1. მუ ჯგირობუა მოუღ ჩქინდა გოშინაშ ონჯუაშა დასწრებას?

 ᲒᲘᲨᲐᲸᲘᲓᲘᲠᲐᲚ ნინათ ვეიჭარენ ფერ ძღვინ რე იეჰოვაშე (2 კორ. 9:15). იესოქ ჩქინო მუშ სიცოცხლე დათმუნ თიშ ჭყოლოფათ, საშვალებაქ ქუმმაჩეს, ვორდათ იეჰოვაშ მეგობრეფ დო მიღუდან ულიებ სიცოცხლე. მართალო, ქიანაშ მიზეზ მიღუნა, უმარდუდათ იეჰოვას გიშაჸიდირალშო, მუდგათ მუშ დიდ ჸოროფა ქუმოძირუეს (რომ. 5:8). იეჰოვაქ დო მუშ სქუაქ ჩქინო მუ აკეთესინ თიქ დღას ვაგმოჭყორდან დო გიშაჸიდირალქ ჩქინ თოლს ფას ვადინუასინ თიშენ, იესოქ მუშ ღურაშ გოშინაშ ონჯუა დარსხუ, ნამდგას ირ წანას აბღნიშნენთ (ლუკ. 22:19, 20).

 2. მუს გუვარჩიენთ თე სტატიას?

² თე წანას გოშინაშ ონჯუას აბღნიშნენთ საბატონს, 12 აპრილს. მუშო ოკო რაგად, არძას მოკონა, დევესწრათ თე მნიშვნელოვან ღონისძიებას. ჯგირ იჸუაფ, გოშინაშ ონჯუაშ პერიოდის ქიფიფქრათ a თი ირფელშე, მუთ იეჰოვაქ დო იესოქ ჩქინო აკეთეს. თე სტატიას გუვარჩიენთ, მუს მოგურუანა გიშაჸიდირალ იეჰოვაშ დო თიშ სქუაშ გურშენ. უკულიან სტატიას ჩიება მაღვენუნა, მუ ჯგირობუა მოუღ ჩქინდა გიშაჸიდირალს დო მუჭო შემლებუნა მარდულობა გიმიბრჩქინათ თიშ გურშენ.

ᲛᲣᲡ ᲛᲝᲒᲣᲠᲣᲐᲜᲐ ᲒᲘᲨᲐᲸᲘᲓᲘᲠᲐᲚ ᲘᲔᲰᲝᲕᲐᲨ ᲒᲣᲠᲨᲔᲜ?

 3. მუჭო ირსხჷ ართ კოჩიშ ღურაქ მთელ კაცობრიობა ცოდა დო ღურაშ მონობაშე? (ქოძირით სურათ).

³ გიშაჸიდირალშე იეჰოვაშ სამართლიანობა ირწყებე (კან. 32:4). მუშენ იფჩიებუთ თეს? მორთ, გვალო დუდშე ქიგიფშინათ ირფელ. ადამქ ვედემორჩილ ღორონთის, მუდგათ მუშ გამნარყის ცოდა დო ღურა ქუმუღ (რომ. 5:12). ცოდა დო ღურაშ მონობაშე დამირსხესკონ თიშენ, იეჰოვაქ მუშ ართკაკალ სქუაშ სიცოცხლე დათმჷ. მარა მუჭო ირსხენდჷ ართ სრულყოფილ კოჩიშ ღურა მილიონობით ადამიანს? თეშ პასუხის პავლე მოციქულ მარზენა.  თიქ ჭარჷ: „მუჭოთ ართ კოჩიშ [ადამიშ] უდუჯერებელობათ გინირთჷ ბრელქ ცოდამო, თეშ ართ კოჩიშ [იესოშ] დაჯერათ ბრელ იჸუაფ მართალო მერჩქინელ“ (რომ. 5:19; 1 ტიმ. 2:6). შხვა სიტყვეფით ქოფთქუათინ, ართ სრულყოფილ კოჩიშ დაუმორჩილებლობათ მეღებულ ცოდა დო ღურაშ მონობაშე დარსხებელო, საჭირო რდჷ კინ ართ სრულყოფილ კოჩიშ მორჩილება.

 4. მუშენ რდჷ საჭირო გიშაჸიდირალ, ნამდა ადამიშ არასრულყოფილ გამნარყის მარადიულ სიცოცხლეშ საშვალებაქ ქიმიაჩუკო?

⁴ აუცილებერ რდუო იესოშ ღურა, ნამდა გეფთავისფალითკო ცოდა დო ღურაშ მონობაშე? ვეშულებუდუო იეჰოვას, თეშ კეთებაშ უმშო ქიმეჩუკო მარადიულ ცხოვრებაშ საშვალება ადამიშ გამნარყშე თინეფს, მით მორჩილებას გეგმირჩქინანდეს? შილებე არასრულყოფილ ადამიანიშ გინაჯინშე თეშ იძირედას, ნამდა ღორონთის თენა გუკეთებუდკონ, ჭკვერულ იჸიდ, მარა იეჰოვაშ მხარეშე თეშ კეთება თის ნიშნენდუკონ იჸიდ, ნამდა ითამ ადამს დღას ვეშუცოდებ დო ვართ თიშ გამნარყ გინორთე ცოდამო. მუშო ოკო რაგად, თაშ მოქციება ღორონთიშ სრულყოფილ სამართლიანობას ვემურდუკონ იჸიდ.

 5. მუ მარწმუნენა, ნამდა იეჰოვა დღას ვემიქციებ უსამართლოთ?

⁵ ხოლო ართ მუდგარენშა დეფიფქრათ: მუ მოხვადუდ, იეჰოვა მუშ სამართლიან ნორმეფშე თოლს დოწკურუნდ დო ადამიშ არასრულყოფილ გამნარყის ულიებ სიცოცხლეშ საშვალებას გიშაჸიდირალიშ უმშო ქიმეჩანდ-და? ადამიანეფს ღორონთიშ ნდობა მეუდინუდეს დო იფიქრენდეს, ნამდა ღორონთიქ თენა ართშა გაკეთ-და, შხვა დროს ხოლო გეგნურთანდ მუშ დოდგინელ ნორმეფს. მაგალთო, შილებე თიშა ხოლო გემშეღესკო ეჭვ, შურო შეასრულენდ დო ვარ იეჰოვა მუშ დუნაპირებუეფს. მარა მუ ჯგირ რე, ნამდა თეშე ართ წუთით ხოლო ვა მაფუნა ონერვიანებელ, მუშენდა იეჰოვას ვეგნურთაფ მუშ სამართლიანობაშა. თენა ვაკეთუკონ თიშენ, მანგარ დიდ ფას გინიგ – მუშ საჸოროფო სქუაშ სიცოცხლე დათმჷ, მუთ მარწმუნენა, ნამდა თინა დღას ვემიქციებ უსამართლოთ.

 6. იეჰოვაშ ხოლო ნამ თვისება იძირე გიშაჸიდირალშე? (1 იოან. 4:9, 10).

⁶ გიშაჸიდირალშე, იეჰოვაშ სამართლიანობაწკუმა ართო, თიშ დიდ ჸოროფა ხოლო იძირე (იოან. 3:16; წეკითხით 1 იოანეშ 4:9, 10). იეჰოვაქ მუშ სქუაშ სიცოცხლე ჩქინო დათმუნ თენა ოძირანს, ნამდა ხვალე თინა ვაკო, ულიებ სიცოცხლე მიღუდანინ, თინა ხოლო ოკო, ნამდა ვორდათ თიშ ოჯახიშ წევრეფ. მუჟამსით ადამქ შეცოდ, იეჰოვაშ გურ მიოდინუ დო თიშ ოჯახიქ დატებელქ აჸუ. შედეგო, ადამიშ გამნარყშე ნამთინ ვა დაბაბდებეთ იეჰოვაშ ოჯახიშ წევრეფო. მარა, გიშაჸიდირალიშ ჭყოლოფათ, არძას, მით ღორონთიშ რწმენას გიმირჩქინანს დო ომორჩილ თის, იეჰოვა პატიენს ცოდეფს დო მალას თიშ პატის ხოლო ქიმეჩანს, ნამდა რდასჷ მუშ ოჯახიშ წევრ. მარა ამდღა ხოლო მერზიებუნა საშვალება, მიღუდან ხოლოშიან ურთიერთობა მუჭოთ იეჰოვაწკუმა, თეშ თიშ  თაყვანიშმცემელეფწკუმა ხოლო. თე ირფელშე არგამათ ვორწყეთ, მუჭო უჸორთ იეჰოვას (რომ. 5:10, 11).

 7. მუჭო ოძირანს იესოშ ტანჯებათ ღურა, ნამდა იეჰოვას მანგარო უჸორთ?

⁷ იეჰოვას მუჭო უჸორთინ თეს ხოლო უმოსო ქობძირუნთ, მუჟამსით დეფიფქრებუთ, ნამდა ჩქი გეგშამჸიდესკონ თიშენ, მუშ საჸოროფო სქუაშ ტანჯებაშა აჸუ ოჯინექ, მუთ მანგარ ნწარე იჸუაფუდ თიშო. სატანა ამტკიცენს, ნამდა ღორონთიშ მსახურეფ, სირთულეეფიშ დროს ვა დოსქიდუნა თიშ ართგურეფ დო ხეთეშე ქურთინუანა ოჭიშის. თინა ტყურას იჩიებუდუნ თიშ დამტკიცებელო, იეჰოვაქ იესოს ვეიოჩილითუ ტანჯება დო წამებულო ღურა (იობ. 2:1–5; 1 პეტ. 2:21). იეჰოვა ორწყედ, მუჭო გაძიცანდეს იესოს რელიგიურ წინამძღოლეფ, მუჭო ლახუნდეს ჯარიშკოჩეფ დო მუჭო მიკაჭკადეს ძელს. ბოლოს იეჰოვაქ თინა ხოლო ქიმიძირუ, მუჭო ეშალ შურქ მუშ საჸოროფო სქუას წამებულო (მათ. 27:28–31, 39). იეჰოვას სინამდვილეს უღუდ თიშ ძალა, ნამდა თე ირფელ ეიოჩილითუკო მუშ სქუას. მაგალთო, მუჟამსით იესოშ მოწინააღმდეგეეფ იჩიებუდეს, ღორონთ თის ქიწონუანს-და, იმწკუმა ასე ირსხასია, იეჰოვას მართალო შეულებუდ თეშ კეთება (მათ. 27:42, 43). მარა თეს გაკეთენდ-და, ჩქინო გიშაჸიდირალ ვეჸიდ გაფილ დო უიმენდოთ ქუდოფსქიდუდით. თაშ ნამდა, იეჰოვაქ სასწაულ მსხვერპლშა იდჷ – თიქ დაუშვჷ, მუშ სქუაქ სიცოცხლეშ ბოლო წუთეფშახ იტანჯუკო.

 8. მუ ამტკიცენს, ნამდა იეჰოვა ქიანაშმადიდა ჭუას გინაფლენდჷ, მუჟამსით მუშ სქუაშ ტანჯებას ორწყედ? გენწყით. (ქოძირით სურათ).

⁸ იეჰოვას ქიანაშმადიდა ძალა უღჷ დო ირფელიშშემალებე რენ თენა ვა ნიშნენს, ნამდა გრძნობეფ ვა უღჷ. ვაგმოჭყორდან, ჩქი ღორონთიშ ამნახანტო ვორეთ გოჭყაფილ – მიღუნა ემოციეფ დო გიმოფხანტუნთ შხვადოშხვანერ გრძნობეფს. თაშ ნამდა, გიშურს, გრძნობეფ იეჰოვას ხოლო ნოღვე. მაგალთო, ბიბლიას თიშ გურშენ ჭარჷ: „გურ ქელაჭუეს“ დო „ჭუას მიორინუანდეს“ (ფსალმ. 78:40, 41). წერმიდგინით, მუშმანწარა აჸიდ თის მუშ საჸოროფო სქუაშ ტანჯებაშ ძირაფა. თეს უჯგუშო ქინვანჭათინ, ქიგიფშინათ აბრაამ დო ისაკიშ შემთხვევა. მუჭოთ მიჩქუნა, იეჰოვაქ აბრაამს უწუ, მსხვერპლო შეწირუკო მუშ ართკაკალ სქუა (დაბ. 22:9–12; ებრ. 11:17–19). ჩქი ხვალე წარმოდგენა შემლებუნა, მუ ამბე ისოფუდუკონ იჸიდ აბრაამიშ გურს, მუჟამსით მუშ სქუაშა ხამუშ გიოშქუმალარო იმზადებუდ, დო მუშმადიდა ჭუას გინაფლენდუკონ იჸიდ თინა. ღორონთიშ ამნახანტო გოჭყაფილ აბრაამ თეცალ მდგომარეობას ქიჸიდ-და, წერმიდგინით, მუ დღას იჸუაფუდ იეჰოვა, მუჟამსით მუშ თოლო ქოძირ, მუჭო მიკაჭკადეს ძელს დო უდუნდებელო დოჸვილეს მუშ საჸოროფო სქუა (ვებსაიტის jw.org ქუჯინით ვიდეოს „მიაჸუნით თინეფიშ რწმენაშ მაგალითის – აბრაამ, ნაწილ II“).

 9. მუს ბგურაფლენთ რომაელეფიშ 8:32, 38, 39-შე იეჰოვაშ ჸოროფაშ გურშენ?

⁹ გიშაჸიდირალშე თის ხოლო ბგურაფლენთ, ნამდა მთელ ქიანას მითინს, ვართ ოჯახიშ წევრეფს დო ვართ ხოლოშიან მეგობრეფს, ვა უჸორთ თეშ, მუჭოთ იეჰოვას (წეკითხით რომაელეფიშ  8:32, 38, 39). ვართ ჩქი მიჸორა ჩქინ დუდ, ღორონთის უჸორთინ თეშ. თაშ ნამდა, დარწმუნებულ რდათჷ, მარადიულო იცხოვრათ დო ცოდეფქ გეპატუანინ თენა თქვა ქუგოკონან-და, იეჰოვას ბრელით უმოსო ოკო თექ ქუმოხვადასინ. თინა ჩქინდე ხვალე თის ითხინს, ნამდა მარდულობა გეგმიბრჩქინათ თი ირფელიშ მიმართ, მუთ ჩქინო აკეთ, დო ვორდათ თიშ მორჩილეფ. გიშაჸიდირალ თიშ არგამა მტკიცებულება რე, ნამდა იეჰოვას მანგარო უჸორთ. ახალ ქვეყნიერებას ხოლო უმოსის ქიგებგენთ ღორონთიშ ჸოროფაშ გურშენ (ეკლ. 3:11).

ᲛᲣᲡ ᲛᲝᲒᲣᲠᲣᲐᲜᲐ ᲒᲘᲨᲐᲸᲘᲓᲘᲠᲐᲚ ᲘᲔᲡᲝᲨ ᲒᲣᲠᲨᲔᲜ?

10. ა) არძაშ უმოსო მუ აწუხენდჷ იესოს? ბ) მუჭო დამტკიც იესოქ, ნამდა, მუდგას სატანა იეჰოვაშ გურშენ იჩიებუდ, ტყურა რდჷ? (ქოძირით ჩარჩო  „იესოქ მუშ მსხვერპლით დამტკიც, ნამდა იეჰოვა მართალ რე“).

¹⁰ იესოშო მანგარ მნიშვნელოვან რე, მუს ფიქრენს ხალხ მუამუშშე (იოან. 14:31). იესოშ გურშენ ხალხ იჩიებუდ, ღორონთის შეურაცხყოფას მიორინუანს დო ბუნტიშ ემატახალ რენია. თის მანგარო აწუხენდჷ, ნამდა მუამუშის სახელს უტახუნდჷ თი ირფელ, მუდგას მუს აბრალუაფუდეს, ათეშენ, ღორონთის თხუ: „მუმა, შეიოლებერ ქორენ-და, რთხინქჷ, ემოჩილითე თეცალ ღურა“ (მათ. 26:39). იესოქ ღურაშახ იეჰოვაშ ართგურქ ქუდოსქიდ, მუდგათ დამტკიც, ნამდა ირფელ, მუდგას სატანა ღორონთიშ გურშენ ოსიმუანდჷ, ტყურა რდჷ.

11. მუჭო ოძირუ იესოქ ადამიანეფიშ მიმართ ჸოროფა? (იოან. 13:1).

¹¹ გიშაჸიდირალშე იესოშ გურშენ თის ხოლო ბგურაფლენთ, ნამდა თის არძაართ ვა აფჷ ადამიანეფიშ მდგომარეობა, განსაკუთრებულო მუშ მიმაჸუნალეფიშ (იგავ. 8:31; წეკითხით იოანეშ 13:1). იესოს არჩქილედ, ნამდა დედამიწას მსახურებაშ დროს შხვადოშხვა სირთულეს ქეშეხვადუდ დო თინა ხოლო ჯგირო უჩქუდ, მუნერ ღურათ ღურუდ. მარა მიკოსურებულო ვართუდ თი საქმეს, მუდგაშ გურშენ იეჰოვაქ დედამიწაშა მაშქვჷ; თე ირფელს ხალხიშ ჸოროფა ოკეთებაფუანდჷ. თინა მთელ შურ დო გურს მიშადვანდჷ  ქადაგებაშ, შხვეფშა გურაფაშ დო მომსახურებაშ საქმეს. მაგალთო, ღურაშ წოხოლენ სერს, კუჩხეფ გუბონ მუშ მოწაფეეფს, გურშა ელუკინ თინეფს დო ბრელ მუდგარენ ქუდაგურუ (იოან. 13:12–15). ძელს მიკოჭკადუდ დო სასწაულ ჭუას ურზუდუნ თიმწკუმა ხოლო შხვეფიშ აზრ უღუდ. მაგალთო, მუშ ხასლას მიკოჭკადუდუნ თი უბადოშმაკეთებელს მომავალიშ იმენდ ქიმეჩ დო თიშე ხოლო იზრუნ, ნამდა დიამუშიქ უმინჯურო ვა დოსქიდუკო დო იოანეს უწუ, ქიმკაჯინუკო თის (ლუკ. 23:42, 43; იოან. 19:26, 27). თაშ ნამდა, იესოქ ადამიანეფიშ ჸოროფა ხვალე მუშ ღურათ ვარინ, თით ხოლო ოძირუ, ნამდა დედამიწას ცხოვრებაშ დროს, ირო შხვეფიშ აზრ უღუდ დო ჯგირო ოქცუდ თინეფს.

12. მუს ორთჷ იესო ჩქინო ამდღა ხოლო?

¹² მართალ რე, იესოქ „ართშა ღურჷ“ ჩქინო, მარა თეთ ვა უთებ ჩქინდა მოხვარა (რომ. 6:10). მუს ორთჷ ამდღა? თინა ჩქინ საჯგირობუოთ ირინუანს თი არძა საშვალებას, მუდგაქ გიშაჸიდირალიშ გაფაშ უკულ მიაჩ. მაგალთო, რე ჩქინ მეფე, მღვდელმთავარ დო კრებაშ დუდ (1 კორ. 15:25; ეფეს. 5:23; ებრ. 2:17). თინა ხელმძღვანელენს „ცხებულეფიშ“ დო „ანაყუ ხალხიშ“ აკოშაყარუაშ საქმეს, ნამდგაქ არმაგედონშახ ოკო გეთუას b (მათ. 25:32; მარ. 13:27). თეწკუმა ართო, თინა ართგურ დო გონიერ მონას ხოლო ოხვარ, ნამდა, თე ბოლო დღალეფს, სულიერ საზრდო ვამმარკან (მათ. 24:45). იესო ვართ ანთასწანიან მმართველობაშ დროს მიოტენს ჩქინდე ზრუნვას. დასურო ირაგადე, ნამდა თის ჩქინო დუდ აფჷ გინოდვალირ დო ძვირფას ძღვინ რე იეჰოვაშე!

ᲒᲐᲒᲠᲫᲔᲚᲘᲗ ᲣᲛᲝᲡᲘᲨ ᲒᲣᲠᲐᲤᲐ

13. მუჭო მიგეხვარებუნა ფიქრ, უმოსო ქოძირათ, მუსხით უჸორთ იეჰოვას დო იესოს?

¹³ მუჟამსით უმოსის ქიფიქრენთ თი ირფელშე, მუთ იეჰოვაქ დო იესოქ თქვანო აკეთეს, უჯგუშო ქოძირუნთ, მუჭო უჸორთ თინეფს. მაგალთო, თე წანას გოშინაშ ონჯუაშ პერიოდის, შეილებუნა გურგედვალირო წეკითხათ ართ ვარდა ჟირ სახარება. ვეცადათ, ბრელ დუდ ართათ წეკითხათ, თეშ მანგიორო, გითოჸუნელო იკითხით დო ქეცადით, ქოძირათ თი ახალ მხარეეფ, მუთ უმოსო ქოიჸოროფუანა იეჰოვას დო იესოს. თეს გეძინელ, ჯგირ იჸუაფ, შხვეფს ხოლო ქეჩუათ თი ირფელიშ გურშენ, მუთ გიმორკვიებაშ დროს გეგით.

14. მუჭო მოხვარუნა გიმორკვიება, ახალ მუდგარენეფ გებგათ გიშაჸიდირალშე დო შხვადოშხვა საკითხშე? (ფსალმ. 119:97; ქოძირით სურათ ხოლო).

¹⁴ შილებე წანეფ რე, მუთ ჭეშმარიტებას რეთჷ დო ბრელშა გაფუნა გიმორკვიებულ თიცალ საკითხეფ, მუნერით რე გიშაჸიდირალ დო ღორონთიშ ჸოროფა დო სამართლიანობა. ათეშენ ასე შილებე ფიქრენდათ, მიჩქუნ თიშე უმოს მუ  ოკო გებგენია. მარა, სინამდვილეს, ქოთ თე დო ქოთ შხვა საკითხეფიშ გურშენ ირო იჸუაფ თიცალ მუდგარენეფ, მუთ დიო ვაიჩქუნა დო ახალ იჸუაფ თქვანო. ათეშენ, წეკითხით დო გეგმირკვით ჩქინ პუბლიკაციეფ, სოდეთ ანაყუ ინფორმაცია რე შხვადოშხვა საკითხიშ გურშენ. ბიბლიაშ კითხირიშ დროს ნამდგაინ მონაკვეთის ჯგირო ვეგეგენთ-და, გეგმირკვით თინა. უკულ ქეცადით, მთელ დღაშ დინახალე იფიქრათ თიშე, მუთ იკითხით, დო თიშე ხოლო, მუთ კითხირებულშე დიგურეთ იეჰოვაშ, თიშ სქუაშ დო თინეფიშ ჸოროფაშ გურშენ (წეკითხით ფსალმუნეფიშ 119:97).

15. მუშენ ოკო ვემვოტუათ ბიბლიაშ გიმორკვიება?

¹⁵ ირ კითხირიშ დროს მუდგაინ ახალს ვა ძირუნთ-და, გურქ ვა გოიტირხან. შილებე ირაგადუას, ნამდა მუდგარენნერო მობგენთ თი კათას, მით ოქროს გორუნს. მინშა თინეფ საათეფს დო დღალეფს ხოლო მუშენა, ნამდა ოქროშ აკაბცხა ნოტეხის ვარა ქიმიოგორუან, მარა გურ ვეუოლუნა გორუაშა, მუშენდა თინეფშო ოქროშ გვალო ჭიჭე ნოტეხ ხოლო მანგარ ძვირფას რე. მუშო ოკო რაგად, ოქროშე ბრელით უმოს ძვირფას რე თი ბიბლიურ აზრეფ, ნამდგას გიმორკვიებაშ დროს მივოგორუანთ (ფსალმ. 119:127; იგავ. 8:10). თაშ ნამდა, მოთვინება გეგმირჩქინით დო მიაჸუნით ბიბლიაშ კითხირიშ გეგმას (ფსალმ. 1:2).

16. მუჭო შემლებუნა მივაჸუნათ იეჰოვაშ დო იესოშ მაგალითის?

¹⁶ გიმორკვიებაშ დროს დეფიქრით, მუჭო შეილებუნა ცხოვრებას გეგმირინუათ თი ირფელ, მუდგას კითხულენთ. მაგალთო, მიაჸუნით იეჰოვაშ სამართლიანობაშ მაგალითის დო ვეგმირჩქინათ გიშაკერძაფა. შეილებუნა თიშე ხოლო დეფიქრათ, მუნერ ჸოროფა უღუდ იესოს მუშ ზეციერ მუმაშ დო ადამიანეფიშ მიმართ დო თიცალო თქვა ხოლო ეცადათ, ირნერო გურ გუხარათ იეჰოვას დო ირიათო მზათ რდათჷ თანაქრისტიანეფიშ მახვარებელო. იესოშ მაგალითის თიმწკუმა ხოლო მიაჸუნუთ, მუჟამსით ხეშე ვა გუტენთ საშვალებას, შხვეფს იეჰოვაშ დიდებულ საქმეეფიშ გურშენ ქეჩუათ დო თინეფს ხოლო ქიმეხვარებუთ, გეგმირჩქინან რწმენა გიშაჸიდირალიშ მიმართ.

17. მუს გუვარჩიენთ უკულიან სტატიას?

¹⁷ მუთ უმოსის გებგენთ გიშაჸიდირალიშ გურშენ, თით უმოსო ქიმეჸოროფებუნა იეჰოვა დო თიშ სქუა. ჩქინ ჸოროფაშ ძირაფა თინეფს ხოლო უმოსო ქუჸოროფუანს ჩქინ დუდის (იოან. 14:21; იაკ. 4:8). თაშ ნამდა, მორთ, გეგმიბრინუათ იეჰოვაშე მოჩამილ ირნერ საშვალება, ნამდა ირიათო ახალ მუდგარენ ქიდიბგურუათ გიშაჸიდირალიშ გურშენ. უკულიან სტატიას უმოსის ქიგებგენთ თიშ გურშენ, მუ ჯგირობუა მოუღ ჩქინდა გიშაჸიდირალს დო თის ხოლო ქობძირუნთ, მუჭო შემლებუნა გეგმიბრჩქინათ მარდულობა ჸოროფათ კეთებულ იეჰოვაშ თე დიდებულ ძღვინშე.