ᲝᲒᲣᲠᲐᲤᲐᲚ ᲡᲢᲐᲢᲘᲐ 44
ᲝᲑᲘᲠᲔᲨ 33 იეჰოვას მიანდ სქან ოწუხებელი
მუ ოკო ვაკეთათ, მუჟამსით უსამართლოთ მოქცუნა?
„ვეგგორჯგინას უბადობაქ, სი გიორჯგინ უბადობას ჯგირით“ (ᲠᲝᲛ. 12:21).
ᲛᲘᲖᲐᲜ
ქობძირუნთ, მუ ოკო ვაკეთათ უსამართლოთ მოქცუნან თიმწკუმა, ნამდა სიტუაციაქ ხოლო უმოსო ვეგეუფრაშას.
1, 2. სო შილებე შეფხვადათ უსამართლობას?
ᲘᲔᲡᲝᲥ ართშა იგავ მიჸუნ ქომონჯღურელ ოსურიშ გურშენ, ნამუთ მოსამართლეს ოხვეწუდ, ჩქიმ საქმე სამართლიანო გეგნოჭყვიდია (ლუკ. 18:1–5). იესოშ მოწაფეეფშე ბრელ ჯგირო გაუგენდ თე ოსურკოჩის, მუშენდა მუნეფ ხოლო ხშირას ხვადუდეს უსამართლობას. თე იგავ ჩქინო ხოლო მანგარ საინტერესო რე, მუშენდა უსამართლობა ვართ ჩქინ დროს რე უცხო.
2 ქვეყნიერებას ადამიანეფ ართიანს მანგარ გლახათ ოქცუნა დო აჩაგრენა. ათეშენ ვამკვენა, მუჟამსით თინეფშე უსამართლობას შეფხვადუთ (ეკლ. 5:8). მარა უსამართლობა განსაკუთრებულო თიმწკუმა ალმოჭუანა გურს, მუჟამსით თის და დო ჯიმალეფშე შეფხვადუთ, მუშენდა თინეფშე თეს ვეველუთ. მუშო ოკო რაგად, და დო ჯიმალეფ ჩქინ მოწინააღმდეგეეფცალო მოფიქრებულო ვართუნა თეს, უბრალოთ, არასრულყოფილებაშ გურშენ აღოლენა მინშა თენა. იესოქ მუშ მაგალითით ქუმოძირუეს, ნამდა ოკო მიფთვინათ თი უსამართლობა, ნამდგას მოწინააღმდეგეეფშე ფხვადუთ. მოწინააღმდეგეეფშა ქუმაფუნა მათვინებელ-და, და დო ჯიმალეფს ხოლო უმოსო ოკო ვა მუთვინათო?! საინტერესო რე, მუს გინაფლენს იეჰოვა, მუჟამსით უსამართლობას შეფხვადუთ, იჸინო თენა ქვეყნიერებაშე დოვარ ორგანიზაციას. არძაართ აფუნო ღორონთის, მუშა მაფუნა გარზებელ?
3. სოვრეშე მიჩქუნა, ნამდა იეჰოვაშო არძაართ ვა რე, მუჭო მოქცუნა შხვეფ?
3 იეჰოვაშო მანგარ მნიშვნელოვან რე, შხვეფ მუჭო მოქცუნა. მუჭოთ ბიბლიას ჭარჷ, თინა „სამართლიანობაშ მოჸოროფე ღორონთ რე“ (ფსალმ. 37:28). იესო მარწმუნენა, ნამდა იეჰოვა, საჭირო დროს, „ხეთეშე გურჩქინანს სამართალს“ თინეფს, მით უსამართლობას ურზუნა (ლუკ. 18:7, 8). მალას თინა მოსპუნს ირნერ პრობლემას, ნამდგას ამდღა ვობრძოლუთ, დო ჩამთხინუანა არძანერ უსამართლობას ხოლო (ფსალმ. 72:1, 2).
4. მუჭო მოხვარუნა იეჰოვა?
4 ონდო იეჰოვა საბოლათ მოსპუნს უსამართლობას, თინა მოხვარუნა, ქუგურზათ თის (2 პეტ. 3:13). თინა მოგურუანა, უსამართლოთ მოქცუნან თიწკუმა მუ ოკო ფქიმინათ, ნამდა ხოლო უმოსო ვაგვაუფრაშათ სიტუაცია. ართ, მუდგათ იეჰოვა თეს მოხვარუნა, იესოშ მაგალით რე, სოვრეშეთ ვორწყეთ, მუჭო ოკო უპასუხათ უსამართლობას. თეწკუმა ართო, თინა მარზენა პრაქტიკულ რჩევეფს, მუ ოკო ვაკეთათ, მუჟამსით უსამართლოთ მოქცუნა.
ᲛᲣᲭᲝ ᲣᲞᲐᲡᲣᲮᲐᲗ ᲣᲡᲐᲛᲐᲠᲗᲚᲝᲑᲐᲡ
5. მუშენ ოკო ვორდათ ფრთხილას, მუჟამსით გინოპჭყვიდუნთ, მუთ უპასუხათ უსამართლობას?
5 მუჟამსით უსამართლობას ფხვადუთ, შილებე გურს მაწყუნან დო მნერვიანენდათ (ეკლ. 7:7). ღორონთიშ თიცალ ართგურ მსახურეფ ხოლო, მუნერეფით რდესჷ იობ დო აბაკუმ, ზუსტას თაშ გინაფლენდეს დუდის (იობ. 6:2, 3; აბაკ. 1:1–3). მართალ რე, ვა რე გასაკვირ, თეცალ გრძნობეფ მიღუდან, მარა ფრთხილას ოკო ვორდათ, მუჟამსით გინოპჭყვიდუნთ, მუთ უპასუხათ უსამართლობას, ნამდა მუდგაინ თიცალქ ვა მაჸუან კეთებულქ, მუთ ვეჸუაფ ჭკვერულ.
6. მუს ბგურაფლენთ აბესალომიშ შემთხვევაშე? (ქოძირით სურათ).
6 შილებე გინოპჭყვიდათ, ნამდა უსამართლობას მანგიორიშ გაფათ უპასუხათ, მუთ ვეჸუაფუდ სწორ. თეთ შილებე სიტუაცია უმოსო გუვაუფრაშათ. ქიგიფშინათ მეფე დავითიშ ქომოლსქუაშ, აბესალომიშ შემთხვევა. თიქ გერისხჷ, მუჟამსით ქიგეგ, ნამდა მუშ და, თამარ, თინეფიშ ჸონერ ჯიმაქ, ამნონქ, გაუპატიურ. მოსეშ კანონით, ამნონ ოჸვილარ რდჷ (ლევ. 20:17). მართალ რე, მუთუნ გასაკვირ ვა რდჷ, აბესალომქ გერისხუკო, მარა თის ვა უღუდ უფლება, მანგიორ გინუგუკო ამნონს დო მუქ დოჸვილუკო (2 სამ. 13:20–23, 28, 29).
აბესალომს დუდიქ ვაჭოფ, მუჟამსით მუშ დას, თამარს, უსამართლოთ მექცუეს (ქოძირით აბზაც 6)
7. მუჭო იმოქმედ უსამართლობაშ ძირაფაქ ფსალმუნმაბირეშა?
7 მუჟამსით ვორწყეთ, ნამდა გლახათ იქციებუნან ფერეფ ვესაჯებუნა, შილებე გურქ გემიოლან სწორას მოქციებაშა. ზუსტას თექ აღოლ ფსალმუნმაბირეს ხოლო, მუჟამსით ორწყედ, ნამდა უბადო კათა ართ მეჯინათ მართალეფიშ უჯგუშო ცხოვრენდეს. თიქ თქუ: „ამარ, უბადოეფ გვალო გემოშა ცხოვრენა“ (ფსალმ. 73:12). თინა თიცალ გურალაჭვილ რდჷ უსამართლობაშ მეჯინათ, იფიქრჷ, ნამდა ვა ღირუდ იეჰოვაშ მსახურება დო თქუ: „ვოცადუდ, ქინვანჭიკო თეს, მარა ძნელქ იჸუ ჩქიმო“ (ფსალმ. 73:14, 16). ფსალმუნმაბირე გეუძინანს: „დახე გინურთჷ შარაშე, დახე ემზგირტჷ კუჩხიქ“ (ფსალმ. 73:2). ზუსტას თეცალ მუდგარენქ აღოლ ართ ჯიმას. მორთ თის ალბერტო ქიგვოდვათ.
8. მუჭო იმოქმედ უსამართლობაქ ართ ჯიმაშა?
8 ალბერტოს კრებაშ ფარაშ ხირუა ქეკაწამეს, ვარინ თენა ვა უკეთებ. თის პასუხიშმგებლობეფქ მანწყჷ დო და დო ჯიმალეფწკუმა ხოლო გოუტირხჷ სახელქ, მუშენდა თე ამბე ბრელქ ქიგეგ. თინა იშინანს: „მანგარ გურმულირ, გაჟღამებულ დო ნაწყენ ვორდჷ“. ალბერტოქ თე გლახა გრძნობეფს ქიმეჩ საშვალება, თიშ სულიერობაშა ქიმოქმედუკო დო სოდგარენ ხუთ წანას არააქტიურ რდჷ. თე შემთხვევა ჯგირო ოძირანს, მუქ შილებე მაღოლან, უსამართლობას ქეშეფხვადუთინ, გარისხებაშა ვამმარიებუეს-და.
ᲘᲔᲡᲝᲪᲐᲚᲝ ᲛᲘᲗᲕᲘᲜᲘᲗ ᲣᲡᲐᲛᲐᲠᲗᲚᲝᲑᲐ
9. მუ დო მუ უსამართლობას გაურზჷ იესოქ? (ქოძირით სურათ).
9 იესოქ თიშ სრულყოფილ მაგალით დომტუეს, მუჭო ოკო მიფქცუათ, მუჟამსით უსამართლობას შეფხვადუთ. ქიგიშინით, მუ დო მუ უსამართლობას შეხვად თიქ, იჸიდუო თენა ოჯახიშ წევრეფშე დოვარ შხვეფშე. ნათესეეფ, მიდგას ვა წანდეს თიშ, იჩიებუდეს, ჭკუაშე გინულებუნია. რელიგიურ ლიდერეფ აბრალუაფუდეს, დემონეფიშ საქმეს ორთუნია. ოჭოფესინ თიმწკუმა, რომაელ ჯარიშკოჩეფ გაციგანუდეს თის, აწამენდეს დო ბოლოს გვალო დოჸვილეს (მარ. 3:21, 22; 14:55; 15:16–20, 35–37). მარა იესოქ ირფელ ქიმითვინ დო მანგიორ მითინშა ვეგნუგაფ. მუშ გურაფა შემლებუნა თიშე?
იესოქ სრულყოფილ მაგალით დომტუეს, მუჭო გაურზათ უსამართლობას (ქოძირით აბზაცეფ 9, 10)
10. მუჭო პასუხენდჷ იესო უსამართლობას? (1 პეტ. 2:21–23).
10 წეკითხით 1 პეტრეშ 2:21–23. a იესოქ თიშ სრულყოფილ მაგალით მუჩეს, მუჭო უპასუხათ უსამართლობას. თის უჩქუდ, მუჟამ ოკო იჩუკო დო მუჟამ უჯგუდ, შურო მუთუნ ვა თქუკო (მათ. 26:62–64). თინა ვა პასუხენდჷ არძა ტყურას, ნამდგას ეკაწამენდეს (მათ. 11:19). მარა, მუჟამსით გინოჭყვიდუნდჷ, პასუხ ქიმეჩუკო, შეურაცხყოფას ვემიორინუანდჷ დო ვარცქინანდჷ მოწინააღმდეგეეფს. იესოქ „დუდ ჩაბარ თის, მით სამართლიანო ასამართლენს“, ათეშენ ითვინენდჷ. იესოშო არძაშ უმოს მთავარ თინა რდჷ, ნამდა უჩქუდ, იეჰოვა ორწყედ უსამართლობას, ნამდგას თინა ურზუდ, დო ჯერდჷ, ნამდა საჭირო დროს ქიმკაჯინედ თე ამბეს.
11. მუჭო გუვაკონტროლათ ჩქინ ჩიება? (ქოძირით სურათ).
11 იესოშ მაგალითის თით ქიმვაჸუნუთ, ნამდა უსამართლოთ მოქცუნან თიმწკუმა გუვაკონტროლენთ ჩქინ ჩიებას. მინშა თისხით ჭიჭე ამბე ჭირსჷ, ნამდა ვა ღირჷ მუთუნიშ რაგად, დო მინშა თიშენ უჯგჷ, მუთუნ ვა ფთქუათ, ნამდა ხოლო უმოსო ვაგვაუფრაშათ სიტუაცია (ეკლ. 3:7; იაკ. 1:19, 20). მარა რე სიტუაცია, მუჟამსით საჭირო რე, ხონარ გეკიბღათ, ნამდა ქიგნვოდირთათ თის, მიდგას უსამართლოთ ოქცუნა, ვარდა ჩქინ რწმენა დეფცვათ (საქ. 6:1, 2). თეცალ დროს ოკო ვაგმოჭყორდან, ნამდა თენა მშვიდას დო პატიცემათ ვაკეთათ (1 პეტ. 3:15). b
მუჟამსით უსამართლობას ფხვადუთ, ოკო მივაჸუნათ იესოშ მაგალითის დო გურ ქუგუჩათ, მუჟამ დო მუჭო ფთქუანთ ორაგადეს (ქოძირით აბზაცეფ 11, 12)
12. მუჭო ვოძირანთ, ნამდა იეჰოვას ვაბარენთ ჩქინ დუდის?
12 იესოშ მაგალითის თით ხოლო ქიმვაჸუნუთ, ნამდა ქიმვანდენთ ჩქინ დუდის იეჰოვას, მით სამართლიანო ასამართლენს. მუჟამსით უსამართლოთ მოქცუნა, ბჯერა, ნამდა იეჰოვას უჩქჷ სიმართლე დო მუშ დროს ირფელს გეგშანწყუნს. თეშ რჩქინა მოხვარუნა, ქუგურზათ უსამართლობას. თეწკუმა ართო, სიტუაციაშ გიშასწორებას იეჰოვას ჩუვაბარენთ დო თის ქუჯინეთ-და, ვეგებრისხებუთ დო გურს ჟღამ ველმოსქიდუნა. თე ემოციეფს შეულებ მუდგაინ გლახა გუმოკეთებაფუან, ხიოლ მიდამღან დო იეჰოვაწკუმა ჩქინ ურთიერთობას ხოლო ეცილას (ფსალმ. 37:8).
13. მუ მიმეხვარებუნა, ქუგურზათ უსამართლობას?
13 მუშო ოკო რაგად, მუთუნით ვეშმალებენა სრულყოფილო ქიმვაჸუნათ იესოშ მაგალითის. მინშა შილებე თიცალ მუდგაინ გუვაკეთათ ვარდა ქოფთქუათ, მუდგას უკულ იმნარღენთ (იაკ. 3:2). მინშა შილებე უსამართლობაშ შედეგო მეღებულ ფიზიკურ ვარდა ემოციურ ტრავმაქ თე ქვეყნიერებაშ ბოლოშახ ვაჩმათხინუან. თქვა ხოლო თეცალ სიტუაციას ქორეთ-და, რჯერდან, იეჰოვას უჩქჷ, მუს ურზუთ. იესოს ხოლო არჩქილე თქვან, მუშენდა თიქ ხოლო ბრელ უსამართლობა მითვინ (ებრ. 4:15, 16). იესოშ მაგალითწკუმა ართო, იეჰოვა ბიბლიაშ საშვალებათ რჩევეფს ხოლო მარზენა უსამართლობაშ გარზებელო. მორთ ასე გუვარჩუათ ჟირ მუხლ რომაელეფიშ წიგნშე.
ᲗᲥᲕᲐᲜ ᲐᲛᲑᲔ „ᲦᲝᲠᲝᲜᲗᲘᲡ ᲓᲝ ᲗᲘᲨ ᲡᲐᲛᲐᲠᲗᲚᲘᲐᲜ ᲠᲘᲡᲮᲣᲐᲡ ᲥᲘᲛᲘᲐᲜᲓᲘᲗ“
14. მუს ნიშნენს „იეჰოვაშ სამართლიან რისხუას“ მივენდათ? (რომ. 12:19).
14 წეკითხით რომაელეფიშ 12:19. მოციქულ პავლე ქრისტიანეფს ელამჩანა, ჩქინ საქმე „იეჰოვაშ სამართლიან რისხუას“ ქიმვანდათ. თეს თიმწკუმა ვორთუთ, მუჟამსით სამართლიანობაშ აღდგენას იეჰოვას ვონდუთ დო საშვალებას ვარზენთ, მუქ გეგნოჭყვიდას, მუჟამ დო მუჭო გაკეთენს თეს. ართ ჯიმა, ჯონ, ნამდგას უსამართლოთ მექცუეს, თეცალ მუდგარენს იჩიებ: „დუდშა მაჸუ ობრძოლებერქ, ნამდა ჩქიმით ვევეცადიკო სამართალიშ დორთინაფას, მარა რომაელეფიშ 12:19-ქ მიმეხვარ, იეჰოვას ქოუჯინიკო“.
15. მუშენ რე ირფელიშ უჯგუშ, იეჰოვას ჩუვაბარათ პრობლემაშ მოგვარება?
15 პრობლემაშ მოგვარებას ჩქინით ვეცადათინ თიშ მანგიორო, უჯგუშ იჸუაფ, თე საქმე იეჰოვას ჩუვაბარათ. მუჟამსით ჩქინით ვოცადუთ პრობლემაშ გინოჭყვიდუას, თეს ბრელ ნერვიანობა დო ხშირას გურგოტახუა მოჸუნს, მარა თეშ კეთებას იეჰოვას ქიმვანდენთ-და, თე ირფელს ეიფჩილითუანთ. თის მთელ გურით ოკო ჩქინ მოხვარა დო მოპირუნა: „მა გინუგანქ“. თაშ ქოფთქუათინ, იეჰოვა თეცალ მუდგარენს მირაგადუნა: „მა ჩუმაბარ თე საქმე, მა მიკვოჯინექ!“. იეჰოვაშ ქობჯერან-და, მშვიდას იპჸით, მუშენდა მიჩქუნა, ნამდა ჩქინ პრობლემას არძაშ უჯგუშო თინა გეგნოჭყვიდუნს. ზუსტას თექ მეხვარ ჟიშე მოშინაფილ ჯონს ხოლო. თინა იჩიებ: „იეჰოვას ქოუჯინექ-და, თინა ჩქიმდე ბრელით უჯგუშო მაგვარენს ჩქიმ ამბეს“.
„ᲒᲘᲝᲠᲯᲒᲘᲜᲘᲗ ᲣᲑᲐᲓᲝᲑᲐᲡ ᲯᲒᲘᲠᲘᲗ“
16, 17. მუჭო მოხვარუნა ლოცვა, გივორჯგინათ უბადობას ჯგირით? (რომ. 12:21).
16 წეკითხით რომაელეფიშ 12:21. პავლექ ქრისტიანეფს თინა ხოლო ელამჩეს, ნამდა გივორჯგინათ უბადობას ჯგირით. გვალას ქადაგებაშ დროს იესოქ თქუ: „გიჸორდან თქვან ნტერეფ დო ილოცით თინეფშო, მით რთხოზუნა“ (მათ. 5:44). ზუსტას თენა აკეთ იესოქ ხოლო. ჩქი ბოლოშა წარმოდგენა ხოლო ვეშემლებუნა, მუშმადიდა უსამართლობა დო დამცირებაშა აჸუ იესოს გარზებელქ დო მუშმანწარა ჭუა გინიღ, მუჟამსით რომაელ ჯარიშკოჩეფქ ძელს მიკაჭკადეს.
17 თე ირფელიშ უმკუჯინუო, იესოშა ვეგურჯგინაფ უსამართლობას. თიშ მანგიორო, ნამდა იეჰოვაშა თინეფიშ დასაჯება უთხუდუკო, თიქ უწუ: „მუმა, ქაპატი თინეფს, მუშენდა ვა უჩქუნა, მუს ორთუნა“ (ლუკ. 23:34). უსამართლოთ მიმექცუესინ თინეფიშ გურშენ ქიბლოცენთ-და, თენა მიმეხვარებუნა, სიმშვიდე დიბრთინუათ, გურს ჟღამქ ველმოსქიდან დო დიფთირუათ თინეფიშ მიმართ დამოკიდებულება ხოლო.
18. მუჭო მეხვარ ლოცვაქ ალბერტოს დო ჯონს უსამართლობაშ გარზებას?
18 თე სტატიას მოშინაფილ ალბერტოს დო ჯონს ლოცვაქ მეხვარ უსამართლობაშ გარზებას. ალბერტო იჩიებ: „ირიათო ბლოცულენდჷ თი ჯიმალეფშო, მიდგაქ უსამართლოთ მიმექცუეს. იეჰოვას მუსხირენშა ფთხი, ქიმმეხვარუკო გურიშმოულაშ ჩათხინაფას დო თე ამბეშ გოჭყოლიდაფას“. მოხიოლუნა, ნამდა ალბერტო ამდღა კინ ართგურო ომსახურ იეჰოვას. მაჟია ჯიმა, ჯონ, იჩიებ: „ბრელშა იბლოც თი ჯიმაშ გურშენ, მიდგაქ გურ მიწყუნუ. იეჰოვას ფთხინდჷ, ქიმმეხვარუკო პატიებას დო თის, ნამდა ვაგვასამართლიკო თი ჯიმა. ღორონთიქ ქუპასუხ ჩქიმ ლოცვეფს დო ქიმმეხვარ, გიპჭყოლიდეკო წყენა დო დიბრთინეკო სიმშვიდე“.
19. მუ ოკო ვაკეთათ თე ქვეყნიერებაშ მოსპუალაშახ? (1 პეტ. 3:8, 9).
19 თე უბადო ქვეყნიერებაშ მოსპუალაშახ, მის უჩქჷ, ხოლო მუზმა უსამართლობას შეფხვადუთ. მარა მუდგაშა ვა გაჸუან გარზებელქინ, დღას ვემიოტუათ იეჰოვაშა მოხვარაშ თხუალა. თეწკუმა ართო, ქიგიშინით, მუჭო პასუხენდჷ იესო უსამართლობას, მიაჸუნით თიშ მაგალითის დო ირიათო გეგმირინეთ ბიბლიურ პრინციპეფ. თე ირფელს გაკეთენთ-და, რჯერდან, იეჰოვა ვამგარკენა კურთხევეფს (წეკითხით 1 პეტრეშ 3:8, 9).
ᲝᲑᲘᲠᲔᲨ 38 ღორონთ მერჩანს ძალას
