგუშ საშვალებეფ, ნამდა დობგორათ დო გეფჩინებაფუათ თიცალ პიროვნება, მიდგაწკუმა ურთიერთობას შილებე ბედნერ ქორწინებაქ ქუმაჸუნას. მუჭო შემლებნა თეცალ პიროვნებაშ გორუა? მუჟამსით საჯარო აკოშაყარუა შეიოლებერ რე, იეჰოვაშ მოწმეეფს შეულებნა ართიან გეჩინებაფუან კრებაშ შეხვალამეფს, კონგრესეფს დო შხვა აკოშაყარუეფს.

მარა მუჟამსით თეცალ აკოშაყარუეფ შეზღუდულ რე, მაგალთო, ᲙᲝᲕᲘᲓ-19 პანდემიაშ გურშენ, ჩქი ელექტრონულ საშვალებეფს იბრინუანთ, ნამდა ქიდვესწრათ კრებაშ შეხვალამეფს, სოდეთ შემლებნა გეფჩინებაფუათ თიცალ მოწმეეფ ხოლო, მით ვა რენა დაქორწინებულ. თექ შემალებენა ქობძირათ, მუჭო ღებულენა თინეფ მონაწილებას შეხვალამეფს დო მუჭო გიმოხანტნა რწმენას (1 ტიმ. 6:11, 12). თეს გეძინელ, შემლებნა შეხვალამაშ უკულ ართიანწკუმა იფჩუათ ზუმიშ აპლიკაციაშ საშვალებათ, სოდეთ შხვა იეჰოვაშ მოწმეეფ ხოლო რენა. თექ ჩქი შემლებნა ქობძირათ, მუნერ ურთიერთობა უღჷ თის შხვეფწკუმა, ნამდა ქიგებგათ, მუნერ პიროვნება რე (1 პეტ. 3:4). დროშ მიკულაშ უკულ, მუჟამსით უჯგუშო გეფჩინებაფუანთ ართიანს, შემლებნა ქიდვეკვირათ, ქომღუნა დო ვარ ართნერ მიზნეფ დო ფასეულობეფ დო ქიპჸუაფუთ დო ვარ ჯგირ მეუღლეეფ.

მუჟამსით დაუქორწინებელეფ ბიბლიურ პრინციპეფწკუმა შეთანხმებულო გორნა მომავალ მეუღლეს, შილებე მუნეფიშ დუდშა გეგმოცადან იგავეფს მოჩამილ სიტყვეფიშ ჭეშმარიტება: „მიდგას ჯგირ ოსურ [ვარდა ქომონჯ] ჸუნს, ხვამელ რე; იეჰოვაშ ჭყოლოფა ვა მაკორდუ თის“ (იგავ. 18:22).