1, 2. ა) ნამ დღას ფშუნა განსაკუთრებულო ჩქინ საჸოროფო ადამიანიშ ღურა? ბ) მუ დაწეს იესოქ ღურაშ წოხოლენ სერს?

საჸოროფო ადამიანიშ ღურაშე მუსხი ხან ვა რდას მიკულირინ, ჩქი იშენით ფშუნა თინა, განსაკუთრებულო თიმწკუმა, მუჟამსით თიშ ღურაშ თარიღ რე ხოლოს.

² ირ წანას ჩქი თი მილიონეფ შქას ვორეთ, მით მთელ მსოფლიოს იშაყარუ საჸოროფო პიროვნებაშ, იესო ქრისტეშ, ღურაშ გოშინაშ ონჯუას (1 პეტ. 1:8). ჩქი იფშაყარუთ თიშ გურშენ, ნამდა ქიგიფშინათ პიროვნება, მიდგაქ მუშ სიცოცხლე ცოდვაშე დო ღურაშე ჩქინ გიშაჸიდირალო შეწირ (მათ. 20:28). იესოს ოკოდ, ნამდა მუშ მიმაჸუნალეფს შუდესკო მუშ ღურაშ დღა. ღურაშ წოხოლენ სერს იესოქ სპეციალურ ოსერშე დაწეს დო ზოჯჷ: „თენა აკეთით ჩქიმ გასაშინეთ“ (ლუკ. 22:19).

3. მუს გუვარჩიენთ თე სტატიას?

³ გოშინაშ ონჯუას ოსწრუნან თი მილიონობით ადამიანშე ბრელს ვა უღჷ ზეცას ცხოვრებაშ იმენდ; უმენტაშ დედამიწას მარადიულ ცხოვრებას ელჷ. თე სტატიას გუვარჩიენთ, მუშენ ოსწრჷ ირ წანას თე ჟირ ჯგუფ გოშინაშ ონჯუას. თის ხოლო ქობძირუნთ, მუ ჯგირობუა მოუღ ჩქინდა თე ღონისძიებაშა დასწრებას.

4. მუშენ ღებულენა ცხებულეფ გოშინაშ ონჯუაშ სიმბოლოეფს?

⁴ ირ წანას ცხებულეფ, მით გოშინაშ ონჯუას ოსწრუნა, ღებულენა სიმბოლოეფს, ქობალს დო ღვინს. მუშენ ორთნა  თინეფ თეს? თე კითხვას პასუხ ქიმეფჩათინ, გუვარჩუათ, მუქ მოხვად იესოშ დედამიწას ცხოვრებაშ ბოლო სერს. პასექიშ აღნიშნებაშ უკულ იესოქ დაწეს ღონისძიება, ნამდგას „უფალიშ ოსერშეს“ უძახნა. თიქ ქობალ დო ღვინ გეგნაჭირინუ მუშ ვითაართ ართგურ მოციქულს დო უწუ, ნამდა უჭკუმდესკო დო გეუშუმდესკო. იესოქ თინეფს ჟირ შეთანხმებაშ გურშენ ეჩუ. თენეფ რე „ახალ შეთანხმება“ დო „შეთანხმება სამეფოშო“ (ლუკ. 22:19, 20, 28—30). * თე შეთანხმებეფქ შარა გოუნწყჷ მოციქულეფს დო გარკვეულ რაოდენობაშ ადამიანს, ნამდა ზეცას მეფეეფქ დო მღვდელეფქ იჸუან (გამოცხ. 5:10; 14:1). გოშინაშ ონჯუას ხვალე ცხებულეფიშ დოსქილადირ ნაწილ * ღებულენს სიმბოლოეფს, მუშენდა თე შეთანხმებეფიშ ართ-ართ მხარე თინეფ რენა.

5. მუ არჩქილენა ცხებულ ქრისტიანეფს მუნეფიშ იმენდწკუმა დაკავშირებით?

⁵ ცხებულეფ შხვა მიზეზიშ გურშენ ხოლო ოსწრუნა გოშინაშ ონჯუას. თე ღონისძიება თინეფს საშვალებას არზენს, დეფიქრან მუნეფიშ იმენდშე. იეჰოვაქ თინეფს დიდებულ იმენდ მეჩჷ — გეხარან უღურალ სრულყოფილ სიცოცხლეთ ზეცას დო იმსახურან განდიდებულ იესოწკუმა დო შხვა ცხებულეფწკუმა ართო დო მუთ არძაშ უმოს მნიშვნელოვან რე, იჸუან იეჰოვა ღორონთწკუმა (1 კორ. 15:51—53; 1 იოან. 3:2). ცხებულ ქრისტიანეფს არჩქილენა, ნამდა თე პატიშ მიოღებელო ღურაშახ ართგურეფქ ოკო იჸუან (2 ტიმ. 4:7, 8). თე იმენდშე ფიქრის თინეფშა დიდ ხიოლ მოუღ (ტიტ. 2:13). მუშ რაგად შილებე „შხვაშ შხურშე“? (იოან. 10:16). თინეფ მუშენ ოსწრუნა გოშინაშ ონჯუას?

6. მუშენ ოსწრჷ „შხვა შხურ“ ირ წანას გოშინაშ ონჯუას?

⁶ შხვა შხურ გოშინაშ ონჯუას თეშ ოსწრჷ, მუჭოთ ღირსუან დამკვირვებელ დო ვართ მონაწილე. 1938 წანას გოშინაშ ონჯუაშა განსაკუთრებულო იჸუეს დაპატიჟებულქ თინეფქ, მიდგას დედამიწას ცხოვრებაშ იმენდ უღდეს. 1938 წანაშ 1 მარტიშ „გინაჯინალ კოშკის“ ჭარჷ: „სწორ იჸუაფ [შხვა შხურქ] ქიდესწრას თე შეხვალამას დო ქიდეკვირას მუ ხვადუ თექ. . . . თე დღა თინეფშო ხოლო სახიოლო ოკო რდას დო ქოთ თაშ რე“. მუჭოთ სტუმარეფ ოკვირნა საქორწინო ცერემონიას, თეშ „შხვა შხურ“ ხოლო ხიოლით ოკვირ გოშინაშ ონჯუაშ ღონისძიებას.

7. მუშენ ოხიოლ „შხვა შხურს“ გოშინაშ ონჯუაშ მოხსენებაშ რჩქილა?

⁷ მუჭოთ ცხებულ ქრისტიანეფიშ გურშენ ფთქვით, „შხვა შხურს“ ხოლო უღჷ შესაძლებლობა, ქიფიქრას მუშ მომავალიშ გურშენ. მაგალთო, თინეფს მანგარო ოხიოლნა გოშინაშ ონჯუაშ მოხსენებაშ რჩქილა, ნამუთ ყურადღებას ამახვილენს, მუ ჯგირობუას მოუღანა იესო ქრისტე დო თიშ 144 000 თანამართველ კაცობრიობას მუნეფიშ მეფობაშ დროს. თინეფ 1 000 წანაშ დინახალე მონაწილებას მიღენა მთელ დედამიწაშ სამოთხეთ გინორთაშ საქმეს დო ადამიანეფს სრულყოფილებაშა ქიმიჸუნანა. მუ სარკო იჸუაფ „შხვა შხურშო“ თიშე დაფიქრება, მუჭო შისრულებ ესაიაშ 35:5, 6; 65:21—23 დო გამოცხადებაშ 21:3, 4. თე  ადამიანეფს საშვალება უღნა, წერმიდგინან დუდ ახალ ქვეყნიერებას მუნეფიშ საჸოროფო ადამიანეფწკუმა ართო. თეშნერო თინეფ იმანგარენა მომავალიშ იმენდის დო უმოს მტკიცაშე გინოჭყვიდნა, ვემიოტუან იეჰოვაშ მსახურება.

8. ხოლო მუ მიზეზიშ გურშენ ოსწრჷ „შხვა შხურ“ გოშინაშ ონჯუას?

⁸ გუვარჩუათ, ხოლო მუშ გურშენ ოსწრჷ „შხვა შხურ“ გოშინაშ ონჯუას. თინეფს ოკონა, ქაძირუან, ნამდა უჸორა ცხებულეფ დო ხუჯის უკინენა თინეფს. ღორონთიშ სიტყვაქ იწინასწარმეტყველ, ნამდა თე ჟირ ჯგუფის, ცხებულეფს დო დედამიწაშ ცხოვრებაშ იმენდ უღნან თინეფს, ხოლოშიან თანამშრომლობა აღვენუდეს ართიანწკუმა.

9. მუჭოთ ზაქარიაშ 8:23-შე იძირე, მუს გინაფლენს „შხვა შხურ“ ცხებულ ქრისტიანეფიშ მიმართ?

⁹ წეკითხით ზაქარიაშ 8:23. თე წინასწარმეტყველებაშე ვორწყეთ, მუს გინაფლენს „შხვა შხურ“ ცხებულ და დო ჯიმალეფიშ მიმართ. სიტყვეფ, „იუდეველ“ დო „თქვანწკუმა“ ართ დო იგივე ჯგუფიშ — ცხებულეფიშ დოსქილადირ ნაწილიშ — გურშენ რე რაგადებულ (რომ. 2:28, 29). „არძა ნინაშე ვით კოჩ“ რე „შხვა შხურ“. თინა „მანგარო ქიმეკიდენს ხეს იუდეველიშ კართეს“, მუთ ნიშნენს, ნამდა ცხებულეფწკუმა გაერთიანებულო ემსახურებ იეჰოვას. თაშ ნამდა, თე ჯგუფიშ ცხებულეფწკუმა ართო გოშინაშ ონჯუაშა დასწრება, ოძირანს თინეფ შქას ხოლოშიან თანამშრომლობას.

10. მუ აკეთ იეჰოვაქ ეზეკიელიშ 37:15—19, 24, 25-ის ენოჭარილ წინასწარმეტყველებაშ შეიოსრულებერო?

¹⁰ წეკითხით ეზეკიელიშ 37:15—19, 24, 25. იეჰოვაქ თე წინასწარმეტყველება თით შეასრულ, ნამდა ცხებულეფს დო „შხვა შხურს“ ართიანწკუმა ხოლოშიან თანამშრომლობა უღნა. წინასწარმეტყველებას მოშინაფილ რე ჟირ კეტ. ზეციერ იმენდ უღნან თინეფ რენა კეტ „იუდაშო“ (ტომ სოვრეშეთ ისრაელიშ მეფეეფ რდეს) დო მიდგას დედამიწას ცხოვრებაშ იმენდ უღნა, რენა „ეფრემიშ“ კეტ. * იეჰოვაქ გაერთიან თე ჟირ ჯგუფ დო „ართ კეტო“ გინართინუ, თენა თის ნიშნენს, ნამდა თინეფ გაერთიანებულო ომსახურნა მუნეფიშ ართ მეფეს, იესო ქრისტეს. ირ წანას ცხებულეფ დო „შხვა შხურ“ ოსწრუნა გოშინაშ ონჯუას, მუჭოთ ჟირ შხვადოშხვა ჯგუფ ვარინ, მუჭოთ „ართ ოჭყიშალ“, ნამდგას „ართ ჭყიშ“ ჸუნს (იოან. 10:16).

11. მუჭო ოძირანა მათეშ 25:31—36, 40-ის მოშინაფილ „შხურეფ“, ნამდა ხუჯის უკინენა ქრისტეშ ჯიმალეფს?

¹¹ წეკითხით მათეშ 25:31—36, 40. „შხურეფ“, ნამუთ იესოქ მიშინუ, რენა მართალ ადამიანეფ, მიდგას დედამიწას ცხოვრებაშ იმენდ უღნა. ზუსტას თენეფ რენა „შხვა შხურიშ“ წარმომადგენელეფ. თინეფ ართგურო უკინენა ხუჯის ქრისტეშ ცხებულ ჯიმალეფს, პირველ რიგის, თით, ნამდა ოხვარნა მანგარ დიდ პასუხიშმგებლობაშ — მთელ მსოფლიოს ქადაგებაშ დო მოწაფეეფიშ მომზადებაშ საქმეშ — შესრულებას (მათ. 24:14; 28:19, 20).

12—13. მუ შხვადოშხვა საშვალებათ ელურე „შხვა შხურ“ ქრისტეშ ჯიმალეფს?

¹² ირ წანას, გოშინაშ ონჯუაშახ მარეფით ადრე „შხვა შხურ“ ქრისტეშ ჯიმალეფს უკინენს ხუჯის დო სრულაშე ღებულენს მონაწილებას მსოფლიო კამპანიას, ნამდა ქუდაპატიჟან ირკოჩ გოშინაშ ონჯუაშა (ქოძირით ჩარჩო,  „ქემზადებუთო გოშინაშ ონჯუაშო?“). თეს გეძინელ, თინეფ ირფელს ორთნა, ნამდა თე ღონისძიებაქ მთელ მსოფლიოს არძა  კრებას ჩეტარას, კრებეფიშ უმენტაშის ცხებულეფ ვა რენან თიშ უმკუჯინუო. „შხვა შხურ“ მანგარ ბედნერ რე, მუშენდა ხუჯის უკინენს ქრისტეშ ჯიმალეფს. თინეფს უჩქუნა, ნამდა იესო ორწყე თე ირფელს დო მუშ ჯიმალეფშო კეთებულ საქმე მუშო კეთებულ საქმეთ მიორჩქ (მათ. 25:37—40).

¹³ ხოლო მუ მიზეზეფ მიღნა, მუდგაშ გურშენ არძა ვოსწრუთ გოშინაშ ონჯუას, ზეცას ცხოვრებაშ იმენდ მიღნა დოვარ დედამიწას?

14. მუჭო გიმირჩქინეს იეჰოვა დო იესოქ ჩქინ მიმართ დიდ ჸოროფა?

¹⁴ჩქი მარდულეფ ვორეთ იეჰოვა დო იესოშ ჸოროფაშენ. იეჰოვაქ ჩქინ მიმართ ჸოროფა ბრელნერო გიმირჩქინ, მარა თექ არძაშ უმოსო თიმ დროს ქიძირ, მუჟამსით მუშ ძვირფას სქუა მაშქვჷ, ნამდგაქ ჩქინ გურშენ იტანჯჷ დო ღურჷ (იოან. 3:16). იესოქ ხოლო დიდ ჸოროფა თით გიმირჩქინ, ნამდა მუშ ნებათ შეწირ ჩქინო სიცოცხლე (იოან. 15:13). ჩქი დღას ვეგნმაგინენა თი დიდ ჸოროფაშენ, ნამუთ იეჰოვა დო იესოქ ჩქინ მიმართ გიმირჩქინეს, მარა შემლებნა მარდულობა ჩქინ ირდღაშიან ცხოვრებათ ქუვოძირათ (კოლ. 3:15). თეს გეძინელ, ვოსწრუთ გოშინაშ ონჯუას, ნამდა ქიფიფქრათ თინეფიშ დიდ ჸოროფაშე დო იშო ხოლო ქუვოძირათ ჸოროფა.

15. მუშენ აფასენა ცხებულეფ დო „შხვა შხურ“ გიშაჸიდირალს?

¹⁵ჩქი მანგარო ვაფასენთ გიშაჸიდირალიშ ძღვინს (მათ. 20:28). ცხებულეფშო გიშაჸიდირალ მანგარ ძვირფას რე, მუშენდა თენა არზენს საშვალებას, უღდან დიდებულ იმენდ. ქრისტეშ მსხვერპლიშ მიმართ რწმენაშ საფუძველშა იეჰოვა თინეფს მართალეფო მირჩქინანს დო სქუალეფო ღებულენს (რომ. 5:1; 8:15—17, 23). „შხვა შხურ“ ხოლო გიშაჸიდირალიშ მარდულ რე. ქრისტეშ დობუნილ ზისხირიშ მიმართ რწმენაშ საფუძველშა თინეფ ღორონთიშ თოლს სუფთეფ რენა, შეულებნა, შეუსრულან თის წმინდა მსახურება დო უღნა იმენდ, ნამდა გეგნიღანა „დიდ გასაჭირს“ (გამოცხ. 7:13—15). ირ წანას გოშინაშ ონჯუაშ დასწრებათ ქოთ ცხებულეფ დო ქოთ „შხვა შხურ“ გიშაჸიდირალიშ მიმართ მარდულობას გიმოხანტუნა.

16. ხოლო მუშენ ვოსწრუთ გოშინაშ ონჯუას?

¹⁶ ხოლო ართ მიზეზ, მუდგაშ გურშენ ვოსწრუთ გოშინაშ ონჯუას, თინა რე, ნამდა მოკონა, დევემორჩილათ იესოს. მომავალწკუმა დაკავშირებით მუდგანერ იმენდ ვამღუდანინ, თითოულ ბღებულენთ იესოშ მითითებას, ნამუთ გოშინაშ ონჯუაშ დაწესებაშ დროს თქუ: „თენა აკეთით ჩქიმ გასაშინეთ“ (1 კორ. 11:23, 24).

17. მუჭო მოხვარნა გოშინაშ ონჯუა, უმოსო დევეახლოვათ იეჰოვას?

¹⁷უმოსო ვეახლოებუთ იეჰოვას (იაკ. 4:8). მუჭოთ უკვე გებგით გოშინაშ ონჯუა საშვალებას მარზენა, ქიფიფქრათ ჩქინ იმენდშენ დო თიშე, მუჭო უჸორთ იეჰოვას (იერ. 29:11; 1 იოან. 4:8—10). მუჟამსით ფიფქრენთ მომავალწკუმა დაკავშირებულ ჩქინ იმენდშე დო ღორონთიშ ჸოროფაშე, გურ ღორონთიშ მიმართ ჸოროფათ ემაფშაფნა დო უმოსო ვეახლოებუთ თის (რომ. 8:38, 39).

18. მუშ კეთება მოკონა ხოლო უმოსო, მუჟამსით იესოშ მაგალითშე ფიფქრენთ?

¹⁸მოხვარნა, მივაჸუნათ იესოშ მაგალითის (1 პეტ. 2:21). გოშინაშ ონჯუაშ პერიოდის ყურადღება მაფნა გინოღალირ იესოშ დედამიწას ცხოვრებაშ ბოლო მარაშა, ღურაშა დო გათელებაშა. თეს  გეძინელ, გოშინაშ ონჯუაშ მოხსენება ხოლო ართშა გუმოშინანა ჩქინ მიმართ იესოშ ჸოროფას (ეფეს. 5:2; 1 იოან. 3:16). მუჟამსით ბკითხულენთ დო ფიფქრენთ იესოშ დუდგინოდვალირობაშ გურშენ, უმოსო მოკონა, თეშ იფცხოვრათ, „მუჭოთ თინა ცხოვრენდჷ“ (1 იოან. 2:6).

19. მუჭო შემლებნა ღორონთიშ ჸოროფაშ ღირსეფ ვორდათ?

¹⁹უმოს მტკიცაშე გეგნობჭყვიდუნთ, ღორონთიშ ჸოროფაშ ღირსეფ ვორდათ (იუდ. 20, 21). ღორონთიშ ჸოროფაშ ღირსეფ თიმწკუმა ვორეთ, მუჟამსით ირფელს ვორთუთ, ნამდა დევემორჩილათ, განვწმინდათ თიშ სახელ დო გურ გუხარათ (იგავ. 27:11; მათ. 6:9; 1 იოან. 5:3). გოშინაშ ონჯუას დასწრება გინმოჭყვიდირაფუანა, ნამდა ჩქინ ირდღაშიან ცხოვრებათ ღორონთის უწუათ: „მოკო, ირიათო სქან ჸოროფაშ ღირს ვორდე!“.

20. მუ მიზეზეფ მიღნა, ნამდა დევესწრათ გოშინაშ ონჯუას?

²⁰ ჩქი ბრელ მიზეზ მიღნა, დევესწრათ გოშინაშ ონჯუას. ირ წანას, მუჟამსით თე ღონისძიებაშა იფშაყარუთ, იფშინანთ ჩქინ საჸოროფო პიროვნებაშ, იესო ქრისტეშ, ღურას. მუთ მთავარ რენ, იფშინანთ ჸოროფაშ არძაშ უმოს დიდებულ გიმოხანტუას, ჸოროფაშ — ნამუთ იეჰოვაქ გიმირჩქინ ჩქინ მიმართ, მუჟამსით მუშ სქუა შემობწირეს. თე წანას გოშინაშ ონჯუა ჩეტარებ 2022 წანაშ 15 აპრილს, ობიშხას. ჩქი მიჸორა იეჰოვა დო თიშ სქუა, ათეშენ თი დღას მუთუნ ვეჸუაფ ჩქინო თიშე უმოს მნიშვნელოვან, ნამდა დევესწრათ გოშინაშ ონჯუას.