ᲝᲒᲣᲠᲐᲤᲐᲚ ᲡᲢᲐᲢᲘᲐ 46
ᲝᲑᲘᲠᲔᲨ 49 გურ გაუხარით იეჰოვას
ჯიმალეფ, ქოიღუნანო მიზანო, მომსახურექ ქიჸუათ?
„შხვაშა ჯგირიშ კეთებას უმოს ბედნერობა მოუღ, ვინემ თის, ნამდა აშო გიკეთენა ჯგირს“ (ᲡᲐᲥ. 20:35).
ᲛᲘᲖᲐᲜ
თე სტატიაშ მიზან რე, ელუჩას ნათილ ჯიმალეფს, ინჭუან მომსახურეთ მსახურებაშა დო ქოძირან, მუ მოთხოვნეფს ოკო აკმაყოფილენდან თეშო.
1. მუჭო უჯინედ პავლე მოციქულ მომსახურეეფს?
ᲛᲝᲛᲡᲐᲮᲣᲠᲔᲔᲤ მანგარ მნიშვნელოვან საქმეეფს ორთუნა კრებეფს. მოციქულ პავლე მანგარო აფასენდჷ თე ართგურ ჯიმალეფს. მაგალთო, თიქ ფილიპელეფშა მეჭარილ წერილიშ დაჭყაფუს უხუცესეფწკუმა ართო, ცალკე მიშინუ მომსახურეეფ ხოლო (ფილ. 1:1).
2. მუს იჩიებ ლუის მომსახურეთ მსახურებაშენ?
2 ბრელ ჯიმაშა, ვა უღჷ მნიშვნელობა ახალგაზრდეფ რენანო დოვარ ხანშამიშულირ, დიდ ხიოლ მოუღ კრებას მომსახურეთ მსახურებას. მაგალთო, ართ ჯიმაქ, დევინქ, 18 წანერ რდუნ თეშ დენიშნჷ მომსახურეთ. მარა ჯიმა ლუისიქ 50 წანას რდჷ გინოჩილათირინ თეშ მიღჷ თე პასუხიშმგებლობა. თინა იჩიებ: „და დო ჯიმალეფშე მანგარ დიდ ჸოროფას ბგინაფლენქ, ათეშენ მანგარო მოხიოლ თინეფშა მომსახურება, მუშენდა თეთ საშვალება მერზიებ, იშო ხოლო ქუვოგინაფუე ჩქიმ ჸოროფა“. თე სიტყვეფით ლუისიქ ბრელ მომსახურეშ ორაგადე თქუ.
3. მუს გუვარჩიენთ თე სტატიას?
3 ნათილ ჯიმა ქორექ დო მომსახურეთ დიო ხოლო ვამსახურენქ-და, ჯგირ იჸი, მიზანო გიღუდას, ქიმიოჭირინუე თე პასუხიშმგებლობას. მუქ შილებე გინგოჭყვიდირაფუას, ინჭუე მომსახურეობაშა დო მუ მოთხოვნეფს ოკო აკმაყოფილენდე, ნამდა მიღე თე პასუხიშმგებლობა? თე სტატიას თე კითხვეფს ქუპასუხენთ. მარა მორთ, დიო თით ქიდიპჭყათ, მუ საქმეეფს ორთუნა მომსახურეეფ კრებას.
ᲛᲣᲡ ᲝᲠᲗᲣᲜᲐ ᲛᲝᲛᲡᲐᲮᲣᲠᲔᲔᲤ ᲙᲠᲔᲑᲐᲡ?
4. მუ დო მუ დავალებეფს ასრულენა მომსახურე ჯიმალეფ კრებას? (ქოძირით სურათ).
4 მომსახურეეფ რენა წმინდა შურით დანიშნულ ნათილ ჯიმალეფ, მით უხუცესეფს ოხვარუნა კრებას შხვადოშხვა საქმეშ კეთებას. ნამთინე მომსახურე პასუხიშმგებელ რე, ნამდა მაუწყებელეფს ქოუღუდან უბანეფ დო ლიტერატურა მსახურებაშო. ნამთინე ხოლო დარბაზიშ დონწყუალაშ დო მიკოლუაფაშ საქმეს მონაწილენს. თეწკუმა ართო, თე ჯიმალეფ მომწესრიგებელეფო მსახურენა კრებაშ შეხვალამეფს დო აუდიო-ვიდეო აპარატურას მიკაჯინენა. მუჭოთ ვორწყეთ, უმენტაშო მომსახურეეფ ტექნიკურ საქმეეფს ორთუნა, მარა პირველ დო არძაშ უმოს მთავარ თინა რე, ნამდა თე ქომოლკათა სულიერო მოწიფულ ჯიმალეფ რენა, მიდგას უჸორა იეჰოვა დო ძვირფას და დო ჯიმალეფ დო ცხოვრენა ბიბლიურ ნორმეფით (მათ. 22:37–39). მუჭო შეულებ ჯიმას ოძირუას, ნამდა ინჭუაფ მომსახურეობაშა?
მომსახურეეფ იესოშ მაგალითის მეჸუნა დო მზათ რენა, იზრუნან შხვეფშა (ქოძირით აბზაც 4)
5. მუჭო ოძირანს ჯიმა, ნამდა მომსახურეობაშა ინჭუაფ?
5 ბიბლიას მოჩამილ რე მოთხოვნეფ, ნამდგას ჯიმა ოკო აკმაყოფილენდას მომსახურეთ დენიშნასინ (1 ტიმ. 3:8–10, 12, 13). მუთ შილებენ ჯგირო გეგმირკვი თე მოთხოვნეფ დო ირნერო ქეცად, დაკმაყოფილე თინეფ; თენა ქიმგეხვარებ, ქიმიოჭირინუე თე მიზანს. მარა პირველ რიგის, თიშე ოკო დეფიქრე, მუშენ გოკო მომსახურეთ მსახურება. ათეშენ მორთ, დიო თეშე ქიფჩუათ.
ᲛᲣᲨᲔᲜ ᲒᲝᲙᲝ ᲛᲝᲛᲡᲐᲮᲣᲠᲔᲗ ᲛᲡᲐᲮᲣᲠᲔᲑᲐ?
6. მუშენ ოკო გოკოდას პასუხიშმგებლობეფიშ მეღება? (მათ. 20:28; ქოძირით სურათ).
6 იესო ქრისტე, ნამუთ ირნერ საკითხის არძაშ უჯგუშ მაგალითის მარზენა, ირფელს იეჰოვაშ დო ადამიანეფიშ ჸოროფათ ორთუდ. ზუსტას ჸოროფაშ გურშენ ხანდენდჷ თეზმას ადამიანეფშო დო თანდაბლურო ომსახურუდ შხვეფს (წეკითხით მათეშ 20:28; იოან. 13:5, 14, 15). პასუხიშმგებლობეფშა ინჭუაფუქინ თიშ მიზეზ სქან შემთხვევას ხოლო ჸოროფა ქორენ-და, რჯერდას, იეჰოვა აუცილებერო ქიმგეხვარებ, ქიმიოჭირინუე მიზანს დო მომსახურექ ქიჸუე (1 კორ. 16:14; 1 პეტ. 5:5).
იესო მუშ მაგალითით ოგურუანს მოციქულეფს, ნამდა მაღალ მდგომარეობაშ მეღებაშე ინჭუანინ თიშ მანგიორო, თანდაბლურო მემსახურან შხვეფს (ქოძირით აბზაც 6)
7. მუშენ ოკო ვა უღუდას ჯიმას ეგოისტურ სურვილეფ?
7 ხშირას ქვეყნიერებას თიცალ ადამიანეფს განადიდენა, მით ირფელს ორთუნა, ნამდა შხვეფიშ თოლს მნიშვნელოვან პიროვნება რდანჷ. მარა იეჰოვაშ ორგანიზაციას თაშ ვა ხვადუ. ჯიმა, ნამდგას იესოცალო უჸორს ადამიანეფ, პასუხიშმგებლობაშა თიშენ ვენჭუაფ, ნამდა შხვეფს ეუნჩაშას ვარდა მანგარ მიდგარენო მირჩქინან. მომსახურეთ ვარდა უხუცესო თეცალ ამბიციურ კოჩიქ დენიშნ-და, ვეშიალებე კრებას და დო ჯიმალეფიშ მამსახურებელო თი საქმეეფიშ კეთება, ნამუთ თანდაბლობას ითხინს; თინა ვეშქიდანს თეცალ დავალებეფიშ შესრულებას (იოან. 10:12). იეჰოვა ვაკურთხენს თიცალ ჯიმალეფიშ მონდომას, მით სიამაყეთ დო ეგოისტურ მიზნეფით ინჭუაფუნა პასუხიშმგებლობეფშა (1 კორ. 10:24, 33; 13:4, 5).
8. მუ რჩევა მეჩჷ იესოქ მოციქულეფს?
8 მინშა იესოშ მოციქულეფს ხოლო ოკოდეს პასუხიშმგებლობეფიშ მეღება არასწორ მოტივეფით. მაგალთო, ართშა იაკობიქ დო იოანექ ქიმერთეს თიშა დო განსაკუთრებულ ადგილ ქოთხუეს ზეციერ სამეფოს. იესოშ თინეფშა ვა უცქვაფ დო ვა უთქუალ, მუ ჯგირ ქიმინით, თენა ფთხითიან. თეშ მანგიორო ვითოჟირხოლო მოციქულს თეცალ მუდგარენ უწუ: „მიდგას ოკო, თქვან შქას დიდ რდასჷ, თქვან მსახურ ოკო რდასჷ, დო მიდგას ოკო, თქვან შქას პირველ რდასჷ, არძაშ მონა ოკო რდასჷ“ (მარ. 10:35–37, 43, 44). თი ჯიმალეფ, მით სწორ მოტივეფით ინჭუაფუნა პასუხიშმგებლობეფშა, დო თე სწორ მოტივ შხვეფიშ მომსახურება რე, კურთხევა რენა კრებაშო (1 თეს. 2:8).
ᲛᲣ ᲒᲐᲘᲛᲐᲜᲒᲐᲠᲔᲜᲡ ᲗᲘᲨ ᲡᲣᲠᲕᲘᲚᲡ, ᲜᲐᲛᲓᲐ ᲘᲜᲭᲣᲔ ᲛᲝᲛᲡᲐᲮᲣᲠᲔᲝᲑᲐᲨᲐ?
9. მუ გაიმანგარენს პასუხიშმგებლობაშ მეღებაშ სურვილს?
9 ალბათ მანგარო გიჸორს იეჰოვა დო და დო ჯიმალეფ დო გოკო, მემსახურე თინეფს. მარა შილებე იშენით ვემგალედას გურ მომსახურეობაშა, მუშენდა ფიქრენქ, ნამდა საქმე მუგაძინუ. მუ გაიმანგარენს შხვეფიშ მომსახურებაშ სურვილს? დეფიქრ, მუშმადიდა ხიოლ მოუღ და დო ჯიმალეფიშ მოხვარას. იესოქ თქუ: „შხვაშა ჯგირიშ კეთებას უმოს ბედნერობა მოუღ, ვინემ თის, ნამდა აშო გიკეთენა ჯგირს“ (საქ. 20:35). იესო თე პრინციპით ცხოვრენდჷ დო თეს ხიოლ მოუღუდ თიშა. რჯერდას, თენა სი ხოლო ქუმოიღანს ბედნერობას!
10. მუჭო ოძირუ იესოქ, ნამდა ოხიოლუდ შხვეფიშ მომსახურება? (მარ. 6:31–34).
10 ქიგიფშინათ ართ შემთხვევა, სოვრეშეთ იძირე, ნამდა იესოშა ხიოლ მოუღუდ შხვეფიშ მომსახურებას (წეკითხით მარკოზიშ 6:31-34). ართშა თინა დო მუშ მოციქულეფ მანგარ შულადირეფ რდესჷ, ათეშენ გეგნოჭყვიდეს, თიცალ ადგილშა მიდართესკო, სოდეთ მითინ ვეჸიდ, ნამდა ჭიჭე ქიმისვანჯესკო. მუჟამსით ხალხიქ თენა ქიგეგ, ქუჭიშუეს თინეფს თე ადგილშა მეულა, მუშენდა იესოშ მორჩქილაფა ოკოდეს. თის შეულებუდ ვარია ქოუწუკო თე ხალხის, მუშენდა მუჭოთ ბიბლიაშე ბგებულენთ, იესოს დო მუშ მოციქულეფს „ოჭკუმშა ხოლო ვა ჩოდუდეს“. ვარდა ხოლო, იესოს შეულებუდ ჭიჭე ხანს ქეჩუკო თინეფს დო უკულ გოუტუკო. მარა თის მანგარო უჸორდჷ თე ხალხ, ათეშენ „ბრელ მუდგარენიშ გურაფა ქუდუჭყჷ“ თინეფს. იესო თიზმა ხანს ოგურუანდჷ თე ხალხის, ონჯუაქ ქუმაჭიშუეს (მარ. 6:35). თიქ თაშ თიშენ მიქცუ, ნამდა „მანგარო ეცოდ თინეფქ“ დო შურ დო გურით ოკოდ, მუდგაინ ქუდაგურუკო. თავრეშე ვორწყეთ, მუშმაშხვა ხიოლ მოუღუდ იესოშა შხვეფიშ მომსახურებას.
11. მუჭო იზრუნ იესოქ ხალხიშ ფიზიკურ საჭიროებეფშო? (ქოძირით სურათ).
11 იესოქ ხვალე გურაფას ვეგეჯერდჷ; თიქ სასწაულ გაკეთ დო თინეფიშ ფიზიკურ საჭიროებეფშო ქიზრუნ – ოჭკუმალ გარჩქინ დო მოწაფეეფს უწუ, ხალხის დაურიგესკო (მარ. 6:41). თეშნერო იესოქ მოწაფეეფს შხვეფიშ მომსახურება ქუდაგურუ დო ქაძირუ, ნამდა ართ მეჯინათ ტექნიკურ საქმეეფ ხოლო, მუნერსით ამდღა მომსახურეეფ ორთუნა, მანგარ მნიშვნელოვან რე. წერმიდგინით, მუჭო ოხიოლუდესკონ იჸიდ მოწაფეეფს იესოწკუმა თანამშრომლობა დო თე ოჭკუმალიშ ხალხშა რიგება, ონდო არძაქ ჯგირო ვა ჭკუმჷ (მარ. 6:42). იესო ხვალე თე შემთხვევას ვარინ, ირო შხვეფიშ ჯგირობუას გიორინუანდჷ მუშ დუდიშ წოხოლე; ონდო დედამიწას ქორდუნ, ირიათო შხვეფს ომსახურუდ (მათ. 4:23; 8:16). თიშა ხიოლ მოუღუდ შხვეფშა გურაფას დო თანდაბლურო მომსახურებას. რჯერდას, მომსახურექ ქიჸუენ თეშო ირფელს გაკეთენქ-და, სი ხოლო გეგმოცადუნქ თეცალ ხიოლს!
იეჰოვაშ ჸოროფა დო და დო ჯიმალეფიშ მომსახურებაშ სურვილ მიგეხვარებუნა, ნამ შეილებუნან ირფელ გაკეთათ კრებაშო (ქოძირით აბზაც 11) a
12. მუშენ ოკო ვეფიქრას ნამთინ ქრისტიანქ, ნამდა კრებას მუთუნშო ვეგმადირთუ?
12 მუთუნ განსაკუთრებულ უნარ ვაიღუნ ქოფიქრენქ-და, გურ ვეგიტახა. აუცილებერო გაღვენუ მუდგაინ ჯგირ, მუდგათ კრებას გეგმადირთუქ. ქილოც დო წეკითხ პავლეშ სიტყვეფ, ნამუთ 1 კორინთელეფიშ 12:12–30-ის ინოჭარ. თიშ ნარაგად ქუგოძირანს, ნამდა იეჰოვაშ არძა მსახურს უღჷ მუდგარენ თიცალ, მუდგათ შეულებ კრებას გეგმადირთას. მომსახურეობაშ მოთხოვნეფს დიო ვაკმაყოფილენქინ ქოძირუნქ-და, თეშე ხოლო ვეგიტახა გურ. ნამ შეილებუნ თინა გაკეთ, ნამდა გეგმადირთე იეჰოვას დო და დო ჯიმალეფს. რჯერდას, უხუცესეფ ხოლო გეთვალისწინენა სქან უნარეფს დო მუთუნით ვადგავალენა ვეშეილებუნ თიზმას (რომ. 12:4–8).
13. მუნერ რე თი მოთხოვნეფიშ უმენტაშ, ნამდგას მომსახურეეფ ოკო აკმაყოფილენდან?
13 ხოლო ართ მიზეზ, მუდგაშ გურშენ მომსახურეობაშა ოკო ინჭუე, თინა რე, ნამდა მოთხოვნეფიშ უმენტაშის, ნამუთ თე ჯიმალეფშო რე, არძა ქრისტიან თეშით ოკო აკმაყოფილენდას – არძაქ ოკო დევეახლოვათ იეჰოვას, მოხიოლუდან შხვეფშა ჯგირიშ კეთება დო ფცხოვრენდათ ღორონთიშ მოსაწონო. თაშ ნამდა, შილებე გვერდ საქმე უკვე კეთებულ გაფუდას. მორთ ასე უმოს ქიფჩუათ კონკრეტულ მოთხოვნეფშე, ნამუთ მომსახურე ჯიმალეფშო რე.
ᲛᲣ ᲝᲙᲝ ᲐᲙᲔᲗᲔ, ᲛᲝᲛᲡᲐᲮᲣᲠᲔᲥ ᲥᲘᲸᲣᲔᲜ?
14. მუს ნიშნენს, რდე „სერიოზულ“? (1 ტიმ. 3:8–10, 12).
14 მორთ გუვარჩუათ მოთხოვნეფ, ნამუთ 1 ტიმოთეშ 3:8-10, 12-ს რე მოჩამილ (წეკითხით). მომსახურე სერიოზულ ოკო რდასჷ. თე სიტყვაქ შილებე თეშნერო ხოლო ითარგმნას: „შხვეფ პატის ცენან ფერ“ დო „პასუხიშმგებლობაშ გრძნობა უღუნ ფერ“. სერიოზულ რდენ თენა ვა ნიშნენს, დღას ვეძიცუე დო ვეციგანე (ეკლ. 3:1, 4). თენა ნიშნენს, სქან პასუხიშმგებლობეფს სერიოზულო მეუდირთე. საიმენდო კოჩიშ სახელ ქოიღუნ-და, კრება პატის რცენდას იჸი.
15. მუს ნიშნენს მოთხოვნეფ „ართწკუმა ართის ოკო ვეჩიებუდას დო მაჟიაწკუმა – მაჟიას“ დო „შიბას ჰარამობათ დო უპატიოსნობათ ოკო ვაცადუდას“?
15 „ართწკუმა ართის ოკო ვეჩიებუდას დო მაჟიაწკუმა - მაჟიას“. თენა ნიშნენს რდე ალალ დო სანდო, სიტყვას ასრულენდე დო ვაღორენდე შხვეფს (იგავ. 3:32). „შიბას ჰარამობათ დო უპატიოსნობათ ოკო ვაცადუდას“. თენა ნიშნენს, პატიოსან რდე ფარაწკუმა დაკავშირებულ საკითხეფს. თანაქრისტიანეფ ფარაშ ოშიბელო ოკო ვეგმირინუე.
16. მუს ნიშნენს მოთხოვნა, „ბრელს ოკო ვა შუნდას“? ბ) მუს ნიშნენს მოთხოვნა, უღუდას სუფთა სინდის?
16 მოთხოვნა „ბრელს ოკო ვა შუნდას“ ნიშნენს, ნაბეტანს ვა შუნდე დო მაშუმალ კოჩიშ სახელ ვეგერძუდას. ოკო გიღუდას სუფთა სინდის, მუთ ნიშნენს, ნამდა იეჰოვაშ ნორმეფით ცხოვრენდე. მართალ რე, სრულყოფილ ვა რექჷ, მარა იეჰოვაწკუმა ჯგირ ურთიერთობა ოკო გიღუდას დო თიცალ მუდგარენს ოკო ვართუდე, მუდგაშ გურშენ გურ ბრალს ქიგერდვანს.
17. მუჭო შეულებ ჯიმას ოძირუას, „გეგმოდირთუ დო ვარ“ მომსახურეთ მსახურებაშო? (1 ტიმ. 3:10; ქოძირით სურათ).
17 „ოკო გეგმიცადას, გეგმოდირთუ დო ვარ თეცალ მსახურებაშო“. თენა ნიშნენს, ნამდა მომსახურეთ დანიშნებაშახ, დიო ოკო ქიძირას, სქანდა პასუხიშმგებლობეფ ინდებენ. ათეშენ, მუჟამსით უხუცესეფ მუდგაინს ქუდგავალენა, ქიმიაჸუნ თინეფშე დო ორგანიზაციაშე მეღებულ მითითებეფს. ჯგირო ქიგეგ, მუ გაფჷ ოკეთებელ დო მუჟამ ოკო იჸუას კეთებულქ თე საქმექ. არძა დავალებას მთელ მონდომათ შეასრულენქ დო შურ დო გურს ვა დარკენქ-და, თენა და დო ჯიმალეფიშ თოლს ხოლო ვემკაკორდუ დო ქოძირუნა, მუჭო მეურქ წიმი. ძვირფას უხუცესეფ, მამზადით ნათილ ჯიმალეფ (წეკითხით 1 ტიმოთეშ 3:10). ქორჸუნანო კრებას 15 წანერ ვარდა ხოლო უმოს ჭიჭე ასაკიშ მოზარდეფ, მით უკვე ნათილეფ რენა? ქოუღუნანო პირად გურაფა დო ქემზადებუნანო კრებაშო? ხშირას ქართუნანო კომენტარეფს დო ქომსახურენანო? თაშ ქორენ-და, ქიმეჩით თინეფს ჭიჭე-ჭიჭე საქმეეფ, ნამუთ თინეფიშ ასაკის დო მდგომარეობას მეურდას იჸი. თეშნერო გემკორჩქინდუ, ახალგაზრდა ჯიმა „გეგმოდირთუ დო ვარ თეცალ მსახურებაშო“, დო მუჟამსით 17 წანას გათენს, შილებე მზათ რდასჷ მომსახურეობაშო.
დიო მომსახურე ვა რენან ფერ ჯიმალეფშა დავალებეფიშ მეჩამათ უხუცესეფს შეულებუნა ქოძირან, გეგმოდირთუნან დო ვარ თინეფ თეცალ მსახურებაშო (ქოძირით აბზაც 17)
18. მუს ნიშნენს მოთხოვნა „მუთუნ ბრალ ოკო ვა უღუდას“?
18 „მუთუნ ბრალ ოკო ვა უღუდას“. თენა ნიშნენს, მითინს ვარაგადედას სქანდე, ნამდა მუდგაინს სერიოზულო აშენქ. მუშო ოკო რაგად, შილებე ქრისტიანეფს ტყურა ქეკმაწამან; იესოშა ხოლო ბრელშა ეკუწამებუნა ტყურა დო თიქ იწინასწარმეტყველ, ნამდა მუშ მიმაჸუნალეფს ხოლო თაშ მექციებუდეს (იოან. 15:20). თაშ ნამდა, შილებე სი ხოლო ქეგკაბრალან თიცალ მუდგაინ, მუთ ვა დაიშებ. მარა იესოცალო სწორას მოქციებას გაგრძელენქ-და, კრებაშ წოხოლე ჯგირ სახელ გაღვენუ (მათ. 11:19).
19. მუს ნიშნენს მოთხოვნა „ხვალე ართ ოსურ ოკო ჸუნდას“?
19 „ხვალე ართ ოსურ ოკო ჸუნდას“. დაქორწინებულ ქორექ-და, ოკო მიაჸუნე ქორწინებაწკუმა დაკავშირებით იეჰოვაშ დოდგინელ ნორმეფს. თიშ თოლს სწორ ხვალე ართ ოსურკოჩიშ დო ართ ქომოლკოჩიშ ართო ცხოვრება რე (მათ. 19:3–9). ათეშენ ქრისტიან ქომოლკოჩ მუშ ოსურიშ ართგურ ოკო რდასჷ დო დღას ვა უღალატას თის (ებრ. 13:4). მეუღლეშ ართგურობაშა თინა ხოლო მიშურს, ნამდა დღას ვეგმირჩქინე რომანტიკულ ინტერეს შხვა ოსურიშ მიმართ (იობ. 31:1).
20. მუს ნიშნენს მოთხოვნა „ჯგირო ოკო აწოჸუნდას სქუალეფს დო ოჯახის“?
20 „ჯგირო ოკო აწოჸუნდას სქუალეფს დო ოჯახის“. ოჯახიშ დუდ ქორექ-და, სერიოზულო ოკო მეუდირთე თე პასუხიშმგებლობას. ირიათო ჩატარ ოჯახურ თაყვანიშცემა, იმსახურ ოჯახიშ თითოულ წევრწკუმა მუთ შილებე ხშირას დო ქიმეხვარ სქან სქუალეფს, პირად ურთიერთობა გავითარან იეჰოვაწკუმა (ეფეს. 6:4). ქომოლკოჩის, ნამუთ ჯგირო მიკაჯინე მუშ ოჯახის, შეიალებე კრებაშა ხოლო ჯგირო იზრუნას (ქეშუდარით 1 ტიმოთეშ 3:5).
21. მუშ კეთება შეილებ, მომსახურე დიო ხოლო ვა რექ-და?
21 ჯიმალეფ, მომსახურე დიო ხოლო ვა რეთ-და, ქორთხინთ, ქილოცით დო დეფიქრით თე სტატიას მოჩამილ აზრეფშე. გეგმირკვით მომსახურეშ მოთხოვნეფ დო ირნერო ქეცადით, დაკმაყოფილათ თინეფ. ხოლო უმოსო ქიჸოროფეთ იეჰოვა დო და დო ჯიმალეფ, მუთ გეგნგოჭყვიდირაფუანა, მემსახურათ თინეფს (1 პეტ. 4:8, 10). ირფელ გაკეთით, ნამდა მომსახურექ ქიჸუათ დო რჯერდან, თენა დიდ ხიოლს ქუმოიღანა. იეჰოვას დოუხვამუდას თქვან მონდომა! (ფილ. 2:13).
ᲝᲑᲘᲠᲔᲨ 17 მზათ ვორექ
a ᲡᲣᲠᲐᲗᲘᲨ ᲔᲭᲐᲠᲣᲐ: კვარჩხან სურათის ვორწყეთ, ნამდა იესო თანდაბლურო ომსახურ შხვეფს. მარძგვან სურათის მომსახურე ოხვარ ხანშამიშულირ ჯიმას.
