1. მუშენ შეულებუნა ხანშამიშულირეფს ჩქინდა ჯგირ რჩევეფიშ მოჩამა?

 ᲛᲜᲘᲨᲕᲜᲔᲚᲝᲕᲐᲜ საკითხეფიშ გინოჭყვიდუაშ დროს არძას მოსაჭირუნა ელაჩამა. ჯგირ რჩევეფიშ მოჩამა შეულებუნა უხუცესეფს დო შხვა სულიერო მოწიფულ თანაქრისტიანეფს. თე და დო ჯიმალეფ ჩქინდე ბრელით უნჩაშეფ ქორენან-და, ხეთეშე ოკო ვეფიფქრათ, ნამდა ჯვეშ დროს რენა ინოსქილადირ დო თინეფიშ რჩევეფ ამდღა ვეგმმოდირთუნა. იეჰოვას ოკო, ბგურაფლენდათ უნჩაშეფშე, მუშენდა რახანს ჩქინდე უმოს აფუნა ნაცხოვრებ, მეტ აფუნა ნაძირეფ დო ჩქინდე უმოს რჩქინა დო გამოცდილება უღუნა (იობ. 12:12).

2. მუს გუვარჩიენთ თე სტატიას?

² იეჰოვას ჯვეშო ხოლო გიმურინუაფ ხანშამიშულირ ართგურ მსახურეფ მუშ ხალხშა რჩევაშ მიოჩამალო დო გურიშ ელაკინალო. მაგალთო, თეცალეფ რდესჷ მოსე, დავით დო მოციქულ იოანე, მით გვალო შხვადოშხვა დროს ცხოვრენდეს დო შხვადოშხვა სიტუაცია უღუდეს. ღურაშახ თინეფქ მანგარ ჭკვერულ რჩევეფ მეჩეს უკლაშეფს. იეჰოვაშ ნებათ თინეფიშ სიტყვეფქ ბიბლიას ქინიჭარ. სუმხოლოშ ნარაგადშე თის ბგებულენთ, მუსხით მნიშვნელოვან რე მორჩილება. მნიშვნელობა ვა უღჷ, ახალგაზრდა ვორეთ დოვარ ხანშამიშულირ, არძას აწმოდირთუნა თინეფიშ რჩევეფ (რომ. 15:4; 2 ტიმ. 3:16). ათეშენ, თე სტატიას გუვარჩიენთ ღორონთიშ თე სუმ ართგურ მსახურიშ ღურაშახ რაგადებულ სიტყვეფს დო ქობძირუნთ, მუშ გურაფა შემლებუნა თინეფიშ სიტყვეფშე.

 „ᲓᲝᲓᲘᲠᲗᲣᲗ ᲑᲠᲔᲚ ᲮᲐᲜᲡ“

3. მუ გამოცდილება უღუდ მოსეს?

³ მოსექ მთელ მუშ ცხოვრება იეჰოვაშ მსახურებას მეუძღვინ. თინა რდჷ წინასწარმეტყველ, მოსამართლე, მხედართმთავარ დო მაჭარალ. თის ბრელ მუდგარენ აფუდ ნაძირეფ ცხოვრებას. თიქ გიშეჸუნ ისრაელეფ ეგვიპტეშ მონობაშე დო მუშ თოლო ძირჷ იეჰოვაშ ბრელ სასწაულ. იეჰოვაქ თე ართგურ კოჩის ოჭარაფუ ბიბლიაშ პირველ ხუთ წიგნ, 90-ა ფსალმუნ დო შილებე 91-ა ხოლო. მუჭოთ იძირე, იობიშ წიგნ ხოლო მოსეშ ნაჭარა რე.

4. მის გიოწურუანს მოსე დო მუშენ?

⁴ ღურაშახ გვალო ჭიჭე ხანით ადრე, 120 წანერ რდუნ თეშ, მოსექ ისრაელეფ გაკოშაყარუ დო ქუგაშინ თინეფშო კეთებულ იეჰოვაშ საქმეეფ, მუთ მუნეფიშ თოლით ძირეს. თე ისრაელეფშე ნამთინეს ახალობას მუშ თოლით აფუდ ძირაფილ იეჰოვაშ სასწაულეფ დო ეგვიპტელეფშა გეტახილ ღორონთიშ 10 სასჯელ (გამ. 7:3, 4). თინეფქ მუნეფიშ კუჩხით გიშართეს შქას გორთილ ჭითა ზღვას დო ძირეს, მუჭო ეშაჭყვიდ იეჰოვაქ ფარაონ დო თიშ ჯარ (გამ. 14:29–31). თე ხალხ ორწყედ, მუჭო ზრუნენდჷ დო თხილანდჷ იეჰოვა თინეფს უდაბნოს (კან. 8:3, 4). ასე, ისრაელეფს გვალო აკაბცხა მეუძუნა დუნაპირებ დიხაშან თეშ, მოსეს ოკო, გეგმირინუას თე ბოლო შანს დო მუდგარენს ელუჩანს თინეფს. a

5. მუჭოთ კანონიშ 30:19, 20-შე იძირე, მუშა დარწმუნ მოსექ ისრაელეფ?

⁵ მუ თქუ მოსექ? (წეკითხით კანონიშ 30:19, 20). მოსექ ისრაელეფს ქუგაშინ, მუ დიდებულ მომავალ ელუდეს წიმი. იეჰოვა თინეფს დუნაპირებ დიხაშა გემნიჸუნანდ, სოდეთ ბრელ ხანს დო ბედნერო დოდირთუდეს. დეკვირით, მუჭო ეუჭარ მოსექ ისრაელეფს თე სქვამ დო ჸოფიერ დიხა: „ღორონთ მერჩანს ჯგირ ქალაქეფს, ნამუთ სი ვაიშენებ, მოსავალით ეფშა ჸუდეეფს, მუდგაშოთ სი ვაიხანდებ. ინჭეფს, ნამუთ სი ვაინთხორ, ბინეხის დო ზეთისხილიშ ჯალეფს, ნამუთ სი ვაირგჷ“ (კან. 6:10, 11).

6. მუშენ დაუშვჷ იეჰოვაქ, მუშ ხალხის ნტერეფქ ქიგიანთხესკო?

⁶ მოსექ ისრაელეფს გაფრთხილება ხოლო მეჩჷ: თინეფ თეიშახ იჸუაფუდეს დუნაპირებ დიხას, ონდო იეჰოვაშ კანონეფს დემორჩილებუდეს. მოსექ ელუჩ თე ხალხის, ნამდა სიცოცხლე ქაკოდეს-და, იეჰოვას ოკო ურჩქილესკო დო მუთუნით ვეჩეთხუესკო თის. მარა თე ხალხიქ ოჭიშ ქურთინუ ღორონთის, მუდგაშ გურშენ თიქ დაუშვჷ, ნამდა დიო ასურელეფქ დო უკულ ბაბილონელეფქ ქიგიანთხესკო თინეფს დო ტყვეთ მიდეჸუნესკო (2 მეფ. 17:6–8, 13, 14; 2 მატ. 36:15–17, 20).

7. მუს ბგურაფლენთ თევრეშე, მუთ მოსექ თქუ? (ქოძირით სურათ).

⁷ მუს ბგურაფლენთ თავრეშე? იეჰოვაშ მორჩილება სიცოცხლეს მომღანა. ისრაელეფცალო, მიდგას აკაბცხა მეუძუდეს დუნაპირებ დიხაშა მინულაშა, ჩქი ხოლო გვალო ჭიჭე მემიძუნა ღორონთიშ დუნაპირებ ახალ ქვეყნიერებაშა, სოდეთ ჩქინ თოლო ბძირუნთ, მუჭო გინირთუ მთელ დედამიწა სქვამ სამოთხეთ (ეს. 35:1; ლუკ. 23:43). ახალ ქვეყნიერებას სატანა დო თიშ დემონეფ ვეჸუაფუნა, ვართ ტყურა რელიგია იჸუაფ, ნამუთ ხალხის ოჩილითუანს დო იეჰოვას უთხინუანს (გამოცხ. 17:16; 20:2, 3). ვეჸუაფ ადამიანურ მთავრობეფ ხოლო, მით ამდღა აჩაგრენს ხალხის (გამოცხ. 19:19, 20). სამოთხეს ვეჸუაფუნა ბუნტიშ ემატახალეფ (ფსალმ. 37:10, 11). არძა დემორჩილებ იეჰოვაშ სამართლიან კანონეფს, მუდგაშ შედეგო მთელ ქიანას ართობა დო მშვიდობა იჸუაფ. სამოთხეს მახორუ ადამიანეფს უჸორდან იჸი ართიან დო ონდუდან იჸი ართმაჟიას (ეს. 11:9). მართალო, მუ დიდებულ მომავალ მელუნა წიმი! იეჰოვას დევემორჩილებუთ-და, სამოთხეს ცხოვრებათ ხვალე ოშ დო ჟიროშ წანას ვარინ, მარადიულო გეფხარენთ (ფსალმ. 37:29; იოან. 3:16).

8. მუჭო მეხვარ ართ მისიონერს მარადიულ სიცოცხლეშე ფიქრიქ? (იუდ. 20, 21).

 ⁸ იეჰოვაშ დუნაპირებ მარადიულ სიცოცხლეშე ირიათო ქიფიფქრენთ-და, თენა მიმეხვარებუნა, მუდგანერ სირთულეს ვეშეფხვადათინ, ღორონთიშ ართგურეფქ ქუდოფსქიდათ (წეკითხით იუდაშ 20, 21). თე დუნაპირებშე ფიქრ თიშ ძალეფს ხოლო ქომუჩანა, ნამდა ვებრძოლათ სისუსტეეფს. ართ ჩქინ ჯიმა, მით ბრელ ხან რე, მუთ აფრიკას მისიონერო მსახურენს, მუდგარენ სისუსტეს ობრძოლუდ დო მინშა თიშ კეთებაშ სურვილ ურჩქინდუდ, მუთ იეჰოვას გურს უწყუნუანდ. თინა ალალას იჩიებ: „მუჟამსით ქიმეფხვად, ნამდა იეჰოვას ვედვემორჩილებუდ-და, სამოთხეს მარადიულო ცხოვრებაშ საშვალებას მივოდინუანდ, თექ უმოსო გინმოჭყვიდირაფუ, ვებრძოლიკო ჩქიმ სისუსტეს დო უმოსო ქივეხვეწიკო იეჰოვას, მიმეხვარუკო თიშა გერჯგინას. ღორონთიშ მოხვარათ ქოთ შემალებუ თექ დო ამდღა სუფთა სინდისით ვომსახურუქ თის“.

„ᲬᲐᲠᲛᲐᲢᲔᲑᲣᲚ ᲘᲸᲣᲐᲤᲣᲥ“

9. მუ სირთულეეფქ აჸუ მიკაულარქ დავითის?

⁹ დავით იეჰოვაშ ართგურ კოჩ დო თიშ გიშაგორილ ხალხიშ მეფე რდჷ. თინა მუსიკოს, პოეტ, მებრძოლ დო წინასწარმეტყველ ხოლო რდჷ. თის ბრელ სირთულე აფუდ გინოღალირ. წანეფიშ დინახალე მუშ დიხაშე რდჷ ნტებულ დო ატყობუდ მეფე საულს, მით თიშ ჸვილუას ოცადუდ. მეფეთ გინორთაშ უკულ, დავითის კინ აჸუ ონტებელქ დუდიშ გინასქილიდაფარო, მუშენდა მუშ ქომოლსქუა, აბესალომ, თიშ ჸვილუას ოცადუდ, ნამდა სამეფო ტახტ მიდუღუკო. მართალ რე, დავითიქ ქიანაშმადიდა სირთულეეფს შეხვად დო მუსხირენშა სერიოზულო ხოლო დაშუ იეჰოვაშ წოხოლე, მარა ღურაშახ ღორონთიშ ართგურქ ქუდოსქიდ, მუდგაშ გურშენ იეჰოვაქ თიშ გურშენ თქუ, „ჩქიმ გურს მოწონსინ ფერ კოჩ“ რენია. თეცალ კოჩიშ სიტყვეფშა მართალო ქორე ორჩქილე! (საქ. 13:22; 1 მეფ. 15:5).

10. მუშენ მეჩჷ რჩევა დავითიქ სოლომონს?

¹⁰ გუვარჩუათ, მუ რჩევა მეჩჷ დავითიქ მუშ ქომოლსქუას, სოლომონს, ნამუთ ისრაელიშ უკულიან მეფე იჸუაფუდ. იეჰოვაქ თე ახალგაზრდა გიშეგორ, ნამდა დავითიშ უკულ თიქ გაგრძელუკო წმინდა თაყვანიშმცემლობაშ ხეშენწყუალა დო აშენუკო ტაძარ (1 მატ. 22:5). თის მანგარ დიდ საქმე აჸიდ ოკეთებელ დო სირთულეეფს ხოლო ქეშეხვადუდ, მუდროსით იეჰოვაშ მოხვარა დესაჭირებუდ. მორთ ქობძირათ, მუ უწუ დავითიქ თის.

11. მუჭოთ 1 მეფეეფიშ 2:2, 3-შე იძირე, მუ უწუ დავითიქ სოლომონს დო მუჭო ეურთჷ თის მუამუშიშ ნარაგადიქ? (ქოძირით სურათ).

¹¹ მუ თქუ დავითიქ? (წეკითხით 1 მეფეეფიშ 2:2, 3). დავითიქ მუშ ქომოლსქუას უწუ, ნამდა იეჰოვას დემორჩილებუდ-და, წარმატებულ იჸუაფუდ. ქოთ თაშ იჸუ – სოლომონქ წანეფიშ დინახალე ქიანაშ წარმატებას მიოჭირინუ (1 მატ. 29:23–25). მაგალთო, თიქ აშენ იეჰოვაშ დიდებულ ტაძარ, თიშ სიტყვეფქ წმინდა წერილეფიშ ნამთინე წიგნის ქინიჭარ დო რე წიგნეფ, ნამუთ დუდშე ბოლოშა თიშ ნაჭარა რე. თეს გეძინელ,  სოლომონიშ სიბრძნეშ დო ქონებაშ გურშენ ირკოჩის აფუდ გაგებულ (1 მეფ. 4:34). მარა, მუჭოთ დავითიქ უწუ თის, წარმატებულ ხვალე თეიშახ იჸუაფუდ, ონდო იეჰოვას დემორჩილებუდ. სანარღოთ, სოლომონქ ორჩინელობას ოჭიშ ქურთინუ იეჰოვას დო შხვა ღორონთეფიშ თაყვანიშცემა ქიდიჭყჷ, მუდგაშ გურშენ ქოთ იეჰოვაშ მოწონა მიოდინუ დო ქოთ თიშე მეღებულ სიბრძნე, ნამდგათ სამართლიანო ხელმძღვანელენდჷ ქიანას (1 მეფ. 11:9, 10; 12:4).

12. მუს ბგურაფლენთ სოლომონშა რაგადებულ დავითიშ სიტყვეფშე?

¹² მუს ბგურაფლენთ თავრეშე? იეჰოვაშ მორჩილებას წარმატება მოუღ (ფსალმ. 1:1–3). მუშო ოკო რაგად, თინა ვა მოპირუნა, ნამდა ქომუჩანა ქონებას დო დიდებას, მუჭოთ თენა სოლომონიშ შემთხვევას აკეთ. მარა ღორონთიშ ართგურეფ ქიპჸით-და, თინა ქომუჩანა სიბრძნეს, ნამუთ სწორ გადაწყვეტილებეფიშ მეღებას მიმეხვარებუნა (იგავ. 2:6, 7; იაკ. 1:5). თიშ სიტყვას ინოჭარილ პრინციპეფს შეულებ მიმეხვარან, მუჟამსით გადაწყვეტილებეფს ბღებულენთ თიცალ საკითხეფწკუმა დაკავშირებით, მუნერით რე სამუშა, განათლება, გართობა დო ფარა. მუჟამსით თე პრინციპეფს გეგმიბრინუანთ, თხილერ იპჸით თიცალ მუდგარენეფშე, მუთ ღორონთწკუმა ურთიერთობას დო მარადიულ სიცოცხლეს მიმოდინაფუანდეს (იგავ. 2:10, 11). იეჰოვაშ მითითებეფიშ მეჸუნათ მაღვენუნა ბედნერ ოჯახურ ცხოვრება დო თეწკუმა ართო, გუვავითარენთ ღორონთწკუმა ხოლოშიან ურთიერთობას.

13. მუქ მეხვარ კარმენს, ქიმიოჭირინუკო ნამდვილ წარმატებას?

¹³ ართ და, კარმენ, ნამუთ მოზამბიკშე რე, ფიქრენდჷ, ნამდა წარმატებას უმაღლეს განათლება მოუღანდ. ათეშენ თიქ უნივერსიტეტის ჩაბარ დო არქიტექტურაშ გურაფა ქიდიჭყჷ. თინა იჩიებ: «მანგარო მოპწონდჷ, მუდგას ბგურაფლენდჷ, მარა თეს ბრელ დრო დო ენერგია ოსაჭირუდ. უნივერსიტეტის ოჭმარეშ 8-შ გვერდშე ონჯუაშ 6 საათშახ ვორდჷ. თეცალ განრიგიშ გურშენ შეხვალამეფშა დასწრება მიჭირდჷ დო იეჰოვაწკუმა ჩქიმ ურთიერთობაქ ხოლო გილელ. ფხვადუდ, ნამდა ვოცადუდ, „ჟირ ბატონს ართო ვემსახურიკო“» (მათ. 6:24). კარმენქ ქილოც დო დოგორ, მუს იჩიებუდ პუბლიკაციეფ თე საკითხიშ გურშენ. თინა აგრძელენს: „სულიერო მოწიფულ ჯიმალეფშე დო დიაჩქიმშე მეღებულ რჩევეფქ გინმოჭყვიდირაფუ, მივოტეკო უნივერსიტეტის გურაფა დო სრულ დროთ ვემსახურიკო იეჰოვას. თენა არძაშ უჯგუშ გადაწყვეტილება რდჷ ჩქიმ ცხოვრებას,  ნამდგას ართ წუთის ხოლო ვა მნარღენქ“.

14. მუ აზრ მიშაძუდ დავითიშ დო მოსეშ ნარაგადის?

¹⁴ მოსეს დო დავითის მანგარო უჸორდეს იეჰოვა დო უჩქუდეს, მუსხით მნიშვნელოვან რდჷ ღორონთიშ მორჩილება. თინეფქ შხვეფს დოუჩინეს, ნამდა მიაჸუნესკო თინეფიშ მაგალითის დო მუთუნით ვეჩეთხუესკო იეჰოვას. ქოთ დავითიქ დო ქოთ მოსექ გაფრთხილეს მუნეფიშ მარჩქილეეფ, ნამდა ღორონთის ოჭიშის ქურთინუანდეს-და, მიოდინუანდეს თიშ მოწონას დო კურთხევეფს. თინეფიშ რჩევეფ ამდღა ჩქინო ხოლო რე გურიშგაჩამალ. დავითიშ დო მოსეშ ღურაშე საუკუნეეფიშ უკულ იეჰოვაშ ხოლო ართ მსახურქ ენწყჷ, მუსხით მნიშვნელოვან რე ღორონთიშ ართგურობა.

„ᲛᲣᲗᲣᲜᲡ ᲕᲐ ᲛᲝᲣᲦ . . . ᲣᲛᲝᲡ ᲓᲘᲓ ᲮᲘᲝᲚ“

15. მუ გამოცდილება აფუდ შაყარელ მოციქულ იოანეს?

¹⁵ იოანე იესოშ საჸოროფო მოწაფე რდჷ (მათ. 10:2; იოან. 19:26). თინა ქრისტეწკუმა ართო მსახურენდჷ, მუშ თოლო ძირჷ თიშ სასწაულეფ დო თიშ ხასლას რდჷ სირთულეეფიშ დროს ხოლო. იოანე ორწყედ, მუჭო ჭოფეს იესო დო გათელებაშ უკულ ხოლო მიაჩ თიწკუმა შეხვალამაშ საშვალებაქ. იოანექ ძირჷ, მუჭო მირდჷ პირველ საუკუნეშ ქრისტიანულ კრებაქ დო მუჭო იჸუ სახიოლო ამბექ „მთელ ქიანას არძა ხალხშა . . . ქადაგებულქ“ (კოლ. 1:23).

16. მიშო რდჷ ჯგირობუაშ მუმაღალარ იოანეშ ნაჭარა წერილეფ ულირს დო მიშო რე ამდღა?

¹⁶ მოხუცებულობას, ღურაშახ გვალო ჭიჭე ხანით ადრე, მოციქულ იოანეს მიაჩ პატიქ, დოჭარუკო წმინდა წერილეფიშ წიგნ „გამოცხადება“, ნამდგას დიდებულ ხილუეფ რე ეჭარილ (გამოცხ. 1:1). თეწკუმა ართო, თიქ ჭარჷ ართ-ართ სახარება, ნამდგას მუშ სახელ გეძჷ, დო ხოლო სუმ წერილ. მოციქულქ თე სუმ წერილ მეჭარ ართგურ ქრისტიანს, გაიუსის, ნამუთ სქუაცალო უჸორდჷ (3 იოან. 1). მუშო ოკო რაგად, თიმ დროს ბრელ იჸუაფუდ თიცალ, მით იოანეს გაიუსცალო მთელ გურით უჸორდჷ. თე ართგურ ხანშამიშულირ მოციქულიშ ნაჭარა სიტყვეფ ამდღა ხოლო ელუკინანს გურშა ქრისტეშ მიმაჸუნალეფს.

17. 3 იოანეშ 4-იშ თანახმას, მუს მოუღ ნამდვილ ხიოლ?

¹⁷ მუ ჭარჷ იოანექ? (წეკითხით 3 იოანეშ 4). მუშ მასმა წერილს მოციქულქ ჭარჷ, მუშმაშხვა ხიოლ მოუღუდ თიშა თიშ ძირაფას, ნამდა და დო ჯიმალეფ ომორჩილუდეს იეჰოვას. თიმ პერიოდის კრებაშა ნამთინეს ტყურა გურაფეფ მიშუღუდ დო ართობას ოცილუდ. მარა რდესჷ თიცალეფ ხოლო, მით სიმართლეშ შარას გეჸუნდეს. თინეფ ომორჩილუდეს იეჰოვას დო მეჸუნდეს ღორონთიშ მცნებეფს (2 იოან. 4, 6). თე ქრისტიანეფ მუნეფიშ ართგურობათ ხვალე მოციქულ იოანეს ვარინ, იეჰოვას ხოლო უხარენდეს გურს (იგავ. 27:11).

18. მუს ბგურაფლენთ იოანეშ სიტყვეფშე?

 ¹⁸ მუს ბგურაფლენთ თავრეშე? იეჰოვაშ ართგურობას ხიოლ მოუღ (1 იოან. 5:3). მაგალთო, ჩქინდა დიდ ხიოლ მოუღ თიშ რჩქინას, ნამდა ღორონთის უხარენთ გურს. იეჰოვას გურ ხიოლით აფშაფ, მუჟამსით ორწყე, მუჭო გივორჯგინანთ ცდუნებეფს დო გეპჸუნთ ჭეშმარიტებაშ შარას (იგავ. 23:15). ჩქინ ართგურობაშ ძირაფა ხვალე იეჰოვას ვარინ, ანგელოზეფს ხოლო მანგარო ოხიოლუნა (ლუკ. 15:10). მუშო ოკო რაგად, ჩქი ხოლო მანგარო მოხიოლუნა, მუჟამსით ვორწყეთ, მუჭო სქიდუნა ჩქინ და დო ჯიმალეფ იეჰოვაშ ართგურეფ თხოზინიშ დო ცდუნებეფიშ დროს (2 თეს. 1:4). მალას, მუჟამსით სატანაშ ქვეყნიერება სადღამუშოთ მისპუ, არძას გურ კმაყოფილებათ მაჸინა ეფშა, მუშენდა შემალებუეს თე უდუნდებელ ქვეყნიერებას იეჰოვაშ ართგურეფქ ქუდოფსქიდითკო.

19. მუს იჩიებ რეიჩელ ჭეშმარიტებაშ შხვეფშა გურაფაშენ? (ქოძირით სურათ).

¹⁹ ჩქინდა მანგარ დიდ ხიოლ მოუღ შხვეფშა სახიოლო ამბეშ ქადაგებას. დომინიკელეფიშ რესპუბლიკას მახორუ ართ და, რეიჩელ, იჩიებ, მუშმადიდა პატი რე თიშო ხალხწკუმა ჩქინ დიდებულ ღორონთიშ გურშენ ჩიება. თინეფიშ გურშენ, მიდგას ბიბლიას ოგურუანს, რეიჩელ მირაგადუნა: „ნინათ ვეიჭარენ ფერ ხიოლ მოუღ ჩქიმდა თიშ ძირაფას, მუჭო ეჸოროფებუნა ჩქიმ ბიბლიაშ მაგურაფალეფს იეჰოვა, აძინუნა თიშ ნდობა დო ბრელ მუდგარენს თირანა ცხოვრებას, ნამდა გურ გაუხარან ღორონთის. თეშ ძირაფა მართალო ირნერ მსხვერპლშა ღირჷ“.

ᲗᲔ ᲥᲝᲛᲝᲚᲙᲐᲗᲐᲨ ᲡᲘᲢᲧᲕᲔᲤᲘᲨ ᲛᲔᲸᲣᲜᲐ ᲯᲒᲘᲠᲝᲑᲣᲐᲡ ᲛᲝᲘᲦᲐᲜᲐ

20. მუ საერთო მიღუნა ჩქი, მოსეს, დავითის დო იოანეს?

²⁰ მართალ რე, მოსე, დავით დო იოანე ბრელ ხანიშ წოხოლე ცხოვრენდეს დო თიმწკუმა გვალო შხვა დრო რდჷ, მარა ართიანწკუმა იშენით ბრელ საერთო მიღუნა. მაგალთო, ჩქი ხოლო თინეფცალო ჭეშმარიტ ღორონთის, იეჰოვას ვომსახურუთ, ლოცვათ ურაგადუთ, ვონდუთ დო ბგორუნთ თიშ ხელმძღვანელობას. თე ართგურ ხანშამიშულირ ქომოლკათაცალო, ჩქი ხოლო დარწმუნებულეფ ვორეთ, ნამდა იეჰოვა კურთხევეფს ვარკენს თინეფს, მით ომორჩილ თის.

21. მუ კურთხევეფ ელუნა თინეფს, მით მიაჸუნუნა მოსეშ, დავითიშ დო იოანეშ რაგადებულ სიტყვეფს?

²¹ თაშ ნამდა, მორთ მივაჸუნათ თე ხანშამიშულირ ქომოლკათაშ რაგადებულ სიტყვეფს დო დევემორჩილათ იეჰოვას. თაშ ქიმიფქციებუთ-და, ირფელს ნამდვილ წარმატებას ქიმვოჭირინუანთ დო იფცხოვრენთ „ბრელ ხანს“ - მარადიულო! (კან. 30:20). თეწკუმა ართო, ხიოლს მომღანა თიშ რჩქინა, ნამდა გურს უხარენთ ჩქინ მოჸოროფე ზეციერ მუმას, ნამუთ ასრულენს მუშ არძა დუნაპირებუს დო თიშე უმოსო მაკურთხენა, ვინემ ჩქი აზრო მუმალენა (ეფეს. 3:20).