ᲝᲒᲣᲠᲐᲤᲐᲚ ᲡᲢᲐᲢᲘᲐ 2
ᲝᲑᲘᲠᲔᲨ 132 ასე ჩქი ართ ვორეთ
ქომონჯეფ, პატიცემათ მექცით თქვან ოსურეფს
„ქომონჯეფ . . . [თქვან ოსურეფს] პატი ცითჷ“ (1 ᲞᲔᲢ. 3:7).
ᲛᲘᲖᲐᲜ
თე სტატიაშე ქობძირუნთ, მუჭო შეულებ ქომონჯის მუშ სიტყვეფით დო საქმეეფით ოძირუას, ნამდა პატის ცენსჷ ოსურს.
1. მუ რე ართ-ართ მიზეზ, მუდგაშ გურშენ იეჰოვაქ ქორწინებაშ ძღვინ მუჩეს?
ᲘᲔᲰᲝᲕᲐ „ბედნერ ღორონთ“ რე დო ოკო, ჩქი ხოლო ბედნერეფ ვორდათ (1 ტიმ. 1:11). ათეშენ, თიქ ბრელ მუდგარენ მუჩეს, ნამდა ხიოლით ეფშა ცხოვრება მიღუდან (იაკ. 1:17). თიშ ართ-ართ ძღვინ ქორწინება რე. მუჟამსით ქომოლკოჩ დო ოსურკოჩ იოჯახებ, თინეფ დვანა აღთქმას, ნამდა უჸორდან იჸი დო პატის ცენდან იჸი ართმაჟიას. ჟირხოლო ბედნერ იჸუაფ, მუჟამსით ართიან შქას ჸოროფას ვენაშქირიტანა (იგავ. 5:18).
2. მუ ხვადუ ამდღა ბრელ ოჯახის?
2 სანარღოთ, ამდღა ქვეყნიერებას ბრელ ჩილ დო ქომონჯ იჭყოლიდუანს ქორწინებაშ დღას დოდვალირ აღთქმას, ათეშენ თინეფ ვა რენა ბედნერეფ. „ჯანდაცვაშ მსოფლიო ორგანიზაციაშ“ ბოლო ანგარიშშე ირწყებე, ნამდა ბრელ ქომონჯ ფიზიკურ დოვარ სიტყვიერ შეურაცხყოფას, ვარდა ხოლო ემოციურ ჭუას მიორინუანს მუშ ოსურს. თეცალ ქომონჯ შილებე შხვეფიშ ოძირაფალო გვალო ჯგირო ოქცუდას ოსურს, მარა ჸუდეს უჩა დღაშა გეურდას. ბრელ ჩილ დო ქომონჯ შქას პრობლემეფს თინა ხოლო ორჩქინანს, ნამდა ქომონჯ პორნოგრაფიას უჯინე.
3. მუ შილებე რდასჷ თიშ მიზეზ, ნამდა ქომონჯ ოსურს გლახათ ოქცუ?
3 ქომონჯეფ მუნეფიშ ოსურეფს გლახათ ოქცუნან თეს შილებე ბრელ მიზეზ უღუდას. მაგალთო, ნამთინე ქომოლკოჩ, ბაღანობას, მუმაშე ორწყედ თეს დო თენა დიგურუ. ათეშენ ოსურს გლახათ მექცუენ თენა თეცალეფშო ნორმალურ რე. ბრელქ ხოლო თიცალ კულტურას ირდჷ, სოდეთ მიორჩქუნა, ნამდა კოჩ თიმწკუმა რექჷ, მუჟამსით ოსურს სქან ძალას ქაძირანქ, ნამდა უჩქუდას, მი რე ოჯახის უნჩაშ. ბრელშა ხოლო ვა უგურუაფუნა ემოციეფიშ კონტროლ, ათეშენ გურ მალენ, დუდ ვაჭოფე. ნამთინე ქომოლკოჩ პორნოგრაფიას უჯინე, მუდგაქ თიცალ აზროვნება გაუვითარ, ნამდა ოსურკათა ხვალე სექსუალურ სურვილეფიშ დაკმაყოფილებერო არსებენს. თეწკუმა ართო, კვლევეფ ოძირანს, ნამდა კოვიდ-19 პანდემიაშ უკულ, ოჯახურ ძალადობაშ ფაქტეფქ უმოსო მიძინ. მარა, მუშო ოკო რაგად, მიზეზ მუდგა ვა რდასინ, ქომონჯ ოსურს გლახათ ოქცუნ თეს მუთუნნერ გამართლება ვა უღჷ.
4. ნამ საკითხის ოკო რდანჷ ქრისტიან ქომონჯეფ ფრთხილას დო მუშენ?
4 ქრისტიან ქომონჯეფქ ირნერო ოკო ეცადან, ნამდა თინეფშა ხოლო ვემოქმედას ოსურკათაშ მიმართ არასწორ დამოკიდებულებაქ, ნამუთ ქვეყნიერებას რე. a მუშენ რე თენა მნიშვნელოვან? მუშენდა პიროვნებას მუდგარენ საკითხიშ მიმართ მუნერ დამოკიდებულება უღუნ თენა, თიშ მოქმედებეფს ხოლო ქიგიოდოხოდუ. ართშა პავლე მოციქულქ რომიშ კრებას, სოდეთ ცხებულ ქრისტიანეფ რდესჷ, თეცალ მუდგარენ მეჭარ: „მეტო ვემეჩათ თე ქიანას საშვალება, მუშ ფორმაშა ქუმოიჸუნან“ (რომ. 12:1, 2). ქრისტიანეფ, მიდგას პავლექ თე სიტყვეფ მეჭარ, გვალო ახალეფ ხოლო ვა რდესჷ რწმენას; ბრელ ძალამ ხანიშ ქრისტიან რდჷ. მარა, ნამთინეს დიო ხოლო ქვეყნიერებაშ აზროვნება აფუდ ასქილადირ დო ტრადიციეფშე ვა რდჷ ბოლოშა გიშულირ. ათეშენ ელუჩ პავლექ თინეფს, ირნერო ეცადესკო აზროვნებაშ დო საქციელიშ თირუას. თე რჩევა ამდღა ქრისტიან ქომონჯეფს ხოლო ოხუ, მუშენდა ირწყებე, ნამდა ნამთინეშა ქვეყნიერებაშ აზროვნება მოქმედენს დო მანგარ გლახათ ოქცუ მუშ ოსურს. b მუს თხულენს იეჰოვა, მუჭო ოკო ოქცუდას ქომონჯ ოსურს? პასუხ თე სტატიაშ მთავარ მუხლის რე.
5. მუჭოთ 1 პეტრეშ 3:7-შე იძირე, მუჭო ოკო ოქცუდას ქომონჯ ოსურს?
5 წეკითხით 1 პეტრეშ 3:7. იეჰოვა ქომონჯეფს ურაგად, ნამდა პატის ოკო ცენდან მუნეფიშ ოსურეფს, მუთ ნიშნენს, გემუანო დო ჸოროფათ ოქცუდან თინეფს. თე სტატიას გუვარჩიენთ, მუჭო შეულებ ქომონჯის ოძირას, ნამდა პატის ცენსჷ მუშ ოსურს. მარა, მორთ, დიო თიშე ქიფჩუათ, მუ იჸუაფუდ ოსურიშ უპატიცემულობა.
ᲕᲔᲛᲔᲥᲪᲣᲐᲗ ᲝᲡᲣᲠᲡ ᲣᲞᲐᲢᲘᲪᲔᲛᲣᲚᲝᲗ
6. მუჭო უჯინე იეჰოვა თი ქომოლკოჩის, ნამუთ მუშ ოსურს ფიზიკურ შეურაცხყოფას მიორინუანს? (კოლ. 3:19).
6 ფიზიკურ შეურაცხყოფა. იეჰოვას ჯოგჷ არძა მოძალადე (ფსალმ. 11:5). მარა განსაკუთრებულო ვა მაძირე, მუჟამსით ქომონჯ ფიზიკურ შეურაცხყოფას მიორინუანს ოსურს (მალ. 2:16; წეკითხით კოლოსელეფიშ 3:19). მუჭოთ თე სტატიაშ მთავარ მუხლშე, 1 პეტრეშ 3:7-შე იძირე, ქომონჯ მუშ ოსურს გლახათ ქაქცუნ-და, თინა ღორონთწკუმა ურთიერთობას გილმელუანს; შილებე იეჰოვაქ თიშ ლოცვეფ ხოლო ვემირჩქილუას.
7. ეფესოელეფიშ 4:31, 32-იშ თანახმას, მუნერ ჩიებას ოკო ეუჩილითუას ქომონჯიქ დუდ? (ქოძირით „განმარტება“).
7 სიტყვიერ შეურაცხყოფა. c ნამთინე ქომონჯ უღაჭალ დო სასწაულ სიტყვეფს ურაგად ოსურს, ვარინ იეჰოვას ჯოგჷ „გურიშმოულა, რისხუა, ღვარაფ დო ლანძღუა“ (წეკითხით ეფესოელეფიშ 4:31, 32). იეჰოვა ირფელს ირჩქილე დო თიშო თინა ხოლო რე მნიშვნელოვან, მუჭო ეჩიებ ქომონჯ მუშ ოსურს, ხვალე სახალხოთ ვარინ, თიმწკუმა ხოლო, მუჟამსით ხვალე რენა. ქომონჯ ოსურს ჸინჩას ქოურაგადუნ-და, ხვალე თიწკუმა ურთიერთობას ვარინ, იეჰოვაწკუმა მეგობრობას ხოლო გილმელუანს (იაკ. 1:26).
8. მუნერ დამოკიდებულება უღჷ იეჰოვას პორნოგრაფიაშენ დო მუშენ?
8 პორნოგრაფიაშ ჯინა. იეჰოვას ჯოგჷ პორნოგრაფია. თაშ ნამდა, ქომონჯ, ნამუთ უზნეობას უჯინე, გილმელუანს იეჰოვაწკუმა ურთიერთობას დო უპატიცემულოთ ოქცუ მუშ ოსურს. d იეჰოვა ქომონჯშე ითხინს, ნამდა მუშ ოსურიშ ართგურ რდასჷ. თეშო ხვალე თინა ვა რე დასაბაღ, ნამდა ვემრუშას; თიქ ფიქრეფით ხოლო ოკო ვა უღალატას ოსურს, მუშენდა, მუჭოთ იესოქ თქუ, კოჩიქ ნამუთ, „ოსურკოჩის უჯინე დო უზნეო სურვილეფ ურჩქინდუ, უკვე ქიმრუშ თიწკუმა მუშ გურს“ e (მათ. 5:28, 29).
9. მუშენ ჯოგჷ იეჰოვას, მუჟამსით ქომონჯ, სქესობრივ ურთიერთობაშ დროს, ამცირენს მუშ ოსურს?
9 დამცირება სქესობრივ ურთიერთობაშ დროს. ნამთინე ქომონჯ, სქესობრივ ურთიერთობაშ დროს, თიცალ მუდგაინიშ კეთებას ანძალს ოსურს, მუთ თის დუდის დამცირებულო ოგინაფუანს ვარდა მუდგაშ გურშენ სინდის შეაწუხენს. იეჰოვას ვაძირუაფ თეცალ ეგოისტურ დო უგურე საქციელ. თინა ქომონჯშე ითხინს, ნამდა უჸორდას მუშ ოსურ დო პატი ცასჷ თიშ გრძნობეფს (ეფეს. 5:28, 29). მუ ოკო აკეთას ქომონჯიქ, ასეშახ ქამცირენდჷ მუშ ოსურს, გლახათ ქაქცუდ ვარდა პორნოგრაფიას ქუჯინედ-და? მუჭო შეულებ თის, დითირას?
ᲛᲣ ᲛᲔᲮᲕᲐᲠᲔᲑ ᲥᲝᲛᲝᲜᲯᲘᲡ, ᲛᲘᲝᲢᲣᲐᲡ ᲝᲡᲣᲠᲨᲐ ᲣᲞᲐᲢᲘᲪᲔᲛᲣᲚᲝᲗ ᲛᲝᲥᲪᲘᲔᲑᲐ?
10. მუჭო მეხვარებ ქომონჯის იესოშ მაგალითიშ მეჸუნა?
10 იესოშ მაგალითშა დაკვირება მეხვარებ ქომონჯის, დითირას დო მიოტუას ოსურშა გლახათ მოქციება. მართალ რე, იესოს ოსურ ვა ჸუნდჷ, მარა თიშე ბრელ მუდგარენიშ გურაფა შეულებუნა ქომონჯეფს (ეფეს. 5:25). მორთ გუვარჩუათ, მუჭო ოქცუდ დო ეჩიებუდ იესო მოციქულეფს.
11. მუჭო ოქცუდ იესო მოციქულეფს?
11 იესო მოციქულეფს გემუანო დო პატიცემათ მეურდჷ. თინა დღას ვაქცუდ თინეფს ჸინჩას დო ვაუნჩაშუდ. მართალ რე, იესოს თინეფშე ბრელით უმოს დიდ ძალაუფლება უღუდ, მარა მუშ მდგომარეობას დღას ვერინუანდჷ თინეფიშ დამცირებელო ვარდა ოშქურნაფალო. თეშ მანგიორო, თანდაბლურო ომსახურუდ თინეფს (იოან. 13:12–17). ართშა იესოქ მუშ მოწაფეეფს უწუ: „ქიდიგურეთ ჩქიმდე, მუშენდა ლიბ ხასიათიშ დო თანდაბალ ვორექ, დო ჭყანა ქუმგაკათუნა“ (მათ. 11:28–30). მუჭოთ ვორწყეთ, იესო ლიბ ხასიათიშ რდჷ. პიროვნებას თეცალ ხასიათ უღუნ თენა ვა ნიშნენს, ნამდა სუსტ რე. ლიბ ხასიათ უღუნ ფერ პიროვნება ვადინუანს სიმშვიდეს დო აკონტროლენს ემოციეფს, მუჟამსით თიშ ეჸოთამას ოცადუნა. გვალო თეშ კეთებას ოკო ძალა, ქაკონ-და!
12. მუნერ ჩიება უჩქუდ იესოს?
12 იესოშ ჩიება ირო გურშა ეუქექუანდჷ დო ძალეფით ოფშანდჷ შხვეფს. თინა დღას ვა ურაგადუდ მოწაფეეფს გენჭირელო (ლუკ. 8:47, 48). მუჟამსით მოწინააღმდეგეეფ თიშ ეჸოთამას ოცადუდეს დო ლანძღუნდეს, „ლანძღუათ ვა პასუხენდჷ“ (1 პეტ. 2:21–23). მინშა იესო მიდგაინშა ჸინჩ პასუხიშ მეჩამაშა ისხუნუანდჷ, შურო ხონარ ვეკიღუკო (მათ. 27:12–14). მუ ჯგირ მაგალით დოუტუ თიქ ქრისტიან ქომონჯეფს!
13. მუჭოთ მათეშ 19:4–6-ის ჭარჷ, მუს ნიშნენს, ნამდა ქომონჯ „ქიმკაჭაბუ მუშ ოსურს“? (ქოძირით სურათ).
13 იესოქ ქომონჯეფიშ გურშენ თქუ, ნამდა მუნეფიშ ოსურეფიშ ართგურეფ ოკო რდანჷ. თე დროს თიქ გემეორ მუამუშიშ სიტყვეფ, ნამდა დაქორწინებაშ უკულ ქომონჯ „ქიმკაჭაბუ მუშ ოსურს“ (წეკითხით მათეშ 19:4–6). თაშ ნამდა, მუჟამსით ჩილ დო ქომონჯ იოჯახებ, თიცალ ხოლოშიან ურთიერთობა ოკო უღუდან, ითამ წებოთ რდანჷ ართმაჟიაშა მიკოჭაბაფილ; თინეფ ართიანშა მუთუნით ვეჩეთხინნე თეშ, ნამდა ჟირხოლოქ ვედეზიანას. ოსურ თეშმანწარას უჸორსინ ფერ ქომონჯ, მუთუნით ვა უჯინე პორნოგრაფიას. თინა ხეთეშე თოლს ჩაუთხინუანს თის, „მუთ ურგებელ რე“ (ფსალმ. 119:37). თეშნერო, თინა, თაშ ქოფთქუათინ, შეთანხმებას დვანსჷ მუშ თოლეფწკუმა, ნამდა მუშ ოსურიშ მეტ მითინს ვემკაჯინე შხვა თოლით (იობ. 31:1).
ოსურიშ ართგურ ქომონჯ თოლშა ვემიძირუანს პორნოგრაფიას (ქოძირით აბზაც 13) g
14. მუ ნაბიჯეფ ოკო გინოდგას ქომონჯიქ, ნამუთ შეურაცხყოფას მიორინუანს ოსურს, ნამდა დირთინუას ჯგირ ურთიერთობა თიწკუმა დო იეჰოვაწკუმა?
14 ქომონჯიქ, ნამუთ ფიზიკურო ვარდა სიტყვიერო შეურაცხყოფას მიორინუანს მუშ ოსურს, მუსხირენ ნაბიჯ ოკო გინოდგას, ნამდა იეჰოვაწკუმა დო მუშ ოსურწკუმა ჯგირ ურთიერთობა დირთინუას. პირველ, თიქ ოკო ქუგოხვადას, ნამდა, მუდგას ორთუნ, მანგარ არასწორ რე დო მუშ საქციელ იეჰოვაშ თოლს მუთუნით ვეფულუ (ფსალმ. 44:21; ეკლ. 12:14; ებრ. 4:13). მაჟია, ოკო დითირას დო მიოტუას მუშ ოსურშა შეურაცხყოფაშ მერინაფა (იგავ. 28:13). მასმა, თიქ ბოდიშ ოკო ქოუწუას მუშ ოსურს დო იეჰოვას დო ქოთხუას თინეფს პატიება (საქ. 3:19). თეწკუმა ართო, ღორონთის ლოცვას თინა ხოლო ოკო ქოთხუას, ქიმეჩას ქოთ სურვილ დო ქოთ ძალა, ნამდა გაკონტროლას მუშ აზრეფ, ჩიება დო საქციელ (ფსალმ. 51:10–12; 2 კორ. 10:5; ფილ. 2:13). მანთხა, უკულ თიქ ოკო ქიმოქმედას მუშ ლოცვეფიშ თანახმას, მუთ ნიშნენს, გიჯოგუას არძანერ ძალადობა დო შეურაცხყოფაშ მერინაფა შხვაშა (ფსალმ. 97:10). მახუთა, მუთ შილებენ მალას ოკო ქოთხუას მოხვარა უხუცესეფს (იაკ. 5:14–16). მაამშვა, კონკრეტულო ოკო დაგეგმას, მუ მეხვარებ, ნამდა ანწ დღას ვეგემეორას თი ირფელ, მუდგას აიშახ ორთუდ. თი ქომონჯეფქ ხოლო, მით პორნოგრაფიას უჯინენა, ზუსტას თე ნაბიჯეფ ოკო გინოდგან; მუნეფ ქიმინდომენან-და, იეჰოვა აუცილებერო ქიმეხვარებ თინეფს, დითირან (ფსალმ. 37:5). მარა ხვალე უპატიცემულოთ მოქციებაშ მეტება ვა რე დასაბაღ, ქომონჯიქ თინა ხოლო ოკო ქიდიგურუას, მუჭო ოკო ცასჷ პატი მუშ ოსურს.
ᲛᲣᲭᲝ ᲝᲙᲝ ᲝᲫᲘᲠᲣᲐᲡ ᲥᲝᲛᲝᲜᲯᲘᲥ, ᲜᲐᲛᲓᲐ ᲞᲐᲢᲘᲡ ᲪᲔᲜᲡᲷ ᲝᲡᲣᲠᲡ?
15. მუჭო შეულებ ქომონჯის ჸოროფაშ გიმოხანტუა?
15 გეგმოხანტით ჸოროფა. ბრელ ჯიმა, მიდგას ბედნერ ოჯახ უღჷ, ოცად, ირდღას გაკეთას მუდგაინ თიცალ, მუდგათ ჸოროფას ქაგინაფუანს მუშ ოსურს (1 იოან. 3:18). ჸოროფაშ გიმახანტალო მინშა შილებე ჭიჭე მუდგარენეფ ხოლო დასაბაღ რდასჷ, მაგალთო, ხემოთხუმილო გილულა ვარდა ხუტოლ. დღაშ დინახალე ართო ვა რენან-და, ნამთინე ქომონჯ მუშ ოსურს მეჭარუნს: „ქიმმენატრ“ ვარდა „მუჭო რექჷ, მუ ამბე გიღჷ?“. მინშა ქომონჯ ჸოროფას თით გიმოხანტუნს, ნამდა ყვავილეფს ვარდა ჭიჭე საჩუქარს აჩუქენს მუშ ოსურს. თეცალ მუდგარენეფით ქომონჯ ხოლო უმოსო ამანგარენს ქორწინებას დო ოგინაფუანს მეუღლეს, ნამდა პატის ცენსჷ თის.
16. მუშენ ოკო ოცქუას ქომონჯიქ მუშ ოსურს?
16 ქაგინაფეთ, ნამდა ძვირფას რე თქვანო. ოსურს პატის ცენსინ ფერ ქომონჯ, ოცქვანს თის დო ოცად, დუდ დაფასებულო ოგინაფუას. მაგალთო, თის დღას ვაჭყორდუ მადლობა ქოუწუას ოსურს თი ირფელშო, მუდგას მუშო ორთჷ (კოლ. 3:15). ოსურს გურს უტიბუანს ქომონჯშე ოცქვაფურ სიტყვეფიშ მორჩქილაფა. შედეგო, თინა დუდის თხილერო გინაფლენს დო ორწყე, მუჭო უჸორს დო პატის ცენსჷ მუშ ქომონჯ (იგავ. 31:28).
17. მუთ ოძირანს ქომონჯ, ნამდა ღირსეულო ოქცუ ოსურს?
17 ღირსეულო მექცით. ოსურ უჸორსინ ფერ ქომონჯშო, მუშ მეუღლე მანგარ ძვირფას რე დო აფასენს თის, მუშენდა თის უჯინე, მუჭოთ იეჰოვაშ საჩუქარს (იგავ. 18:22; 31:10). ათეშენ, თინა სქესობრივ ურთიერთობაშ დროს ხოლო პატიცემათ ოქცუ მუშ ოსურს. თინა თე დროს, მუთუნ თიცალიშ კეთებას ვა დანძალს მეუღლეს, მუთ თიშო უსიამოვნო დო დუმამცირებელ იჸუაფ ვარდა სინდისის შეუწუხენს. f მუშო ოკო რაგად, ქომონჯიქ ხოლო ირნერო ოკო ეცადას, ნამდა სუფთა სინდის უღუდას იეჰოვაშ წოხოლე (საქ. 24:16).
18. მუ ოკო აფუდან ქომონჯეფს გინოჭყვიდილ? (ქოძირით ჩარჩო „ოთხ საშვალება, მუდგათ შეილებუნა პატიცემა გეგმირჩქინათ თქვან ოსურიშ მიმართ“).
18 რჯერდან, იეჰოვა მანგარო აფასენს, მუჟამსით ორწყე, მუჭო ოცადუთ, ირნერო გეგმირჩქინათ პატიცემა თქვან ოსურიშ მიმართ. ათეშენ, ვემექცუათ მეუღლეს უპატიცემულოთ; მექცით ღირსეულო, ქაგინაფეთ ჸოროფა დო დაფასით. თაშ ნამდა, პატი ცითჷ თქვან მეუღლეს, მუდგათ ხეს შეუნწყუნთ ცხოვრებას არძას უმოს მნიშვნელოვან პიროვნებაწკუმა, იეჰოვაწკუმა, ჯგირ ურთიერთობას (ფსალმ. 25:14).
ᲝᲑᲘᲠᲔᲨ 131 ოჯახ — იეჰოვაშ საჩუქარი
a ჯგირ იჸუაფ, ქომონჯეფქ წეკითხან 2024 წანაშ იანარიშ „გინაჯინალ კოშკის“ მოჩამილ სტატია „ქოიღუნანო ოსურკათაშ მიმართ იეჰოვაცალ დამოკიდებულება?“.
b ოჯახურ ძალადობაშ მსხვერპლ ქორეთ-და, ქიმგეხვარებუნა სტატია „რჩევეფ თინეფშო, მით ოჯახურ ძალადობაშ მსხვერპლ რენა“, ნამუთ მოჩამილ რე ვებსაიტის jw.org. დო JW ბიბლიოთეკას სტატიეფიშ სერიას „შხვადოშხვა“ [ქორთ.].
c ᲒᲐᲜᲛᲐᲠᲢᲔᲑᲐ: „სიტყვიერ შეურაცხყოფაშა“ მიშურს დუმამცირებელ სახელეფიშ დოძახინ, გოძიცა, ირიათო კრიტიკა დო თიცალ ჩიება ხოლო, ნამუთ ადამიანს ღირსებაშ გრძნობას უდინუანს. თაშ ნამდა, ირფელ, მუდგას ქომონჯ ოსურს გურიშ ელაჭუაფალო დო დამცირებელო ურაგად, სიტყვიერ შეურაცხყოფა რე.
d ვებსაიტის jw.org ვარდა JW ბიბლიოთეკას ქოძირით სტატია „პორნოგრაფია ოცილ ქორწინებას“ [ქორთ.].
e ოსურს, ნამდგაშ ქომონჯ პორნოგრაფიას უჯინე, ქიმეხვარებ 2023 წანაშ არგუსოშ „გინაჯინალ კოშკის“ მოჩამილ სტატია მუშ კეთება შეილებუნა თქვან ქომონჯ პორნოგრაფიას ქუჯინენ-და?“„.
f ბიბლიას სოთინ ვა ჭარჷ, მუ შილებე დო მუ ვეშილებე ჩილ დო ქომონჯ შქას სქესობრივ ურთიერთობაშ დროს. არძა ჩილ დო ქომონჯიქ თენა მუშით ოკო გინოჭყვიდას, ოღონც თეშ, ნამდა თინეფიშ გადაწყვეტილება განადიდენდას იეჰოვას დო გათვალისწინებურ რდასჷ ჟირხოლოშ გრძნობეფ დო სინდის. მუჭოთ წესინ, ჩილ დო ქომონჯიქ შხვეფწკუმა ოკო ვეჩუას მუნეფიშ ინტიმურ ურთიერთობაშ გურშენ.
g ᲡᲣᲠᲐᲗᲘᲨ ᲔᲭᲐᲠᲣᲐ: ჩქინ ართ ჯიმას, სამუშას, თანამშრომელეფ პორნოგრაფიულ ჟურნალიშ გაჯინშა უძახუნა.
