პოლ: 1985 წანაშ ნოემბერ რდჷ. მა დო ენ დასავლეთ აფრიკაშა, ლიბერიაშა, მიფშით ჩქინ პირველ მისიონერულ დანიშნულებაშა, მუთ მანგარო მოხიოლუდეს. დიო სენეგალშა გენობრთით. ენიქ მიწუ, ართ საათ დო ლიბერიას იპჸითია. მარა უკულ განცხადებაქ იჸუ კეთებულქ: „ლიბერიაშა მიმაულარეფქ გეგთორთით სამალიოტშე; თექ სახელმწიფო გადატრიალება რე, ათეშენ ვა მალინენა“. ვით დღას მისიონერეფწკუმა ქუდოფსქიდით სენეგალს. ახალ ამბეეფს იბრჩქილუაფუდით, ნამდა ლიბერიას ხალხიშ ჭყვიდუა მიშჷ. თექ კომენდანტიშ საათ რდჷ, ათეშენ სერით მიდგაინ ჸუდეშე გეგმიშ-და, ადგილს გიოჸვილანდეს.

ენ: მა დო პოლ მანგარ ფრთხილეფ ვორეთ. ბაღანობაშე ირფელშა მოშქურუდ, ათეშენ ციგანებულო ჩიჩიეს მიძახუდეს. წერმიდგინით, შარაშ გინულაშ დროს ხოლო გურ მაცანცალ. მარა იშენით გეგნოპჭყვიდით, მიდაბრთითკო ლიბერიაშა ჩქინ დანიშნულებაშა.

პოლ: მა დო ენიქ, ჟირხოლოქ, დასავლეთ ინგლისის დებაბდით. ჩქინ ჸუდეეფ შქას გვალო ბრუო კილომეტრ აშაძუდ. სკოლაშ თება დო ხეთეშე ჟირხოლოქ პიონერო მსახურება ქიდიპჭყით, მუდგაქ მანგარო ახიოლეს ჩქიმ მშობლეფს დო ენიშ დიდას, მუშენდა თინეფ ირიათო ელამჩანდეს თეშ კეთებას. 19 წანერ ვორდინ თეშ ბეთელშა მემწვიეს დო 1982 წანას, მუჟამსით დეფქორწინით, ენიქ ხოლო ქიდიჭყჷ ჩქიმწკუმა ართო ბეთელს მსახურება.

ენ: მანგარო მიჸორდეს ბეთელს მსახურება, მარა ირიათო მოკოდეს, თექ იბმსახურითკო, სოდეთ მაქადაგებელეფიშ საჭიროება რდჷ. ბეთელს ჯვეშ მისიონერეფწკუმა თანამშრომლობაქ თეშ სურვილ ხოლო უმოსო გამიმანგარეს. სუმ წანას ირ სერს კონკრეტულო ბლოცულენდით თე საკითხიშ გურშენ. ათეშენ ხიოლით ცას ვონჭუდით, მუჟამსით 1985 წანას „გალაადიშ“ 79-ა კლასშა მემწვიეს! თევრეშე დასავლეთ აფრიკას, ლიბერიას დუმანიშნეს.

პოლ: სენეგალს ძალამ ხანიშ ჯინაშ უკულ, მუჟამსით ლიბერიაშა გილაფურინუაქ კინ ქიდიჭყჷ, ხეთეშე, პირველ რეისით მიდაბრთით. თექ დიო ხოლო კომენდანტიშ საათ რდჷ. ხალხ თიცალ დაშიშებულ რდჷ, მაშნაშ გრუჩიტელიშ ხონარშე ხოლო წუმოლუდეს დო მირულედეს. შიშის ვენობლითკო დო მშვიდას ქუვორდითკონ თიშენ, ირ სერს ფსალმუნეფს პკითხულენდით. თეცალ სიტუაციაშ უმკუჯინუო, იშენით მანგარო მოპწონდეს თექ მსახურება. ენ ოქადაგებშა გილეშ დო მა ბეთელს ვოხვარუდ, სოდეთ ჯიმა  ჯონ ჩარუკწკუმა ფთანამშრომლენდჷ. a თინა ბრელ ხან რდჷ, მუთ ლიბერიას ცხოვრენდჷ, დო ჯგირო უჩქუდ, მუ სირთულეეფს ხვადუდეს თექიან და დო ჯიმალეფ, ათეშენ ბრელ მუდგარენ დიბგურე თიშე.

ენ: ლიბერიას თიცალ ართგურ, მოჸოროფე დო გემუან და დო ჯიმალეფ რდესჷ, ნამდა ჩქინ დანიშნულებაქ ხეთეშე ქიმეჸოროფეს. თინეფქ ოჯახიშ წევრეფცალო გინმართეს. თე და დო ჯიმალეფიშ რჩევეფ მანგარო მოხვარუდეს დო სულიერო მამანგარენდეს. ლიბერიას მსახურება სასწაულ რდჷ. მობინადრეეფს ოკოდესინ თიზმა ხანს ვეგუჩენდუდ-და, გურ მალედეს. ხალხ ქუჩეფს არჩიენდჷ ბიბლიურ საკითხეფს. სი შეილებუდ უბრალოთ ქიმერთიკო დო გეიაჸუნიკო ჩიებას. თიზმა ბიბლიაშ გურაფა მიღუდეს, ნამდა ვევალედით. თეშ უჯგუშ „პრობლემა“ მუ ოკო გიღუდას კოჩის?!

პოლ: მარა 1989 წანას, ოთხ წანაშ უკულ, ქიანაქ კინ დუდგიმე გემნირთჷ – ქიდიჭყჷ სამოქალაქო ომქ. 1990 წანაშ 2 კვირკვეს აბუნტებულეფქ თი ტერიტორია გეჭოფეს, სოდეთ ბეთელ რდჷ. სუმ თუთას მითინწკუმა ვა ნობღვენა კონტაქტ, ვართ ჩქინ ოჯახიშ წევრეფწკუმა დო ვართ მთავარ სამმართველოწკუმა. ლიბერიას მანგარ არეულობა რდჷ, ოჭკუმალ ვეშიდ დო ოსურკათას აუპატიურენდეს. თეცალ გლახა მდგომარეობაქ თექ 14 წანას გეგრძელ.

ენ: შხვადოშხვა ტომიშ ხალხ ჩხუპენდჷ დო ჸვილუნდეს ართიანს; ქუჩეფს ირდიხას იარაღამ ჯარიშკოჩეფ გერდეს, ჸუდეეფშა მინოლუდეს დო მუთ ოკოდეს, ირფელ მეუღუდეს. ნამთინეს კოჩიშ ჸვილუა წიწილაშ ჸვილუაცალ აფუდ. თინეფს შარა გინოკილერ აფუდეს დო მით იშენით მინდომენდ მიკულას, ჸვილუნდეს დო ღურელეფს ართიანს მინანწკარანდეს. თენა გვალო ბეთელიშ ხოლოს ხვადუდ. აბუნტებულეფქ ჩქინ და დო ჯიმალეფ ხოლო დოჸვილეს, თინეფ შქას ჩქინ ჟირ ძვირფას მისიონერ.

ნამთინე და დო ჯიმა მუშ სიცოცხლეს საფრთხეშ თუდო გიორინუანდჷ დო ოტყობინუანდჷ თი ტომიშ ხალხის, მიდგას გიანთხუდეს დო ჸვილუნდეს. ბეთელელეფ დო მისიონერეფ ხოლო თაშ იქციებუდეს. ბეთელს ნამთინეს პირველ სართულიშ კარიდორეფს დო ოფისეფს ლურდჷ დო მუნეფიშ ოცხოვრებელ ოთახეფ, ნამუთ მაჟია სართულს რდჷ, ოტყობინუანდესინ თინეფს დაუთმჷ. ჩქი ხოლო ართ ოჯახ მაფუდეს ჩქინ ოთახის ტყობინაფილ; თინეფ შქვით რდესჷ.

პოლ: აბუნტებულეფ ირდღას ოცადუდეს ბეთელშა მინულას, ნამდა გეგნამოწმესკო, მითინ ხომ ვამტყობუდეს. თეცალ გეგმა მიფიფქრით: მინალწკუმა ჟირ კოჩ გერდჷ დო აკოშკაშე ხოლო ჟირ გითიჯინედ. მინალწკუმა გერდესინ თინეფს ხე წოხოლე ქუღუდეს-და, საქმე ჯგირო რდჷ. მარა ხელეფს უკახალე ქიმკიდვანდეს-და, თენა ნიშნენდჷ, ნამდა  აბუნტებულეფ ძალით ოცადუდეს მინულას. ათეშენ აკოშკაწკუმა გერდესინ თინეფ მიდერულედეს ხალხიშ ოტყობინაფშა.

ენ: მუსხირენ მარაშ უკულ აბუნტებულეფქ იშენით გემნიღეს დუდ ბეთელშა. ართ დაწკუმა ართო დუდ აბანოს ქინიპკილე, სოდეთ ჭიჭე ოტყობინალ მაფუდეს მონწყილ. თექ თიშმაჭიჭა ადგილ რდჷ, თე და ონდეთ ვოტყობინე. იარაღამ აბუნტებულეფქ პტყობუდითინ თი სართულშა გეშართეს დო აბანოშ კარს უჯგვაჯგუანდეს. პოლ ოცადუდ, გემკიჸუნუკო თინეფ თევრეშე, ათეშენ უწუ, ჩქიმ ოსურ იბონუნსია. თე დაშ ტყობინაფაქ ბრელ დრო მიკორინუ დო ხმაურქ ხოლო იჸუ. შიშიქ გეპჭოფ დო ფცანცალანდჷ. ათაშ მუჭო გუვონჯიკო კარ?! გურს ქიბლოც დო იეჰოვას მოხვარა ქოფთხი. უკულ კარ გუვონჯ დო მუდგარენნერო მუვახერხჷ, ნამდა მშვიდას ქუწიკო თინეფს გამარჯობა. ართ ჯარიშკოჩიქ გემჯიკუ დო გემნოლ აბანოშა. პირდაპირ თი ადგილჸურე მიდართჷ, სოდეთ თი და ტყობუდ. ირფელ თევრე-თავრე ქიმკარღვჷ, მარა მუთუნ ვა ძირჷ. უკულ მუშ ხალხწკუმა ართო შხვა ოთახეფ დო სხვინ ხოლო დილჷ, მარა ვართ თექ ძირეს მუთუნ.

პოლ: მუსხირენ თუთას გვალო აკაბცხა ოჭკუმალით მემღუდეს დუდ, მარა სულიერ საზრდო დღას ვა მობრკებუნა. ოჭმარეს მინშა ოჭკუმალო მუთუნ ვა მიღუდეს, მარა ბეთელიშ ოჭმარეშ თაყვანიშცემა ჩქინო ოჭკუმალცალ რდჷ. მანგარო ვაფასენდით თე პროგრამას, მუშენდა ძალას მარზენდეს თე რთულ დღალეფიშ გინაღალარო.

ოჭკუმალ დო წყარიშ ოშიბშა ბეთელიშ გალე გეგმიფშით-და, მიტყობუდესინ თი ხალხ ვა მათხილედეს დო შილებედ დოჸვილესკო. ხშირას იეჰოვა საჭირო მუდგარენეფს შურო ვეფიფქრენდითინ თეშ დო ზუსტ დროს მარზენდეს. თინა ზრუნენდჷ ჩქინ საჭიროებეფშო დო მოხვარუდეს, შიშის ვევაჸუნითკო.

მუთ უმოსო იუფრაშებუდ ლიბერიას სიტუაცია, თით უმოსო მამანგარენდეს დო სინთანდჷ ჭეშმარიტება ჩქინო. ჩქინ და დო ჯიმალეფს ბრელშა აჸუეს ონტებელქ დუდიშ გინატებელო, მარა თინეფს რწმენა დო სიმშვიდე დღას ვა უდინუაფუნა. ნამთინე თის ხოლო იჩიებუდ, თეცალ სირთულეეფ დიდ გაჭირებაშო მამზადენანია. გაბედულ უხუცესეფ დო ახალგაზრდა ჯიმალეფ ირფელს ორთუდეს და დო ჯიმალეფიშ მახვარებელო. ნტებულ და დო ჯიმალეფ ართიანს ელურდეს დო სოდეთ რდესინ თექ ქადაგენდეს. მუდგას ძირუნდეს, ირფელს ირინუანდეს, ნამდა დარბაზცალ მუდგაინ გეიონწყუესკო შეხვალამეფიშ ჩატარებელო. თეცალ რთულ დროს შეხვალამეფ დო მსახურება მანგარო ოხვარუდ დო ამანგარენდჷ და დო ჯიმალეფს. მუჟამსით თინეფს ბარგ, ოჭკუმალ დო შხვა აუცილებერ მუდგარენეფ მეუღით, მიკაქუნალ ისხით ვაინტერესუდესინ, მსახურებაშო ჩანთეფს ფთხინდეს. თექ მანგარო ელამკინეს გურშა. ხალხის თიცალ მუდგარენეფ აფუდ მოძირაფილ, მთელ გურით ირჩქილუანდეს სახიოლო ამბეს. თინეფ გაკვირებულ რდესჷ, ნამდა იეჰოვაშ მოწმეეფს თეცალ ხიოლ დო დადებით განწყობა უღუდეს. ღორონთიშ ხალხ წკურუმ უკმელას სინთეცალო რდჷ! (მათ. 5:14–16). და დო ჯიმალეფიშ თეცალ დამოკიდებულებაშ მიმაჯინუ ნამთინე აბუნტებულ ჯარიშკოჩიქ  ხოლო დეინტერეს ჭეშმარიტებათ დო იეჰოვაშ მოწმეთ გინირთჷ.

პოლ: ლიბერიაქ მუსხირენშა მაჸუეს დატებელქ; სუმშა ჭიჭე ხანით დო ჟირშა ართ წანათ. ართ მისიონერ დაშ სიტყვეფ ზუსტას ეჭარუნს, მუს ბგინაფლენდით თე დროს. თიქ თქუ: „გალაადის მოგურუანდეს, ნამდა შურ დო გურ ქიმშაბდვითკო ჩქინ დანიშნულებას დო ქოთ გუვაკეთით თაშ. ათეშენ და დო ჯიმალეფს თეცალ სიტუაციას იპტენდითინ თენა გურს მისოფუნდეს!“. მადლობა ღორონთის, ნამდა ლიბერიაშ გოხოლუა ქიანეფშე იშენით ვახერხენდით თექიან და დო ჯიმალეფშა დო ქადაგებაშ საქმეშა ხუჯიშ დაკინებას.

ენ: 1996 წანას ქალაქიშ მაჟია მხარეშა, სოდგარენ 16 კილომეტრიშ მაშორაშა გეგნოპჭყვიდით ულა, სოდეთ უმოს უსაფრთხოთ იპჸიდით. ფილიალიშ მაშნათ მიფშით, სოდეთ ოთხ კოჩ მითვოხედით დო მნიშვნელოვან დოკუმენტეფ მემღუდეს. ახალ გინულირეფ ვორდით, მუჟამსით შარას გვალო არეულობაშ ადგილს ქუმოფხვადით. აბუნტებულ ჯარიშკოჩეფ ტყვიეფს ჰაერს ოჸოთანდეს, გუმაჩერეს, სუმ კოჩ ძალით გეგთომიჸონეს მაშნაშე დო პოლ დიო ხოლო თექ მითოხედუნ თეშ, მაშნა მიდეჸუნეს. აზრშა ვამმართინეს, მუქ მოხვად. ჭიჭე ხანშა პოლს ქუმუკინდეთ თოლ. თინა კუჩხით მიშჷ დო ჸვა გოზისხირელ აფუდ. დუდშე იფიფქრით, ალბათ ტყვია ოჸოთესია, მარა უკულ ქიმეფხვადით, ნამდა თაშ ქოჸოფედუკონ, მუშით ვეგლართედკონ იჸიდ. მუჭოთ გებგით, ართ-ართ აბუნტებულს თიშა ხე მეუგამ, მუჟამსით მაშნაშე გითარაგუანდჷ. მადლობა ღორონთის, ნამდა სერიოზულ მუთუნ ვაჭირუდ.

ჩქინ ხოლოს სამხედრო მაშნა ქობძირით, ნამუთ მთავრობაშ რდჷ. თექ შქურნაფილ ხალხ მითოხედ. ვეცადით ეშულას, მარა ადგილ ვა რდჷ, ათეშენ გალეშე ქუმვაღუზით მაშნას. შოფერქ თიშმაჩქარას აყარ მაშნა, ნამდა დახე გეგთვანთხით. ვოხვეწუდით გაჩერია, მარა თიცალ შქურნაფილ რდჷ, ჩქინ ნარაგად შურო ვარჩქილედ. მუდგარენნერო მუვახერხით დუდიშ დამარგება დო ბოლოშახ მეულა. მაშნაქ გაჩერდუნ, თიშ მუნაღუზინა დო შიშიშ ჭკუმილეფს ხე დო კუჩხ მაცანცალუდეს.

პოლ: წინდამ, აკოსოფილ ბარგით გივორდით დო ართიანს გაბორებულეფ ინვოჯინედით, მუშენდა მიკვენდეს, მუჭო დოფსქიდით ცოცხალეფქ. თიმ სერს გალე ბლურდეს დო მაჟია დღას აკოცხირილ დო გვერდო აკოცუმილ ვერტალიოტით მიდაბრთით სიერა-ლეონეშა. მუშო ოკო რაგად, მოხიოლუდეს, ცოცხალეფ ვორდითინ, მარა მანგარო მნერვიანენდით ლიბერიას დოტებულ და დო ჯიმალეფშენ.

ენ: უსაფრთხოთ გენობრთით სიერა-ლეონეშ დედაქალაქშა, ფრიტაუნშა, სოდეთ ბეთელს და დო ჯიმალეფ ყურადღებას ვა მარკენდეს დო ჩქინდე ზრუნენდეს. მარა ახალ სირთულექ ქირჩქინ დუდ. ირიათო გუმაშინედ დო თოლშა ეწომდირთუდ თი ირფელ, მუდგაქ ლიბერიას მაჸუეს გინაღალარქ. ირიათო თიცალ შეგრძნება მიღუდ, ნამდა მუდგარენ გლახაქ ოკო მოხვადუკო. საღას აზროვნება მიჭირდჷ. სერით ფცანცალანდინ თეშ წუმობლუდ დო რგილ უფის გინმოსოფანდჷ. შურიშ ღალა მიჭირდჷ. თე დროს პოლ მიხუტოლუანდჷ დო ჩქიმწკუმა ართო ლოცულენდჷ. ონდო ვედემშვიდებუდინ თეიშახ სამეფოშ ობირეშეფს იბიბრდით. თიცალ გრძნობა მიღუდ, ნამდა ჭიე-ჭიეთ ჭკუაშე გინმიფშჷ დო ფიფქრენდჷ, მისიონერულ მსახურება ვაგმაგრძელებედ.

უკულ დღას ვაგმოჭყორდუნ ფერ მუდგარენქ მოხვად. თიმ მარას მიბღით ჟირ ჟურნალ. ართ რდჷ 1996 წანაშ 8 ივანობაშ „გეგშაკურცხით!“, სოდეთ რდჷ თეცალ სტატია: „მუჭო შეილებუნა გიორჯგინათ პანიკურ შეტევეფს?“. თე სტატიაშ კითხირიშ უკულ ქუგოფხვად, მუ ნოპჭირუე. მაჟია სტატია რდჷ 1996 წანაშ 15 მესიშ „გინაჯინალ კოშკი“, სოდეთ მოჩამილ რდჷ თეცალ სტატია: „სოვრეშე ღებულენა თინეფ ძალას?“. ართ-ართ სტატიას ხანტუდ პეპელა, ნამდგას ფსუალეფ აფუდ დაზიანებულ, დო ენწყუმილ რდჷ, ნამდა თის თეცალ მდგომარეობას ხოლო შეულებ გილაფურინას. თეშნერო, ჩქი ხოლო იეჰოვაშ წმინდა შურით შემლებუნა გუვაგრძელათ შხვეფშა მოხვარა, თიშ უმკუჯინუო, ნამდა ემოციურო მანგარ გლახათ ვორეთ. იეჰოვაქ არძაშ უმოსო მოსაჭირუდუნ თიმწკუმა გუმამანგარ თე სტატიეფით (მათ. 24:45). თე საკითხშენ სტატიეფს ბგორუნდჷ დო ფშაყარანდჷ, მუდგაქ მანგარო მიმეხვარ. თე ემოციურ ტრავმაშე გეტებულ სიმპტომეფქ ჭიე-ჭიეთ ქიმკიწყნარ.

პოლ: ირო მანგარო მოხიოლუდეს, მუჟამსით ლიბერიაშა ინულაშ საშვალება მუმაჩამუდეს. 2004 წანაშ ბოლოს, ლიბერიას სოდგარენ 20 წანაშ მსახურებაშ უკულ, ახალ დანიშნულება მიბღით. თე დროს  ლიბერიას ომ უკვე თებულ რდჷ დო ფილიალს ხოლო მშენებლობა რდჷ დაგეგმილ.

ახალ დანიშნულებაშა ულაქ ჩქინო ადვილქ ვეჸუ, მუშენდა მანგარო ვორდით მერჩქვანელ ლიბერიელ და დო ჯიმალეფს დო ვა მოკოდეს თინეფიშ დოტება. მარა თინა ხოლო ფშუდეს, მუჭო მაკურთხეს იეჰოვაქ, მუჟამსით „გალაადშა“ ულაშ დროს ოჯახეფქ დატებელქ მაჸუეს. ათეშენ მიდაბრთით ახალ დანიშნულებაშა, კინ მეზობელ ქიანაშა, განაშა.

ენ: ლიბერიაშ დოტებაშ დროს ქიანაშ იმნგარით. მანგარო გამკვირდეს ართ ხანშამიშულირ ჯიმაშ, ფრენკიშ, სიტყვეფქ, ნამდგაქ მიწუეს: „ოკო გომჭყოლიდუათ!“. უკულ ემინწყეს, მუშენ მიწუეს თენა: „მიჩქუნა, ნამდა დღას ვა გომჭყოლიდუანთ, მარა ასე მთელ შურ დო გურ ახალ დანიშნულებას ოკო ინოდვათ. თე დავალება იეჰოვაქ მერჩეს, ათეშენ მთელ ყურადღება თექიან და დო ჯიმალეფშა გეგნიღით“. თე ჯიმაშ სიტყვეფქ მანგარო მიმეხვარეს დო ქომუჩეს ძალა, კინ დუდშე ქიდიპჭყითკო ირფელ ახალ დანიშნულებას, სოდეთ გვალო მუსხირენ კოჩის იფჩინენდით დო ირფელ ახალ რდჷ ჩქინო.

პოლ: მარა განას ხოლო მალას გეპჭოფით თექიან და დო ჯიმალეფიშ ჸოროფა. თექ ქიანაშ იეჰოვაშ მოწმე რდჷ. ჩქინ ახალ მეგობრეფიშ ართგურობაქ დო რწმენაქ ჯგირ მაგალითიქ იჸუ ჩქინო. 13 წანას ქიმსახურით განას დო უკულ ხოლო ართ შურო ვეველუდითინ ფერ დანიშნულება მიბღით – ქოფთხუეს, გინიბლითკო აღმოსავლეთ აფრიკაშ ფილიალშა, ნამუთ კენიას რდჷ. მართალ რე, განას დო ლიბერიას მახორუ და დო ჯიმალეფ მანგარო მონატრუდეს, მარა კენიას მახორუ და დო ჯიმალეფს ხოლო ხეთეშე ქიმვარჩქვანით. ჩქი ამდღარშახ კენიას მსახურენთ დო თაქ მაქადაგებელეფიშ მანგარ საჭიროება რე.

ენ: თე წანეფიშ დინახალე მუქ ვა მაჸუ გინაღალარქ. თეზმა ნერვიანობა დო შიშ ადამიანს ქოთ ემოციურო დო ქოთ ფიზიკურო გიგოდოხოდუ. თე ქვეყნიერებას ვემაჩილითენა დუდ თეცალ სიტუაციეფშა. ამდღა ხოლო, მუჟამსით ჸოთამაშ ხონარს გებგენქ, გურ მაღიონტ დო ხე მაბურძღინ. მარა ქიდიბგურე, გეგმიბრინუე ირფელ, მუდგათ იეჰოვა მამანგარენს, მაგალთო, მიბღე და დო ჯიმალეფიშ ალარნა. თინა ხოლო ქიდიბგურე, ნამდა სულიერ განრიგიშ მეჸუნათ იეჰოვა მოხვარ, გუვაგრძელე ჩქიმ დანიშნულებას მსახურება.

პოლ: მინშა მოკითხუნა: „ქოიჸორანო თქვან დანიშნულება?“. მართალ რე, თი ქიანეფ, სოდეთ ვორდით, მანგარ სქვამ რე, მარა შილებე წუთიშმამალას ირფელქ დუდგიმე გამნირთას. ათეშენ ქიანეფიშ სისქვამეშე უმოსო ჩქი თექიან და დო ჯიმალეფ მიჸორა. თიშ უმკუჯინუო, ნამდა შხვადოშხვა ქიანაშე ვორეთ, ჩქი ართ აზროვნება მიღუნა. ფიფქრენდით, ნამდა ჩქი ვორდით და დო ჯიმალეფიშ გურიშ ელაკინშა გოტებულ, მარა სინამდვილეს, აშო მამანგარენა თინეფ.

ირო, მუჟამსით ახალ დანიშნულებაშა მეურთ, ვორწყეთ, მუშმაშხვა სასწაულ აფჷ იეჰოვას კეთებულ – სოდგა ვა ვორდათინ, ირდიხას პჸუნა ოჯახ, ჩქინ საჯიმალო! ბოლოშა ბჯერა, ნამდა იეჰოვაშა მენდებულ ქიპჸით-და, მუდგაქ ვა მოხვადასინ, თინა ქომუჩანა ძალას ირფელიშ გინაღალარო (ფილ. 4:13).