1, 2. ა) მუშენ ოკო ონდუდან ახალდაქორწინებულეფ იეჰოვას? (ფსალმ. 37:3, 4) ბ) მუს გუვარჩიენთ თე სტატიას?

დაქორწინება ქოილამნა ვარდა ახალდაქორწინებულ ქორეთ-და, მუშო ოკო რაგად, გოკოდან იჸი, ბედნერო იცხოვრათ საჸოროფო ადამიანწკუმა ართო, მარა ქორწინებას მუშ სირთულეეფ მოჸუნს დო მნიშვნელოვან გადაწყვეტილებეფ რე მიოღებელ. სირთულეეფიშ დო გადაწყვეტილებეფიშ მეღებაშ დროს მუჭო მიქციებუთინ, თიშა რე დამოკიდებულ, ქიჸუაფუთ დო ვარ ბედნერ წანეფიშ დინახლე. იეჰოვას ქიმიენდებუთ-და, გონივრულ გადაწყვეტილებეფს მიღენთ, შედეგო თქვან ქორწინება უმოს მტკიცე დო ბედნერ იჸუაფ. მარა ღორონთიშ რჩევეფს ვემიაჸუნუთ-და, შილებე ქეშეხვადათ პრობლემეფს, ნამუთ ქორწინებას მონკა ოღალო გინოიშქვანა დო ბედნერობას მიდაიღანა (წეკითხით ფსალმუნიშ 37:3, 4).

² მართალ რე, თე სტატია ახალდაქორწინებულეფშო რე, მარა თაქ გარჩიებულ სირთულეეფიშ წოხოლე შილებე არძა დაქორწინებულ წყვილქ ქიგედირთას. ჩქი ქობძირუნთ, მუშ გურაფა შემლებნა ბიბლიას მოჩამილ ნამთინე ართგურ პიროვნებაშ დო, თეს გეძინელ, თანამედროვე წყვილეფიშ მაგალითეფშე.

3, 4. მუ სირთულეეფიშ წოხოლე შილებე გედირთან ახალდაქორწინებულეფქ?

³ ნამთინექ შილებე ახალდაქორწინებულეფს ელუჩას, თეშ იცხოვრან, მუჭოთ უმენტაშ ცხოვრენს. მაგალთო,  მშობლეფქ ვარდა შხვა ნათესეეფქ შილებე აუჩემან, ხეთეშე გეიორჩქინან სქუალეფ; ვარდა ჯგირ ოკონ თი მეგობრეფ დო ოჯახიშ წევრეფ ურაგადდან, ნამდა ქიჸიდან ახალ ჸუდე დო მუთ შილებე კომფორტულო გეგმანწყუან თინა.

⁴ ფრთხილას ვეჸუაფუნ-და, წყვილქ შილებე თიცალ გადაწყვეტილება მიღას, ნამუთ მანგარ ვალს ქინაჸათანდჷ; უკულ შილებე ჟირხოლოს ბრელქ აჸუას ოხანდებელქ თე ვალიშ ოსურებელო. თეცალ სამუშაქ შილებე თინეფს დრო მიდუღას ბიბლიაშ პირად გურაფაშო, ოჯახურ თაყვანიშცემაშო დო მსახურებაშო. მეტ ფარა ქიშუან ვარდა სამუშა ვადინუანინ თიშენ, თინეფს შილებე ჩვეულებრივშე მეტ დროქ აჸუან დათმებელქ მუშობაშა; მარა თეცალ დროს ოდინუანა ძვირფას შესაძლებლობას, ნამდა მეტ გაკეთან იეჰოვაშ მსახურებაშო.

5. მუს ბგურაფლენთ კლაუსი დო მარისაშ მაგალითშე?

⁵ გამოცდილება ოძირანს, ნამდა მთელ ყურადღებაშ მატერიალურშა გინოღალას ვა მოუღ ბედნერობა. გუვარჩუათ ართ წყვილიშ, კლაუსი დო მარისაშ, შემთხვევა. * მუჟამსით დექორწინეს, თინეფ სრულ განაკვეთის მუშენდეს დო კომფორტულ ცხოვრება უღდეს, მარა შინაგან კმაყოფილებას იშენით ვა გინაფლენდეს. კლაუსი იჩიებ: „ჩქი მატერიალურო თიშე ბრელით უმოს მიღდეს, ვინემ მოსაჭირდეს, მარა ვამღუდეს სულიერ მიზნეფ. სიმართლე ქოიწუათინ, ჩქინ ცხოვრება რთულ დო სტრესულ რდჷ“. შილებე თქვა ხოლო გინაფლენდათ, ნამდა მატერიალურშა ყურადღებაშ გინოღალას ვა მოუღ ნამდვილ კმაყოფილება, მარა თექ გურ ვა გოიტახან. შხვეფიშ ჯგირ მაგალითეფშა დაფიქრებას შეულებ თქვან მოხვარა. მორთ პირველ რიგის გუვარჩუათ, მუშ გურაფა შეულებნა ქომონჯეფს მეფე იეჰოშაფატიშ მაგალითშე.

6. მუჭო გიმირინუ იეჰოშაფატიქ იგავეფიშ 3:5, 6-ის ენოჭარილ პრინციპ, მუჟამსით სერიოზულ პრობლემაშ წოხოლე ქიგედირთჷ?

⁶ ქომონჯეფს შილებე მინშა უჭირდან მუნეფიშ პასუხიშმგებლობაშ შესრულება. თეცალ დროს თინეფს მეფე იეჰოშაფატიშ მაგალით მეხვარებ. მეფე იეჰოშაფატიქ მთელ ერიშ ჯგირობუაშე ოკო იზრუნკო. თინა მუთ შეულებუდუნ ირფელს ორთუდ მუშ ხალხიშ დაცვებელო. თიქ გამანგარ იუდაშ ქალაქეფ დო 1 160 000-შე მეტ ჯარიშკოჩ ჸუნდჷ (2 მატ. 17:12—19). ჭიჭე ხანშა იეჰოშაფატიქ სერიოზულ პრობლემაშ წოხოლე ქიგედირთჷ. ამონელეფიშ, მოაბელეფიშ დო სეირიშ გვალამხარეს მახორუ ხალხიშ ჯარეფქ დიშაყარ თიშ წინააღმდეგ. შედეგო საფრთხეშ თუდო ქიგედირთჷ იეჰოშაფატიშ ოჯახიქ დო თიშ ხალხიქ (2 მატ. 20:1, 2). მუ აკეთ იეჰოშაფატიქ? თის იეჰოვაშ მოხვარაშ დო ძალაშ იმენდ უღუდ დო ზუსტას თეშ მიქცუ, მუჭოთ იგავეფიშ 3:5, 6-ის ენოჭარ (წეკითხით). 2 მატიანეშ 20:5—12-ს მოჩამილ იეჰოშაფატიშ ლოცვაშე იძირე, მუზმათ ონდუდ თინა მუშ მოჸოროფე ზეციერ მუმას. მუჭო უპასუხ იეჰოვაქ თიშ ლოცვას?

7. მუჭო უპასუხ იეჰოვაქ იეჰოშაფატიშ ლოცვას?

 ⁷ იეჰოვაქ იეჰოშაფატის ლევიან იახაზიელიშ საშვალებათ დურაგადუ დო უწუ: „გიშელით, ქიგედირთით დო ქოძირით, მუჭო გირსხენა იეჰოვა“ (2 მატ. 20:13—17). ბრძოლაშ თე მეთოდ ვეძირედ გონივრულო, მარა თენა ადამიანიშ ვარინ, იეჰოვაშ აზრ რდჷ. იეჰოშაფატიქ ქუდაჸუნ თე მითითებეფს, მუშენდა ბოლოშა ონდუდ მუშ ღორონთის. მუჟამსით თიქ მუშ ხალხწკუმა ართო ნტერეფიშ შეიოხვალამშა მიდართჷ, წოხოლე გამოცდილ ჯარიშკოჩეფ ვარინ, მუთუნნერ იარაღ ვა უკინებდესინ ფერ მაბირეეფ ქიგიორინუ. იეჰოვაქ შეასრულ მუშ დუნაპირებ დო განადგურ ნტერიშ ჯარ (2 მატ. 20:18—23).

8. მუს გურაფლენა ქომონჯეფ იეჰოშაფატიშ მაგალითშე?

⁸ ქომონჯეფ, თქვა შეილებნა ბრელ მუთუნ დიგურუათ იეჰოშაფატიშ მაგალითშე. თქვან პასუხიშმგებლობა რე, ქიზრუნათ თქვან ოჯახშე დო ქოთ ბრელს ხანდენთ თეშო. მუჟამსით პრობლემეფიშ წოხოლე გედირთუთ, შილებე ფიქრენდათ, ნამდა თქვანით ხოლო შეილებნა თიშ მოგვარება, მარა ხვალე თქვან შესაძლებლობეფს ვენდათ. თეშ მანგიორო, ქოთ პირადო დო ქოთ მეუღლეწკუმა ართო გულწრფელო ქოთხით იეჰოვას მოხვარა, დოგორით იეჰოვაშ ხემძღვანელობა ბიბლიაშ დო ბიბლიაშა გერსხილ პუბლიკაციეფიშ გიმორკვიებათ დო ქიმიაჸუნით თექ მოჩამილ რჩევეფს. შხვეფს შილებე ვემეწონან ბიბლიაშა გერსხილ თქვან გადაწყვეტილებეფქ დო გიწუან, ნამდა ჩირთუთ დო ფარას არძაშ უჯგუშო შეულებ თქვან ოჯახიშ თხილუა. მარა რშუდან, იეჰოშაფატი ონდუდ იეჰოვას დო თეს მუშ საქმეეფით ამტკიცენდჷ. იეჰოვას ვემუტებ თე ართგურ პიროვნება დო ვართ თქვა მიგოტენა (ფსალმ. 37:28; ებრ. 13:5). ხოლო მუ მეხვარებ წყვილს, ნამდა ბედნერ ქორწინება უღდას?

9. მუშ რაგად შემლებნა წინასწარმეტყველ ესაია დო თიშ მეუღლეშ გურშენ?

⁹ ესაია დო თიშ მეუღლეშო იეჰოვაშ მსახურება არძაშ უმოს მნიშვნელოვან რდჷ. ესაია წინასწარმეტყველო მსახურენდჷ დო შილებე თიშ ოსურს ხოლო თეცალ დავალება უღუდკო, მუშენდა ბიბლიას თინა ხოლო წინასწარმეტყველო რე მოშინაფილ (ეს. 8:1—4). თინეფ ართო ომსახურდეს იეჰოვას. მუ ჯგირ მაგალით რე თენა დაქორწინებულ წყვილეფშო!

10. მუჭო ოხვარ ბიბლიურ წინასწარმეტყველებეფიშ გიმორკვიება წყვილეფს, მეტ გაკეთან იეჰოვაშო?

¹⁰ დაქორწინებულ წყვილეფს შეულებნა მონდომა ვა დარკან, ნამდა ირფელ გაკეთან იეჰოვაშ მსახურებას დო თეშნერო არძაშ უმოს მნიშვნელოვანო გინაშქვან თინა მუნეფიშ ცხოვრებას. წყვილეფს შეულებნა გამანგარან მუნეფიშ მენდება იეჰოვაშ მიმართ თით, ნამდა გეგმირკვიან ბიბლიურ წინასწარმეტყველებეფ დო თინეფიშ შესრულება * (ტიტ. 1:2). თეს გეძინელ, შეულებნა დეფიქრან, მუჭო მიღან მონაწილება თე ბიბლიურ წინასწარმეტყველებეფიშ შესრულებას. მაგალთო, იესოშ წინასწარმეტყველებაშ შესრულებას, ნამუთ მთელ მსოფლიოს სახიოლო ამბეშ ქადაგებას ოხუ (მათ. 24:14). მუთ უმოსო დერწმუნებნა წყვილეფ, ნამდა ბიბლიურ წინასწარმეტყველებეფ ისრულებ, თით უმოს მტკიცაშე გეგნოჭყვიდნა, მეტ გაკეთან იეჰოვაშ მსახურებას.

11. მუშ კეთებაქ შეიალებუეს პრისკილა დო აკვილას დო მუშენ?

¹¹ ახალგაზრდა წყვილეფს შეულებნა რომს მახორუ იუდეველ ჩილ დო ქომონჯშე, პრისკილა დო აკვილაშე, ბრელ მუდგარენ დიგურუან. თინეფქ მირჩქილუეს იესოშ გურშენ სახიოლო ამბე დო გინირთეს ქრისტიანეფო. მუშო ოკო რაგად, თინეფ კმაყოფილ იჸუაფდეს მუნეფიშ ცხოვრებათ, მარა ველდესინ თეშ სიტუაციაქ დითირ. იმპერატორ კლავდიუსიქ ზოჯჷ, ნამდა არძა იუდეველს ქუდუტებუდკო რომი. აკვილა დო პრისკილაშო თენა ნიშნენდჷ, ნამდა დატებელ აჸიდეს გარემო, ნამდგას მერჩქვანელ რდეს დო ოშიბელ აჸიდეს ახალ ჸუდე დო ახალ სამუშა შხვა ადგილს. მეჩესო თინეფქ საშვალება სიტუაციაშ თეშნერო თირუას, ნამდა სამეფოშ ინტერესეფქ თინეფიშ ცხოვრებას მაჟიახარისხოვანო გინირთკო? ვარ, თინეფს ირიათო პირველ ადგილშა გეურდეს სამეფოშ ინტერესეფ. ათეშენ კორინთის, სოდეთ გინიხორეს, დეკავშირეს ადგილობრივ კრებას დო მოციქულ პავლეწკუმა ართო ხანდენდეს, ნამდა გამანგარესკო და დო ჯიმალეფ. უმოს გვიანო თინეფქ გინილეს შხვა ქალაქეფშა, სოდეთ მაქადაგებელეფიშ საჭიროება რდჷ (საქ. 18:18—21; რომ. 16:3—5). მუნერ ხიოლით დო აზრით ეფშა ცხოვრება აღვენუდ თე წყვილს!

12. მუშენ ოკო უღდან დაქორწინებულ წყვილეფს სულიერ მიზნეფ?

¹² ამდღა ხოლო წყვილეფს შეულებნა მიაჸუნან პრისკილა დო აკვილაშ მაგალითის დო სამეფოშ ინტერესეფ მუნეფიშ ცხოვრებას პირველ ადგილს ქიგიორინუან. მიზნეფიშ გურშენ ოჩიებელო არძაშ უჯგუშ დრო დაქორწინებაშახ რე. მუჟამსით წყვილეფ ართო ღებულენა გადაწყვეტილებეფს დო ოცადნა, ქიმიოჭირინუან საერთო სულიერ მიზნეფს, უმოს მეტ შესაძლებლობა უღნა, იეჰოვაშ ხე ქოძირან მუნეფიშ ცხოვრებას (ეკლ. 4:9, 12). გუვარჩუათ ართ წყვილიშ რასელი დო ელიზაბეტიშ შემთხვევა. რასელი იჩიებ: „ქორწინებაშახ კონკრეტულო ქიფჩით ჩქინ სულიერ მიზნეფშენ“. ელიზაბეტი გეუძინანს: „თეშ გურშენ წინასწარ ჩიებაქ მიმეხვარეს, ჩქინ სულიერ მიზნეფშა ვა უცილებუდკო თი გადაწყვეტილებეფს,  ნამუთ დაქორწინებაშ უკულ მიბღით“. მუნეფიშ მდგომარეობაქ თინეფს ქიმეჩ საშვალება, მიკრონეზიაშა გინულებდესკო, სოდეთ მაქადაგებელეფიშ საჭიროება რდჷ.

13. მუჭოთ ფსალმუნიშ 28:7-შე იძირე, მუ შედეგ მოჸუნს იეჰოვაშა მენდებას?

¹³ რასელი დო ელიზაბეტცალო, ბრელ წყვილქ გინოჭყვიდ, ნამდა მუთ შეულებდესინ მეტ დრო დუთმესკო ქადაგება დო გურაფაშ საქმეს დო შხვა ვალდებულებეფშე თავისფალ ჸოფედესკო. მუჟამსით წყვილეფს აღვენუნა მიზნეფ იეჰოვაშ მსახურებას დო ართო ქეცადებნა თინეფიშ მეჭირნაფას, შედეგეფ ბრელით უჯგუშ იჸუაფ. თინეფ ქოძირნა იეჰოვაშ ზრუნვას, უმოსო ონდუდან იჸი თის დო ნამდვილ ბედნერობას ქიგინანა (წეკითხით ფსალმუნიშ 28:7).

14. მუჭო ოძირეს პეტრე დო მუშ მეუღლექ, ნამდა ონდუდეს მათეშ 6:25, 31—34-ის მოჩამილ დუნაპირებუს?

¹⁴ დაქორწინებულ წყვილეფს პეტრე დო თიშ მეუღლეშე ხოლო შეულებნა დიგურუან. იესოწკუმა პირველ შეხვალამაშე სოდგარენ ამშვ თუთაშე ართ წანაშახ რდჷ მიკულირ, მუჟამსით პეტრეს მნიშვნელოვან გადაწყვეტილება აფუდ მიოღებელ. პეტრე ჩხომენდჷ, ნამდა გეიჯუმუკო ოჯახ. თაშ ნამდა, მუჟამსით იესოქ თის უწუ, მუშა ქეკუჸუნალუდკონ, პეტრეს ოფიქრებელ აფუდ მუშ ოჯახიშ სიტუაციაშე (ლუკ. 5:1—11). თიქ გინოჭყვიდ, ნამდა იესოწკუმა ართო უქადაგებუდკო. თენა გონივრულ გადაწყვეტილება რდჷ. ჩქი მიღნა მიზეზეფ, მუდგაშ გურშენ შემლებნა ბჯერდან, ნამდა პეტრეშ გადაწყვეტილებას მუშ მეუღლე ხოლო უკინენდჷ ხუჯის. ბიბლიაშე იძირე, ნამდა იესოშ გათელებაშ უკულ პეტრეწკუმა ართო მუშ ოსურ ხოლო გილეშ მსახურებაშა (1 კორ. 9:5). მუშო ოკო რაგად, თიშ, მუჭოთ ქრისტიან ოსურიშ ჯგირ მაგალითიქ პეტრეს მეჩჷ საშვალება, თავისფალო ქიმუჩამუდკო ღორონთშე შთაგონებულ რჩევა ქრისტიან ქომონჯეფ დო ოსურეფშა (1 პეტ. 3:1—7). არგამა რე, ქოთ პეტრე დო ქოთ თიშ მეუღლე ონდუდეს იეჰოვაშ დუნაპირებუს, ნამდა სამეფოშ ინტერესეფს პირველ ადგილს ქიგიორინუანდეს-და, ღორონთ ქიზრუნენდჷ თინეფშე (წეკითხით მათეშ 6:25, 31—34).

15. მუშ გურაფა შემლებნა ტიაგუ დო ესთერიშ მაგალითშე?

¹⁵ შილებე წანეფ რე, მუთ დაქორწინებულ რეთ. მუჭო შეილებნა თქვა ხოლო მეტ გაკეთათ იეჰოვაშო? ართ-ართ მხარე შხვა წყვილეფიშ გამოცდილებაშა დაკვირება რე. მაგალთო, თქვა შეილებნა წეკითხათ სტატიეფიშ სერია: „თინეფქ მზადყოფნა გეგმირჩქინეს“. თეცალ სტატიეფქ მეხვარ ბრაზილიელ წყვილს, ტიაგუ დო ესთერს, გეგნოჭყვიდესკო თექ მსახურება, სოდეთ მაქადაგებელეფიშ საჭიროება რე. ტიაგუ იჩიებ: „მუჟამსით წებკითხით თიშ გურშენ, მუჭო მეხვარ იეჰოვაქ მუშ თანამედროვე მსახურეფს, ჩქი ხოლო გომრჩქინდეს სურვილქ, ქიბგინითკო იეჰოვაშ ხემძღვანელობა დო მზრუნველობა“. საბოლათ, თინეფქ პარაგვაიშა გინილეს დო 2014 წანაშე მსახურენა პორტუგალიურ ნინაშა მორაგადე ხალხწკუმა. ესთერი იჩიებ: „ჩქი ჟირხოლოს მანგარო მიჸორა ეფესოელეფიშ 3:20, ნამდგაშ ჭეშმარიტებაშა ბრელშა დებრწმუნით“. ეფესოელეფშა მეჭარილ თე წერილს პავლე პირობას ირზენს, ნამდა იეჰოვა თიშე უმოსის ქომჩანა, ვინემ ფთხულენთ. თენა მართალო თაშ რე!

16. მის შილებე რჩევა ელაკითხუან ახალდაქორწინებულეფქ, მუჟამსით ფიქრენა, ნამდა თინეფიშ მიზნეფს გინოჯინა ოსაჭირ?

¹⁶ ახალდაქორწინებულ წყვილეფს შეულებნა დიგურუან თინეფიშ გამოცდილებაშე,  მიდგაქ გავითარ იეჰოვაშ მიმართ ნდობა. ნამთინე წყვილ ვითობით წანა რე, მუთ სრულ დროთ მსახურენს; ქელაკითხეთ თინეფს რჩევა, მუჟამსით ფიქრენთ, ნამდა თქვან მიზნეფს გინოჯინა ოსაჭირ. თენა ხოლო ართ საშვალება რე თიშ ოძირაფალო, ნამდა ონდუთ იეჰოვას (იგავ. 22:17, 19). უხუცესეფს ხოლო შეულებნა მეხვარან ახალდაქორწინებულ წყვილეფს, ნამდა უღდან სულიერ მიზნეფ დო ქიმიოჭირინუან თინეფს.

17. მუქ მოხვად კლაუსი დო მარისაშ შემთხვევას დო მუს ბგურაფლენთ თინეფიშ გამოცდილებაშე?

¹⁷ მინშა შილებე გინოჭყვიდილ მაფდან, უმოს გუვაკეთათ მსახურებაშ კონკრეტულ სფეროს, მარა იეჰოვას შხვა სფეროს ულამდას ჩქინ გიმორნაფა. ყურადღება ქიმიაქცით დაჭყაფუს მოშინაფილ კლაუსი დო მარისაშ მაგალითის. ქორწინებაშე სუმ წანაშ უკულ თინეფქ შორშა მიდართეს, ნამდა ფინეთიშ ფილიალს სამშენებლო საქმეს მიღესკო მონაწილება. მარა მალას ქიგეგეს, ნამდა ამშვ თუთაშა მიოტებელ აჸიდეს მსახურებაშ თე სფერო. დუდშე თინეფს გურქ გუტირხეს, მარა თეშ უკულ ხეთეშე მიწვიეს არაბულ ნინაშ ოგურაფშა დო ასე ხიოლით მსახურენა არაბულ ტერიტორიას, შხვა ქიანას. მარისა იჩიებ: „მოშქურუდ თიცალ მუდგარენიშ კეთებაშა, მუთ თეიშახ დღას ვა მაფუდ ნაკეთებ დო მოსაჭირუდ, სრულას მივენდიკო იეჰოვას. მარა, მუჭოთ ბძირინ, იეჰოვა ირიათო მოხვარდეს შურო ვეველუდითინ ფერ საშვალებეფით. გამოცდილებაქ იეჰოვაშ მიმართ ჩქინ მენდება ხოლო უმოსო გამანგარ“. მუჭოთ თე მაგალითშე ვორწყეთ, შეილებნა დარწმუნებულ რდათ, ნამდა იეჰოვა დუგაჯილდოვენა, მუჟამსით სრულას მიენდებუთ თის.

18. მუ ოკო აკეთან დაქორწინებულ წყვილეფქ, ნამდა ვადინუან იეჰოვაშ ნდობა?

¹⁸ ქორწინება საჩუქარ რე იეჰოვაშე (მათ. 19:5, 6). თის ოკო, დაქორწინებულ წყვილეფქ გეხარან თე საჩუქარით (იგავ. 5:18). ახალდაქორწინებულეფ, ჯგირო ქიგნაჯინით თქვან ცხოვრებას. ირფელს ქართუთო, ნამდა ქაძირათ იეჰოვას, მუსხით აფასენთ თე საჩუქარს? ლოცვათ ქუდურაგადეთ იეჰოვას, დოგორით თიშ სიტყვაშე პრინციპეფ, ნამუთ თქვან სიტუაციას მეურე დო გეგმირინეთ რჩევა, ნამდგას იეჰოვა გარზენა. თქვა შეილებნა დარწმუნებულ რდათ, ნამდა გაღვენუნა ბედნერ ცხოვრება დო მიღენთ ჯილდოს, მუჟამსით მთელ ყურადღებას იეჰოვაშ მსახურებაშა გეგნიღანთ.