ᲝᲒᲣᲠᲐᲤᲐᲚ ᲡᲢᲐᲢᲘᲐ 43
ᲝᲑᲘᲠᲔᲨ 90 ართიანს ელუდირთათ
მუ მიგეხვარებუნა ეჭვეფიშ ჩათხინაფას?
„ირფელ გურგედვალირო გეგმირკვით“ (1 ᲗᲔᲡ. 5:21).
ᲛᲘᲖᲐᲜ
ქობძირუნთ, მუჭო ჩეფთხინუათ ეჭვეფ, ნამდგაქ შილებე იეჰოვაშ მსახურებას მეცილან.
1, 2. ა) მუ ეჭვეფქ შილებე გოურჩქინდან იეჰოვაშ მსახურეფს? ბ) მუს გუვარჩიენთ თე სტატიას?
ᲛᲘᲜᲨᲐ არძა ასაკიშ ქრისტიანს შილებე გურჩქინდას ეჭვეფქ. a მაგალთო, წერმიდგინით თეცალ სიტუაციეფ: ახალგაზრდა მაუწყებელს ეჭვ ურჩქინდუ, ქორენ დო ვარ იეჰოვაშო ძვირფას, დო თენა შილებე ნათუაშ გინოჭყვიდუას ოცილუდას. ვარდა ჯიმას, ნამუთ უკვე შქა ხანშა რე მეულირ, ოთაკილ, ქოღირუდ დო ვარ ღორონთიშ მსახურებაშ პირველ ადგილს გერინაფა დო ქვეყნიურ კარიერაშე ვარიაშ რაგად, მუშენდა მუშ სამუშათ ოჯახის ეიჯუმუანს დო მეტ ვა რე. ვარდა ხოლო ხანშამიშულირ დას, ნამდგას ჯვეშობურო ვა უღჷ ჯანმრთელობა, ოკონ თისხი ვაკეთებე იეჰოვაშ მსახურებას დო თეშ გურშენ გურ უტირხუ. დღას გორრჩქინუნანო თეცალ კითხვეფ: მართალო ქუვორექო ძვირფას იეჰოვაშო? ქოღირუდუო იეჰოვაშ მსახურებაშ გურშენ მსხვერპლშა ულა? კინ ქუვორგუქო იეჰოვას მუთუნშო?
2 თეცალ ეჭვეფ გომრჩქინდუნან, ყურადღება ვემვაქცით დო თინეფიშ ჩათხინაფალო მუთუნ ვა ფქიმინით-და, შილებე ჭიე-ჭიეთ იეჰოვაშ მიმართ რწმენაქ მემდინან დო ბოლოს გვალო მივოტუათ თიშ მსახურება. თე სტატიას ქობძირუნთ, მუჭო მიმეხვარებუნა ბიბლიურ პრინციპეფიშ გიმორკვიება, მუჟამსით მოეჭვუნა: 1) ქუვორეთ დო ვარ იეჰოვაშო ძვირფას, 2) ქორდჷ დო ვარ ულირს მეღებულ ჩქინ გადაწყვეტილებეფ ჭკვერულ დო 3) კინ ქუვორგუთ დო ვარ იეჰოვას.
ᲛᲣ ᲕᲐᲙᲔᲗᲐᲗ ᲔᲭᲕᲔᲤᲘᲨ ᲩᲐᲗᲮᲘᲜᲐᲤᲐᲚᲝ?
3. მუ ოკო ვაკეთათ ეჭვეფიშ ჩათხინაფალო?
3 ეჭვეფიშ ჩათხინაფა ქუმოკონან-და, გომრჩქინდესინ თი კითხვეფშე პასუხეფიშ გორუა ღორონთიშ სიტყვას ოკო ქიდიპჭყათ. თენა რწმენას გამიმანგარენა, იეჰოვაწკუმა ჩქინ ურთიერთობას შეუნწყუნს ხეს დო მიმეხვარებუნა, ჭეშმარიტებას ვამვოჩირთათ (1 კორ. 16:13).
4. მუს ნიშნენს, ირფელ „გურგედვალირო“ გეგმიბრკვიათ? (1 თეს. 5:21).
4 წეკითხით 1 თესალონიკელეფიშ 5:21. დეკვირით, ნამდა თე მუხლის ბიბლია მირაგადუნა, ირფელ გურგედვალირო გეგმიბრკვიათ. მუჭო ოკო ვაკეთათ თენა? ართიანს ოკო ქეშუდარათ თინა, მუდგას ჩქი ფიფქრენთ დო თინა, მუდგას ბიბლია იჩიებ თე საკითხიშ გურშენ. მაგალთო, ჟიშე მოშინაფილ ახალგაზრდაშე დეფიფქრათ, ნამდგას ეჭვიქ გოურჩქინდჷ, ქორენ დო ვარ იეჰოვაშო ძვირფას. ოკო იფიქრასო, ნამდა, რახანს თე ეჭვიქ გოურჩქინდჷ მართალო ვა ნოღვე ღორონთიშ თოლს ფას? მუშო ოკო რაგად, ვარ. თიქ, გურგედვალირო ოკო გეგმირკვიას ირფელ დო ქოძირას, მუ მუდგას ფიქრენსინ თენა ქიმურენ დო ვარ თის, მუდგას იეჰოვა ფიქრენს თე საკითხშე.
5. მუჭო შემლებუნა იეჰოვაშე მიბღათ ჩქინ კითხვეფიშ პასუხეფ?
5 მუჟამსით ბიბლიას პკითხულენთ, იეჰოვა „მეჩიებუნა“. მარა ეჭვიქ გომრჩქინდესინ თი საკითხშე იეჰოვაშ აზრიშ გაგება ქუმოკონან-და, ოკო ვეფიფქრათ, ნამდა უბრალოთ ოკო იპკითხათ ბიბლია დო სოდგაინ ქობძირუნთ პასუხის. საჭირო რე, თე საკითხწკუმა დაკავშირებულ კონკრეტულ ბიბლიურ მონაკვეთეფ დობგორათ დო გეგმიბრკვიათ. თეშო იეჰოვაშ ორგანიზაცია ქიანაშ საშვალებას მარზენა (იგავ. 2:3—6). თეწკუმა ართო, ოკო იბლოცათ, ნამდა იეჰოვაქ ქომხელმძღვანელან გიმორკვიებაშ დროს დო დუმოგორაფუან ჩქინ კითხვაშ პასუხ. უკულ ოკო ქიდვეკვირათ ბიბლიურ პრინციპეფს დო პრაქტიკულ რჩევეფს, ნამუთ ჩქინ სიტუაციას მეურე. ქიმმეხვარებუნა ბიბლიაშე ღორონთიშ თიცალ მსახურეფიშ ამბეშ გიმორკვიება ხოლო, მიდგას ჩქინცალ ფიქრეფ დო გრძნობეფ ურჩქინდუდეს.
6. მუჭო შილებე კრებაშ შეხვალამეფქ ეჭვეფიშ ჩათხინაფას ქიმმეხვარან?
6 იეჰოვაქ კრებაშ შეხვალამეფიშ საშვალებათ ხოლო შილებე „ქუდომრაგადუან“. მუჟამსით ირიათო ვოსწრუთ კრებეფს, შილებე მოხსენებას ვარდა მიდგაინიშ კომენტარს თიცალ აზრ ქიმიბრჩქილუათ, ნამუთ ზუსტას ჩქინ ეჭვიშ ჩათხინაფას მიმეხვარებუნა (იგავ. 27:17). მორთით ასე თიშე ქიფჩუათ, მუჭო შემლებუნა დაჭყაფუს მოშინაფილ ეჭვეფიშ ჩათხინაფა.
ᲥᲣᲕᲝᲠᲔᲥᲝ ᲘᲔᲰᲝᲕᲐᲨᲝ ᲫᲕᲘᲠᲤᲐᲡ?
7. მუ კითხვაქ შილებე გურჩქინდას ნამთინეს?
7 დღას ქოიფიქრებუნანო თეცალ მუდგარენ: მართალო მნიშვნელოვან ქუვორექო იეჰოვაშო? თქვან დუდ მუთუნო ვემგორჩქუნან-და, შილებე იფიქრათ, ნამდა სამყაროშ გუმაჭყაფალ ღორონთწკუმა თქვან მეგობრობა დღას ვა მოხვადუნ ფერ ამბე რე. შილებე მეფე დავით ხოლო თაშ ფიქრენდუკო, მუშენდა თის მანგარო უკვენდჷ, ნამდა იეჰოვა უბრალო ადამიანეფს ხოლო აქციენს ყურადღებას. დეკვირით, მუს იჩიებ თინა: „იეჰოვა, მი რე ადამიან თეცალ, ნამდა ოკვირუქ თის, ღურა მოძუნ ფერ კოჩ, ნამდა ყურადღებას აქციენქ თის?!“ (ფსალმ. 144:3). მუჭო შეილებუნა ჩეთხინუათ თეცალ ეჭვ?
8. მუჭოთ 1 სამუელიშ 16:6, 7 დო 10—12-შე ბგებულენთ, მუს ოკვირ იეჰოვა?
8 ბიბლიაშე ბგებულენთ, ნამდა იეჰოვა თიცალ ადამიანეფს ხოლო აფასენს, მიდგას შხვეფიშ თოლს იშენდოიშენ პატი ვეგეძუნა. მაგალთო, ართშა იეჰოვაქ სამუელს ქუდავალ, იესეშ ჸუდეშა მიდართუკო დო უწუ, ნამდა თიშ ქომოლსქუალეფშე ართ-ართ იჸუაფუდ ისრაელიშ უკულიან მეფე. იესექ მუშ შქვით ქომოლსქუა გეგმიჸუნ. მარა არძაშე უკლაშშა, დავითშა, ვა დუძახებ. b ვარინ, ღორონთის გვალო თე ბოშ აფუდ გიშაგორილ მეფეთ (წეკითხით 1 სამუელიშ 16:6, 7, 10—12). იეჰოვა დავითიშ გურს ოკვირუდ დო ორწყედ, ნამდა თე ახალგაზრდას მანგარო უჸორდჷ თინა.
9. მუ მიგეხვარებუნა თიშ ძირაფას, ნამდა იეჰოვაშ თოლს ძვირფას რეთჷ? (ქოძირით სურათ).
9 დეფიქრით თი ირფელშე, სოვრეშეთ ირწყებე, ნამდა იეჰოვა პირადო თქვა გოკვირუნა. მაგალთო, თინა გარზენა თიცალ რჩევეფს, ნამუთ გვალო თქვან სიტუაციას მეურე (ფსალმ. 32:8). მუჭო აკეთებედ თენა, მანგარ ჯგირო ვაიჩინენდანინ?! (ფსალმ. 139:1). მუჟამსით გეგმირინუანთ იეჰოვაშ რჩევეფს დო ქოძირუნთ, მუ ჯგირ შედეგეფ მოუღ თინეფიშ მეჸუნას, ხოლო უმოსო დერწმუნებუთ, ნამდა თიშ თოლს მანგარ ძვირფას რეთჷ (1 მატ. 28:9; საქ. 17:26, 27). იეჰოვაშ თოლს ვართ თქვან ხანდა მიკაკორდუ დო ვართ თქვან ჯგირ თვისებეფ, ათეშენ თქვანწკუმა მეგობრობა ოკო (იერ. 17:10). თის მანგარო ახიოლე, თეშე ვარიას ვა უწინთ-და (1 იოან. 4:19).
„[იეჰოვას] გორუას ქუდუჭყანქ-და, დუდის ქუგოძირანს“ (1 მატ. 28:9) (ქოძირით აბზაც 9) c
ᲥᲝᲠᲓᲣᲝ ᲭᲙᲕᲔᲠᲣᲚ ᲣᲚᲘᲠᲡ ᲛᲔᲦᲔᲑᲣᲚ ᲩᲥᲘᲛ ᲒᲐᲓᲐᲬᲧᲕᲔᲢᲘᲚᲔᲑᲔᲤ?
10. მუ კითხვეფქ შილებე გომრჩქინდან, მუჟამსით ულირშე ფიფქრენთ?
10 მინშა შილებე დემეეჭვან, ქორდჷ დო ვარ ულირს მეღებულ ჩქინ გადაწყვეტილებეფ ჭკვერულ. მაგალთო, იეჰოვაშ მსახურებას უმოს გაკეთითკონ თიშ გურშენ, შილებე ვარია თქვითჷ ჯგირ სამუშაშე ვარდა თიცალ ბიზნესიშ წუმოჭყაფაშე, ნამდგას ჯგირ მოგება აღვენუდ. მიკილ წანეფქ, შილებე ვითობით წანაქ, დო ორწყეთ, ნამდა თქვან ნაჩინებუეფ, მიდგაქ მუშ დროს ფარაშ შიბას ეცადეს, თქვანდე ბრელით უჯგუშო ცხოვრენა. თეშ მიმაჯინუ, შილებე იფიქრათ: მართალო ქოღირუდუო მსხვერპლშა ულა იეჰოვაშ მსახურებაშ გურშენ? ხომ ვა უჯგუდ, მა ხოლო მიმუშებუდუკო დო ფარაშ შიბაშო მიფიქრებუდუკო?
11. მუ აზრეფ უსოფუანდჷ 73-ა ფსალმუნიშ მაჭარალს?
11 თეცალ ფიქრეფ თქვა ხოლო ქოისოფუანან-და, დეფიქრით, მუს გინაფლენდჷ 73-ა ფსალმუნიშ მაჭარალ. თინა ორწყედ, ნამდა ნამთინე ვამსახურუდ იეჰოვას, მარა თეშ იძირედ, ითამ თინეფს ვართ ფარა ორკუდეს, ვართ ჯგირ ჯანმრთელობა დო ონერვიანებელ ხოლო მუთუნ ვა უღუდეს (ფსალმ. 73:3—5, 12). თეშ ძირაფაქ ფსალმუნმაბირეს გურ გოუტახ დო იფიქრჷ, ნამდა იეჰოვაშ მსახურებას აზრ ვა უღუდ. მუჭოთ ბიბლიაშე ბგებულენთ, თის „მთელ დღას“ უსოფუანდჷ თეცალ აზრეფ (ფსალმ. 73:13, 14). მუქ მეხვარ თის, ჩეთხინუკო თე ფიქრეფ?
12. მუქ მეხვარ ფსალმუნმაბირეს ეჭვეფიშ ჩათხინაფას? (ფსალმ. 73:16—18).
12 წეკითხით ფსალმუნეფიშ 73:16—18. ფსალმუნმაბირექ იეჰოვაშ „წმინდა ადგილშა“ მიდართჷ. იეჰოვაშ თაყვანიშმცემელეფ შქას რინაქ მეხვარ თის, სწორას ქიდიჭყუკო თე საკითხიშ ჯინა. თიქ ქიმეხვად, ნამდა შილებედ ნამთინე ჭეხანს გემოშა ცხოვრენდუკო, მარა, მანგიორ, მომავალიშ იმენდ ვა უღუდეს. თეშ ინონჭაფაქ სიმშვიდე ქიმეჩ თის დო ქიმეხვად, ნამდა იეჰოვაშ მსახურებაშ პირველ ადგილს გერინაფა რდჷ ირფელიშ უმოს ჭკვერულ. შედეგო, დართჷ სურვილქ, ართგურო გაგრძელუკო იეჰოვაშ მსახურება (ფსალმ. 73:23—28).
13. მუ მიგეხვარებუნა სიმშვიდეშ დორთინაფას, მუჟამსით გოთაკილუნა, მუსხით ჭკვერულ ქორდჷ ულირს მეღებულ გადაწყვეტილებეფ? (ქოძირით სურათ).
13 ღორონთიშ სიტყვას შეულებ ქიმგეხვარან, ჩეთხინუათ ეჭვეფ დო დირთინუათ შინაგან სიმშვიდე. ხშირას ქიფიქრით, მუ განსხვავება რე თქვან დო თინეფ შქას, მით ვამსახურუნა ღორონთის. თქვა იეჰოვაშ მოწონა გიღუნა დო თიშე კურთხევეფს ღებულენთ, მარა თინეფ ხვალე მუნეფიშ დუდიშ დო თიშ იმენდო რენა, მუთ თე ქვეყნიერებას მიაჩინე თინეფშა. თქვა თიცალ სასწაულ მომავალიშ იმენდ გიღუნა, ნამდგაშ წარმოდგენა ხოლო მიჭირა ამდღა (ფსალმ. 145:16). მარა ღორონთის ვამსახურუნან თინეფს, მთელ ყურადღება თიშა აფუნა გინოღალირ, მუდგაშა ამდღა მიაჭირინენა, მუშენდა მომავალიშ მუთუნნერ იმენდ ვა უღუნა. დეფიქრით თეშე ხოლო: მითინს ვა მიჩქუნა, ჩქინ ცხოვრება მუჭო იშჷ, გვალო შხვა შარა გეგშამგორუდესკონ. მარა ართ მუდგარენ ზუსტას მიჩქუნა: თინა, მით ღორონთიშ დო ადამიანეფიშ ჸოროფაშ გურშენ მსხვერპლშა ურსჷ, დღას ვა წაგენს!
ხშირას იფიქრით თი კურთხევეფშე, ნამდგას ელუთ (ქოძირით აბზაც 13) d
ᲥᲣᲕᲝᲠᲒᲣᲥᲝ ᲘᲔᲰᲝᲕᲐᲡ ᲛᲣᲗᲣᲜᲨᲝ?
14. მუ სიტუაციას რე ღორონთიშ ნამთინე მსახურ დო მუ ეჭვიქ შილებე თინეფს გურჩქინდან?
14 ღორონთიშ ნამთინე მსახურს ხანიშ, გლახა ჯანმრთელობაშ ვარდა შხვა მიზეზიშ გურშენ, ღორონთშო თისხი ვაკეთებე, მუსხით გურით ოკო. ათეშენ თინეფს შილებე ოეჭვუდან, მუთუნს ქონიშნენსო თინეფიშ მსახურება იეჰოვაშო დო იფიქრან: კინ ქუვორგუქო ღორონთის მუთუნშო?
15. მუშ ჯერდჷ 71-ა ფსალმუნიშ მაჭარალს?
15 ზუსტას თაშ გინაფლენდჷ დუდის 71-ა ფსალმუნიშ მაჭარალ ხოლო. თინა იეჰოვას თხულენდჷ: „ვემმოტუა, მუჟამსით ძალა ქეშმელიებ“ (ფსალმ. 71:9, 18). მართალ რე, ფსალმუნმაბირეს ბრელიშ კეთება ვეშულებუდ, მარა ჯერდჷ, იეჰოვაშ ართგურ ქუდოსქიდუდ-და, მუშ ღორონთ ვემიოტენდჷ დო ქიმეხვარებუდ. ფსალმუნმაბირექ ქიმეხვად, ნამდა იეჰოვა იწონუანს დო მთელ გურით აფასენს თინეფს, მით ნამ შეულებუნან თის ორთუნა ღორონთშო (ფსალმ. 37:23—25).
16. მუჭო შეულებუნა ხანშამიშულირეფს, გეგმადირთან იეჰოვას? (ფსალმ. 92:12—15).
16 საჸოროფო ხანშამიშულირეფ, იეჰოვაშ თოლით ქუჯინით თქვან დუდის. შილებე ფიზიკურო ირჩინუდათ, მარა თინა მიგეხვარებუნა, სულიერო „გოფალირ“ რდათჷ (წეკითხით ფსალმუნეფიშ 92:12—15). თიშე ვეფიქრათ, მუშ კეთება ვეშეილებუნა; ყურადღება თიშა გეგნიღით, მუდგაშ კეთება შეილებუნა. მაგალთო, და დო ჯიმალეფს ოხვარუთ თით, ნამდა ღორონთიშ ართგურო მსახურებაშ მაგალითის არზენთ დო ყურადღებას აქციენთ შხვეფს. ქოუწით თინეფს, მუჭო გოხვარუდეს იეჰოვა წანეფიშ დინახალე დო მუნერ იმენდით ელუთ თიშ დუნაპირებუეფიშ შესრულებას. ვართ თიქ გუგოჭყორდან, მუშმადიდა ძალა უღჷ თქვან ლოცვეფს. ათეშენ ხშირას ქილოცით შხვეფშო (1 პეტ. 3:12). თაშ ნამდა, მუდგა სიტუაციას ვა ვორდათინ, არძას შემლებუნა მუდგარენიშ კეთება იეჰოვაშო დო შხვეფშო.
17. მუშენ ოკო ვეშუდარათ ჩქინ დუდ შხვეფს?
17 იეჰოვაშ მსახურებას ბრელ ვა გაკეთებენან თენა გურს ქოიტახუნან-და, რჯერდან, თინა მანგარო აფასენს თის, მუდგას თქვა ორთუთ. მუთუნით ვეშუდარათ ართიანს თინა, მუდგას თქვა ორთუთ დო მუდგას შხვეფ ორთუნა ღორონთშო, მუშენდა იეჰოვა ართიანს ველუჸუნუანს მუშ მსახურეფს (გალ. 6:4). მუჭოთ ფშუნა, მარიამქ მანგარ ძვირიან ზეთ გიობ იესოს კუჩხის (იოან. 12:3—5). მარა, ქომონჯღურელ ოსურქ ტაძარს ჟირ ჭიჭე მონეტა ინაჸათ, ნამდგას თიმ დროს მანგარ ჭიჭე ფას უღუდ (ლუკ. 21:1—4). იესოს თე ჟირ ოსურ ართიანშა ველუჸუნუაფ; თიქ ჟირხოლოშ საქციელს ძალიერ რწმენა ძირჷ. იესო მუამუშის გჷ, ათეშენ, შემლებუნა ბჯერდან, ნამდა იეჰოვა ხოლო მთელ გურით აფასენს ჸოროფათ კეთებულ ჩქინ საქმეეფს, ჩქი გვალო აკაბცხათ მიმორჩქუდანინ ხოლო.
18. მუ მიმეხვარებუნა ეჭვეფიშ ჩათხინაფას? (ქოძირით ჩარჩო „იეჰოვაშ სიტყვას შეულებ მიგეხვარას ეჭვეფიშ ჩათხინაფას“).
18 კანკალეშა არძას მირჩქინდუნა ეჭვეფ, მარა, მუჭოთ ბძირით, ღორონთიშ სიტყვას უღჷ ძალა, ქიმმეხვარან თინეფიშ ჩათხინაფას. ირნერო ქებრძოლით თქვან ეჭვეფს. მუჟამსით ირფელს გაკეთენთ თინეფიშ ჩათხინაფალო, დარწმუნებულ იჸით, ნამდა იეჰოვაშო ძვირფას რეთჷ. თინა მანგარო აფასენს თქვან მსხვერპლის დო აუცილებერო გაკურთხენა. რჯერდან, იეჰოვას მუშ თითოულ მსახურ ქიანაშა უსხუნ დო არძაშე ზრუნენს.
ᲝᲑᲘᲠᲔᲨ 111 ჩქინ ხიოლი
a ᲒᲐᲜᲛᲐᲠᲢᲔᲑᲐ: თე სტატიას ქობრაგადანთ თიცალ ეჭვეფშე, მუჟამსით მირჩქინდუნა კითხვეფ, ქუვორეთ დო ვარ იეჰოვაშ თოლს ძვირფას ვარდა ქორდჷ დო ვარ ულირს მეღებულ ჩქინ გადაწყვეტილებეფ ჭკვერულ. ჩიება ვეჸუაფ თიცალ ეჭვეფშე, ნამდგაქ შილებე ადამიანს ბიბლიურ გურაფეფიშ მიმართ გოურჩქინდას, მუთ იეჰოვაშ დო თიშ დუნაპირებუეფიშ მიმართ რწმენაშ სინაკლებეშ მაძირაფალ რე.
b ბიბლიას ვა ჭარჷ, ზუსტას მუზმა წანერ რდჷ დავით, მუჟამსით იეჰოვაქ გიშეგორ მეფეთ. მარა თინა თე დროს ბაღანა ბოშ იჸიდ. ქოძირით 2011 წანაშ 1 სექტემბერიშ „გინაჯინალ კოშკი“, გვ. 29, აბზ. 2 [ქორთ.].
