ᲝᲒᲣᲠᲐᲤᲐᲚ ᲡᲢᲐᲢᲘᲐ 3
ᲝᲑᲘᲠᲔᲨ 35 დერწმუნით მუ რე უმოს მნიშვნელოვანი
მიღით იეჰოვაშ მოსაწონ გადაწყვეტილებეფ
„იეჰოვაშ შიშშე მოურს სიბრძნე; უწმინდესიშ გურშენ რჩქინა გონიერებას ირზენს“ (ᲘᲒᲐᲕ. 9:10).
ᲛᲘᲖᲐᲜ
ქობძირუნთ, მუჭო მიმეხვარებუნა ჭკვერულ გადაწყვეტილებაშ მეღებას არძა საჭირო ინფორმაციაშ რჩქინა, იეჰოვაშ დამოკიდებულებაშ გაგება დო ინონჭაფაშ უნარ.
1. მუქ შილებე მინშა გამჭირდან?
ᲒᲐᲓᲐᲬᲧᲕᲔᲢᲘᲚᲔᲑᲔᲤᲡ ირდღას ბღებულენთ. ნამთინე საკითხ მანგარ ეფ გინაჭყვიდირალ რე, მაგალთო, მუ პჭკუმათ დღაშ დინახალე ვარდა მუჟამ დიბრულუათ. მარა ირო თეშმაეფას ვა რე საქმე. მინშა შილებე გამჭირდან გადაწყვეტილებაშ მეღებაქ თიცალ საკითხწკუმა დაკავშირებით, ნამუთ იმოქმედენს ჩქინ ცხოვრებაშა, ჯანმრთელობაშა, საჸოროფო ადამიანეფშა დო ღორონთიშ მსახურებაშა. მუჭოდგა ვა რდასინ, მოკონა, თიცალ გადაწყვეტილებეფ მიბღათ, მუთ ჯგირობუას მომღანა მუჭოთ ჩქი, თეშ ჩქინ ოჯახის, დო, მუთ არძაშ უმოს მთავარ რე, გურს გუხარენს იეჰოვას (რომ. 12:1, 2).
2. მუ მიგეხვარებუნა ჭკვერულ გადაწყვეტილებეფიშ მეღებას?
2 თე სტატიას გუვარჩიენთ სუმ მხარეს, ნამუთ ჭკვერულ გადაწყვეტილებეფიშ მეღებას მიგეხვარებუნა: 1) ქიგეგით არძა საჭირო ინფორმაცია, 2) გეგმირკვით, მუ დამოკიდებულება უღჷ იეჰოვას, დო 3) ჯგირო დეფიქრით ირფელშე. თეწკუმა ართო, თე სტატია ინონჭაფაშ უნარიშ გაუჯგუშებას ხოლო ქიმმეხვარებუნა (იგავ. 2:11).
ᲥᲘᲒᲔᲒᲘᲗ ᲐᲠᲫᲐ ᲡᲐᲭᲘᲠᲝ ᲘᲜᲤᲝᲠᲛᲐᲪᲘᲐ
3. ქიმიჸუნით მაგალით, მუშენ რე ჯგირ გადაწყვეტილებაშ მეღებაშახ არძა საჭირო ინფორმაციაშ გაგება.
3 ჭკვერულ გადაწყვეტილებაქ ქიმმაღებუანინ, პირველ რიგის, ოკო ქიგებგათ არძა საჭირო ინფორმაცია. მუშენ რე თეშ კეთება მნიშვნელოვან? წერმიდგინით თეცალ სიტუაცია: მიდგარენს ჯანმრთელობაშ სერიოზულ პრობლემა უღჷ დო ექიმშა მეურს. მუს ქიმინუნს ექიმ? მუთუნს ვა კითხენს დო გამოკვლევეფს ვა ჩუტარენსინ თეშ დუჭყანსო მკურნალობას? მუშო ოკო რაგად, ვარ. თეშნერო, თქვა ხოლო, პირველ რიგის არძა საჭირო ინფორმაციას ქიგეგენთ-და, უმოსო შეგალებენა ჭკვერულ გადაწყვეტილებაშ მეღება. მორთ ასე გუვარჩუათ, მუჭო შეილებუნა თეშ კეთება.
4. მუ მიგეხვარებუნა საჭირო ინფორმაციაშ მეღებას? (იგავ. 18:13; ქოძირით სურათ).
4 ხშირას საჭირო ინფორმაციაშ მეღებას კითხვეფიშ დოსუმალა მიგეხვარებუნა. მაგალთო, წერმიდგინით, ნამდა წვეულებაშა ქუდგაპატიჟეს. მუ მიგეხვარებუნა თიშ გინოჭყვიდუას ურთჷ დო ვარ თექ? თე წვეულებაშ დუდის პირადო ვეჩინენთ დო თექ მეულირს მუნერ სიტუაცია დორხვადუნან ვაიჩქუნან-და, ჯგირ იჸუაფ ქიგეგათ პასუხეფ თეცალ კითხვეფშე: მუჟამ დო სო იჸუაფ თე წვეულება? მუზმა კოჩ იჸი თექ? მი გაკონტროლენს სიტუაციას, ნამდა მუთუნ გლახაქ ვა მოხვადას? მი დო მი რე დაპატიჟებულ? მუშ კეთება რე დაგეგმილ? ოშუმალ ხოლო იჸუაფუნო? თე კითხვეფშე პასუხეფიშ გაგება ჭკვერულ გადაწყვეტილებაშ მეღებას მიგეხვარებუნა (წეკითხით იგავეფიშ 18:13).
ქუდასვით კითხვეფ დო ქიგეგით არძა საჭირო ინფორმაცია (ქოძირით აბზაც 4) a
5. მუ ოკო აკეთათ საჭირო ინფორმაციაშ მეღებაშ უკულ?
5 საჭირო ინფორმაციაშ მეღებაშ უკულ აუცილებერ რე, მთლიან სურათ ხოლო ქოძირათ. მაგალთო, მუს გაკეთენთ, მუჟამსით გეგენთ, ნამდა თი წვეულებას თიცალეფ ხოლო იჸუაფუნა, მით ვა ცხოვრენა იეჰოვაშ ნორმეფით, ვარდა მითინ ვა გაკონტროლენს, სტუმარეფ მუზმას შუნა? ხომ ვარწყეთ თიშ საფრთხეს, ნამდა თე წვეულებაქ „დუდეშქუმალირ დროშტარებაშა“ გინილას? (1 პეტ. 4:3). თი შემთხვევას მუს გინოჭყვიდუნთ, თე წვეულებაშ გურშენ კრება ვარდა მსახურება ქუგაჸინა გაჩილითაფარ-და? არძა საჭირო ინფორმაცია ქუგაღვენუნა დო მთლიან სურათის ქოძირუნთ-და, ვა გაიჭირდუნა სწორ გადაწყვეტილებაშ მეღება. მარა ხვალე თენა ვა რე დასაბაღ. მართალ რე, თქვა თქვან გინაჯინშე უკვე ორწყეთ მთლიან სურათის, მარა ოკო ვეგშგოსქიდან ართ მნიშვნელოვან მუდგარენქ: მუ დამოკიდებულება უღჷ იეჰოვას? (იგავ. 2:6).
ᲥᲘᲒᲔᲒᲘᲗ, ᲛᲣ ᲓᲐᲛᲝᲙᲘᲓᲔᲑᲣᲚᲔᲑᲐ ᲣᲦᲷ ᲘᲔᲰᲝᲕᲐᲡ
6. მუშენ ოკო ფთხუათ იეჰოვას მოხვარა? (იაკ. 1:5).
6 ქოთხით იეჰოვას, ქიმგეხვარან თიშ ძირაფას, მუს ფიქრენს კონკრეტულ საკითხიშ გურშენ. თინა მოპირუნა, ნამდა ქომუჩანა სიბრძნეს, ნამუთ ქიმმეხვარებუნა, ქინვანჭათ, ქიჸუაფუნ დო ვარ ჩქინ გადაწყვეტილება თიშო მოსაწონ. მუჭოთ ბიბლიაშე ბგებულენთ, იეჰოვა „არძაწკუმა გურხვე რე დო მითინს ვეგიორაგადანსინ“ თეშ არზენს სიბრძნეს (წეკითხით იაკობიშ 1:5).
7. მუჭო შემლებუნა გებგათ, მუს ფიქრენს იეჰოვა კონკრეტულ საკითხშენ? ქიმიჸუნით მაგალით.
7 თიშ უკულ, მუთ იეჰოვას ლოცვას მოხვარას ქოთხინთ, ჯგირო ქიდეკვირით, მუჭო მერჩანა თინა პასუხის. ქიმიპჸუნათ თეცალ მაგალით: წერმიდგინით, ნამდა სოდგაინ მოგზაურობაშა რეთჷ ულირ, მუდროსით შარას ეჩირთით დო ვაგგაგინეს, სო რეთჷ. ალბათ თექიან მახორუს ქოთხინდით, ქიმგეხვარესკო დო შარას ქიგგოწურუესკო. მარა, მუს ქიმინუნდით უკულ? რაგადიშ დოჭყაფას ვაცალენდითინ თეშ მიკირთუდით დო იშითო? ვარ, მუშო ოკო რაგად. ყურადღებათ ქუმურჩქილუანდით, სოვრე გოწურუანდეს. თეშნერო, მუჟამსით იეჰოვას სიბრძნეს ქოთხინთ, ქეცადით, ქოძირათ, მუჭო გარზენა ლოცვაშ პასუხის; დოგორით თიცალ ბიბლიურ კანონეფ დო პრინციპეფ, ნამუთ თქვან სიტუაციას მეურე. დუვართათ ჟიშე მოშინაფილ წვეულებაშ მაგალითის. ონდო ულაშ ამბეს გინოჭყვიდუნდათ, ჯგირ იჸუაფ, დოგორათ, მუს იჩიებ ბიბლია დუდეშქუმალირ დროშტარებაშ, გლახა საზოგადოებაწკუმა ურთიერთობაშ დო ღორონთიშ სამეფოშ პირველ ადგილს გერინაფაშ გურშენ (მათ. 6:33; რომ. 13:13; 1 კორ. 15:33).
8. მუშ კეთება შეილებუნა, თქვა გოსაჭირუნან ფერ ბიბლიურ პრინციპეფიშ ოგორალო მოხვარა ქუგოკონან-და? (ქოძირით სურათ).
8 მინშა თქვა გოსაჭირუნან ფერ ბიბლიურ კანონეფიშ დო პრინციპეფიშ ოგორალო შილებე მოხვარაქ დეგესაჭირან. თეცალ დროს შეილებუნა გამოცდილ თანაქრისტიანს ქელაკითხუათ რჩევა. მარა თქვანით ხოლო ანაყუ ინფორმაცია გაგორენა ჩქინ პუბლიკაციეფს. თეშო შეილებუნა გეგმირინუათ ორკვიებელ საშვალებეფ, მუნერით რე „იეჰოვაშ მოწმეეფიშ ორკვიებელ სახელმძღვანელო“ დო „ბიბლია მოგურუანა ქრისტიანულ ცხოვრებას“. ვა უღჷ მნიშვნელობა, თანაქრისტიანეფს მიხვარუანთ დოვარ თქვანით გორუნთ გოსაჭირნან ფერ ბიბლიურ პრინციპეფს, ვაგგოჭყორდან, მუ რე თქვან მიზან – მიღათ თიცალ გადაწყვეტილება, ნამუთ გურს გუხარენს იეჰოვას.
გეგმირკვით, მუ დამოკიდებულება უღჷ იეჰოვას (ქოძირით აბზაც 8) b
9. მუჭო შემლებუნა დებრწმუნათ, ნამდა ჩქინ გადაწყვეტილება იეჰოვაშო მოსაწონ იჸუაფ? (ეფეს. 5:17).
9 მუჭო შემლებუნა დებრწმუნათ, ნამდა ჩქინ გადაწყვეტილება იეჰოვაშო მოსაწონ იჸუაფ? თეშ გაგებელო მანგარ მნიშვნელოვან რე, ჯგირო იფჩინენდათ თის, მუშენდა, მუჭოთ ბიბლიაშე ბგებულენთ, „უწმინდესიშ გურშენ რჩქინა გონიერებას ირზენს“ (იგავ. 9:10). თაშ ნამდა, ნამდვილ გონიერებას მარზენა თიშ რჩქინა, მუნერ თვისებეფ უღჷ იეჰოვას, მუ რე თიშ განზრახვა დო მუ უჸორს დო მუ ჯოგჷ. ათეშენ, ქოკითხით თქვან დუდის: თი ირფელიშ უკულ, მუთ იეჰოვაშენ მიჩქჷ, ქუმარაგადენო, ნამდა მიწონუანს ჩქიმ გადაწყვეტილებას? (წეკითხით ეფესოელეფიშ 5:17).
10. მუშენ რე ოჯახურ ტრადიციეფშე დო ადგილობრივ კულტურაშე უმოს მნიშვნელოვან ბიბლიურ პრინციპეფიშ მეჸუნა?
10 მინშა იეჰოვაშ მოსაწონო მიფქცუათინ თიშენ შილებე თიცალ მუდგარენქ მაჸუან ოკეთებელქ, მუთ ჩქინ ოჯახიშ წევრეფს ვემეწონებუნა. მაგალთო, მშობლეფქ შილებე მუნეფიშ ძღაბშო ჯგირ ოკონან თიშენ, დანძალან თის, თიცალ კოჩის მიდაჸუნას ოსურო, მით სულიერო სუსტ რე, მარა ჯგირო უღჷ საშვალება დო მუთუნს ვემიარკენს მუჭოთ მუნეფიშ ძღაბის, თეშ მუნეფს ხოლო. მუშო ოკო რაგად, მშობლეფ თეს ჯგირ გურით ორთუნა დო ოკონა, მუნეფიშ ძღაბის მატერიალურო ვა გუჭირდას. მარა ქიმეხვარებუნო თეცალ ქომონჯ თის სულიერო წიმი ულას? მუს ფიქრენს იეჰოვა თე საკითხშენ? თეშ პასუხ არგამათ იძირე მათეშ 6:33-შე, სოდეთ ჭარჷ, ნამდა ქრისტიანეფქ პირველ ადგილს ღორონთიშ სამეფო ოკო გივორინუათ. მართალ რე, ჩქი დიდ პატის ფცენთჷ მშობლეფს დო თი საზოგადოებას, ნამდგას ფცხოვრენთ, მარა ჩქინო არძაშ უმოს მთავარ იეჰოვაშ გურიშ გახარება რე.
ᲘᲠᲤᲔᲚᲨᲔ ᲯᲒᲘᲠᲝ ᲓᲔᲤᲘᲥᲠᲘᲗ
11. მუჭოთ ფილიპელეფიშ 1:9, 10-შე იძირე, მუ მიგეხვარებუნა სწორ გადაწყვეტილებაშ მეღებას?
11 თიშ უკულ, მუთ ბიბლიურ პრინციპეფს დოგორუნთ, ჯგირო დეფიქრით, მუ დო მუ გადაწყვეტილებეფიშ მეღება შეილებუნა (წეკითხით ფილიპელეფიშ 1:9, 10). ინონჭაფაშ უნარ მიგეხვარებუნა, წინასწარ დეფიქრათ, მუ შედეგიქ შილებე მაჸუნას თქვან მეღებულ თითოულ გადაწყვეტილებას. ნამთინე საკითხიშ გინოჭყვიდუას ბრელ ამბე ვაკო დო უცფას გინგაჭყვიდირენა, მარა გვალო ირფელ ვა რე თეცალ ეფ გინაჭყვიდირალ. ინონჭაფაშ უნარ მიგეხვარებუნა, თიმწკუმა ხოლო ჭკვერულო მიქცუათ, მუჟამსით რთულ გადაწყვეტილებაშ წოხოლე გერეთ დო ბრელ მხარეშა გაფუნა ყურადღება მიოქციებელ.
12, 13. მუჭო მიგეხვარებუნა ინონჭაფაშ უნარ ჭკვერულ გადაწყვეტილებაშ მეღებას, მუჟამსით საქმე სამუშას ოხუ?
12 ქიმიპჸუნათ თეცალ მაგალით: სამუშას გორუნთ, ნამდა ჩილ დო სქუა გეიჯუმუათ, დო ჟირ ვარიანტიქ გემკორჩქინდჷ. ჟირხოლოშ გურშენ მუთ გოსაჭირუნან, ირფელს გებულენთ. მაგალთო, მუ გაჸინა ოკეთებელ, მუნერ გრაფიკ რე, მუსხი ხან დეგესაჭირებუნა შარას დო თაშ დო თაშ. თინა ხოლო გიჩქუნა, ნამდა ვართ ართის დო ვართ მაჟიას ვა გაჸინა თიცალ მუთუნ ოკეთებელ, მუთ ოწინააღმდეგ ბიბლიურ ნორმეფს. მარა შილებე თე ჟირ ვარიანტშე ართშა უმოსო მიგალედან გურ, მუშენდა თი საქმეშ კეთება გისხუნუნა, მუდგას თექ ითხინა, ვარდა თექიან ხელფას უმოსო მორწონა. მარა, ონდო საბოლა გადაწყვეტილებას მიღენდათ, შხვა მხარეეფშე ხოლო ოკო დეფიქრათ.
13 მაგალთო დეფიქრით: სამუშაშ გურშენ კრებაშ შეხვალამეფ ხომ ვა გაჸინა გაჩილითაფარ? თექ მუშობა ქიდიჭყით-და, ქუდგოსქიდუნანო დრო, ნამდა თქვან ოჯახიშ ემოციურ დო სულიერ საჭიროებეფს ქიმკაჯინათ? თე კითხვეფშე დაფიქრება მიგეხვარებუნა, პირველ ადგილშა ფარაშ შიბა ვარინ, თინა გეირდან, მუთ არძაშ უმოს მთავარ რე – იეჰოვაწკუმა ურთიერთობა დო თქვან ოჯახიშ ჯგირობუაშე ზრუნვა. თეს გაკეთენთ-და, მიგაღებენა თიცალ გადაწყვეტილება, ნამდგას იეჰოვა აკურთხენს.
14. მუჭო მიმეხვარებუნა ინონჭაფაშ უნარ დო ჸოროფა, ნამდა „ეკახაბარკალ ქუაქ“ ვეპჸუათ შხვეფშო?
14 ინონჭაფაშ უნარ თის ხოლო მიმეხვარებუნა, ნამდა დეფიფქრათ, მუჭო იმოქმედენს ჩქინ გადაწყვეტილებეფ შხვეფშა, მუშენდა „ეკახაბარკალ ქუა ვეწუდვათ“ თინეფს (ფილ. 1:10). თექ განსაკუთრებულო თიმწკუმა ოკო ვაგმოჭყორდან, მუჟამსით საქმე ოხუ ჩქინ გარეგნობას დო მიკოქუნას. მაგალთო, შილებე მიკაქუნალიშ ვარდა ვარცხნილობაშ ართ ნამდგაინ სტილ მოპწონდან, მარა თენა ჩქინ თანაქრისტიანს ვარდა კრებაშ გალე მიდგაინს ქაბრკოლენს-და, ინონჭაფაშ უნარ დო ჸოროფა მიმეხვარებუნა, პატი ქოფცათ თინეფიშ გრძნობეფს, გუვაკეთათ თინა, მუთ „შხვეფს მოუღანს ჯგირობუას“, დო ვოძირათ, ნამდა მოკრძალებურეფ ვორეთ (1 კორ. 10:23, 24, 32; 1 ტიმ. 2:9, 10). თეშ უკულ მიბღენთ თიცალ გადაწყვეტილებას, სოვრეშეთ შხვეფიშ ჸოროფა დო პატიცემა გემკორჩქინდუ.
15. მუშე ოკო დეფიქრათ მნიშვნელოვან გადაწყვეტილებაშ მეღებაშახ?
15 მუჟამსით სერიოზულ საკითხ გაფუნა გინაჭყვიდირალ, წინასწარ ჯგირო დეფიქრით, მუ გაჸინა ოკეთებელ თე გადაწყვეტილებაშ მეღებაშ უკულ; მუჭოთ იესოქ დუმოგურუეს, „გეგმოკოროცხით ხარჯეფ“, შხვანერო ქოფთქუათინ, ჯგირო დეფიქრით, მუსხი დრო დო ენერგია დეგესაჭირებუნა, ნამდა მეღებულ გადაწყვეტილებას ქიმიაჸუნათ (ლუკ. 14:28). ნამთინე შემთხვევას შეილებუნა ოჯახიშ წევრეფწკუმა ართო ქიმირაგადუათ, მუშ კეთება შეულებუნა თითოულს, ნამდა ხუჯ ქუდუკინან თქვან გადაწყვეტილებას დო მიგეხვარან მიზანიშ მენჭირნაფას. მუ ჯგირ შედეგეფ მაჸუნუ თაშ მოქციებას? თექ შილებე გოძირუან, ნამდა თქვან გადაწყვეტილებას მუდგარენეფიშ თირუა რე საჭირო ვარდა გვალო შხვანერო მოქციება უჯგჷ. თეწკუმა ართო, მუჟამსით ოჯახიშ წევრეფს რჩევას ქელაკითხანთ დო თინეფიშ აზრის გეთვალისწინენთ, უმოსო ქეცადებუნა, ირნერო ქელაიდირთან დო ქიმგეხვარან (იგავ. 15:22).
ᲛᲘᲦᲘᲗ ᲗᲘᲪᲐᲚ ᲒᲐᲓᲐᲬᲧᲕᲔᲢᲘᲚᲔᲑᲐ, ᲜᲐᲛᲣᲗ ᲯᲒᲘᲠ ᲨᲔᲓᲔᲒᲔᲤᲡ ᲛᲝᲘᲦᲐᲜᲐ
16. მუ ნაბიჯეფიშ გინოდგუმა მიგეხვარებუნა ჭკვერულ გადაწყვეტილებაშ მეღებას? (ქოძირით ჩარჩო „მუ მიგეხვარებუნა ჭკვერულ გადაწყვეტილებაშ მეღებას?“).
16 ჟიშე გარჩიებულ არძა ნაბიჯის ქიმიაჸუნით-და, მზათ ჸოფეთ ჭკვერულ გადაწყვეტილებაშ მიოღებელო. თქვა უკვე გიღუნა არძა საჭირო ინფორმაცია დო გიმორკვიებულ გაფუნა თი ბიბლიურ პრინციპეფ, ნამუთ იეჰოვაშ მოსაწონ გადაწყვეტილებაშ მეღებას მიგეხვარებუნა. ასე თიქ დუგოსქიდეს, ნამდა იეჰოვას ქოთხუათ, აკურთხას თქვან გადაწყვეტილება დო ქიმგეხვარან მიზანიშ მენჭირნაფას.
17. მუ რე არძაშ უმოს მთავარ ჭკვერულ გადაწყვეტილებეფიშ მიოღებელო?
17 შილებე ულირს ბრელშა გაფუდან მეღებულ თიცალ გადაწყვეტილებეფ, ნამდგაქ ჯგირ შედეგეფ მოიღეს. მარა ვაგგოჭყორდან, ჭკვერულ გადაწყვეტილებაშ მიოღებელო არძაშ უმოს მთავარ თქვან რჩქინა დო გამოცდილება ვარინ, იეჰოვაშ სიბრძნე რე. რშუდან, ხვალე ღორონთის შეულებ მერჩან ნამდვილ რჩქინა, გონიერება დო ინონჭაფაშ უნარ, მუთ აუცილებერ რე სიბრძნეშ მიოღებელო (იგავ. 2:1–5). რჯერდან, იეჰოვა მიგეხვარებუნა, მიღათ თიცალ გადაწყვეტილება, მუნერით გურს გუხარენს თის (ფსალმ. 23:2, 3).
ᲝᲑᲘᲠᲔᲨ 28 მი რე იეჰოვაშ მეგობარი?
