1, 2. მუ სირთულეეფს ხვადუ ბრელ იეჰოვაშ მოწმე?

მოციქულ პავლექ ელუჩ ტიმოთეს, დო თიწკუმა ართო არძა ქრისტიანს, ნამდა ბოლოშა შეასრულესკო მუნეფიშ მსახურება (2 ტიმ. 4:5). ჩქი, არძა, მეპჸუნთ პავლეშ რჩევას დო მუთ შემლებნან, ირფელს ვორთუთ ღორონთიშ მსახურებას. მარა მინშა თენა რთულ რე. ბრელ ჩქინ და დო ჯიმას გაბედულება ოსაჭირ, ნამდა ქიქადაგას (2 ტიმ. 4:2). მაგალთო, დეფიქრით თი და დო ჯიმალეფშე, მით ცხოვრენს თიცალ ტერიტორიას, სოდეთ ჩქინ საქმიანობა შეზღუდულ ვარდა ვარიებულ რე. თინეფ მონაწილებას ღებულენა მსახურებას თიშ უმკუჯინუო, ნამდა შილებე თეშ გურშენ თავისუფლება მიოდინუან!

² იეჰოვაშ ხალხის გარზებელ აფჷ შხვადოშხვანერ გურიშ გუმატახალ პრობლემაშა. მაგალთო, ბრელ მანგარო ხანდენს, ნამდა ოჯახიშ აუცილებერ საჭიროებეფს ქიმკაჯინას. თინეფს ოკონა, უმოს გაკეთან მსახურებას, მარა მარაშ ბოლოს თეშო ძალა ვა უღნა. შხვეფს ქრონიკულ ლახალაშ ვარდა ხანიშ გურშენ ვეშულებნა ბრელიშ კეთება; თინეფს შილებე ჸუდეშე ხოლო ვაგმართინედან. რენა თიცალეფ ხოლო, მიდგას უღირსობაშ გრძნობა უღნა. ართ და, მერი, * იჩიებ: „დიდ მონდომა მოსაჭირ, ნამდა ქივეწინააღმდეგე თი უარყოფით გრძნობეფს, ნამუთ ემოციურო მანადგურენს. შედეგო დუდის დამნაშავეთ ბგინაფლენქ, მუშენდა თენა მსახურებაშო საჭირო დროს დო ძალას მიდმამღანს“.

3. მუს გუვარჩიენთ თე სტატიას?

³ მუდგანერ სიტუაციას ვა ვორდათინ, იეჰოვას შეულებ გუმამანგარან, ნამდა ქუგვურზათ სირთულეეფს დო, ნამ შემლებნან თით, გუვაგრძელათ მსახურება. სოიშახ გუვარჩიენდათ, მუჭო შეულებ იეჰოვას ჩქინ მოხვარა, მორთ ქობძირათ, მუჭო გამანგარ თიქ პავლე დო ტიმოთე, ნამდა შეასრულესკო მუნეფიშ მსახურება სირთულეეფიშ უმკუჯინუო.

4. მუ სირთულეეფ უღუდ პავლეს?

⁴ პავლე ბრელ სირთულეს შეხვადუდ. თის ძალა განსაკუთრებულო თიმწკუმა ოსაჭირუდ, მუჟამსით გოლახეს, ჩაქოლეს დო ციხეს ქუდახუნეს (2 კორ. 11:23—25). პავლე არგამათ აღიარენდჷ, ნამდა მინშა უარყოფით ემოციეფშა აფუდ ობრძოლებერ (რომ. 7:18, 19, 24). თეწკუმა ართო, თინა ურზუდ ჯამრთელობაშ თიცალ პრობლემას, ნამუთ „სხეულს ძიგირცალ“ რდჷ დო მანგარო ოკოდ, ღორონთიქ ჩუთხინუკო თინა (2 კორ. 12:7, 8).

5. მუ აკეთ პავლექ სირთულეეფიშ უმკუჯინუო?

⁵ იეჰოვაქ გამანგარ პავლე, ნამდა სირთულეეფიშ უმკუჯინუო გაგრძელკო მსახურება. გუვარჩუათ, მუ აკეთ პავლექ. მაგალთო, მუჟამსით თინა რომს შინაპატიმრობას რდჷ, გურგედვალირო ქადაგენდჷ სახიოლო ამბეს გავლენიან იუდეველეფწკუმა დო შილებე მაღალ თანამდებობაშ კათაწკუმა ხოლო (საქ. 28:17; ფილ. 4:21, 22). თეწკუმა ართო, უქადაგენდჷ პრეტორიულ გვარდიაშ ბრელ ჯარიშკოჩის (საქ. 28:30, 31; ფილ. 1:13). თე პერიოდის პავლე ჭარუნდჷ შთაგონებულ წერილეფს, ნამუთ, მუჭოთ თი დროს, თეშ ამდღა ხოლო, ოხვარ ჭეშმარიტ ქრისტიანეფს. თეს გეძინელ, პავლეშ მაგალითიქ გამანგარ რომიშ კრება, მუდგაშ შედეგო ჯიმალეფ „უშქურანჯუო დო უმოს გაბედულო“ გინოჩანდეს ღორონთიშ სიტყვას (ფილ. 1:14). მართალ რე, პავლეს ოკოდუნ თისხი ვაკეთებედ, მარა მუთ შეულებუდუნ ირფელს ორთუდ დო თექ „სახიოლო ამბეშ გავრცელებას მემსახურ“ (ფილ. 1:12).

6. მუჭოთ 2 კორინთელეფიშ 12:9, 10-ის ჭარჷ, მუქ მეხვარ პავლეს შეასრულკო მუშ მსახურება?

⁶ პავლეს არჩქილედ, ნამდა ირფელ, მუთ იეჰოვაშ მსახურებას აკეთ, მუშ ვარინ, ღორონთიშ ძალათ რდჷ. თის უჩქუდ, ნამდა ღორონთიშ ძალას სრულაშე თიმწკუმა იგინანდჷ, მუჟამსით ძალაგიშალიებურ რდჷ (წეკითხით 2 კორინთელეფიშ 12:9, 10). იეჰოვაქ წმინდა შურიშ საშვალებათ ძალა მეჩჷ პავლეს, ნამდა სრულას შეასრულკო მუშ მსახურება თხოზინიშ, პატიმრობაშ დო შხვა სირთულეეფიშ უმკუჯინუო.

7. მუ სირთულეეფშა აფუდ გარზებელ ტიმოთეს, ნამდა შეასრულკო მუშ მსახურება?

⁷ პავლეშ ახალგაზრდა თანამშრომელ ტიმოთექ ხოლო ოკო მიენდკო ღორონთიშ ძალას, ნამდა გაგრძელკო მსახურება. ტიმოთე პავლეწკუმა ართო რდჷ დიდ მისიონერულ მოგზაურობეფს. თეს გეძინელ, პავლექ გოუტუ თინა, ნამდა ქიძირუკო  კრებეფ დო გურშა ელუკინკო (1 კორ. 4:17). თე საქმეშ ოკეთებელო ტიმოთეს შილებე დუდ შესაფერისო ვემიორჩქუდ. ალბათ, ათეშენ უწუ პავლექ თის: „მითინქ ვა დოიჭყას ჟიშე ჯინა სქან ახალგაზრდობაშ გურშენ“ (1 ტიმ. 4:12). თეს გეძინელ, თიმწკუმა ტიმოთეს ხოლო უღუდ „სხეულს ძიგირ“ — თინა ხშირას ილახანდჷ (1 ტიმ. 5:23). მარა უჩქუდ, ნამდა იეჰოვაშ ძალიერ წმინდა შურ მეჩანდჷ ძალას, ნამუთ ოსაჭირუდ, ნამდა იქადაგკო სახიოლო ამბე დო მემსახურკო ჯიმალეფს (2 ტიმ. 1:7).

8. მუჭო ამანგარენს იეჰოვა მუშ ხალხის ამდღა?

⁸ ამდღა იეჰოვა მუშ ხალხის არზენს ძალას, „ნამუთ ჩვეულებრივშე უმოს რე“, ნამდა თინეფს შეიალებუან ართგურო გაგრძელან ღორონთიშ მსახურება (2 კორ. 4:7). მორთ გუვარჩუათ ოთხ საშვალება, ნამდგათ იეჰოვა მამანგარენა დო მოხვარნა, ვა ვოდინუათ თიშ ართგურობა. თენეფ რე: ლოცვა, ბიბლია, ქრისტიანეფწკუმა ურთიერთობა დო მსახურება.

9. მუჭო შეულებ ლოცვას მიმეხვარან?

⁹ ლოცვაშ საშვალებათ გამანგარებულ. მუჭოთ ეფესოელეფიშ 6:18-ს ჭარჷ, პავლე ელამჩანა, „ირიათო“ იბლოცათ. ღორონთ უპასუხენს ჩქინ ლოცვას დო გუმამანგარენა. ჯონიქ, ნამუთ ბოლივიას ცხოვრენს, მუშ დუდშა გეგმოცად შხვადოშხვანერ განსაცდელიშ დროს იეჰოვაშ მოხვარა. თიშ ოსურ დო მშობლეფქ ართდროულო მანგარო დელახეს. თის სუმხოლოშა აფუდ მიკალუაფარ, მუთ ვა რდჷ ადვილ. სანარღოთ, დიდაქ დოუღურ. დო ოსურს დო მუმას ბრელ დროქ დესაჭირეს, ნამდა გეგშეკეთესკო. ულირს იშინანსინ, ჯონი იჩიებ: „მუჟამსით მანგარ ოწუხებელ მიღუდ, ირიათო მოხვარუდ კონკრეტულ ლოცვა“. იეჰოვაქ მეჩჷ ჯონის გარზებელო საჭირო ძალა. ბოლივიას მახორუ უხუცესიქ, რონალდიქ, გეგჷ, ნამდა მუშ დიდას კიბო ოჭირუდ. თიქ ართ თუთაშა დოღურ. მუქ მეხვარ რონალდის თე რთულ დროს? თინა იჩიებ: „ლოცვა საშვალებას მარზენს იეჰოვას გეგნუფაჩე გურ დო ქივეჩუე, მუს ბგინაფლენქ. მიჩქჷ, ნამდა თის არძაშ უჯგუშო არჩქილე ჩქიმ, თიშე უმოსო ხოლო, ვინემ მა მარჩქილე ჩქიმ დუდიშ“. მინშა შილებე ფიფქრენდათ, ნამდა ვაგმარზინენა პრობლემაშა დო თინა ხოლო ვა მიჩქნა, მუშე იბლოცათ. მარა იეჰოვა მირაგადნა, იბლოცათ თიმწკუმა ხოლო, მუჟამსით რთულ რე ჩქინ ფიქრეფიშ დო გრძნობეფიშ სიტყვეფით გინოჩამა (რომ. 8:26, 27).

10. მუჭოთ ებრაელეფიშ 4:12-შე იძირე, მუშენ რე ბიბლიაშ კითხირ დო თიშე ფიქრ მანგარ მნიშვნელოვან?

¹⁰ ბიბლიაშ საშვალებათ გამანგარებულ. მუჭოთ პავლე რდჷ მენდებულ წმინდა წერილეფშა, ნამდა თევრეშე მიღენდჷ ძალას დო გურიშექექაფას, თეშნერო ჩქი ხოლო შემლებნა თიშა ვორდათ მენდებულ (რომ. 15:4). მუჟამსით ბკითხულენთ ღორონთიშ სიტყვას დო ფიფქრენთ თიშე, იეჰოვას შეულებ მუშ წმინდა შურ გიმირინუას ჩქინ მახვარებელო, ნამდა უჯგუშო ქიგებგათ, მუჭო გიმიბრინუათ წმინდა წერილეფ (წეკითხით ებრაელეფიშ 4:12). ჟიშე მოშინაფილ რონალდი იჩიებ: „მოხიოლ, ნამდა გუვავითარ ირსერს ბიბლიაშ კითხირიშ ჩვევა. ბრელს ფიფქრენქ იეჰოვაშ თვისებეფშე დო თიშე, მუჭო ზრუნენს თინა მუშ მსახურეფშე. თენა მოხვარ ძალაშ დორთინაფას“.

11. მუჭო გამანგარ ბიბლიაქ ართ გურშეჭირებულ და?

¹¹ ღორონთიშ სიტყვაშა დაფიქრებათ შემლებნა სწორ დამოკიდებულება გუვავითარათ ჩქინ მდგომარეობაშ მიმართ. გუვარჩუათ, მუჭო მეხვარ ბიბლიაქ გურშეჭირებულ ქომონჯღურელ ოსურკოჩის. ართ უხუცესიქ თის უწუ, ნამდა ბრელ მუდგარენიშ გურაფა შეულებუდ იობიშ წიგნიშ კითხირით. თიქ წეკითხჷ იობიშ წიგნ დო დუდშე ვემეწონ იობიშ არასწორ აზროვნებაქ.  ფიქრეფით თინა ურაგადუდ იობის: „იობ! ირიათო გლახაშე ვეფიქრა!“. მარა უკულ თე დაქ ქიმეხვად, ნამდა მუშ დამოკიდებულება მანგარო ქოგუდ იობიშის. თექ მეხვარ, მუშ პრობლემეფშე უმოსო იეჰოვა დო თიშ მოჩამილ იმენდშე უფიქრებუდკო, მუდგაქ გამანგარ თინა, ნამდა გიორჯგინკო თი ჭუას, მუთ ქომონჯიშ ღურაქ მოუღ.

12. მუჭო მამანგარენა იეჰოვა თანამორწმუნეეფიშ საშვალებათ?

¹² ქრისტიანეფწკუმა ურთიერთობაშ საშვალებათ გამანგარებულ. ხოლო ართ საშვალება, მუდგათ იეჰოვა ქრისტიანეფს ამანგარენს, თანამორწმუნეეფ რე. პავლექ ჭარჷ, ნამდა ონატრუდ და დო ჯიმალეფწკუმა გურიშემაკინალ ურთიერთობეფ (რომ. 1:11, 12). მერი, ნამუთ ჟიშე მიფშინეთ, მანგარო აფასენს და დო ჯიმალეფწკუმა ურთიერთობას. თინა იჩიებ: „იეჰოვაქ ჩქიმ მახვარებელო თიცალ და დო ჯიმალეფ გიმირინუ, მიდგას შურო ვა უჩქუდ, მუ პრობლემეფ მიღუდ. თინეფ გურიშემაკინალ სიტყვეფს მირაგადდეს ვარდა წერილეფს მიჯღონანდეს დო მა ხოლო ზუსტას თენა მოსაჭირუდ. თენა თის ხოლო მოხვარ, ნამდა გურ გეგნუფაჩე დალეფს, მიდგას ჩქიმცალ პრობლემეფ უღდეს დო ქიდიბგურუე თინეფიშ გამოცდილებაშე. უხუცესეფ ხოლო ირიათო მოგინებაფუანა, ნამდა კრებაშო ძვირფას ვორექ“.

13. მუჭო შემლებნა გუვამანგარათ ართიან კრებაშ შეხვალამეფს?

¹³ ართ-ართ არძაშ უჯგუშ ადგილ, სოდეთ შემლებნა ართიანს გურშა ელვუკინათ, კრებაშ შეხვალამეფ რე. მუჟამსით კრებაშ შეხვალამეფს ოსწრუთ, ჯგირ იჸი, ქუწუათ შხვეფს, ნამდა გიჸორა თინეფ დო აფასენთ თის, მუდგას ორთნა, თეშნერო გამანგარენთ და დო ჯიმალეფს. მაგალთო, ართ უხუცესიქ, სახელო პიტერქ, დას, ნამდგაშ ქომონჯ ვა რე იეჰოვაშ მოწმე, უწუ: „სი ვაიჩქ, მუნერ გურიშემაკინალ რე, თაქ სქან ძირაფა. ამშვხოლო სქუა ირო მოწესრიგებულო მორჸუნს დო კომენტარეფშო ხოლო მომზადებულ გაფჷ“. თე დას თოლქ მარდულობაშ ჩილამურით გეიაფშჷ დო უპასუხ: „ნინათ ვა მარაგადე, მუჭო მოსაჭირუდ ასე თე სიტყვეფიშ მორჩქილაფა“.

14. მუჭო მოქმედენს ჩქინდა მსახურებას მონაწილება?

¹⁴ მსახურებაშ საშვალებათ გამანგარებულ. შხვეფშა ბიბლიურ ჭეშმარიტებაშ გინოჩამა დუდის ჯგირო მოგინებაფუანა, თიშ უმკუჯინუო, ირჩქილუანა დო ვარ თის (იგავ. 11:25). ართ დაქ, სტეისიქ, მუშ დუდშა გეგმოცად, მუჭო შეულებ მსახურებას ძალეფიშ მეჩამა. მუჟამსით თიშ ოჯახიშ წევრიქ გერიცხჷ, თინა დუდის მანგარ გლახათ გინაფლენდჷ დო ფიქრენდჷ: „ეგება უმოსიშ კეთება შემლებუდ თიშ მახვარებელო“. თის ვეშულებუდ შხვა მუთუნშე ქიფიქრკო. მუქ მეხვარ სტეისის თეცალ სიტუაციაშ დროს? მსახურებაქ! ქადაგებაშ დროს თის მთელ ყურადღება მუშ სამქადაგებლო უბანს მახორუ თი ხალხშა გინუღუდ, მიდგას მოხვარა ოსაჭირუდ. სტეისი იჩიებ: „თე პერიოდის იეჰოვაქ ბიბლიაშ მაგურაფალ გამკომრჩქინ, ნამდგაქ ხეთეშე ქიდიჭყჷ თიშ გიმორნაფა, მუდგას გურაფლენდჷ. თექ მანგარო ელამკინ გურშა. მსახურება რე თინა, მუდგაქ არძაშ უმოსო მიმეხვარ“.

15. მუს გურაფლენთ მერიშ სიტყვეფშე?

¹⁵ მუნეფიშ მდგომარეობაშე გამომდინარე, ნამთინე შილებე ფიქრენდას, ნამდა ბრელიშ კეთება ვეშულებ მსახურებას. თქვა ხოლო თაშ ქოფიქრენთ-და, რშუდან, ნამდა იეჰოვას ახარენს, მუჟამსით ნამ შეილებნან, თის ორთუთ. გუვარჩუათ ჟიშე მოშინაფილ მერიშ მაგალით. მუჟამსით თიქ უცხო ნინაშა იჩიებნან ფერ ტერიტორიაშა გინორთჷ, დუდის თეშ გინაფლენდჷ, ითამ ბრელ მუთუნშო ვაგმოდირთუდ. თინა იჩიებ: „მინშა ხვალე თინა შემლებუდ, ნამდა კრებას მარტივ კომენტარ გუვაკეთკო, ბიბლიურ მუხლ წებკითხკო ვარდა მსახურებას ბუკლეტ ქუდვოკინეკო მიდგაინს“. მერი ფიქრენდჷ, ნამდა თე ნინაშა თავისფალო  რაგადანდესინ თინეფწკუმა შედარებით, საჭირო რდუნ თიზმა ვაკეთებედ. მარა თიქ დოთირუ მუშ აზროვნება. მერიქ ქიმეხვად, ნამდა თე ნინა ჯგირო ვა უჩქუდუნ თიშ უმკუჯინუო, იეჰოვას იშენ შეულებუდ თიშ გიმორნაფა. თინა იჩიებ: „სიცოცხლეშ მარსხებელ ჭეშმარიტება, ნამუთ ადამიანეფიშ ცხოვრებას თირანს, რე მარტივ დო ხალხშა თიშ გინაჩამალო ვა რე აუცილებერ, ნინა მანგარ ჯგირო გიჩქუდას“.

16. მუს შეულებ თინეფიშ გამანგარება, მიდგას ჸუდეშე ვეგმართინე?

¹⁶ იეჰოვა ორწყე დო აფასენს ჩქინ სურვილს, მონაწილება მიბღათ მსახურებას, თიმწკუმა ხოლო, მუჟამსით ჸუდეშე ვეგმმართინენა. თის შეულებ მუჩან საშვალება, დუვამოწმათ სამედიცინო პერსონალწკუმა ვარდა ჩქინ მიკმალუაფარეფწკუმა. ასე მუდგას ვორთუთინ თინა, ულირს შემლებდესინ თის ქეშვუდარით-და, შილებე გურქ გომტირხან. მარა, მუჟამსით მარჩქილენა, მუჭო მოხვარნა იეჰოვა ამდღა, ძალა ქუმმაჩამნა, ნამუთ ნებისმიერ განსაცდელიშ ხიოლით გინაღალარო მოსაჭირნა.

17. მუჭოთ ეკლესიასტეშ 11:6-ის ჭარჷ, მუშენ ოკო გუვაგრძელათ მსახურება თიმწკუმა ხოლო, მუჟამსით ხეთეშე ვა ვორწყეთ შედეგის?

¹⁷ ჩქი ჭეშმარიტებაშ თასის ფთასუნთ, მარა ვამჩქუნა, ნამ იკეთენს ჩხვიჩხვის დო ნამ ირდუ (წეკითხით ეკლესიასტეშ 11:6). მაგალთო, 80 წანას გინოჩილათირ და, ბარბარა, რეგულარულო ქადაგენს ტელეფონით დო წერილეფით. თიქ ვა უჩქუდუნ თეშ, ართ-ართ წერილ მიდაჯღონ გარიცხულ წყვილშა. თე წერილს ქუჸუნუ 2014 წანაშ, 1 მარტიშ „გინაჯინალ კოშკი“, ნამდგაშ თემა რე: „მუ აკეთ ღორონთიქ თქვანო?“ [ქორთ.]. თინეფქ ბრელშა წეკითხეს თე ჟურნალ. ქომონჯ დუდის თეშ გინაფლენდჷ, ითამ იეჰოვა პირდაპირ მუს ეჩიებუდ. თე წყვილქ ქიდიჭყჷ კრებაშ შეხვალამეფშა დასწრება დო საბოლათ, 27 წანაშე მეტ ხანიშ უკულ, თინეფქ კინ გინირთეს იეჰოვაშ აქტიურ მსახურეფო. წერმიდგინით, მუჭო ელუკინანდჷ გურს დო მუჭო გამანგარენდჷ ბარბარას თეცალ დადებით შედეგ, მუდგაქ მუშ ართ წერილს მაჸუნ!

18. მუშ კეთება შემლებნა, ნამდა ღორონთიშ ძალაქ ჯგირობუა მომღან?

¹⁸ იეჰოვა ბრელნერ საშვალებას მარზენა, ნამდა მიბღათ თიშ დიდ ძალა. მუჟამსით გიმიბრინუანთ თე საშვალებეფს, მუნერით რე ლოცვა, ბიბლია, ქრისტიანეფწკუმა ურთიერთობა დო მსახურება, ვოძირანთ, ნამდა ბჯერა, თის ოკო ჩქინ მოხვარა დო ქოთ შეულებ თეშ კეთება. მორთ ირიათო მივენდათ ჩქინ ზეციერ მუმას, მიდგას ოკო, „მუშ ძალათ ქიმეხვარას თინეფს, მით მთელ გურით ომსახურ“ (2 მატ. 16:9).