1, 2. მუჭო მოხვარნა ესაიაშ 65:16, 17-ის მოჩამილ იეჰოვაშ დუნაპირებ, ბოლოშა მიფთვინათ?

„ბოლოშა მითვინით!“ თენა რდჷ 2017 წანაშ რეგიონულ კონგრესიშ პროგრამაშ თემა. თე პროგრამას მოჩამილ რდჷ, მუჭო შემლებნა გავურზათ სირთულეეფს. მართალ რე, თე კონგრესიშ უკულ მუსხირენ წანაქ მიკილ, მარა ჩქი კინ მაფნა მათვინებელ თე უბადობათ ეფშა ქვეყნიერებას.

² მუშა გაფნა გარზებელ ამდღა? ოჯახიშ წევრ ვარდა ძვირფას მეგობარ ხომ ვა გაფნა ღურელ? სერიოზულ ლახალა ხომ ვა გაწუხენა? ხანშამიშულაქ უმოს პრობლემეფ ხომ ვა გოირჩქინეს? სტიქიურ უბედრობაშ, ძალადობაშ ვარდა თხოზინიშ მსხვერპლ ხომ ვა რეთ? თიცალ სირთულეეფ ხომ ვაიღნა, მუდგაშ მიზეზ კოვიდ-19 ვარდა შხვა თეცალ ლახალა რე. შურ მოლნა თი დროშ მოულაშა, მუჟამსით თე ირფელს უკახლე ქიკნიპტენთ, გიბჭყოლიდუანთ დო მეტო ვეშეფხვადუთ! (წეკითხით ესაიაშ 65:16, 17).

3. მუ ოკო ვაკეთათ ასეშე დო მუშენ?

³ თე სისტემას ცხოვრება რთულ რე დო მომავალს შილებე უმოს მეტ სირთულეშა მაჸუან გარზებელქ (მათ. 24:21). საჭირო რე, უმოსო გუვავითარათ მოთვინებაშ უნარ, მუშენდა იესოქ თქუ: „მოთვინებათ გინისქილიდუანთ დუდის“ (ლუკ. 21:19). თიშე დაფიქრება, შხვეფქ მუჭო გურზეს ჩქი მიღნან თიცალ პრობლემეფს, ჩქინ მოთვინებას ხოლო უმოსო გამანგარენს.

4. მუშენ შემლებნა თიშ რაგად, ნამდა იეჰოვა მოთვინებაშ არძაშ უჯგუშ მაგალითის მარზენა?

⁴ მი მარზენა მოთვინებაშ არძაშ უჯგუშ მაგალითის? იეჰოვა ღორონთ. შილებე თე პასუხიქ გაიკვირდეს, მარა დეფიქრებუთ-და, ქიმეხვადუთ, ნამდა თენა თაშ რე. ქვეყნიერება, ნამდგას ეშმაკ აკონტროლენს, პრობლემეფით რე ეფშა. იეჰოვას უღჷ ძალა, ასე ხოლო მოსპას თე ქვეყნიერება, მარა თინა იჯინე, სოიშახ თეშ დრო დოდირთუ (რომ. 9:22).  დანიშნულ დღაშ მოულაშახ იეჰოვა ითვინენს. მორთ გუვარჩუათ ჩხორო მხარე, მუდგას იეჰოვა ითვინენს.

5. მუჭო მიორინეს ღორონთიშ სახელს შეურაცხყოფა დო თქვანდა მუჭო მოქმედენს თენა?

⁵ მუშ სახელიშ შეურაცხყოფა. იეჰოვას უჸორს მუშ სახელ დო ოკო, ნამდა არძაქ პატი ცას თის (ეს. 42:8). მარა სოდგარენ 6 000 წანა რე, მუთ თიშ სახელს შეურაცხყოფას მიორინუანა (ფსალმ. 74:10, 18, 23). თექ ედემიშ ბაღის დიჭყჷ, მუჟამსით ეშმაკიქ (ნიშნენს „ტყურაშ ეკმაწამებელს“) ტყურა ქეკაწამ ღორონთის, ითამ ადამ დო ევას უფულუნდჷ თიცალ მუდგარენს, მუთ თინეფიშ ბედნერობაშო რდჷ საჭირო (დაბ. 3:1—5). თევრეშე მოჸუნაფილ, იეჰოვას აბრალუაფნა, ნამდა ადამიანეფს ვარზენს თის, მუთ სინამდვილეს ოსაჭირნა. იესოს აწუხენდჷ, ნამდა თიშ მუმაშ სახელ შეურაცხყოფილ რდჷ, ათეშენ მუშ მოწაფეეფს უწუ თეშნერო ილოცესკო: „ჩქინ ზეციერ მუმა, წმინდა რდას სქან სახელ“ (მათ. 6:9).

6. მუშენ მეჩჷ გარკვეულ დრო იეჰოვაქ მუშ უზენაესობაშ საკითხიშ გინოჭყვიდუას?

⁶ მუშ უზენაესობაშ წინააღმდეგ ულა. იეჰოვას აბსოლიტურ უფლება უღჷ, რდას მართველ ცას დო დედამიწას დო თიშ მართველობა არძაშ უჯგუშ რე (გამოცხ. 4:11). მარა ეშმაკიქ მინდომ, ანგელოზეფ დო ადამიანეფს ოფიქრებაფუკო, ნამდა ღორონთის ვა უღჷ თეშ უფლება. ეშმაკ ტყურას იჩიებუდუნ თიშ გიმაარგამებელო დრო რდჷ საჭირო. იეჰოვაქ გონივრულო მიქცუ დო ადამიანეფს ქიმეჩ დასაბაღ დრო თიშ ოძირაფალო, ნამდა შემოქმედიშ ხემძღვანელობაშ უმშო თინეფს ვეშიალებენა მუნეფიშ დუდიშ წარმატებულო მართუა (იერ. 10:23). იეჰოვაშ მოთვინებაშ შედეგო თე საკითხ საბოლათ გეგნოჭყორდუ. ეჭვიშ თუდო მითინ ვეგიორინუანს, ნამდა იეჰოვაშ მართველობა არძაშ უჯგუშ რე დო ხვალე თიშ სამეფოს შეულებ, მომღან ნამდვილ მშვიდობა დო უსაფრთხოება.

7. მიქ იდჷ ღორონთიშ წინააღმდეგ დო მუ ელნა თინეფს?

⁷ მუშ სქუალეფშე ნამთინეშ აბუნტება. იეჰოვაქ მუშ სქუალეფ — ანგელოზეფ დო ადამიანეფ — სრულყოფილო გაჭყჷ. მარა ბუნტიშ ემატახალ ანგელოზიქ, სატანაქ (ნიშნენს „მოწინააღმდეგეს“), სრულყოფილ ადამიანეფ, ადამ დო ევა, ღორონთიშ წინააღმდეგ გეიახნარ. შხვა ანგელოზეფ დო ადამიანეფქ ხოლო გეიაჸუნეს თე ბუნტის (იუდ. 6). უმოს გვიანო, ისრაელ ერშე, ნამუთ იეჰოვაშ გიშაგორილ რდჷ, ნამთინექ ვარია თქუ თიშე დო ტყურა ღორონთეფიშ თაყვანიშცემა ქიდიჭყჷ (ეს. 63:8, 10). იეჰოვა თეშ გინაფლენდჷ დუდის, მუჭოთ თიცალ პიროვნება, ნამდგას უღალატეს. მარა თიქ მითვინ დო ამდღა ხოლო ითვინენს, სოიშახ მობუნტეეფიშ მოსპუალაშ დრო ვა მოურს. თენა ჯგირობუას მოუღანს თინეფს, მით ღორონთიშ ართგურ რენა დო ითვინენა უბადობას!

8, 9. მუ ტყურეფქ იჸუ იეჰოვაშ გურშენ რაგადებულქ დო ჩქი მუშ კეთება შემლებნა?

⁸ ეშმაკიშ ტყურეფ. ეშმაკიქ ტყურა ქეკაწამ იეჰოვაშ ართგურ მსახურ იობის დო თქუ, ნამდა იეჰოვაშ არძა მსახურ თის მუდგარენიშ მეღებაშ სურვილით ომსახურ (იობ. 1:8—11; 2:3—5). სატანას ამდღარშახ ვემუტებ შხვეფშა ტყურაშ ეკოწამება (გამოცხ. 12:10). თითოულს შემლებნა, მონაწილება მიბღათ თიშ დამტკიცებას, ნამდა სატანა მეტყურე რე. თეშო საჭირო რე, მიფთვინათ სირთულეეფ დო ვა ვოდინუათ იეჰოვაშ ართგურობა, მუშენდა მიჸორა თინა. იეჰოვა იობცალო ჩქი ხოლო მაკურთხენა მოთვინებაშენ (იაკ. 5:11).

⁹ სატანა ირინუანს რელიგიურ ლიდერეფს თიშ ორაგადეთ, ნამდა იეჰოვა რე სასტიკ დო ადამიანეფიშ ტანჯება თიშ ბრალ რე. მაგალთო, ბაღანეფ ღურნან, ნამთინე იჩიებ, ნამდა თინეფ ღორონთიქ იჸონ, მუშენდა უმოს ანგელოზ ოსაჭირუდ ზეცას. თენა ღორონთიშ მანგარ შეურაცხყოფა რე! მარა ჩქი მიჩქნა, მუნერ მოჸოროფე რე იეჰოვა. მუჟამსით სერიოზულო იბლახებუთ  ვარდა საჸოროფო ადამიან მიღურნა, თეს იეჰოვას ვა ვაბრალენთ. პირიქით, ჩქი ბწანა, ნამდა მალას ღორონთ არძას ჯამრთელობას დურთინუანს დო ღურელეფს გათელენს. ჩქი შემლებნა არძას, მით მირჩქილენა, ვუწუათ, მუნერ მოჸოროფე ღორონთ პჸუნა. თეშნერო, ღორონთის საშვალებას მეფჩანთ, ქუპასუხას თინეფს, მით გაძიცანს (იგავ. 27:11).

10. მუს იჩიებ იეჰოვაშ გურშენ ფსალმუნიშ 22:23, 24?

¹⁰ მუშ ძვირფას მსახურეფიშ ტანჯება. იეჰოვას გურშა მეუღ შხვეფიშ მდგომარეობა. თის მანგარო აწუხენს, მუჟამსით ჩქინ ტანჯებას ორწყე, მუდგაშ მიზეზ შილებე რდას თხოზინ, ლახალა ვარდა არასრულყოფილება (წეკითხით ფსალმუნიშ 22:23, 24). იეჰოვა გინაფლენს ჩქინ ჭუას. თის ოკო, ჩამთხინუან ირნერ ტანჯება დო ქოთ თაშ გაკეთენს (ქეშუდარით გამოსვლაშ 3:7, 8; ესაიაშ 63:9). მალას დოდირთუ თი დღა, მუჟამსით ღორონთ გელამწიმინდანა „ირნერ ჩილამურს თოლეფშე დო მეტო ვეჸუაფ ღურა, ვართ ნგარა, თვალუა დო ჭუა, მუშენდა მუთ ულირს რდუნ, ირფელქ მისპჷ“ (გამოცხ. 21:4).

11. მუს გინაფლენს იეჰოვა მუშ საჸოროფო ართგურ მსახურეფიშ მიმართ, მით ღურელ რე?

¹¹ თი მეგობრეფიშ მონატრება, მით ღურელ რე. მუს გინაფლენს იეჰოვა, მუჟამსით მუშ ართგურ მსახურ ღურუ? თის მანგარო ოკო თიშ კინ ძირაფა! (იობ. 14:15). შეილებნანო წერმიდგინათ, მუჭო ონატრჷ იეჰოვას მუშ მეგობარ აბრაამი? (იაკ. 2:23). ვარდა მუჭო ონატრჷ მოსე, მიდგაწკუმა თეშ იჩიებუდ, „მუჭოთ კოჩ ურაგად კოჩის“? (გამ. 33:11). მუჭო ოლჷ შურ დავითი დო შხვა ფსალმუნმაბირეეფიშ ბირაშ რჩქილაშა, მუჟამსით მუნეფიშ ნაჭარა სქვამ ობირეშეფით განადიდენა იეჰოვას! (ფსალმ. 104:33). მართალ რე, ღორონთიშ თე მეგობრეფს ღურაშ ლურით ლურა, მარა იეჰოვას ვა გოჭყოლად თინეფ (ეს. 49:15). ღორონთის თინეფიშ პიროვნებაშ არძა დეტალ შჷ. ბიბლია იჩიებ: „თიშო თინეფ ცოცხალეფ რენა“  (ლუკ. 20:38). ართ დღას, იეჰოვა თე ხალხის სიცოცხლეს დურთინუანს, კინ მირჩქილუანს თინეფიშ გულწრფელ ლოცვეფს დო მიღენს თინეფიშ თაყვანიშცემას. საჸოროფო პიროვნება ღურელ ქუგაფნან-და, თეშე ფიქრ გურშა ეიქექუანა.

12. განსაკუთრებულო მუ უჭუანს იეჰოვას გურს უბადობათ ეფშა თე ბოლო დღალეფს?

¹² ადამიანეფიშ დაჩაგრება უბადოეფიშ ხეშე. ედემიშ ბაღის ბუნტიშ დოჭყაფაშახ ირფელ ჯგირო მიშჷ, მარა ბუნტიშ უკულ მდგომარეობაქ უფრაშობაშა მიდართჷ. იეჰოვას ჯგირო უჩქუდ, თენა თაშ იჸუაფუდუნ. თის ჯოგჷ უბადობა, უსამართლობა დო ძალადობა, ნამუთ ამდღა მოდვალირ რე მსოფლიოს. ღორონთ ირიათო აქციენდჷ განსაკუთრებულ ყურადღებას დაჩაგრულ ხალხის. მაგალთო, თიცალ სუსტ დო დაუცველ ადამიანეფს, მუნერით რე ქომონჯღურელ ოსურკოჩ დო ომბოლ ბაღანა (ზაქ. 7:9, 10). იეჰოვას განსაკუთრებულო უჭუანს გურს, მუჟამსით მუშ ართგურ მსახურეფს აჩაგრენა დო ციხეს ოხუნუანა. დარწმუნებულ რდათ, ნამდა თის უჸორთ არძა, მით თიწკუმა ართო გიმირჩქინანთ მოთვინებას.

13. მუჭო გეუფრაშ იეჰოვაშ თოლიშ წოხოლე ადამიანიშ ზნეობრივ ნორმეფქ დო მუს გაკეთენს თინა?

¹³ ადამიანიშ ზნეობრივ ნორმეფიშ ხოლო უმოსო გაუფრაშება. ადამიანეფ ღორონთიშ ამნახანტო რენა გოჭყაფილ, მარა სატანას მოწონს, თინეფს ზნეობრივ ნორმეფიშ უთირანსინ. მუჟამსით იეჰოვაქ ქოძირ, ნამდა ნოეშ დღალეფს „დედამიწას გევრცელ უბადობაქ, გურქ დოჭყორდჷ იეჰოვას მუშ გოჭყაფილ ადამიანეფიშ გურშენ დო გურს აწყუნ“ (დაბ. 6:5, 6, 11). გეუჯგუშუო თეშ უკულ მდგომარეობაქ? მუშო ოკო რაგად, ვარ! სატანას მანგარო ოხიოლ თიშ ძირაფა, ნამდა სექსუალურ უზნეობაშ არძანერ ფორმაქ მანგარო გევრცელ, თეშა მიშურს უზნეო საქციელ ართ დო იგივე ვარდა საპირისპირო სქესიშ ადამიანეფ შქას! (ეფეს. 4:18, 19). თის განსაკუთრებულო ახარენს, მუჟამსით ღორონთიშ მსახურს სერიოზულ ცოდვას ოკეთებაფუანს. მუჟამსით იეჰოვაშ მოთვინებაშ დრო გეთებუ, თინა მოსპუნს უზნეო კათას დო თეშნერო დამტკიცენს მუშ დამოკიდებულებას უზნეობაშ მიმართ.

14. მუჭო ოქცუნა ადამიანეფ ღორონთიშ გუნაჭყეფუეფს?

¹⁴ მუშ გუნაჭყეფუეფიშ ადამიანეფიშ ხეშე განადგურება. ადამიანეფ ოცილნა ართიანს; თეწკუმა ართო, ვა ზრუნენა დედამიწაშე დო ვართ ცხოველეფშე, ნამუთ იეჰოვაქ ჩაბარ თინეფს (ეკლ. 8:9; დაბ. 1:28). ნამთინე ექსპერტ იჩიებ, ნამდა ადამიანეფიშ საქციელიშ გურშენ შილებე მუსხირენ წანაშა მილიონშე მეტ სახეობაქ * გეშალას. ათეშენ გასაკვირ ვა რე, მუშენ იჩიებნა თინეფ, ნამდა ბუნებას უჭირს! საბედნეროთ, იეჰოვაქ დემეპირეს, ნამდა მოსპუნს „დედამიწაშ მუმასპალეფს“ დო მთელ პლანეტას სამოთხეთ გინაშქვანს (გამოცხ. 11:18; ეს. 35:1).

15, 16. მუქ ოკო აღბძრან, მიფთვინათ იეჰოვაწკუმა ართო? ქიმიჸონით მაგალით.

¹⁵ დეფიქრით თი პრობლემეფშე, ნამდგას ჩქინ ზეციერ მუმა ანთასობით წანა რე, ითვინენს (ქოძირით ჩარჩო  „მუს ითვინენს იეჰოვა?“). თის შეულებ, ნებისმიერ დროს განადგურას თე უბადო ქვეყნიერება. მარა თიშ მოთვინებას ჩქინდა კურთხევეფ მოუღ! წერმიდგინით თეცალ სიტუაცია: ჩილ დო ქომონჯის უწის, ნამდა მუნეფიშ ბაღანას, ნამუთ დიო დაბადებულ ვა რე, ჯამრთელობაშ სერიოზულ პრობლემა უღჷ. თიქ შილებე ბრელ ხანს ვეცოცხლას ვარდა მთელ ცხოვრებას ოტანჯებელქ აჸუას. თიშ უმკუჯინუო, ნამდა თინეფშო მანგარ რთულ იჸუაფ თე ბაღანაშ მიკოლუაფა, იშენით ხიოლით ელნა თიშ დაბადებას. თინეფს ბაღანაშ ჸოროფა მეხვარებ, მითვინან  ნებისმიერ სირთულე, ნამდა მუნეფიშ სქუას მუთ შილებენ უჯგუშ ცხოვრება უღდას.

¹⁶ თეშნერო, ადამ დო ევაშ არძა გამნარყ დაბადებაშე არასრულყოფილ რე. მარა იეჰოვას უჸორს თინეფ დო ზრუნენს თინეფშე (1 იოან. 4:19). ჟიშე მოშინაფილ არასრულყოფილ მშობლეფიშ გინაწონს, იეჰოვას შეულებ მუშ სქუალეფ ტანჯებაშე დერსხას. თის დანიშნულ აფჷ დრო, მუჟამსით მოსპუნს არძანერ ლახალას, მუდგათ ადამიანეფ იტანჯებნა (მათ. 24:36). იეჰოვაშ ჸოროფა აღბძრენა, ჩქი ხოლო თიწკუმა ართო თეიშახ მიფთვინათ, სოიშახ საჭირო იჸუაფ.

17. მუჭო მოხვარნა იესოშ გურშენ ებრაელეფიშ 12:2, 3-ს მოჩამილ სიტყვეფ, ვა ვოდინუათ მოთვინება?

¹⁷ იეჰოვაქ მოთვინებაშ სრულყოფილ მაგალით დომტეს. იესო წარმატებულო მეჸუნდჷ მუმაშ მაგალითის. მუჟამსით თინა დედამიწას რდჷ, მითვინ ლანძღუა, დამცირება დო წამებაშ ძელს მიკოჭკადუა (წეკითხით ებრაელეფიშ 12:2, 3). მუშო ოკო რაგად, იეჰოვაშ მაგალითიქ მეჩჷ იესოს გარზებელ ძალა. თინა ჩქი ხოლო გუმამანგარენა.

18. მუჭო მოხვარნა 2 პეტრეშ 3:9 თიშ გაგებას, მუ შედეგიქ მაჸუნ იეჰოვაშ მოთვინებას?

¹⁸ წეკითხით 2 პეტრეშ 3:9. იეჰოვას უჩქჷ, მუჟამ იჸუაფ არძაშ უჯგუშ დრო თე უბადო ქვეყნიერებაშ განადგურებელო. თიშ მოთვინებაქ საშვალება ქიმეჩჷ მილიონობით ადამიანს, გეჩინებაფუკო ღორონთ დო თაყვან ცუკო თის. თინეფ ბედნერეფ რენა, მუშენდა იეჰოვაშ მოთვინებაშ შედეგო ქაშუეს სიცოცხლექ, ქიჸოროფუეს ღორონთ დო დუდ მეუძღვინეს თის. მუჟამსით მილიონობით ადამიან ბოლოშა მოთვინებაშენ ჯილდოს მიღენს, დემტკიცებ, ნამდა იეჰოვაშ გადაწყვეტილება, მითვინკო, სწორ რდჷ!

19. მუ ოკო მაფდან გინოჭყვიდილ დო მუს მიბღენთ შედეგო?

¹⁹ იეჰოვაშე ხიოლით მოთვინებას ბგურაფლენთ. არძა გურჭუა დო ტანჯებაშ უმკუჯინუო, ნამდგაშ მიზეზ სატანა რე, იეჰოვა იშენით „ბედნერ ღორონთ“ რე (1 ტიმ. 1:11). თეშნერო, ჩქი ხოლო ვა ვოდინუანთ ხიოლს დო მოთვინებათ ველუთ თი დროს, მუჟამსით ღორონთ განწმინდენს მუშ სახელს, დამტკიცენს მუშ უზენაესობას, მოსპუნს არძა უბადობას დო ჩამთხინუანა პრობლემეფს. მორთ გინოჭყვიდილ მაფდან, მიფთვინათ დო გურშა ეიფქექუათ თიშე ფიქრით, ნამდა ჩქინ ზეციერ მუმა ხოლო ითვინენს. თაშ ქიმიფქციებუთ-და, ჩქინ დუდშა ქიბგინანთ თე სიტყვეფიშ ჭეშმარიტებას: „ბედნერ რე თინა, მით განსაცდელს ურზუ, მუშენდა იეჰოვაშ მოწონას დემსახურენს დო სიცოცხლეშ გვირგვინს მიღენს, ნამუთ თიქ მუშ მოჸოროფეეფს დეპირ“ (იაკ. 1:12).