ᲝᲒᲣᲠᲐᲤᲐᲚ ᲡᲢᲐᲢᲘᲐ 7
ᲝᲑᲘᲠᲔᲨ 15 განადიდით იეჰოვაშ პირველ სქუა!
მუნერ პატიება უჩქჷ იეჰოვას?
„სი გიჩქუნ თი პატიება რე დასურო პატიება“ (ᲤᲡᲐᲚᲛ. 130:4).
ᲛᲘᲖᲐᲜ
თე სტატიას გუვარჩიენთ ბიბლიას მოჸუნაფილ შედარებეფს, ნამუთ ქუმოძირანა, მუნერ პატიება უჩქჷ იეჰოვას. თენა ქიმმეხვარებუნა, უმოს მარდულეფ ვაფუდათ ჩქინ ზეციერ მუმას.
1. მუშენ რე ხშირას ძნელ გაგებელ, მუ უღუდ გურს თი პიროვნებას, მიდგაქ მიწუეს, გაპატია?
„ᲞᲐᲢᲘᲔᲑᲣᲚ ᲛᲐᲤᲷ ᲡᲥᲐᲜᲓᲐ“. ალბათ შურს მოიდგუნდეს თე სიტყვეფიშ მორჩქილაფა თი ადამიანშე, მიდგას ოწყინებაფეთ. მარა, ხშირას ვეგიგინე, სინამდვილეს მუ უღჷ გურს თი ადამიანს, მით გირაგად, გაპატია. მუშ რაგად ოკო თეთ, გიპჭყოლიდუათ თე ამბე დო კინ ჯვეშობურო ვორდათია ართიანწკუმან თიშიო? დოვარ თის გულისხმენს, ნამდა, მართალ რე, დღას ვეგიშინანს თე ამბეს, მარა ანწ ვა გაღვენუნა გიღუდესინ თიცალ ურთიერთობა? თაშ რე, ადამიანეფ შხვადოშხვანერო უჯინენა პატიებას.
2. მუჭო ეჭარუნს წმინდა წერილეფ იეჰოვაშ პატიებას? (ქოძირით სქოლიო).
2 არასრულყოფილ ადამიანეფიშ გინაწონს, იეჰოვა გვალო შხვანერო პატიენს. თის უჩქუნ თიცალ პატიება მითინს ვა უჩქჷ. დეკვირით, მუ თქუ ფსალმუნმაბირექ იეჰოვაშ გურშენ: „სი გიჩქუნ თი პატიება რე დასურო პატიება, ზუსტას ათეშენ უღუნა სქან რიდ!“ a (ფსალმ. 130:4). თაშ რე, იეჰოვა პატიებაშ არძაშ უჯგუშ მაგალითის მარზენა, თის უჩქუნ თი პატიებას ჯოხო „დასურო პატიება“. საინტერესო რე, ნამდა ბიბლიაშ მაჭარალეფ მინ დიხას იეჰოვაშ პატიებაშ ეიოჭარალო თიცალ ებრაულ სიტყვას ირინუანა, ნამუთ დღას ვა რე გიმორნაფილ ადამიანიშ პატიებაშ ეიოჭარალო.
3. მუნერ პატიება უჩქჷ იეჰოვას? (ეს. 55:6, 7).
3 მუჟამსით იეჰოვა პატიენს მიდგაინს, თინა ლასუნს თიშ ცოდას დო კინ ჯვეშ ურთიერთობას აგრძელენს თიწკუმა. იეჰოვა თეცალ პატიებაშო ართ დო ჟირშა ვარინ, ირიათო მზათ რე (წეკითხით ესაიაშ 55:6, 7).
4. მუჭო მოხვარუნა იეჰოვა თიშ გაგებას, მუნერ რე ნამდვილ პატიება?
4 იეჰოვაშ პატიება ადამიანეფიშ პატიებაშე თეცალ განსხვავებულ ქორენ-და, მუჭო შემლებუნა ჩქი, არასრულყოფილ ადამიანეფს, ქინვანჭათ, მუნერ რე ნამდვილ პატიება? იეჰოვა ბიბლიას გიმორნაფილ შედარებეფით მოხვარუნა თე საკითხიშ ინონჭაფას. თე სტატიას გუვარჩიენთ მუსხირენ თეცალ შედარებას. თინეფ ქუმოძირანა, მუჭო ლასუნს იეჰოვა ჩქინ ცოდეფს, მუჟამსით მნარღენთ დო მუჭო აგრძელენს კინ ჯგირ ურთიერთობას ჩქინწკუმა. თე ირფელშე დაფიქრება ხოლო უმოსო ქომიჸოროფუანა ჩქინ მოჭყოლოფე ზეციერ მუმას, ნამუთ თეცალ გასაგებო მოგურუანა, მუნერ რე ნამდვილ პატიება.
ᲘᲔᲰᲝᲕᲐ ᲛᲘᲗᲮᲘᲜᲣᲐᲜᲐ ᲪᲝᲓᲐᲡ
5. მუს შილებე შევადარათ იეჰოვაშ პატიება?
5 ბიბლიას ცოდეფ ხშირას მონკა ოღალწკუმა რე შედარებულ. ზუსტას თეშნერო ეჭარ მეფე დავითიქ მუშ ცოდეფ: „მინომლუ ჩქიმ დაშებულქ, მანგარ მონკა ოღალო ქიგმანჯირ“ (ფსალმ. 38:4). მარა იეჰოვა პატიენს, ეუქექუანს, თინეფს, მით ნარღენა დაშებულს (ფსალმ. 25:18; 32:5). თე მუხლეფს გიმორნაფილ ებრაულ სიტყვა, ნამუთ თარგმნილ რე, მუჭოთ „პატიება“, ნიშნენს მუდგაინიშ „ეჭოფუას“ ვარდა „ღალას“. მუჟამსით იეჰოვა ცოდეფს მაპატიენა, თაშ ქოფთქუათინ, მონკა ოღალს მითხინუანა. თინა შემლებუნა შევადარათ ძალიერ კოჩის, ნამუთ მოურს ჩქინდა, ხუჯშე ოღალს გილამწყუნა დო მითხინუანა.
პატიენს – ეუქექუანს ოღალს (ფსალმ. 32:5)
6. მუშმაშორაშა მითხინუანა იეჰოვა ჩქინ ცოდეფს?
6 ბიბლია ხოლო ართ შედარებას ირინუანს, სოვრეშეთ იძირე, მუჭო მითხინუანა იეჰოვა ჩქინ ცოდეფს. 103-ა ფსალმუნიშ მა-12 მუხლის პკითხულენთ: „ბჟაეიოლ რე შორს ბჟადინოლშენ, თიშმაშორაშა ჩამთხინუეს თიქ ჩქინ ცოდეფ“. აღმოსავლეთშე არძაშ უმოს შორ ადგილ დასავლეთ რე; თე ჟირ წერტილ ართიანს დღას ვაკოხვადუ. თაშ ქოფთქუათინ, იეჰოვა ჩქინ ცოდეფს წარმოდგენა ხოლო ვეშემლებუნან თიშმაშორაშა მითხინუანა. მართალო მუშმაჯგირას ეჭარუნს თე შედარება იეჰოვაშ პატიებას დო მუჭო ელამკინანა გურშა თეშ რჩქინა!
„მუჭოთ ბჟაეიოლ რე შორს ბჟადინოლშე“ (ფსალმ. 103:12)
7. მუჭოთ ბიბლიაშე ბგებულენთ, მუს ორთჷ იეჰოვა ჩქინ ცოდეფს? (მიქ. 7:18, 19).
7 ქობძირით, ნამდა იეჰოვა მითხინუანა ოღალს – ცოდეფს, მარა საინტერესო რე, უკულ სო მეუღ, ირიათო ხეს უკინებუნო თინეფ? ვარ. დეკვირით, მუ ჭარჷ მეფე ხიზკიაქ იეჰოვაშ გურშენ: „ოჭიშიშ უკახალე გაფჷ კინოჸოთამილ ჩქიმ არძა ცოდა“ (ეს. 38:9, 17). თე შედარება ოძირანს, ნამდა იეჰოვა ნარღენსინ ფერ ადამიანიშ ცოდეფს ეჭოფუნს დო ოჭიშიშ უკახალე კინიჸოთანს, თეშ, ნამდა ვარწყედას. ხიზკიაშ სიტყვეფ თეშნერო ხოლო შემლებუნა ფთარგმნათ: „თეშ გადინე ჩქიმ ცოდეფ, ითამ დღას ვა მაფუდას დუნაშებ“. თე აზრიშ უჯგუშო ინონჭაფას მოხვარუნა ხოლო ართ შედარება, ნამუთ მიქაშ 7:18, 19-ს რე ინოჭარილ (წეკითხით). თაქ იეჰოვაშ გურშენ რაგადებულ რე, ნამდა თინა ჩქინ ცოდეფს ზღვას ნწყუნსჷ. ჯვეშო მუდგაინ ზღვას დინწყუდ-და, მუთუნ კოჩის ვეშიალებედ თიშ ეშაღალა.
„ოჭიშიშ უკახალე გაფჷ კინოჸოთამილ ჩქიმ არძა ცოდა“ (ეს. 38:17)
„ზღვას დონწყუნქ ჩქინ ცოდეფს“ (მიქ. 7:19)
8. მუ დიბგურეთ ბიბლიას ინოჭარილ შედარებეფშე?
8 თე შედარებეფქ ქუმოძირუეს, ნამდა, მუჟამსით იეჰოვა მაპატიენა, მითხინუანა ჩქინ ცოდეფს, ნამუთ მონკა ოღალცალო გებჯანუნა. მუჭოთ დავითიქ თქუ „ბედნერეფ რენა თინეფ, მიდგას უკანონო საქმეეფქ ეპატუ დო მიდგაშ ცოდეფქ დიფორ. ბედნერ რე კოჩ, მიდგას იეჰოვა დაშებულს ცოდათ ვა უთვალუნს“ (რომ. 4:7, 8). ზუსტას თენა რე ნამდვილ პატიება.
ᲘᲔᲰᲝᲕᲐ ᲚᲐᲡᲣᲜᲡ ᲩᲥᲘᲜ ᲪᲝᲓᲔᲤᲡ
9. ხოლო მუ შედარებას ირინუანს იეჰოვა თიშ ეიოჭარალო, ნამდა ბოლოშა მაპატიენა?
9 იეჰოვა ხოლო ართ შედარებას ირინუანს, ნამდა ქიმმეხვარან თიშ ინონჭაფას, მუჭო ილასუ გიშაჸიდირალიშ ჭყოლოფათ თინეფიშ ცოდეფ, მით მთელ გურით ნარღენა დაშებულს. იეჰოვაშ გურშენ სიმბოლურო რაგადებულ რე, ნამდა თინა მიკორჩხუნს დო გინორჩხუნს ცოდეფს. თეშნერო, ცოდეფშე ისუფთებ თინა, მიდგას დაშებულ აფჷ (ფსალმ. 51:7; ეს. 4:4; იერ. 33:8). დეკვირით, მუჭო ეჭარუნს იეჰოვა, მუ მოჸუნს თე ირფელს შედეგო. თინა იჩიებ: „თქვან ცოდეფ ალიშფერ რდასინ ხოლო, თირცალო დერჩიალებ; შინდიშფერ ნოჭკერცალ რდასინ ხოლო, მონტყორს ქაგურუ“ (ეს. 1:18). ალიშფერ დო შინდიშფერ ლაქაშ ნოჭკერშე ეშაჸონაფა მანგარ ძნელ რე. მარა თე შედარებათ იეჰოვა მოძირანა, ნამდა ჩქინ ცოდეფ შურო ვერწყებედასინ თეშ გეგნირჩხუ.
„თქვან ცოდეფ ალიშფერ რდასინ ხოლო, თირცალო დერჩიალებ“ (ეს. 1:18)
10. ხოლო მუ შედარება რე მოჩამილ ბიბლიას, ნამუთ ეჭარუნს, მუნერ პატიება უჩქჷ პატიებას?
10 მუჭოთ წოხოლენ სტატიას რდჷ რაგადებულ, ცოდეფ შედარებულ რე ვალეფწკუმა (მათ. 6:12, სქოლიო; ლუკ. 11:4, სქოლიო). ადამ დო ევაშ შეცოდებაშ გურშენ არძას დაბადებაშე დიდ ვალ გებძუნა. მუჟამსით ჩქი ხოლო ფცოდენთ, ვალშა ვალს გიბძინანთ. ათეშენ, არძას ქიანაშმადიდა ვალ მაფუნა შაყარელ. მარა, მუჟამსით იეჰოვა მაპატიენა, თაშ ქოფთქუათინ, გილაჭარუნს ჩქინ ვალეფს, ნამუთ ოგაფალ მაჸიდეს. თინა პასუხის ვა მოფთხინა თი ცოდეფიშ გურშენ, ნამუთ უკვე პატიებულ აფჷ. კოჩის ვალეფიშ გილაჭარუა ოხიოლუნ თეშ, ჩქი ხოლო დიდ ხიოლ მიღუნა, მუჟამსით იეჰოვა ცოდეფს მაპატიენა.
„ქუმაპატით ჩქინ ცოდეფ“ (მათ. 6:12)
11. მუს ნიშნენს, ნამდა ჩქინ ცოდეფ ილასუ? (საქ. 3:19).
11 იეჰოვა ჩქინ ვალეფს, ცოდეფს, უბრალოთ ვეგლაჭარუნსინ, ლასუნს თინეფს (წეკითხით საქმეეფიშ 3:19). ვალიშ გილაჭარუაშ დროს მიდგარენქ შილებე გეგნოხაზას, მუზმა რდჷ ოგაფალ, მარა გინოხაზუაშ უკულ ციფრეფ შილებე იშენ ირწყებედას. ლასუა გვალო შხვა რე. მაგალთო, ჯვეშო ირინუანდესინ თი მელანით ნაჭარა შოლირ გუბკაშ ართ გინოსუმალათ ილასუდ, თეშ, ნამდა მუთუნ ვეგიოხედ, ითამ ვართ დღას ჭარუდუკო მუთუნ. ათეშენ, მუჟამსით ვალს გინოლასუნდეს, ნაჭარა ბოლოშა დინუდ დო კოჩ ვემეხვადუდ, მუ ჭარუდ თეიშახ. გურს მიტიბუანა თიშ რჩქინა, ნამდა იეჰოვა ხოლო ჩქინ ცოდეფს უბრალოთ ვეგლაჭარუნსინ, ბოლოშა ლასუნს (ფსალმ. 51:9).
„დილასას თქვან ცოდეფქ“ (საქ. 3:19)
12. მუს ბგებულენთ ფსქელ მუნაფაშ შედარებაშე?
12 იეჰოვა ხოლო ართ შედარებას ირინუანს თიშ ოძირაფალო, მუჭო მაპატიენა ჩქინ ცოდეფს. თინა იჩიებ: „თეშ დოფობრუნქ სქან დაშებულს, ითამ მუნაფათ მაფუდას ფორილ, სქან ცოდეფშა ფსქელ მუნაფა მუნომფორუდასინ თეშ“ (ეს. 44:22). მუჟამსით იეჰოვა მაპატიენა, თინა, თაშ ქოფთქუათინ, ფსქელ მუნაფას მინაფორანს ჩქინ დაშებულს, ნამდა ვართ ჩქი დო ვართ მუ ვა ვორწყედათ თის.
„თეშ დოფობრუნქ სქან დაშებულს, ითამ მუნაფათ მაფუდას ფორილ“ (ეს. 44:22)
13. მუს გინაფლენთ, მუჟამსით თიშე ფიქრენთ, მუნერ პატიება უჩქჷ იეჰოვას?
13 მუს ბგურაფლენთ გარჩიებულ შედარებეფშე? მუჟამსით იეჰოვა მაპატიენა, შემლებუნა მთელ ცხოვრება ვეპწუხათ დაშებულიშ გურშენ. მუჭოთ გებგით, ქრისტეშ ზისხირიშ ჭყოლოფათ, ჩქინ ვალეფ ბოლოშა რე გილაჭარილ დო თეშ რე ლასირ, ითამ ვართ დღას ინოჭარუდუკო სოთინ. ზუსტას თეცალ პატიება უჩქჷ იეჰოვას, მუჟამსით მთელ გურით მნარღენთ დაშებულს.
ᲘᲔᲰᲝᲕᲐ ᲙᲘᲜ ᲛᲔᲒᲝᲑᲠᲔᲤᲝ ᲑᲦᲔᲑᲣᲚᲔᲜᲐ
იეჰოვაშ პატიება თიწკუმა ჯგირ ურთიერთობაშ საშვალებას მარზენა (ქოძირით აბზაც 14)
14. მუშენ შემლებუნა ბჯერდან, ნამდა იეჰოვა ვა გომშინანა დაშებულს? (ქოძირით სურათეფ).
14 მუჟამსით იეჰოვა ცოდეფს მაპატიენა, კინ მეგობრეფო ბღებულენა. შემლებუნა მეტო ვეპწუხათ დაშებულიშ გურშენ, მუშენდა თინა ბოლოშა იჭყოლიდუანს ჩქინ ცოდას. ვართ თიშა ოკო მოშქურუდან, ნამდა იეჰოვა ართ დღასით ქუგომშინანა ჩქინ შეცდომეფს დო დუმასაჯენა. თენა მუთუნით ვა მოხვადუ! მუშენ შემლებუნა ბჯერდან თეშ? დეკვირით, მუ უწუ თიქ წინასწარმეტყველ იერემიას: „ვაპატიენქ თინეფს დაშებულს დო მეტო ვა გუშინანქ ცოდას“ (იერ. 31:34). წანეფიშ უკულ მოციქულ პავლექ ხოლო თქუ თე სიტყვეფ (ებრ. 8:12). მორთ ასე ქიგებგათ, მუს ნიშნენს თე სიტყვეფ.
„მეტო ვა გუშინანქ ცოდას“ (იერ. 31:34)
15. მუს ნიშნენს, ნამდა იეჰოვა მეტო ვა გომშინანა ცოდეფს?
15 ბიბლიას სიტყვა „გოშინა“ ირიათო ვა ნიშნენს ულირს მოხვალამირშე ფიქრის. თე სიტყვას შილებე მოქმედება ხოლო იგულისხმებუდას. ქიგიფშინათ, მუ თხუ იესოს თი უბადოშ მაკეთებელქ, მით თიშ ხასლას მიკოჭკადუდ ძელს: „იესო, ქუგომშინ, მუჟამსით სქან სამეფოს იჸუაფუქ“ (ლუკ. 23:42, 43). მუჟამსით თე კოჩიქ უწუ ქუგომშინია, თიშ რაგად ვაკოდ, ნამდა იესოქ უბრალოთ იფიქრუკო თიშე, მუდგაქ იესოშ პასუხშე ხოლო ჯგირო ქიძირ. თიქ უბადოშ მაკეთებელს უწუ, ნამდა ქიმოქმედენდ თიშ საჯგირობუოთ დო გათელენდ. თაშ ნამდა, მუჟამსით იეჰოვა მირაგადუნა, მეტო ვეგიფშინანქია სქან ცოდეფს, გულისხმენს, ნამდა პატიებულ ცოდეფიშ გურშენ მომავალს პასუხის ვა მოფთხინა დო ვა დაფსაჯენა.
16. მუს ადარენს ბიბლია ცოდაშ პატიებას?
16 ბიბლიას ხოლო ართ შედარება რე მოჸუნაფილ, ნამუთ მოხვარუნა თიშ ინონჭაფას, მუჭო მათავისფალენა იეჰოვა, მუჟამსით ცოდეფს მაპატიენა. მუჭოთ მიჩქუნა, არასრულყოფილებაშ გურშენ „ცოდაშ მონეფ“ ვორეთ, მარა, მუჟამსით ღორონთ დაშებულს მაპატიენა, თაშ ქოფთქუათინ, „ცოდაშე იფთავისფალებუთ“ (რომ. 6:17, 18; გამოცხ. 1:5). მუჭოთ გათავისფალებურ მონას უღჷ დიდ ხიოლ, თეშ ჩქინდა ხოლო ბედნერობა მოუღ თიშ რჩქინას, ნამდა იეჰოვას პატიებულ აფჷ ჩქინდა დაშებულ.
„ცოდაშე გეთავისფალით“ (რომ. 6:18)
17. მუ გაგებათ მოსქილიდუანა პატიება? (ეს. 53:5).
17 მორთ ასე გუვარჩუათ ბოლო შედარება, ნამუთ მოჩამილ რე ესაიაშ 53:5-ის (წეკითხით). თაქ რაგადებულ რე, ნამდა იესოშ მსხვერპლიშ ჭყოლოფათ იეჰოვაქ, თაშ ქოფთქუათინ, დუმოსქილიდუეს, მუშენდა ცოდაშ გურშენ თი ადამიანცალ სიტუაციას ვორდით, მიდგას ოღურალ ლახალა ოჭირ (1 პეტ. 2:24). მარა გიშაჸიდირალიშ ჭყოლოფათ იეჰოვაწკუმა ჯგირ ურთიერთობა დიბრთინეთ, ნამუთ ცოდას – „სულიერ ლახალას“ – აფუდ გილალუაფირ. მუჭოთ სერიოზულო დალახებურ კოჩშა მოუღ დიდ ხიოლ ლახალაშე სქილიდაფას, თეშ ჩქი ხოლო მანგარო ფხარენთ, მუჟამსით იეჰოვა სულიერო მოსქილიდუანა დო თიშ თოლს იბრთინუანთ მოწონას.
„თიშ ჭრილობეფქ დუმოსქილიდუეს“ (ეს. 53:5)
ᲛᲣ ᲯᲒᲘᲠᲝᲑᲣᲐ ᲛᲝᲣᲦ ᲩᲥᲘᲜᲓᲐ ᲘᲔᲰᲝᲕᲐᲨ ᲞᲐᲢᲘᲔᲑᲐᲡ
18. მუ დიბგურეთ ბიბლიას მოჩამილ შედარებეფშე იეჰოვაშ პატიებაშ გურშენ? (ქოძირით ჩარჩო „მუჭო მაპატიენა იეჰოვა“).
18 მუ დიბგურეთ თე შედარებეფშე იეჰოვაშ პატიებაშ გურშენ? მუჟამსით იეჰოვა ცოდეფს მაპატიენა, სადღამუშოთ იჭყოლიდუანს თინეფს დო დღას ვა გომშინანა. თეშ ჭყოლოფათ, შემლებუნა ჯგირ ურთიერთობა მიღუდან ჩქინ ზეციერ მუმაწკუმა. თეს გეძინელ, მარჩქილენა, ნამდა ცოდამ ადამიანეფს ვა მაფუნა დამსახურებულ ღორონთშე პატიება. თენა ძღვინ რე ჩქინ მოჭყოლოფე მუმაშე, მუდგას თ იშენ მარზენა, ნამდა მანგარო უჸორთ (რომ. 3:24).
19. ა) მუშ გურშენ ვორეთ მარდულეფ? (რომ. 4:8). ბ) მუს გუვარჩიენთ უკულიან სტატიას?
19 წეკითხით რომაელეფიშ 4:8. მთელ გურით უმარდუთ იეჰოვას, ნამდა თეცალ პატიება უჩქჷ (ფსალმ. 130:4). მარა, ქუმოკონა ღორონთიქ ქუმაპატუან-და, ჩქი ხოლო ართ მნიშვნელოვან მუდგარენ ოკო ვაკეთათ. იესოქ მიწუეს: „ვაპატიენთ-და, ვართ თქვა გაპატიენა თქვან ზეციერ მუმა“ (მათ. 6:14, 15). თაშ ნამდა, აუცილებერ რე, მივაჸუნათ იეჰოვაშ მაგალითის დო ვაპატუათ შხვეფს. უკულიან სტატიას ზუსტას თეშე მაღვენუნა ჩიება.
ᲝᲑᲘᲠᲔᲨ 46 სქან მარდულეფ ვორეთ, იეჰოვა
a ებრაულ ორიგინალ ტექსტის თე მუხლის იეჰოვაშ პატიებაშ ეიოჭარალო თიცალ ფრაზა რე გიმორნაფილ, ნამუთ ოძირანს, ნამდა იეჰოვას უჩქუნ თიცალ პატიება მითინს ვა უჩქჷ დო ხვალე თინა პატიენს სრულას.
