მა ნიდერლანდებს 1948 წანას დებაბდჷ. უკულიან წანას ჩქინ ოჯახიქ სან-პაულუშა, ბრაზილიაშა, გინილ ოცხოვრებშა. ჩქიმ მშობლეფ ირიათო გილეშეს ეკლესიაშა დო ირ ონჯუას მთელ ოჯახ ბკითხულენდით ბიბლიას. 1959 წანას შეერთებულ შტატეფს, მასაჩუსეტსის, ქიდიფხორით.

ჩქიმ მუმა ბრელს ხანდენდჷ, ნამდა გეიჯუმუკო ოჯახ, სოდეთ ბრუო შურ ვორდით. თიქ მუსხირენშა დიჭყჷ მუდგარენეფიშ გიმოჩამა შხვადოშხვა ადგილშა გილეშუნ თეშ. თეს გეძინელ, მუშენდჷ შარეფიშ კეთებას დო საერთაშორისო ავიაკომპანიას. მთელ ოჯახის მანგარო მახიოლეს, მუჟამსით თიქ ავიაკომპანიას დიჭყჷ მუშობა, მუშენდა ხშირას მაჸიდეს შხვადოშხვა ადგილშა გილაულარ.

მაღალ კლასეფს ქიმვოჭირნენ, ფიფქრენდჷ: „მუს ფქიმინუნქ სკოლაშ თებაშ უკულ?“. ნამთინე ჩქიმ მეგობარ ისხუნუანდჷ უნივერსიტეტის გურაფას, შხვეფ — ჯარშა ულას. ჯარშა მუთუნით ვეფშჷ, მუშენდა დღას ვა მობწონდჷ ჩხუპ. ჯარს დუდ ეუჩილითეკონ თიშენ უნივერსიტეტის ქიდიბჭყჷ გურაფა. მარა შხვეფიშ მოხვარა უმოსო მოკოდ, მუშენდა ფიფქრენდჷ, ნამდა თენა ჩქიმ ცხოვრებას აზრის ქიმეჩანდჷ.

უნივერსიტეტის ანთროპოლოგიაქ დემეინტერეს. თევრეშე მოჸუნაფილ ვოცადუდ, მეტ ქიგებგიკო სიცოცხლეშ გორჩქინაშ გურშენ. ჩქი ევოლუციას მოგურუანდეს დო მიორჩქუდეს, ნამდა თის ქიდებჯერენდით. მარა თინეფიშ ნამთინე ენწყუმა არალოგიკურ რდჷ დო ჩქინდე ითხინდჷ, ნამდა მტკიცებულებეფიშ უმშო ქუდამჯერებდესკო.

თექ ჩქი მითინ ვა მოგურუანდეს ზნეობრივ ფასეულობეფს. თეშ მანგიორო, მოგურუანდეს, ირფელშა მიდაფრთითკო უნივერსიტეტის წარმატებაშ მიოჭირნაფალო. წვეულებეფშა გილულაქ დო ნარკოტიკეფიშ გამორსებაქ დუდ ითამ ბედნერო მოგინაფუ, მარა თენა ბრელ ხანს ვა გაგრძელებე. ფიფქრენდჷ, „მართალო თენა რენო ცხოვრებაშ აზრ?“.

თე პერიოდის ქალაქ ბოსტონშა გინიბლჷ დო თექიან უნივერსიტეტის ქიდიბჭყჷ გურაფა. გურაფაშ ფარაშ ოგაფალო ზაფხულიშ არდადეგეფიშ დროს მუფშენდჷ. ზუსტას თე დროს შეფხვად პირველო იეჰოვაშ მოწმეს. თინა რდჷ ჩქიმ თანამშრომელ. თიქ დანიელიშ მანთხა დუდის ნაწინასწარმეტყველებ „შქვით დროშ“ გურშენ მეჩუ დო ემინწყჷ, ნამდა ბოლო დღალეფს ფცხოვრენთჷ (დან. 4:13—17). ხეთეშე ქიმეფხვად, ნამდა თეცალ ჩიებეფს გუვაგრძელენდჷ დო სერიოზულო მიბღენდჷ-და, ცხოვრებაშ წეს მაჸიდ ოთირალ, ათეშენ ირნერო ურიდანდჷ დუდის თე თანამშრომელს.

უნივერსიტეტის მიკოფრთჷ კურსეფ, ნამდგაქ მუმამზად, ნამდა სამხრეთ ამერიკას მოხალისეთ ქომმსახურებუდკო. ფიფქრენდჷ, ნამდა შხვეფიშ მოხვარა ჩქიმ ცხოვრებას აზრის ქიმეჩანდჷ, მარა თენა თაშ ვა მოხვალამე. ათეშენ გურქ გომტირხჷ დო სემესტრიშ ბოლოს უნივერსიტეტის გურაფა მივოტე.

1970 წანას გეგნოფრთჷ ამსტერდამშა დო თი ავიაკომპანიას ქიდიბჭყჷ მუშობა, სოდეთ ჩქიმ მუმა მუშენდჷ. თე სამუშა საშვალებას მარზენდჷ აფრიკაშ, ამერიკაშ, ევროპაშ დო აზიაშ შხვადოშხვა ქიანაშა მიდაფრთკო. მალას ქიმეფხვად, ნამდა ნამდგა ქიანაშა ვენოფრთიკონ, ირდიხას ბრელ პრობლემა უღდეს დო საშველ ხოლო ვეძირედ. მოკოდ, ჩქიმ ცხოვრებას მუდგარენ მნიშვნელოვან გამკეთებუდკო, ათეშენ გეგნობჭყვიდ, დიფრთიკო შეერთებულ შტატეფშა დო კინ ბოსტონიშ უნივერსიტეტის გუვაგრძელკო გურაფა.

მარა მალას ქიმეფხვადჷ, ნამდა უნივერსიტეტის გურაფა ვა მოხვარუდ ჩქიმ კითხვეფშა პასუხეფიშ მეღებას. ვამჩქუდ, მუ ფქიმინკონ, ათეშენ ჩქიმ ანთროპოლოგიაშ პროფესორს ქელვაკითხე რჩევა. მანგარო გამკვირდჷ, მუჟამსით თიქ მიწუ, ნამდა მემტებუდკო უნივერსიტეტის გურაფა. ხიოლით ქუდვაჸუნ თიშ რჩევას დო თიშ უკულ დღას ვა დომრთინ უნივერსიტეტშა.

ბგინაფლენდჷ, ნამდა ჩქიმ ცხოვრება უაზრო რდჷ, ათეშენ ქუვაკათ ჯგუფის, ნამუთ ვემეჸუნდჷ საზოგადოებას აღიარებულ წეს-ჩვეულებეფს დო თეშ იძირედ, ითამ მშვიდობა დო ჸოროფას უნწყუნდჷ ხეს. მუსხირენ მეგობარწკუმა ართო გინობჭყვიდ, შეერთებულ შტატეფშე აკაპულკოშა, მექსიკაშა, გეგნომრთუმუდკო. თექ ჰიპეფწკუმა ართო ფცხოვრენდით დო თეშ იძირედ, თინეფს მუთუნ ვაწუხენდეს. ბრელ ხანქ ვედმესაჭირ თიშ გაგებელო, ნამდა თეცალ ცხოვრებაშ წესის მუთუნ აზრ ვა უღუდ დო ვართ ნამდვილ ბედნერობაშ მოღალა შეულებუდ. პირიქით, თინეფ შქას ბრელ ვა რდჷ პატიოსან დო ართგურ.

თი პერიოდის ჩქიმ ბაღანობაშ ოცნებაშენ ქიდიბჭყჷ ფიქრ. მოკოდ, ზღვა გეგნომჩურკო, მარა მუჭოთ მეზღვაურქ ვარინ, მუჭოთ კაპიტანქ. თეშო საჭირო რდჷ პჸუნდკო იალქანიან ნავ, ნამუთ ხვალე ჩქიმ საკუთრება იჸუაფუდ. ჩქიმ მეგობარ ტომს ხოლო თენა ოკოდ, ათეშენ გეგნობჭყვიდით, ართო მიბლითკო მსოფლიო. მოკოდ, სამოთხეცალ ტროპიკულ კუნძულს ქიმვოგორეკო, სოდეთ თავისფალ იპჸუაფუდ საზოგადოებას დოდგინელ წესეფშე.

მა დო ტომიქ არენის დე მარშა მიდაფრთით, ნამუთ ბარსელონაშ გოხოლუას, ესპანეთის რე. თექ ჩხორო მეტრაშე ჭიჭეთ მეტ რდუნ ფერ იალქანიან ნავ, სახელო ლიგრა, ქიპჸიდით. ჩქი თიშ გარემონტება ქიდიბჭყით, ნამდა შემალებესკო უსაფრთხოთ მოგზაურობაქ. დანიშნულებაშ ადგილშა მეულა ვა მოჩქარდესინ თიშენ, მატორ გეშებღით დო თიშ ადგილ ოშუმალ წყარიშ ოჩუალარო გეგმიბრინეთ. ჭიჭე ნავსადგურეფშა მიშაულარო ქიპჸიდით ჟირ ხუთმეტრიან ნიჩაბ. საბოლათ, ქიდიბჭყით მოგზაურობა ინდოეთიშ ოკეანეს, ნამდა სეიშელიშ კუნძულეფშა ქიმემრთუმდესკო. ჩქინ გეგმა რდჷ, ქელვაჸუნითკო აფრიკაშ დასავლეთ სანაპიროს დო სამხრეთ აფრიკას კეთილ იმენდიშ კონცხის ქუგვაჸუნთიკო. სწორ მიმართულებათ ოულარო, იბრინუანდით მურიცხეფს, რუკეფს, წიგნეფს დო მარტივ ხელსაწყოეფს. მანგარო მაკვირენდჷ, ნამდა თე საშვალებეფიშ გიმორნაფათ ზუსტას ბგებულენდით, სო ვორდითინ.

მალას ქიმეფხვადით, ნამდა ჩქინ ჯვეშ ჯაშ ნავ ვერგუდ ოკეანეს ონჩურალო. თიშა ირ საათის სოდგარენ 22 ლიტრა წყარ მითიშ. მუჭოთ დუდშე მიფშინენ, შტორმიშ დროს მანგარო დოფშქურდჷ დო ჩქიმ ცხოვრებას პირველო იბლოც. თიმ დროს ღორონთის დევეპირ, ნამდა გინოფსქიდუდით-და, ქივეცადებუდ თიშ გაჩინებაფას. ქარბორიაქ მეჭყორდჷ დო მა ქიდიბჭყჷ ჩქიმ პირობაშ შესრულება.

ბიბლიაშ კითხირ ზღვას ვორდითინ თეშ დიბჭყჷ. წერმიდგინით, მუ სასიამოვნო იჸუაფუდ ნავით ხმელთაშუა ზღვას შხვადოშხვანერ ჩხომეფიშ, დელფინეფიშ დო თოლ ვეჭირნენ ფერ ჰორიზონტიშ ჯინა. მანგარო მობწონდჷ სერით მურიცხეფით მოჭკადილ ცაშ დაკვირება, ნამუთ ხოლო უმოსო მარწმუნენდჷ, ნამდა არსებენს ღორონთ, ნამუთ დაინტერესებულ რე კაცობრიობათ.

მუსხირენ მარაშ უკულ ესპანეთის ალიკანტეშ ნავსადგურშა ქიმეფრთით. თექ ჩქინ ნავ გიმაჩამალო ქუდვორნეთ, ნამდა უჯგუშ ქომიჸიდირდესკო. მარა თიშ გიმოჩამა ვა რდჷ ადვილ, მუშენდა ჩქინ ნავ რდჷ ჯვეშ, უმატორე დო წყარ მითიშუნ ფერ. მანგიორ, თენა ჯგირ დრო რდჷ ბიბლიაშ ოკითხეთ.

ბიბლიაშ კითხირიშ შედეგო ქიმეფხვად, ნამდა თინა რე წიგნ, ნამდგას შეულებ ადამიანეფშა ბედნერობაშ მოღალა. ჩქიმდა მანგარო იმოქმედ თიქ, ნამდა ბიბლიას გასაგებო ინოჭარუდ წმინდა, ზნეობრივ ცხოვრებაშ გურშენ დო მიკვენდჷ, მუშენ მიორჩქუდ ბრელ ადამიანს, თინეფ შქას მა ხოლო, დუდ ქრისტიანო, მუჟამსით ვემეპუნდით ბიბლიას ინოჭარილს.

გინობჭყვიდ, დიფთირეკო ცხოვრებაშ წეს, ათეშენ მივოტე ნარკოტიკეფიშ მეღება. ფიფქრენდჷ, ნამდა აუცილებერო იჸუაფდეს ადამიანეფ, მით ბიბლიაშ მაღალზნეობრივ ნორმეფით ცხოვრენდეს დო მოკოდ თინეფწკუმა შეხვალამა. მაჟიაშა ლოცვაშ დროს ღორონთის ფთხი, დუმოგორაფუკო თე ხალხ.

ფიფქრენდჷ, ნამდა რელიგიეფშა ოკო ქუდამკვირებუდკო დო რელიგია, ნამუთ ვემურდჷ  თის, მუთ ბიბლიას მაფუდ კითხირებულ, გიშეშ, ნამდა ვა რდჷ ჭეშმარიტ რელიგია. ქალაქ ალიკანტეშ ქუჩეფს სეირნობაშ დროს ბრელ რელიგიურ შენობას შეფხვად, მარა თინეფიშ უმენტაშ ხატეფს ირინუანდჷ თაყვანიშცემაშ დროს. ათეშენ ჩქიმო ადვილ რდჷ თიშ ინონჭაფა, ნამდა თინეფშე ნამთინ ვა რდჷ ჭეშმარიტ რელიგია.

ართ ჟეშხა ონჯუას მაღალ ადგილშა გეკოფრთჷ, ნამდა ნავსადგურს ქიგნვოჯინკო დო ბკითხულენდჷ იაკობიშ 2:1—5-ის, ნამუთ გაფრთხილებას ირზენს მდიდრეფიშ მიმართ გიშაკერძაფაშ გიმორჩქინაშ გურშენ. უკახლე იფრთუდინ, ქობძირ რელიგიურ შენობა, ნამდგას მიკოჭარუდ: „იეჰოვაშ მოწმეეფიშ დარბაზ“.

იფიფქრჷ, მორთ გეგმოფცადუნქჷ თე ხალხის დო ქობძირუნქჷ, მუჭო მემღენა. იეჰოვაშ მოწმეეფიშ დარბაზშა კუჩხუჩაფლეთ, პიჯის თუმა მოფჩანდუნ თეშ დო ხარცქილ ჯინსით მინიბლჷ. ართ პიროვნებაქ ქუდმოხუნუ ხანიერ ოსურკოჩიშ გვერდით, მით მთელ გურით მოხვარუდ მომხსენებელიშ მოშინაფილ ბიბლიურ მუხლეფიშ გორუას. გაკვირებულ ვორდჷ, მუნერ ყურადღება გიმირჩქინეს თინეფქ შეხვალამაშ უკულ ჩქიმ მიმართ. ართ კოჩიქ მუშ ჸუდეშა ქუდმაპატიჟ ბიბლიურ თემეფიშ გურშენ ოჩიებშა, მარა ბიბლიაშ კითხირ თებულ ვა მაფუდუნ თიშ გურშენ ვუწი: „მზათ ქიპიქინ, ქოიწინქ“. ეშობას, არძა შეხვალამაშა დასწრება ქიდიბჭყჷ.

მუსხირენ მარაშა ქიმეფრთჷ თე კოჩიშ ჸუდეშა დო თიქ პასუხ ქიმეჩ ბიბლიაწკუმა დაკავშირებულ ჩქიმ კითხვეფს. ართ მარაშ უკულ თიქ ჯგირ ბარგით ეფშა ჩანთა ქომუჩ დო მიწუ, ნამდა თე ბარგეფიშ მინჯე ციხეს ხედჷ თი ბიბლიურ მითითებაშ მორჩილებაშ გურშენ, ნამდა მიჸორდან ართიან დო ვა დიბგურუათ ჩხუპ (ეს. 2:4; იოან. 13:34, 35). უკვე დარწმუნებულ ვორდჷ, ნამდა ქიმვოგორე თის, მუდგას ბგორუნდჷ — ხალხის, ნამუთ მეჸუნს ბიბლიურ პრინციპეფს წმინდა, ზნეობრივ ცხოვრებაწკუმა დაკავშირებით. ასე ჩქიმ მიზან სამოთხეცალ კუნძულიშ გორუა ვარინ, ბიბლიაშ ტომბაშე გურაფა რდჷ. თაშ ნამდა, დიფრთჷ ნიდერლანდებშა.

ოთხ დღას მიფშჷ შარას, ნიდერლანდებიშ ქალაქ გრონინგენშა გენომრთუმუდკონ. მოკოდ, თე ქალაქის დუდიშ ეიოჯუმალარო სამუშა იფშიკონ. სამუშაშ გურშენ ართ ჯაშ სახელოსნოშა ქიმეფრთჷ. თექ ქარღად ქუდმოკინეს, სოდეთ კითხვეფ გეჭარუდ. ართ-ართ კითხვა რელიგიას ოხუდ, თიშ პასუხო გივოჭარ, ნამდა იეჰოვაშ მოწმე ვორდჷ. სახელოსნოშ  მინჯექ თენა წეკითხუნ, სახექ დათირ დო მიწუ, დოირეკუნქია, მარა თენა ვა უკეთებ.

ხოლო შხვა სახელოსნოშა ქიმეფრთჷ დო იბკითხჷ, თანამშრომელ ხომ ვასაჭირდეს. თე სახელოსნოშ მინჯექ მოფთხუ დიპლომ დო სო მიმუშებუნ თიშ ცნობა. მა გევუნწყჷ, ნამდა ჯაშ ნავ მაფუდ ნარემონტა. გამკვირდჷ, მუჟამსით მიწუ: „ამდღა ნაონდღერშე შეილებ მუშობა დიჭყე, მარა ართ პირობათ, ვა მოკო ჩქიმ სახელოსნოს მუთუნ პრობლემაქ გორჩქინდას, მუშენდა იეჰოვაშ მოწმე ვორექ დო ბიბლიურ პრინციპეფით ფცხოვრენქ“. თის გაკვირებულო ქინვოჯინ დო უწი: „მა ხოლო იეჰოვაშ მოწმე ვორექ“. მა კინ მოუწესრიგებელ გარეგნობა მიღუდ, ათეშენ თიქ ქიმეხვად, ნამდა იეჰოვაშ მოწმე ვა ვორდჷ დო მიწუ: „იმწკუმა, ართო ქიდიბგურუათ ბიბლია“. მა ხიოლით დევეთანხმჷ. ასე არგამა რდჷ ჩქიმო, მუშენ ვამრეკ პირველ სახელოსნოშ მინჯექ. იეჰოვაქ ქუპასუხ ჩქიმ ლოცვეფს (ფსალმ. 37:4). მუფშენდჷ თე ჯიმაშ სახელოსნოს დო ართ წანას ბგურაფლენდჷ ბიბლიას თიწკუმა. საბოლათ, 1974 წანაშ იანარს დიბნათ.

ართ თუთაშ უკულ პიონერო მსახურება ქიდიბჭყჷ, მუდგაქ კმაყოფილებათ გემოფშჷ. უკულიან თუთას ამსტერდამშა გეგნოფრთჷ, ნამდა ახალჩამოყალიბებურ ესპანურ ჯგუფის ქიმვეხვარკო. ჩქიმდა დიდ ხიოლ მოუღუდ ბიბლიაშ გურაფეფიშ ჩატარებას ესპანურ დო პორტუგალიურ ნინეფშა. 1975 წანაშ მესის მიბღჷ დიდ პატი, ვიმსახურკო სპეციალურ პიონერო.

ართშა ჩქინ ესპანურ კრებაშა სპეციალურ პიონერ დაქ, ინეკექ, ქუმორთჷ, ნამდა მუშ ბოლივიელ ბიბლიაშ მაგურაფალ გუმოჩინებაფესკო. ინეკექ დო მა გეგნობჭყვიდით, ართიან უჯგუშო გეფჩინებაფეთკო წერილეფიშ საშვალებათ. ჩქი ხეთეშე ქობძირით, ნამდა ართნერ მიზნეფ ნობღვენა. 1976 წანას მა დო ინეკექ დეფქორწინით დო გუვაგრძელით სპეციალურ პიონერეფო მსახურება 1982 წანაშახ, სოიშახ გალაადიშ 73-ა კლასშა ვემემწვიეს. მანგარ გაკვირებულ დო გახარებულ ვორდით, მუჟამსით აღმოსავლეთ აფრიკას დაბნიშნეს, სოდეთ 5 წანას ვმსახურენდით მომბასას, კენიას. 1987 წანას ჩქი გეგნომიჸონეს ტანზანიაშა, სოდეთ მთავრობას უკვე ქადაგებაშ ნება აფუდ მეჩამილ. თექ 26 წანას ქივმსახურით დო უკულ კინ კენიაშა დიფრთით.

მარდულ ადამიანეფშა ბიბლიურ ჭეშმარიტებაშ გურაფაქ ჩქიმ ცხოვრებას ნამდვილ აზრ ქიმეჩ. მაგალთო, მომბასას ჩქინ პირველ ბიბლიაშ მაგურაფალს ქადაგებაშ დროს შეფხვად, თის ჟირ ჟურნალ ქიმეფჩჷ, მუდგაშ დროს ბკითხჷ: „თენეფს წებკითხენქინ უკულ მუ ფქიმნა?“. უკულიან მარას ჩქი ქიდიბჭყით ბიბლიაშ გურაფა წიგნით „სი შეილებ მარადიულო იცხოვრე სამოთხეს დედამიწას“, მუთ თი დროს ახალ გიშაშქუმალირ რდჷ სუაჰილი ნინაშა. ართ წანაშა თიქ დინათ დო სრულ დროთ პიონერობა ქიდიჭყჷ. თიშ უკულ მუშ ოსურწკუმა ართო სოდგარენ 100 პიროვნებას მეხვარ იეჰოვაშა დუდიშ მეძღვინუას დო ნათუას.

მუჟამსით პირველო გებგჷ ცხოვრებაშ აზრიშ გურშენ, მოგზაურ ვაჭარცალო ბგინაფლენდჷ დუდის, მიდგაქ განსაკუთრებულ განძის ქიმიოგორუ დო ხეშე ვაკოდ თიშ გოტება (მათ. 13:45, 46). მა მოკოდ, მთელ ცხოვრება შხვეფშა თიშ მოხვარას შევალიკო, ნამდა ქოძირესკო სიცოცხლეშ ნამდვილ აზრ. ჩქიმ ძვირფას მეუღლეწკუმა ართო პირადო გეგმოფცად, მუჭო აკურთხენს იეჰოვა მუშ ხალხის აზრით ეფშა ცხოვრებათ.