1. მუს გინაფლენს იეჰოვა, მუჟამსით მუშ მსახურეფს ორწყე?

 ᲘᲔᲰᲝᲕᲐᲨᲝ არძაართ ვა რე, მუს გინაფლენა მუშ მსახურეფ; თინა ორწყე, მუ მოხიოლუნა დო მუ მიჭირა (ფსალმ. 37:18). იეჰოვას გურ ეხარებ, მუჟამსით ორწყე, ნამდა თიშ მსახურებას ნამ შემლებუნან ირფელს ვორთუთ, თიმწკუმა ხოლო, მუჟამსით ემოციურო მანგარ გლახათ ვორეთ. ხვალე თენა ვარინ, ჩქინ ზეციერ მუმას შურ დო გურით ოკო, ქიმმეხვარან დო გურშა ემქექუან.

2. მუს ორთჷ იეჰოვა გურგოტახილეფშო დო მუ ოკო აკეთან თინეფქ, ქაკონა „ნჭყოლირ ადგილქ“ დოუსქიდან-და?

² 147-ა ფსალმუნიშ მა-3 მუხლშე ბგებულენთ, მუნერ ჸოროფათ ზრუნენს იეჰოვა გურგოტახილეფშე. თე მუხლის ჭარჷ, ნამდა თინა ნჭყოლირ ადგილეფს უკირუნს თეცალეფს. თე სიტყვეფიშ კითხირიშ დროს შილებე გონებაშა მომირთან გემუან ხე უღუნ ფერ ექიმქ, ნამუთ მანგარ ფრთხილას უმუშენს ნჭყოლირ ადგილს პაციენტის. მარა ნჭყოლირქ დოუსქიდასინ, თიქ ოკო ქუდაჸუნას ექიმს. თეშნერო, ჩქი ხოლო ქუმოკონა, ემოციურ ჭუაშე დოფსქიდათ-და, ოკო მივაჸუნათ იეჰოვაშ რჩევეფს, ნამდგას მუშ სიტყვაშ საშვალებათ მარზენა. თე სტატიას გუვარჩიენთ, მუს ელუჩანს იეჰოვა თინეფს, მით გურგოტახილეფ რენა დო ქობძირუნთ თის ხოლო, მუჭო შეულებუნა თინეფს, მიაჸუნან თიშ რჩევეფს.

ᲘᲔᲰᲝᲕᲐ ᲛᲘᲠᲐᲒᲐᲓᲣᲜᲐ, ᲜᲐᲛᲓᲐ ᲫᲕᲘᲠᲤᲐᲡᲔᲤ ᲕᲝᲠᲔᲗ ᲗᲘᲨᲝ

3. მუშენ ურჩქინდუ ბრელს უღირსობაშ გრძნობა?

³ თე ქვეყნიერებას ჸოროფა დინაფილ რე, ათეშენ, ხშირას ადამიანეფ ართიანს მანგარ გლახათ ოქცუნა, მუდგაშ გურშენ ბრელს უღირსობაშ გრძნობა ურჩქინდუ. მაგალთო, ართ და,  ჰელენ, a იჩიებ: „თეშ მიბრდჷ, დიდა დო მუმაშე ჸოროფა დღას ვამგინაფ. მუაჩქიმ ბლახუნდეს დო ირდღას თის მირაგადუდეს, მუთუნშა ვა ღირუთია“. შილებე, ჰელენცალო, ჩქი ხოლო ჸოროფა ვამგინაფუნან თეშ მიბრდით, გლახათ მოქცუდეს დო ჩქინ მუთუნ ვა მოწონდეს. ათეშენ ამდღა შილებე მიჭირდან თიშ დაჯერა, ნამდა მიდგარენს მართალო უჸორთ.

4. მუშა მარწმუნენა ფსალმუნიშ 34:18?

⁴ შილებე შხვეფ გლახათ გოქცუდეს, მარა შეილებ რჯერდას, ნამდა იეჰოვას მანგარო უჸორქ დო ძვირფას რექჷ თიშო. მუჭოთ ბიბლიაშე ბგებულენთ, თინა „ხოლოს რე გურგოტახილეფწკუმა“ (წეკითხით ფსალმუნიშ 34:18). უღირსობაშ გრძნობა ქოიღუნ-და, რშუდას, ნამდა იეჰოვას სქან გურს ჯგირ ვა უძირუდუკონ, ვემეიჸუნანდ მუშ ხოლოშა (იოან. 6:44). თინა ირო მზათ რე სქან მახვარებელო, მუშენდა მანგარ ძვირფას რექჷ თიშო.

5. მუშ გურაფა შემლებუნა თევრეშე, მუჭო ოქცუდ იესო თინეფს, მით შხვეფს მუთუნო ვემიორჩქუდეს?

⁵ იეჰოვაშო მუსხით ძვირფასეფ ვორეთინ თეშ ძირაფა იესოშ მაგალითშე შემლებუნა. დედამიწას რდუნჷ თიმწკუმა იესო ყურადღებას აქციენდჷ დო ჯგირო ოქცუდ თიცალ ადამიანეფს ხოლო, მით შხვეფს მუთუნო ვემიორჩქუდეს (მათ. 9:9—12). მაგალთო, ართშა ართ ოსურქ იესოშ ბარგის ქიმეთხჷ ხე თი იმენდით, ნამდა ლახალაშე დოსქიდუდ. მუჭო მექცუ იესოქ თის? გურშა ეუქექუ დო ქაცქუ რწმენაშ გურშენ (მარ. 5:25—34). იესო სრულყოფილო გიმირჩქინანს მუამუშიშ თვისებეფს, ათეშენ შეილებ დარწმუნებულ რდე, ნამდა იეჰოვა ზუსტას თეშ ქიმგექციებ, მუჭოთ იესოქ მექცუ თე ოსურს (იოან. 14:9). ღორონთ ორწყე სქან ჯგირ თვისებეფს, მაგალთო, ორწყე, მუნერ ძალიერ რწმენა გიღჷ დო მუჭო გიჸორს თინა.

6. მუშ კეთება შეილებ, უღირსობაშ გრძნობა ქოიღუნ-და?

⁶ უღირსობაშ გრძნობა ქოიღუნ-და, წეკითხ დო დეფიქრ თი ბიბლიურ მუხლეფშე, სოვრეშეთ იძირე, ნამდა იეჰოვაშო მანგარ ძვირფას  რექჷ b (ფსალმ. 94:19). მუდგაინ მიზანშა ვემგაჭირინუ ვარდა შხვეფზმა ვა გაკეთებენ თიშ გურშენ გურგოტახილ ქორექ-და, ნაბეტან ვა მოთხუა სქან დუდის დო ირიათო თიშე ვეფიქრა, მუდგაშ კეთება ვეშეილებ. ვაგგოჭყორდას, იეჰოვა შეილებუნ თიშე უმოსიშ კეთებას ველჷ სქანდე (ფსალმ. 103:13, 14). ძალადობაშ ნამდგაინ ფორმაშ მსხვერპლ ქოჸოფექ-და, ვეფიქრა, ნამდა თექ სქან ბრალ რდუნჷ თიშენ მოხვად. სი მუთუნ შქას ვა რექჷ! რშუდას, იეჰოვა მიდგას დუშუესინ თის ვარინ, დუმაშებელს დასაჯენს (1 პეტ. 3:12). სანდრა, ნამუთ ბაღანობას ფიზიკურ ძალადობაშ მსხვერპლ რდჷ, იჩიებ: „იეჰოვას ირიათო თის ვოხვეწუქ, მუშ თოლით ქუმოძირას ჩქიმ დუდ დო თი ჯგირ თვისებეფ, მუდგას ორწყე“.

7. მუჭო შემლებუნა იეჰოვაშ მსახურებაშო გეგმიბრინუათ თი ირფელ, მუთ ულირს მაფუნა მიკნაულა?

⁷ რჯერდას, ნამდა იეჰოვას შეულებ გეგმოირინუას შხვეფიშ მახვარებელო. თიქ მერჩჷ პატი, მუწკუმა ართო იხანდე ქადაგებაშ საქმეს (1 კორ. 3:9). თი ირფელიშ უკულ, მუთ მიკორთჷ, ალბათ, უმოსო შეილებ ქინანჭე თინეფიშ გრძნობეფს, მიდგას ემოციურო უჭირს, ათეშენ ბრელ გაკეთებე თინეფიშ მახვარებელო. ჟიშე მოშინაფილ ჰელენს მანგარო მეხვარ იეჰოვაქ დო კრებაქ. თინა პიონერო მსახურენს დო ასე იშო ოხვარ შხვეფს. ჰელენ იჩიებ: „დუდ მუთუნო ვემმორჩქუდუნ ფერ ჰელენს იეჰოვაქ ჸოროფა ქუმოგინაფუ დო ასე შხვეფიშ მახვარებელო მირინუანს“.

ᲘᲔᲰᲝᲕᲐᲡ ᲝᲙᲝ, ᲛᲘᲑᲦᲐᲗ ᲗᲘᲨᲔ ᲞᲐᲢᲘᲔᲑᲐ

8. მუშა მარწმუნენა ესაიაშ 1:18?

⁸ ნამთინე იეჰოვაშ მსახურს ულირს კეთებულ გლახა საქმეშ გურშენ გურ ბრალს გედვანს. მარა ვაგგოჭყორდან, ნამდა იეჰოვას მანგარო უჸორთ დო მუშ სქუაშ სიცოცხლე ზუსტას ჩქინ ცოდეფიშ გიშაჸიდირალო დათმჷ. თის მთელ გურით ოკო, ვარია ვა ფთქუათ თე საჩუქარშე. იეჰოვა მარწმუნენა, ნამდა რახანს ართშა უკვე მუვაგვარით თიწკუმა საქმეეფ, c ანწ ულირს დაშებულიშ გურშენ ვა მოფთხინა პასუხის (წეკითხით ესაიაშ 1:18). მართალო, მუ მარდულ ვაფუთ ჩქინ მოჸოროფე მუმას, ნამდა ვეგიშინანს ჩქინ ცოდეფს! მარა, თეწკუმა ართო, მუთუნით ვეგიჭყოლიდუანს ჩქინ კეთებულ ჯგირ საქმეეფს (ფსალმ. 103:9, 12; ებრ. 6:10).

9. მუშენ ოკო ვეგნვაჸუნათ ულირს დაშებულშენ ფიქრის?

⁹ ულირს კეთებულ გლახა საქმეეფ სვანჯის ქოიდინუანან-და, ქეცადით, მთელ ყურადღება თიშა გეგნიღათ, მუდგაშ კეთება ამდღა შეილებუნა დო მუთ მომავალს გაკეთებენა. დეფიფქრათ პავლე მოციქულიშ მაგალითშე. მართალ რე, თინა ნარღენდჷ, ნამდა ართ დროს ქრისტიანეფს თხოზუდ, მარა თინა ხოლო არჩქილედ, ნამდა იეჰოვას პატიებულ აფუდ თიშა (1 ტიმ. 1:12—15). ათეშენ მოციქულ ვეგნოჸუნაფ ულირს დაშებულშე ფიქრის დო ვართ თი ირფელს მიანარღუდ, მუდგას იუდაიზმიშ მიმაჸუნალ რდუნჷ თიმწკუმა მიოჭირინუ (ფილ. 3:4—8, 13—15). თეშ მანგიორო, პავლეს მთელ ყურადღება იეჰოვაშ მსახურებაშა აფუდ გინოღალირ დო ინჭუაფუდ თიშა, მუთ წიმი ელუდ. პავლეცალო, თქვა ხოლო ვა გათირენა თი ირფელ, მუდგაქ ულირს მოხვად, მარა შეილებუნა ამდღა მიქცუათ იეჰოვაშ მოსაწონო დო მთელ ყურადღება თი დიდებულ მომავალშა გეგნიღათ, ნამდგას ღორონთ გოპირუნა.

10. მუ ოკო აკეთათ, ულირს კეთებულ თქვან გლახა საქმეთ მიდგაინს გურ ქუწყუნეთ-და?

¹⁰ შილებე თიშე ნერვიანენდათ, ნამდა ულირს კეთებულ თქვან გლახა საქციელით მანგარო უწყუნეთ მიდგაინს გურ. მუ მიგეხვარებუნა თეცალ დროს? მუთ შეილებუნან ირფელ გაკეთით, ნამდა გეგშანწყუათ გილალუაფირ სიტუაცია. თეწკუმა ართო, ალალას ქუწით  ბოდიშ თი პიროვნებას, მიდგას თქვან საქციელქ მანგარო ქალაჭვუ გურ, დო ქაძირეთ, ნამდა მთელ გურით ნარღენთ (2 კორ. 7:11). იეჰოვას ქოთხით, ქიმეხვარას თის. რჯერდან, ღორონთ ირფელს გაკეთენს, ნამდა ქოთ თქვა დო ქოთ თიქ გაგრძელათ თიშ მსახურება დო დირთინუათ შინაგან სიმშვიდე.

11. მუშ გურაფა შემლებუნა იონაშ მაგალითშე? (ქოძირით სურათ).

¹¹ ქიდიგურეთ ულირშე დო ქიმეჩით იეჰოვას საშვალება, თი საქმეშო გეგმოირინუან, ნამდგაშოთ გიშარგორუნა. ქიგიფშინათ წინასწარმეტყველ იონაშ მაგალით. მუჟამსით იეჰოვაქ თის ნინევეშა ულა უზოჯ, თიქ გვალო შხვადო მიდართჷ. ათეშენ იეჰოვაქ დასაჯ იონა დო წინასწარმეტყველქ ხოლო ქიდიგურუ მუშ შეცდომაშე (იონ. 1:1—4, 15—17; 2:7—10). იეჰოვას ხაზ ვეგნუსუმალ თიშა დო ხოლო ართშა უწუ, ნინევეშა მიდართუკო. თე შემთხვევას იონაქ ხეთეშე დემორჩილ იეჰოვაშ მითითებას. მართალ რე, იონა მანგარო ნარღენდჷ დაშებულს, მარა თენა ვეცილუ, ნამდა შეასრულუკო იეჰოვაშე მეღებულ დავალება (იონ. 3:1—3).

ᲘᲔᲰᲝᲕᲐ ᲛᲣᲨ ᲬᲛᲘᲜᲓᲐ ᲨᲣᲠᲘᲗ ᲔᲛᲥᲔᲥᲣᲐᲜᲐ ᲒᲣᲠᲨᲐ

12. მუჭო მარზენა იეჰოვა სიმშვიდეს, მუჟამსით უბედრობა გიმოტირხუნა? (ფილ. 4:6, 7).

¹² იეჰოვა მუშ წმინდა შურით ემქექუანა გურშა, მუჟამსით მუდგაინ უბედრობა გიმოტირხუნა დუდის. გუვარჩუათ ართ ჩილ დო ქომონჯიშ, რონიშ დო კეროლიშ შემთხვევა, მიდგას მანგარ გლახა ამბექ ქაღოლეს. თინეფიშ ბოშიქ დუდ დიჸვილ. რონ დო კეროლ იჩიებუნა: „ცხოვრებას მუდანერ გაჭირება ქუმაფუნა გინნაღელ, მარა ჩქინ სქუაშ ამბექ ირფელიშ უმოს ნწარექ მაჸუეს. თე ამბეშ უკულ ლურ ვა მიღუდეს დო მთელ სერს იეჰოვას ვეჩიებუდით ლოცვას, მუდგაშ უკულ თი ნამდვილ სიმშვიდეს ბგინაფლენდით, ნამუთ ფილიპელეფიშ 4:6, 7-ის რე ეჭარილ“ (წეკითხით). თქვან ცხოვრებას ხოლო მანგარ გლახა ამბექ ქუმოხვად დო გურშეჭირებულ ქორეთ-და, ალალას ქეჩით იეჰოვას, მუს გინაფლენთ. მუსხიშა დო მუზმა ხანს გოკონან თიზმა ხანს დურაგადეთ ღორონთის (ფსალმ. 86:3; 88:1). ირიათო ქოთხით, ვამგარკან მუშ წმინდა შურ. რჯერდან, იეჰოვა თეშ ვედიტენს თქვან ლოცვეფს დო აუცილებერო შეისრულენა ოთხუალს (ლუკ. 11:9—13).

13. მუჭო მოხვარუნა წმინდა შურ, გუვაგრძელათ იეჰოვაშ ართგურო მსახურება? (ეფეს. 3:16).

¹³ თქვან ცხოვრებას მოხვალამირ გლახა ამბექ ძალეფ მიდაიღეს-და, იეჰოვაშ წმინდა შურს შეულებ გუგამანგარან, ნამდა ვემიოტუათ თიშ ართგურო მსახურება (წეკითხით ეფესოელეფიშ 3:16). გუვარჩუათ ჩქინ დაშ, ფლორაშ, შემთხვევა. თინა დო თიშ ქომონჯ მისიონერეფო მსახურენდეს, მარა ართ დღას ფლორაქ ქიგეგ, ნამდა თიქ უღალატ, მუდგაშ უკულ ართიანს ჩეთხუეს. ფლორა იჩიებ: „გურ გოსოფილ ვორდჷ დო დღაშ დო სერით თე ამბეშე მაფიქრუაფუდ. ბლოცულენდჷ დო იეჰოვას ირიათო წმინდა შურს ფთხინდჷ, ნამდა გარზებაქ ქეშმალებუკო. ღორონთიქ გურშა ემქექუ დო ქიმმეხვარ, გეგნიბღიკო თი ამბე, ნამდგაშეთ დუდშე ფიფქრენდჷ, ნამდა მუთუნით ვეგნმაღინედ“. ღორონთიშ თეცალ ალარნაშ უკულ ფლორა უმოსო ონდჷ თის დო ჯერსჷ, ნამდა ანწ ხოლო მუდგა სირთულეს ვეშეხვადასინ, იეჰოვა ირფელს გეგნაღალაფუანს. თინა გეუძინანს: «119-ა ფსალმუნიშ 32-ა მუხლ ზუსტას ეჭარუნს, მუჭო მოხვარ იეჰოვა. თექ ჭარჷ: „მთელ გურით მეპჸუნქ სქან მცნებეფს, მუშენდა სი მიფართოენქ გურს“» (ფსალმ. 119:32; სქოლიო).

14. მუ ოკო ვაკეთათ, ნამდა წმინდა შურს ჩქინდა მოქმედებაშ საშვალება ქიმეფჩათ?

¹⁴ მუჭო ოკო მიქცუათ თიშ უკულ, მუთ ღორონთის წმინდა შურს ქოთხინთ? თიცალ საქმეეფ აკეთით, ნამუთ წმინდა შურს თქვანდა მოქმედებაშ საშვალებას მეჩანს. მაგალთო, ქეცადით, ირიათო ქიდესწრათ კრებაშ შეხვალამეფს დო ქუქადაგათ შხვეფს. თეწკუმა ართო, ირდღას წეკითხით ბიბლია, ნამდა იეჰოვაშ აზრეფით გეიოფშათ თქვან გონება (ფილ. 4:8, 9).  ყურადღება ქიმიაქცით თი ბიბლიურ პერსონაჟეფს, მიდგაქ სირთულეეფ გინიღეს, დო დეფიქრით, მუჭო მეხვარ იეჰოვაქ თინეფს გარზებას. დაჭყაფუს მოშინაფილ სანდრა, ნამდგაშ ცხოვრებას ქიანაშ გლახა ამბექ მოხვად, იჩიებ: „იოსებიშ შემთხვევა მანგარო ელამკინანს გურშა. თიქ ბრელ სირთულე დო უსამართლობა გინიღ, მარა იეჰოვაწკუმა ხოლოშიან ურთიერთობა ვა უდინუაფ“ (დაბ. 39:21—23).

ᲘᲔᲰᲝᲕᲐ ᲗᲐᲜᲐᲥᲠᲘᲡᲢᲘᲐᲜᲔᲤᲘᲨ ᲡᲐᲨᲕᲐᲚᲔᲑᲐᲗ ᲔᲛᲥᲔᲥᲣᲐᲜᲐ ᲒᲣᲠᲨᲐ

15. მი დო მუჭო ემქექუანა გურშა? (ქოძირით სურათ).

¹⁵ მუჟამსით ოწუხებელ მიღუნა, შილებე თანაქრისტიანეფ რდანჷ ჩქინ „გურიშ ემაქექაფალეფ“ (კოლ. 4:11). იეჰოვა და დო ჯიმალეფიშ საშვალებათ ხოლო მოძირანა მუშ ჸოროფას. რთულ სიტუაციეფს თანაქრისტიანეფ შილებე ჩქინწკუმა ართო რდანჷ, შურ დო გურით მომრჩქილუან, მუჟამსით ვეჩიებუთ, მუს ბგინაფლენთ, შილებე ნამდგაინ ბიბლიურ მუხლით ელამკინან გურშა ვარდა ჩქინწკუმა ართო ილოცან d (რომ. 15:4). მინშა ნამდგაინ დაქ ვარდა ჯიმაქ შილებე ქუგმოშინან, მუჭო უჯინე იეჰოვა შხვადოშხვა საკითხის დო თეშნერო მიმეხვარან, ვეგნვაჸუნათ წუხებას. თანაქრისტიანეფ ხშირას პრაქტიკულო ხოლო ელამრენა, მაგალთო, ოჭკუმალს მიკეთენა, მუჟამსით ჩქი მუთუნიშ დუდ ვა მიღუნა.

16. მუ ოკო ვაკეთათ შხვეფშე მოხვარაშ მიოღებელო?

¹⁶ და დო ჯიმალეფს მანგარო უჸორთ დო  მთელ გურით ოკონა ჩქინ მოხვარა (იგავ. 17:17). მარა თექ ქეშიალებუანინ, მინშა შილებე საჭიროქ იჸუას, იშო ქოფთხუათ თენა, მუშენდა შილებე ირო ვა უჩქუდან, მუს ბგინაფლენთ დო მუ მიჭირა (იგავ. 14:10). ემოციურო მანგარ გლახათ ქორეთ-და, ალალას ქუდურაგადეთ თქვან გრძნობეფიშ გურშენ სულიერო მოწიფულ მეგობრეფს დო თინა ხოლო ქუგაგებაფეთ, მუჭო შეულებუნა თქვან მოხვარა. შეილებუნა ართ ვარდა ჟირ უხუცესის ხოლო ქუდურაგადუათ, მიდგაწკუმა თავისფალო გინაფლენთ დუდის. ნამთინე დაქ შილებე ისხუნუას მოწიფულ დაწკუმა ქიჩუას მუშ გრძნობეფიშ გურშენ დო თიშე მიღას გურიშ ექექაფა.

17. მუქ შილებე მეცილან შხვეფშე გურიშ ექექაფაშ მეღებას დო მუ მიმეხვარებუნა, მივერუათ თე ირფელს?

¹⁷ მუჟამსით კოჩ ემოციურო გლახათ გინაფლენს დუდის, გასაკვირ ვა რე, ვაკოდას შხვეფწკუმა ურთიერთობა. მინშა შილებე და დო ჯიმალეფ ვენანჭუდან, მუს ბგინაფლენთ; ვარდა ხოლო მინშა მუნეფიშ სიტყვეფით გურუგუჩამუო ჭუაშა ჭუა ქიგემძინან (იაკ. 3:2). ვემეჩათ თე მიზეზეფს თიშ უფლება, ნამდა გურიშ ექექაფაშ მეღებაშე ვარია ქუგორაგადაფუან. მუთუნით ვენიკილათ თქვან დუდის. ართ უხუცეს ჯიმა, გავინ, ნამდგას დეპრესია უღჷ, იჩიებ: „მინშა თეშ ვორექ, ნამდა შურო ვა მოკო მეგობრეფწკუმა ჩიება დო თინეფწკუმა ართო რინა“. მარა გავინ თეცალ გრძნობეფს ვარზენს უფლებას, ქეცილას მეგობრეფშე მოხვარაშ მეღებას, მუდგაშ უკულ უჯგუშო გინაფლენს დუდის. ართ და, ემი, იჩიებ: „თიცალ მუდგარენეფ მაფჷ მიკნაულა, მანგარო მიჭირს ადამიანიშ ნდობა, მარა ვოცადუქ, იეჰოვაცალო, მიჸორდას დო ვონდუდე და დო ჯიმალეფს. თეშ კეთებათ ქოთ იეჰოვას უხარენქ გურს დო ქოთ მა ბგინაფლენქ ხიოლს“.

ᲘᲔᲰᲝᲕᲐᲨ ᲓᲣᲜᲐᲞᲘᲠᲔᲑᲣᲔᲤᲨᲔ ᲤᲘᲥᲠ ᲒᲣᲠᲨᲐ ᲔᲘᲥᲔᲥᲣᲐᲜᲐ

18. მუ მელუნა მომავალს დო მუ ოკო ვაკეთათ ამდღა?

¹⁸ შემლებუნა იმენდიშ თოლით უჯინათ მომავალს, მუშენდა მიჩქუნა, ნამდა მალას იეჰოვა ჩამთხინუანა ქოთ ფიზიკურ დო ქოთ ემოციურ ჭუას (გამოცხ. 21:3, 4). ბიბლიაშე ბგებულენთ, ნამდა თიმწკუმა ულირს მოხვალამირ გლახა „გურს ხოლო ვეშუწუხენს მითინს“ (ეს. 65:17). მარა, მუჭოთ გებგით, იეჰოვა ამდღა ხოლო მიკირუნა ნანჭყოლა ადგილეფს. თინა ბრელ მუდგარენს ორთჷ, ნამდა გურშა ემქექუან, ათეშენ მიღით თიშე მოხვარა. ართ წუთით ხოლო ვედგეეჭვან, ნამდა „თინა ზრუნენს თქვანდე“ (1 პეტ. 5:7).