1, 2. მუ შემთხვევას მიწონუანს იეჰოვა ჩქინ თაყვანიშცემას?

 მუ მუგალენა გონებაშა სიტყვა „თაყვანიშცემაშ“ გაგონებაშ დროს? შილებე, თოლშა აწოიდირთან თანდაბალ ჯიმაქ, ნამუთ ბირგულდოშქუმალირო შურ დო გურით ლოცულენს ვარდა ბედნერ ოჯახიქ, ნამუთ მთელ გურით ირკვიენს ბიბლიას.

² ჟირხოლო შემთხვევას თინეფ ღორონთის ცენა თაყვანს, მარა მიღენს დო ვარ იეჰოვა თინეფიშ თაყვანიშცემას თევრეშე გიმორჩქინდუ, მუსხით ოცადნა თიშ ნებაშ შესრულებას დო ჸოროფა დო პატიცემაშ გიმორჩქინას. ჩქი მანგარო მიჸორა იეჰოვა დო მიჩქუნა, ნამდა თინა იმსახურენს თაყვანიშცემას. ათეშენ მოკონა, მთელ გურით ფცათ თის თაყვან.

3. მუს გუვარჩიენთ თე სტატიას?

³ თე სტატიას გუვარჩიენთ თიცალ თაყვანიშცემას, ნამუთ იეჰოვაქ მიწონუ ბიბლიურ დროს დო გუვარჩიენთ თაყვანიშცემაშ ბრუო მხარეს, ნამდგას იეჰოვა იწონუანს ამდღა. გარჩიებაშ დროს ჯგირ იჸუაფ, დეფიფქრათ თიშე, მუჭო შემლებნა პირადო ჩქი გუვაუჯგუშათ თაყვანიშცემაშ ხარისხ. თეს გეძინელ, თის ხოლო ქობძირუნთ, მუშენ მოუღ ჭეშმარიტ თაყვანიშმცემლობას ბედნერობა.

4. მუჭო გიმირჩქინეს ჯვეშ დროს იეჰოვაშ თაყვანიშმცემელეფქ თიშ პატიცემა დო ჸოროფა?

⁴ ქრისტეშ მოულაშახ მახორუ თიცალ ართგურ ქომოლკათა, მუნერით რდეს აბელ, ნოე, აბრაამ დო იობ, გიმირჩქინანდეს იეჰოვაშ პატიცემას დო ჸოროფას. თენა იძირე თინეფიშ მორჩილებაშე, რწმენაშე დო შესაწირავეფშე. ბიბლია ვერზენს კონკრეტულ ინფორმაციას თიშ გურშენ, თაყვანიშცემაშ მუნერ ფორმას მიაჸუნესკო თინეფქ. მარა  თინეფქ ირფელ გაკეთეს, ნამდა იეჰოვაშ პატიცემა გეგმურჩქინდესკო, შედეგო თე ადამიანეფიშ თაყვანიშცემა მიწონუ ღორონთიქ. უმოს გვიანო იეჰოვაქ მოსეშ კანონ ქიმეჩ აბრაამიშ გამნარყის, ნამდგაშა მიშეშ კონკრეტულ მითითებეფ, მუჭო ოკო ცესკო თაყვან იეჰოვას თიშო მოსაწონ ფორმათ.

5. მუქ ითირ იესოშ ღურა დო გათელებაშ უკულ ჭეშმარიტ თაყვანიშმცემლობას?

⁵ იესოშ ღურა დო გათელებაშ უკულ, იეჰოვა ვეთხინდჷ მოსეშ კანონიშ მეჸუნას (რომ. 10:4). ქრისტიანეფქ ოკო მიაჸუნესკო ახალ კანონს, „ქრისტეშ კანონს“ (გალ. 6:2). თენეფქ თე კანონს ქიდემორჩილესკონ, ვასაჭირდეს თიშ დაზეპირება დო კანონეფიშ დიდ სიაშ მეჸუნა. თეშ გინაწონს, ოკო მიაჸუნესკო იესოშ მაგალითის დო თიშ გურაფეფს. ამდღა ქრისტიანეფ ირფელს ორთნა, ნამდა მიაჸუნან ქრისტეშ მაგალითის დო თეშნერო გურ გუხარან იეჰოვას, მუდგას თინეფშა ხოლო მოუღ ბედნერობა (მათ. 11:29).

6. მუ ჯგირობუაშ მეღება შემლებნა თე სტატიაშე?

⁶ თაყვანიშცემაშ თითოულ ნაბიჯიშ გარჩიებაშ დროს, თქვან დუდის ქოკითხით: „მუს მივოჭირინე თე კუნთხუთ? შემლებნო გუვაუჯგუშე ჩქიმ თაყვანიშცემაშ ხარისხ?“ თქვა შილებე კმაყოფილ რდათ თით, მუდგას ამდღა ორთუთ. მარა თეწკუმა ართო, ოკო ქოთხუათ იეჰოვას, ქიმგეხვარან თიშ ძირაფას, მუშ კეთება შეილებნა ხოლო უმოს უჯგუშო.

7. მუჭო უჯინე იეჰოვა ჩქინ მთელ გურით რაგადებულ ლოცვეფს?

⁷ იეჰოვას თაყვანს ფცენთ, მუჟამსით ლოცვათ ურაგადუთ თის. ბიბლიას ჩქინ ლოცვეფ შედარებულ რე მთელ გურით მომზადებულ საკმელშა, ნამუთ კარავშა დო უმოს გვიანო ტაძარშა მეუღდეს (ფსალმ. 141:2). თე საკმელიშ არომატ მოწონდჷ იეჰოვას. თეშნერო ჩქინ მთელ გურით რაგადებულ ლოცვეფ სასიამოვნო რე თიშო, თიმწკუმა ხოლო, მუჟამსით უბრალო სიტყვეფით ურაგადუთ თის (იგავ. 15:8; კან. 33:10). ჩქი ჯგირ მიზეზ მიღნა თიშ დაჯერებელო, ნამდა იეჰოვას გურს უხარენთ, მუჟამსით გიმოფხანტუნთ ჸოროფა დო მარდულობას თიშ მიმართ. თის ოკო, ნამდა ქივეჩუათ ჩქინ ფიქრეფშე, იმენდშე დო მიზნეფშე. ლოცვაშახ ოკო დეფიფქრათ, მუშ რაგად მილამნა. თაშ ქიმიფქციებუთ-და, ჩქინ მომზადებულ საკმელ მოსაწონ იჸუაფ ზეციერ მუმაშო.

8. მუ ჯგირ საშვალება მიღნა ღორონთიშ ოდიდებელო?

⁸ იეჰოვას თაყვანს ფცენთ, მუჟამსით განვადიდენთ თის (ფსალმ. 34:1). თეს ვორთუთ, მუჟამსით ღორონთიშ სარკო თვისებეფ დო საქმეეფიშ გურშენ იფჩიებუთ. მარდულობათ ეფშა გურ, მოხვარნა განვადიდათ თინა. მუჟამსით დროს გეგმურთუნთ ფიქრის იეჰოვაშ სიჯგირაშე, თიშე მუთ ჩქინო აფჷ ნაკეთებ, დღას ვეშმელიებნა თიშ განდიდებაშ მიზეზეფ. განსაკუთრებულო ქადაგებაშ საქმე მარზენა ჯგირ საშვალებას „შებწირათ ღორონთის მსხვერპლო ცქვაფა, ჩქინ ბაგეეფიშ ნაყოფ“ (ებრ. 13:15). მუჭოთ ლოცვაშახ რე საჭირო ფიქრ, მუს უწინთ იეჰოვას, თეშნერო ქადაგებაშახ რე საჭირო ფიქრ, მუს უწინთ თინეფს, მიდგას შეფხვადუთ. ჩქი მოკონა, ნამ შემლებნან თით განვადიდათ იეჰოვა. ზუსტას ათეშენ უქადაგენთ შხვეფს მთელ გურით.

9. ჯვეშ ისრაელეფცალო, მუ ჯგირობუა მოუღ ჩქინდა ართო აკოშაყარუას? ქიმიჸუნით პირად მაგალით.

⁹ იეჰოვას თაყვანს ფცენთ, მუჟამსით შეხვალამეფს ვოსწრუთ. ჯვეშ ისრაელშა რაგადებულ რდჷ: „არძა ქომოლკოჩიქ წარმოწანაშე სუმშა ქიგედირთას იეჰოვაშ  თქვან ღორონთიშ წოხოლე თი ადგილს, ნამდგას თინა გიშეგორუნს“ (კან. 16:16). თინეფქ ოკო ქიდიტესკო მუნეფიშ ჸუდეეფ დო დიხეფ უმინჯურო, მარა იეჰოვა ოპირუდ: „მითინს ვემდაღინე თქვანდა დიხა თიმ დროს, მუჟამსით იეჰოვაშ თქვან ღორონთიშ წოხოლე გიორინშა იჸუაფუდ ულირ“ (გამ. 34:24). ღორონთიშ მოშიშ ისრაელეფს დიდ რწმენა უღდეს დო ათეშენ ოსწრუდეს ირწანიან შეხვალამეფს. შედეგო თინეფს კურთხევეფ ვარკუდეს, უმოსო ინმანჭუდეს ღორონთიშ კანონს, ფიქრენდეს იეჰოვაშ სიჯგირაშე დო ართიანწკუმა ურთიერთობათ ხარენდეს (კან. 16:15). ჩქი ხოლო თეცალ კურთხევეფს ბღებულენთ, მუჟამსით ირფელს ვორთუთ, ნამდა ქიდვესწრათ კრებაშ შეხვალამეფს. დეფიქრით, მუჭო უხარენს გურს იეჰოვას ჩქინ მომზადებულ მოკლე დო აზრიან კომენტარეფ.

10. მუშენ რე ბირა თაყვანიშცემაშ მნიშვნელოვან ნაწილ?

¹⁰ იეჰოვას თაყვანს ფცენთ, მუჟამსით თიშ ოდიდებელ ობირეშეფს იბიბრთ (ფსალმ. 28:7). ისრაელეფშო ბირა თაყვანიშცემაშ მნიშვნელოვან ნაწილ რდჷ. მეფე დავითიქ 288 ლევიან გიორინუ კარავს მაბირეთ (1 მატ. 25:1, 6—8). ამდღა ჩქი ღორონთიშ ჸოროფას გიმოფხანტუნთ, მუჟამსით ოდიდებელეფს უბირთ თის. თეშო მნიშვნელოვან ვა რე, იშენდოიშენ ჯგირ მაბირეეფ ვორდათ. ქიმიპჸუნათ თეცალ შედარება: ჩიებაშ დროს არძა ხშირას ფჩირთუთ, მარა თეშ გურშენ ვემვოტალენთ რაგადის კრებას დო მსახურებას (იაკ. 3:2). თეშნერო ჩქი ოკო ვებწუხათ, ნამდა ჯგირო ვა მაბირენა დო ვემვოტუათ ობირეშით იეჰოვაშ განდიდება.

11. მუჭოთ ფსალმუნიშ 48:13 რაგადანს, მუშენ ოკო გიმურთათ დრო ოჯახწკუმა ართო ბიბლიაშ გურაფას?

¹¹ იეჰოვას თაყვანს ფცენთ, მუჟამსით იბრკვიენთ თიშ სიტყვას დო სქუალეფს ვოგურუანთ თიშ გურშენ. საბატონიშ კანონ ისრაელეფს საშვალებას არზენდჷ, გეგნოდვესკო მუნეფიშ ირდღაშიან საქმეეფ დო ყურადღება იეჰოვაწკუმა ურთიერთობაშა გეგნიღესკო (გამ. 31:16, 17). ართგურ მშობლეფ მუნეფიშ სქუალეფს ოგურუანდეს იეჰოვაშ დო თიშ სიჯგირაშ გურშენ. ჩქი ხოლო გეგშურთათ ოკო დრო ღორონთიშ სიტყვაშ კითხირს დო გურაფას. თენა იეჰოვაშ თაყვანიშცემაშ ნაწილ რე დო მოხვარნა დევეახლოვათ თის (ფსალმ. 73:28). მუჟამსით თეს ჩქინ ოჯახწკუმა ართო ვორთუთ, ვოხვარუთ სქუალეფს, მოჸოროფე ზეციერ მუმაწკუმა ხოლოშიან პირად ურთიერთობა გავითარან (წეკითხით ფსალმუნიშ 48:13).

12. მუს ბგურაფლენთ იეჰოვაშ დამოკიდებულებაშე თი ადამიანეფიშ მიმართ, მით კარავიშ მონწყილობეფს აკეთენდეს?

¹² იეჰოვას თაყვანს ფცენთ, მუჟამსით ვაშენენთ დო ულუანთ თაყვანიშცემაშ ადგილეფს. ბიბლია იჩიებ, ნამდა კარავიშ დო თიშ მონწყილობეფიშ კეთება წმინდა მსახურება რდჷ (გამ. 36:1, 4). იეჰოვა ამდღა ხოლო დარბაზეფიშ დო შხვა თეოკრატიულ შენობეფიშ შენებას უჯინე, მუჭოთ წმინდა მსახურებას. ნამთინე და დო ჯიმა ბრელ დროს უთმენს თეცალ საქმეს მონაწილებაშ მეღებას. ჩქი, მუშო ოკო რაგად, ვაფასენთ თინეფიშ დიდ მსხვერპლის. მშენებლობაწკუმა ართო თინეფ ქადაგებაშ საქმეს ხოლო ღებულენა მონაწილებას. თინეფშე ნამთინეს პიონერობა ხოლო ოკო. კრებაშ უხუცესეფ, სამშენებლო საქმიანობას ხუჯის დუკინენა, მუჟამსით თე მოხანდე და დო ჯიმალეფს, მოთხოვნეფს ქაკმაყოფილენან-და, ქიმეჩანა საშვალებას პიონერო იმსახურან. გამოცდილ მშენებელ ვორეთ  დო ვარ, არძას შემლებნა მონაწილება მიბღათ შენობეფიშ დასუფთებას დო მიკოლუაფას.

13. მუნერ დამოკიდებულება ოკო მიღდან შესაწირავეფიშ მიმართ, ნამდგას სამეფოშ საქმეშო ვორთუთ?

¹³ იეჰოვას თაყვანს ფცენთ, მუჟამსით სამეფოშ საქმეს ხუჯის უკინენთ შესაწირავეფით. ირწანიან დღესასწაულეფიშ დროს ისრაელეფქ იეჰოვაშ წოხოლე ხეცარიელო ოკო ვეგედირთესკო (კან. 16:16). თინეფს, ნამ შეულებდესინ თიშ მიხედვით, მატერიალურ შესაწირავეფ ოკო ქიმუღალდესკო. თეშნერო მარდულობას გეგმოხანტუნდეს თიშ გურშენ, მუდგას იეჰოვა თინეფიშ სულიერ ჯგირობუაშო ორთუდ. მუჭო შემლებნა ჸოროფა დო მარდულობა გეგმოფხანტათ იეჰოვაშ მიმართ თი სულიერ ჯგირობუაშენ, მუდგას თინა მარზენა? ართ-ართ საშვალება რე, მუსხით შემლებნან თით, ფინანსურო ქუდუკინათ ხუჯ ჩქინ კრებას დო მსოფლიო საქმეს. პავლე მოციქულქ თქუ: „ღორონთის განსაკუთრებულო მოწონს მთელ გურით კეთებულ ძღვინ; თინა ჩქინდე მუთ მიღნან თიშ შეწირუას ელჷ დო ვართ ხოლო თიშ, მუთ ვა მიღნა“ (2 კორ. 8:4, 12). იეჰოვა აფასენს შურ დო გურით კეთებულ შესაწირს, ვა უღჷ მნიშვნელობა, თინა ჭიჭე რენ დოვარ ბრელ (მარ. 12:42—44; 2 კორ. 9:7).

14. მუჭოთ იგავეფიშ 19:17-შე იძირე, მუჭო უჯინე იეჰოვა თი და დო ჯიმალეფიშ მოხვარას, მიდგას ელარნა ოსაჭირნა?

¹⁴ იეჰოვას თაყვანს ფცენთ, მუჟამსით ვოხვარუთ თი თანაქრისტიანეფს მიდგას ელარნა ოსაჭირნა. იეჰოვა ოპირუდ ისრაელეფს, ნამდა აკურთხენდჷ თის, მით გაჭირებულს მეხვარებუდ (კან. 15:7, 10). მუჟამსით ვოხვარუთ თანამორწმუნეს, ნამდგას ელარნა ოსაჭირ, იეჰოვა ჩქინ მოქმედებას უჯინე, მუჭოთ მუშა მეღალირ ძღვინს (წეკითხით იგავეფიშ 19:17). მაგალთო, ფილიპელ ქრისტიანეფქ დაპატიმრებულ პავლეს მუდგარენეფ მითუჯღონეს, მუდგაშ გურშენ პავლექ თქუ, ნამდა თინა რდჷ „ღორონთშო სასიამოვნო, მოსაწონ მსხვერპლ“ (ფილ. 4:18). ქიგიჯინით თქვან კრებას დო ქოკითხით თქვან დუდის: „ხომ ვა რე მითინ, მიდგაშ მოხვარა შემლებ?“. იეჰოვას გურს უხარენს, მუჟამსით ორწყე, ნამდა ჩქინ დროს, ენერგიას, უნარეფს დო მატერიალურ შესაძლებლობეფს შხვეფიშ მახვარებელო იბრინუანთ. თინა თეს თაყვანიშცემაშ ნაწილო მირჩქინანს (იაკ. 1:27).

15. მუშენ ვა რე მონკა ოღალ ჭეშმარიტ თაყვანიშცემა, ნამუთ თხულენს დროს დო მონდომას?

¹⁵ ჭეშმარიტ თაყვანიშცემა დროს დო მონდომას თხულენს. მარა იეჰოვას მიჸორან თიშენ ფცენთ თაყვანს დო ათეშენ თენა მონკა ოღალ ვა მაფნა (1 იოან. 5:3). წერმიდგინით, ნამდა ბაღანას მანგარო ოკო, მუშ მუმას საჩუქარ გუკეთას. თიქ შილებე მუმაშო მუდგარენიშ ხანტუას ბრელ დრო ქიმკახარჯას, მარა თეს ხიოლით ორთჷ. თის უჸორს მუშ მუმა დო ოხიოლ, ნამდა თიშა საჩუქარ მიაჩინე. თეშნერო ჩქი ხოლო მიჸორა იეჰოვა დო ათეშენ ვა მონარღუნა ჩქინ დრო, დო მონდომა თიშ თაყვანიშცემაშო. თეს ჩქინდა ხიოლ მოუღ.

16. მუჭოთ ებრაელეფიშ 6:10-შე იძირე, მუჭო უჯინე იეჰოვა თითოულიშ მონდომას, ნამდა გურ გუხარას თის?

¹⁶ მოჸოროფე მშობლეფ არძა სქუაშე ართნერ საჩუქარს ველნა. თინეფს უჩქნა, ნამდა სქუალეფ შხვადოშხვანერეფ რენა დო შხვადოშხვა მდგომარეობა უღნა. თეშნერო, ჩქინ ზეციერ მუმას არჩქილე თითოულიშ მდგომარეობა. შილებე თქვა შხვეფშე უმოსიშ კეთება შეილებნა ვარდა შხვას შეულებდას თქვანდე უმოსიშ კეთება თქვან ხანიშ, ჯამრთელობაშ ვარდა ოჯახურ პასუხიშმგებლობეფიშ გურშენ,  მარა გურქ ვა გოიტირხან (გალ. 6:4). იეჰოვა ვეგიჭყოლიდუანს თქვან ხანდას. მუჟამსით ნამ შეილებნან თის სწორ მოტივეფით ორთუთ, თის გურს უხარენთ (წეკითხით ებრაელეფიშ 6:10). იეჰოვა ორწყე, მუშ კეთება გაფნა გურს გინოჭყვიდილ. თის ოკო, რდათ ბედნერეფ დო კმაყოფილეფ თით, მუდგაშ კეთება თიშ თაყვანიშცემაშო შეილებნა.

17. ა) მუშ კეთება შემლებნა, მუჟამსით თაყვანიშცემაშ ნამთინე მხარეშ მეჸუნა მიჭირა? ბ) მუჭო მიგეხვარეს  ჩარჩოს მოშინაფილ მხარეეფიშ გიმორნაფაქ?

¹⁷ მუ შემლებნა ვაკეთათ, მუჟამსით მიჭირა ჟიშე მოშინაფილ მხარეეფშე ნამდგაინიშ მეჸუნა? მაგალთო, პირად გურაფა ვარდა ქადაგება. მუთ უმოსო ვორთუთ თეცალ საქმეეფს, შილებე თით უმოსო მოხიოლდან თინეფიშ კეთება დო სარგებელს ხოლო ბღებულენდათ. თაყვანიშცემაშ ნამთინე მხარეს მონაწილება, შილებე შევადარათ ვარჯიშის ვარდა მუსიკალურ ინსტრუმენტის მეცადინეობას. თეს ხვალე კანკალეშა გუვაკეთენთ-და, წარმატებაშა ვემმაჭირნენა. მარა მუ მოხვადუ, თეშ კეთებას ირ დღას გეგნოჭყვიდუნთ-და? დუდშე შილებე ჭიჭე დრო დუთმათ დო უკულ დროს ჭიე-ჭიეთ მოუძინათ. ჩქინ მონდომაშ ჯგირ შედეგეფს ქობძირუნთინ, მივახიოლანდათ იჸი თიშ კეთებას. თაშ რე ჭეშმარიტ თაყვანიშცემაწკუმა დაკავშირებით ხოლო.

18. მუჭო ვამართლენთ ჩქინ არსებობაშ მთავარ მიზანს დო მუ შედეგეფ მოჸუნს თეს?

¹⁸ მუჟამსით მთელ გურით ფცენთ იეჰოვას თაყვანს, ვამართლენთ ჩქინ არსებობაშ მთავარ მიზანს. შედეგო, ჩქინდა ხიოლ მოუღ ბედნერობათ დო აზრით ეფშა ცხოვრებას დო იმენდ მიღნა, მარადიულო ვემსახურებუთ იეჰოვას (იგავ. 10:22). თეწკუმა ართო, მიღნა შინაგან სიმშვიდე, მუშენდა მიჩქნა, ნამდა იეჰოვა მუშ მსახურეფს ოხვარ პრობლემეფიშ დროს (ეს. 41:9, 10). თეს გეძინელ, ბედნერობაშ ბრელ მიზეზ მიღნა, მუჟამსით თაყვანს ფცენთ მოჸოროფე მუმას, მით ღირს რე, მიღას დიდება დო პატი მუშ არძა გუნაჭყეფშე (გამოცხ. 4:11).