ᲝᲒᲣᲠᲐᲤᲐᲚ ᲡᲢᲐᲢᲘᲐ 6
ᲝᲑᲘᲠᲔᲨ 18 გიშაჸიდირალიშ მარდიელეფი
მარდულ ვაფუთ იეჰოვას, ნამდა ცოდეფს მაპატიენა
„ღორონთიქ თიშმანწარას ქიჸოროფუ თე ქიანა, ნამდა მუშ ხვალეგუნაჭყეფ სქუა ქიმეჩ“ (ᲘᲝᲐᲜ. 3:16).
ᲛᲘᲖᲐᲜ
ქობძირუნთ, მუშმაშხვა ამბე აკეთ იეჰოვაქ, ნამდა ცოდეფქ ქიმეპატუესკო. თენა ქიმმეხვარებუნა, უმოს მარდულ ვაფუდათ თის.
1, 2. მუთ მოგენს პირველ აბზაცის მოშინაფილ ახალგაზრდა ბოშიშ სიტუაცია ჩქინ სიტუაციას?
ᲬᲔᲠᲛᲘᲓᲒᲘᲜᲘᲗ ახალგაზრდა ბოშ, ნამდგაქ ქონებიერ ოჯახის მირდჷ. ართ დღას მანგარ გლახა ამბე ხვადუ – თიშ მშობლეფ კოჩ ველუდუნ თეშ ღურუნა. მუშო ოკო რაგად, თის დიდა დო მუმაშ ღურა მანგარ ნწარე აფჷ, მარა შურო აზრის ვა რე, ნამდა მალას ხოლო ართ გლახა ამბეს ქიგეგენს. თიშ მშობლეფს მთელ ქონება მეუდინუაფუნა დო ქიანაშმაშხვა ვალეფ ქიგუდვალუნა. წერმიდგინით, თე ახალგაზრდა ბოშის მშობლეფშე ქონებაქ ვარინ, ვალეფქ ქიგიოსქიდ. მევალეეფ ფარაშ სურებას თხულენა, მარა თისხი ფარა გეძჷ, ნამდა დღას ვასურებე.
2 ჩქინ სიტუაცია მუდგარენით მოგენს თის, მუდგაქ თე ახალგაზრდა ბოშის აღოლ. ჩქინ მშობლეფ, ადამ დო ევა, სრულყოფილეფ რდესჷ დო სამოთხეს ცხოვრენდეს (დაბ. 1:27; 2:7–9). თინეფს შეულებუდეს მარადიულო დო ბედნერო იცხოვრესკო. მარა ართ დღასით მანგარ გლახა ამბექ ქუმოხვად – თინეფქ ქოთ სამოთხეს ცხოვრებაშ უფლება დო ქოთ მარადიულ სიცოცხლე მიოდინუეს. მუ დოუტუ თე ჩილ დო ქომონჯიქ მუნეფიშ სქუალეფს? ბიბლიას პკითხულენთ: „ართ კოჩშე [ადამშე] მიშართჷ ცოდაქ ქიანაშა დო ცოდაშე – ღურაქ, თეშნერო ღურაქ ირ კოჩშა გეგნორთჷ, მუშენდა არძაქ შეცოდ“ (რომ. 5:12). ადამქ მუშ გამნარყის ცოდა გეგნოჩ, მუდგას შედეგო ღურა მოჸუნს. თენა თიშმაშხვა ვალ რე, ნამდა დღას ვა მასურებენა (ფსალმ. 49:8).
3. მუშენ რე შედარებულ ჩქინ ცოდეფ ვალეფწკუმა?
3 იესოქ ცოდეფ „ვალეფს“ შეადარ (მათ. 6:12, სქოლიო; ლუკ. 11:4, სქოლიო). მუჟამსით ვაშენთ, თაშ ქოფთქუათინ, იეჰოვაშ ვალ გიმადვალუნა. მუშო ოკო რაგად, თე ვალს გაფა ოკო. იეჰოვას ჩქინ ცოდეფშე ვეგშუჸიდირუდითკონ, თინა ჩქინ სიცოცხლეთ მაჸიდეს ოგაფალ; მართალ რე, თეშ უკულ ჩქინ ვალ გეუქმებუდ, მარა სიცოცხლეს სადღამუშოთ მივოდინუანდით (რომ. 6:7, 23).
4. ა) იეჰოვაშ მოხვარაშ უმშო მუშ იმენდ ვა მაღვენუდეს? (ფსალმ. 49:7–9). ბ) მუ აზრით რე გიმორნაფილ ბიბლიას სიტყვა „ცოდა“? (ქოძირით ჩარჩო „ცოდა“).
4 შემლებუნანო, დიბრთინუათ თინა, მუთ ადამ დო ევაქ მიდამღეს? ჩქინით თენა დღას ვა მაკეთებენა (წეკითხით ფსალმუნეფიშ 49:7–9). ღორონთის ვა მუხვარებუდუკონ, მარადიულ სიცოცხლეშ ვარდა გათელებაშ იმენდ დღას ვა მაღვენუდეს დო ცხოველეფ ღურუნა დო დღას ვეთელებუნან თეშ, ჩქი ხოლო გათელებაშ იმენდიშ უმშო დობღურუდით (ეკლ. 3:19; 2 პეტ. 2:12).
5. მუ აკეთ იეჰოვაქ ცოდაშე ჩქინ გიშაჸიდირალო? (ქოძირით სურათ).
5 დუვართათ ჟიშე მოშინაფილ ახალგაზრდაშ მაგალითის. წერმიდგინით, მუს იგინანდ თინა, მიდგაინ ქონებიერ კოჩ გემკორჩქინედუკო დო უთქუალუდუკო, არძა ვალს გისურენქია. მუშო ოკო რაგად, თე ახალგაზრდა მოხვარაშ მოვარიე მუთუნით ვეჸიდ დო მანგარ მარდულ აჸიდ თი კოჩის. თეშნერო, ჩქინ მოჸოროფე მუმაქ, იეჰოვაქ, თაშ ქოფთქუათინ, გეგნომგეს თი ვალ, ნამდგაქ ადამიშ დაშებულიშ გურშენ გიმადვეს. იესოქ თქუ: „ღორონთიქ თიშმანწარას ქიჸოროფუ თე ქიანა, ნამდა მუშ ხვალეგუნაჭყეფ სქუა ქიმეჩ, მუშენდა მით თიშ რწმენას გიმირჩქინანს, ვა ღურას დო ულიებ სიცოცხლე უღუდას“ (იოან. 3:16). ჸოროფათ კეთებულ თე ძღვინ თიშ საშვალებას ხოლო მარზენა, ნამდა ხოლოშიან ურთიერთობა მიღუდან იეჰოვაწკუმა.
იესო ქადაგენდჷ სახიოლო ამბეს, ნამდა გიშაჸიდირალიშ ჭყოლოფათ იეჰოვა ადამიანეფს აპატიენდ ცოდეფს (იოან. 3:16) უკულ თიქ მუშ ნებათ დათმჷ სიცოცხლე ადამიანეფიშ გიშაჸიდირალო (ქოძირით აბზაც 5)
6. ნამ ბიბლიურ ტერმინეფს გუვარჩიენთ თე სტატიას დო მუს მიმეხვარებუნა თინეფიშ გარჩიება?
6 მუ ოკო ვაკეთათ, ნამდა თე ძღვინქ გეგნოფორას ჩქინ „ვალეფ“ – ცოდეფ? პასუხიშ გაგებას მიმეხვარებუნა ბიბლიას გიმორნაფილ თიცალ ტერმინეფიშ უჯგუშო ინონჭაფა, მუნერით რე „შერიგა“, „გიშაჸიდირ“, „გიშაჸიდირალ“, „გათავისფალება“ დო „მართალო მერჩქინა“. თე სტატიას გუვარჩიენთ თითოულ ტერმინს. თინეფშე დაფიქრება მიმეხვარებუნა, ხოლო უმოს მარდულ ვაფუდათ იეჰოვას, ნამდა ცოდეფს მაპატიენა.
ᲛᲘᲖᲐᲜ: ᲨᲔᲠᲘᲒᲐ
7. ა) მარადიულ ცხოვრებაწკუმა ართო ხოლო მუ ოდინუეს ადამ დო ევაქ? ბ) მუ მოსაჭირუნა ადამ დო ევაშ გამნარყეფს? (რომ. 5:10, 11).
7 გოჭყაფაშ დღაშე მოჸუნაფილ ადამ დო ევა ღორონთიშ ოჯახიშ წევრეფ რდესჷ (ლუკ. 3:38). მარა, მუჟამსით ქუდაშუეს, მარადიულ სიცოცხლეწკუმა ართო თინეფქ ზეციერ მუმაწკუმა, იეჰოვაწკუმა, ძვირფას ურთიერთობა დო თიშ ოჯახიშ წევრობაშ პატი ხოლო მიოდინუეს. თე დროს თინეფს დიო ხოლო ვა ჸუნდეს სქუალეფ (დაბ. 3:23, 24; 4:1). ადამ დო ევაშ არძა გამნარყ თიშ უკულ ვორეთ დაბადებულ, მუთ თინეფ უკვე ვა რდესჷ ღორონთიშ ოჯახიშ წევრეფ. ათეშენ მოსაჭირუნა იეჰოვაწკუმა შერიგა – თიწკუმა ხოლოშიან ურთიერთობაშ დორთინაფა (წეკითხით რომაელეფიშ 5:10, 11). ართ ნაშრომს ჭარჷ, ნამდა ბერძნულ სიტყვა, ნამუთ თარგმნილ რე, მუჭოთ „შერიგა“, შილებე ნიშნენდას „ნტერწკუმა დამეგობრებას“. სასწაულ ვა რენო, ნამდა იეჰოვაქ გინოდგჷ პირველ ნაბიჯ თეშ ოკეთებელო?! მუჭო აკეთ თიქ თენა?
ᲨᲐᲠᲐ ᲨᲔᲠᲘᲒᲐᲨᲝ: ᲒᲘᲨᲐᲸᲘᲓᲘᲠ
8. მუ რე გიშაჸიდირ?
8 ცოდამ ადამიანეფქ ღორონთწკუმა ჯგირ ურთიერთობა დირთინუესკონ, იეჰოვაქ თინეფიშ გიშაჸიდირ გეგნოჭყვიდ. მუ რე გიშაჸიდირ? თენა რე დინაფილიშ დართინაფალო შესაფერის ოგაფურიშ გაფა. ზუსტას გიშაჸიდირიშ ჭყოლოფათ მუმაჩეს თიშ საშვალებაქ, ნამდა მიღუდან ღორონთწკუმა მშვიდობიან ურთიერთობა დო ვორდათ თიშ მეგობრეფ (რომ. 3:25).
9. მუ მიფიქრჷ იეჰოვაქ ისრაელეფშო დროებით, ნამდა ეპატუესკო ცოდეფქ?
9 ჯვეშ დროს იეჰოვაქ ისრაელეფშო დროებით თიცალ მუდგარენ მიფიქრჷ, მუთ საშვალებას ქიმეჩანდ თინეფს, ეპატუესკო ცოდეფქ დო უღუდესკო იეჰოვაწკუმა ჯგირ ურთიერთობა. თინეფქ წანმოწანაშე ართშა გიშაჸიდირიშ დღა ოკო აღნიშნესკო. თე დღას მღვდელმთავარ ცხოველურ შესაწირს წირენდჷ მთელ ერიშ ცოდეფიშ გიშაჸიდირალო. მუშო ოკო რაგად, თე ცხოველურ მსხვერპლის ვეშულებუდ, სრულას გეგშეჸიდუკო ისრაელეფიშ ცოდეფ, მუშენდა ცხოველიშ ზისხირს ადამიან ვეგშაჸიდირედ. მარა რახანს ისრაელეფ მთელ გურით ნარღენდეს დაშებულს დო თის წირენდეს ღორონთის, მუდგას თინეფშე ითხინდჷ, იეჰოვა მზათ რდჷ, ქაპატუკო დაშებულ (ებრ. 10:1–4). გიშაჸიდირიშ დღას დო შხვა დროს კეთებულ შესაწირეფ გაშინანდჷ ისრაელეფს, ნამდა ცოდამეფ რდესჷ დო ოსაჭირუდეს უმოს დიდ გიშაჸიდირალ, ნამუთ სადღამუშოთ გეგნოფორუნდ თინეფიშ ცოდეფს.
10. მუ გინოჭყვიდ იეჰოვაქ, ნამდა მთელ კაცობრიობაშ ცოდეფქ სადღამუშოთ იჸუკო ფორილქ?
10 მუ აკეთ იეჰოვაქ, ნამდა მთელ კაცობრიობაშ ცოდეფქ სადღამუშოთ იჸუკო ფორილქ? თიქ გინოჭყვიდ, მუშ ხვალეგუნაჭყეფ სქუა შეწირუკო, ნამდა „ბრელიშ ცოდეფ“ გეგშეჸიდუკო (ებრ. 9:28). იესოქ მუშ სიცოცხლე „დათმჷ ბრელიშ გიშაჸიდირალო“ (მათ. 20:28). მორთ ასე თე დიდ გიშაჸიდირალიშ გურშენ ქიფჩუათ.
ᲒᲐᲤᲘᲚ ᲝᲒᲐᲤᲣᲠ: ᲒᲘᲨᲐᲸᲘᲓᲘᲠᲐᲚ
11. ა) მუჭოთ ბიბლიაშე ბგებულენთ, მუშენ რდჷ საჭირო გიშაჸიდირალ? ბ) მუნერ კოჩის შეულებუდ ჩქინ გიშაჸიდირ?
11 მუჭოთ ბიბლიაშე ბგებულენთ, იეჰოვაქ გინოჭყვიდ, ნამდა ცოდეფქ ქიმეპატუესკო დო თიწკუმა მეგობრობაშ საშვალებაქ ქუმმაჩესკონ, გიშაჸიდირალიშ გაფა რდჷ საჭირო. a მუნერ გიშაჸიდირალქ ოკო იჸუკო გაფილქ თი ირფელიშ დართინაფალო, მუთ ადამ დო ევაქ ოდინუეს? მუჭოთ მიჩქუნა, მუჟამსით თინეფქ შეცოდეს, სრულყოფილება დო მარადიულო ცხოვრებაშ საშვალება მიოდინუეს. ათეშენ თე ირფელიშ დართინაფალო შესაფერის გიშაჸიდირალიშ გაფა რდჷ საჭირო (1 ტიმ. 2:6). თე გიშაჸიდირალ აგინედ თიცალ ძინათებულ ქომოლკოჩის, მით 1) იჸუაფუდ სრულყოფილ, 2) აღვენუდ დედამიწას მარადიულ ცხოვრებაშ საშვალება დო 3) მზათ იჸუაფუდ, მუშ სიცოცხლე დათმუკო ჩქინო. ხვალე თეცალ კოჩიშ სიცოცხლეს შეიალებედ ჩქინ გიშაჸიდირ.
12. მუშენ შემლებუნა თიშ რაგად, ნამდა იესოს შეულებუდ გიშაჸიდირალიშ გაფა?
12 იესო ჟიშე მოშინაფილ სუმხოლო მოთხოვნას აკმაყოფილენდჷ. 1) თინა სრულყოფილ რდჷ. მუჭოთ ბიბლიაშე ბგებულენთ, დღას „ვა ჩილათე“ (1 პეტ. 2:22), 2) დღას ვა ჩილათენ თიშენ, დედამიწას მარადიულ ცხოვრებაშ საშვალება უღუდ დო 3) მზათ რდჷ, დოღურუკო დო მუშ სიცოცხლე დათმუკო ჩქინ გიშაჸიდირალო (ებრ. 10:9, 10). იესო სრულყოფილ რდჷ, ზუსტას თეშ, მუჭოთ ადამ შეცოდებაშახ (1 კორ. 15:45). თიქ მუშ ღურათ გეგშამჸიდეს ცოდაშე, მუდგათ საშვალება ქომუჩეს, დიბრთინეთკო თი ირფელ, მუთ ადამქ ოდინუ (რომ. 5:19). თეშნერო, იესოქ გინირთჷ „ბოლო ადამო“, მუთ ნიშნენს, ნამდა მეტო ვა რდჷ საჭირო, შხვა სრულყოფილ ადამიანქ ხოლო დათმუკო მუშ სიცოცხლე დო დომრთინუესკო თი ირფელ, მუთ ადამქ ოდინუ, მუშენდა იესოქ „ართშა დო სადღამუშოთ გაკეთ თენა“ (ებრ. 7:27; 10:12).
13. მუ განსხვავება რე გიშაჸიდირ დო გიშაჸიდირალ შქას?
13 მუ განსხვავება რე გიშაჸიდირ დო გიშაჸიდირალ შქას? გიშაჸიდირ რე ღორონთშე გინოდგუმილ ნაბიჯ, ნამდა კაცობრიობაქ თიწკუმა ურთიერთობა დირთინუკო. გიშაჸიდირალ რე ადამიანეფიშ ცოდეფშე დარსხებელო გინოგაფილ ოგაფურ. თე გიშაჸიდირალიშ სიმბოლო ჩქინ დარსხებელო დობუნილ იესოშ ზისხირ რე (ეფეს. 1:7; ებრ. 9:14).
ᲨᲔᲓᲔᲒᲔᲤ: ᲒᲐᲗᲐᲕᲘᲡᲤᲐᲚᲔᲑᲐ ᲓᲝ ᲛᲐᲠᲗᲐᲚᲝ ᲛᲔᲠᲩᲥᲘᲜᲐ
14. მუს გუვარჩიენთ დო მუშენ?
14 მორთ ასე ქიგებგათ, მუ შედეგეფ მომღეს გიშაჸიდირქ. თეშო გუვარჩუათ ჟირ ტერმინ, ნამდგას ბიბლია ირინუანს. თინეფ მუდგარენით მოგენს ართიანს, მარა თითოულ გიშაჸიდირშე მეღებულ შედეგეფიშ კონკრეტულ მხარეს მოძირანა. თე ტერმინეფშე დაფიქრება მიმეხვარებუნა, ქიგებგათ, პირადო ჩქინო მუ ჯგირობუა მოუღ გიშაჸიდირს.
15, 16. ა) მუს ნიშნენს ბიბლიას გიმორნაფილ სიტყვა „გათავისფალება“? ბ) მუ გრძნობა გირჩქინდუნა, მუჟამსით ფიქრენთ, მუჭო გუგათავისფალეს იეჰოვაქ დო იესოქ ცოდა დო ღურაშ მონობაშე?
15 ბიბლიას გიმორნაფილ სიტყვა გათავისფალება ნიშნენს გიშაჸიდირალიშ გაფაშ ჭყოლოფათ დარსხებას. დეკვირით, მუჭო ენწყჷ თე აზრ მოციქულ პეტრექ. თიქ ჭარჷ: „მუშენდა გიჩქუნა, ნამდა თქვან ჯვეშეფიშ მუთუნიშ მოღე ვა რენ ფერ ადათ-წესეფშე გილმელებუნ ფერ ვარჩხილქ ვარდა ოქროქ ვაგგათავისფალესინ, გუგათავისფალეს ქრისტეშ, მუჭოთ უმანკო დო უმწიკვლო კირიბიშ, ძვირფას ზისხირქ“ (1 პეტ. 1:18, 19).
16 გიშაჸიდირალიშ ჭყოლოფათ შემლებუნა გეფთავისფალათ ცოდა დო ღურაშ მონობაშე, მუდგას წვალება მოუღ ადამიანეფშა (რომ. 5:21). მანგარ მარდულეფ ვაფუთ იეჰოვა დო იესოს, ნამდა ქრისტეშ ზისხირიშ საშვალებათ ვორეთ გათავისფალებურ (1 კორ. 15:22).
17, 18. ა) მუს ნიშნენს მართალო მერჩქინა? ბ) მუ შედეგეფ მოუღ ჩქინდა თის, ნამდა იეჰოვა მართალეფო მემრჩქინანა?
17 ბიბლიაშე ბგებულენთ, ნამდა იეჰოვაქ მუშ მსახურეფ მართალეფო მირჩქინ დო თინა მეტო ვეთხინს ჩქინდე ჩქინ ცოდეფიშ ჩათხინაფალო ვალიშ გაფას. მარა თენა ვა ნიშნენს, ნამდა იეჰოვაქ მუშ სამართლიან ნორმეფს გინურთჷ; თის თოლ ვა უწკურ ჩქინ ცოდეფშე დო ვართ თიშ გურშენ მეურჩქინუთ მართალეფო, ნამდა თენა დამსახურებულ მაფუდეს. სინამდვილეს, თინა თიშ გურშენ მაპატიენა, ნამდა რწმენას გიმიბრჩქინანთ მუშ დო იესოშ გაფილ გიშაჸიდირალიშ მიმართ (რომ. 3:24; გალ. 2:16).
18 იეჰოვა მართალეფო მემრჩქინანან თეს მუ ჯგირობუა მოუღ ჩქინდა, თითოეულშა? მართალეფო მერჩქინელეფშე ნამთინე ღორონთის მუშ სქუალეფო აფჷ მეღებულ დო თინეფ ქრისტეწკუმა ართო იმმართველენა ზეცას (ტიტ. 3:7; 1 იოან. 3:1). ღორონთ იჭყოლიდუანს თინეფიშ ცოდეფს თეშ, ითამ დღას მუთუნ ვა აფუდან დაშებულ, მუთ თინეფს ქრისტეშ თანამმართველობაშ უფლებას არზენს (რომ. 8:1, 2, 30). მართალო მერჩქინელეფშე ნამთინეს დედამიწას მარადიულო ცხოვრებაშ იმენდ უღჷ. იეჰოვა პატიენს თინეფს ცოდეფს დო მუშ მეგობრეფო ღებულენს (იაკ. 2:21–23). ანაყუ ხალხ არმაგედონს გეგნიღანს დო მარადიულ სიცოცხლეს მიღენს (იოან. 11:26). მართალეფ დო უმართლოეფ ხოლო – თი ადამიანეფ, მით ღურელეფ რენა – გეთელებუნა (საქ. 24:15; იოან. 5:28, 29). საბოლათ იეჰოვაშ არძა მორჩილ მსახურ „მიღენს ღორონთიშ სქუალეფიშ დიდებულ თავისუფლებას“ (რომ. 8:21). მართალო მუშმაჯგირა შედეგ მოუღ ჩქინდა გიშაჸიდირს – საბოლათ ვერიგებუთ ჩქინ მუმას, იეჰოვას!
19. მუჭო გიშენწყუ ჩქინ სიტუაციაქ? (ქოძირით ჩარჩო „მუ მომღეს იეჰოვაშ პატიებაქ“).
19 ჩქინ სიტუაცია ართ დროს მართალო მოგენდჷ დაჭყაფუს მოშინაფილ ახალგაზრდაშ სიტუაციას, ნამდგაქ ირფელ მიოდინუ დო ქიანაშმადიდა ვალეფქ ქიგიადვჷ, ნამუთ დღას ვასურებედ. მარა იეჰოვაშ ჭყოლოფათ უიმენდოთ ვა დოფსქიდით. თიქ დოგორ შარა, ნამდა მეპატუესკო ცოდეფქ, დო გიშაჸიდირალ გეგნიგ. ქრისტეშ მიმართ რწმენა საშვალებას მარზენა, გეფთავისფალათ ცოდა დო ღურაშ მონობაშე. თეწკუმა ართო, ჩქინ ცოდეფ ილასუ, თაშ ქოფთქუათინ, ჩქინ ისტორია ისუფთებ. დო მუთ არძაშ უმოს მნიშვნელოვან რე, ასე ჩქინ მოჸოროფე ზეციერ მუმაწკუმა ჯგირ ურთიერთობაშ საშვალება მიღუნა.
20. მუს გუვარჩიენთ უკულიან სტატიას?
20 მუჟამსით ფიფქრენთ თი ირფელშე, მუთ იეჰოვაქ დო იესოქ ჩქინო აკეთეს, გურ მარდულობათ ემაფშაფუნა (2 კორ. 5:15). თინეფიშ მოხვარაშ უმშო მუთუნიშ იმენდ ვა მაღვენუდეს! უკულიან სტატიას გუვარჩიენთ მუსხირენ შედარებას ბიბლიაშე, მუთ ქიმმეხვარებუნა, უჯგუშო ქინვანჭათ, მუ ჯგირობუა მოუღ ჩქინდა გიშაჸიდირალს.
ᲝᲑᲘᲠᲔᲨ 10 ვადიდათ ჩქინ ღორონთ, იეჰოვა!
a ნამთინე ნინას სიტყვა „გიშაჸიდირალ“ პირდაპირ ითარგმნუ მუჭოთ „სიცოცხლეშ საფასურ“.
