1. მუჭო შემლებნა იეჰოვაწკუმა ურთიერთობას დრო გეგშურთათ?

ჩქი მიჸორა თი ადამიანეფწკუმა ურთიერთობა, მიდგაწკუმა ხოლოს ვორეთ. მაგალთო, დაქორწინებულ წყვილს მანგარო ოსიამოვნ, მუჟამსით დროს გიმურთუნა ართიანს, ახალგაზრდეფს მუნეფიშ მეგობრეფწკუმა ოკონა რინა დო ჩქი არძას თანამორწმუნეეფწკუმა ურთიერთობა მიხარენა გურს. მუთ არძაშ უმოს მთავარ რე, ჩქი მიჸორა ღორონთწკუმა ურთიერთობაშო დროშ გიშართუალა. თეშ კეთება შემლებნა ლოცვათ, ბიბლიაშ კითხირით დო ღორონთიშ თვისებეფ დო განზრახვეფშე ფიქრით. ჩქი მანგარო ვაფასენთ იეჰოვაწკუმა ურთიერთობას! (ფსალმ. 139:17).

2. მუ სირთულეს შეფხვადუთ?

² მართალ რე, იეჰოვაწკუმა ურთიერთობაშო დროშ გიშართუალას ჩქინდა ხიოლ მოუღ, მარა თენა ვა რე ადვილ. სამუშაქ, ოჯახურ პასუხიშმგებლობეფქ დო შხვა აუცილებერ საქმეეფქ შილებე თეშ მიდამღან დრო, ნამდა ვა მაჩოდან ლოცვაშა, გურაფაშა დო ფიქრშა.

3. ხოლო მუქ შილებე დრო მიდამღან?

³ ხოლო რე მუდგარენეფ, მუთ დროს ითხინს, მარა კურცხას ვეპით-და, თინეფქ შილებე თი დრო მიდამღან, მუთ იეჰოვაწკუმა ურთიერთობაშო მოსაჭირნა. მაგალთო, თენა შილებე რდას მოსვანჯა. საჭირო რე, თის მუშ ადგილ ქიმურჩქინათ, მუშენდა შხვანერო სულიერ საქმეეფშო დრო ვადმოსქიდნა (იგავ. 25:27; 1 ტიმ. 4:8).

4. მუს გუვარჩიენთ თე სტატიას?

 ⁴ თე სტატიას გუვარჩიენთ, მუშენ ოკო დეფიფქრათ, მუ რე ჩქინ ცხოვრებას არძაშ უმოს მნიშვნელოვან. თეს გეძინელ, ქობძირუნთ, მუჭო შემლებნა გონივრულო გეგმიბრინუათ დრო დო მუ ჯგირობუას მომღანა თენა.

5. მუჭო მეხვარებ ახალგაზრდეფს ეფესოელეფიშ 5:15-17-ის მოჩამილ სიტყვეფშე დაფიქრება, ქიგიოდირთან ცხოვრებაშ არძაშ უჯგუშ შარას?

⁵ქიგიოდირთით ცხოვრებაშ არძაშ უჯგუშ შარას. უმენტაშო, ახალგაზრდეფს აფნა გინაჭყვიდირალ, მუ შარას გიოდირთნა ცხოვრებას. მასწავლებერეფ დო იეჰოვაშ მოწმე ვა რენ ფერ ოჯახიშ წევრეფ შილებე თინეფს ელუჩანდან უმაღლეს განათლებაშ მეღებას დო ქვეყნიერებას წარმატებაშ მეჭირნაფას. თენა ალბათ თინეფს მთელ დროს მიდუღანს. თეშ გინაწონს, იეჰოვაშ მოწმე მშობლეფ დო მეგობრეფ შილებე ურაგადდან, ნამდა იეჰოვაშ მსახურებას დუთმან მუნეფიშ ცხოვრება. მუ მეხვარებ ახალგაზრდას, მიდგას იეჰოვა უჸორს, მიღას გონივრულ გადაწყვეტილება? თის ქიმეხვარებ ეფესოელეფიშ 5:15—17-ის მოჩამილ სიტყვეფშე დაფიქრება (წეკითხით). თე მუხლეფიშ კითხირიშ უკულ ახალგაზრდას შეულებ მუშ დუდის კითხას: „მუ რე იეჰოვაშ ნება?“, „ნამ გადაწყვეტილება გუხარენს თის გურს?“, „მუ მიმეხვარებ, გონივრულო გეგმიბრინუე დრო?“. ფშუდან, ნამდა „ძნელ დროს ფცხოვრენთ“ დო თე ქვეყნიერება, ნამდგაშ მართველ სატანა რე, მალას გენადგურებ. ჭკვერულ იჸუაფ, ჩქინ ცხოვრებათ იეჰოვას გუხარათ გურ.

6. მუ არჩევან აკეთ მარიამქ დო მუშენ რდჷ თენა ჭკვერულ?

⁶დეფიქრით, მუ რე უმოს მნიშვნელოვან. მინშა დროშ გონივრულო გიმორნაფა ნიშნენს, არჩევან გუვაკეთათ ჟირ საქმეშ შქას, ნამდგაშე ნამთინ ვა რე გლახა. თენა ჯგირო იძირე თი შემთხვევაშე, მუჟამსით იესოქ მარიამ დო მართაშ ჸუდეშა მერთჷ სტუმარო. მართას მანგარო ახიოლ იესოშ მოულაქ დო შურდოგურით ქეშუდირთჷ ოჭკუმალიშ კეთებას. თეშ გინაწონს, მარიამქ იესოშ კუჩხეფწკუმა ქუდოზოჯ დო თიშ რჩქილა ქიდიჭყჷ. მუშო ოკო რაგად, მუდგას მართა ორთუდ ვა რდჷ გლახა, მარა იესოქ თქუ, ნამდა „მარიამქ უჯგუშ გიშეგორ“ (ლუკ. 10:38—42). დროშ მიკულაშ უკულ შილებე მარიამს გაჭყორდუკო, მუ ოჭკუმალ უღდეს თიმ დღას, მარა დღას ვა გაჭყორდუდ, მუ დიგურუ იესოშე. მუჭოთ მარიამქ გიმირინუ დრო იესოშ მარჩქილაფარო, თეშ ჩქი ხოლო ოკო გეგმიბრინუათ დრო, ნამდა ქუმურჩქილუათ იეჰოვას. მუჭო შემლებნა თე დრო გონივრულო გეგმიბრინუათ?

7. მუშენ ოკო გიმურთათ დრო ლოცვას, გურაფას დო ფიქრის?

⁷ რშუდან, ნამდა ლოცვა, გურაფა დო ფიქრ ჩქინ თაყვანიშცემაშ ნაწილ რე. მუჟამსით ბლოცულენთ, ურთიერთობა მიღნა ჩქინ ზეციერ მუმაწკუმა, მიდგას მანგარო უჸორთ (ფსალ. 5:7). მუჟამსით ბიბლიას ბგურაფლენთ, იფჩინებაფუანთ ღორონთის, მიდგაშე მოურს სიბრძნე (იგავ. 2:1—5). მუჟამსით ნაგურეფშე ფიფქრენთ, ვორწყეთ იეჰოვაშ ძვირფას თვისებეფს დო ინვანჭუთ თიშ დიდებულ განზრახვას, მუთ ჩქი მოხუნა. თენა მართალო დროშ გონივრულ გიმორნაფა რე. მარა მუჭო შემლებნა თენა თეშ გუვაკეთათ, ნამდა მაქსიმალურ სარგებელ მიბღათ?

8. მუშ გურაფა შემლებნა იესოშ მაგალითშე?

⁸შეიოლებერ ქორენ-და, გეგშეგორით  წყნარ ადგილ. გუვარჩუათ იესოშ მაგალით. სოიშახ თინა დედამიწას მსახურებას დიჭყანდკო, 40 დღას უდაბნოს რდჷ (ლუკ. 4:1, 2). თე წყნარ ადგილს იესოს შეულებუდ ილოცკო დო ქიფიქრკო იეჰოვაშ განზრახვაშე, ნამუთ მუს ოხუდ. თეშნერო იესოს საშვალება უღუდ, მემზადკო თი გამოცდეფშო, ნამდგას მალას ქეშეხვადუდ. მუშ გურაფა შეილებნა თიშ მაგალითშე? დიდ ოჯახის ქოცხოვრენთ-და, ალბათ ირო ვეჸუაფ ადვილ, დოგორათ წყნარ ადგილს თქვან ჸუდეს. თე შემთხვევას, შილებე შხვადო ქიმიოგორუათ თეცალ ადგილს. თაშ იქციებ ართ და, ჯულია, მუჟამსით ოკო, იეჰოვას დურაგადუას ლოცვას. თინა მეუღლეწკუმა ართო ცხოვრენს საფრანგეთის, ართ ჭიჭე ბინას, სოდეთ ძნელ რე წყნარ ადგილს ქიმიოგორუან. ჯულია იჩიებ: „მა ირდღას ოსეირნებშა პარკშა გილურქ. თექ შემლებ ვორდე ხვალე დო მთელ გურით ქუდურაგადუე იეჰოვას“.

9. ბრელ საქმე უღუდუნ თიშ უმკუჯინუო, მუჭო ოძირუ იესოქ, ნამდა აფასენდჷ იეჰოვაწკუმა ურთიერთობას?

⁹ იესოს ბრელ საქმე უღუდ. თინა შხვადოშხვა ადგილშა გილეშ დო ეკოჸუნდჷ ხალხ, მით თიშე ყურადღებას ითხინდჷ. თინა ქოძირესკონ, ართშა „მთელ ქალაქიქ კარწკუმა ქიგიშაყარ“. თეშ უმკუჯინუო, იესოქ იშენით გეგმურთჷ დრო იეჰოვაწკუმა ურთიერთობას. ჩხანაშ ეშულაშახ თიქ წყნარ ადგილშა მიდართჷ, ნამდა ქილოცკო (მარ. 1:32—35).

10, 11. მუჭოთ მათეშ 26:40, 41-ის ჭარჷ, მუ დროულ რჩევა მეჩჷ იესოქ მოწაფეეფს, მარა მუქ მოხვად უკულ?

¹⁰ მუშ მიწიერ ცხოვრებაშ ბოლო სერს იესოქ ხოლო ართშა დოგორ წყნარ ადგილ ფიქრშო დო ლოცვაშო (მათ. 26:36). თიმწკუმა თიქ მუშ მოწაფეეფს დროულ მითითება მეჩჷ ლოცვაშ გურშენ.

¹¹ შილებე შქასერ ჸოფედკო, მუჟამსით იესოქ მოწაფეეფწკუმა ართო გეთსემანეშ ბაღშა იდჷ. თექ თინეფს თხუ, კურცხას ჸოფედესკო დო მუქ ოლოცებშა მიდართჷ (მათ. 26:37—39). მარა ონდო იესო ლოცულენდჷ, თინეფს ქუდარულეს. დორულაფირ მოწაფეეფ ქოძირუნ, იესოქ ხოლო ართშა თხუ თინეფს: „კურცხას რდათ დო ირიათო ილოცით“ (წეკითხით მათეშ 26:40, 41). იესოს არჩქილედ, ნამდა თინეფ ემოციურო დო ფიზიკურო გინოშულადირეფ რდეს. თიქ მიშელ მოწაფეეფიშ მდგომარეობაშა დო თქუ, ნამდა ხორც სუსტ რე. თიმ სერს იესოქ ხოლო ჟირშა იდჷ ოლოცებშა დო დირთუნ, მოწაფეეფქ ილოცესკონ თიშ მანგიორო, კინ ლურენჯეფქ ქუდოხვად (მათ. 26:42—45).

12. მუ ოკო ვაკეთათ, მუჟამსით ემოციურო დო ფიზიკურო თეშ ვორეთ გინოშულადირ, ნამდა ლოცვაშ დუდ ვამღუნა?

¹²გეგშაგორით დრო. მინშა შილებე ემოციურო  დო ფიზიკურო თეშ ვორდათ გინოშულადირ, ნამდა ლოცვაშ დუდ ვამღუდან. მუშ კეთება შილებე თეცალ დროს? ნამთინექ, მიდგას წესო უღუდ დღაშ ბოლოს ილოცკო, ქიმეხვად, ნამდა თეშ კეთება უჯგუშ იჸუაფუდ ჭიჭე უმოს ადრე, მუჟამსით ნაკლებო იჸუაფუდ შულადირ. ნამთინექ ხოლო ქუგოხვად, ნამდა დოხუნელო ვარდა ბირგულდოშქუმალირო ლოცვაშ დროს ნაკლებო გინუღ შხვა მუდგარენეფშა ყურადღება. მუჟამსით გურგოტახილ ვარდა მანგარ შეწუხებულ რეთ, ქოუწით იეჰოვას, მუს გინაფლენთ. შეილებნა დარწმუნებულ რდათ, ნამდა ჩქინ მოჭყოლოფე მუმა გაიგენა (ფსალმ. 139:4).

13. მუჭო შილებე ელექტრონულ მოწყობილობეფქ მეცილან იეჰოვაწკუმა ურთიერთობას?

¹³ქეცადით, მუთუნქ ვეგეცილან გურაფას. ხვალე ლოცვა ვა რე იეჰოვაწკუმა დაახლოებაშ საშვალება. ბიბლიაშ გურაფას დო კრებაშ შეხვალამეფშა დასწრებას ხოლო შეულებ, დუმაახლოვან ღორონთწკუმა. მუჭო შეილებნა მაქსიმალურ სარგებელ გეგშეღათ პირად გურაფაშე დო კრებაშ შეხვალამეფშე? ქოკითხით თქვან დუდის, მუ გოცილნა, ყურადღებით რდათ შეხვალამეფიშ ვარდა გურაფაშ დროს; ტელეფონიშ ზარეფ ვარდა წერილეფ ხომ ვარ?! ამდღა მილიარდობით ადამიან ირინუანს თეშ საშვალებეფს. ნამთინე მარკვიებელიშ აზრით ადვილო შილებე ყურადღება შხვა მუდგარენშა გეგნიბღათ, მუჟამსით ტელეფონ ხოლო მიღნა. ართ ფსიქოლოგ იჩიებ: „თეცალ დროს ართ მუდგარენშე ვა გაფიქრებე დო სქან გონება შხვადო გინოსხაპუნს“. კონგრესეფიშ დოჭყაფაშ დროს ხშირას მირაგადნა, ნამდა ჩქინ ელექტრონულ მოწყობილობეფ გეგნიპჸუნათ თიცალ რეჟიმშა, ნამუთ შხვეფს ვეცილებ მორჩქილაფას. ჯგირ იჸუაფ თენა ხვალე ვორეთინ თიმწკუმა ხოლო, თაშ გუვაკეთათ. შედეგო ელექტრონულ მოწყობილობა ჩქი ხოლო ვა მეცილებნა იეჰოვაწკუმა ურთიერთობას.

14. მუჭოთ ფილიპელეფიშ 4:6, 7-შე იძირე, მუჭო მიმეხვარებნა იეჰოვა, ნამდა შხვა მუდგარენშა ვეგნიბღათ ყურადღება?

¹⁴ქოთხით იეჰოვას მოხვარა, ნამდა ყურადღება შხვა მუდგარენშა ვეგნიღათ. მუჟამსით გურს გოუჩანთ, ნამდა გურაფაშ  ვარდა შეხვალამაშ დროს თქვან გონება შხვადო გინოსხაპუნს, ქოთხით იეჰოვას მოხვარა. ოწუხებელ ქოიღნან-და, შილებე ადვილ ვა რდას სულიერ საქმეეფს მონაწილებაშ დროს თინა გიჭყოლიდუათ; მარა თენა მნიშვნელოვან რე. ქილოცით, ნამდა ღორონთიქ ქიმერჩან მშვიდობა, ნამუთ ხვალე თქვან გურს ვარინ, „გონებას“ ხოლო დეცვენს (წეკითხით ფილიპელეფიშ 4:6, 7).

15. მუ რე ართ-ართ ჯგირობუა, მუთ იეჰოვაწკუმა ურთიერთობაშო დროშ გიშართუალას მოჸუნს?

¹⁵ იეჰოვაწკუმა ჩიებას, თიშ რჩქილას დო თიშე ფიქრის დროს გეგმურთუნთ-და, თენა ჯგირობუას მოიღანა. პირველ რიგის, მიღენთ უჯგუშ გადაწყვეტილებეფს. ბიბლია მირაგადნა: „მით ბრძენეფწკუმა გილურს, დებრძენებ“ (იგავ. 13:20). თაშ ნამდა, მუჟამსით თიწკუმა ურთიერთობას გეგშურთუნთ დროს, მიდგაშე სიბრძნე მოურს, თქვა ხოლო დებრძენებუთ. თეშნერო გარჩქვენუნა, მუჭო გუხარათ იეჰოვას გურ დო მუჭო ეუჩილითუათ თიცალ გადაწყვეტილებას დუდ, მუთ თის ოწყინუანს.

16. მუჭო აუჯგუშენს თქვან გურაფაშ უნარეფს იეჰოვაწკუმა ურთიერთობა?

¹⁶ მაჟია, იჸუაფუთ უჯგუშ მასწავლებერ. მუჟამსით შხვას ბიბლიას ოგურუანთ, თქვან ართ-ართ მთავარ მიზან რე, ქიმეხვარათ თის იეჰოვაწკუმა დაახლოებას. მუთ უმოს ურთიერთობა გაღვენუნა ჩქინ ზეციერ მუმაწკუმა, თით უმოსო გეგემანგარებნა თიშ მიმართ ჸოროფა დო უმოს უჯგუშო შეგალებენა ბიბლიაშ მაგურაფალს ხოლო ქუჸოროფუათ თინა. თაშ მოხვად იესოშ შემთხვევას. იესო თიცალ ჸოროფაშ სიტყვეფით მიშინუანდჷ ზეციერ მუმას, ნამდა მუშ მიმაჸუნალეფს ხოლო ქუჸოროფუ თინა (იოან. 17:25, 26).

17. მუჭო მოხვარნა ლოცვა დო გურაფა რწმენაშ გამანგარებას?

¹⁷ მასმა, თქვან რწმენა უმოსო გემანგარებ. დეფიფქრათ, მუ ხვადუ, მუჟამსით ღორონთის თხინთ ხემძღვანელობას, გურიშექექაფას ვარდა ელარნას. იეჰოვაშე პასუხიშ ირ მეღებაშ დროს თქვან რწმენა იმანგარებ (1 იოან. 5:15). პირად გურაფას ხოლო შეულებ თქვან რწმენაშ გამანგარება. ბიბლიას ჭარჷ: „რწმენა რჩქილაშ შედეგ რე“ (რომ. 10:17). მარა რწმენაშ გამანგარებელო ხვალე რჩქინაშ მეღება ვა რე დასაბაღ.

18. ფსალმუნმაბირეშ მაგალითით გენწყით, მუშენ რე საჭირო ფიქრ.

¹⁸ საჭირო რე დეფიფქრათ თიშე, მუდგას ბგურაფლენთ. გუვარჩუათ 77-ა ფსალმუნიშ მაჭარალიშ შემთხვევა. თინა მანგარ შეწუხებულ რდჷ, მუშენდა ფიქრენდჷ, ნამდა მუს დო დანარჩენ ისრაელეფს იეჰოვა ვეწონუანდჷ. თე ოწუხებელქ  თის ლურ მეუდინუ (მუხლეფ 2—8). თე ფსალმუნმაბირექ იეჰოვას უწუ: „არძა სქან საქმეშე იფიფქრენქ დო სქან ნახელუანს ქიდვეკვირებუქ“ (მუხლ 12). მუშო ოკო რაგად, თის ჯგირო უჩქუდ, მუ აფუდ იეჰოვას ნაკეთებ მუშ ხალხშო, მარა იშენით ოინტერესუდ: „გიჭყოლიდუო ღორონთიქ ჭყოლოფაშ გიმორჩქინა ვარდა გერისხჷ დო მეტო ვეგმირჩქინანსო ჭყოლოფას?“ (მუხლ 9). თე პიროვნებაქ დეფიქრჷ იეჰოვაშ საქმეეფშე დო თიშე, მუჭო გიმირჩქინანდჷ ღორონთ ულირს ჭყოლოფას დო მუჭო მიშეშ შხვეფიშ მდგომარეობაშა (მუხლ 11). შედეგო ფსალმუნმაბირექ დერწმუნ, ნამდა იეჰოვა დღას ვემიოტენს მუშ ხალხის (მუხლ 15). თეშნერო, თქვა ხოლო, მუჟამსით დეფიქრებუთ, მუ აფჷ იეჰოვას ნაკეთებ მუშ ხალხშო დო პირადო თქვანო, თენა გაიმანგარენა რწმენას.

19. ხოლო მუ ჯგირობუა მოუღ ჩქინდა იეჰოვაწკუმა ურთიერთობაშო დროშ გიშართუალას?

¹⁹ მანთხა დო არძაშ უმოს მნიშვნელოვან, იეჰოვაშ მიმართ თქვან ჸოროფა გემანგარებ. არძა თვისებაშე უმოსო ჸოროფა მოხვარნა, დევემორჩილათ იეჰოვას, მიდაფრთათ მსხვერპლშა, ნამდა თის გურ გუხარათ დო ქუგურზათ არძა პრობლემას (მათ. 22:37—39; 1 კორ. 13:4, 7; 1 იოან. 5:3). მუ შილებე რდას იეჰოვაწკუმა ხოლოშიან მეგობრობაშე უმოს ძვირფას?! (ფსალმ. 63:1—8).

20. მუ გაფნა დაგეგმილ, ნამდა იეჰოვაწკუმა ურთიერთობას დრო გეგმურთათ?

²⁰ რშუდან, ნამდა ლოცვა, გურაფა დო ფიქრ ჩქინ თაყვანიშცემაშ ნაწილ რე. იესოცალო წყნარ ადგილ დოგორით იეჰოვაწკუმა ურთიერთობაშო. ქეცადით, მუთუნქ ვეგეცილან გურაფას. ქოთხით, იეჰოვას ყურადღება შხვა მუთუნშა ვეგნიღათ, მუჟამსით სულიერ საქმეეფს ღებულენთ მონაწილებას. დროს ამდღა ხოლო გონივრულო გეგმირინუანთ-და, იეჰოვა გაკურთხენა მარადიულ ცხოვრებათ ღორონთიშ ახალ ქვეყნიერებას (მარკ. 4:24).