1. მუშე ფიქრენს ამდღა ბრელ?

 ᲐᲛᲓᲦᲐ ადამიანეფიშ უმენტაშის ქიანაშის ვაინტერეს ღორონთიშ განდიდება. ბრელ ხვალე მუშ დუდიშ განდიდებაშე ფიქრენს. თინეფ ირნერო ოცადუნა, სოციალურ მედიას გედვალირ მასალათ მუნეფიშ დუდშა მიქცუან ყურადღება დო ირკოჩის ქუგაგებაფუან, მუ წარმატებეფს მიოჭირინუეს. თინეფიშ გინაწონს, რე ხალხ, მიდგას იეჰოვა ღორონთიშ გადიდება ოკო. ათეშენ, თე სტატიას გუვარჩიენთ, მუს ნიშნენს, დიდება უძღვინათ იეჰოვას დო მუშენ ვორთუთ თეს. ქიგებგენთ თის ხოლო, მუჭო შემლებუნა დიდება უძღვინათ იეჰოვას დო მუ მუს გაკეთენს მალას, ნამდა განადიდას მუშ სახელ.

ᲛᲣᲡ ᲜᲘᲨᲜᲔᲜᲡ, ᲓᲘᲓᲔᲑᲐ ᲣᲫᲦᲕᲘᲜᲐᲗ ᲘᲔᲰᲝᲕᲐᲡ?

 2. მუჭო ოძირუ იეჰოვაქ მუშ დიდება სინაიშ გვალაწკუმა? (ქოძირით სურათ).

² ბიბლიას გიმორნაფილ სიტყვა „დიდება“ ნიშნენს თის, მუთ მიდგაინს შხვეფშე უმოს განსაკუთრებულო გინაშქვანს. ეგვიპტეშე გათავისფალებაშე მალას იეჰოვაქ სასწაულ მუდგარენ გაკეთ, მუდგათ ისრაელეფს მუშ დიდება ქაძირუ. წერმიდგინით თეცალ სურათ: მილიონობით ისრაელ სინაიშ გვალაწკუმა რე შაყარელ, ნამდა ღორონთის ქუმურჩქილუან. სინაიშ გვალას უჩა მუნაფა ფორუნს, გვალაშ წვანდშე ფურკ ეშურს, თექ დაჩხირ რზუდასინ თეშ; დიხა იზარზალ, ვალუნს, გურგინუნს დო საყვირიშ სასწაულ ხონარ ირჩქილე (გამ. 19:16–18; 24:17; ფსალმ. 68:8). წერმიდგინით, მუჭო იმოქმედენდ ისრაელეფშა იეჰოვაშ ძალაშ დო დიდებაშ ძირაფა.

 3. მუჭო შემლებუნა დიდება უძღვინათ იეჰოვას?

³ ჩქი ხოლო შემლებუნა დიდება უძღვინათ იეჰოვას. თეშ კეთებაშ ართ-ართ საშვალება რე, შხვეფს ქივეჩუათ თიშ სასწაულ ძალაშ დო თვისებეფიშ გურშენ. თით ხოლო ვადიდენთ  ღორონთის, ნამდა ირფელს, მუდგას მივოჭირინუანთ, თის მივოჭარანთ დო მარჩქილენა, ნამდა თიშ მოხვარაშ უმშო მუთუნ ვა მაკეთებედეს (ეს. 26:12). მეფე დავითიქ იეჰოვაშ განდიდებაშ ჯგირ მაგალით მუჩეს. ისრაელ ერიშ წოხოლე რაგადებულ ლოცვას თიქ ღორონთის უწუ: „დიდებულ, ძალიერ, სარკო დო პატიგედვალირ რექჷ დო ირკოჩიშ უმოს მაღალას გერექ, მუშენდა ირფელ სქან რე ქოთ ცას დო ქოთ დედამიწას“. მუჟამსით დავითიქ ლოცვა გათუ, „ხალხიქ ხოლო განადიდ იეჰოვა“ (1 მატ. 29:11, 20).

 4. მუჭო განადიდენდჷ იესო იეჰოვას?

⁴ დედამიწას ცხოვრებაშ დროს იესო დიდებას უძღვინენდჷ ზეციერ მუმას დო მუშ არძა სასწაულს თიშ ძალას მიოჭარანდჷ (მარ. 5:18–20). თეწკუმა ართო, იესო თეშ იჩიებუდ მუამუშიშ გურშენ დო თეშ ოქცუდ ადამიანეფს, ნამდა ქაძირუკო შხვეფს, მუნერ დიდებულ რე იეჰოვა. ართშა, მუჟამსით თინა სინაგოგას ოგურუანდჷ, მარჩქილეეფ შქას რდჷ ართ ოსურ, მიდგას 18 წანა რდჷ დემონეფ მიშუხედუნ. თეშ გურშენ თინა წელს რდჷ მოდირაკილ დო გოთინუა ვეშულებუდ. წერმიდგინით, მუ დღა უღუდ თე ოსურს. იესოს მანგარო ეცოდ თიქ, ათეშენ ქიმერთჷ დო გემუანო უწუ: „სქილადირ რექჷ სქან ლახალაშე“. უკულ ხელეფ ქიგედვჷ თე ოსურს; თიქ ხოლო ხეთეშე გითინ დო ღორონთიშ განდიდება ქიდიჭყჷ. თინა მანგარ მარდულ აფუდ ღორონთის, ნამდა დასქილიდუ ლახალაშე (ლუკ. 13:10–13). თე ოსურკოჩის მართალო უღუდ თიშ მიზეზ, ნამდა განადიდუკო იეჰოვა, დო ჩქი ხოლო ქიანაშ მიზეზ მიღუნა თეშ ოკეთებელო.

მᲣᲨᲔᲜ ᲒᲐᲜᲕᲐᲓᲘᲓᲔᲜᲗ ᲘᲔᲰᲝᲕᲐᲡ?

 5. მუშენ ოკუთვნ იეჰოვას ჩქინდე პატიცემა?

⁵ თის ოკუთვნ ჩქინდე პატიცემა. იეჰოვა ირფელიშშემალებე ღორონთ რე დო ულიებ ძალა უღჷ (ფსალმ. 96:4–7). თინა სარკოთ ბრძენ ხოლო რე, მუთ თიშ გუნაჭყეფუეფშე იძირე. იეჰოვაქ მუჩეს სიცოცხლე დო ირფელ, მუთ მოსაჭირუნა, ნამდა იფცოცხლათ (გამოცხ. 4:11). თინა ართგურ ღორონთ რე (გამოცხ. 15:4). იეჰოვას ბოლოშა ვემიაჸუნინენ ფერ საქმე ვა არსებენს დო ირო ასრულენს მუშ სიტყვას (იეს. 23:14). ათეშენ მუ გასაკვირ რე, ნამდა წინასწარმეტყველ იერემიაქ ღორონთიშ გურშენ თეცალ სიტყვეფ თქუ: „ხალხეფიშ ჭკვერ კათა შქას დო თინეფიშ სამეფოეფს მითინ ველეჸუნინე სქანდა!“ (იერ. 10:6, 7). მუშო ოკო რაგად, თე ირფელ იეჰოვაშ მიმართ რიდის დო პატიცემას მირჩქინანა. მარა იეჰოვა მუშ თვისებეფით ხვალე რიდ დო პატიცემას ვა მირჩქინანან, დუდის ხოლო მიჸოროფუანა.

 6. მუშენ მიჸორა იეჰოვა?

⁶ მთელ გურით მიჸორა თინა. დეფიფქრათ ნამთინე თვისებაშე, ნამუთ უმოსო მიჸოროფუანა იეჰოვას. თინა მოჭყოლოფე რე დო მიშურს შხვეფიშ მდგომარეობაშა (ფსალმ. 103:13; ეს. 49:15). თის გურშა მეუღ შხვეფიშ გაჭირება; ჩქინ ჭუა თიშ ჭუა რე (ზაქ. 2:8). იეჰოვა მოხვარუნა, გეფჩინებაფუათ თინა დო თიშ მეგობრეფო გინიბრთათ (ფსალმ. 25:14; საქ. 17:27). იეჰოვა მანგარ თანდაბალ ხოლო რე; თინა „თუდო გიმიკინანს, ნამდა ქიგნაჯინას ცას დო დიხას. გაჭირებულს ტვერშე წუმადგინუანს“ (ფსალმ. 113:6, 7). მუნერო ოკო ვაიჸორდას ღორონთ, ნამდგას თეცალ თვისებეფ უღჷ?! (ფსალმ. 86:12).

 7. მუ პატი მიღუნა?

⁷ მოკონა, შხვეფქ ხოლო გეჩინებაფუან თინა. სატანა იეჰოვაშ გურშენ ტყურეფს ოსიმუანს დო ხალხშა გონება აფჷ კილერ, ათეშენ ბრელს ვა უჩქჷ, მუნერ ღორონთ რე თინა (2 კორ. 4:4). ეშმაკიქ თინეფს ქუდაჯერუ, ნამდა იეჰოვა უდუნდებელ ღორონთ რე, არძა ართ აფჷ ხალხიშ მდგომარეობა დო თიშ ბრალ რე არძა უბედრობა, მუთ ქოხვადუნ. მარა ჩქი მიჩქუნა სიმართლე ღორონთიშ გურშენ დო მიღუნა პატი, შხვეფს ხოლო  ქუგვოგებაფუათ, მუნერ დიდებულ ღორონთ რე თინა, დო თეშნერო თიშ განდიდებას შეუნწყუათ ხე (ეს. 43:10). 96-ა ფსალმუნს იეჰოვაშ განდიდებაშე მეურს ჩიება. მორთ გუვარჩუათ ღორონთიშ შთაგონებულ თე სიტყვეფ დო დეფიფქრათ, მუჭო შემლებუნა მეუძღვინათ იეჰოვას დიდება, ნამუთ თის დასურო ოკუთვნ.

ᲛᲣᲭᲝ ᲨᲔᲛᲚᲔᲑᲣᲜᲐ ᲣᲫᲦᲕᲘᲜᲐᲗ ᲘᲔᲰᲝᲕᲐᲡ ᲓᲘᲓᲔᲑᲐ, ᲜᲐᲛᲣᲗ ᲗᲘᲡ ᲝᲙᲣᲗᲕᲜ?

 8. მუ რე ართ-ართ საშვალება, მუდგათ იეჰოვაშ განდიდება შემლებუნა? (ფსალმ. 96:1–3).

⁸ წეკითხით ფსალმუნეფიშ 96:1–3. შემლებუნა დიდება უძღვინათ იეჰოვას ჩქინ ჩიებათ. თე მუხლეფ ღორონთიშ ხალხის ურაგად: „ქუბირით იეჰოვას, განადიდით თიშ სახელ! . . გაცხადით სახიოლო ამბე, ნამდა თინა მარსხებელ რე! ქეჩით თიშ დიდებულებაშ გურშენ ერეფს“. მუჭოთ ვორწყეთ, ჟიშე მოშინაფილ არძა აზრ ჩიებაშ უნარწკუმა რე დაკავშირებულ, ნამუთ შემლებუნა გეგმიბრინუათ ზეციერ მუმაშ განდიდებელო. ულირს მახორუ იეჰოვაშ მსახურეფ გაბედულო ეჩიებუდეს შხვეფს, სინამდვილეს მუნერ ღორონთ რე თინა დო მუ დიდებულ საქმეეფ აფუდ ნაკეთებ თინეფშო (დან. 3:16–18; საქ. 4:29). ჩქი მუჭო შემლებუნა თეშ კეთება?

9, 10. მუს ბგურაფლენთ ანჯელინაშ შემთხვევაშე? (ქოძირით სურათ).

⁹ გუვარჩუათ ართ დაშ, ანჯელინაშ, a შემთხვევა, ნამუთ შეერთებულ შტატეფს ცხოვრენს. ართშა თიქ გაბედულო დეცვჷ იეჰოვაშ სახელ სამუშას. მუშობა ახალ დოჭყაფილ აფუდუნ თეშ, ანჯელინას ქუდუძახეს შეხვალამაშა, სოდეთ ახალ თანამშრომელეფქ მუნეფიშ დუდ ოკო გაჩინებაფუესკო შხვეფს. ანჯელინას თინეფშა ოძირაფალო მომზადებულ აფუდ სურათეფ, სოვრეშეთ ირწყებედ, მუშმადიდა ხიოლ მოუღუდ თის, ნამდა იეჰოვაშ მოწმე რე. მარა ანჯელინაშახ სიტყვა ქიმეჩეს ართ თანამშრომელს, ნამდგაქ თქუ, ნამდა იეჰოვაშ მოწმეეფიშ ოჯახის ირდჷ. თიქ ჩქინ რწმენაშ გოციგან ქიდიჭყჷ. ანჯელინა იჩიებ: «გურ მაბათქუდ, მარა უკულ ჩქიმ დუდის ქეუძახ: „ასე მუთუნით ვეშილებე ხონარ ვეკიღე დო თე კოჩის იეჰოვაშ გურშენ ტყურეფ ორაგადაფუე. ოკო ქუგვოგებაფუე თე ხალხის, სინამდვილეს, მუნერ რე იეჰოვა“».

¹⁰ მუჟამსით თანამშრომელქ გათუ ჩიება, ანჯელინაქ უცფას გურს ქილოც დო უკულ თის გემუანო უწუ: „ჩქინ ისტორია ართიანს ნოგუე, მა ხოლო იეჰოვაშ მოწმეეფიშ ოჯახის იბრდჷ. ოღონც მა ამდღარშახ იეჰოვაშ მოწმე  ვორექ“. დაძაბულ სიტუაციაშ უმკუჯინუო, ანჯელინაქ ვადინუ სიმშვიდე დო გაგრძელ მუშ ორაგადე. თიქ თანამშრომელეფს ქაძირუ შხვადოშხვა სულიერ ღონისძიებეფს გინოღალირ სურათეფ დო ტაქტიანო დეცვჷ მუშ რწმენა (1 პეტ. 3:15). ქოიჩქუნანო მუქ იჸუ შედეგიქ? ანჯელინაშ ჩიებაშ უკულ, თე კოჩიქ დემშვიდ. ინა ვარ, თინა ხოლო ქოთქუ, ნამდა ბრელ ჯგირ გაშინედ ბაღანობაშე, მუჟამსით იეჰოვაშ მოწმეეფწკუმა უღუდ ურთიერთობა. ანჯელინა იჩიებ: „დიდ პატი რე შხვეფიშ წოხოლე იეჰოვაშ სახელიშ დაცვება. თენა თის მართალო ხვადჷ“. მუჟამსით შხვეფ იეჰოვაშ გურშენ ტყურეფს იჩიებუნა, შემლებუნა ხონარ გეკიბღათ თიშ სახელიშ დაცვებელო. თე დროს იეჰოვაშ განდიდებაშ საშვალება მერზიებუნა, მუთ ქიანაშმადიდა პატი რე.

11. მუჭო მეჸუნდჷ ღორონთიშ ხალხ ირო ფსალმუნიშ 96:8-ს ინოჭარილ პრინციპის?

¹¹ წეკითხით ფსალმუნეფიშ 96:8. შემლებუნა იეჰოვა ჩქინ შესაწირეფით განვადიდათ. ღორონთიშ მსახურეფ ირო განადიდენდეს იეჰოვას თე საშვალებათ (იგავ. 3:9). მაგალთო, ისრაელეფქ შესაწირ აკეთეს ტაძარიშ ოშენებელო დო უკულ ხოლო ულუანდეს თის (2 მეფ. 12:4, 5; 1 მატ. 29:3–9). ქრისტეშ ნამთინე მოწაფე ხოლო მუშ ქონებათ ელურდჷ იესოს დო თიშ მოციქულეფს (ლუკ. 8:1–3). პირველ საუკუნეშ ქრისტიანეფქ ხოლო მუნეფიშ შესაწირეფით მეხვარეს და დო ჯიმალეფს შქირენაშ დროს (საქ. 11:27–29). ამდღა ჩქი ხოლო შემლებუნა განვადიდათ იეჰოვა მთელ გურით კეთებულ შესაწირეფით.

12. მუჭო შილებე ჩქინ კეთებულ შესაწირეფქ დიდება ქუმუღას იეჰოვას? (ქოძირით სურათ).

¹² გუვარჩუათ ართ შემთხვევა, სოვრეშეთ იძირე, მუჭო შილებე ჩქინ კეთებულ შესაწირქ იეჰოვას დიდება ქუმუღას. 2020 წანას ზიმბაბვეს მანგარ გოლოფაქ იჸუ, ნამდგაქ ბრელ ხანს გეგრძელ. მილიონობით ადამიან შქირენაშ კარს გერდჷ, თინეფ შქას ჩქინ და, პრისკა. თიქ ხონუაშ სეზონს ხოლო გაგრძელ მუშ მსახურებაშ გეგმაშ მეჸუნა დო ირ ჯუმაშხას დო ობიშხას ოქადაგებშა მიშჷ. მეზობელეფ გაციგანუდეს თის, ჸვანაშ მანგიორო ოქადაგებშა გილეშუნ, დო ურაგადუდეს, შქირენს დოღურუქია. მარა პრისკას ჯერდჷ, ნამდა იეჰოვა ქიზრუნენდ თიშა, ათეშენ თაშ პასუხენდჷ მეზობელეფს: „იეჰოვას მუშ ხალხ დღას ვემუტებ“. ბრელ ხანს ვემკურთუმ დო თიქ ორგანიზაციაშე ჰუმანიტარულ დახმარება მიღჷ. თიშ ჯღონუაქ ორგანიზაციას თანაქრისტიანეფიშ კეთებულ შესაწირეფიშ ჭყოლოფათ შეიალებუ. თეშ ძირაფაქ პრისკაშ მეზობელეფშა მანგარო იმოქმედ დო თის  უწუეს: „სი ღორონთ ირო გოხვარ. ჩქი ხოლო მოკონა თიშ უჯგუშო გაჩინებაფა“. პრისკაშ შქვით მეზობელქ ქიდიჭყჷ შეხვალამეფშა გილულა.

13. მუჭო შილებე ჩქინ საქციელქ განადიდას იეჰოვა? (ფსალმ. 96:9).

¹³ წეკითხით ფსალმუნეფიშ 96:9. შემლებუნა იეჰოვა ჩქინ საქციელით განვადიდათ. მღვდელეფ, მით ჯვეშო იეჰოვაშ ტაძარს მსახურენდეს, ფიზიკურო სუფთეფ ოკო ჸოფედესკო (გამ. 40:30–32). მარა ფიზიკურ სისუფთავეშე უმოს მნიშვნელოვან ზნეობრივ სისუფთავე რე (ფსალმ. 24:3, 4; 1 პეტ. 1:15, 16). ათეშენ ირნერო ოკო ვეცადათ, ჩეფთხინუათ „ჯვეშ პიროვნება“, მუდგაშათ მიშურს უწმინდურ აზროვნება დო საქმეეფ, დო გინიბრთათ „ახალ პიროვნებათ“, მუთ ნიშნენს, თიცალ აზროვნება დო საქციელ მიღუდან, ნამუთ ოძირანს, ნამდა იეჰოვაშ მაგალითის მეპჸუნთ დო თიშ ჯგირ თვისებეფ მიღუნა (კოლ. 3:9, 10). იეჰოვაშ მოხვარათ, არძაშ უმოს უზნეო დო მოძალადე ადამიანეფს ხოლო შეულებუნა დითირან დო ახალ პიროვნებათ გინირთან.

14. მუ დიგურეთ ჯეკიშ შემთხვევაშე? (ქოძირით სურათ).

¹⁴ გუვარჩუათ ჯეკიშ შემთხვევა, ნამუთ თიცალ მოძალადე დო უდუნდებელ კოჩ რდჷ, „სატანას“ უძახუდეს. თის თიცალ მუდგარენეფ აფუდ დაშებულ, ნამდა ღურათ დასაჯება ქიმუსაჯეს. მარა განაჩენიშ აღსრულებაშახ, თიქ ბიბლიაშ გურაფა ქიდიჭყჷ ართ ჯიმაწკუმა, ნამდგაქ ციხეს მიაკითხუ. თეცალ სასწაულ ცხოვრება აფუდ მიკნაულან ფერ კოჩიქ ჩეთხინუ „ჯვეშ პიროვნება“ დო ჭეხანშა დინათ. თიქ თიცალო დითირ, ნამდა ღურათ დასაჯებაშ დღას ციხეშ ნამთინე ყარულ ინგარდუნ თეშ ეთხიებუდ. ართ ჯარიშკოჩიქ, ნამუთ ციხეს მუშენდჷ, თქუ: „ართ დროს თინა თაქ არძაშ უფრაშ ადამიან რდჷ, მარა ამდღა თინა თაქ არძაშ უჯგუშ კოჩ რე“. ჯეკ ღურათ დასაჯესინ თიშ უკულიან მარას ჯიმალეფქ ჩატარეს შეხვალამა პატიმარეფწკუმა, ნამუთ ირ მარას იტარებუდ. თე შეხვალამაშა მორთჷ ართ პატიმარქ, ნამუთ თეიშახ დღას ვა რდჷ მუნაულა. მუქ მიჸონ თე კოჩ შეხვალამაშა? თიშა თიცალო იმოქმედ ჯეკიშ თირუაშ ძირაფაქ, ნამდა ოკოდ, ქიგეგუკო, მუ ოკო აკეთუკო იეჰოვაშ თაყვანიშმცემელო გინორთაშო. თე შემთხვევაშე არგამათ ირწყებე, ნამდა ჩქინ საქციელს შეულებ ჩქინ ზეციერ მუმას დიდება ქუმუღას (1 პეტ. 2:12).

 ᲛᲣᲡ ᲒᲐᲙᲔᲗᲔᲜᲡ ᲘᲔᲰᲝᲕᲐ ᲛᲐᲚᲐᲡ ᲛᲣᲨ ᲡᲐᲮᲔᲚᲘᲨ ᲒᲐᲜᲡᲐᲓᲘᲓᲔᲑᲔᲚᲝ?

15. მუჭო განადიდენს მალას იეჰოვა მუშ სახელს სრულას? (ფსალმ. 96:10–13).

¹⁵ წეკითხით ფსალმუნეფიშ 96:10–13. 96-ა ფსალმუნიშ ბოლო მუხლეფ იეჰოვას ეჭარუნს, მუჭოთ სამართლიან მოსამართლეს დო მეფეს. მუჭო განადიდენს იეჰოვა მალას მუშ სახელს? თინა აღასრულენს სამართალს. მალას თინა დასაჯენს „დიდ ბაბილონს“, ნამუთ ტყურეფს ოგურუანს ხალხის დო შეურაცხყოფას მიორინუანს იეჰოვაშ წმინდა სახელს (გამოცხ. 17:5, 16; 19:1, 2). ნამთინექ, მით ქოძირუნს „დიდ ბაბილონიშ“ განადგურებას, შილებე ჩქინწკუმა ართო ქიდიჭყას იეჰოვაშ მსახურება. ბოლოს, არმაგედონს, იეჰოვა განადგურენს სატანაშ ქვეყნიერებას დო თინეფს, მით ოწინააღმდეგუნა თის დო შეურაცხყოფას მიორინუანა თიშ სახელს. თე დროს იეჰოვა ირსხენს თინეფს, მიდგას უჸორა თინა, ომორჩილუნა დო დიდ პატით მიორჩქუნა თიშ განდიდება (მარ. 8:38; 2 თეს. 1:6–10). საბოლა გამოცდაშ უკულ, ნამუთ ქრისტეშ ანთასწანიან მმართველობას მაჸუნუ, იეჰოვაშ სახელ სრულას იჸუაფ განწმენდილ (გამოცხ. 20:7–10). თე დროს „იეჰოვაშ სიდიადეშ რჩქინათ გეიფშაფუ დედამიწა თეშ, მუჭოთ ზღვა რე წყარით ეფშა“ (აბაკ. 2:14).

16. მუშ კეთება გაფუნა გინოჭყვიდილ? (ქოძირით სურათ).

¹⁶ მუნერ სახიოლო იჸი, ნამდა არძა შურდგუმილ იეჰოვაშ სახელს ოკუთვნუნ თიცალ დიდებას მეუძღვინენს. მარა, თეიშახ, მოკონა, ნამ შემლებუნან, ირფელ გუვაკეთათ იეჰოვაშ სახელიშ ოდიდებელო. თე მნიშვნელოვან აზრ ჯგირო ქოფშუდანინ თიშენ, ხელმძღვანელ საბჭოქ 2025 წანაშ მუხლო გიშაგორ ფსალმუნიშ 96:8, სოდეთ ჭარჷ: „დიდება უძღვინით იეჰოვას მუშ სახელიშ გურშენ“.