1—3. მუშ გურშენ შილებე იმნგარათ?

ბოლოს მუჟამ ინგარით? მინშა ხიოლიშ ჩილამურეფ მიღნა, მარა უმენტაშო ჭუა მონგარუანა. მაგალთო, შილებე იმნგარათ, მუჟამსით საჸოროფო ადამიან მიღურნა. შეერთებულ შტატეფს მახორუ ართ და ლორა იჩიებ: „ჩქიმ ძღაბიშ ღურაშ უკულ მინშა თეშ ბგინაფლენდჷ დუდის, ფიფქრენდჷ, მუთუნ ვემქექუანდჷ გურშა. მიკვენდჷ, თეცალ გაჭირებაშ უკულ ხოლო მუჭო ვორდჷ ცოცხალ“. *

² შხვა მიზეზეფიშ გურშენ ხოლო შილებე იმნგარათ. ართ იაპონელ პიონერ დაქ, ჰირომქ თქუ: „გურ მიტირხუ, მუჟამსით ხალხის ვაკო ბიბლიურ ცნობაშ მორჩქილაფა. მინშა ჩილამურამ თოლეფით ფთხინქ იეჰოვას, ქიმმეხვარას თიცალ ადამიანიშ გორუას, მიდგას ჭეშმარიტება ოინტერეს“.

³ ჩქინდე ბრელს შილებე თე დალეფცალ გრძნობეფ მიღდან (1 პეტ. 5:9). ჩქი მოკონა ხიოლით ვემსახურათ იეჰოვას, მარა მინშა შილებე თეს ჩილამურით ვორთუდათ, მუშენდა მიღნა ოწუხებელ, მიტირხნა გურ დო თიცალ სიტუაციას ინობლუთ, ნამუთ გიმოცადუნს ღორონთიშ მიმართ ჩქინ ართგურობას (ფსალმ. 6:6; 100:2). მუჭო გივორჯგინათ თეცალ გრძნობეფს?

4. მუს გუვარჩიენთ თე სტატიას?

⁴ ჩქი შილებე იესოშ მაგალითშე დიბგურუათ. მინშა იესო ხოლო თიცალ ემოციეფს რდჷ, ნამდა ჩილამურეფ ელაჸუნუდ (იოან. 11:35; ლუკ. 19:41; 22:44; ებრ. 5:7). მორთ გუვარჩუათ თე შემთხვევეფ დო ქობძირათ, მუს ბგურაფლენთ იესოშე. თეს გეძინელ, ქობძირუნთ, მუჭო გივორჯგინათ სირთულეეფს, ნამუთ ჩქინ ნგარაშ მიზეზ რე.

5. მუს ბგურაფლენთ იესოშ გურშენ იოანეშ 11:32—36-ის ენოჭარილ შემთხვევაშე?

⁵ ახ. წ. 32 წანაშ ზოთონჯის იესოშ ძვირფას მეგობარქ, ლაზარექ გლახათ გინირთჷ დო დოღურ (იოან. 11:3, 14). თის ჸუნდჷ ჟირ და მარიამ დო მართა. იესოს თე ოჯახ მანგარო უჸორდჷ. დალეფ საჸოროფო ჯიმაშ ღურათ მანგარ გურშეჭირებულეფ რდეს. ლაზარეშ ღურაშ უკულ იესოქ ქიმერთჷ სოფელ ბეთანიაშა, სოდეთ თინეფ ცხოვრენდეს. მუჟამსით მართაქ ქიგეგ, ნამდა იესო მიშჷ, თიშ ეწაზადინშა მიდერულ. წერმიდგინით, მუნერ დამწუხრებულ იჸუაფუდ მარიამ, მუჟამსით იესოს თეცალ სიტყვეფ უწუ: „უფალ, სი თაქ ქოჸოფედკონ, ვა ღურუდ ჩქიმ ჯიმა“ (იოან. 11:21). მუჟამსით იესოქ ქოძირ, ნამდა მარიამ დო შხვეფ ინგარდეს, მუს ხოლო „ჩილამურქ ქელაჸუნ“ (წეკითხით იოანეშ 11:32—36).

6. მუშენ ინგარ იესოქ?

⁶ მუშენ ინგარ იესოქ? „წმინდა წერილეფიშ საკვლევ ცნობარს“ ენწყუმილ რე: „მუშ მეგობარ ლაზარეშ ღურაქ დო ლაზარეშ დალეფიშ გაჭირებაშ ძირაფაქ იესოშა თეშ იმოქმედ, ნამდა ჩილამურეფქ ქელაჸუნ“. * იესოქ შილებე დეფიქრუკო, მუს გინაფლენდჷ ლაზარე, მუჟამსით გლახათ რდჷ დო მუჟამსით ქიმეხვად, ნამდა მალას დოღურუდ. იესოს შილებე ჩილამურქ თიშენ ხოლო ქელაჸუნკო, მუჟამსით ქოძირ, მუ დღას რდეს ჯიმაშ ღურაშ გურშენ მართა დო მარიამ. ხოლოშიან მეგობარ ვარდა ოჯახიშ წევრ ღურაქ მიდაიღეს-და, მუშო ოკო რაგად, თქვა ხოლო თეცალო იგინანდით დუდის. გუვარჩუათ სუმ მხარე, მუდგაშ გურაფა შემლებნა თე შემთხვევაშე.

7. მუს ბგურაფლენთ იეჰოვაშ გურშენ მეგობრეფშო დობუნილ იესოშ ჩილამურეფშე?

⁷იეჰოვას უჩქ, მუს გინაფლენთ. იესო რე „ღორონთიშ . . . ამნახანტ“ (ებრ. 1:3). მუჟამსით თიქ ინგარ, მუშ მუმაშ გრძნობეფ ხოლო გიმოხანტჷ (იოან. 14:9). თქვა ხოლო საჸოროფო ადამიან ღურელ ქუგაფნან-და, შეილებნა დარწმუნებულ  რდათ, ნამდა თეს იეჰოვა ხვალე ვარწყენ, თინა მანგარო წუხენს დო ოკო გურშა ეიქექუან (ფსალმ. 34:18; 147:3).

8. მუშენ შემლებნა დარწმუნებულ ვორდათ, ნამდა იესო სიცოცხლეს დურთინუანს ჩქინ საჸოროფო ადამიანეფს?

⁸იესოს ოკო, სიცოცხლე დურთინუას თქვან საჸოროფო ადამიანეფს. სოიშახ ინგარდჷ, იესოქ მართას უწუ: „გეთელებუ სქან ჯიმა“. მართას ჯერდჷ თე სიტყვეფიშ (იოან. 11:23—27). მუჭოთ იეჰოვაშ ართგურ თაყვანიშმცემელს, მართას, მუშო ოკო რაგად, არჩქვენუდ ღურელეფიშ გათელებაშ თი შემთხვევეფ, ნამდგაქ საუკუნეეფიშ წოხოლე ელიაშ დო ელისეშ საშვალებათ მოხვად (1 მეფ. 17:17—24; 2 მეფ. 4:32—37). თის ალბათ თინა ხოლო აჸიდ გაგებულ, მუჭო ათელენდჷ იესო ღურელეფს (ლუკ. 7:11—15; 8:41, 42, 49—56). შეილებნა დარწმუნებულ რდათ, ნამდა თი საჸოროფო ადამიანეფს, მიდგაქ გიღურეს, კინ ქოძირუნთ. დამწუხრებულ მეგობრეფშა გურიშექექექაფაშ დროს იესოქ ინგარუნ თენა, თიშა მარწმუნენა, ნამდა თის მანგარო ოკო ღურელეფიშ გათელება.

9. მუჭო შეილებნა იესოცალო გურშა ეუქექუათ თინეფს, მიდგას საჸოროფო ადამიან აფჷ ღურელ? ქიმიჸონით მაგალით.

⁹თქვა შეილებნა გურშა ეუქექუათ თინეფს, მიდგას საჸოროფო ადამიან აფჷ ღურელ. იესოს მართა დო მარიამწკუმა ხვალე ვა უნგარუნ, მურჩქილუ თინეფს დო გურიშემაკინალ სიტყვეფ ხოლო უწუ. ჩქი ხოლო შემლებნა მივაჸუნათ თიშ მაგალითის. ავსტრალიას მახორუ უხუცეს, დენი, იჩიებ: ჩქიმ ოსურიშ ღურაშ უკულ ელარნა მოსაჭირუდ. ნამთინე წყვილ დღაშ დო სერით მზათ რდჷ, ნამდა ჩქიმდა ქუმურჩქილუაფუდკო, თინეფ საშვალებას მარზენდეს, ჩქიმ გრძნობეფ ჩილამურით გეგმოფხანტკო დო პრაქტიკულო ხოლო მოხვარდეს. მაგალთო, რჩხუნდეს ჩქიმ მანქანას, პროდუქტეფს ჸიდულენდეს დო ოჭკუმალს მიკეთენდეს. თიმ დროს თე საქმეეფიშ კეთება ვეშემლებუდ. თინეფ ხშირას ლოცულენდეს ჩქიმწკუმა ართო დო დამტკიცეს, ნამდა „გაჭირებაშო დაბადებულ“ მეგობრეფ რდეს (იგავ. 17:17).

10. გეჭარით ლუკაშ 19:36—40-ის ენოჭარილ შემთხვევა.

¹⁰ ახ. წ. 33 წანაშ 9 ნისან რე. იესო იერუსალიმშა მეურს. ქალაქის ქიმიოჭირინუანსინ, აკოშაყარელ ხალხის შეხვადუ. თინეფ მუნეფიშ გინაქუნალეფს გიორჩანა შარას დო თეშნერო თის მეფეთ ღებულენა. თენა, მუშო ოკო რაგად, სახიოლო შემთხვევა რდჷ (წეკითხით ლუკაშ 19:36—40). ათეშენ იესოშ მოწაფეეფ ალბათ ველდეს თიშ უკულიან მოქმედებას. „ხოლოშა ქიმერთუნ უჯინედ ქალაქის დო ინგარდჷ“. ჩილამურამ თოლეფით იესოქ იჩუ თი გლახა ამბეშ გურშენ, მუთ იერუსალიმს მახორუ ხალხის ელუდ (ლუკ. 19:41—44).

11. მუშენ ინგარდჷ იესო იერუსალიმ მახორუეფიშ გურშენ?

¹¹ იესოს აწუხენდჷ, ნამდა თეცალ ჯგირ დოხვალამაშ უმკუჯინუო, იუდეველეფიშ უმენტაშ იშენ ვემიღენდჷ სამეფოშ ცნობას. შედეგო იერუსალიმ გენადგურებუდ დო თინეფს, მით თე განადგურებას გინასქიდუდ ტყვეეფო მიდეჸონანდეს (ლუკ. 21:20—24). სანარღოთ, თიქ ქუმოხვად, მუთ იესოქ თქუ დო ხალხიშ უმენტაშიქ ვემიღ თინა. მუჭო ღებულენს ხალხ სახიოლო ამბეს თქვა ცხოვრენთინ თექ? თქვან ტერიტორიას სახიოლო ამბეს ხვალე ართ დო ჟირ პიროვნება ქოღებულენს-და, იმწკუმა მუშ გურაფა შეილებნა თი შემთხვევაშე, მუჟამსით იესოქ ინგარ? გუვარჩუათ სუმ მხარე.

12. მუს მოგურუანა იეჰოვაშ გურშენ მოყვასშო დობუნილ იესოშ ჩილამურეფ?

¹²იეჰოვას აწუხენს ხალხიშ მდგომარეობა.  იესოშ ჩილამურეფშე ვორწყეთ, მუზმათ აწუხენს იეჰოვას ხალხიშ მდგომარეობა. თის „ვაკო, მითინქ დოღურას; თის ოკო, ნამდა არძაქ მინანუას“ (2 პეტ. 3:9). შხვეფიშ ჸოროფას თიმწკუმა ქუვოძირანთ, მუჟამსით დუდგინოდვალირო ქივეცადებუთ თინეფიშ გურშა სახიოლო ამბეშ მეღალას (მათ. 22:39). *

13, 14. სოვრეშე იძირ, ნამდა იესო მიშეშ ხალხიშ მდგომარეობაშა დო ჩქი მუჭო შემლებნა თე თვისებაშ გავითარება?

¹³იესო ბრელს ხანდენდჷ მსახურებას. თინა ირნერ საშვალებას ირინუანდჷ ადამიანეფშა დაგურაფალო დო თეშნერო ჸოროფას გიმოხანტუნდჷ თინეფიშ მიმართ (ლუკ. 19:47, 48). იესო თეს თიშენ ორთუდ, ნამდა ხალხიშ მდგომარეობაშა მიშეშ. მინშა თიზმას ოკოდ თიშ რჩქილა, ნამდა იესოს დო მოწაფეეფს ოჭკუმშა ხოლო ვა ჩოდუდეს (მარკ. 3:20). თინა მზათ რდჷ სერით ხოლო ქუდაგურუკო თინეფს, მიდგაშო თაშ რდჷ მოხუჯურ (იოან. 3:1, 2). მართალ რე, თინეფიშ უმენტაშ, მით იესოს ურჩქილედ, ვეგნორთე თიშ მოწაფეთ, მარა სახიოლო ამბეშ მორჩქილაფაშ საშვალებაქ არძას ქიმიაჩ. ჩქი ხოლო მოკონა, ირკოჩის მეფჩათ საშვალება, მირჩქილუან სახიოლო ამბე (საქ. 10:42). თეშო შილებე საჭიროქ იჸუას, დოფთირუათ ქადაგებაშ დრო დო მეთოდეფ.

¹⁴მზათ რდათ საჭირო ცვლილებეფშო. მსახურებაშა ირო ართ დო იგივე დროს ქიგლურთ-და, შილებე ვეშეფხვადათ თიცალ ადამიანეფს, მიდგას ოკონა სახიოლო ამბეშ მორჩქილაფა. ართ პიონერ სახელო მატილდა იჩიებ: „მა დო ჩქიმ ქომონჯ ვოცადუთ, შხვადოშხვა დროს უქადაგათ ადამიანეფს. ოჭმარეს ადრე საქმიან ტერიტორიას ფქადაგენთ, ონდღეს, მუჟამსით უმენტაშ გალე რე — სტენდეფით დო დღაშ ბოლოს უმოს ეფექტურქ იჸუ კარდოკარ ქადაგებაქ“. უჯგუშ იჸუაფ, მსახურებაშა ჩქინო მოხუჯურ დროს ვარინ, თიცალ დროს მიდაფრთათ, მუჟამსით უმოსო შემალებენა ხალხიშ ძირაფა. თაშ გუვაკეთენთ-და, შემლებნა დარწმუნებულ ვორდათ, ნამდა იეჰოვას გუხარენთ გურს.

15. მუჭოთ ლუკაშ 22:39—44-ის ჭარჷ, მუქ მოხვად იესოშ ღურაშ წოხოლენ სერს?

¹⁵ ახ. წ. 33 წანაშ 14 ნისანიშ სერს იესოქ გეთსემანეშ ბაღშა მიდართჷ, სოდეთ გურ გეგნუფაჩ იეჰოვას (წეკითხით ლუკაშ 22:39—44). თიმწკუმა იესო „ძალიერ ხვეწებათ დო ჩილამურეფით“ თხინდჷ ღორონთის (ებრ. 5:7). მუშ გურშენ ლოცულენდჷ იესო ღურაშ წოხოლენ სერს? თინა ღორონთის თხინდჷ ძალას, ნამდა ქუდოსქიდკო თიშ ართგურქ დო შეასრულკო თიშ ნება. იეჰოვაქ ქიმირჩქილუ მუშ სქუაშ მთელ გურით რაგადებულ ლოცვა დო ანგელოზ გოუტუ თიშ გამანგარებშა.

16. მუშენ რდჷ იესო შეწუხებულ, მუჟამსით გეთსემანეშ ბაღის ლოცულენდჷ?

¹⁶ მუშო ოკო რაგად, იესო ინგარდკონ იჸიდ გეთსემანეშ ბაღის ლოცვაშ დროს, მუშენდა თის ღორონთიშ შეურაცხმყოფელიშ სახელ ქიგიადვალუდ. თეს გეძინელ, თის არჩქილედ, მუშმადიდა პასუხიშმგებლობა უღუდ — ოკო განწმინდკო მუშ მუმაშ სახელ. იეჰოვაშ მიმართ თქვან ართგურობა ხოლო ქიგმიცადებუნ-და, მუშ გურაფა შეილებნა იესოშ ჩილამურეფშე? გუვარჩუათ ხოლო სუმ მხარე.

17. მუს ბგურაფლენთ იეჰოვაშ გურშენ თევრეშე, მუჭო უპასუხ იესოშ მთელ გურით რაგადებულ ლოცვეფს?

¹⁷იეჰოვა ურჩქილე თქვან მთელ გურით რაგადებულ ოთხუალს. იეჰოვა იესოშ მთელ გურით რაგადებულ ოთხუალს თიშენ ურჩქილედ, ნამდა იესოშ მთავარ ოფიქრებელ რდჷ ღორონთიშ ართგურო დოსქილადა დო თიშ სახელიშ განწმენდა. ჩქინ მთავარ ოთხუალ ხოლო იეჰოვაშ ართგურო დოსქილადა დო თიშ სახელიშ განწმენდა ქორენ-და, თინა აუცილებერო უპასუხენს ჩქინ ლოცვეფს (ფსალმ. 145:18, 19).

18. მუნერ მეგობარ რე იესო?

¹⁸იესოს ჯგირო არჩქილე, მუს ბგინაფლენთ. მუჟამსით დუდის გლახათ ბგინაფლენთ, მანგარო ვაფასენთ თიცალ მეგობარს, ნამდგას ჯგირო არჩქილე ჩქინ, განსაკუთრებულო თიცალ მეგობარს, მიდგას ჩქინცალ პრობლემა უღუდ. თეცალ მეგობარ იესო რე. თის უჩქჷ, მუს ბგინაფლენთ თეცალ დროს დო ოკო ჩქინ მოხვარა. თინა ირფელს გაკეთენს, ნამდა საჭირო დროს ქიმმეხვარან (ებრ. 4:15, 16).  მუჭოთ იესოქ მიღჷ გეთსემანეშ ბაღის ანგელოზშე მოხვარა, თეშ ჩქი ხოლო მზათ ოკო ვორდათ, მიბღათ იეჰოვაშე მოხვარა, იჸუაფ თენა პუბლიკაციაშ, ვიდეოშ, მოხსენებაშ, სამწყემსო მონახულებაშ დოვარ მოწიფულ მეგობარიშ საშვალებათ.

19. მუ მიმეხვარებნა, ვა ვოდინუათ სიმშვიდე დო სწორ აზროვნება? ქიმიჸონით მაგალით.

¹⁹იეჰოვა მერჩანა „ღორონთიშ მშვიდობას“. მუჭო მამანგარენა იეჰოვა? მუჟამსით ბლოცულენთ, ჩქი ბღებულენთ „ღორონთიშ მშვიდობას, ნამუთ ნებისმიერ აზრშე უმოს რე“ (ფილ. 4:6, 7). მშვიდობა, ნამუთ იეჰოვაშე მოურს, მარზენა სწორას აზროვნებაშ საშვალებას დო მამშვიდენა. ქობძირათ, მუჭო გიმოცად ლუსიქ თე სიტყვეფიშ ჭეშმარიტება: „მა ხშირას ბგინაფლენქ დუდის ხვალახეთ. თეშ გურშენ მინშა ფიფქრენქ, ნამდა იეჰოვას ვა უჸორქ. მუჟამსით თეცალ ფიქრეფ ქუმმალე, ხეთეშე იეჰოვას ლოცვას ვეჩიებუქ, მუს ბგინაფლენქ. ლოცვა მოხვარ ვა ვოდინუე სწორ აზროვნება“. თე შემთხვევა მოძირანა, მუჭო მოხვარნა ლოცვა, ვა ვოდინუათ სიმშვიდე.

20. მუს ბგურაფლენთ იესოშ ჩილამურეფშე?

²⁰ დასურო მუსხი მუდგარენიშ გურაფა შემლებნა იესოშ ჩილამურეფშე. ჩქი ოკო ქელუდირთათ მეგობრეფს, მიდგას საჸოროფო ადამიანეფ აფნა ღურელ დო ბჯერდან, ნამდა იეჰოვა დო იესო ჩქინწკუმა რენა, მუჟამსით საჸოროფო ადამიანს ვოდინუანთ. ჩქინ ქადაგება დო გურაფაშე ოკო იძირედას, ნამდა გურშა მემღუნა ხალხიშ მდგომარეობა, მუშენდა იეჰოვა ღორონთ დო იესო ქრისტე გიმირჩქინანა თე ძვირფას თვისებას. გურშა ელამკინანა თიშ რჩქინა, ნამდა იეჰოვას დო თიშ ძვირფას სქუას არჩქილენა, მუს ბგინაფლენთ, მიშულა ჩქინ მდგომარეობაშა დო ოკონა, მიმეხვარან, ნამდა მიფთვინათ. მორთ გუვაგრძელათ თიშ გიმორნაფა, მუთ თე სტატიაშე დიბგურეთ, სოიშახ იეჰოვა ვეშეარსულენს მუშ სარკო დუნაპირებუს: „გელუწიმინდანს თინეფს ირნერ ჩილამურს თოლეფშე“ (გამოცხ. 21:4).