ბეთელელ ჯიმალეფ ართ წანაშე უმოსის მანგარო მუშენდეს, ნამდა ბოლოშა ქიმიჸუნესკო WBBR-იშ რადიოსადგურიშ შენება სტეიტენ-აილენდის (ნიუ-იორკ). ტერიტორია გასუფთესინ თიშ უკულ, თინეფქ აშენეს ჟირ შენობა — ართ რაიდიოსადგურს იმუშენდესინ თინეფიშ ოცხოვრებელო დო მაჟია სადგურშო საჭირო მოწყობილობეფშო. მშენებლობაქ გეთუნ, ჯიმალეფქ ქიდიჭყეს რადიომაუწყებლობაშ დაჭყაფალო საჭირო მოწყობილობეფიშ შიბა. მარა წიმი მუსხირენ სირთულე ელუდეს.

ართ სირთულე თინა რდჷ, ნამდა მანგარ ძნელქ იჸუ რადიოსადგურიშ მთავარ ანტენაშ გერნაფაქ. 91-მეტრიან ანტენა ოკო გოდვესკო ჟირ ჯაშ 61-მეტრიან სტოლბას, მუდგაქ პირველო ვეგშურთეს. მარა იეჰოვაშ მოხვარათ, საბოლათ, გეკეთინ თე საქმექ. ართ ჯიმაქ, კელვინ პროსერქ, ნამუთ თე პროექტის მუშენდჷ, თქუ: „თე საქმე ხეთეშე გეგშაფრთუმდესკონ, ალბათ, ირფელს ჩქინ დუდის ქიმვოჭარანდით დო ფთქუანდით, მუ მანგარ მუდგარენ ვაკეთითია“. თეშ მანგიორო, თე ჯიმალეფ წარმატებაშო იეჰოვას განადიდენდეს.

მარა პრობლემეფ თეთ ვათებე. თიმ პერიოდის რადიომაუწყებლობა ახალ მიშულირ რდჷ დო ახრებულო ვეშიდ საჭირო მოწყობილობეფ. ათეშენ, ჯიმალეფქ ხეთ ენანწყუა 500-ვატიან მეორად გადამცემ ქიჸიდეს დო მიკროფონიშ ჸიდირიშ მანგიორო, გეგნოჭყვიდეს, უბრალო ტელეფონ გეგმირინუესკო. ფრევალიშ თუთას, ართ სერს ჯიმალეფქ გეგნოჭყვიდეს, შეამოწმესკო, მუჭო იმუშენდ თინეფიშ ენანწყუა სისტემა. რადიოს მუდგაინ ოკო გოუტუესკო, ათეშენ, გეგნოჭყვიდეს, სამეფოშ ობირეშეფ ქიბირესკო. იბირდუნ თი ჯიმალეფშე ართ-ართ, ერნესტ ლო, იშინანდჷ ოძიცე  ამბეს, მუჭო ურეკ თინეფს ჯიმა რუტერფორდიქ, b ნამდგას სოდგარენ 25 კილომეტრიშ მაშორას მუშ რადიოთ ოუჭოფ თე ჯიმალეფიშ ბირა.

«თიქ ციგანებულო მიწუეს: „ათე წუთის მიოტეთ ბირა, კატუეფცალო ჸურანთ“». ჯიმალეფს ონჯღორექ დაგურეს დო გოთიშეს გადამცემ, მარა, მუთ მთავარ რე, ქიმეხვადეს, ნამდა მუნეფიშ გენწყილ რადიო ნომუშებუე დო მზათ რდესჷ მაუწყებლობაშ დაჭყაფალო.

1924 წანაშ 24 ფრევალს, მუჟამსით რადიომაუწყებლობა ოფიციალურო პირველო გოუტუეს, ჯიმა რუტერფორდიქ თქუ, ნამდა თინა გიმორნაფილ იჸუაფუდ თი საქმეშ ოკეთებელო, ნამუთ ქრისტეს აფუდ თინეფშა დავალებურ. რუტერფორდიქ თინა ხოლო გეუძინ, ნამდა თე რადიომაუწყებლობა ქიმეხვარებუდ არძანერ ადამიანს, ქინანჭესკო ბიბლიას დო ქიგეგესკო, მუ მნიშვნელოვან დროს ცხოვრენდეს.

ჯიმალეფიშ გოტებულ პირველ პროგრამას ჯგირ შედეგიქ მაჸუნ. უკულიან 33 წანას WBBR იეჰოვაშ მოწმეეფიშ რადიომაუწყებლობაშ ცენტრ რდჷ.

1924 წანაშ კვირკვეს ბიბლიაშ მარკვიებელეფქ კოლუმბუსის (ოჰაიო) კონგრეს ჩატარეს. თე კონგრესშა დასწრებელო, ხალხ მსოფლიოშ შხვადოშხვა კუნთხუშე რდჷ მოულირ. მოხსენებეფ კეთებულ რდჷ არაბულ, ბერძნულ, გერმანულ, ინგლისურ, იტალიურ, ლიეტუვურ, პოლონურ, რუსულ, სკანდინავიურ, უკრაინულ, უნგრულ დო ფრანგულ ნინეფშა. ნამთინე მოხსენება რადიოთ გინიჩამუდ. თეწკუმა ართო, ჯიმალეფქ ადგილობრივ გაზეთიშ გიშმაშქუმალარეფს ხოლო ქოთხუეს, მუნეფიშ გაზეთის ირდღას დობეშტუესკო სტატიეფ კონგრესიშ პროგრამაშ გურშენ.

ცააშხაᲡ, 24 კვირკვეს, 5 000-შე უმოს დელეგატიქ იდჷ მსახურებაშა. თინეფქ სოდგარენ 30 000 წიგნ გავრცელეს დო ანთასობით ბიბლიაშ გურაფა დიჭყეს. „გინაჯინალ კოშკის“ თე დღაშ გურშენ ჭარუდ, ნამდა თენა კონგრესიშ არძაშ უჯგუშ ნაწილ რდჷ.

მნიშვნელოვან მუდგარენქ მოხვად 25 კვირკვეს ხოლო, ობიშხა დღას. ჯიმა რუტერფორდიქ მუშ მოხსენებას კითხირებულ განცხადებათ გაბედულო მიდართჷ სამღვდელოებაშ წინააღმდეგ. თიქ თქუ, ნამდა პოლიტიკურ, რელიგიურ დო კომერციულ ლიდერეფ ვარზენდეს ხალხის საშვალებას, ქიგეგესკო ღორონთიშ სამეფოშ გურშენ, ნამუთ ადამიანეფს კურთხევეფს მოუღანდ. ჯიმა  რუტერფორდ განცხადებას თის ხოლო იჩიებუდ, ნამდა თე ლიდერეფ ხუჯის უკინენდეს „ერთა ლიგას“ დო ამტკიცენდეს, ნამდა თინა ღორონთიშ სამეფოშ წარმომადგენელ რდჷ დედამიწას. ბიბლიაშ მარკვიებელეფს მართალო დიდ გაბედულება დესაჭირებუდეს, ნამდა თე ირფელ ხალხის გეგნოჩესკო.

კოლუმბუსის ჩატარებულ კონგრესიშ გურშენ „გინაჯინალ კოშკის“ იჭარ, ნამდა თე კონგრესიქ გუმანგარ რწმენა და დო ჯიმალეფს დო ქიმეჩ გაბედულება, ნამდა მუდგა წინააღმდეგობას ვეშეხვადესკონ, ართგურო გაგრძელესკო ქადაგება. თე კონგრესიშ ართ-ართ დელეგატ, ლეო კლაუს, იშინანდჷ: „პროგრამაშ უკულ არძას შურ მოლუდეს, მუჟამ გინოფჩანდით ჯიმა რუტერფორდიშ რაგადებულ ამბეს ჩქინ ტერიტორიას მახორუ ხალხის“.

ოქტომბერიშ თუთას ბიბლიაშ მარკვიებელეფქ გავრცელეს მილიონობით ეგზემპლარ ბუკლეტიშ „სამღვდელოებაშ საქმეეფიშ გიმოარგამება“, სოდეთ მოჩამილ რდჷ თი ამბე, ნამუთ ჯიმა რუტერფორდიქ მუშ მოხსენებას იჩუ. ოკლაჰომაშ ჭიჭე ქალაქის, კლივლენდის, ფრანკ ჯონსონ ავრცელენდჷ თე ბუკლეტეფს. მუშ ტერიტორიას ბუკლეტეფიშ გავრცელებას გათენდუნ უკულ შხვა და დო ჯიმალეფს ოკო შეხვადუკო, მარა თინეფიშ მოულაშახ 20 წუთით ადრე გათუ მუშ ტერიტორიაშ დამუშება. თის ქუჩას ვაჯინნედ და დო ჯიმალეფშა, მუშენდა თი ქალაქიშ მახორუეფ მანგარ გაღიზიანებულეფ რდესჷ თიშ ქადაგებათ დო გორუნდეს. ათეშენ ჯიმა ფრანკიქ გინოჭყვიდ, დიტყობუკო ეკლესიას, ნამუთ თი ტერიტორიაშ გოხოლუას რდჷ, სოდეთ ქადაგენდჷ. დინახალე გემნორთჷ დო ქოძირ, მითინ ვა რდუნჷ, ბუკლეტ, ნამდგას ავრცელენდჷ, ქოთ მღვდელიშ ბიბლიას ქიმშადვჷ დო ქოთ არძა სკამს ქიგედვჷ. თიშმამალას გაკეთ თე ირფელ, ნამდა დროქ ქუდასქიდ, ხოლო ჟირ ეკლესიაშა გემნორთუკო დო თექ ხოლო ქიდიტუკო ბუკლეტეფ.

ჯიმა ფრენკიქ რულაიათ მიდართჷ თი ადგილშა, სოდეთ და დო ჯიმალეფს ოკო შეხვადუკო, კალონკაშ უკახალე ქიმკიტყობ დო თოლს ვა უთხინუანდჷ თი კათას, მით თის გილაგორუნდჷ. თე კოჩეფქ თეშ მიკულუეს კალონკას, ნამდა ფრენკ შურო ვა უძირუნა. თინეფიშ ულა დო და დო ჯიმალეფიშ მოულა ართ რდჷ. თინეფქ ფრენკ ქიმთიხუნუეს დო მიდართეს.

თექ რდუნჷ თინეფშე ართ ჯიმა იშინანდჷ: „ეპყარითინ, სუმ ეკლესია მიკოფრთით. თითოწკუმა სოდგარენ 50 კოჩ ქორდჷ გერდუნ. ნამთინე კითხულენდჷ ბუკლეტის დო ნამთინე მღვდელს ოძირანდჷ. მანგარ დროს უჭიშეთ თექიანობაშ დოტება. მარდულ ვაფუდით იეჰოვას, ნამდა დოფთხილუეს დო ქომუჩეს გონიერება, თეშ გეგნოფჩითკო ცნობა, ნამდა ჩქინდა მითინს მუთუნქ ვა დაშებუ“.

ბიბლიაშ მარკვიებელეფ შხვა ქიანეფს ხოლო გაბედულო ქადაგენდეს სამეფოშ ცნობას. მაგალთო, ჩრდილოეთ საფრანგეთის ჯიმა იუზეფ კრეტ უქადაგუდ მაღაროშ მუშეფს, მით პოლონეთშე რდესჷ მოულირ. თიქ დაგეგმჷ ხალხშა მოხსენებაშ კითხირ, ნამდგაშ სათაურ რდჷ „მალას ღურელეფიშ გათელება იჸუაფ“. ბიბლიაშ მარკვიებელეფქ ქალაქიშ მახორუეფ ქუდაპატიჟეს თე მოხსენებაშა. თექიან მღვდელქ მუშ მრევლ გაფრთხილ, მუთუნით ვედათია, მარა პირიქით ქუმოხვად — მოხსენებაშ მარჩქილაფშა 5 000-შე უმოს კოჩიქ ქიმერთჷ, თინეფ შქას თე მღვდელქ ხოლო. ჯიმა იუზეფიქ თის უწუ, მუქ ხოლო გეგშართუკო დო ხალხიშ წოხოლე ქიჩუკო მუშ რწმენაშენ, მარა თიქ ვარია უწუ. ჯიმა იუზეფ ორწყედ, ნამდა ხალხის მანგარო ოკოდ ღორონთიშ სიტყვაშ გურშენ უმოსიშ გაგება, ათეშენ, მუთ ქოუღუდუნ, არძა ლიტერატურა ქიმეჩ თინეფს (ამოს. 8:11).

აფრიკას, „ოქროშ წყარპიჯის“, ნამდგას ამდღა განა ჯოხო, სახიოლო ამბე პირველო ჯიმა კლოდ ბრაუნქ იქადაგ. თიშ კითხირებულ მოხსენებეფიშ დო გავრცელებურ პუბლიკაციეფიშ ჭყოლოფათ ხეთეშე ბრელ ადამიანქ ქიგეგ ჭეშმარიტება. თინეფშე  ართ-ართ რდჷ ჯიმა ჯონ ბლანკსონ, ნამუთ ფარმაცევტიკას გურაფლენდჷ. თიშ უკულ, მუთ ჯიმა კლოდიშ მოხსენება მირჩქილუ, თიქ ხეთეშე ქიმეხვად, ნამდა თენა ჭეშმარიტება რდჷ. თინა იშინანდჷ: „ჭეშმარიტებაშ გაგებაქ თიცალ ხიოლ მომიღ, ნამდა ბგურაფლენდინ თექ ირკოჩის უქადაგუდ“.

ართ დღას ჯონქ ანგლიკანურ ეკლესიაშა ქიმერთჷ დო მღვდელს სამებაშ გურშენ კითხვეფ ქუდუსვჷ, მუშენდა ქიგეგ, ნამდა თინა ვა რდჷ ბიბლიურ გურაფა. მღვდელქ ღვარაფით გეგმაჸათ თინა ეკლესიაშე დო ურაგადუდ: „სი ქრისტიან ვარ, ეშმაკიშ მოციქულ რექჷ. დიწიმინდ თავრეშე!“.

ჸუდეშ მეულირს, ჯონქ მღვდელს წერილ ქიმეჭარ დო უწუ, სამებაშ გურშენ ხალხიშ წოხოლე ქიჩუკო დო გენწყუკო თე გურაფა. თიქ პასუხო ჯონის მოჭარ, ნამდა მუშ სასწავლებერიშ დირექტორშა გემნორთუკო. დირექტორქ თის კითხჷ, მართალო მეჭარიაო წერილ მღვდელს.

„ქო, მეპჭარ“, უპასუხ ჯონიქ.

დირექტორქ ჯონს უწუ, მღვდელს წერილ ქიმეჭარუკო დო ბოდიშ ქოუწუკო. ჯონიქ მღვდელშო თეცალ წერილ დოჭარ:

„ჩქიმ დირექტორქ ფთხუ, ბოდიშ ქომთქუალუდუკო თქვანდა, დო ქოთ მზათ ვორექ ბოდიშიშ ორაგადეთ, ოღონც ოკო აღიარათ, ნამდა, მუდგას ოგურუანთ, ტყურა რე“.

დირექტორქ გაკვირებულო კითხჷ ჯონს: „სი ათეშ მეჭარუა გილამუნო მღვდელშა?“.

„ქო პატიცემულ, მეტ მუთუნ ვა მიღჷ ორაგადე“, უპასუხ ჯონქ.

„გიჩქუდას, გუგარიცხენქ სასწავლებერშე! სახელმწიფო რელიგიაშ მღვდელს თაშ ურაგადუქ დო თიშ იმენდ გიღუნო, ნამდა სახელმწიფო სასწავლებერს დოიტენქ?!“.

„ქო მარა პატიცემულ, თქვან ლექციეფიშ დროს მუდგაინს ვეგებგენთ-და, კითხვაშ დოსუმალა ხომ ქიშილებე?“.

„ქო, მუჭო ვარ“.

„მღვდელწკუმა ხოლო ზუსტას თექ მოხვად. თინა ბიბლიას მოგურუანდეს, მუდგარენქ ვაგმაგინ დო კითხვა ქუდუსვჷ. კითხვაშა პასუხიქ ვა მაჩინ დო ხოლო მა ოკო უწუენიო იშო ბოდიშ?!“.

ჯონ ვართ სასწავლებერშე გურიცხებუნა დო ვართ ბოდიშიქ აჸუ ორაგადექ.

1924 წანაშ გურშენ „გინაჯინალ კოშკის“ თეცალ მუდგარენ ჭარუდ: «დავითცალო, ჩქი ხოლო შემლებუნა ფთქუათ: „სი ქომუჩანქ ძალას ობრძოლებერო“ (ფსალმ. 18:39). თე წანა ჩქინო მანგარ გურიშემაკინალ რდჷ, მუშენდა ქიბგინით იეჰოვაშ ხე. თიშ ართგურ მსახურეფ ხიოლით ქადაგენდეს სახიოლო ამბეს».

1924 წანაშ ბოლოს ჯიმალეფქ გეგნოჭყვიდეს ჩიკაგოშ ხოლოს ხოლო ართ რადიოსადგურიშ გეძინა. თე რადიოსადგურიშ სახელ იჸუაფუდ WORD, მუთ ითარგმნუ, მუჭოთ „სიტყვა“. თე სახელ ზუსტას მეურდჷ თე რადიოსადგურს, მუშენდა თინა ღორონთიშ სიტყვას გაცხადენდუკონ იჸიდ. რადიომაუწყებლობაშო 5 000-ვატიან გადამცემს ირინუანდეს, მუდგაშ ჭყოლოფათ, სამეფოშ ცნობა ოშობით კილომეტრიშმაშორას, კანადას ხოლო გინიჩამუდ.

მუ ელუდეს ბიბლიაშ მარკვიებელეფს 1925 წანას? თინეფქ უჯგუშო ქინანჭეს გამოცხადებაშ მა-12 დუდის. თე ახალ გაგებაქ ნამთინე დაბრკოლ, მარა ბრელს ახიოლ თიშ გაგებაქ, მუქ მოხვად ზეცას დო მუჭო იმოქმედენდ თენა დედამიწას მახორუ ღორონთიშ ხალხშა.