1, 2. მუ თქუ ართ მაჭარალქ დო მუს გუვარჩიენთ თე სტატიას?

ამდღა მილიონობით ადამიან იჩიებ, ნამდა წანს იესოშ, მარა ვემეჸუნს თის, მუთ თიქ ოგურუ (2 ტიმ. 4:3, 4). ართ მაჭარალქ თქუ: «ჩქინ შქას შხვა „იესო“ ქოჸოფედკონ, ნამუთ ნამდვილ იესოცალო იჩიებუდკონ იჸიდ, . . ამდღა ხოლო ვარიას ფთქუანდითო თიშე, მუჭოთ თენა ჟირ ანთას წანაშ წოხოლე ვაკეთით? . . . პასუხ რე, ქო, თაშ იჸუაფუდ».

² პირველ საუკუნეს ბრელქ მირჩქილუ იესოშ გურაფეფ დო ძირჷ თიშ კეთებულ სასწაულეფ, მარა ვერწმუნ თინა. მუ რდჷ თეშ მიზეზ? წოხოლენ სტატიას ჩქი გუვარჩით ოთხ მიზეზ, მუშენ დაბრკოლ ადამიანეფ იესოშ ჩიება დო საქმეეფქ. მორთ ხოლო ოთხ მიზეზ გუვარჩუათ. თეს გეძინელ, ქობძირუნთ, მუშენ ვა ღებულენს ამდღა ხალხ იესოშ მიმაჸუნალეფს დო მუჭო შემლებნა დუდ ავარიდათ დაბრკოლებას.

3. მუს ორთუდ იესო, მუდგაქ ბრელ დაბრკოლ?

³ დედამიწას ცხოვრებაშ დროს იესოს არძანერ ადამიანწკუმა უღუდ ურთიერთობა. თიქ ოჭკუმალ ჭკუმ მდიდარ დო ძალაუფლება უღუდუნ ფერ კოჩწკუმა, მარა, თეწკუმა ართო, ბრელ დროს ატარენდჷ ღარიბ დო დაჩაგრულ ხალხწკუმა. თეს გეძინელ, იესო მიშეშ თინეფიშ მდგომარეობაშა, მიდგას „ცოდვილეფს“ უძახდეს. ნამთინე ამაყ ადამიან დაბრკოლ თიქ, მუდგას იესო ორთუდ, ათეშენ თინეფქ მოწაფეეფს კითხეს: „მუშენ ჭკუმუნთ დო შუნთ მებაჟეეფ დო ცოდვილეფწკუმა ართო?“. იესოქ უპასუხ: „ექიმ ჯამრთელეფს ვარინ, ლეხეფს ოსაჭირ. მა მართალეფიშ ვარინ, ცოდვილეფიშ მახვარებშა მოფრთჷ, ნამდა მინანუან“ (ლუკ. 5:29—32).

4. მუჭოთ წინასწარმეტყველ ესაიაქ თქუ, მუქ ოკო ვა გუკვირდესკო იუდეველეფს მესიაშ გურშენ?

 ⁴ მუს იჩიებ წმინდა წერილეფ? მესიაშ მოულაშე ბრელ ხანით ადრე წინასწარმეტყველ ესაიაქ თქუ, ნამდა თის ქვეყნიერება ვემიღენდჷ. თე წინასწარმეტყველება იჩიებ: „აკიბირაფილ აფდეს დო დუდის ურიდანდეს . . . თიშ სახე ითამ ფორილ რდჷ ჩქინდე. აკიბირაფილ რდჷ დო მუთუნო ვემმორჩქუდეს“ (ეს. 53:3). წინასწარმეტყველებაშ მიხედვით ადამიანეფ დუდის ურიდანდესკონ იჸიდ მესიას, ათეშენ პირველ საუკუნეშ იუდეველეფს ოკო ვა გუკვირდესკო, ნამდა ხალხ იესოს ვემიღენდჷ.

5. მუჭო უჯინე ამდღა ბრელ იესოშ მიმაჸუნალეფს?

⁵ ამდღა ხოლო რენო თეჯგურა პრობლემა? ქო. ბრელ სასულიერო პირ ხიოლით ღებულენს მუშ ეკლესიაშა ფარამ, ქვეყნიერებას ბრძენო მერჩქინელ დო მნიშვნელოვან კათას, თიშ უმკუჯინუო, ნამდა თე ადამიანეფიშ ზნეობრივ ნორმეფ დო ცხოვრებაშ წეს ვემურე ღორონთიშ ნორმეფს. თე სასულიერო პირეფს ჯოგნა იეჰოვაშ დუდგინოდვალირ, ზნეობრივო სუფთა მსახურეფ, მუშენდა თინეფ ვა რენა ქვეყნიერებაშ თოლს მნიშვნელოვან კათა. მუჭოთ პავლექ თქუ, ღორონთიქ „დამცირებულეფ“ გიშეგორ (1 კორ. 1:26—29). მარა იეჰოვაშო მუშ არძა ართგურ მსახურ ძვირფას რე.

6. მუჭო შემლებნა მიღდან იესოცალ დამოკიდებულება, ნამუთ მათეშ 11:25, 26-შე იძირე?

⁶ მუ მიმეხვარებნა, დუდ ავარიდათ დაბრკოლებას? (წეკითხით მათე 11:25, 26). ღორონთიშ ხალხიშ მიმართ ქვეყნიერებაშ თვალსაზრისის ვემეჩათ უფლება, იმოქმედას თქვანდა. რშუდან, ნამდა იეჰოვა მუშ ნებაშ შეიოსრულებერო ხვალე თანდაბალ ადამიანეფს გიმირინუანს (ფსალმ. 138:6). დეფიქრით, მუსხი მუდგარენ უკეთებ თის თიცალ ადამიანეფიშ საშვალებათ, მით ქვეყნიერებაშ თოლს ვა რე ბრძენ დო ჭკვერ.

7. მუშენ დუძახ იესოქ ფარისეველეფს თვალთმაქცეფ დო მუნერ რეაქცია უღდეს თინეფს?

⁷ იესო გაბედულო გედვანდჷ ბრალს რელიგიურ ლიდერეფს, მუშენდა თინეფ ხალხის ვაგურუანდეს, მუჭო ცესკო იეჰოვას სწორაშე თაყვან. მაგალთო, თიქ გეგმაარგამ თი ფარისეველეფიშ თვალთმაქცობა, მიდგას თინა უმოსო ოინტერესდეს, მი, მუჭო იბონუნდჷ ხელეფს, ვინემ თინა, მუჭო ულუანდჷ მშობლეფს (მათ. 15:1—11). იესოშ მოწაფეეფს შილებე უკვენდესკო თიშ სიტყვეფ დო ათეშენ კითხეს: „ქოიჩქუნო, ნამდა სქან ნარაგადიქ ფარისეველეფ დაბრკოლ?“. იესოქ უპასუხ: „არძა ნერგ, ნამუთ ჩქიმ ზეციერ მუმას ვა დურგუაფ, გეშალუ. დუდ დანებით თინეფს, ჸვერე მაჸალეფ რენა. ჸვერე ჸვერეს ქეწოჸუნს-და, ჟირხოლო ნთხორილს ქინანთხუ“ (მათ. 15:12—14). რელიგიურ ლიდერეფიშ უარყოფით რეაქციაშ უმკუჯინუო, იესოს ვემუტებ სიმართლეშ რაგად.

8. მუჭო ოძირუ იესოქ, ნამდა არძა რელიგია ვა რე ღორონთშო მოსაწონ?

⁸ იესოქ ტყურა რელიგიეფიშ გურაფეფ ხოლო გეგმაარგამ. თის ვა უთქუალ, ნამდა არძა რელიგია რდჷ ღორონთშო მოსაწონ. თეშ მანგიორო, თიქ თქუ, ნამდა ბრელ გიაჸუნუდ ფართო შარას, „ნამდგას ღურაშა მეჸუნს კოჩ“ დო ჭიჭე გიაჸუნუდ ჭიფე შარას, ნამუთ სიცოცხლეშა მეურს (მათ. 7:13, 14). იესოქ ენწყჷ, ნამდა, ნამთინე თეშ იძირედკონ იჸიდ, ითამ ღორონთის ომსახურ, მარა სინამდვილეს თაშ ვეჸიდ. თიქ გუმაფრთხილეს: „მუთხილეთ ტყურაწინასწარმეტყველეფს, მით თქვანდა შხურიშ მიკაქუნალით მოულა დო დინახლეშე შქირენულ გერეფცალ რენა. თინეფს მუნეფიშ ნაყოფით გიშეჩინენთ“ (მათ. 7:15—20).

9. ტყურა რელიგიეფიშ ნამ გურაფეფ გიმაარგამ იესოქ?

⁹ მუს იჩიებ წმინდა წერილეფ? ბიბლიაქ იწინასწარმეტყველ, ნამდა მესიას იეჰოვაშ  ჸუდეშ დუდგინოდვალირ მოშურნეობა აღვენუდ (ფსალმ. 69:9; იოან. 2:14—17). თე მოშურნეობაქ აღძრჷ იესო, გეგმაარგამკო ტყურა რელიგიეფიშ გურაფეფ დო საქმეეფ. მაგალთო, მუჟამსით ფარისეველეფს წანდეს, ნამდა კოჩიშ შურ ვა ღურუდ, იესო ოგურუანჷ, ნამდა ღურელეფს ლურა — ვაგრძელენა არსებობას (იოან. 11:11). მუჟამსით სადუკეველეფ იჩიებდეს, ნამდა ღურელეფ ვეგეთელებდეს, იესოქ გათელ მუშ მეგობარ ლაზარე (იოან. 11:43, 44; საქ. 23:8). მუჟამსით ფარისეველეფ ირფელს ბედის დო ღორონთის მიოჭარანდეს, იესო ოგურუანდჷ, ნამდა ადამიანეფს მუნეფიშით შეულებნა გიშეგორან, ემსახურებნა დო ვარ ღორონთის (მათ. 11:28).

10. მუშენ აბრკოლენს ბრელს ჩქინ გურაფეფ?

¹⁰ ამდღა ხოლო რენო თეჯგურა პრობლემა? ქო. ბრელ თიშენ იბრკოლებ, ნამდა ჩქინ ბიბლიაშა გერსხილ გურაფეფ გიმაარგამენს ტყურა რელიგიეფიშ შეხედულებეფს. სასულიერო პირეფ მუნეფიშ მიმაჸუნალეფს ოგურუანა, ნამდა ღორონთ უბადოეფს ჯოჯოხეთის ასაჯენს. თინეფ თე ტყურა გურაფას ხალხიშ ოკონტროლებერო ირინუანა. მარა იეჰოვაშ მსახურეფ, მით ჸოროფაშ ღორონთის ფცენთ თაყვანს, ვოხვარუთ ადამიანეფს, ქიგეგან, ნამდა თენა ტყურა გურაფა რე. სასულიერო პირეფ თის ხოლო ოგურუანა, ითამ კოჩიშ შურ ვა ღურუ. ჩქი ვაცხადენთ, ნამდა თენა არაბიბლიურ გურაფა რე. თაშ ქორდასინ, გათელება საჭირო ვეჸიდ. თეს გეძინელ, ბრელ რელიგია ოგურუანს ბედისწერაშ გურშენ. მარა ჩქი ვოგურუანთ, ნამდა ადამიანს უღჷ ნებაშ თავისუფლება დო შეულებ მუქ გიშეგორას ღორონთიშ მსახურება. მუნერ რეაქცია უღნა რელიგიურ ლიდერეფს, მუჟამსით თინეფიშ ტყურა გურაფეფს გიმვაარგამენთ? ხშირას თინეფ ირისხებნა!

11. მუჭოთ იოანეშ 8:45—47-ის მოჩამილ იესოშ სიტყვეფშე იძირე, მუს ითხინს ღორონთ მუშ ხალხშე?

¹¹ მუ მიმეხვარებნა, დუდ ავარიდათ დაბრკოლებას? ჭეშმარიტება ქომიჸორან-და, ქიმვაჸუნუთ თის, მუდგას ღორონთ იჩიებ (წეკითხით იოანეშ 8:45—47). სატანა ეშმაკშე განსხვავებით, ჩქი მტკიცაშე გივორეთ ჭეშმარიტებას დო დღას ვა ფქიმინუნთ  მუთუნ თიშ საწინააღმდეგოს (იოან. 8:44). ღორონთ ითხინს, ნამდა მუშ ხალხიქ იესოცალო გიჯოგუას უბადობა დო ქიჸოროფუას სიკეთე (რომ. 12:9; ებრ. 1:9).

12. მუშენ რდჷ წამებაშ ძელს იესოშ ღურა ბრელ იუდეველშო დუმაბრკოლებერ?

¹² ხოლო მუ მიზეზით იბრკოლებდეს იუდეველეფ იესოშ დროს? პავლექ თქუ: „ჩქი ძელს მიკოჭკადილ ქრისტეშ გურშენ ფქადაგენთ, მუთ იუდეველეფშო დაბრკოლება რე“ (1 კორ. 1:23). მუშენ რდჷ წამებაშ ძელს იესოშ ღურა იუდეველეფშო დუმაბრკოლებერ? თეშნერ ღურა თინეფშო ნიშნენდჷ, ნამდა იესო დამნაშავე დო ცოდვილ რდჷ დო ვართ ხოლო მესია (კან. 21:22, 23).

13. მუს ვაღიარენდეს თი იუდეველეფ, მიდგაქ იესოშ გურშენ დებრკოლეს?

¹³ თი იუდეველეფ, მიდგაქ დებრკოლეს, ვაღიარენდეს, ნამდა იესო რდჷ უდანაშაულო, თის ტყურა ქეკაწამეს დო უსამართლოთ დასაჯეს. თი პიროვნებეფიშ საქციელ, მიდგაქ იესო გასამართლჷ, მუთუნნერო ვემურდჷ სამართალს. იუდეველეფიშ უზენაეს სასამართლოქ ხეთეშე ეკიშაყარ დო ვართ დოდგინელ კანონეფ გუთვალისწინებ (ლუკ. 22:54; იოან. 18:24). თიშ მანგიორო, ნამდა მოსამართლეეფს იესოშ გურშენ ბრალდებეფ დო მტკიცებულებეფ ქუმურჩქილუაფდესკო, თინეფ „ტყურამოწმეეფს გორუნდეს“, ნამდა იესოშა ღურაშ განაჩენ გეგშუღალდესკო. მუჟამსით თექ ვეგშურთეს, მღვდელმთავარქ ეცად, იესოს თიცალ მუდგარენ ქარაგადაფუკო, მუდგათ შეიალებედეს თიშა ბრალიშ გედვალა. თეცალ საქციელ ირნერო ოწინააღმდეგუდ თიმ დროს მეღებულ კანონეფს (მათ. 26:59; მარ. 14:55—64). თიშ უკულ, მუთ იესოქ გეთელ, თე უსამართლო მოსამართლეეფქ რომაელ ჯარიშკოჩეფს, მით თიშ სამარეს ყარაულენდეს, „ქიანაშ ვარჩხილ მეჩეს“, ნამდა ტყურა გუვრცელებდესკო, თიშ გურშენ, მუშენ რდჷ იესოშ სამარე ცარიელ (მათ. 28:11—15).

14. მუ რდჷ ნაწინასწარმეტყველებ წმინდა წერილეფს მესიაშ ღურაშ გურშენ?

¹⁴ მუს იჩიებ წმინდა წერილეფ? მართალ რე, იესოშ დროს ბრელ იუდეველ ველუდ, ნამდა მესია ოკო დოღურედკო, მარა ქიდეკვირით, მუ რდჷ ნაწინასწარმეტყველებ  წმინდა წერილეფს იესოშ გურშენ: „ღურას გეგნოჩ მუშ სიცოცხლე დო შემცოდველო მირჩქინეს. თიქ ბრელიშ ცოდვა ეჭოფ მუშ დუდშა დო შემცოდველეფიშ შუამავალო გინირთჷ“ (ეს. 53:12). თაშ ნამდა, იუდეველეფს ვა უღდეს მუთუნნერ მიზეზ, დებრკოლესკო, მუჟამსით იესოს ტყურა ეკაწამეს დო დოჸვილეს, მუჭოთ ცოდვილ.

15. იეჰოვაშ მოწმეეფიშ წინააღმდეგ რაგადებულ, ნამ ბრალდებეფქ დაბრკოლ ნამთინე?

¹⁵ ამდღა ხოლო რენო თეჯგურა პრობლემა? მუშო ოკო რაგად, ქო! იესოს უსამართლოთ ქიგედვეს ბრალ დო დამნაშავეთ მირჩქინეს; ამდღა ხოლო ხვადუნა იეჰოვაშ მოწმეეფ თეცალ უსამართლობას. ქობძირათ მუსხირენ მაგალით. 1930—1950 წანეფს ამერიკაშ შეერთებულ შტატეფს ხშირას რდჷ სასამართლო პროცესეფ, ნამდა თავისფალო ქოფცითკო ღორონთის თაყვან. ნამთინე მოსამართლე არგამათ გიმოხანტუნდჷ ჩქინ წინააღმდეგ მუშ გლახა დამოკიდებულებას. კანადას, კვებეკიშ კათოლიკურ ეკლესია დო სახელმწიფო ართო ოცადუდეს, გუჩერებდესკო ჩქინ საქმიანობა. ბრელ მაუწყებელ ხვალე თიშ გურშენ დახუნეს ციხეს, ნამდა შხვეფს უქადაგდეს ღორონთიშ სამეფოშ გურშენ. ნაცისტურ გერმანიას სასტიკ რეჟიმქ ბრელ ართგურ ახალგაზრდა მოწმეშ ღურაშ მიზეზიქ იჸუ. თე ბოლო წანეფს რუსეთის ბრელ ჩქინ ჯიმას ქიგედვეს ბრალ დო ციხეს ქუდახუნუეს ბიბლიაშე მსჯელობაშ გურშენ, მუთ „ექსტრემისტულ საქმიანობათ“ მირჩქინეს. თეს გეძინელ, ვარიებულქ იჸუ რუსულ ნინაშა „ახალ ქიანაშ თარგმანქ“ დო თინა ხოლო „ექსტრემისტულ მასალათ“ მირჩქინეს, მუშენდა იეჰოვაშ სახელს გიმირინუანს.

16. მუჭოთ 1 იოანეშ 4:1-ს ჭარჷ, მუშენ ოკო ვემმოჩილითუან იეჰოვაშ ხალხიშ გურშენ რაგადებულ ტყურეფქ?

¹⁶ მუ მიმეხვარებნა, დუდ ავარიდათ დაბრკოლებას? გეგმირკვით ფაქტეფ. გვალას ქადაგებაშ დროს იესოქ გაფრთხილ მარჩქილეეფ, ნამდა ნამთინე თინეფს „არძანერ უბადობას“ ქეკაწამენდჷ (მათ. 5:11). მუშო ოკო რაგად, თე ტყურეფ სატანაშე მოურს. თინა გიმირინუანს მოწინააღმდეგეეფს, ნამდა ტყურა ქეკაწამან თინეფს, მიდგას ჭეშმარიტება უჸორს (გამოცხ. 12:9, 10). ჩქი ოკო ვევაჸუნათ მოწინააღმდეგეეფიშ რაგადებულ ტყურეფს დო დღას ოკო ვემეფჩათ უფლება, დუმოშქურნუან დო დასუსტან ჩქინ რწმენა (წეკითხით 1 იოანეშ 4:1).

17. მუჭო შილებე დაბრკოლკო ნამთინე იესოშ ღურაშახ მოხვალამირ მოვლენეფქ?

¹⁷ ღურაშახ იესოს მუშ 12 მოწაფეშე ართ-ართიქ უღალატ, შხვაქ სუმშა გეგნივარუ, ნამდა იჩინენდჷ თის დო ღურაშ სერს არძა მოწაფექ მიოტუ (მათ. 26:14—16, 47, 56, 75). მარა იესოს ვა გაკვირებ თენა დო ქოთ იწინასწარმეტყველ, ნამდა თაშ ქუმოხვადუდ (იოან. 6:64; 13:21, 26, 38; 16:32). თეშ მიმაჯინე, ნამთინექ შილებე დებრკოლკო დო თქუკო: „იესოშ მოწაფეეფ თაშ ქიქციებნან-და, მა ვა მოკო თინეფ შქას ვორდე!“.

18. ნამ წინასწარმეტყველებეფქ შისრულ იესოშ ღურაშ სერს?

¹⁸ მუს იჩიებ წმინდა წერილეფ? იესოშ დედამიწაშა მოულაშახ საუკუნეეფით ადრე იეჰოვაქ მუშ სიტყვათ გაცხად, ნამდა მესიას 30 ვარჩხილშა გეგმოჩანდეს (ზაქ. 11:12, 13). იესოშ მოღალატე თიშ ართ-ართ ხოლოშიან მეგობარ იჸუაფუდ (ფსალმ. 41:9). წინასწარმეტყველ ზაქარიაქ ხოლო ჭარჷ: „ქიგიაშქვ ჭყიშის დო აკოცენს შხურ“ (ზაქ. 13:7). თიშ მანგიორო, ნამდა თე მოვლენეფს ჯგირ გურიშ ადამიანეფ დუბრკოლებუდკო, იესოშე შესრულებურ თე წინასწარმეტყველებეფიშ ძირაფას თინეფშა რწმენა ოკო გუმანგარებუდკო.

19. მუ არჩქილე ჯგირ გურიშ კათას?

¹⁹ ამდღა ხოლო რენო თეჯგურა პრობლემა? ქო. ამდღარ დროს ხოლო ნამთინექ ქიდიტუ ჭეშმარიტება, განდგომილო  გინირთჷ დო უკულ შხვეფიშ მეჩილითაფა ხოლო მინდომ. თინეფ ავრცელენა უარყოფით აზრეფს, გვერდო მართალ ისტორიეფს, ნამდა შეცდომაშა გემშეჸუნან ხალხ. თეწკუმა ართო, ინტერნეტით დო საინფორმაციო საშვალებეფით ტყურეფს იჩიებნა იეჰოვაშ მოწმეეფიშ გურშენ. მარა ჯგირ გურიშ კათაქ ვედებრკოლ. თეშ მანგიორო, თინეფს არჩქილენა, ნამდა თეცალ მოვლენეფ მოხვადუდ, მუშენდა თენა ბიბლიას რე ნაწინასწარმეტყველებ (მათ. 24:24; 2 პეტ. 2:18—22).

20. მუ მიმეხვარებნა, ვადმაბრკოლან თინეფქ, მიდგაქ ჭეშმარიტება დიტეს? (2 ტიმოთეშ 4:4, 5).

²⁰ მუ მიმეხვარებნა, დუდ ავარიდათ დაბრკოლებას? საჭირო რე, ვემვოდინუათ მტკიცე რწმენა რეგურალურო გურაფათ, ირიათო ლოცვათ დო თი საქმეს მონაწილებათ, მუდგაშ კეთება იეჰოვაქ დუმავალეს (წეკითხით 2 ტიმოთეშ 4:4, 5). რწმენას გუვავითარენთ-და, პანიკას ვენობლუთ, მუჟამსით იეჰოვაშ მოწმეეფიშ გურშენ უარყოფით აზრეფს ქიმიფრჩქილუანთ (ეს. 28:16). ჸოროფა, ნამუთ იეჰოვაშ მიმართ მიღნა, თიშ სიტყვა დო ჩქინ და დო ჯიმალეფ ქიმმეხვარებნა, ვადმაბრკოლან თინეფქ, მიდგაქ ჭეშმარიტება დიტეს.

21. თიშ უმკუჯინუო, ნამდა ადამიანეფიშ უმენტაშ ვა ღებულენს ჩქინ ცნობას, მუშა შემლებნა ვორდათ დარწმუნებულ?

²¹ პირველ საუკუნეს ბრელქ დებრკოლ დო ვემიღ იესო. მარა ბრელ რდჷ თიცალ, მიდგას თაშ ვა მუქციებინ. მაგალთო, თინეფ შქას რდეს სინედრიონიშ ართ-ართ წევრ დო ბრელ მღვდელ (საქ. 6:7; მათ. 27:57—60; მარ. 15:43). ამდღა ხოლო, მილიონეფქ ვედებრკოლეს, მუშენდა თინეფს უჩქნა დო უჸორა წმინდა წერილეფს მოჩამილ ჭეშმარიტება. ღორონთიშ სიტყვა იჩიებ: „მშვიდობა ვა მაკორდუნა სქან კანონიშ მოჸოროფეეფს, მუთუნ ვა დაბრკოლენს თინეფს“ (ფსალმ. 119:165).