1. მუ რთულ სიტუაციას მოხვად დავითიქ?

ისრაელიშ მეფე საულს გინოჭყვიდილ აფუდ დავითიშ ჸვილუა, ათეშენ თინა ნტებულ რდჷ. დავითის ოჭკუმალ ოსაჭირუდ, ათეშენ თიქ ქალაქ ნობშა ქიმერთჷ დო მოკრძალებურო ხვალე ხუთ ქობალ ითხუ (1 სამ. 21:1, 3). ჭიჭე ხანშა თიქ დო თიშ მაჸალეეფქ გამოქვაბულს გექთუფორუეს დუდ (1 სამ. 22:1). მუჭო მოხვად დავითიქ თე სიტუაციას?

2. მუჭო ენიჸოთ საულქ ოშქურანჯ მდგომარეობაშა დუდ? (1 სამ. 23:16, 17)

² საულს მანგარო ონჯარუდ დავითიშ თიშენ, ნამდა თინა ბრელს უჸორდჷ დო ბრძოლა ხოლო ბრელ აფუდ მოგებულ. საულს თინა ხოლო უჩქუდ, ნამდა დაუმორჩილებლობაშ გურშენ იეჰოვას ვარია აფუდ თიშ მეფობაშენ რაგადებულ დო დავით აფუდ გიშაგორილ (წეკითხით 1 სამუელიშ 23:16, 17). მარა საულ დიო ხოლო ისრაელიშ მეფე რდჷ, მუდგაშ გურშენ დიდ ჯარ ჸუნდჷ დო თიშ მხარე ბრელს უკინებუდ. ათეშენ დავითის ონტებელქ აჸუ, ნამდა ცოცხალქ ქუდოსქიდკო. დასურო ფიქრენდუო საულ, ნამდა შეიალებედ დავითწკუმა დაკავშირებულ ღორონთიშ განზრახვაშ წინააღმდეგ ბრძოლა?! (ეს. 55:11). ბიბლია ვეჩიებ, მარა შემლებნა დარწმუნებულ ვორდათ, ნამდა საულქ მანგარ ოშქურანჯ მდგომარეობაშა ენიჸოთ დუდ. მით ღორონთიშ წინააღმდეგ გიშურს, ირო წაგებულ იჸუაფ!

3. მუჭო გინაფლენდჷ დავით დუდის მუშ მდგომარეობაშ უმკუჯინუო?

 ³ დავით თანდაბალ კოჩ რდჷ. თის ვეგნუჭყვიდირ ისრაელიშ მეფობა, თე პასუხიშმგებლობა იეჰოვაქ მეჩჷ (1 სამ. 16:1, 12, 13). მარა დავითის ოშქურანჯ მდგომარეობას რდუნ თიშ გურშენ, იეჰოვაშა ვეგუდვალ ბრალ, თინა თიშენ ხოლო ვეგმოხანტუნდჷ უკმაყოფილებას, ნამდა ჭიჭე ოჭკუმალ უღუდ დო გამოქვაბულს ცხოვრენდჷ. თიქ შილებე ზუსტას თე დროს ჭარკო ღორონთიშ ოდიდებელ სქვამ ობირეშ, ნამდგაშა მიშურს თე სტატიაშ მთავარ მუხლ „იეჰოვას გორნან, თინეფს მუთუნ ვა მაკორდუნა“ (ფსალმ. 34:10).

4. ნამ კითხვეფს მეფჩანთ პასუხის დო მუშენ რე თინეფ მნიშვნელოვან?

⁴ ამდღა იეჰოვაშ ბრელ მსახურს ვა უღჷ დასაბაღ ოჭკუმალ დო შხვა აუცილებერ საჭიროებეფ, განსაკუთრებულო პანდემიაშ პერიოდის. * თეს გეძინელ, მუთ უმოს ხოლოს რე დიდ გასაჭირ, თით უმოსო ველუთ სირთულეეფს (მათ. 24:21). ათეშენ მორთ პასუხ ქიმეფჩათ ოთხ კითხვას: მუშენ შილებე თიშ რაგად, ნამდა დავითის მუთუნ ვარკუდ? მუშენ ოკო ვორდათ კმაყოფილეფ თით, მუთ მიღნა? მუ მარწმუნენა, ნამდა იეჰოვა ქიზრუნენს ჩქინდე? დო მუჭო შემლებნა მივემზადათ მომავალშო?

5, 6. მუჭო მოხვარნა ფსალმუნიშ 23:1—6 თიშ ენონჭაფას, მუს ნიშნენდჷ დავითიშ სიტყვეფ, ნამდა ღორონთიშ მსახურს მუთუნ ვა მაკორდუ?

⁵ მუს ნიშნენს დავითიშ სიტყვეფ, ნამდა იეჰოვას მსახურეფს „მუთუნ ვა მაკორდუნა“? თეცალ სიტყვეფს ბკითხულენთ 23-ა ფსალმუნს ხოლო, მუთ მიმეხვარებნა თეშ ენონჭაფას (წეკითხით ფსალმუნიშ 23:1—6). დავით თე ფსალმუნს იჭყანს სიტყვეფით: „იეჰოვა რე ჩქიმ ჭყიშ, მუთუნ ვემმოკორდუ“. უკულ თინა მიშინუანს იეჰოვაშ კურთხევეფს, ნამუთ თიშენ უღუდ, ნამდა ღორონთის მუშ ჭყიშო თვალუნდჷ. იეჰოვა აწოჸუნდჷ თის  სიმართლეშ ჭიფე შარას დო ართგურო ელურდჷ ქოთ ჯგირ დროს დო ქოთ გლახა დროს. დავითის უჩქუდ, ნამდა იეჰოვაშ ხეს მუშ ცხოვრება პრობლემეფიშ უმშო ვეჸუაფუდ, მუჟამსით „წკურუმია რობუს“ გილეშკონ იჸიდ დო ნტერეფ აჸვენუდ, მარა იეჰოვა თიშ ჭყიშ რდუნ თიშენ, დავითის მუთუნშა ვაშქურნედ.

⁶ თაშ ნამდა, ჩქი მიბღით პასუხ პირველ კითხვაშე: მუშენ შილებე თიშ რაგად, ნამდა დავითის მუთუნ ვარკუდ? თის უღუდ ირფელ, ნამდა იეჰოვაწკუმა ხოლოშიან ურთიერთობა ვა უდინუაფუდკო. დავითიშ ბედნერობა მატერიალურშა ვა რდჷ გერსხილ, თინა კმაყოფილ რდჷ თით, მუდგას იეჰოვა არზენდჷ. თიშო არძაშ უმოს მნიშვნელოვან რდჷ თინა, ნამდა იეჰოვა არზენდჷ კურთხევას დო თხილანდჷ.

7. მუჭოთ ლუკაშ 21:20—24-ის რე მოშინაფილ, მუ რთულ სიტუაციაშ წოხოლე გედირთეს პირველ საუკუნეშ იუდეველ ქრისტიანეფქ?

⁷ დავითიშ სიტყვეფშე ბგურაფლენთ, ნამდა მატერიალურს ჩქინ ცხოვრებას მნიშვნელოვან ადგილ ოკო ვა უკინებდას. შილებე მატერიალურო მუთუნ ვამჭირდან, მარა მთელ ყურადღება თეშა ოკო ვა მაფდან გინოღალირ. თეს განსაკუთრებულ ყურადღება ოკო მიაქცუესკო პირველ საუკუნეშ იუდეველ ქრისტიანეფქ (წეკითხით ლუკაშ 21:20—24). იესოქ გაფრთხილ თინეფ, ნამდა იერუსალიმს ჯარ ქუგუდირთუდ, თეს ქოძირუნდესინ, თინეფქ გვალაშა ოკო ინტესკო, ნამდა ცოცხალ ქუდოსქიდესკო, მარა ბრელ მუდგარენ აჸიდეს დატებელ. მუსხირენ წანაშ წოხოლე „გინაჯინალ კოშკის“ ჭარუდ: „თინეფქ ქიდიტუეს ჸვანეფ დო ჸუდეეფ თეშ, ნამდა თევრეშე მუთუნ ვა უღალნა. თიშა დარწმუნებულეფქ, ნამდა იეჰოვა დოთხილანდჷ დო ქიმეხვარებუდ, თინეფქ ღორონთიშ თაყვანიშცემა პირველ ადგილს ქიგიორინეს, თიცალ მუდგარენეფიშ წოხოლე ხოლო, მუთ ართ მეჯინათ მნიშვნელოვან რდჷ.

8. მუს ბგურაფლენთ პირველ საუკუნეს მახორუ იუდეველ ქრისტიანეფიშ შემთხვევაშე?

⁸ მუს ბგურაფლენთ პირველ საუკუნეს მახორუ იუდეველ ქრისტიანეფიშ შემთხვევაშე? „გინაჯინალ კოშკის“, ნამუთ ჟიშე მიფშინეთ ჭარჷ: „შილებე წიმი მატერიალურ ქონებაწკუმა დაკავშირებულ გამოცდა მელდან. მუ რე ჩქინო უმოს მნიშვნელოვან? ქონება დოვარ რსხება, ნამდგას ღორონთ მოუღანს არძას, მით თიშ მხარეს რე. თაშ რე, ნტება შილებე დაკავშირებულ რდას სირთულეეფწკუმა დო მუდგარენეფიშ დინაფაწკუმა. პირველ საუკუნეშ ჯიმალეფცალო, მიდგაქ იუდეაშე იორდანეშ მელე, პერეაშა, ინტეს, ჩქი ხოლო ირფელშო მზათ ოკო ვორდათ“. *

9. მუჭო ელაიკინანა გურშა ებრაელეფშა მეჩამილ მოციქულ პავლეშ რჩევა?

⁹ წერმიდგინით, მუ ძნელ იჸუაფუდ თე ქრისტიანეფშო ირფელიშ დოტება დო ცხოვრებაშ დუდშე გენწყუალა. იეჰოვა იზრუნენდჷ თინეფიშ აუცილებერ საჭიროებეფშე. მარა თენა ქიდეჯერესკონ, რწმენა ოსაჭირდეს. მუ მეხვარებუდ თინეფს, გავითარესკო თეშ რწმენა? თე მოვლენაშე ხუთ წანაშ წოხოლე მოციქულ პავლექ ებრაელ ქრისტიანეფს მეჩჷ ჭკვერულ რჩევა: «იცხოვრით ფარაშ ჸოროფაშ უმშო დო ქიგეჯერდით თის, მუთ გიღნა, მუშენდა ღორონთიქ თქუ: „დღას ვა დოიტენქ დო ვემგოტენქ“. ათეშენ ბოლოშა დარწმუნებულეფ იფჩიებუთ: „იეჰოვა ელამრე, ვა მაშქურნე, მუ აღოლნე კოჩის ჩქიმდა?“» (ებრ. 13:5, 6). მუშო ოკო რაგად, მიდგაქ პავლეშ რჩევა გიმირინუ, უმოს ადვილ აჸიდ ახალ ცხოვრებაშ წესშა მეხუჯაფა. თინეფ დარწმუნებულ რდეს, ნამდა იეჰოვა იზრუნენდჷ თინეფიშ აუცილებერ  საჭიროებეფშენ. პავლეშ სიტყვეფ ჩქი ხოლო მარწმუნენა, ნამდა შემლებნა ვენდათ იეჰოვას.

10. მუ დუმოგურეს პავლექ?

¹⁰ პავლექ ებრაელ ქრისტიანეფს მეჩუნ თიცალ რჩევა, ტიმოთეს ხოლო მეჩჷ, მუთ ჩქი ხოლო მოხუნა. თიქ ჭარჷ: „თაშ ნამდა, ოჭკუმალ, მიკაქუნალ დო დუდიშ გითაფორაფალ ქომღუნან-და, თეს გებჯერდათ“ (1 ტიმ. 6:8). ნიშნენსო თენა თის, ნამდა ვა ბჭკუმათ ჯგირ ოჭკუმალ, ვამღუდან სქვამას მონწყილ ჸუდე ვარდა მინშა ახალ ბარგ ვეპჸიდათ. პავლეს თიშ რაგად ოკოდ, ნამდა ჩქი ოკო გებჯერდათ თის, მუთ მიღნა მატერიალურო (ფილ. 4:12). ზუსტას თენა დიგურუ პავლექ. არძაშ უმოს ძვირფას, მუთ ქუმაპალნა, რე ჩქინ ღორონთწკუმა ურთიერთობა დო ვართ ხოლო მატერიალურ ქონება (აბაკ. 3:17, 18).

11. მუს ბგურაფლენთ მოსეშ სიტყვეფშე, ნამუთ ისრაელეფს უწუ?

¹¹ შილებე ჩქინ დო იეჰოვაშ აზრ შხვადოშხვანერ რდას მუ მოსაჭირნან თიწკუმა დაკავშირებით. დეფიფქრათ, მუ უწუ მოსექ ისრაელეფს თიშ უკულ, მუთ თინეფ 40 წანას რდეს უდაბნოს: „გაკურთხეს იეჰოვაქ, ჩქინ ღორონთიქ, თის ჯგირო უჩქჷ, მუჭო გილეშით თე ქვერსემ უდაბნოს. თე 40 წანას თქვანწკუმა რდჷ იეჰოვა, თქვან ღორონთ, დო მუთუნ ვა მორკებნა“ (კან. 2:7). თე 40 წანაშ დინახალე იეჰოვა თინეფს მანანას არზენდჷ ოჭკუმალო დო ბარგ ხოლო ვა შირუნა, ნამდგათ ეგვიპტეშე გიშართეს (კან. 8:3, 4). ნამთინექ შილებე იფიქრუკო: „თენა ვა რდჷ დასაბაღ“,  მარა მოსექ ქუგაშინ, ნამდა მუთ ოსაჭირდესინ, ირფელ უღდეს. მუთ მიღნან თით კმაყოფილეფ ქიპჸუაფუთ-და, თენა იეჰოვას გურს გუხარენს. თის ოკო, მარდულობა გეგმოფხანტათ თი ჭიჭე მუდგარენეფშენ ხოლო, მუდგას ჩქინო ორთ.

12. სოვრეშე იძირე, ნამდა დავით იეჰოვაშა რდჷ მენდებულ დო ვართ ხოლო მუშ დუდშა?

¹² დავითის უჩქუდ, ნამდა იეჰოვა რე ართგურ დო ზრუნენს მუშ მოჸოროფეეფშე. 34-ა ფსალმუნიშ ჭარუაშ დროს დავითიშ სიცოცხლე საფრთხეშ თუდო გერდჷ, მარა თინა რწმენაშ თოლით ორწყედ, მუჭო გოურდჷ იეჰოვაშ ანგელოზეფ (ფსალმ. 34:7). მუჟამსით დავით ნტერეფიშ ჯარს უჯინედ, თინეფ დო იეჰოვაშ ანგელოზეფ შქას შილებე ირიათო შედარებას ორთუდკო. მართალ რე, თინა ძალიერ მეომარ რდჷ დო იეჰოვაქ ხოლო მეფობა დეპირ, მარა მუშ შესაძლებლობეფშა ვა რდჷ დაიმენდებულ (1 სამ. 16:13; 24:12). თეშ მანგიორო, ონდუდ ღორონთის დო დარწმუნებულ რდჷ, ნამდა იეჰოვაშ ანგელოზ გინასქილიდუანდჷ თიშ მოშიშეფს. მუშო ოკო რაგად, ჩქი ამდღა ვეველუთ ღორონთშე სასწაულებრივო თხილუას, მარა მიჩქნა, ნამდა მით იეჰოვას ონდჷ, ვემიღენს მარადიულ ზიანს.

13. მუშენ იბძირედათ იჸი უმინჯურეფცალო, მუჟამსით „გოგ მაგოგელ“ გიშელენს ჩქინ წინააღმდეგ დო მუშენ ოკო ვა მაშქურნან? (ქოძირით სურათ გალენ გვერდის)

¹³ მალას გეგმიცადებ, მუზმათ ვონდუთ იეჰოვას. მუჟამსით „გოგ მაგოგიშ დიხაშე“ ღორონთიშ ხალხიშ წინააღმდეგ გიშელენს, ჩქინ სიცოცხლე ქინოლუ საფრთხეს. თე დროს დარწმუნებულქ ოკო იპჸუათ, ნამდა იეჰოვას შეულებ ჩქინ მოხვარა. ერეფიშ კოალიციაშ თოლს ჩქი იპჸუაფუთ უმინჯურ შხურცალო, ნამდგას მათხილარ მითინ ვა ჸუნს (ეზეკ. 38:10—12). ჩქი ვა მაღვენუნა იარაღ დო ვართ ჩხუპ მაჸინა ნაგურეფ. თინეფ ვარწყედან იჸი თის, მუდგას ჩქი რწმენაშ თოლეფით ბძირუნთ — ანაყუ ანგელოზის, ნამუთ ღორონთიშ ხალხის გოურე, ნამდა დოთხილუას თინეფ. მუჭო შეიალებენა ერეფს თეშ ძირაფა, თინეფს ხომ სულიერ ხედვა ვა უღნა?! ღორონთიშ ხალხიშ ნტერეფს მანგარო გაუკვირდუნა, მუჟამსით ზეციერ ჯარ ქიდიჭყანს ჩქინო ბრძოლას (გამოცხ. 19:11, 14, 15).

14. მუშ კეთება შემლებნა, ნამდა მივემზადათ მომავალშო?

¹⁴ მუჭო ოკო მივემზადათ მომავალშო? პირველ რიგის, ჩქი მუშ ადგილ ოკო ქიმურჩქინათ მატერიალურ ქონებას, მუშენდა აკა დღას ირფელ დატებელ მაჸინა. თეს გეძინელ, ოკო გეუჯერდათ თის, მუთ მიღნა დო არძაშ უმოს დიდ ხიოლ იეჰოვაწკუმა ურთიერთობაშე მიბღათ. მუთ უმოსო გეფჩინებაფუანთ ჩქინ ღორონთის, თით უმოსო დებრწმუნებუთ, ნამდა თის შეულებ დოფთხილუან, მუჟამსით „გოგ მაგოგელ“ გიშელენს ჩქინ წინააღმდეგ.

15. თეიშახ მოხვალამირ ნამ შემთხვევეფქ დაგურუ დავითის, ნამდა იეჰოვა ირიათო ქიმეხვარებუდ?

¹⁵ გუვარჩუათ, ხოლო მუქ მეხვარ დავითის, მემზადკო სირთულეეფშო, მუთ ჩქი ხოლო მიმეხვარებნა. თიქ თქუ: „გამორსით დო ქოძირუნთ, მუშმაჯგირა რე იეჰოვა! ბედნერ რე კოჩ, მით დუდის გითუფორუანს თის“ (ფსალმ. 34:8). თე სიტყვეფშე იძირე, მუშენ უღუდ დავითის იეჰოვაშ მოხვარაშ იმენდ. დავითის ხშირას მეუნდებ იეჰოვაშა დო გურგოტახილ დღას ვა დოსქილადე. ახალგაზრდობას, მუჟამსით დავითიქ ძალიერ ფილისტიმელ გოლიათიშ წინააღმდეგ გიშართჷ, თიქ უწუ: „ამდღა ქეშამიჸოთანს ხეშა სქან დუდის  იეჰოვა“ (1 სამ. 17:46). ჭიჭე ხანიშ უკულ მეფე საულქ ბრელშა მინდომ თიშ ჸვილუა, მარა იეჰოვა რდჷ დავითწკუმა (1 სამ. 18:12). ულირს დავითის იეჰოვაშ მოხვარა ბრელშა აფუდ გიმნაცადებ, ათეშენ ჯერდჷ, ნამდა თინა კინ ქიმეხვარებუდ.

16. ნამ პრაქტიკულ მხარეეფით შემლებნა „გუვამორსათ“, მუშმაჯგირა რე იეჰოვა?

¹⁶ მუთ უმოსო მივენდებუთ იეჰოვაშ ხემძღვანელობას, თით უმოსო დებრწმუნებუთ, ნამდა თის შეულებ მომავალს ჩქინ რსხება. რწმენა დო მონდომა რე საჭირო იეჰოვაშა მიონდებელო, მუჟამსით დამსაქმებელშა მაფნა ოთხუალ დღალეფ კონგრესიშ დასწრებელო ვარდა გრაფიკიშ თეშ თირუა, ნამდა შემალებუან არძა შეხვალამაშა დასწრებაქ დო მსახურებას უმოს მონაწილებაქ. შილებე ჩქინ დამსაქმებელქ ვარია ქომწუან დო სამუშა ხოლო მივოდინუათ. ქომღუნანო თიშ რწმენა, ნამდა იეჰოვა დღას ვემმოტენა დო ირიათო ქომჩანა აუცილებერ საჭიროებეფს? (ებრ. 13:5). ბრელ სრულ დროთ მსახურს შეულებ ქიმეჩუან შემთხვევეფ, მუჭო გიმოცად იეჰოვაშ ხე, მუჟამსით თენა მანგარო ოსაჭირუდ. იეჰოვა ართგურ რე.

17. ნამ რე 2022 წანაშ მუხლ დო მუშენ რე თინა დროულ?

¹⁷ ონდო იეჰოვა ჩქინწკუმა რე, ვამღუნა თიშ მიზეზ, ნამდა მომავალშა მოშქურდან. ჩქინ ღორონთ დღას ვემმოტენა, სოიშახ ჩქინ ცხოვრებას პირველ ადგილშა თინა გემრენა. თიშ გაშინალო, ნამდა მომავალ სირთულეეფშო ასეშე ოკო მივემზადათ დო ბჯერდან, ნამდა იეჰოვა დღას ვემმოტენა, ხემძღვანელ საბჭოქ 2022 წანაშ მუხლო ფსალმუნიშ 34:10 გიშაგორ: „იეჰოვას გორნან თინეფს, მუთუნ ვა მაკორდუნა“.