მერი დო მუშ ქომონჯ, ჯონ, a თიცალ ქიანას ცხოვრენა, სოდეთ ფილიპინეფშე ომუშებშა მეულირ უცხოელეფწკუმა ქადაგებაშ საშვალება უღუნა. კოვიდ-19 პანდემიაშ დროს მერიქ ხვალე მუშ ქიანას ვარინ, შხვა ქიანას მახორუ კათაწკუმა ხოლო დიჭყჷ ბიბლიაშ გურაფეფ. მუქ მეხვარ თეს?

მერი მუშ ბიბლიაშ მაგურაფალეფს ოკითხუდ: „ხომ ვეჩინენთ თიცალ მითინს, მიდგას ბიბლიაშ გურაფაშ დოჭყაფა ოკო?“. თინეფ ქოვა ქოუწინდეს-და, უკულ ურაგადუდ, ქეშეილებუნან-და, დუმაკავშირითია. ხშირას თე მარტივ მუდგარენიშ კითხირს ჯგირ შედეგეფ მოუღ. მუშენ იფჩიებუთ თეს? მუშენდა, მუჭოთ წესინ, თინეფს, მით მთელ გურით აფასენა ბიბლიურ ჭეშმარიტებას, ოკონა, შხვეფს ხოლო გეგნოჩან ნაგურეფ, იჸუაფუნო თენა ოჯახიშ წევრ დოვარ მეგობარ. მუ ჯგირ შედეგეფქ მაჸუნ თე კითხვაშ დოსუმალას?

მერიშ ბიბლიაშ მაგურაფალქ, ჟასმინქ, თის ოთხ პიროვნება გაჩინებაფუ, მიდგას ოკოდ ბიბლიაშ გურაფა. ართ-ართ რდჷ კრისტინ, მიდგას თეშ მოწონდჷ თე პროცეს, ნამდა მერის თხუ, მარაშე ჟირშა ჩუტარუკო. მერიქ კრისტინს ხოლო ქოკითხჷ, ხომ ვეჩინენდჷ თიცალ მითინს, მიდგას ბიბლიაშ გურაფა ოკოდ; თიქ უპასუხ, ქო, ჩქიმ მეგობრეფს ოკონა დო გუგოჩინებაფუანქია. მუსხირენ მარაშ დინახალე, კრისტინქ თის მუშ ოთხ მეგობარ გაჩინებაფუ, მიდგას ოკოდ ბიბლიაშ გურაფაშ დოჭყაფა. უკულ შხვეფ ხოლო გაჩინებაფუ, თინეფქ მუნეფიშ მეგობრეფ გაჩინებაფუეს დო თაშ.

კრისტინს ოკოდ, ფილიპინეფს მახორუ მუშ ოჯახიშ წევრეფქ ხოლო ქიდიჭყესკო ბიბლიაშ გურაფა, ათეშენ მუშ ძღაბის, ანდრეას, ქუდურაგადუ. ანდრეა ფიქრენდჷ, ნამდა იეჰოვაშ მოწმეეფ სექტანტეფ რდესჷ, ვა წანდეს იესოშ დო ხვალე ჯვეშ აღთქმას ირინუანდეს. მარა, ართ გურაფაშ უკულ დათირ თე აზრიქ. ირ გურაფაშ დროს, მუდგაინ ახალს ქიგეგენდუნ, იჩიებუდ: „ბიბლიას თაშ ქოჭარ-და, იმწკუმა მართალ ჸოფე“.

ჭიჭე ხანშა, ანდრეაქ მერის ხოლო ჟირ მეგობარ დო თანამშრომელ გაჩინებაფუ; თინეფქ ბიბლიაშ გურაფა ქიდიჭყეს. ხვალე თენა ვარინ, მერის ვა უჩქუდუნ თეშ, ანდრეაშ მამ, ანჯელა, ნამუთ თოლს ვარწყე, ნორჩქილუე თინეფს, მუჟამსით ბიბლიაშ გურაფას ატარენდეს. ართ დღას თიქ ანდრეას უწუ, მუს ხოლო გაჩინებაფუკო მერი დო ბიბლიაშ გურაფა მითხუ. ანჯელას მანგარო მოწონდჷ თინა, მუდგას ბიბლიაშე გურაფლენდჷ. ართ თუთაშ დინახალე თიქ ბრელ ბიბლიურ მუხლ ქიდემახსოვრჷ დო მითხუ, მარაშე 4-შა ჩუტარესკო ბიბლიაშ გურაფა. ანდრეაშ მოხვარათ,  თიქ ვიდეოკონფერენციაშ საშვალებათ, შეხვალამეფშა დასწრება ხოლო ქიდიჭყჷ.

მერიქ ქიგეგ, ნამდა კრისტინიშ ქომონჯ, ჯოშუა ხოლო ნორჩქილუე თინეფს, ბიბლიაშ გურაფაშ დროს, ათეშენ თის ხოლო კითხჷ, ოკოდ დო ვარ ბიბლიაშ გურაფაშ დოჭყაფა. ჯოშუაქ უწუ: „უბრალოთ მოირჩქილუანთ, მუთუნ ვა პკითხა. ქოპკითხენქ-და, გალე გეგმურქ“. ბიბლიაშ გურაფაშ ჩატარება ქიდიჭყესინ, პირველ ხუთ წუთიშ დინახალე თიქ უმოს მეტ კითხვა დასვჷ, ვინემ კრისტინქ, დო მუქ ხოლო მითხუ ბიბლიაშ გურაფა.

მერის მარტივ კითხვაშ დოსუმალაქ ქიანაშ ბიბლიაშ გურაფა დაჭყაფუ. თინეფშე ნამთინე შხვა და დო ჯიმალეფს გეგნაბარ. გაკობძინათინ, მერიქ გვალო 28 ბიბლიაშ გურაფა დიჭყჷ 4 შხვადოშხვა ქიანას.

ჟასმინქ, ნამუთ ჟიშე მიფშინეთ, 2021 წანაშ აპრილს დინათ. კრისტინქ 2022 წანაშ მესის დინათ დო ფილიპინეფს მუშ ოჯახის დართჷ. თეწკუმა ართო, დინათ მერიშ ჟირ ბიბლიაშ მაგურაფალქ ხოლო, მით კრისტინქ გაჩინებაფუ. კრისტინიშ ნათუაშე მუსხირენ თუთაშა ანჯელაქ ხოლო დინათ დო ასე სრულ დროთ პიონერო მსახურენს. კრისტინიშ ქომონჯ ჯოშუა, თინეფიშ ძღაბ ანდრეა დო ხოლო მუსხირენ ბიბლიაშ მაგურაფალ, წიმი მეულა სულიერო.

პირველ საუკუნეს იესო დო თიშ მოციქულეფ მუნეფიშ ოჯახიშ წევრეფს დო მეგობრეფს გინოჩანდეს სახიოლო ამბეს (იოან. 1:41, 42ა; საქ. 10:24, 27, 48; 16:25–33). ჯგირ იჸუაფ, თქვან ბიბლიაშ მაგურაფალეფს დო დაინტერესებულეფს ქოკითხათ: „ხომ ვეჩინენქ თიცალ მითინს, მიდგას ბიბლიაშ გურაფაშ დოჭყაფა ოკო?“. მის უჩქჷ, ეგება თე მარტივ კითხვაშ ჭყოლოფათ ბრელ ბიბლიაშ გურაფა ქიდიჭყათ.