ჩქი ფილიპინეფიშ დედაქალაქ მანილაშ გარეუბანს ფცხოვრენდით, ნამდგას სან-ხუან-დელ-მონტე ჯოხოდ. დიაჩქიმ დო მუაჩქიმ დუდგინოდვალირ კათოლიკეეფ რდესჷ, მარა, მუჟამსით ბიბლიაშე ღორონთიშ სახელ ქიგეგეს, ჟირხოლოქ იეჰოვაშ მოწმეეფო გინირთეს დო შურ დო გურით ომსახურუდეს თის. მუაჩქიმ ჯაშ მოხელე რდჷ. ჭეშმარიტებაშ გაგებაშახ თინა იესოშ ქანდაკებეფს ორთუდ, მარა უკულ მიოტუ თეშ კეთება დო მუშ ხელობა თიშო გეგმირინუ, ნამდა ჩქინ ჸუდეშ პირველ სართულ კრებაშ შეხვალამეფიშ ჩატარებელ დარბაზო გეგნაკეთუკო.

დებაბდჷ 1952 წანას. მშობლეფ, ჩქიმ და დო ჯიმალეფცალო, მა ხოლო ჭიჭენობაშე მოგურუანდეს დო მოჩინებაფუანდეს იეჰოვას. ოთხ ჯიმა დო სუმ და პჸუნდჷ, არძა უნჩაშეფ. ჭიჭე გემწიბრდინ, მუაჩქიმქ ელამიჩ, ბიბლიაშე ირდღას ართ დუდ წეპკითხიკო დო შხვადოშხვა პუბლიკაციას არჩიენდჷ ჩქიმწკუმა. მშობლეფ ხიოლით ღებულენდეს ჸუდეშა რაიონულ ზედამხედველეფს დო ფილიალშე მოულირ ჯიმალეფს. მთელ ოჯახის მანგარო მოხიოლუდეს დო გურშა ელამკინანდეს თინეფიშ შემთხვევეფიშ მორჩქილაფა დო თენა მოხვარუდეს, ცხოვრებას პირველ ადგილს გივორინეთკო იეჰოვაშ მსახურება.

ჩქიმ მშობლეფ იეჰოვაშ ართგურ მსახურეფ რდესჷ დო თეთ მანგარ ჯგირ მაგალით მუჩეს. დიაჩქიმიშ ღურაშ უკულ მა დო მუაჩქიმქ პიონერობა ქიდიპჭყით, 1971 წანას. მარა ჟირ წანაშა, 20 წანერ ვორდინ თეშ, მუმაქ ხოლო დომღურ. მშობლეფიშ დინაფაქ დუდ თეშ მოგინაფუ, ითამ გვალო ხვალე ქუმწოფსქიდ. მარა მომავალიშ სანდო იმენდიქ, ნამდგას ბიბლია მარზენა, მიმეხვარ, ვადვანთხიკო დო ემოციურო დო სულიერო მანგარო ქიგებდირთიკო (ებრ. 6:19). მუაჩქიმიშ ღურაშე ბრელ ხან ვა რდჷ მიკულირინ თეშ, სპეციალურ პიონერო დებნიშნჷ დო პალავანიშ პროვინციაშ ართ-ართ კუნძულშა, კორონშა, გომტუეს.

კორონშა ინობრთინ 21 წანერ ვორდჷ. ქალაქის ნარდ ბოშის მეულირს გუმაკვირ უსინთელობაქ, უწყარობაქ დო ტრანსპორტიშ სინაკლებექ. თეს ვა ვორდჷ მერჩქვანელ. მართალ რე, თექ მუსხირენ ჯიმა რდჷ, მარა პიონერ მითინ ვა რდჷ, ათეშენ ხშირას ხვალე მიხვადუდ ოქადაგებშა ულა. პირველ თუთას მანგარო გამჭირდჷ, სასწაულო მონატრუდ ჩქიმ ოჯახ დო მეგობრეფ. სერით მურიცხეფით მოჭკადილ ცას ელვოჯინედ დო მანგარინუაფუდ. თიცალო ქიმკოპჭირდჷ, ნამდა ფიფქრენდჷ, თექიანობა ქიდიპტეკო დო ჸუდეშა დიბრთიკო.

თეცალ დროს, იეჰოვას ალალას ვეჩიებუდ დო ურაგადუდ, მუს ბგინაფლენდჷ. ვოცადუდ, ქიგიფშინიკო თი გურიშ ემაკინალ აზრეფ, ნამუთ ბიბლიას დო პუბლიკაციეფს მაფუდ ნაკითხირ. ხშირას გუმაშინედ ფსალმუნეფიშ 19:14. ქინვანჭჷ, ნამდა იეჰოვა იჸუაფუდ ჩქიმ „კირდე“ დო „გიშმაჸიდირალ“, მუჟამსით ქიფიფქრენდ თიშე, მუთ გურს გაუხარენდ თის, მაგალთო, თიშ თვისებეფშე დო საქმეეფშე. მანგარო მიმეხვარ „გინაჯინალ კოშკიშ“ ართ სტატიაქ, ნამდგაშ სათაურ რდჷ „დღას ვა რექჷ ხვალე“. a ირიათო პკითხულენდჷ თე სტატიას. ხვალე რინა საშვალებას მარზენდჷ, იეჰოვაწკუმა უმოს ხოლოს ვორდიკო, იბლოციკო, იბგურეკო დო იფიფქრიკო.

კორონშა ინულაშე მალას, უხუცესო დებნიშნჷ. რახანს ხვალე მა ვორდჷ უხუცეს, ირ მარას მა მაფუდ ოტარებელ თეოკრატიულ მსახურებაშ სკოლა, სამსახურებრივ შეხვალამა, წიგნიშ გურაფა დო „გინაჯინალ კოშკიშ“ გარჩიება. თეწკუმა ართო, ირ მარას მაფუდ ოკეთებელ საჯარო მოხსენებეფ. თიზმა ამბე მისოფუანდჷ, ხვალახეობაშე ოფიქრებელო ვართ ფჩოდუდ.

მანგარ ჯგირო მიშჷ ჩქიმ მსახურება კორონს. ჩქიმ ნამთინე ბიბლიაშ მაგურაფალქ დინათ. მარა სირთულეეფ ხოლო მიღუდ. მინშა უბანშა მიოულარო გვერდ დღა მოსაჭირუდ დო სო გიფსერეკონ თინა ხოლო ვა მიჩქუდ. კრებაშ ტერიტორიაშა ბრელ კუნძულ მიშეშ. თინეფშა მატორამ ნავით მიფშჷ. მინშა შტორმიშ დროს მაფუდ ოულარ, ვარინ ნჩურუა ხოლო ვა მიჩქუდ. არძა სირთულეშ დროს იეჰოვა ფთხილანდჷ დო მამანგარენდჷ. უკულ მეფხვად, ნამდა თეთ თინა მამზადენდჷ უმოს დიდ სირთულეეფშო, ნამუთ ანწიან დანიშნულებას მელუდ.

1978 წანას პაპუა ახალ გვინეას, ჩრდილოეთ ავსტრალიას, დუმანიშნეს. თე ქიანას ირდიხას გვალეფ რე. გუმაკვირ თიშ გაგებაქ, ნამდა თე ტერიტორიას გვალო სუმ მილიონ კოჩ ცხოვრენს დო 800-შე უმოს ნინაშა რაგადანა. თინა ხოლო ჯგირ, ნამდა ხალხიშ უმენტაშის უჩქუდ მელანეზიურ პიჯინ, ნინა, ნამდგას ტოკ პისინს ხოლო უძახუნა.

პაპუა ახალ გვინეაშ დედაქალაქის, პორტ მორზბის, ჭიჭე ხანით ინგლისურ კრებას დუმანიშნეს. მარა უკულ ტოკ პისინ ნინაშა მორაგადე კრებაშა გინიბლჷ დო თე ნინაშ კურსეფ ხოლო მიკიბლჷ. ნაგურეფუს მსახურებაშ დროს პრაქტიკულო ხოლო იბრინუანდჷ, მუდგაქ მიმეხვარ, უმოს ჩქარას ქიდიბგურეკო ნინა. ჭიჭე ხანშა შემალებუ საჯარო მოხსენებათ გიშებლიკო ტოკ პისინურ ნინაშა. პაპუა ახალ გვინეაშა ინულაშე ართ წანა ხოლო ვა რდჷ მიკულირინ თეშ, ტოკ პისინ ნინაშა მორაგადე კრებეფიშ რაიონს ზედამხედველო დუმანიშნეს.

რახანს კრებეფ ართიანშე მანგარ შორს რდჷ, მუსხირენ რაიონულ კონგრესიშ ჩატარება მიხვადუდ. ათეშენ ბრელ მაფუდ გილაულარ. დუდშე  ხვალახეთ ბგინაფლენდჷ დუდის, მუშენდა ირფელ უცხო რდჷ ჩქიმო – ქიანა, ნინა, კულტურა. თიცალ გვალამ ადგილეფ რდჷ, შხვა ტრანსპორტით ვემირთედ, ათეშენ ირ მარას აკოჩქვაჩქვილ სამალიოტით გილეფშჷ; მინშა ხვალე მა მითვოხედ. თაქ ხოლო ნავს გივოხედინ თიცალ შიშიშ ჭკუმილ მითვოხედ.

თიმწკუმა ხალხის ტელეფონეფ ნაკლებო უღუდ, ათეშენ კრებეფს წერილეფით ვოკავშირუდ. მარა წერილიშ ინულას თიზმა ხან ოკოდ, მინშა მა უწორუანდჷ მეულას, ათეშენ თექ მახორუეფშა მაფუდ ოკითხე, იეჰოვაშ მოწმეეფს ხომ ვეჩინენდეს. ირო, მუჟამსით ჯიმალეფს ქიმვოგორუანდ, თინეფ სასწაულ ხიოლით დო ჸოროფათ შეფხვადუდეს. თეშ ძირაფა ირნერ ხანდაშა ღირუდ. იეჰოვაშ მოხვარას ბრელნერო ბგინაფლენდჷ, მუდგაქ ხოლო უმოსო დუმაახლოვ თიწკუმა.

მუჟამსით პირველო ბუგენვილშა ინობრთჷ დო კრებაშ შეხვალამას ვორდჷ, ართ ჩილ დო ქომონჯიქ ქუმორთჷ ჩქიმდა დო გოძიცებულო პკითხეს: „ქორშუთო?“. ქუგმაშინ, ნამდა პორტ მორზბიშა პირველო ინობრთინ, თინეფს ბიბლიაშ გურაფა დოუჭყჷ დო უკულ შხვა ჯიმას გინვაბარ. მანგარო მახიოლ თიშ გაგებაქ, ნამდა ჟირხოლო დონათენა. თენა რდჷ ართ-ართ თი ქიანაშ კურთხევა შქას, ნამუთ იეჰოვაქ პაპუა ახალ გვინეას სუმწანიან მსახურებაშ დროს მუჩჷ.

ონდო 1978 წანას კუნძულ კორონშე იბშიკო, თექ გეფჩინებაფე ართ სქვამ დო დუდგინოდვალირ და, ადელ. თინა პიონერო მსახურენდჷ დო ჟირ სქუას რდუნდჷ, სამუელს დო შირლის. თეწკუმა ართო, მოხუცებულ დიამუშის ხოლო ულუანდჷ. 1981 წანაშ მესის დიბრთჷ ფილიპინეფშა დო მა დო ადელქ დეფქორწინით. ჩქი პიონერეფო ბმსახურენდით დო ოჯახის ხოლო ართო მიკვოჯინედით.

ოჯახ პჸუნდუნ თიშ უმკუჯინუო, 1983 წანას სპეციალურ პიონერო დუმანიშნეს პალავანიშ პროვინციაშ ართ-ართ კუნძულს, ლინაპაკანს. მთელ ოჯახიქ გინიბლით თე კუნძულშა, სოდეთ იეჰოვაშ მოწმე მითინ ვა რდჷ. ართ წანაშა ადელიშ დიდაქ დოღურ. ირიათო მსახურებას ვორდით, მუთ მოხვარუდეს თე რთულ პერიოდიშ მიკულას. თიზმა ჯგირ ბიბლიაშ გურაფას ვატარენდით ლინაპაკანს, ნამდა მალას დარბაზიქ დემესაჭირეს შეხვალამეფიშ ჩატარებელო. ქოთ გევაშენით დარბაზ ჩქინით. მანგარო მოხიოლუდეს, ნამდა ჩქინ ინულაშე სუმ წანაშა 110 კოჩიქ დესწრჷ გოშინაშ ონჯუას დო ჩქი აშო მოლაბრთითინ თიშ უკულ თინეფშე ბრელქ სულიერო წიმი მიდართჷ დო დინათ.

1986 წანას გეგნომიჸუნეს ართ კუნძულშა, კულიონშა, სოდეთ კეთრით დალახებურ პაციენტეფიშ დასახლება რდჷ. თე დროს ადელ ხოლო სპეციალურ პიონერო დანიშნეს. დუდშე მანგარო მნერვიანენდით დო მოშქურუდეს კეთრით დალახებულ ხალხწკუმა ქადაგებაშა. მარა უკულ თექიან და დო ჯიმალეფქ მიწუეს, ნამდა თე ხალხის მიკულირ აფუდ საჭირო მკურნალობა, ათეშენ, ლახალაქ ჩქი გეგნმადვესკონ თეშ შანს მანგარ ჭიჭე რდჷ. თინეფშე ნამთინე კრებაშ შეხვალამეფს ხოლო ოსწრუდ, ნამუთ ჩქინ დაშ ჸუდეს იტარებუდ. ჭიჭე ხანშა ქიმვარჩქვანით თე სიტუაციას დო გვალო ჯგირ შედეგეფქ ხოლო მაჸუნ თეცალ ადამიანეფწკუმა ქადაგებას, მუშენდა თინეფს მიორჩქუდეს,  ნამდა ქოთ ღორონთის დო ქოთ ადამიანეფს ოჭიშ აფუდ რთინაფილ თინეფშა. თე ადამიანეფშა მანგარ დიდ ხიოლ მოუღუდ თიშ გაგებას, ნამდა მალას სრულყოფილ ჯანმრთელობა აღვენუდეს. თეშ ძირაფა ჩქინო ხოლო მანგარ სასიამოვნო რდჷ (ლუკ. 5:12, 13).

მა დო ადელქ ჟირ ახალგაზრდა დას, მით კუნძულ კორონშე რდესჷ, ქოფთხით, ჩქინდა გინილესკო, ნამდა ბაღანეფს ჯგირ სულიერ გარემო ქოუღუდესკო. სამუელს, შირლის დო თე ჟირ დას მანგარ ხიოლ უღუდეს მსახურებას, მუშენდა ბრელ ბაღანას უტარენდეს ბიბლიაშ გურაფას, მუდროსით მა დო ადელ თინეფიშ მშობლეფს ვოგურუანდით. ართ მომენტის ვითაართ ოჯახის ვოგურუანდით ბიბლიას. მალას თიზმა ბიბლიაშ მაგურაფალქ მიდართჷ წიმი სულიერო, კრებაშ ჩამოყალიბება რდჷ საჭირო!

დუდშე ხვალე მა ვორდჷ უხუცეს თი კუნთხუს, ათეშენ, ფილიალიშ დავალებათ, ირ მარას ვატარენდჷ შეხვალამეფს კულიონს, სოდეთ ბრუო მაუწყებელ რდჷ დო უკულ მიფშჷ ართ სოფელშა, მერილიშა, სოდეთ ჩხორო მაუწყებელ რდჷ. თექ მიოულარო სუმ საათ მოსაჭირუდეს ნავით. შეხვალამაშ ჩატარებაშ უკულ მთელ ოჯახ გვალეფით მიფშით საათობით, ნამდა ბიბლიაშ გურაფეფ ჩუვატარითკო ართ სოფელს, ნამდგას ჰელსი ჯოხოდ.

საბოლათ, თიშმაჯგირათ მიდართჷ საქმექ დო თიზმაქ ქიგეგ ჭეშმარიტება, ნამდა ქოთ მერილის დო ქოთ ჰელსის დარბაზეფ გევაშენით. მუჭოთ ლინაპაკანსინ თეშ, თაქ ხოლო საქმეშ უმენტაშ და დო ჯიმალეფქ დო დაინტერესებულეფქ აკეთეს. 200 კოჩ ინტირედ მერილიშ დარბაზის, ნამდგას, მოსაჭირუდესინ თიმწკუმა, გოუძინანდით დო თექ ვატარენდით კონგრესეფს.

ბაღანეფქ გამწირდეს დო 1993 წანას მა დო ადელქ რაიონულ მსახურება ქიდიპჭყით ფილიპინეფს. 2000 წანას „მსახურებას დახელოვნებაშ სკოლა“ მიკიბლჷ, ნამდა მივემზადიკო თე სკოლაშ მასწავლებერობაშო. ფიფქრენდჷ, ნამდა ვეგშმალედ დო თენა საჩქიმო საქმე ვა რდჷ, მარა ადელ ირიათო გურშა ელამკინანდჷ დო გუმოშინანდჷ, ნამდა იეჰოვა ქომუჩანდ საჭირო ძალას თე დავალებაშ შეიოსრულებერო (ფილ. 4:13). თინა თეს მუშ გამოცდილებათ მირაგადუდ, მუშენდა მუ ხოლო ჯანმრთელობაშ პრობლემა  უღუდუნ თეშ აგრძელენდჷ დანიშნულებაშ შესრულებას.

2006 წანას, მასწავლებერო ბმსახურენდინ თეშ, ადელს პარკინსონიშ ლახალაშ დიაგნოზ ქიგუშქვეს. მუთუნით ვეველუდით თეცალ მუდგარენს. მა მილამუდ, მივოტეკო ჩქიმ დანიშნულება, ნამდა ადელს მუკულეკო. მარა თიქ მიწუ: „გოხვეწუქ, ექიმ დობგორათ, მით მიმკურნალენს, დო ბჯერსჷ, ნამდა, იეჰოვაშ მოხვარათ, შემალებენა თე დანიშნულებათ მსახურებაშ გაგრძელება“. თავრეშე მოჸუნაფილ ამშვ წანას ადელქ მითინშა ვა უჭირუაფუნ თეშ, მოთვინებათ გაგრძელ იეჰოვაშ მსახურება. გილულა ვეშულებუდუნ, კალიასკათ გილეშ ოქადაგებშა. მუჟამსით უკვე ჩიება ხოლო უჭირდჷ, თითო-ჟირ სიტყვიან კომენტარეფს აკეთენდჷ კრებას. ადელ ღურადღაშახ და დო ჯიმალეფშე ბრელ მადლობაშ წერილს ღებულენდჷ დო ირკოჩ ოცქვანდჷ მუშ ჯგირ მაგალითშენ დო მოთვინებაშენ. თიქ 2013 წანას დომღურ. 30 წანას პჸუნდჷ ხასლას ჩქიმ მოჸოროფე დო ართგურ მეუღლე, მარა თიშ დინაფაშ უკულ კინ ხვალე ქუდოფსქიდ დო მანგარო გამჭირდჷ.

ადელს ოკოდ, გუვაგრძელკო ჩქიმ დანიშნულებას მსახურება დო ქოთ თაშ გუვაკეთ. ვოცადუდ, იეჰოვაშ საქმეთ ვორდიკო დაკავებულ, მუთ მოხვარუდ, ხვალახეობას ქუგურზიკო. 2014–2017 წანეფს ტაგალოგურ ნინაშა მორაგადე კრებეფს იბძირუანდჷ თი ქიანეფს, სოდეთ ჩქინ საქმიანობა შეზღუდულ რდჷ. თეშ უკულ კინ ტაგალოგურ ნინაშა მორაგადე კრებეფს იბძირუანდჷ ტაივანს, შეერთებულ შტატეფს დო კანადას. 2019 წანას ინდოეთის დო ტაილანდის ჩუვატარ „სამეფოშ მახარობელეფიშ სკოლა“ ინგლისურ ნინაშა. თე დავალებეფიშ შესრულებას ხიოლ მოუღუდ ჩქიმდა. არძაშ უმოს ბედნერ თიმწკუმა ვორექ, მუჟამსით მთელ ჩქიმ დრო დო ენერგიას იეჰოვაშ საქმეშო იბრინუანქ.

ირ დანიშნულებას მსახურებაშ დროს მანგარო მეჸოროფებ და დო ჯიმალეფ, ათეშენ თინეფიშ დოტება ირო მიჭირს. თეცალ სიტუაციეფქ ქუდმოგურუ, ნამდა ბოლოშა ოკო მივენდე იეჰოვას. თიშ ელარნას ირო ბგინაფლენდჷ დო თიშ მოხვარათ ირო შურ დო გურით ბღებულენდჷ ნებისმიერ ცვლილებას. ასე სპეციალურ პიონერო ბმსახურენქ ფილიპინეფს. მანგარ ჯგირო მივანწყი ახალ კრებას, ნამუთ ირიათო ალამრე დო ოჯახცალ მაფჷ. მანგარო მოხიოლ, ნამდა სამუელ დო შირლი მუნეფიშ დიდაშ რწმენაშ მაგალითის მეჸუნა (3 იოან. 4).

ცხოვრებას ბრელ მუდგარენქ მაჸუ მიკაულარქ, თინეფ შქას ჩქიმ ოსურიშ ლახალა დო წვალება ხოლო ქიმიბძირე. ბრელ შხვა სირთულეშა ხოლო მაჸუ გარზებელქ, მარა ირო ვორწყედ, ნამდა იეჰოვა „შორს ვა რე ჩქინდე“ (საქ. 17:27). თიშ „ხე ვა დაკუნტარებე“, ნამდა ქიმეხვარას მუშ მსახურეფს დო გამანგარას თინეფ, მსოფლიოშ არძაშ უმოს მიკოლაფირ ადგილს რდანინ ხოლო (ეს. 59:1). იეჰოვა, ჩქიმ კირდე, ირო ჩქიმწკუმა რდჷ დო დღას ვა დუტებუქ, ათეშენ მარდულ ვაფუქ თის.