1. მუჭო ეჭარუნდით იაკობიშ ოჯახის?

იესოშ ჯიმა იაკობიქ სულიერო ძალიერ ოჯახის ირდჷ. * თიშ მშობლეფს, იოსებ დო მარიამს, მანგარო უჸორდეს იეჰოვა დო ნამ შეულებდესინ ირფელს ორთუდეს, ნამდა ქემსახურესკო თის. იაკობის შხვა კურთხევა ხოლო უღუდ — თიშ უნჩაშ ჯიმაქ დუნაპირებ მესიაქ იჸუ. თიშო მართალო დიდ პატი რდჷ, ჸოფედკო თეცალ ოჯახის წევრ.

2. მუ მიზეზეფ უღუდ იაკობის, მიაჸუნკო უნჩაშ ჯიმაშ მაგალითის?

² იაკობის ბრელ მიზეზ უღუდ, მიაჸუნკო უნჩაშ ჯიმაშ მაგალითის (მათ. 13:55). მაგალთო, იესოს წმინდა წერილეფ ჯგირო უჩქუდ. სოვრეშე მიჩქუნა თენა? მუჟამსით თინა 12 წანერ რდჷ, მუშ რჩქინათ მანგარო გაკვირ გურაფილ მასწავლებერეფ (ლუკ. 2:46, 47). იაკობ შილებე იესოწკუმა ართო მუშენდკო ჯაშ ხელობას. თაშ ქორდ-და, ალბათ მუშ ჯიმას ჯგირო გეჩინებაფუანდჷ. ნეითან ნორ ხშირას იჩიებუდ: „ბრელ მუდგარენიშ გაგება შეილებნა პიროვნებაშ გურშენ მიდგაწკუმა ართო მუშენთ“. * იაკობ ალბათ თის ხოლო ქოძირუნდჷ, „მუჭო აძინუდ იესოს სიბრძნე, ირდუდ დო უმოს მეტ პატიცემას ღებულენდჷ ღორონთიშ დო ადამიანეფიშ თოლს“ (ლუკ. 2:52). თე ირფელიშ უკულ შილებე ფიფქრენდათ, ნამდა იაკობ პირველ ოკო ჸოფედკო იესოშ მოწაფეეფშე, მარა თექ თაშ ვეჸუ.

3. მუნერ რდჷ იაკობიშ დამოკიდებულება, მუჟამსით იესოქ მსახურება დიჭყჷ?

 ³ დედამიწას იესოშ მსახურებაშ პერიოდის იაკობ ვეგნორთე თიშ მოწაფეთ (იოან. 7:3—5). შილებე შხვა ნათესეეფცალო თინა ხოლო იჩიებუდკო, ნამდა იესოქ ჭკუაშე გეგნორთჷ (მარ. 3:21). ვართ თიშ მტკიცებულება მიღნა, ნამდა იაკობ მუშ დიდაწკუმა, მარიამწკუმა, რდჷ, მუჟამსით იესო ღურუდ (იოან. 19:25—27).

4. მუს გუვარჩიენთ თე სტატიას?

⁴ უმოს გვიანო იაკობიქ გეგმირჩქინ იესოშ მიმართ რწმენა დო ქრისტიანულ კრებაშ ძვირფას უხუცესო გინირთჷ. თე სტატიას გუვარჩიენთ ჟირ მუდგარენს, მუდგას იაკობიშ მაგალითშე ბგურაფლენთ. პირველ, მუშენ ოკო ვა ვოდინუათ თანდაბლობა დო მაჟია, მუჭო შემლებნა ვორდათ ეფექტურ მასწავლებერეფ.

5. მუჭო მიქცუ იაკობიქ თიშ უკულ, მუთ იესოქ გიმეცხად?

⁵ იაკობიქ თიშ უკულ გინირთჷ ქრისტიანო, მუთ გათელებურ იესოქ გიმეცხად (1 კორ. 15:7). თინა მოციქულეფ შქას რდჷ, მუჟამსით იერუსალიმს დუნაპირებ წმინდა შურიშ მეღებას ელდეს (საქ. 1:13, 14). უმოს გვიანო იაკობის მიაჩ პატიქ, იმსახურკო პირველ საუკუნეშ ხემძღვანელ საბჭოს (საქ. 15:6, 13—22; გალ. 2:9). ახ. წ. 62 წანაშახ ღორონთიშ შთაგონებათ თიქ წერილ მეჭარ ცხებულ ქრისტიანეფს. თე წერილს ამდღა ჩქინდა ხოლო მოუღ ჯგირობუა, ზეცაშ მაცხოვრებელ ვორეთ დო ვარ დედამიწაშ (იაკ. 1:1). მუჭოთ პირველ საუკუნეშ ისტორიკოს, იოსებ ფლავიუს, იჩიებ, მღვდელმთავარ ანანიაქ იაკობ დაჸვილაფუ. თიქ მიწიერ ცხოვრებაშ ბოლო წუთშახ იეჰოვაშ ართგურქ ქუდოსქიდ.

6. მუ განსხვავება რდჷ იაკობ დო რელიგიურ ლიდერეფ შქას?

⁶ იაკობ რდჷ თანდაბალ. მუშენ შემლებნა თეშ რაგად? მორთ ართიანს ქეშუდარათ, მუჭო მიქცუ იაკობიქ იესოშ გიმოცხადებაშ უკულ დო მუჭო იქციებდეს რელიგიურ ლიდერეფ. მუჟამსით იაკობიქ ქოძირ თიშ მტკიცებულება, ნამდა იესო ღორონთიშ სქუა რდჷ, თანდაბლურო მიღჷ თინა. მარა თენა ვა მარაგადენა უნჩაშ მღვდელეფიშ გურშენ. მაგალთო, თინეფს ვარაგადედეს, ნამდა ლაზარე იესოს ვა გუთელებ, მარა იეჰოვაშ წარმომადგენელო მიღესკონ თიშ მანგიორო, მინდომეს თიშ დო ლაზარეშ ჸვილუა (იოან. 11:53; 12:9—11). უმოს გვიანო, მუჟამსით იესოქ გეთელ, თინეფქ მირაგადეს, თენა ხალხის დუფულესკო (მათ. 28:11—15). სიამაყეშ გურშენ რელიგიურ ლიდერეფქ ვარია ქოთქუეს მესიაშენ.

7. მუშენ ოკო ეუჩილითუათ დუდ სიამაყეს?

 ⁷გაკვეთილ ჩქინო: დუდ ეუჩილითუათ სიამაყეს დო მზათ ვორდათ გურაფაშო. მუჭოთ ნამთინე ლახალას შეულებ, დაზიანას ფიზიკურ გურიშ ჯერღვეფ დო ეცილას გურიშ მუშობას, თეშნერო სიამაყეს შეულებ, დაზიანას ჩქინ სიმბოლურ გურ დო მეცილან იეჰოვაშ მითითებეფიშ მეჸუნას. ფარისეველეფ ამაყეფ რდეს დო ვაკოდეს თიშ დაჯერება, ნამდა იესოს ღორონთიშ წმინდა შურ უღუდ დო თიშ სქუა რდჷ (იოან. 12:37—40). თეშნერ დამოკიდებულებათ თინეფ მუნეფიშ მომავალს საფრთხეშ თუდო ქიგიორნუანდეს (მათ. 23:13, 33). თაშ ნამდა, მანგარ მნიშვნელოვან რე, ღორონთიშ სიტყვას დო თიშ წმინდა შურს ქიმეფჩათ საშვალება, დოთირუას ჩქინ პიროვნება, ფიქრეფ დო გადაწყვეტილებეფ (იაკ. 3:17). იაკობის თანდაბლობა არზენდჷ საშვალებას, იეჰოვაშე დუგურუაფუდკო დო მუჭოთ ანწიან აბზაცეფშე ბძირუნთ, თე თვისებაქ მეხვარ, ჸოფედკო ჯგირ მასწავლებერ.

8. მუ მიმეხვარებნა, ვორდათ ჯგირ მასწავლებერეფ?

⁸ იაკობ ვა რდჷ განათლებურ ადამიან. თიმ პერიოდიშ რელიგიურ ლიდერეფს პეტრე დო იოანე „უგურაფ დო უბრალო“ კათათ მიორჩქუდეს, ათეშენ არგამა რე, ნამდა იაკობშე ხოლო თაშ იფიქრენდეს (საქ. 4:13). თეშ უმკუჯინუო, თიქ ჯგირ მასწავლებერქ იჸუ, მუდგას თიშ წიგნშე ვორწყეთ. იაკობცალო შილებე ჩქი ხოლო ვამღუდან დიდ განათლება, მარა იეჰოვაშ წმინდა შურიშ დო თიშ ორგანიზაციაშე მეღებულ გურაფაშ ჭყოლოფათ ჩქი შემლებნა, ვორდათ ჯგირ მასწავლებერეფ. მორთ გუვარჩუათ იაკობიშ, მუჭოთ მასწავლებერიშ, მაგალით.

9. მუჭო ენწყუნდჷ იაკობ საკითხეფს?

⁹იაკობ მარტივო ენწყუნდჷ საკითხეფს. მუ რდჷ თეშ შედეგ? თიშ მარჩქილეს უჩქუდ, მუ აკეთკო დო მუჭო აკეთკო. მაგალთო, გუვარჩუათ, მუ მარტივო ეუნწყჷ იაკობიქ ქრისტიანეფს, ნამდა უსამართლობას გაჟღამებაშ უმშო ქუგურზესკო. თიქ ჭარჷ: „ჩქი ბედნერეფო მიმორჩქნა თინეფ, მიდგაქ მითვინ. თქვა  გაიგონებნა იობიშ მოთვინებაშენ დო გიჩქნა, ბოლოს მუ აკეთ იეჰოვაქ თიშო, მუჭო მეუღ თის შხვეფიშ გაჭირება გურშა დო მუნერ მოჭყოლოფე რე“ (იაკ. 5:11). ყურადღება ქიმიაქცით, ნამდა იაკობიქ ორაგადე წმინდა წერილეფშა გიორსხუ. თიქ ღორონთიშ სიტყვაშ საშვალებათ ქაძირუ მარჩქილეეფს, ნამდა იეჰოვა ირიათო აკურთხენს იობცალ ართგურეფს. იაკობიქ თეშ ეიონწყუმალო მარტივ სიტყვეფ დო ლოგიკურ მსჯელობა გიმირინუ. თეშნერო თიქ ყურადღება მუშ დუდშა ვარინ, იეჰოვაშა გეგნიღ.

10. მუჭო შემლებნა მივაჸუნათ იაკობიშ მაგალითის, მუჟამსით შხვეფს ვოგურუანთ?

¹⁰გაკვეთილ ჩქინო: მარტივო გემნწყათ საკითხეფ დო ვოგურუათ ღორონთიშ სიტყვაშე. მიზანო თინა ოკო ვამღუდან, შხვეფ ჩქინ რჩქინათ გუვაკვირათ. მარჩქილეეფს ოკო ქუვოძირათ, მუზმათ ბრძენ დო მზრუნველ რე იეჰოვა (რომ. 11:33). თეს ქიმვოჭირინუათ, მუჟამსით ორაგადეს წმინდა წერილეფშა ქიგვორსხუანთ. მაგალთო, თიშ მანგიორო, ნამდა ბიბლიაშ მაგურაფალს უწუათ, ჩქი მუჭო მიფქციებუდით თიშ ადგილს, ჯგირ იჸუაფ ბიბლიურ მაგალითეფიშ საშვალებათ ქიმიპჸუნათ თინეფ დასკვნაშა დო ქუვოძირათ, მუს ფიქრენს იეჰოვა კონკრეტულ საკითხიშ გურშენ. თეშნერო თინეფს ჩქინ ვარინ, იეჰოვაშ განდიდებაშ სურვილ გურჩქინდუნა.

11. მუ სირთულეეფ უღუდ ნამთინე ქრისტიანს დო მუ ელუჩ თინეფს იაკობიქ?

¹¹იაკობის რეალურ მოლოდინ უღუდ და დო ჯიმალეფიშ მიმართ. თიშ წერილშე არგამათ ირწყებე, ნამდა იაკობის არჩქილედ, მუ სირთულეეფ უღდეს მუშ თანამორწმუნეეფს დო თეწკუმა დაკავშირებით მითითებეფს არზენდჷ. მაგალთო, ნამთინე ქრისტიანს უჭირდჷ რჩევეფიშ მეჸუნა (იაკ. 1:22). შხვეფ გიშაკერძაფას გიმირჩქინანდეს (იაკ. 2:1—3). ნამთინეს ნინაშ გაკონტროლება უჭირდჷ (იაკ. 3:8—10). თე ქრისტიანეფიშ ნაკლოვანებეფიშ უმკუჯინუო, იაკობის ჯერდჷ, ნამდა თინეფს შეიალებედეს თირუა. თიქ ლიბას, მარა პირდაპირ მეჩჷ რჩევა დო სულიერო მოსუსტებულეფს უწუ, უხუცესეფს ქოთხისკო მოხვარა (წეკითხით იაკობიშ 5:13—15).

12. მუჭო შემლებნა ვა ვოდინუათ დადებით განწყობა, მუჟამსით ბიბლიაშ მაგურაფალეფს ვოხვარუთ?

¹²გაკვეთილ ჩქინო: მიღდან რეალურ მოლოდინ, მარა ვა ვოდინუათ დადებით განწყობა შხვეფიშ მიმართ. ბიბლიაშ ბრელ მაგურაფალს უჭირს გეგმირინუანს ბიბლიურ რჩევეფ (იაკ. 4:1—4). შილებე თინეფს დრო ოსაჭირდან, მუნეფიშ გლახა თვისებეფ ჯგირით დოთირუან. იაკობცალო, ჩქი ხოლო გაბედულო ოკო უწუათ ბიბლიაშ მაგურაფალეფს, მუ აფნა ოთირალ. თეს გეძინელ, მოსაჭირნა, ვა ვოდინუათ დადებით განწყობა. ოკო ბჯერდან, ნამდა იეჰოვა მუშა ქიმიჸონანს თანდაბალ ადამიანეფს დო ქიმეხვარებ, დითირუან ცხოვრება (იაკ. 4:10).

13. მუჭოთ იაკობიშ 3:2-შე იძირე, მუს იჩიებუდ იაკობ მუშ დუდიშ გურშენ?

¹³იაკობის სწორ დამოკიდებულება უღუდ მუშ დუდიშ მიმართ. მართალ რე, იაკობიქ განსაკუთრებულ ოჯახის ირდჷ დო უღუდ სერიოზულ პასუხიშმგებლობეფ, მარა და დო ჯიმალეფიშ უჯგუშო ვემუღუდ დუდ. თინა თანაქრისტიანეფს თეშნერო მიშინუანდჷ: „ჩქიმ საჸოროფო ჯიმალეფ“ (იაკ. 1:16, 19; 2:5). თინა ვაცადუდ, შხვეფს თეშ ქაძირუკო დუდ, ითამ მუთუნ ვეშაჩირთუდ. იაკობიქ თქუ: „ჩქი არძა ხშირას ფჩირთუთ“ (წეკითხით იაკობიშ 3:2).

14. მუშენ ოკო ვა ფუბლათ, ნამდა ჩქი ხოლო ფჩირთუთ?

¹⁴გაკვეთილ ჩქინო: ფშუდან, ნამდა ჩქი არძა ცოდვილეფ ვორეთ. ჩქი ოკო ვეფიფქრათ, ნამდა მუდგარენით უჯგუშეფ  ვორეთ თინეფშე, მიდგას ბიბლიას ვოგურუანთ. ბიბლიაშ მაგურაფალს უჩილათ ვორეთინ თიშნერ აზრის ქუდუტენთ-და, შილებე თიქ იფიქრას, ნამდა დღას ვემიაჸუნნე ღორონთიშ მოთხოვნეფშა. მარა, მუჟამსით ქუვოძირანთ, ნამდა ჩქინო ხოლო ირო ვა რე ადვილ, მივაჸუნათ ღორონთიშ პრინციპეფს დო გეუნწყუნთ, მუჭო მიმეხვარეს იეჰოვაქ, გივორჯგინითკო სირთულეეფს, თინა ქოძირუნს, ნამდა მუს ხოლო შეულებ ემსახურას იეჰოვას.

15. მუჭო ეჭარუნდით იაკობიშ მოჸუნაფილ მაგალითეფს? (იაკ. 3:2—6, 10—12).

¹⁵იაკობ ირინუანდჷ გურს ინანჭუდუნ ფერ მაგალითეფს. მუშო ოკო რაგად, თის წმინდა შურ ოხვარუდ, მარა ალბათ მუშ უნჩაშ ჯიმაშე, იესოშე, ხოლო ბრელ მუდგარენ დიგურუ მაგალითეფიშ გიმორნაფაწკუმა დაკავშირებით. იაკობის მუშ წერილს მარტივ მაგალითეფ აფჷ გიმორნაფილ, ნამუთ მარჩქილეეფს ოხვარუდ საკითხიშ უჯგუშო ინონჭაფას (წეკითხით იაკობიშ 3:2—6, 10—12).

16. მუშენ ოკო გიმიბრინუათ ეფექტურ მაგალითეფ?

¹⁶გაკვეთილ ჩქინო: გეგმიბრინუათ ეფექტურ მაგალითეფ. მუჟამსით საკითხის ოხუნ ფერ მაგალითეფს იბრინუანთ, შხვეფ თის ხვალე ვერჩქილენან, გონებაშ თოლით ხოლო ორწყენა. თეშნერო, ჩქი სურათის ფხანტუნთ თინეფიშ გონებას. თენა მეხვარებ მარჩქილეეფს, ქიდემახსოვრან მნიშვნელოვან ბიბლიურ აზრეფ. იესოს მანგარ ჯგირო გიშალედ თენა, მუთ ჯგირ მაგალით რდჷ იაკობშო. მორთ ასე დეფიფქრათ იაკობიშ ართ მაგალითშე დო გუვარჩუათ, მუშენ რე თინა ეფექტურ.

17. მუშენ რე იაკობიშ 1:22—25-ის მოშინაფილ მაგალით ეფექტურ?

¹⁷ წეკითხით იაკობიშ 1:22—25. ბრელნერ მიზეზიშ გურშენ შილებე თიშ რაგად, ნამდა იაკობიშ მოჸუნაფილ მაგალით სარკეშ გურშენ ეფექტურ რდჷ. თე მაგალითით იაკობის თიშ რაგად ოკოდ, ნამდა ღორონთიშ სიტყვაშე სარგებელ მიბღათინ, ხვალე თიშ კითხირ ვა რე დასაბაღ; საჭირო რე, ნაკითხირ ცხოვრებას გეგმიბრინუათ. იაკობიქ თიშნერ მაგალით მიჸუნ, ნამდგაშ წარმოდგენა მარჩქილეეფს ვა გუჭირდუდეს. სარკეშ ინოჯინას აზრ უდინუ, მუჟამსით კოჩ ორწყე მუდგარენ აფჷ ოთირალ, მარა თეს ვართ. თეშნერო, ღორონთიშ სიტყვაშ კითხირს  ხოლო აზრ უდინუ, მუჟამსით ნაკითხირიშ მიხედვით ვა ფთირანთ ჩქინ პიროვნებას.

18. მუ სუმ მუდგარენ ოკო ფშუდან, ნამდა ეფექტურ მაგალითეფ ქიმიპჸუნათ?

¹⁸ იაკობცალო ეფექტურ მაგალითეფ ქიმიპჸუნათინ, სუმ მუდგარენ ოკო ფშუდან: პირველ, მაგალით ოკო მეურდას თი საკითხის, მუდგაშ გურშენ იფჩიებუთ. მაჟია, თიშნერ მაგალით ოკო მიპჸუნათ, ნამუთ მარჩქილეს ადვილ გაგებელ აჸი, დო მასმა, თე მაგალითიშ საშვალებათ მარჩქილექ ადვილო ოკო ენანჭას გარჩიებელ საკითხის. საკითხის მეურენ ფერ მაგალითიშ გორუა ქოიჭირან-და, შეილებნა, გეგმირინუათ „გინაჯინალ კოშკიშ“ პუბლიკაციეფიშ საძიებელ. ქვესათაურს „მაგალითეფ“ თქვა ბრელნერ მაგალითის ქოძირუნთ. ოკო ვაგმოჭყორდან, ნამდა მაგალითეფ მოგენს მიკროფონს. მუჭოთ მიკროფონ უძინანს ხონარიშ სიმაღლეს, თეშ მაგალითეფ უძინანს ნარაგადის ეფექტურობას. ათეშენ, ყურადღება ოკო მივაქცუათ, ნამდა მაგალითეფით ხვალე მთავარ აზრ გემნწყათ. მუშო ოკო რაგად, გურაფაშ უნარიშ გაუჯგუშება თიშენ ვა მოკონა, ნამდა დუდ გეგმიფრჩქინათ; ჩქი მოკონა, მუთ შილებე მეტ ადამიანს ქიმვეხვარათ, გინირთან იეჰოვაშ ბედნერ ოჯახიშ წევრეფო.

19. მუჭო ვოძირანთ, ნამდა ვაფასენთ ჩქინ სულიერ ოჯახის?

¹⁹ მართალ რე, ჩქი ვამღუდეს საშვალება სრულყოფილ უნჩაშ ჯიმაწკუმა ართო იბრდითკო, მარა მიღნა პატი, ვემსახურათ იეჰოვას დიდ ოჯახის ქრისტიან და დო ჯიმალეფწკუმა ართო. ჩქი ჸოროფას გიმიფრჩქინანთ თინეფიშ მიმართ, მუჟამსით ურთიერთობა მიღნა თინეფწკუმა, ბგურაფლენთ თინეფშე დო ართგურო ვასრულენთ ქადაგებაშ დო გურაფაშ საქმეს თინეფწკუმა ართო. მუჟამსით მეპჸუნთ იაკობიშ მაგალითის ჩქინ დამოკიდებულებათ, საქმეეფით დო გურაფაშ მეთოდეფიშ გიმორნაფათ, განვადიდენთ იეჰოვას დო ვოხვარუთ ალალ გურიშ ადამიანეფს, დეახლოვან ჩქინ მოჸოროფე ზეციერ მუმას.